مسلسل سعاده كاذبه الجزء الاخير

مسلسل سعاده كاذبه

الحلقه 98

نا ؛؛ فيش اخبار علي خوتك وعلي الحوش 
نجاح ؛؛ كيف ماسمعتيش شن صاير
نا ؛؛ ﻻ شن في
نجاح ؛؛ خنقتها العبره ونزلت راسها وبصوت مخنوق
نعيمه مريضه

نا ؛؛ مرض شنو كنها
نجاح ؛؛ سرطان الثدي تقريبا
نا ؛؛ هييييييييييي شنو
نجاح ؛؛ لها مده تشكي بس ماقالتها للحد بعدها ياحنه تمت تمشي هنا هم قالولها احتمال كبير سرطان الثدي تبي تمشي للتونس
نا ؛؛ حطيت صورة اعيالها قدامي وخنقتني العبره ودمعتي انزلت
ربي يشفيها وجعتني الحق مشيتلها
نجاح ؛؛ ما تستقبلش في حد امسكره علي روحها في الشقه وامل قالت طول الوقت تبكي

نا ؛؛ ونا ليش ماقالتولي
نجاح ؛؛ انا بروحي ماليا كم يوم سمعت بها قالتها ليا اميره اتصدقي اميره حكتلي ودمعتها علي خدها نا بروحي بكيت وجعتني هي صاح مادرتش فينا خير بس مرات خونا ام اعيال خويا وجعوني العويل وااااجد

نا ؛؛ خذيت نور في يدي واضبطتها وبكيت

نجاح ؛؛ اس خلاص كنك انتي في زبونه شكلها انزلت

نا ؛؛ مسحت ادموعي
مديلي ميه
نجاح ؛؛ خوذي

البنت ؛؛ السلام عليكم
نجاح ؛؛ وعليكم السلام
البنت ؛؛ تو كان خطيبي هنا وحجز ديكور امتع البحر
نا ؛؛ امنزله اعيوني لوطه شربت ميه وانشرب في نور

نجاح ؛؛ تفضلي قعمزي
البنت ؛؛ قعمزت علي الكرسي اللي اصداري واتبحت فيا
نجاح ؛؛ اسم خطيبك احمد
البنت ؛؛ اها يوم 24 7
نجاح ؛؛ شن تبي اتغيري الموعد ولا شنو
الينت ؛ ﻻﻻ امغير جايه نبي بونبونايره ونبي نختار الكروت وفيلو هنا
نجاح ؛؛ ماشاءالله
البنت ؛؛ اتبحت فيا زين
نا ؛؛ ما دققتش فيها واجد وكنت لاهيه في نور

البنت ؛؛ ممكن سؤال
نا ؛؛ بحتت فيها بالاستغراب
تفضلي
البنت ؛؛ اسمك ايه صاح
نا ؛ ان شاءالله
البنت ؛؛ اتصدقي انك حقيره
نا ؛ استغربت وتمبت انبحت فيها
البنت ؛؛ وعبيطه وهبله ودرويشه وطيب اكتر من لازم ووووو اكبيده

نجاح ؛؛ ماشاءالله
نا ؛؛ وهو الصوت قربته
بنت ؛؛ نا اسماء ياهمي انسيتني
نا ؛؛ نزلت نور وصبيت
اسماء ؛؛ صبت وبسرعه واضبطتني بقوه
وينك وين اخبارك
نا ؛؛ ووو الدنيا اصغيره وينك ياحنه

نجاح ؛؛ تعرفن بعضكن
اسماء ؛؛ الابله هذه كانت صاحبتي في نفس الدرج اللي نسيتني تو ياخسارة العشره يا ويه
نا ؛؛ هههههههه نجك ليا
قعمزي
اسماء ؛؛؛ وين يا حنه متغيره
نا ؛؛ حتي انتي
اسماء ؛ يعني كان ماعرفتك ماعرفتني صاح
نا ؛؛ والله عارفه مابحتش فيك زين كنت لاهيه بس نبي نسالك احمد هو نفسه احمد الزمان
اسماء ؛؛ يعني ماعرفتيش
نا ؛؛ والله اول ما شفته حسيت وجه مار بيا واجد بس ماجمعش عقلي وفتت الحق يعني بس والله صحه لكي مازالتي معه
اسماء ؛؛ معه وامطلع عقلي معه اخري
نا ؛؛ ووو مااقدمها علاقتكم
اسماء ؛؛ عارفه روحي عنزت واجد معه بس شن اندير القلب وماايرده باهي انتي شن شكلك متزوجه
نا ؛؛ ايييي من زمان متزوجه هذه بنتي
اسماء ؛ ماشاءالله وليش جايه هنا
نا ؛؛ المكتب امتعي نا وخواتي
اسماء ؛؛ شنو
نا ؛؛ اهااا شفتني صار مني
اسماء ؛؛ ههههههههه باهي شن صار في قرايتك من متزوجه ومن امتي وكيف عرفتيه
نا ؛ ياحنه بعد الثانوي وقفت سنه ويعدها ازوجت طول
اسماء ؛؛ لكي مده يعني
نا ؛؛ اها
اسماء ؛؛ انا اللي عانز
نا ؛؛ ههههههه حشاك ماهو حايه للفرحك
اسماء ؛؛ المهم احكيلي علي راجلك

