احفاد الشيطان للكاتبة زهور جمال الدين
#احفاد_الشيطان
بقلم زهور جمال الدين
?الحلقه الثامنه عشر ?
–
بعد شهرين
موسى ارتحم ليه شهرين … الناس مشت وجت .. وتم العزى
امحمد قاعد ايدورلهم فى صاحب العملة .. القصه مش ساهلة وتمت بالسر لكن قاعد ايحاول
ايوب رجع لى شغله ..الخدمه معش عندها بنه زى زمان ..
يقبل فى مواضيع .. بالرغم اتعظ من وفاة موسى ..ودماغه عارف اغلاطه … لكن توة صعب ايولى بعد رجله عفست فالموضوع .. الرجعه برقبته …
اما زكريا تفه كل شى .. مع انه الشغل صبح تعب عليه خدى مكانه ومكان موسى?…وايناس تساير فيه وخلاص
-ايناس/ انا ماقلتلك شى … مجرد اتجيبنا امك نص ساعه بس … ماطلبتش هلبا انا
-زكريا بعصبيه / انا قلتلك قبل ما يطيح حزن موسى مستحيل نخطب ولا ندير حتى حاجه
-ايناس/ شنو كلام العزايز هدا… حبيبي لا قلتلك نديرو بيان لاغيره …لكن امى كلتلى وجهى ..لان بابا معش عاجبه الوضع
-زكريا / شنو عاجبه ومش عاجبه … بوك عاطينى كلمه واللى يرجع فى كلمته مش راجل .. وبعتالى انا متاكد ان بوك ما يقولش هكى
-ايناس تبكى / يعنى انا نكدب عليك …
وتمسح فدموعها / عموما الباين انك اعدت نضر فالموضوع وانا انلصق فى روحى بالسيف عليك .. والباين ان رايك تغير ومصارلكش من الموضوع
-زكريا / غيرت عينك مش غيرت رائى…انطمرى فى حوش بوك وماتحلميش انتى وبوك حد ياخدك غيري .. ايطيح عزى موسى وانجيبلك امى وفى نفس الاسبوع نديرو عرس …
باهى هكى راضيه ولا مزال
– ايناس فرحت / باهى
-زكريا / نحبك يا بنت
-ايناس/ نمووووت فيك
_____________________________________
–
بعد اسبوعين …
فى عيادة البشري
روقيه راقدة على سرير ودايريلها فى ايديها تغديه .. وشادة التليفون تتكلم فيه
-روقيه / والله حالى كويس يا بوى ..هما غير ليش قالولك بس .. ماكانش فى داعى …
وقعدت تدوى معاه شوى وبعتالى سكرت الخط
-سالمه / قلتلك يابنيتى ما تمسيهاش بومبة الغاز.. تو ايجى ايوب ويركبهالك ماهداكش ربي
-روقيه / انا ماقمتهاش ..انا كريتها بس .. مانحسابش روحى حامل …
-سالمه / كنت شاكه فيك غير ماقلتش …
-ايوب مربع ايديه وباين عليه الحزن/ انشالله ربي يعوضنا خير … ربي يطول فى عمرها اتعيش واتجيب المهم سلامتها
روقيه فرحانه بالدوة لكن متحشمه من حناها سالمه مش قادرة اترد
-سالمه / الممرضه قالت بقولى توامه
-ايوب / تو يا حناى هوا الحمل شهرين وشويا ..وطلعو حتى توامه
-روقيه / ايه والله الممرضه توة لما جتنا قالت تقريبا زوز مش واحد .. اصلا امى متوامه ..مرات انا طلعت زيها
-ايوب / ربي كريم وقادر يعطينا مرة ثانيه
-سالمه بدت تبكى / والله يا وليدى كان نلقى نشوف صغارك مادامنى بصحتى وبعقلى … ماتدرى بعد وقت حتى انت يا وليدى ننساك
-ضمها ايوب ويمسحلها فدموعها / معقولة بتنسينى يا سالمه
تى نحلف عليك تنسى الدنيا كلها وانا ماتنسينيش
-روقيه / ربي يطولنا فى عمرك يانوارة الحوش
-ايوب قاعد ضامها ليه/ اصلا لعلمك اول بنت بتجينى بنسميها سالمه
-سالمه تضحك / لااااا يا ودى …اسمى بالك قديم وشين
-ايوب / لكن انا عاجبنى وبنسميه
-سالمه / وكانا جاك ولد سميه حمد على جدك
-ايوب وخد لكرسيه وعيونه دمعو/ كانا جانى ولد بنسميه موسى
-روقيه سخفها / ربي يطول فى عمرك …وتعيش وتسمى ياااارب
طقطق الباب
رقيه تساوى فى حجابها
-ايوب / تفضل
انفتح الباب خشو سهام وسماح خوات روقيه
سهام بطنها قدامها واصلة قريب لى نص الخامس..وسماح زيها واصلة قريب للرابع ..
