مسلسل سعاده كاذبه الجزء الاخير
مسلسل سعاده كاذبه
الحلقه 95
رجاء ؛ بنت الكلب هذه تي والله انوريها الحقيره
نا ؛؛ رجاء فوتي خلاص
رجاء ؛؛ راجلها ماهو قاعد والله نركبلها الحقيره وانوريها
نا ؛؛ رجاء راكي حامل خافي علي اللي في بطنك بس
رجاء ؛؛ والله ما نقعد رجاء كان خليتها اتهني الحقيره تو ركبتلها
رجاء ؛؛ طوووووول اركبت والهام لحقتها
ادق علي الباب
افتحي يا غاده افتحي ياحقيره
الهام ؛ ارجيوه اهدي وفكينا خلاص عمتي لوطه
غاده؛؛ افتحت الباب وطلعت
نعم كنك اتخبطي
رجاء ؛؛ اقربت من غاده تبي تنتش شعرها
الهام ؛؛ صبت بينتهن وبعدتهن
طارق ؛؛ سمع صوت رجاء خش علينا ولقنا امصبيات عند الدروج
رجاء ؛؛ اتخربي علي اختي ياحقيره يافتانه يا كذابه
غاده؛؛ احترمي نفسك يا
عمتي ؛؛ اطلعت بسرعه علينا
رجاء ؛؛ يا شنو احكي يا شنو كنك سكتي ولا انتي حيه من تحت التبل تي والله انوريك مانقعد رجاء بعدها
وقربت منها وكرت شعرها ونزلت راسها لوطه
الهام ؛؛ ﻻ يا رجاء من جدك انتي
اقعدت تمسك في ايدنا غاده خافت منها تضرب رجاء علي بطنها
ارجيوه اطلقي الله ايربحك
غاده ؛؛ اطلقي يا كلبه راه خيرلك
طارق ؛؛ كنها رجاء
هاجر ؛؛ غاده هي سبب طلاق ايه ورجاء تو عرفتها وقالت والله انوريها
عمتي ؛؛ هيييييييييييي شنو
هاجر ؛؛ اها تستاهل غاده اللي ايجيها هي اللي خربت غلي خويا
نا ؛؛ هاحر خلاص
هاجر ؛؛ خلي الناس تعرف حقيقتها
عمتي ؛ اركبي ياهدي شوفيهن
طارق ؛؛ جاي يبي يركب
عمتي ؛؛ عمتي مساكته
خبر صبايا انت ماتدخلش فيه بيش ماتخسرش خوك خليك هنا
طارق ؛؛ امييييي
عمتي ؛؛ لا امي لا شيء خليك هنا امشي يا هدي فوق
هدي ؛؛ اركبت بسرعه وشافت كيف رجاء امسكه في شعر غاده امنزلته لوطه والهام مساكه غادي واتهدي في رجاء
هدي ؛؛ انزلت تجري
طارق عدي امسك رجاء تضرب في المراه
طارق ؛؛ هي اللي تضرب
هدي ؛؛ اها
طارق؛؛ عدي اركبي بدال رجاء وهي تضرب خليها اتفش غلها وكان طقت فيها غاده قوليلي تو نركبلها
هاجر ؛؛ هههههههه صحه لك يا خوايا
طارق ؛؛ عارفها ما تهدي نين اتفش غلها
نا ؛؛ خفت علي رجاء وقعدت نرعش
طارق ؛؛ اركب الله ايربحك راه رجاء حامل تخيل تضربها
طارق؛؛ نقتلها قتل نا خاطري فيها من زمان الضربه
عمتي ؛؛ تو نركبلها نا هذه رجاء وعرفتها ماتهدي بكل
بحتت في طارق
شر منك انت
طارق ؛؛ هههههه عدي شوفيها خير
رجاء ؛؛ اختي نا يا حقيره اتخربي عليها اختي لقيتها طيبه وهاديه اتخربي عليه انتي كيف اتقابلي في ربك واتركعي وامخربه بيت كيف اتجيك نيه ترقدي وتشربي وتاكلي وانتي سبب دمار اسره يا حقيره تي والله انوريك باهي
اسلحت سباطها وبدت فيها
الهام ؛ اتحز واتمسك في غاده
هدي ؛؛ ارجيوه خلاص فوتيها
غاده؛؛ حولنا يا امتعات الشوارع حولي تحسبني مش عارفه ماضيكن وماضي اختكن يا خقيرات ياجاهلات يا متعات العلاقات والتكرس
رجاء ؛؛ يا شريفه ياطاهره انتي ناعليا نا نا تاريخي الحمدالله علاقة شهور حتي نص سنه ماطقيتها نين قرا فاتحتي وقعدت حلاله حتي لما انتكرس انتكرس مع حلالي مش انتي يا امتعت سنين ياامتعت الجامعه
طارق ؛؛ بحت في هاجر
هههههههههههههههههه ياعنجدها
هاجر ؛؛ ههههههههههه خطيره رجاء
غاده ؛؛ دفت رجاء وابتعتد
عدي عدي اكيده حنيتي للايام عرم علاقات والتشليط علي الفون السريات والمواعيد
