احفاد الشيطان للكاتبة زهور جمال الدين

#احفاد_الشيطان

بقلم زهور جمال الدين
?الحلقه العشرون ?

–

فى حوش المبروك ولد خو سالمه ….

قيس العشيه مقعمزين سالمه وعمتك قمر مرت خوها … دايرين براد الشاهى والطواسى والكانون قدامهم
-قمر/ هوا وين ماشى …بعيد المكان قصدك
-سالمه / قال ماشى لى جزيرة فروة هوا وجماعته ..بيقعدو اسبوع وبيروحو
-قمر / فروة فى شهر 2 والجو مصقع …. من هنا لى بوكماش مطول رجليهم
-سالمه / شباب .. وخلى يمشو وين مايبو هدا وقتهم
-قمر/ وكنتك شن حالها معاكم …هادى ولا موقفه عليكم قرونها
-سالمه خدت طاسه الشاهى / كنتى … ريتها كنة كل حبيب.. الطياب والنظافه ووسعت البال
-قمر / ربي يهنيكم …

شرين الباب …
-قمر/ زكيه …يا زكيه افتحى الباب

جت زكيه من المطبخ تمسح فى ايديها / حاضر هى …
ومشت للباب فتحت وخشت
-قمر / شكون عالباب
-زكيه / ايوب ولد عمتى سالمه
-سالمه انخلعت/ ااه .. ايووب ..خيره سمالله
-خش ايوب للسقيفه/ السلام عليكم
-سالمه تنادى/ خش يا ايوب .. خيرك وليت اوليدى
-ايوب من السقيفه / انا فى المربوعه يا حناى
-ناضت بسرعه / شووويا بس انشوفه
وخشت للممر بتمشي للمربوعه

__________________________________

فى مكتب ايوب……

زكريا مقعمز … ومعاه امحمد …

قدامهم اوراق ايراجعو فيهم … متع ارقام الاسلحة اللى بعتو عليها من برة … وكم تأمن نوع منهم
-امحمد قام راسه / تعبت
-زكريا / مزال ورقتين بس ونكملو.. اشرب القهوة تو راسك يصفى
-امحمد يشبحله باعجاب / ماشالله قداش كبرت ورزنت يا زكريا ..عاجبنى من زمان وتوة زدت اكثر
-زكريا / وفاة موسى كبرتنى عشرة سنين …. نص الخدمه كان قايمها هوا
-امحمد / تحول معاى
-زكريا شبحله ?/ وين بنمشى معاك
-امحمد / تبدا معاى فى مكتبى .. انت شاب نشيط واسمك بدى ياخد فى صيت
-حط الورق من يده / وايوب من بيقعد معاه
-امحمد / ماقلتلكش سيبه …قلتلك تعالة هنى وهنى..اخدم بلقمتك
-زكريا / انقولك حاجه .. نبيع روحى ومنبيعش ايوب
-امحمد بضحكه صفرا / من جاب سيرة البيع توة …
وقام الاوراق / غير هيا نكملو ووقعلى ..عندى ماندير انا
عرف ان زكريا زبطه يبيه ايكون عين على ايوب ويرفعله اخباره

___________________________________

–
فى شقه السراج …

روقيه مقعمزة فالصالة …وتخمم / معقولة ايوب يطلع هكى ..بالك فى لبس فالموضوع …معقولة يطلع مجرم ونصاب وصاحب مليشيا
..
تخمم فى خاطرها / الحب ماليشى علاقه بالزعل .. وحبي ليه كل يوم ايزيد …ياريتنى ماعرفت بحكايته…ياريتى ماشفت توقيعه …
اتكت عالصالون ..حطت راسها على طرف الكنبه ونهايه رجليها نازلات عالارض ….

وحطت يدها على جبهتها وتشبح للسقف وتدكر لما لقاته طايح ومضروب وانقداته زمان …
وتلفتت للجهه الثانيه وتدكر فى شهر العسل وكيف سافرو وادهورو .. وتدكر فى دلعه ليها فالسرير
هلبا دكريات ..شريط حياتها معاه كله مر قدام عيونها …
ومع هدا عقلها رافض انها تستمر معاه بعد ماعرفت حقيقته

وتخمم / الحب حاجه .. والحياة الصحيحه حاجه ثانيه ..
معقولة نرتبط بمجرم داير مليشيا بعد الحرب …حتى فلوسه حرام .. وربي بدى يحاسب فالدنيا قبل الاخرة .. منين نظمن حتى نجيب صغار سليمين …نيه الناس حتى صغاره يطلعو مرضى ومعاقين