-سهام وسماح / السلام عليكم
-ايوب وروقيه وسالمه / وعليكم السلام
وقف ايوب طالع وهما خاشين / ربي يعوظك خير يا ايوب
-ايوب/ بارك الله فيكم
وطلع لى عدايله برة من الغرفه مقعمزين
خشو البنات ..
واحمد ومعاد من فم الباب / الف سلامه عليك يا روقيه
-روقيه / الله يسلمكم اوخيينى
-سهام عيونها مدمعات وتبوس فيها / الف سلامه عليك اوخيتى
-روقيه / الله ايسلمك سهومه حبيبتى
-سماح / اعطينا المكان يا سهام ..
ونزلت سلمت على روقيه / الف سلامه عليك روقيه
-روقيه / الله يسلمك يا سماح
ومشو سلمو على عمتك سالمه وقغمزو الزوز
-سهام / كيف صارلك يا روقيه.. ماتندريش على روحك
-روقيه / لا لا مانندريش الحق.. فالليل جانى نزيف .. جابنى ايوب للعيادة قالوله حالة اجهاض
-سماح / ربي يعوضك خير حبيبتى .. العمر قدامك اتعيشى واتجيبي انشالله
طق باب الدار وانفتح …خشت امنه وايناس …
وحسن من ورا الباب / الف سلامه عليك يا روقيه
-روقيه / الله يسلمك يا حسن
خشت امنه تسلم / انشالله لاباس عليك بنيتى
-روقيه / الله لا يوريك باس يا عمتى
-ايناس/الف سلامه عليك يا روقيه
-الله يسلمك ايناس حبيبتى
وقعمزت تنشد كيف صار
____________________________________
–
فى حوش كنزى
كنزى مقعمزة عالصالون فى صالتهم ..وخوها كريم شاد تليفونه ومتكى يلعب بلعبه
حياة تلبس فى حجابها عالمرش متع روشن الصالة …
لانهم فضو الحوش كله خلو فيه دولاب المطبخ والصالون
اللى فى الصالة بس ماعندهمش وين ايحطوه ..بيجى منعم خو حياة غدوة يرفعه ويخزنه فى حوش اهلها …اما دولاب المطبخ خلوه للمستأجرين اللى بيأجرو شقتهم بعد مابيسافرو
عبدالرحمن فضى شقته وبيسافر بصغاره للخارج ..وخلى مفتاح شقته لى مكتب بيش ايأجرهاله
-عبدالرحمن / شنو واتيين ..خوى وسيم قريب يوصل
وخش للغرفه اللى مخزنين فيها اثاثهم كله يطمن عليها مسكرة كويس والا لا …حتى من دياؤ نومهم قضوهم وستفو اللوح فوق بعضه
حياة تشبح لى بنتها وخلاص ..واجعتها كيف مقعمزة ومسبوهة وخلاص
-حياة عيونها مدمعات/ البنت معش عندها احساس بكل ..
ولا تركيز
-عبدالرحمن / يا حياة خيرك راك تعبتينى ..متقولش عليك متعلمه ومثقفه ..مش قالنا الدكتور ان هكى بيصيرلها بدايه العلاج ..وبعتالى ساهل
-حياة/ ليها قريب شهرين تاخد فى الحبوب وحالتها ماتحسنش
-عبدالرحمن / انت بتهبلينى..اهو سيبت خدمتى وحالى و بنرفعكم لى ايطاليا …نلحقو الاولاد غادى .. ونعالجو بنتنا كويس.. شن تبي ثانى .. ومرات حتى نقعدو ديما غادى
شرين تليفونه …شاف لقاه خوه وسيم
-رد عليه / هيا اهو نازلين
طلعو من الممر
-حياة / كنزى …هيا نوضى ماما عمك جى
-كنزى عيونها مدمعات / هيا يا ماما
حياة قلبها واجعها… برغم المهدئات القوية اللى واخدتها كنزى .. واللى المفروض دايرتلها لا مبالة …الا ان دموعها مزالو ينزلو …وحالة الكآبه ما فارقتهاش
___________________________________
–
فى العيادة …
ايوب واقف مع عدايله وخوه حسن فى الممر ….