نا ؛؛ ياحنه رواده لا علاقه ولا شافني مرات خالي حكتله عليا خطبني طول وعندي عيالين تؤام اكبر من نور هذه
اسماء ؛؛ شن اسمه وشن يخدم اللي واخذك
نا ؛؛ مراد دكتور نساء
اسماء ؛؛ اووووو طبيتي في الدكاتره ماشاءالله والله
نا ؛؛ نصيب باهي وانتي
اسماء ؛؛ ياحنه قاعده كيف ما انا واحمد خطبني له 3 سنين ونص وتو ربي حن عليا وفرحي ح يطلع
نا ؛ ووو علاقتكم قديمه انتو
اسماء ؛؛ اها ياحنه سنين طويله بكل باهي شن اخبار خواتك زمان نذكر عندك اختك اصغر منك هرجتها واجده راه
نا ؛ اهااا ارجيوه
اسماء ؛؛ ايوه رجاااء شن جوها
نا ؛؛ اكويسه ياحنه حتي هي ازوجت بعيلها
اسماء ؛؛ شكلي نا اللي عنزت
نا ؛؛ يافرخه مانك حايه تحجزي
اسماء ؛؛ خطرتي عليل هيا نبي انقيس الفيلوات
نا ؛؛ تعالي تو نساعدك انا
اسماء ؛؛ عندي خصومات طبعا
نا ؛؛ ادللي هيا تعالي في غرفه هنا للقياس
اسماء ؛؛ هيا

نا ؛؛ اهو هذا جا عليك حلو
اسماء ؛؛ يعني تمام
نا ؛؛ والله عجبني يا اسميوه
اسماء ؛؛ باهي تمام تو ناخذه
نا ؛؛ تو انسجل اسمك خلاص
اسماء ؛؛ تعالي ساعدني
نا ؛؛ ههههه حاضر اصبري
اسماء ؛؛ عارفه انا جايه حط عبني في هذا وفي الاول
نا ؛؛ اهااا حتي عجبني اساسا ذوقي هو جبته من تركيا
اسماء ؛؛ ماشاءالله متغيره ومتسمحه يا ويه
نا ؛؛ ههههه ان شاءالله عقبالك تزوجي واتجيبي الاعيال وتعرفي صداعهم

اسماء ؛؛ ويه شن عمتي عيشه
نا ؛؛ خذيت الفيلو وتميت انعلق فيه وخنقتني العبره
الله يرحمها
اسماء ؛؛ شن من امتي
نا ؛؛ في عيد الاضحي اللي فات
اسماء ؛؛ الله يرحمها تي نحن كيف انقطعنا هكي
نا ؛؛ الحياه هكي
اسماء ؛؛ انتي كنتي هاديه واااجد وخوتك كان مايبوكش اديري صديقات
نا ؛؛ هيا تعالي اختاري باقي حاجاتك
اسماء ؛؛ بعدك طولت وخويا ايهزب فيا لما انروح بعد المغرب
نا ؛؛ كيف بسيارتك
اسماء ؛؛ اهااا

نا ؛؛ طلعت والقيت نجاح تخدم مع وحدات مشيت شور الطرمات وجتني اسماء تمت تختار في الكروت البونبونايره

مراد ؛؛ السلام عليكم
نا ؛؛ التفت وشفته
عليكم السلام
اسماء ؛؛ كيف هذا يبي يزوج تو بس عليك طرف
نا ؛؛ اسماااااء كنك انتي
اسماء ؛؛ عليك ابتسامه اتجننن
مراد ؛؛ سمع كلمتها نول ومسك نور
ها بابا لعبتي

نا ؛؛ بحتت في اسماء ورفعت حاجبي
اسماء ؛؛ ههههههههه طيح سعدك راجلك
نا ؛؛ تو كان ما راجلي كيف انرد عليها بالابتسامه

نجاح ؛ تفضل مراد
مراد ؛؛ ﻻ شكرا خليك متريحه وين مجدي
نجاح ؛؛ طالع تو ايجي
نا ؛؛ ها اسماء شن اخترتي
اسماء ؛؛ خلاص هذين
نا ؛؛ تم
خذيت الكرت ومشيت بيه عند نجاح
نجاح نبو كرت هذا والبونبونايره هذه
نجاح ؛ هذا ناقص يا ويه راه عند منه 100بس
نا ؛؛ كيف
نجاح ؛ تعالي شوفي القيت اميره امسجلته ليا شكلها في طلبيه في الصبح كبيره

اسماء ؛؛ نا نبي 250كرت ونقانه عجبني
نا ؛؛ به اصبري
نجاح ؛؛ تعالي قعمزي علي المكتب نمشي انطلعها بونبونايره
نا ؛؛ به
نجاح ؛؛ كم تبي
اسماء ؛؛ 500
نجاح ؛؛ تم

قعمزت علي المكتب وبحتت في مراد وهو ايلعب في نور وتميت انتراسل مع محل من تركيا علي النت