وقفت خشت للمطبخ …حطت السزوا عالنار …
وسرحانه تفكر فيه .. البنت تحبه … لكن الصدمه اللى خدتها فيه خلتها مصرة انها تبتعد عنه

_____________________________________

–

فى حوش خو سالمه

سالمه مشت للمربوعه مخلوعة …

-سالمه / شنو يا وليدى خيرك وليت
-ايوب واضح وجهه حزين مسكلها يدها / ماتتخلعيش يا حناى خيرك.. تعالى قعمزى
-سالمه قعمزت / غير قولى خيرك ..
-ايوب / ماخيرنى شى … الولد اللى معاى صار معاه ضرف اضطريت انى انراجيه الليله وبنمشى غدوة
-سالمه / وخيره وجهك هكى رايح مظلم
-حط راسه على فخدتها واتكى/ خاطرى واجعنى
-سالمه / من منو يا وليدى راك شغلتنى قول
-ايوب / ماديريش فى بالك …رفاقه قدم غاليين عليا وجعونا
-سالمه / انشالله مايربحوش .. علاش هكى يديرولك
-ايوب / ماتدعيش عليهم يا حناى .. راهم عزاز علينا هلبا
-سالمه / هدا علاش مامشيتش للزردة
-ايوب /لا بنمشى غدوة ..غير قلت انجى نشوفك مدامنى قعدت
-سالمه تضحك وحاطه يدها على شعره / من لما كنت صغير … كانا وجعك خاطرك من حاجه اتجى تتكى على رجلى ..وقد ما ننشدك ماتقولش اللى واجعك شنهوا

طق باب المربوعه …
-زكيه تنادى/ عمتى سالمه …
تقاعد ايوب وقعمز …
-سالمه / خشى يازكيه
-خشت زكيه قايمه صفرة شاهى / تفضلو
-سالمه / فضل عليك بنيتى ..
-زكيه / قالتلكم عمتى قمر خشو لداخل مافيش حد برانى

-خدى ايوب طاسة الشاهى/ تولما بنطلع نخش نسلم عليها
…انا والله مستعجل بنطلع
-زكيه / براحتك …. وطلعت
-سالمه / روقيه وين
-ايوب / فى حوش اماليها
-سالمه / كلمتها بكرى لقيت رقمها مقفل
-ايوب / تو نكلم اختها مرام ..نقوللها تفتح تليفونها.. اكيدة ماعندهاش شحن
-سالمه / وراس اوليدى ماضايق روحك ..كل شى وليه حل
-ايوب / الا قتل الروح وجسدها قاعد حى
-سالمه انشغلت /خيرك يا اوليدى
-ايوب / ماتخافيش يا سالمه …غير نفضفض معاك.. تعرفينى كانا اضايقت مانرتاحش غير لما نحكى معاك
-سالمه مسخفها / ربي يحفظك يا اوليدى …استودعتك لربي هوا الحارس
-ايوب ضمها / ربي مايحرمنى منك يااااارب

وناض خش سلم على عمتك قمر… وطلع ركب سيارته وتوجه لى مكتبه ….