شوى وخش زكريا ايسلم …
-زكريا / الف سلامه عالعيله يا ايوب
-ايوب / الله ايسلمك …قلتلك ماتجيش واتعب روحك
-زكريا / لا كيف عاد ..مرت خوى مريضه لازم نجى نحمد بالسلامه …ربي يشفيهالك يا عرفى
-ايوب / تسلم ربي يحفظك
مشى زكريا وقف جنب حسن ايهدرز عليه
-زكريا / انت تشوف فالحال .. ووفاة موسى مش ساهلة علينا .. لكن الموضوع انا قاعد شاد فيه
-حسن / والله شن منقولك .. البنت بوها وامها حيين.. وشيرتها عندهم …انا ماعندى مانقولك غير انى نتشرف بيك ..لكن الكلمه الاولة والاخيرة لى بوها
-زكريا / ربي يعلى مقدارك … وانا فاهم الموضوع ..والله حتى امى كل يوم تنقز عليا
وقام يده مسح دموعه / لكن انا مش قادر اندير اى خطوة قبل ما يطيح حزن موسى
-حسن / نشهد بالله معاك حق.. تى كانا احنا قاعد حارقنا لتوة .. امالا انت وايوب كيف
-زكريا / خلاص امالا كلم عويلتكم …وقوللهم انى مازال نبى البنت …ولولا العارض اللى صار ممكن اليوم كنا حتى متزوجين
-حسن / انشالله خير .. نشوف بوى ونرد عليك
انفتح باب دار روقيه..طلعت منه سهام وسماح … شاورو لى حسن بالسلام من بعيد ونزلو مع ازواجهم …
وبعدهم طول طلعت امنه وبنتها ايناس زكريا يشبحلها وفرحان مش مصدق …محلا هالصدفه من قبل مايتوفى موسى ماشافهاش
وهيا جت عينها فى عينه … نزلتها خافت من خوها حسن
مقابلها….اما حسن قريب رقاله السكر والضغط لما طلعت ايناس وزكريا واقف ..زى كل اخ ليبي ايغير على اخته
-حسن عيونه حمر/ انزلو تحت للسيارة اهو لاحقكم
-امنه زبطت ولدها / باهى
-ايوب / شويا بس.. خل تطلع حناى وصلوها فى طريقكم
-زكريا / نستادنكم توة …
-ايوب / ادنك معاك …
-خش ايوب للغرفه / حناى خلى حسن يوصلك للحوش اكيدة رجليك وجعوك من التقعميز …
-سالمه / علاش انديرو فى تعبة لى حسن …تو انروح معاك وخلاص
-ايوب / عندى شغل يا حناى ..
-سالمه / مدامه هكى تو انوض معاهم وخلاص …
سلمت على روقيه وطلعت
نزلت هيا و امنه وبنتها من الاسانسير ….
واستادن حسن من ايوب / توصى حاجه
-حط ايوب يده ع كتف حسن / نوصى سلامتك يا حسونه ومشى حسن وراهم للاسانسير ….ونزل معاهم
وخش ايوب لغرفه روقيه وسكر الباب وراه …
ومش قعمز جنبها عالسرير وحضنها …
-روقيه حطت راسها على صدره / مش قلت لى حناك عندك شغل
-ايوب / وانا توة شن ندير … حتى هدا اسمه شغل .. اندلع فى حبيبيتى ونواسي وناخدها فى حضنى
-روقيه / نحبك
-ايوب / نموووت فيك
_____________________________________
–
ثانى يوم ….
روقيه روحت طلعت من العيادة ….