عمتي ؛؛اركبت وجت عينها في عين غاده
غاده احترمي نفسك هذه مرات اولدي وانت تحكي علي عرض اولدي راكي افطني لروحك راه انكلم راجلك هنا ايلمك
مراد ؛؛ يطلع من المربوعه ومعه حاتم
شن في
هاجر ؛؛ طوارئ فوق
حاتم ؛؛ طوارئ شنو
معتصم ؛ ايخش يجري للحوش
غاده ؛؛ اختك امخربه علي روحها بروحها وهي اتحب ماضيها اللي امعبي مصايب
رجاء ؛؛ عمتي تسمعي في الكلام
عمتي ؛؛ غاده خشي وسكري شقتك
مراد ؛؛ بحت فيا وفنص
رجاء اعرفت
نا ؛؛ ما قالتلهش انا
غاده ؛؛ ﻻ مانيش خاشه هي كنت في الشقه وهي تللي دقت عليا اتحمل امتعت الماضي هذه هي واختها
منتصر ؛؛ ركب دغري
طارق ؛؛ الحقه بسرعه
منتصر ؛؛ غاده صكري فمك
غاده ؛؛ الحقيره المسخه هذه جتني ودقت عليا الباب وتمت اتهزب واتضرب
طارق ؛؛ احترمي نفسك واعرفي روحك مع من تحكي
رجاء؛ ؛ شفت طارق كيف امصبي معها نزلت سباطها ولابسته وقربت منه
عمتي ؛ خشي جو يا غاده بدالي هالساعه بساعه اخري
غاده ؛؛ لا مش امبدله نا محترمتها نفسي يا طارق ومعروفه من زمان عدي شوف اللي شايفه روحها علي الفاضي ومش محترم
منتصر ؛؛ ضرب غاده كف
خشي جوا و انتي ساكته
غاده ؛؛ لا مش ساكته انت امسيبها هي وتضربني نا وهي الغلط راكبلها من ساسها لراسها
منتصر ؛؛ حتي وكان هي غالطه شوفيها لما جت امي و راجلها احترمتهم واسكتت وانتي ما سكتي زدتي اخري
غاده ؛؛ اها انتو عاد البنات هذين ديرتلكن سحر اتموتو فيهن الحوش كله يبيهن وغاليات عليكن اتموت في الطيشات ومش محترمات
منتصر ؛؛ ضربها اخري ودفها جو الشقه وسكر عليها
غاده ؛ اهااااااااا ماتضربنيش نا
منتصر ؛؛ سكري فمك انا سمعت الكلام كله شن قايله انتي وشن امخربه علي مراد احمي راه انكسرك هنا يا حقيره
هاجر ؛؛ حي حي شكله يضرب فيها
مراد وحاتم ؛؛ اركبو
طارق ؛ برم وجه علي رجاء
خشي للشقه انتي
رجاء ؛ حبيبي
طارق ؛؛ بصوت عالي وهو متعقد
خشي انا قالت
رجاء؛ ؛ ابرمت وجها وافتحت الباب الشقه وخشت وقعمزت علي الصالون وتمت تبكي
عمتي ؛؛ طارق ما تجيش شورها غاده اللي غالطه
طارق ؛؛ تم ايدق علي منتصر
منتصر افتح
منتصر : نسمع حسك نهارك يا حقيره اتنزلي في راسي قدام هلي حتي ولو هي شنو اطلعت محترمه خير منك
غاده ؛؛ خير مني في شنو في جلطتها ولا في الفناصه
منتصر ؛ سمع الباب ايدق سكر علي غاده في الدار وطلع فتح وجت عينه في عين مراد انحرج
طارق ؛؛ تعال يا منتصر
منتصر ؛؛ مراد غاده شن قايله
مراد ؛؛ مش قايله شيء خلاص فوت الموضوع
منتصر ؛؛ يعني في كلام صاح
حاتم ؛؛ خلاص يا منتصر كبر عقلك واطلع خليها نين تهدي وانت تهدي
منتصر ؛ مانيش هادي نين اتقولو شن صاير
مراد ؛؛ كلام صبايا فوت يا راجل
منتصر ؛؛ كلام الصبايا ايخرب البيوت يا مراد واهو خرب بيتك
مراد ؛؛ لا خربه لاشيء رفيقتي وقاعده معي خلاص هيا انزل
منتصر ؛ تم يا مراد
وخش وسكر الباب الشقه
عمتي ؛؛ خلاص خلهم انزلو
مراد ؛ مش عارف مناللي حمي نا قالت مانبيش نسمع الكلام هذا
نزل بسرعه ولقني امصبيه وماسكه نور في يدي
هيا اطلعي قدامي
نا ؛؛ به حاضر
خشيت للحوش ولابست وشاح ولفيت نور في البطنيه وطلعت العويل قدامي
عمتي ؛ ويه خليك مازال بدري
نا ؛؛ بحتت في مراد
مراد؛؛ بدري من عمرك عندنا حاجات ناقصه نبي انجيبهن واانروح
عمتي ؛؛ به براحتكم
وطلعنا نا ومراد وركبنا في السياره
……………………..