_______________________________________

–
فى الطريق

ايوب يخمم .. دكراته حناه فى حكايه التليفون.. روقيه
فى الشقه منغير تليفون …وعلى اى طارئ يصيرلها ماعندهاش تليفون تتصل …
كان ماشى فى طريق مكتبه …فجأة لف وتوجه للشقه متع السراج …
درس السيارة قدام العمارة ونزل
فتح الشقه بالشوى …وخش… لقاها هدوء … خش من الممر للصالة لقى روقيه راقدة عالصالون .. وفنجان القهوة قدامه معبى من تعبها رقدت قبل حتى ماتشربه
خش لدار النوم جاب لحاف وحطه عليها….فاقت ….فتحت عيونها لقت ايوب قدامها …
قعمزت / نعم شن تبى
-حط التليفون عالطاولة / جبتلك تليفونك ..قلت بالك تستحقيه
-خداته ووقفت بتمشى / شكرا
ولفت حوالين الطاولة ومشت …
مسكها من يدها / روقيه
-غمضت عيونها / نعم
-يبي يتسبل بأى حاجه / نبى قهوة ..راسى يوجع فيا
-تبيش تتلفتله / باهى
مشت للمطبخ .. وردت الباب وراها .. حطت السزوا عالنار .. حطت فيه شووى سكر وكاشيكين صغار.. واقفهةتشبحلها تراجى فيها تغلى …انفتح الباب وراها .. خش ايوب …
مابتش تتلفت..ايوب واقف وواضح عليه تعبان مايحسابش
فراقها بيدير فيه هكى
-ايوب / لازم نتفاهمو
-عاطياته بالضهر / مفيش بينا تفاهم ..
-قرب منها بحدر / اللى يرضيك انا نديره ..حبيبي احنا نحبو بعض .. ليش تبى نسيبو بعض … وتهدمى الحوش اللى درناه انا وانتى …
-تلفتتله / الحوش اللى مبنى بالحرام بينهدم عاجلا ام اجلا ..
فاضت القهوة وراها ….تلفتت طفت الغاز
طلع ايوب من المطبخ للصالة ….قعمز عالصالون وفى خاطره
غضب كبير لكن عادرها …لان عارف ان عندها الحق فى ردت فعلها ….
دارت فنجان جديد وجابتهوله …حطاته عالطاولة
-ايوب / وتى روحك
-تلفتتله باستغراب / ليش
-ايوب / اقعدى فى حوش بوك لين نتفاهمو كيف بيصير
-روقيه / بيصير فى شنو … قصدك فى موضوع طلاقنا
-وقف / قلتلك انا الايام هادى كلها مش فاضى .. خليك فى حوش بوك اضمن …عالاقل نقعد مستريح عليك
-روقيه / منقدرش نقعد عند بوى هكى ونشغله … شن بنقوله ..تبينى نكدب عليه ونقوله انك مسافر وانت قاعد
-ايوب / منقدرش نجى هنايا ديما الايام هادى …قلتلك مشغول هلبا ..ونخاف عليك تقعدى بروحك
-روقيه / لا خلينى هنايا …ونرجع نمشى زى زمان يوم فالاربعه ايام .. لو فاضى تجى انت ترفعنى وكانا مش فاضى تجى وحدة من خواتى براجلها ويرفعونى
-ايوب / براحتك …وزى متحبي … مدامك بتقعدى خلى نجيبلك قضية الحوش كاملة
-روقيه / تمام …
طلع من الشقه …وهوا مزال عنده نيه يقعد … لكن حب يخليها براحتها

بعد ماطلع قعدت بروحها تخمم … انتى حق ماتبيش تشغلى بوك …ولا ماتبيش تبتعدى عنه ..

______________________________________

–

وفاتو اسبوعين …..

سالمه قاعدة فى حوش خوها .. وايوب كل مرة يتسبلها بحاجه …مرة يقولها صحابى جايين من برة معاى فالحوش.. ومرة يقوللها مشينا زردنا وكل مرة سبله …يرد عليها فالتليفون ومشالها مرتين

روقيه وقف عليها النزيف وبدت تصلى …ليها اكثر من ثلاث اسابيع رامية .. قاعدة فالشقه .. جو لا نبيه لا نطيق فراقه .. تمشى لبوها فى يوم دورها …يجوها خواتها يرفعو فيها ..ولما سألوها عالشقه ..قالتلهم فى ناس يهددو فى ايوب.. لان الحوش اللى خداه ورثه ومش الكل خدو حقهم …ويجيها ايوب مرة مرة فالنهار …اما فالليل ايبات رسمى فالشقه ….لكن هوا فالصالة وهيا فى دار النوم …كابر عليها تتنازله … وهوا قاللها اطلبي اى شى الا انى نغير خدمتى

ايناس مازالت مستمرة فالتنقريز على زكريا انه يجى يخطب
..وعلى قد مافهمها وتعارك معاها وهيا شى تنسى يومين والثالث ترد للتنقريز…من كثر ما وجعتله راسه مؤخرا حتى تليفوناتها معش ايرد عليها….بالرغم من حقها تنقرز

مكتب ايوب وصلهم السلاح كامل… وجرو واستقصو على حكايه مقتل موسى … هوا صحيح متاكدين ان عياد هوا اللى وراها.. لكن لازم بعرفو منو الشبكه اللى وراه ..وكم نفرر يحمو فيه …..وبالفعل دارو عيون داخل صفوفه وزبطو اسامى اللى خططو بالواحد
صبرو وبعتو امحمد ايخطر عليهم زردة فى منطقه خارج طرابلس .. وبالفعل تفاهمو انهم يهجمو عليهم نفس اليوم