غريبه امروح بدري
مراد ؛؛ اهاا كملت بسرعه
نا ؛؛ الاعيال مازالو مع طارق
مراد ؛؛ طارق تو ايجيبهم
نا ؛ اسماء انا تو اهو حكيت مع محل اللي نتعامل معه وقالي في ونجاح اختي مسافره تو اتجيبلك يعني ترجي
اسماء ؛ اكيده ويه
مراد ؛؛ بحت فيها واستغرب وحسها تعرفني
نا ؛؛ ان شاءالله راه فرحك مازال عليه
اسماء ؛ خلاص تمام
نا ؛؛ مبروك ان شاءالله
اسماء ؛؛ يبارك فيك ان شاءالله
نجاح ؛؛ اهي حاجاتك
اسماء ؛ شكرا بكم
نجاح ؛؛ ب…
اسماء ؛ تم كيف انتواصل معاك
نجاح ؛؛ علي النت انردو وفون المكتب اهو الكرت

اسماء ؛؛ شكرا
ادفعت وطلعت
نا ؛؛ هيا
مراد ؛؛ ايجي مجدي
نجاح ؛ مجدي امطلع ايه للملاهي ايلعب فيها تو اقريب ايجي
مراد ؛؛ تبي اتسافري
نجاح ؛ اها عطوني اسماء الاماكن
مراد ؛؛ تم تو اندزهن لكي في رساله
نجاح ؛؛ تمام
نا ؛؛ خلاص سلام
نجاح ؛؛ سلام

نا ؛؛ طلعت وركبت السياره
مراد ؛؛ ركب نور لاوره وجا ركب جنبي
تعرفيها الزبونه
نا ؛؛ كانت تقرا معي ليش
مراد ؛؛ وجها مار عليا واااجد
نا ؛؛ شن تقصد انت
مراد ؛؛ مالوف وجها
نا ؛؛ وطي اعويناتك احسن انت
مراد ؛؛ ههه اتغيري يعني
نا ؛؛ اكيده مش حبيبي من حقي انغار عليه
مراد ؛؛ بحت فيا وهو مبتسم وغض فمها التحتني
نا ؛؛ بشويه علي روحك
مراد ؛؛ هههههه شن جو ظهرك
نا ؛؛ تمام الحمدالله كنك ماشي الطريق هذه
مراد ؛؛ عشانا في الحوش
نا ؛؛ ليش من امكلم
مراد ؛؛ اشويات غادي كيف ما قالولكش
نا ؛؛ ﻻ والله
مراد ؛؛ تو انجيب كبده تبي حاجه اخري
نا ؛؛ جيبلنا حتي للحوش
مراد ؛؛ اكتر انسان يشري في الكبده
نا ؛؛ هههههه انزل انزل
مراد ؛؛ نزل للمحل وشراء لحم وكبده
ومشينا للحوش والقينهم ديرن قعده في الجنان

الهام ؛؛ وينكم كنكم طولتو
نا ؛ كنت في المكتب وين رجاء
الهام ؛ اتغير لحمادي
نا ؛؛ اها هدي شن جو
هدي ؛؛ تمام الحمدالله حال العمل للحوش
نا ؛؛ شن تمام ماشيه
هدي ؛؛ غمزتلي
نا ؛ صبيت وقربت منها وقعمزت جنبها
ها شن جوك تو
هدي ؛؛ تمام الحمدالله محمد بعد العلاج فرحان لان تحاليل تمام تو والله كان ساكت وغام ومايبيش ايبين
نا ؛ معناتها وتي روحك للحمل
هدي ؛؛ ان شاءالله هو مراد امكلم الدكتوره
نا ؛؛ صاح
هدي ؛؛ اها قالتلي خوك وساني عليك ومتابع معاك خطوه بخطوه
نا ؛ انتي غاليه علينا ياهدي ربي ايفرجها عليك ان شاءالله
هدي ؛؛ ان شاءالله والله مراد هذا امرفعلي راسي اتصدقي بعد مانمشي ويعرفوني اخته انحصل احسن معامله نين انتحشم نا من المرضه من كثر اهتمام بيا حتي دكتوره حكتلي قالتلي اول مره انعالج مريضه وانخاف اشويه ودقيقه معها واجد

نا ؛؛ هههههههه اكيده مراد امركب عليها
هدي ؛؛ ههههه اكيده

وانفتح الباب وخشو ارحيمه وبيده وطارق

ارحيمه ؛؛ هيييييي بابا
مراد ؛؛ اووو تعال بابا
طارق ؛ ابسرعه خليك راجل
بيده ؛؛ راجل نا
رجاء ؛؛ طلعت وفي يدها حمادي
خيرات

نا ؛ اهلا جيبيه نبي انشوفه
رجاء ؛؛ هه خوذيه مليت منه امدرهلي كبدي اليوم مريض بطلت ونا انغيرله
نا ؛؛ كنك بشويه عليه
رجاء ؛؛ قعمزت جنبي وهي غمتلها
مزعج يا ويه مزعج لا نرقد ولا انتريح

