احفاد الشيطان للكاتبة زهور جمال الدين

#احفاد_الشيطان

?بقلم الكاتبه زهور جمال الدين ?

?الحلقه الثانيه عشر?

–
فى حوش ابراهيم

روقيه بعتت الرسايل لى ايوب ….و لبست وشاحها وطلعت ..

بعد ماستادن عمك الصادق بوها ..

مشت جيهه المربوعه …

-طلعت مرام من دارها والتليفون ايشرين فى يدها /روقيه تليفونك شرين .. وسكت .. وزاد شرين مرة ثانيه

خداته روقيه لقاته رقم ايوب ….فتحت الخط وردت

-روقيه / الوو
-ايوب / تعرفى تطلعى ولا يشوفك ليلتك سودة … اعطينى ربع ساعه بس
-روقيه منه فرحانه بغيرته ومنه انشغلت / ربع ساعه متع شنو فهمنى

وسكر الخط توووت توووت

-ابراهيم اينادى / روقيه …ياروقيه

-وقفت فم الباب / نعم يا بوى
-ابراهيم / طلعتى

-روقيه / خلى ندير قهوة قبل
-الصادق / بالشويا عليك بنتى

وخشت روقيه للمطبخ وتخمم فى العشرة دقايق هادو شنهما

_____________________________________

–
زكريا راكب سيارته وماشى جهه حوش عمك ميلاد

ويخمم / حسن اكيدة بيقولى موعدنا غدوة علاش جاى اليوم
ويفكر/ نقوله غدوة عندى مشوار خارج طرابلس وخلاص

وفى خاطره يدعى / يااااربى تفتح هيا ….ياااارب

وصل قدام الحوش شرين …ولاويته عمتك امنه لابسه المصليه وتسيق فى الجنان فتحتله الباب

زكريا فى خاطره / يا والله نهار مبروك

مد يده / اهلا عمتى امنه شنحالك

-امنه / الحمدلله اوليدى ..زكريا انت ماهو
-زكريا / ايه زكريا صاحب ايوب …غير نبى حسن شوياا

-امنه / حسن راقد .. خش المربوعه تو انوضهولك
-زكريا / لا عادى مدامه راقد خليه يستريح ..وتو نجيه وقت ثانى

-امنه / لا لا خلاص اصلا عصرونيه ..خلى انوضه خير

” فى بعض من الليبيين ايقولو عصرونيه حبيت نكتبها?”

-زكريا / باهى براحتك

-امنه / خش اهو من هنايا الباب …

وشافت كلب جيرانهم حاشاكم واقف قدام حوشهم

-امنه / كِس ..كِس يعطك كنسه

-زكريا يضحك / الكلب يقولوله كَس يا عمتى امنه …

وشد عصاة / الكلب يحدفوه بعصا وانشالله الحال ايلاقى

وخدى العصا وحدفها عالكلب / تى برة يا امسخ

وهرب الكلب

خش زكريا للمربوعه الخارجيه …وخشت امنه للحوش اتنوض فى ولدها حسن

بعد خمسه دقايق …

فتحت ايناس باب القراج وخشت …

ويجى الكلب يجرى وراها يبي ايخش

من خوفها طلعت تجرى وخشت باب المربوعه لقاته اول باب من قداها

______________________________________

–
فى حوش ابراهيم

روقيه ادير فى القهوة فى المطبخ …

واثقل فى يدها بيش اتعطل…

وفى الدار متع بوها…

-الصادق / وين رقيه يا حاج
-ابراهيم/ قالت ادير فى قهوة

-الصادق / ولد خوى مستعجل …ومن توة نقولك يا ابراهيم اللى بتطلبوه يحضر
-ابراهيم / احنا مانبو غير الهنى

-الصادق/ ولد اوصول يا ابراهيم .. وانا الحق جيت انا وياه بس خفت روقيه ترفض زى مارفضت اللى جوها زمان
…وانت عارف النساوين كان جبناهم معانت مايسكتوش واللى ايصير ايعاودوه
-ابراهيم / انشاءالله مايصير الا الخير يا صادق

خشت مرام لدار بوها شادة صفرة قهوة / بوى .. قالتلك روقيه اعطيه القهوة يشربها وتو نخش بعدها
-الصادق / باهى براحتها هاتى

خدى الصادق الصفرة متع القهوة وخش بيها للمربوعه ..
عطاها للضيف وطلع رجع قعمز جنب ابراهيم

بعد ربع ساعه ….

باب الحوش ايطقطق…..