______________________________________

يوم الاربعاء …

كان اليوم المحدد بيش ايوب وجماعته يهجمو على عياد وجماعته …المشكلة ان عياد غافل مايدريش ان ايوب كلف امحمد ودارو عيون وعرفو من السبب فى موت موسى
ليبيا بعد الثورة صارت غابه.. واخد الحق بدى بالدراع.. وشرى السلاح فى ليبيا بدى اسهل من شرى كيلو بصل
ايوب مطمن ان روقيه فى حوش بوها بايته ليلتها .. لكن تشاء الصدف ان احمد راجل سماح رقد مع ولد عمه فى المستشفى ..ومشت سماح لحوش بوها وكانت ليله روقيه .. فاعطاها بوها الادن انها تروح لحوشها .. على قد ماشدت فالبيات معاهم بوها رفض وقاللها مدامه ضرف سماح يسمحلها بالبيات روحى انتى …وبالفعل مشت سماح واحمد وصلوها لشقتها ورد احمد سماح ومشى لولد عمه

اما فى زردة عياد وجماعته ..ماشيين مع بعضهم 25 نفر
نصبو الخيم ومقعمزين اللى يدبح واللى يسلخ واللى ينضف
بعد العصر وصل عياد فى سيارته الفخمه هوا وزوز مرافقين
قعمزو لين ادن المغرب ..فى اللى صلى وفى اللى قعد مقعمز
… والشباب اللى باعتهم ايوب ايراقبو من ورا الشجر شادين تليفوناتهم ويصورو …لحد ماصوروهم كلهم
انسحبو بالشوى منغير مايحسو بيهم ورفعو التليفونات لى ايوب … شاف الاسامى والصور ..لقى الاسامى اللى عنده ومشتركه فى قتل موسى كلهم موجودين ….
بعد ماظلمت الدنيا شوى …
-وقف ايوب / توكلنا على الله
-زكريا / الهمه ياشباب …
وقفو كلهم قريب خمسين نفر ..وقامو كلاشناتهم ..
مشو مجموعتين …مجموعه مشت ايمين ومجموعه مشت ايسار ….

عياد وجماعته مقعمزين عالكراسى ويهدرزو ويضحكو …
لحد ماسمعو صوت ضرب سلاح ..انخلعو وناضو مع بعضهم كلهم مشو جهه الصوت اللى سمعوه…
وطلع ايوب وزكريا وجماعتهم من الجهه اليمين وباغتوهم …
ونزلو فيهم صلى بالكلاشنات
-ايوب / الله اكبر …
وطاحو كلهم ضرب …صلى بالسلاح …ماعطوهمش فرصه حتى ينتبهو ان فى ناس طلعت فجأة من ورا الشجر اللى عاليمين ….
جماعه عياد كلهم انضربو بالرصاص وطاحو ..اللى مات واللى يعيط …
خشو جماعه ايوب اللى يلقوه ميت يعطوه طلقه على راسه
-زكريا واقف جنب عياد يشبحله مزال فيه الروح شوى ويضبح/ ايوب
تلفت ايوب مشاله يجرى لقى عياد فيه الروح ..حول الغطا من وجهه… وشبحله …وعياد طبعا زبطه
-ايوب / هدا حق سيدك موسى يا واطى …
ويقيمو ايوب وزكريا كلاشناتهم ويسحبو ويفجروله راسه
وبدو يسمعو فى صوت كلاشنات تضرب من بعيد
-زكريا يعيط / خونااااا
-ايوب / انبطح وتراجع يا زكريا ….
خايف عليه يفقده حتى هوا ….
وبدت الكلاشنات تضرب عشوائي من جماعه منبطحين …
عددهم اكثر من عدد جماعه ايوب …الرصاص زى الرز …
وايوب وزكريا يتراجعو وهما منبطحين ..ومعاهم شباب ثانيه تتراجع بنفس الطريقه ….
ايوب عينه على زكريا .. وزكريا عينه على ايوب…
ولانهم مش جدد عالصنعه …كانو متوقعين الخونه ودايرين خطه بديله …موقفين سيارات بغيد عاليسار …لو صارت الخونه يمشو جهه السيارات ..كل وحدة مفتوحه ومفتاحها فيها ….
وبالفعل وقفو ايوب وزكريا على رجليهم زمشو يجرو لاول سيارة ….
ركب زكريا جهه السواق…وايوب جنبه ..ووصلو زوز ثانيين ركبو من الخلف… وولع زكريا ومشى يجرى ..لان الاتفاق هكى كان فالخطه البديله ..لو صار شى اللى ينجى يركب سيارة ويطير …
وبالفعل زكريا يجرى على اقصى سرعه ….وايوب سرواله جهه رجله اليمين رايح كله دم
-زكريا/ رجلك دم يا ايوب …شكلها جت فيك رصاصه
-ايوب تعبان / ناشتنى ومشت …لكن ما ستقرتش فى رجلى
-زكريا / بسيطه …