منتصر ؛؛ خش الشقه وسكر الباب بالقوه
ومسكها من شعرها
غاده ؛؛ اهاااا
منتصر ؛؛ تحكي ولاه انكسرك
غاده ؛؛ نا ماقالت شيء نا مره حكيت ل الهام وقالتلها سناء ومراد ردو لان فعلا هم ردو ولما حكيت ايه اطلعت تسمع فيا
منتصر؛ ؛ يعني انتي ما تسمعيش فيها وباهي شن عرفك انتي انهم ردو
غاده ؛؛ سناء قالتها ليا
منتصر ؛؛ انتي مازالتي تحكي معها سناء
غاده ؛؛ هي اللي رنت
منتصر ؛؛ ونا شن قالت مش قالت انسي سريب المراه هذه
وقرب منها ومسكها من عند يدها
هاااااا شن قالت انا ولاه انتي اتكسري في كلامي
غاده ؛؛ حول وماتمدش يدك يا منتصر راه انكلم خوتي
منتصر ؛ خوفتني والله بخوتك انقولك حاجه لمي دبشك هذا ومعش نبي انحق وجك وكلمي خوتك اللي تفوحلي بيهم ايجو ياخذوك
وطلع وسكر الباب ونزل بسرعه
……………………..
طارق ؛؛ خش للشقه وسمع صوت بكاء رجاء مابش ايخش عليها سلح كندرته وحول جاكته وقعمز علي الصالون وولع التي في
رجاء ؛؛ اسمعت صوته خش وولع التي في وفايتها
قعدت امقعمزه ترجا فيه وما جاهش تعقدت
صبت غيرت دبشها ولابست روب حوامل اقصير امتع دلع ولبست كندرة سوف امتعت فرش
وخشت للحمام غسلت وجها وطلعت ولقته علي الصالون ما بتش اتعدل عليه وتمت تمشي بشويه للمطبخ
وتمت ادير في كاكو
طارق ؛ خش ولقها امصبيه علي الغاز وعطيته ظهرها قرب منها واضبطها من لاوره
حبيبي مشكلجي ادير في مشاكل وايطنش عليا نا
رجاء ؛؛ مانطنشش نا
طارق ؛؛ باهي ليش تلابسي هكي وتتدلعي قدامي
رجاء ؛؛ طفت علي الكاكو وصبت لروحها وطارق مازال ماسك فيها من لاوره ويتحرك وين ماهي تتحرك وبصوت دلع وبيبي
لانك سمعتني نبكي ومابيتش اتخش عليا
طارق ؛؛ لاني متعقد ومانبيش انخش عليك لاني عارفك وعارف روحي قالت نين تهدي وبعدين انا عارفك تو اتلابسي وتقعد تتدلعي
رجاء ؛؛ برمت وجها عليه واضبطته وهمستله في وذنه
انحبك يا حافظ طبعي انت
طارق ؛؛ وكان ماحفظت طبع حبيبي وعمري طبع من نحفظه
رجاء ؛؛ تبي انديرلك قهوه
طارق ؛؛ ليش مادرتيلي من الاول
رجاء ؛؛ كنت متعقده
طارق ؛؛ طلقها وبرم وجه
ﻻﻻ نبيش شكرا
رجاء ؛؛ مسكت يده وجاته
حبيبي زعولي
طارق ؛؛ يعني انتي متعقده ناتبيش اديرلي حاجتي
رجاء ؛؛ والله ماهكي بس كنت نبي نحرق دمك واندير كاكو وانجي انقعمز جنبك
طارق ؛؛ رفع حاجبه
تحرقي في دمي
رجاء ؛؛ حطت ايدها وراء ارقبته ورفعت روحها وصبت علي اصابع كرعيها وحباته علي لحيته
ﻻن حبيبي لما انجي وانقعمز جنبه هو ايتقرب مني وياخذني في حضنه ويدلعني
طارق ؛؛ حبها علي راسها