طارق ؛ ايبحت فيها وسكات
نا ؛؛ انتي نظمي وقته
رجاء ؛؛ تعبت منه انديرله ما انديرله امعاندي
عمتي ؛؛ الاعيال يبو وسعت بال
رجاء ؛ ونا ماعنديش بال واسع
طارق ؛؛ هاتي يا ايه تو نمسكه
رجاء ؛؛ ايوه انت اللي امخربه اتجي اتلعبه وبعدها اتحطه ونا نقعد انسكت فيه
طارق ؛؛ بحت فيها وفنص
رجاء ؛؛ غيرت وجها وبحتت فيا واعيونها ملينات ادموع
نا ؛؛ ارجيوه كنك

رجاء ؛؛بصوت واطي
نفسيتي بعد الصفر
نا ؛ كنك
رجاء ؛؛ حامل اخري شفتي
نا ؛؛ صاااح مبروك
رجاء ؛؛ تي مش وقتها فاضيه انا تو فاضيه ماعندي محمد انعاني فيه ونبي نشتغل فيش راحه بكل سكرت الاربعين شالت طول
نا ؛؛ كنك ماخذيتي مانع
رجاء ؛؛ مش خاطره عليا نبي نحمل طول لما سكرت الاربعين تريحت اشويه وقالت تو نمشي للدكتوره تعطني مانع تاخرت بعدها مشيت قالتلي انتي حامل ومن وقتهت ونا وطارق متعاركين
نا ؛؛ هذه نعمه
رجاء ؛ عارفه بس مش هكي طول حتي صحتي تخرب هكي كله من هو اخرني علي الدكتوره وانقوله دير مانع هو مايبيش ايقولي ديري انتي مادخلنيش انا بالله عليك مش امساعد

نا ؛؛ وسعي بالك بس مااهو نا عندي 3 اعيال وحامل

رجاء ؛؛ من جدك انتي
نا ؛؛ اهااا
رحاء ؛؛ بعقلك انتي تهلكي صحتك هكي وبعدين العيال وجيج نا محمد وامخرجني طول اليوم يبكي يبي يد
نا ؛؛ مراد يبي ونا مانقدرش نرفضه وبعدين يوم اللي نفسيتي اتعبت الوحدين خلوني نضحك هم اللي شغلوني وملو وقتي وضحكتهم عندي بالدنيا راه والله ايزيلو في الهم لما يضحكو ولاه لما ايقولك يا ماما والله بالدنيا مافيها راه مازالاي ماشفتي شيء اهو شوفي بيده ضروري يومي ادير حتجات ايخلني انتعصب وبعدها نقعد نضحك وارحيمه الحنون امتعي لما ايشوفني ابروحي ايجني وايضبطني وايبوسني ونور ماتحركش بكل من جنبي متعلقه بيا و بمراد واااجد والله ايهبلو راه ونا مابيتش نرحم روحي ولا نحرم راجلي منهم وراجلي يبي تو هو قالي بعدها خلاص

بيده ؛؛ رجاء راه طارق عنده اكبيده
رجاء ؛؛ مسحت دمعتها وبحتت في بيده
شنو يا بيده
بيده؛؛ طارق عنده اكبيده

حاتم ؛؛ هذا يبي ايخرب ييتك يا طارق
طارق ؛ تعال هنا يا بيده يا كذاب
رجاء ؛؛ تعال بيده احكيلي علي الكبيده من
بيده ؛؛ علي الفون ايكلم فيها
كلنا ؛؛ هههههههههه

طارق ؛؛ بيده راه خيرلك
رجاء ؛؛ بحتت في طارق
كيف صار
بيده ؛ اسمها رجاء
نا ؛؛ هههههههههههههه العيل يضحك عليك
مراد ؛ هههههه مش ساهل بيده هذا
بيده ؛؛ رجاء قوليله يعطني الفون
رجاء ؛؛ تو نعطيك فوني
بيده ؛؛ ﻻﻻ عنده لعبه ثمحه
طارق ؛؛ تعال هنا او نعطيك
مراد ؛؛ انقلها ليا العب
طارق ؛؛ به

قعدنا انهدرزو تعشينا ولمينا الحوسه وروحنا

……………………..………..

طارق ؛؛ خطا راه تشكي مني عند اختك
رجاء ؛؛ خشت للدار وقعمزت علي السرير ومعها محمد
طارق مش فاضيتلك
طارق ؛؛ مشي وراها
نحكي نا ماتمشيش واتسيبني
رجاء ؛؛ نعم ها
طارق ؛؛ احكي معي بالادب راه خيرلك
رجاء ؛؛ شن تبي ادير مثلا انت تبي تطمنسي تبني انكون في الحوش وانعاني اعيالك وخلاص
طارق ؛؛ خبط السرير بكراعه
كنك انتي مش عاجبك مثلا
رجاء ؛؛ ﻻ مش عاجبني لان نحن متفقين اتفاق تاني
طارق ؛؛ صارت هكي شن تبي اديري هيا وريني
رجاء ؛؛ انت متزوجني علشان هكي
طارق ؛؛ اها متزوجك علشان هكي شن عندك كلام
رجاء ؛؛ طارق خطاني كذا تعبت راه
طارق ؛؛ ليش تزوجي من اولها لو ماتبيش مسؤليه
طلع للصاله وسيبها في الدار تبكي وتم ايدخن

رجاء غيرت لمحمد ورقدته وصبت دوشت وغيرت دبشها ولقته راقد علي الكنبه ومازال ايدخن ومتعقد ولعت الضيء عليه