فاتت على حوش بوها بيش اطمنه قبل ماتروح للحوش
-ابراهيم / الحمدلله انك بخير يا بنتى ..والباقى كل شى يتعوض
-روقيه باست يده / الله يسلمك يابوى ..ويطولى فى عمرك
قعدت شوى مع مرام فالمطبخ
وايوب قعد ايهدرز على عمك ابراهيم …طبعا ابراهيم من لما دار ايوب نسيب وهوا يعشقه ويموووت فيه ومفضله على رجالات سهام وسماح …غلاوته من غلاوة روقيه
وبعدها طلعت …وصلها للحوش
-سالمه / مرحبتين ببنيتى
-روقيه / اهلين يا حناى
-سالمه / انشالله مانفقدك يا بنيه …الحوش منغيرك مظلم
-روقيه / ربي يحفظك يا حناى .. انتى نوارتنا
-ايوب / وانا بديت عالرف
-سالمه / لاااا كيف اوليدى
-روقيه / تى انت الكل فالكل
-ايوب / المقاول بيسلمنى الحوش غدوة
-روقيه فرحانه/ بلحق
-سالمه / نزيدو حتى يومين عالاقل اتجى الناس لروقيه
تحمدلها بالسلامه …
-ايوب / اصلا انا ما رافع شى من هنايا .. بنخلى الاثاث والخوش كيف ماهوا .. وبندير اثاث جديد غادى
-سالمه/ اما انا سامحنى ..دارى نبيها هيا هيا ترفعهالى بيش مانحسش بالوحش
-ايوب / حاضر على راحتك
-روقيه/ حتى احنا دار نومنا جديدة ..ا فعهالنا هيا وخلاص
-ايوب / باهى توة غير نكمل الفرش والحاجات الثانية وبعتالى ساهل
-روقيه / ربى يعاونك
وشرين تلفون ايوب ..قام التليفون شاف لقاه امحمد
فتح الخط طول / بشر
-امحمد / لقيته خلاص
-ايوب / متاكد هوا
-امحمد / غير تعالة وبعتالى ساهل
ستادنهم وطلع
_____________________________________
–
فى مكتب امحمد ….
-امحمد / قلتلك هوا … والدليل عندى.. شريته بالفلوس الغاليات
-ايوب ماسك مسدس فى يده والدخان فى فمه / ورينى ترا
قام امحمد التليفون واتصل ….
-امحمد / ايوة با ادريس تعالى …
وسكر الخط …وشبح لى ايوب وابتسم ….
شويا وطق الباب …خش شاب فى عمر الثلاثين
-ادريس / السلام عليكم
-ايوب وامحمد / وعليكم السلام
-امحمد / احكى يا ادريس اللى حكيتهولى بكرى
-ادريس / نبى الامان
تلفت امحمد لى ايوب ….
-ايوب/ عطيناك الامان …
-ادريس / سيدى الفندى عياد هوا ورا الموضوع كله وهوا الل لعب بالفرينوات متع سيارتك يبي يقتلك اانت جت فى صاحبك
وقف ايوب بعصبيه هجم عليه شده من رقبه سوريته / يا مسخين يا مجرمه …
وطاح فيه كفوف
امحمد وقف ولف من ورا مكتبه يجرى وشد ايوب
-امحمد / انت عاطى الامان للراجل
-ايوب / تى اقسم بالله لما نشرب من دمهم
وتلفت لى ادريس وقام يده / اما انت.. مدامنى عطيتك كلمه قدام التريس ..والله مانى ماسك … لكن تقول الصدق وتحكردى كل شى
-ادريس/ حاضر
وقعد يحكيله كيف خلوهم لين رقدو كلهم فى الزردة ومشو تحت سيارته هوا فكو الفرينوات بيش تنقلب بيه السيارة
بعد ما ستجوبوه ومغصروه امليح …قررو يحبسوه عندهم فترة تنفيد العمليه…خايفين يقلب عليهم …
قبل مايمشو لى عياد ويحرفوله اياماته ..طلبو طلبيه سلاح من تركيا.. كلاشنات …قالوللهم توصل بعد اسبوع
_______________________________________
–
فى هداكه الاسبوع …
ايوب ايراجى فالسلاح … وفات فيه كمل اثاث الحوش وقض دار حناه ورفعها للحوش الثانى …..
خلاص انحط فالامر الواقع .. وسكن مرته وحناه فالحوش الجديد ….
روقيه الدور الثانى وعمتك سالمه الدور الاول
جاب زوز شغالات لى حناه…وشغالة لى روقيه
هدا كله كملوه خوته حسن وحسين …هوا لاهى
ايدير فى صفقه السلاج متاعه وداير بين عيونه الانتقام لى موسى .. وقتل اللى تسببو فى موته اليوم قبل غدوة ..غير ايراجى فالسلاح ….
ومن كثر ما خايف علي مرته وحناه قرر ايسكر الحوش
…ويرفع حناه لى حوش خوها …وروقيه لحوش اماليها …
فالليل …
روقيه وايوب فى دار نومهم متكيين عالسرير ويهدرزو
ايوب متقعد على خلفيه السرير وروقيه فى حضنه
-ايوب / عشان خاطرى حبيبي ..امشى لحوش اماليك وحناى نبيها تمشى لى حوش خوها ….
