احفاد الشيطان للكاتبة زهور جمال الدين
#احفاد_الشيطان
?بقلم الكاتبه زهور جمال الدين?
?الحلقه الرابعه?
.
روحت روقيه من البريد …ووصلت للحوش….
فتحت الباب لقت احمد ولد خالتها عندهم ….
واقف فى السقيفه …واختها سماح واقفه معاه
-احمد / اوووو روقيه اهلين بيك
ومد يده سلم عليها
-روقيه / اهلا احمد كيف حالك وحال خالتى والعويلة
-احمد / الحمدلله كويسين كلنا
تلفتت روقيه شبحت لى سماح و هيا ساكته
-احمد لاحظها تشبحلها / معليشى بالك جيت فى وقت مش مناسب.. لكن لما قالتلى سماح انكم روحتو ..قلت نجى بالك محتاجين حاجه
-روقيه / بارك الله فيك حميدة ..خش قعمز لداخل علاش واقفين هنايا
-سماح / تفضل يا احمد خش
وخشو للصالة واحمد وراهم ومنها للدار اللى فيها عمك ابراهيم والحاجه ..
خش وسلم عليهم …وقعمز جنب عمك ابراهيم شويا
سأله على بوه وامه وعويلتهم وشرب الشاهى
-ابراهيم / نبيك ادورلى حوش ايجار هنايا فى هالجيهات
-احمد / لمنو انشالله خير
-ابراهيم / عبدالسلام ولد عمى اللى كنا قداه ..قالى دورلى حوش جيهتكم …خاطر المنطقه اللى هوا فيها معش اطمن
-روقيه / لكن عمتى فتحيه قال
واستادن يبي يطلع…
ناض من مكانه ومشى جهه الباب الرئيسى وسماح اتسقد فيه
لما وصل للسقيفه تلفت لى سماح / ترا ناديلى روقيه نبيها
-سماح تنادى / روقيه …روقيه
جت روقيه / نعم
-احمد / تبى الحق ..انا نص جيتى نسأل عليكم ونشوفكم والنص الثانى جاى بنخطب
-هزت براسها وابتسمت / مش نحسابك خاطب اختى سماح
-احمد / لا يا شاطرة ..انا مش جاى نخطب لروحى..انا جاى تنخطب لصاحبى …وتحديدا نخطب فيك انتى
-ربعت ايديها على صدرها / مفهمتش قداش منقعدو نحكو فيه الموضوع هدا …كانا مرة عطيتكم جوابى من زمان
-احمد / روقيه ..انا زى خوك ..وعندى عليك دلالة ..على خاطرى زيدى فكرى فى الموضوع ..منير كويس وخسارة تخسريه
-روقيه / دلالتك على عينى وراسى…لكن الموضوع هدا انا مطلعاته من حياتى ..مانبيش حتى اناقش فيه
-احمد/ كانك على بوك وحناك هاك عايشه معاهم فى نفس الشارع .. وهادو جيرانكم وعشرة عمر واكيدة تعرفيهم وتعرفى اطباعهم …وبالنسبه لمنير انا نضمنهولك نعرفه من لما احنا فى الثانوية ..اخلاقه عاليه والقرش عنده
-روقيه / انت تقنع فيا انا ولا تقنع فى روحك…منير يخدم فى البريقه … ويجى اسبوع بعد ثلاث اسابيع..كيف تبينى نخلى بوى وحناى…نخلى خواتى
-احمد / احنا معاهم ماتخافيش يابنت خالتى وبري شوفى نصيبك
-روقيه / مستحيل قلبي يطمن …ولدلك سامحنى وفوته الموضوع
-احمد / باهى وصلاح
-حطت يدها على رقبتها/ من نازلى من هنايا
__________________________
فى حوش سالمه
-محمود / اسسسسس نقصو الصوت …الموضوع هدا يقعد بينا احنا السته …مايسمع حد بيه
-ميلاد تلفت لى حسن / خوك حسين وين
-حسن / من بكرى وانا نتصل بيه ..مرة خارج التغطيه ومرة مايردش
-عبدالنبى / خلاص خوى ميلاد اللى حاضر ايهنى ..