طارق ؛؛ طفي الخرا
رجاء ؛؛ طفت الضيء وجت وقربت وقعمزت جنبه وتمت تبكي
طارق ؛؛ جايه اتكملي في ابكاك هنا
رجاء ؛؛ والله نفسيتي تعبانه
طارق ؛ قعمز وتم ايبحت فيها
علشان حامل شوفي روحك يا رحاء اتحسسي فيا ماتبيش مني اعيال وجبتي محمد بس بيش اتسكتني
رجاء ؛؛ والله ما هكي بس تفاجت مانخستبش روحي بشرعه نحمل هكي وبعدين حتي محمد ينهضم حقه في الرضاعه
طارق ؛؛ علي اساس انتي اتخبي اترضعيه
رجاء ؛؛ صبت وقعمزت علي كرعيه
اسفه حبيبي
طارق ،؛؛ من امتي ونحن علي الوضع هذا
رجاء ؛؛ والله خاطري نخدم واندير سياره وانت امواعدني هكي
طارق ؛؛ سياره مستعد انديرلها لكي من بكره بس انتي اهدي ليش تسبقي في الأحداث والعمل تو تلحقي عليه حاجه ماهي ناقصتك تو
رجاء ؛؛ اسفه وهذا راسك انبوسه
طارق ؛؛ معش تحكي حاجتنا بره
رجاء ؛؛ ايه نعرفش اندس عليها وبعدين ايه قالتلي كلام هي اللي خلتني تو هاديه ونحكي معاك هكي
طارق ؛؛ بحت فيها وهو ساكت
رجاء ؛؛ والله انحبك ونا نبي انعيش حياتي معام شوف في الاول حملت وانت عرفت ان الحمل واعر وشقي ومعانه بعدها جا حمادي وشغلني وقتي ونا نبيش ننشغل غليك واجد
طارق ؛؛ كرها في حضنه واضبطها وباسها علي راسها
رجاء ؛؛ وهي تبكي
والله انحبك والله
طارق ؛؛ معش تشكي لو اتحبني
رجاء ؛؛ حاضر
طارق ؛؛ واللي تبيها انديرها لكي وسياره مستعد من بكره نطلع نشيرلك وحده بس نا عندي شروط
رجاء ؛؛ متقبله كل شرطوك
طارق ؛؛ ساهله تو لما نشريها
رجاء ؛؛ نجك ليا
واضبطته بالقوه وباسته علي الحيه
حبيبي نبي لونها اسود راه
طارق ؛؛ ليش
رجاء ؛؛ انحب لون الاسود نا
طارق ؛؛ ان شاءالله خير
فونك ايرن
رجاء ؛؛ يييي جو جنب حمادي
هشا تجري ومسكتت الفون
ايوه
اميره ؛؛ بكره تعالي للحوش هلي
رجاء ؛؛ كنك تبكي
اميره ؛؛ انفضوه يا ارجيوه
رجاء ؛ شن
اميره ؛؛ اهااا نبو انفضو الحوش خلاص عادل حصل واحد يشري ويبي يسافر
رجاء؛؛ سكرت في وجها وتمت تبكي
طارق ؛؛ سمعها حاها بسرعه
كنك
رجاء ؛؛ حوشنا انباع
طارق ؛؛ شن
رجاء ؛؛ حوشنا حياتنا طفولتنا ذكريتنا انبعت كله بس علشان الفلوس انا نش عارفه كيف ايهون عليه ايبيع كيف بس

هذاك الليل كلنا رقدنا وادموعنا علي خدنا لان تاني يوم ماشين من الصبح للحوش

مراد ؛؛ كوني قويه
نا ؛؛ وخنقتني العبره ودمعتي انزلت
كذاب كان قالتلك حاضر
مراد ؛؛ وجعته الكلمه برم وجه
نا ؛؛ نزلت من السياره وخشيت للحوش ومعي العويل والقيت ايمان راقده علي سرير ماما وتبكي وامل جنبه
من لما شفت الموقف قلبي انشق
ايمان ؛؛ ليش هكي يا ويه ليش يبو ايبعوه ليش
نا ؛؛ جيتها بسرعه واضبطتها
اميره ؛؛ خشت وهي تبكي ولما شفتنا انسدت علي الساس وانزلت

الحوش امظلم ياناعليا يا حوشنا اللي اظلم وغابت اللي ضاويتك
امل ؛؛ جتها بسرعه وتمت تضبط فيها
انقوللكن كاره الحوش كارهت امظلم بارد معش فيه طعمه شفتنا تو باهي انتن قعدات بره شن اتقولن علينا نحن نا وخالد اقريب نطلعو من اعقولنا
رجاء ؛؛ خشت ولقتنا امقعمزات في الصاله ونبكو حطت حمادي لوطه ومشت طول لسرير ماما وقعمزت علي الارض وتمت تبكي بصوت عالي واتعيط
اميره ؛؛ رجاء صبي
رجاء ؛؛ تي شن انصبي انقهرت ماما سيبتنا وتو يبو اينهنو المكان اللي فيه رايحتها ليش هكي ليش
اميره ؛؛ هيا نحن جاين نبو انلمو الدبش
رجاء ؛؛ باهي حاضر تو اندسو ادموعنا وهمنا وانصبو انلمو تمام هكي ليش مكتبونا انخبو مشاعرنا ليش ديمه تبونا نزيفو وانبينو ان نحن اكثر تاس سعيده ونحن الهم ركبنا ومن نحن اصغار منحرمات من احسن اثنين في الدنيا ليش هكي ليش مكتوبلي نتعب ليش