-ابراهيم/ مرام افتحى الباب
-الصادق / من جايكم توة

-ابراهيم / بالك وحدة من البناويت

-مرام / هيا بوى اهو بنفتح

مشت مرام فتحت الباب لقت عزوز واقفه قدامها

-مرام / ايوووة
-الحاجه / هدا حوش رقيه

-مرام مستغربه / ايه حوش روقيه
-مدت يدها / باهى شدينى العتبه عاليه

مدت مرام يدها وعدت العزوز العتبه مع انها نوعا ما خافت منها … وخشت من الممر
وفاتت من قدام المربوعه

فاتت الحاجه للصاله .. وقعمزت عالصالون

-الحاجه / وين كبيركم
-مرام / كيف مافهمتكش

-الحاجه / امك متوفيه ولا .. وين بوك

-مرام / شويه بس انسكر الباب
-الحاجه/ لا شن تسكرى الباب

وتنادى / ايوب وليدى تعالة وينك خش للمربوعه
وتلفتت لى مرام / ترا دخلينى قدا بوك

روقيه سمعت اسم ايوب طلعت تجرى من المطبخ

______________________________________

–
فى حوش كنزى

امها دارت شربه خضار … وحطتها فى سفرة

وركبت من الدروج مشت لى دار كنزى

-حياة فتحت الستار وضوت الدار / كنزى …بنتى نوضى خيرك
-كنزى عيونها منفخات من البكى/ بنرقد يا ماما خيرك

-حياة/ غير كان نعرف بس خيرك صايرلك هكى
-كنزى/ مش قلتلك ام صاحبتى توفت…وصاحبتى وجعتنى هلبا

-حياة / الله يرحمها ويغفرلها.. لكن خيرك ماقلتيليش ارفعينى ليها
-كنزى حشت راسها فى المخدة / هيا تسكن خارج ليبيا .. متعرفه عليها من الفيس

-حياة / باهى ما علينا ..نوضى كولى الشربه طيبتها على خاطرك
-كنزى تبكى / قلتلك مانبيش يا ماما …مانبيش

قربت منها امها وحطت يدها على شعرها / يابنيتى خيرك بس هكى صاير فيك

كنزى عيونها مقلوبات / بندوخ يا ماما

-حياة تعيط / حيه عليا بنتى … يا عبدالرحمن تعالة

وقاموها رفعوها للعيادة طول

____________________________________

–
خشت ايناس للمربوعه الخاريجيه تجرى.. حدفت شنطتها وكتاباتها اللى فى يدها .. وسكرت الباب

انخلع زكريا جاها يجرى / خيرك

تلفتتله وانخلعت/ انت شكون

-زكريا / انا زكريا صاحب حسن وايوب ..غير حولى بس

فتح الباب وطلع بسرعه …خدى عصا وبدى يحدف فى الملب لين طلع

طلعت امها وحسن يجرو لما سمعو صوت عياطها

حسن جاته اقواز لما لقى اخته ايناس لابدة وزكريا ايدافع عليها

عيونه حمر واشر براسه لباب الحوش / خشى
-ايناس خافت / باهى

وخشت تمشى بسرعه …لما جت جنب حسن …
شبحلها بى غل / نهارك احرف بعدين

خشت ايناس للباب .. ومشى حسن سلم على زكريا
-حسن / اهلا زكريا …سامحنا خلعناك

-زكريا يضحك / لا لا حصل خير
-حسن / خش للمربوعه اهو جايك غير نغسل وجهى بس وانجيك

-زكريا / خود راحتك يا حسونه

مشى حسن جهه الباب .. وتلفت لى زكريا

-حسن / نحساب موعدنا غدوة ولا
-زكريا / هوا الموعد غدوة …لكن انا عندى مندير واحتمال نطلع من طرابلس فقلت انجيك اليوم

-حسن / مرحبتين بيك فى اى وقت ..هى شوى ونجى

وخش للمربوعه …لقى شنطه ايناس طايحه عالارض وكتاباتها …

فكر يفتح الشنطه اكيدة فيها تليفونها .. يفتحه وياخد الرقن
لكن اولها تحشم .. والثانيه قال اكيدة دايرتله رقم سرى

قامهم وحطهم عالكنبه …لقى واحد من الكتابات فى وسطه بيرو …خطر عليه خاطر

فتح اخر صفحة مخربشه بالبيرو … وكتب فيها رقمه وجنبه اسمه وكاتب تحته اتصلى

وحط الكتاب عالكنبه …

وهيا لداخل خدت تكشيختين مليحات من خوها حسن
وطلب منها قهوة ليه ولصاحبه

خشت ادير فى القهوة وتضحك وتدكر كيف خشت تجرى وسكرت الباب عليها هيا وايوب بس

وكيف فتحه هوا بسرعه وطلع

______________________________________

–
فى حوش ابراهيم

روقيه سمعت اسم ايوب طلعت تجرى ..وقفت فى الممر اللى يرفع للصاله تبى تتاكد

وعمتك سالمه خشت لى دار ابراهيم لابسه قفطان وفوقه جرد العزايز اللى يلبسو فيه زمان

-سالمه/ خير عليكم
-الصادق وابراهيم / وعليكم السلام

-ابراهيم / تفضلى يا حاجه

خشت سالمه قعمزت اتعاون فيها مرام ….