وجه يده على زكريا وموسى / اهو الشباب الزوز .. ومحمود معانا …سادين
ميلاد قام تليفونه وطلع رقم بنته ايناس وبعد عليهم / شويا بس
تكلم فى التليفون شويا وبعتالى جاهم
-ميلاد / متأكد من المعلومه يا زكريا … واثقه فيها البنت اللى اتصلت
-زكريا / منكدبش عليك ..انا مانعرفهاش واول مرة نسمع صوتها ..لكن احنا ماخسرنا شى اهو نمشو نشبحو ..وانشالله خير
-محمود / غير هيا اطلعو سقدونا لا يصير للولد حاجه
جى صالح ولد محمود يجرى / بابا تبيك عمتى سالمه
تلفت محمود لميلاد ..
-ميلاد / برا شوفها بسرعه وتعالةة
-محمود / لكن معش وقت يا ميلاد
-عبدالنبى/ برة شوفها خوى محمود …ادورنا كلنا ماتلقاناش تنشغل ..كل تأخيرة وفيها خيرة
-محمود / باهى قدر الله وماشاء فعل…نخش شوى ونجيكم
وبالفعل خش للحاجه تكلم معاها وطلعلهم ركبو سيارتين ومشو لى عين زارة
__________________________
خشت روقيه لدار امها اللى مسكرتها بالمفتاح ….
حطت الكيسه اللى كانت داستها بين حوايجها عالطاولة
وحطت معاها كاصه الدهب متع امها اللى كانت رافعتها معاها..وتلفتت سكرت الباب بالمفتاح
مشت للكيسه طلعت منها تيشرت ايوب ..شداته بايديها
قعمزت عالسرير وقامت التيشرت اتشم فيه …
وتدكر فى الخمسه ادقايق اللى قعدتهم معاه ..اختصرولها عمرها كله
وتدكر فى كلامه اللى قالهولها …
ادكرت لما يقوللها ماتسيبينيش …وابتسمت
وادكرت لما طاحت بين ايديه وقاللها بسم الله العظيم
قعدت كل شويا تدكر فيه وفى لقطاته وتبتسم
وقفت جابت كاصه الدهب …وفتحت الارقام السريه
وفتحتها …
جابت تيشرت ايوب ونزلو دموعها …وحايرة فى حضها ليش هكى ..رقم ايوب نساته من الخلعه لما شافت اختها وبنت عمها فم الباي وكانو يبو يلحقوها
ورقم صاحبة قطعاته ولوحاته لما لقت صلاح النم يجرى وراها ويراقب
فتحت دولاب امها ..وحطت فيها الكاصه وسكرت الدولاب
وطلعت من الدار وسكرتها
__________________________
المغرب كيف ايأدن
زكريا واللى معاه وصلو للقابينه المحروقه فى عين زارة
وقعدو يمشو بالشوى لين شافو البراكه
دارو لبعضهم اشارة بى ضى السيارات
درسو على جنب ونزلو
نزل زكريا وفى يده كلاشن
-عبدالنبى/ هدا شنو يا ولد
-زكريا / كلاشن خيرك مستغرب
-ميلاد / منين خديته
-موسى/ حتى انا عندى واحد وايوب نفس الشى..خديناهم من المعسكر ايوزعو فيهم بالبطاقه
-محمود / مش موضوعنا توة … غير سقدو انشوفو ايوب فى البراكه والا لا
-ميلاد / ردو الكلاشنات ..انا تحتى مسدس
زكريا شبح لى موسى
-موسى / باهى
وردو الكلاشن للسيارة … وبدو يمشو على رجليهم
السماء قريب بظلم
-ميلاد / ماتولعوش ضى الموبايلات … الحياش صح بعيدة لكن لو شافو ضى موبايل حينتبهو ..ردو بالكم
وبدو يمشو بالشوى ويتسحبو لحد ماوصلو قدام باب البراكه
__________________________
فى حوش امنه…
مقعمزين امنه وبنتها ايناس فى الصالة
وايناس تتكلم فى التليفون / تى كلمك بوى وحسن قريب خمسين مكالمه وانت ماتردش
وسكتت شوى
واسترسلت / بوى هوا اللى قالى نقعد نعاودلك لين ترد
وسكتت … واسترسلت / خلاص اهو تو نفتحلك الباب .. و كلم بوى تو يقولك شن يبيك ..