خالد ؛؛ خش ولقنا كلنا نبكو بدون مايحكي قعمز علي الكرسي واعيونه ملينات ادموع
نا ؛؛ جيت وقعمزت علي ركبي
ماتبيعش
خالد ؛؛ وهو يبكي وبصوت مخنوق
ﻻﻻﻻ نبي انبيع نا

نجاح ؛؛ خشت وتمت اتبحت فينا

نا ؛؛ ليش تبكي تو
خالد ؛؛ علشان يبي ينباع يبي ينباع اللي عشت فيه اجمل انسانه اللي كانت ضاويه حياتي اللي كنت مستعد نعطيها من عمري بيش اتعيش اخري اللي نفديها بروحي كنت مستعد انديرلها اللي تبيه بس اتكون هنا في الحوش اتنوره لنا بس

رجاء ؛؛ خالد نا مستعده انعارض علي بيعت الحوش
خالد ؛؛ رجاء ما تكونيش انانيه انتن ازوجتنا وطلعتنا بس نحن اللي قعدنا وانشوفو فيه في مل طلعه وخشه فاضي وامظلم وبارد والله مرات نركب نجري بيش يعني ماتجيش علي الباب وانتخايل امي تفتح فيه ولا مرات انتخايل في روحي انشم في بنت طعمها ومرات انخش نقعد انتخايل في اصواتكن وصوتها وانتن تضاحكن وانخش عليكن وانتن اتغيرن الموضوع انتخايل في فرح كل وحده فيكن شن دارت وكيف اقعدت تبكي امي اكتر وحده كسرتها في طلعتها هي ايه يومها اقعدت في المطبخ الخارجي وتبكي ماحد فطنها الا نا خشيت عليها القيتها غارقه روحها في ادمةع واتقولي اكبيدتي اطلعت وازوجت بلا ما بوها ايزفها عارف شن قالتلها يا ايه

نا ؛؛ انبحت فيه ونبكي
خالد ؛؛ قالتلها ايه مستحيل اتسيبك مستحيل اتخليك اوحدك مانحسابش كلمتي هي اللي اتجي صاح وفعل الحوش كله طلع وانتي جيتي وقعدتي معها ماخليتهش اوحدها بكل حسيت طلاقك ربي كتبلك هكي بس بيش ماتسيبش امي وحدها وتقعدي معها لعند اخري لحظه في حياتها طول ما انتي حرجانه اتقولي ايه ماحد ياخذها الا مراد ماتخليش حد ياخذها عندك معلومه انها كلمت هيثم وهزبته علشانك
نا نبي انبيع الحوش لان مانبيش نقعد في مكان هي كانت فيه وعدت سيبته مش مصدق اني انشوف في الحوش وما نشوفهش وفي نفس الوقت مانبيش انبيع اجمل مكان ليا
صبا وطلع بسرعه وهو يبكي
امل ؛؛ مشت وره وهي تبكي
نجاح ؛؛ خليه يا امل
امل ؛؛ خالد اقريب يفقد عقله ان ماعمريش شفت راجل يبكي كيف ما خالد يبكي اتصدقن مره سمعت صوت ابكاه في الليل هنا لوطه خشيت والقيته امطلع دبشها ويضبط فيه ويبكي قالته كنك قالي سمعت حركه خشيت نجري نحسابها امي شفتنا خوكن لعند شنو وصل هذا عليش نبو انبيعو الحوش

رجاء ؛؛ جت ل امل وتمت تضبط فيه
امل ؛؛ والله كرهت روحي ودنيتي من كثر مانشوف فيه منقهره ويبمي وانشوف في الحوش فاضي ولا وحده فيكن قاعده تمنيت لو انن ماازوجنا وقعدنا كيف زمان نضحكو ونهدرزو وانديرو في مقالب لروحنا انتعارك نا وانتي وخالتي اتهزبنا ايه دير القهوه وتجي وتقعمز واتقول يا مامت انتي هذه قهوتك المره
امرايفه علي صوتها لما اتقول يا اميره صبي ديري عشاء ونقعدو نشرطو علي اميره شنو ايكون هو العشاء امرايفه علي صوتها لما اتقول ل ايمان هبا اطلعي وادهةري وايمان اتقول ﻻﻻ احمد قالي ﻻﻻ رايفت والله رايفت علي حاجات واااااااجده خالتي ماكنتش خالتي بس كانت امي التانيه اللي ماعمرها وجعتني ولا زعلتني ممكن امي نا اتزعل فيا واتوجع فيا بس مش كيف خالتي خالتي مشت وكسرتنا كلنا كلكم كرهتو الحوش ومعش جيتو بس نحن كرهينا وقاعدين فيه