وحط يده على شعرها / انا قاعد نترجى فيك من بكرى خودى بخاطرى
روقيع تبكى .. حست ان فى حاجه
-روقيه متكدرة / وراس حبيبي ما ادس عليا كانا فى حاجه قولى انا مرتك وسرك
-ايوب يضحك / قلنالك مافى شى حبيبتى … انا ماشى مزرد مع صحابى وبنروح الاسبوع الجاى
-روقيه / توة قبل شوى قلت انك بتقعد فالحوش..وتوة تقول
مزرد .. معش فهمتك ..احنا كيف سكنا ليش بطلعنا
-ايوب / اوووووف علينا عاد ..وتى روحك غدوة بنوصلك حوش بوك
-تقاعدت وقعمزت مقابلاته / يا بتقولى خيرك …يا اما كانك ناوى ترفعنى لحوش بوى …رانى منمشى غضبانه ..ومعش تحلم نولى
قعمز ايوب مقابلها/ ياساتر ياساتر …هدا كله على زردة مع صحابى ….والله ما نى مصدق ودانى .. عندك علم انك جرحتينى بالجملة هادى
-روقيه تحشمت / وانت ماجرحتنيش لما تبينى نمشى حوش بوى وانت داس عليا الحق وكل مرة تخلقلى سبب
وقامت صبعها / ولعلمك لو مشت يوم لحوش بوى غضبانه مستحيل نرجعلك لو من تبعتلى ..
وبعدت عليه وقعمزت حاشيه السرير وتلفتتله / انا الموضوع هدا نتحسس منه ..ولو قلت انا غضبانه مستحيل كرامتى تسمحلى نرجع قدام الناس اللى سمعت
-ايوب يضحك وضرب التحيه / عُلم وينفد فندى روقيه
-روقيه تعصبت / نحكى بلحقه راهو.. مش هازى ودايرها ضحكه وبصارة انت
-ايوب داس ضحكته / انا داير الموضوع ضحكه …بالعكس انا والله موافق على كل كلمه قلتيها ….وهادى توقيعتى انى موافق على كل شروطك .. راك انتى الكبيدة كانا ماتدريش على روحك ?
وفتح القجر اللى جنبه وطلع ورقه وبيرو ….
حطها على رجله كتب عليها / اوافق على جميع شروطك …..
وحط صبعه على خشمها خلاها تضحك / وهاااادى توقيعتى انى موافق على شرطك هدا …..ووقع
-روقيه تاخد فالورقه / ايوووه هكى نبيك
شافت التوقيعه … وجهها تغير ….طول عيونها تعبو دموع
انصدمت …التوقيعه هادى جايتها زمان فى ورقه تهديد
انسحبت من جنبه….ووقفت….حطت يدها على فمها وعيونها معبيااااات دموع وتشبح للتوقيعه …كانا عقلها مايبيش ايصدق ويقوللها اتأكدى
ايوب وقف جيهتها يبي يحضنها فكت نفسها منه منغير ماتتكلم
-ايوب حاير / خيرك حبيبي…فى شى
-روقيه قعمزت عالسرير ونزلت راسها تحت ..والورقه مازالت فى يدها / جيبلى وايبس نبى نمسح بطنى شحطت عليا
-ايوب / حاضر …
وطلع …..
وسمعت روقيه الباب تسكر وراها
قامت تليفونها واتصلت بى معاد ولد خالتها / تووووة تجينى انت وسهام نبى نمشى حوش بوى …
-معاد / خيرك اللطف فى حاجه يا روقيه
-روقيه بدت تبكى / ايوب ماتكلماش ..قلتلك نبى نمشى حوش بوى …انا نعرف شن ندير
وسكرت الخط …..
وقفت ……..تلفتت وراها ……
لقت ايوب واقف وراها وما طلعش اصلا..وسكر الباب بالكدب يبي يسمعها شن تقول
ايوب يشبحلها مصدوم خيرها تكلم فى معاد وتبى تمشى حوش بوها …وهيا تشبحله ومصدومه معقولة هوا المجرم اللى كان ورا حرقه سيا تهم وتعديبهم اسابيع ?
_______________________________________
تمت ….ويتبع
اليوم روقيه شبه عرفت حقيقته ….لكن غدوة بتتاكد …زعما هوا بيعترفلها …غدوة نشوفو الاحداث اللى بتصير
نحبكم ❤