-سالمه / قبل كل كلمه واى شى ..رانى جايتكم نخطب فى رقيه
-الصادق / تى كيف يا حاجه

-سالمه / وانت منهوا بلا مواخدة
-الصادق / انا جارهم وسابقك جاى نخطب فى رقيه لولد خوى

-سالمه / توة عاد انت سابقنا ..احنا سابقينك ..البنت ماواخدها الا اللى كاتبهولها ربي ونصيبها معاه
-الصادق / معروفه والنعم بالله

-ابراهيم / انتو شكون….. وشن اتكون
-سالمه / نحكيلك على اصلنا وفصلنا … وبعدها نادى البنيه واسألها من تبى وعلى منو بتوافق

……………………………………………………..

انفتح باب الحوش خش منه ايوب

-ايوب / السلام عليكم

روقيه زبطت صوته …وبدى قلبها ايطق

خش ايوب للمربوعه

-ايوب / السلام عليكم
-عبدالمجيد العريس/ وعليكم السلام

-ايوب / تفضل خوى عندك حاجه هنايا
-عبدالمجيد / انت شكون

-ايوب / انا خطيب بنتهم روقيه …انت اللى شكون
-عبدالمجيد وقف/ نعمممم… البنت مخطوبه

-ايوب / ايه مخطوبه.. اللى زلبحوك وجابوك تخطب ماقالولكش البنت مخطوبه
-عبدالمجيد اينادى / عمى الصادق ..عمى الصادق

-ايوب قرب منه / تى صكر فمك ..الحوش ليه حرمه .

جى الصادق للمربوعه / خيرك يا مجيد

-عبدالمجيد / منو العزوز اللى خشت لداخل

وتلفت لى ايوب / انتو اشكون

-ايوب / قلتلك انا واخد روقيه من زمان حياة امها …غير هما نسونى ..ولا صارلهم تلخبيط وقاعدين يستقبلو فى ناس ثانيه

-الصادق / عمرنا ما سمعنا بى روقيه معطيه لحد
-ايوب / هاكم سمعتو…

-الصادق / شن بقولك عاد .. خلى نفهم من ابراهيم بعتالى ساهل

وتلفت لى ولد خوه / اصبر شوى ونجيك

وطلع الصادق مشى لدار ابراهيم وخلى ايوب ومجيد مقعمزين فى المربوعه

______________________________________

–
فى العيادة

ام كنزى وبوها مقعمزين قدام الغرفه اللى فيها كنزى ومعاها الدكتور

طلع الدكتور مشوله يجرو

-الدكتور / البنت محصلة صدمه .. كأنها مصدومه فى حد …او متعاركين قدامها عركه قويه فى الحوش ادت الى صدمه

-عبدالرحمن / مستحيل يا دكتور .. احنا الحوش هادى وماعندناش مشاكل
-حياة / اصلا كنزى من نوع رقيقه ..وماعندهاش مشاكل مع اى حد من صاحباتها

-الدكتور / هيا مخطوبه …او عندها علاقه بي حد
-عبدالرحمن تعصب/ بنتى صغيرة وماتعرفاش الكلام هدا كله

-الدكتور/ 18 سنه مش صغيرة ..عموما انا عطيتها علاج منوم … بعد ساعتين تفيق وتقدرو تحكو معاها تعرفو مشكلتها او سبب صدمتها شنهوا

-حياة تبكى/ نقدرو انروحو بيها يا دكتور
-الدكتور / انا نعطى فيها فى علاج مهدئ.. الافضل تقعد عندنا يومين … وبعدها تروحو بيها

-عبدالرحمن قعمز عالكرسى / اى شى فى مصلحتها انديروه يا دكتور…خلاص خلى تقعد

__________________________________

–

فى حوش ابراهيم

-الصادق / هدا غلط يا حاجه..مفروض لما لقيتينى قدامك سكتى
-سالمه / نسكت ونخليك تاخد كنتى ..مرت اللى نبى ناخدها لى ولد ولدى