نا؛؛ خشيت طلعت شنطه كبيره وتميت انستف في دبش ماما فيها وكل قطعه انطلعها من دولاب انتخايلها عليها وانتخيل موقف صار نبكي ودمعتي ناوله ومرات نبتسم لما نذكر موقف حلو وانرد نبكي لان خلاص فقدنها فقدنا اغلي انسانه فقدنا الحنان والحبه والطيبه فقدنا كلمة ماما فقدنا الحضن الدافي اللي نبكو فيه وهي اتبصرنا كسرتنا وعدت

نجاح ؛؛ بنات المواعين شن انديرولهن

اميره ؛؛ مانعرفش
امل ؛؛ بنات انتن خوذنا اللي تبنها وخلن اللي ما تبنهش لان قال صاحب المكتب سيبو الاثاث فيه الشراي قال عادي سيبوهن

ايمان ؛؛ معقوله انسيبو حاجات ماما هكي
امل ؛؛ الله غالب شن انديرو انتن خوذن اللي تبنا واللي ما تبنش خلنا

نجاح ؛؛ خلاص تو انشوفو

تمينا انلمو في الدبش ومواعين الغاليات علي ماما

انا ؛؛ ايوه خالتي شن الاخبار
خالتي فاطمه ؛؛ اهلا كيف حالك
نا ؛؛ الحمدالله ممكن نطلب منك طلب
خالتي فاطمه؛؛ تفضلي
نا ؛؛ تعالي باتي معنا في حوش هلي هنا نحن عارفينك انتي كرهتينا وكره الحوش بس هذه اخري ليله لنا في الحوش ونحن خاطرنا انكون كيف زمان ملتمين حتي خالتي سالمه تو اتجي ماتكسريش بخاطري وتعالي باهي علشان اخري ليله

خالتي فاطمه؛؛ وهي تبكي
نا مش كرهتكن نا كاره الدنيا ما تاخذ فيت الطيب وتقهرنا وحاضر تو انجي وانبات معاكن
نا ؛؛ نرجو فيك
صكرت وبحتت في رجاء
رجاء ؛؛ جا يوم اللي افترقنا فيه اهو الليله اخري ليله نلتمو فيها هتا في الحوش الليله ح انباتو وبكره كل وحده فينا تمشي للحوشها واتكمل حياتها بخاطر مكسور جوا

نجاح ؛؛ هكي ربي كتبلنا
ايمان ؛؛ كتبلنا التعب والشقي وفقدةمن نحن اصغار من نحن اصغار ونحن خيفات من الدنيا لان ماعندنش سند قوي
اميره ؛؛ خالتي سالمه ودعاء جن

خالتي سالمه؛؛ اول ما خشت تمت تبكي وتضبط في نجاح
دعاء ؛ شفتنا خشت تجري واضبطتني وتبكي

خالتي سالمه؛ ؛ خلاص عدت وحوشها اسمر وتو ح ينباع وح نطلعو كلنا منه وايعدي اغلي مكان علي اغلي انسانه ليا

خالتي فاطمه؛؛ جتنا وكان معها العشاء دايره امقطع وجايه تعشينا ولمينا الحوسه وقعمزنا كلنا

نا ؛ خالتي فاطمه ليش حرمتني منك وانتي عارفه روحك غاليه علينا ليش كرهتينا
خالتي فاطمه؛ ؛ مش هكي نا يا ايه عندي جرح جوا في قلبي هي صاح صبيتي بس والله كانت اغلي انسانه عليا والله كانت ليا اقرب من خواتي كنت انحس انها اختي الكبيره نا وهي عشرة عمر ليا معها 16 سنه ونا احس فيها اختي والله في مواضيع نحكيلهن ل مرحومه وما نحكيهن ل خواتي كنت انتحشم نحكي لخواتي بس هي مانتحشمش منها جيتكن وانتن اصغار والله ما اعتبرتكن الا بناتي من كثر ماهي غاليه عليا والله يا ايه مافي دمعه مانزلتيها ومانزلتها معاك في حوشي طول سنه ونص وانتي هنا نا ليلتي نبكي وننقهر وانقول كلها مني نا اللي كسرت ايه وخليتها اتعاني في العويل من هي اصغيره والله كل حاجه حسيتها حسيته بها معتك انا هذا عليش ما نبيش انشوفك نبيش انشوف اعيونك وهن يبكن بسببي

نا ؛؛ ﻻ يا خالتي مش سببك هذه الحياه نصيبنا هكي ربي كتبلنا هكي اني نتعب في حياتي ونطلق وانجي هنا جنب ماما ونحضر موتتها وانرد لمراد ربي كل حاجه كتبها مافيش حاحه اتجي هكي صدفه

اميره ؛؛ صاح فكرنا ماما اكتر وحده غاليه عليها ايه لان اتقول عليها اكبيدت الغالي ولان حتي اتقول ايه هي اكتر وحده شايله صفات بابا وحتي ان ايه كانت اكتر وحده تهتم بماما كلنا كانا انخشو نرقدو جو في الدار ماعاد ايه هي اللي كانت وحيده ترقد معها وماتسيبهش سبحان الله من ايقول كلنا نزوجو ونطلعو وايه اترد وتقعد معها فعلا كل مكتوبه ومش بالصدفه