وانهو المكالمه …
-امنه / خيره خوك
-ايناس / خلى نفتح الباب..قال قريب يوصل وناسى مفتاحه
-امنه / انا غير كان نعرف بوك شن يبي فى حسين
-ايناس / والله ماندرى ياماما …كلمنى وقالى اقعدى عاوديله لين ايرد نبيه فى امر ضرورى
-امنه / وشنهوا الامر الضرورى هدا اللى يبيه فيه ..حسنى انشلغت ..بوك مش عوايده
-ايناس / والله ماندرى عليه …غير خلى نطلع ونفتح الباب
وبالفعل طلعت وفتحت الباب وخشت هيا وخوها حسين
-حسين / السلام عليكم
-امنه / وعليكم السلام
-حسين / بوى من بكرى نكلم فيه خارج التغطيه تليفونه
-امنه ركبت فيها نار/ ياااربي استر..عرفته موضوع مكالمته مش بلاش
– حسين / غير فكينا من المناقد يااام وخلينى انكلم بوى فى عقلى بيش انحصله
__________________________
.
زكريا واقف قدام باب البراكه
والباقى كلهم فى جنبه …حط يده عالباب ودفه
يلاقو ايوب راقد عالوطا وقايم رجله اليمين فوق
خش زكريا يجرى ومش قادر ايشد دموعه / ايوب ..الحمدلله انك بخير يا ايوب
وخش موسى يجرى قعمز على ركابه جنب ايوب ويبكى
ايوب شبه مغمى عليه من الدم اللى نزف هلبا فى البدايه قبل ما يربط ساقه بالوشاح
-ميلاد بحزم / مش وقته.. قيمو ايوب معاى بسرعه
محمود خاله منهار ويبكى ….الموقف عظيم عليه …بعد مافقدوه ومعش عرفوله طريق …بمكالمه بنت يلقوه قدامهم وفيه الروح
حسن زيهم مشاله يجرى ويبوس فيه / ايوب اوخى..وليد امى
‘ميلاد / تى هياا …نوض يا حسن
ايوب حاس بيهم…ويسمع فى الدوة كلها … لكن مش قادر يتحرك
قاموه مابين بعضهم وطلعو بيه من الباب
-محمود تلفت لى حسن وموسى/ اى حاجه فى مكانه جيبوها …ما تخلوش المكان يتلاحظ انه كان فيه حد
وبالفعل خشو حسن وموسى جابو شيش الميه وساوو الغاز والصندوق حطوهم على تركينه …وساوو المكان …
ولحقوهم قامو ايوب معاهم …
وطلعو يجرو …وصلو للسيارة ….وشرين تليفون ميلاد
-حسن / خيره تليفونك خارج التغطيه يابوى شغلتنا ..خيرك شن تبينى
-ميلاد / لقينا خوك ايوب
-حسن عيط / لقيتو ايووب
جاته امنه تجرى/ لقو ايوب …لقو خوك …وين لقوه ارفعنى ليه
-ميلاد سمعها / امك ماتطلعش من الحوش ..خوك بنرفعوه للمستشفى توة
-حسن / اما مستشفى انتو ماشيين
-امنه سمعت كلمت مستشفى وتهسترت/ مستشفى شنو..