-ابراهيم / غير بالشوى يا جماعه .. انا ايلوم عليا حد منكم .. انادى بنتى …وهيا وخلوقها …مرات حتى ترفضهم الزوز
-سالمه / خلاص ناديها امالا ونشوفو

ونادى ابراهيم مرام / نادى اختك

خشت مرام / روقيه يبيك بوى

وجت روقيه متحشمه لى دار بوها

-سالمه / اهلا ببنيتى ..اهلا بيك

جتها روقيه وسلمت عليها / اهلا بيك يا حاجه
-سالمه / قوليلى يا حناى زى ماينادى فيا وليدى ايوب

روقيه ساكته ومتحشمه

وكلما بوها وحكالها ظروف ايوب ومجيد وشن يشتغلو
وخيرها على منو تبى توافق .. هدا ولا هدا

-روقيه / الراى ليك انت يا بوى …المهم انهم الزوز عارفين ظرفى والتزامى بيك انا وخواتى

-الصادق / لكن ولد خوى يجرى ع الايفاد بيطلعله بيسافر لى كندا عامين ..
-روقيه لقت مخرج منغير ماتنحرج/ معناها بنوافق على ولدك يا حاجه ..

وبدت عمتك سالمه اتزغرط …سمعها ايوب زبط ان الامور ماشيه تمام

وتفاهمت عمتك سالمه مع ابراهيم ان فى نفس الاسبوع ليجو الرجاله يخطبوها …
والعرس بعد اسبوعين

ايوب من فرحته خدى حناه وروح …نسى ايدير معاها مقابله شرعيه …عالاقل قدام بوها وحناه

وكلمها فى الليل وكانت احلى مكالمه بينهم

-ايوب / غير امتى ايتمو الاسبوعين بس
-روقيه / توة انا نقولك زيدنى وقت ..وانت اتقول امتى يتمو .. اسبوعين شويا مايسدونيش انوتى روحى

-ايوب / نزيدك وقندت عينك

وقعدو يضحكو

وتفاهمو ان الفضانيه اتكون بعد غدوة ووصاها اتخلى بوها ايكلم اقاربهم من غدوة …

____________________________________

–

ثانى يوم مشى موسى للمطعم اللى عابي بيتلاقى فيه هوا وكنزى ..

ولكنها ماجتش .. يتصل بيها تليفونها مقفل ….

ندم انه ما دارش زيها وخدى رقم صاحباتها …

روح للمكتب يترجا فى ايوب

-موسى / قلتلك شفتها واقفه عليها لما مشينا للمدرسه
..متاكد انها تعرفها
-ايوب / حاضر اهو تو نكلمها

وبالفعل كلم ايوب روقيه

-ايوب / قتلك فى بنت اسمها كنزى تقرا فى مدرستك تعرفيها
-روقيه / كنزى صاحبة اختى مرام ..خيرها

حول التليفون من ودنه وتلفت لى موسى / تعرفها

جى موسى يجرى قعمز جنبه …يبي يعرف عليها خبر

-ايوب / اسمعى مالاخير نبى نعرف البنت اليوم جت للمدرسه والا لا …ولما نشوف تو نحكيلك
-روقيه انشغلت / حبيبي خيرها كنزى

-ايوب / يابنتى خلى عندك ثقه فيا وقوليلى جت والا لا
-روقيه / انا منقريش فيهم …لكن اهو تو نسألك مرام اختى صاحبتها

وبدت اتنادى/ مرام ..يا مرام ..
-مرام / نعم

-روقيه / جت كنزى اليوم
-مرام / ماجتش يا نارى ..ولما كلمت ابله حياة امها قالتلى انها راقدة فى للعيادة
-روقيه / علاش خيرها

-مرام / مندرى … امها مابتش اتقول

ردت روقيه التليفون على ودنها وعاودت لى ايوب كل اللى قالتهولها مرام

موسى لما قاله ايوب قريب طااااار

ويترجا فيه / جيبلى اسم العيادة يا ايوب
-ايوب / ماتتهورش يا موسى

خش زكريا من الباب / خيركم شن فى
-ايوب / اهو تونعاودلها

وعاود ايوب لى روقيه …وخلت اختها مرام اتكلم ام كنزى وبصعوبه بيش عرفت منها اسم العيادة

وعطاته لى ايوب …وبالتالى ايوب عطاه لى موسى

وخدى مفتاح سيارته بيطلع

شده زكريا / ماتتهورش يا موسى البنت ماتعرفش حتى شكلك كيف

فك يده منه / تى حول يا زكريا …

و طلع يجرى متوجه للعيادة? …

___________________________________

تمت …ويتبع

 

نحبكم ❤