دعاء ؛؛ من ايقول ايجي يوم اللي نقعدو ملتمين ونحكو علي ذكريتنا معها والله خالتي كانت بالنسبه ليا ماما
امل ؛؛ كنت انقول فيها لهن ماكنتش خالتي بس كانت امنا البي ماعمرها وجعتنا
خالتي سالمه؛؛ الله يرحمها ماعمرها وجعت حد ديمه قلبها طيب وياما اتشيل فيه نين وجعها قلبها
خالتي فاطمه؛؛ بنات شن صار مع نعيمه
امل ؛؛ عند هلها امسافرين الايام هذين
خالتي فاطمه؛؛ ربي يشفيها
رجاء ؛؛ زمان كنا انقول ان شاءالله دا بلا دواء وتو عندها دا وندعولها بدواء سبحان الله لا دارت خير وجاها خير ياما تعبتنا ونزلت دمعتنا ودمعت ماما ياما خشت ماما من وراها للمستشفي سبحان الله

اميره ؛؛ بس وجعتني الحق
ايمان ؛؛ والله حتي مهما كان هي مرتنا وعاشت معنا وكلت معنا شاركتنا في فرتحنا وفي دمعتنا حتي ولو كانن مشاكلنا نصها منا بس والله وجعتني وربي يشفها

نجاح ؛؛ يمهل ولا يهمل
اللي صاير لعادل ونعيمه تو كله من دموعناةومن الزلم اللي عيشونا فيه زمان حرموني منكم خلوني وحدي 6 سنين ونا بعيده علي ماما زعلي خواتي وعلي حوشنا وعلي منطقتنا وعلي بلادي خلني انرايف حتي علي بنت حوشنا
اميره ؛؛ امرايفه علي بنت السحب اللي دير فيه ماما لنا ونحن مقعمزات نقرو
نا ؛؛ امرايفه علي وعيتي في الصبح ونلقي النطر تمطر ونلقي ماما فاتحه باب المطبخ وتشرب في حليبها واتفرج علي المطر واتشم في بنت المطر لما ينزل علي العشب واتولع الراديو وايجيبو اغنية نسم علينا الهواء

نجاح ؛؛ عندي معها ذكره الاغنيه هذه طول 6 سنين ونا نسمع وانغني فيها كل صبح يوميا لان عارفتها ماما غاليه عليها
وهي تبكي تمت اتغني وتمسح في دمعتها وبصوت مقطوع

نسم علينا الهوا من فراق الوادي
يا هوا دخل الهوا خذني على بلادي

كلنا ؛؛ انغنو ونذكرو ونبكو
يا هوا يا هوا يلي طاير بالهوا في منتوره طاقه وصوره خذني عندهم يا هوا

فزاغني يا قلبي تكبر فيا الغربه وما تعرفني بلادي

خـــــــــــذني خذني على بلادي

شو بنا شو بنا يا حبيبي شو بناكنت وكنا ظلوا عنا وافترقنا شو بناوبعد الشمس بتبكي على الباب وما تحكي وبيحكي هوا بلادي
خــــــــذني خذني على بلادي نسم علينا الهوا من فراق الوادي يا هوا دخل الهوا خذني على بلادي

ليله طويييييييله علينا ما بتش تنتهي لا رقدنا ولا سكتنا طول الليل ونحن ننذكرو ونبكو الاعيال من كثر ما ايحقو فينا نبكو مستغربين قعدو مقعمزين وايبحتو فينا نين في الليل ارقدو تاني يوم كل وحده فينا خذت حاجات من دبش ومواعين ماما كل وحده فينا خضت كبيتها امتعت الحليب في الصبح وطلعنا من الحوش ودمعتنا علي خدنا ولا وحده فينا جاها عزم واقدرت تاخذ سرير ماما خلينها وخلينا سراريرنا ودولايب والات الكهربائيه الكبيره طلعنا كلنا من الحوش حتي عيت خالد مشو للحوش خالتي

من حوش ملينا صوت ضحكنا ولعبنا وابكانا وكلامنا علي الحياه وعلي الحب وعلي المواجع وعلي القهاير وعلي عاريكنا طلعنا وسيبنا في كل مكان في الحوش ذكره حلوه وشينه ضحكه ودمعه فرحه وحزن طلعنا ونحن امرايفن علي حوشنا زمان علي خيالنا انرسم في كل مكان طلعنا وقلوبنا وروحنا في الحوش طعنا ونحن شيلن ذكريتنا الموجعه اكتر من المفرحه طلعنا ونحن شيلن ذكرتنا لما كنا انقولو سعادتنا سعاده كاذبه وتقريبا الي حد هذا اليوم كاذبه

مراد ؛؛ ايه ايه ايه
نا ؛؛ نعم
مراد ؛؛ نسالك انتي مش عارفه الحوش من شره
نا ؛؛ ﻻ ما نحن درنا توكيل للعادل وباعه وعطنا الفلوس وسافر ما دورنش من شره ليش من شره
مراد ؛؛ متاكده انتي
نا ؛؛ والله كنك عليش شن فيه راه مالنا شيء بعنا الحوش
مراد ؛؛ الحوش تو باسم ……………

يتبع