مشو مسافه لا بأس بها .. نزلو الشباب الزوز اللى معاهم ..
بيش ياخدو تاكسى من الطريق ..ويبو يمشو منطقه بعيدة بكل مافيهاش شك…
اما ايوب وزكريا ماشيين فالطريق ..
-زكريا / سروالك دم وتخاف اتشدنا بوابه
-ايوب عارق/ برة للحوش متعنا القريب
-زكريا / لو الخونه مننا وفينا … اعتبر حتى الحوش هدا متع المنظمه مبلغين فيه
-ايوب / احتمال …لكن غير انغيرو فيه ملابسنا بسرعه خير من الشبهه
ووصلو للحوش… خشو فيه .. سوره فيه قريب خمس سيارات …..خشو فيه ودرسو ….
مشو بسرعه للباب …خشو وغيرو ملابسهم …وخدوهم معاهم فالسيارة … وطلعو بسرعه فى نفس سيارتهم اللى خشو بيها … يمشو فالكياس …ويشوف زكريا سيارات ستيشنات تعبو قدام الحوش … وماشافوهمش ..لكن فاللحظه هادى عرفو ان الخونه منهم .. وحد يعرفهم هلبا

مشو وصلو للطريق الرئيسى..درسو السيارة ونزلو وقفو تاكسى …ركبو فيها وتسقدت لطرابلس …
وهادى احسن خطوة داروها لان الستيشنات وصلو الرئيسى ولقو السيارة مدرسه على جنب

____________________________________

–

فالطريق

التاكسى وصلت لطرابلس …
-السواق / وين تبو خوى
-زكريا / نبو المدينه …
-ايوب / لا لا انا حطنى فى السراج
-السواق يشبح لزكريا/ صاحبك شكله مريض زى اللى بيستبرد
-زكريا / ايه الباين عليه هكى

وتلفت لى ايوب ويوشوش / نمشو للمكتب ونجيبلك دكتور
-ايوب / رد بالك تمشى للمكتب ..منين تضمنه انت ..وبعتالى انا كويس .. انت عارف مجرد حرارة الليله وغدوة يمشى الحال
-زكريا / وكان سألاتك روقيه
-ايوب صوته تعبان/ روقيه بايته فى حوش بوها اليوم
-زكريا / تم ..انا نستقصى ونشوف الجو وشن صار وبعتالى ساهل …الصبح تو نجيك
-ايوب / تمام … دير رايك
ونزل ايوب قدام شقته فى السراج
نزل … وخش لممر العمارة ومشى للشقه …فتح الباب بالمفتاح وخش …
فات الممر شوى وطاح على طوله …
-جت روقيه تجرى قامته من كتافه / حبيبي .. حبيبي خيرك هكى تعبان
-فتح عيونه / روقيه …حبيبتى ….
وحضنها … ضمها بين ايديه وهيا ضماته …لانهم مستاحشين بعض
-روقيه تبكى / خيرك حبيبى شنةصاير معاك وخيرك هكى صايرمعاك
-ايوب جبهته عرق / متخافيش حبيبتى..مجرد مستبرد بس
-روقيه / باهى غير نوض ندخلك للدار
-ايوب فرحان بالرغم قريب بيغمى عليه/ هيا
وشدو ايدين بعض ووقفو ….وماسكين حضن بعض…وادخل فيه روقيه للغرفهة…بالرغم رزين عليها هلبا …لكن جتها قوة وسنداته لحد ماخش لداره فالشقه

_______________________________________

تمت …ويتبع

زعما بيطلقو …والا لا ….
ايوب مريض وشبه مغمى عليه …وروقيه سخفها ومبيتاته طول الليل فى حضنها … زعما كيف بيصير ?
وعلى فكرة فتحلى الفيس الازرق وماقسمتش الحلقه ..
خلاص هيا هادى كلها مع بعضها ?
تبهدلت بيش نزلت الحلقه … بعتالى قولو زهيرة ماتحبناش ???????

نحبكم ❤