حيه عليا اوليدى لقوه ميت ولا حى
سكر حسن التيفون ولهى بامه … لانه امهم تشنجت عليهم وقعدو شادينها هوا من جهه وايناس من جهه ثانيه
__________________________
بعد ثلاثه شهور …
نهايه شهر 7
فى عز ضرب الناتو على طرابلس وعالمناطق الحيوية فيها اللى مليانه سلاح
ايوب وموسى وزكريا مقعمزين قدام حوش ايوب
-موسى يضحك / تصدق كل ماندكر هاديكا الايام نموت بالضحك
-ضربه ايوب على كتفه/ وشن اللى ايضحك فيك يا قرد
وتلفت لى زكريا لقاه حتى هوا يضحك/ وانت شن ايضحك فيك …
وبدى حتى هوا يضحك
-موسى يمسح فى دموعه من كثر الضحك/ اللى ضحكنى يومتها …فى عز ما احنا خايفيين عليك..وانت ..الوشاح يا موسى …نبى الوشاح ردو بالكم اتلوحوه
-زكريا يضحك/ مشينا نجرو للسله متع اللى ملوحين فيها التغديه والوسخ بيش طلعنا هاداكه الوشاح وهوا رايح كله دمايات
-ايوب يضحك/ تو يا امصخ انت وياه ..من الموضوع اللى صار كله ماتتفكروش الا فى لقطه الوشاح
-موسى / خطرها وين داسه توة الوشاح
-ايوب مبتسم / داسه فى قلبي
وتلفت لى زكريا / قاعد ماجاكش رقم غريب
-زكريا / للاسف يا صاحبي
-موسى/ معقولة لتوة مالقيتهاش … اسم رقيه مش هلبا فى ليبيا تحسه
-ايوب / ماخليت وين دورت عليها …عين زارة كلها قلبتها على ناس اسم بنتهم رقيه ..وشى مهناش
-زكريا / باهى الحياش اللى كانت قريبه على البراكه ماشفتهمش
-ايوب / اكثر الحياش امسكرة مهناش اهلهم …وسالت فى حياش ابعد ومفيش فايدة
-موسى/ زكريا تعرفنى صاحبك ومانرضاش فيك ..لكن كلمه الحق بنقولهالك فى وجهك ..البنت عندها رقمين ليك بدل رقم وما اتصلتش …بالك البنت متزوجه وماقالتش
-سرح ايوب ..وبعدها / لا لا ما اعتقدش ..لو كانت متزوجه كانت قالتلى
-زكريا / خلينا نغيرو الموضوع ..شن امورك توة مع عمك ميلاد
-ايوب / سمن على عسل …صراحة وقفته معاى وجريته عليا والله ماننساهاله طول عمرى
-موسى / ربي يوفق بيناتكم …دارك مطلوق سراحك بدل من هارب …ودارك تبكى على جارك بوعجيله توفى ومسح التحقيق كله بأنك واخد الصورة وتحرق فيها
-ايوب / صراحة زايدة معاه …والله لولاه هوا بعد الله رانى توة تحت التراب
-موسى/ اصلا واضح ان قلبك عليه ابيض غير …لان اول شخص اضبطه بعد مافقت هوا
-زكريا / صح …اضبطه قبل ماتعرف انه ساعدك ولا جري معاك اصلا
-زكريا / الحمدلله انك حى وبينا توة ..ربي يحفظكم
وسرح ايوب …يتدكر فى وشاح روقيه كيف غسله ودسه فى دولابه ..وكل مايستاحشها يفتحه ويتغطى بيه
ومشت الايام …..
و سنه 2011 بدت البلاد كلها ماشيه بنظام فبراير……
داروها زى فتح مكه …وخشو لى باب العزيزيه يوم 20 رمضان اللى يوافق 20/8/2011
فى من بعض الناس فرحت …وجاها امل ان ليبيا بتمشى قدام
دارو احزاب …اللى كانت ممنوعه فى ليبيا
دارو البرلمان …اللى كان ممنوع فى ليبيا
ولكنها مازالت خاشه بعضها ويتناحرو عالسلطه …خارجيا دايررن اقنعه وزعميتا البلاد كويسة ….وداخليا مابينات بعضهم زى الحوت الكبير يقعد والصغير ايموت
ولحد هنايا وايوب ماليشى علاقه لا بي سياسه ولا بي ثورة
عايش بحلم واحد بس ..وهوا انه يلاقى روقيه اللى حبها من اول نضرة
وفات عام كامل ….
لحد ماجى يوم فى سنه 2012 ….
ايوب تليفونه شرين …ورد عليه
-ايوب / الو
-الشخص المتصل / انت ايوب
-ايوب / ايه انا ايوب
-الشخص المتصل/ الرايد ميلاد شن يقربلك
__________________________
تمت …ويتبع
زعما عمك ميلاد خيره ..وشن صاير معاه
اول يوم العيد والحوش يردس ناس ماشيه وناس جايه …لكن مدامه عطيتكم كلمه بى حلقه كادو منى ..معناها لازم نصدق معاكم وانزلها ..انشالله الفجر واللى تنوض الصبح تلقاها
عارفتكم توة راقديم …غدوة تفيقو اقروها براحتكم
نحبكم ❤