تعالي نبيك في الصاله
رجاء ؛ عدي تو انجيك
درت قهوه وحطت حلو خذت كاكو امتعها ولحقته وقعمزت علي الصالون
هيا حبيبي
طارق ؛؛ تو درتي يا شينه
رجاء ؛؛ هههه اسفه
طارق ؛؛ شن صار
رجاء ؛؛ غاده اطلعت اموصله كلام ل ايه واللي تقهر ايه ساكته
طارق ؛؛ عارف
رجاء ؛؛ وانت عارف
طارق ؛؛ حكلي امس حاتم الموضوع كله
رجاء ؛؛ وليش ماحكيت
طارق ؛؛ عارفك ح اديري الجو اللي دريته بس يا رجاء المره هذه مشيتها لكي لانك معك الحق بس مره تانيه صوتك معش نسمعه عالي وخافي علي روحك حامل وح تقعدي ام ومعش اتخلي حد ايطق فيك
رجاء ؛؛ هذه طقت في ويه كانها طقت فيا
طارق ؛؛ عارف حبيبي
كرها واضبطها
بس عجبتني والله ما سكتيلهش وخذيتي حقك ولما جت امي احترمتيها وسكتي
رجاء ؛ هههههههه نجك ليا
طارق ؛ تي انحبك
رجاء ؛؛ كنك عليت صوتك عليا قدام هلك
طارق ؛؛ علي خاطر منتصر شفتيه ضربها وخششها وبعدين نا عارف وكان تقعدي امصبيه ح ايصير كلام اخري بس حسبتها وخششتك طول وحتي مراد خذ ايه وروح
رجاء ؛؛ ازي وما نحسبها حقيره للدرجه هذه
طارق ؛؛ خلاص فوتي
……………………..
مراد ؛؛ حبيبي تبي حاجه انتكي علي الحوش هلك
نا ؛؛ ﻻﻻ حبيبي نا تعبانه ماعنديش حاجه ضروري نين انتكي امس رجاء جبتلي دبشي كله بس نبي امحلبيه
مراد ؛؛ بس
نا ؛؛ اها
ارحيمه ؛؛ ابي لعبه نا
بيده ؛؛ حتي نا بابا
مراد ؛؛ باهي يا بابا امغير قعمزو خلوني انبحت
ارحيمه ؛ ماما انجي هنا
نا ؛؛ ماما ماسك نور نا
مراد ؛؛ تعال هنا عندي سوق
بيده ؛؛ نا انجي
مراد ؛؛ بالواحد
ارحيمه ؛؛ زقب علي مراد وقعمز علي اكراعه
بيده ؛؛ قعد ايخبط علي الكرسي ويبكي
نا ؛؛ تعال بيده هنا
مراد ؛؛ هههههههه يا هبل عليش تبكي
بيده ؛؛ ابي ثوق
مراد ؛؛ ههههههه ثوق نقناه ثوق تعال هنا
ارحيمه ؛؛ ﻻﻻﻻ
نا ؛؛ هههههههههه مكر
بيده ،؛ كر شعر ارحيمه
مراد ؛؛ اضربه علي يده
بطل خوك هذا
بيده ؛؛ عزق روحه علي كرسي لاوره وقعد يبكي
مراد ؛؛ هيا ارحيمه حتي انت امشي لاوره
نا ؛؛ ﻻﻻ خليه هنا هاته تو يضربه بيده
مراد؛؛ شراني
نا ؛؛ هههههههههه تعال ارحيمه حبيبي
حطيت نور علي اكراع وجبت ارحيمه علي اكراع التانيه واضبطته ومسحت ادموعه
مراد ؛؛ وقف علي محل
خلاص تبي محلبيه بس
نا ؛ اهااا وعصير سن توب
مراد ؛؛ باهي فتح الباب ونزل
بيده ؛ فتح الباب ونزل وراه وهو زعلان وادمعيته علي خده
مراد ؛؛ التفت ولقه وراه نزل عليه ورفعه ومسحله دموعه وخش للمحل
ارحيمه ؛؛ هيييييي ماما شوفي بيده عد لبابا
نا ؛؛ ههههههه تو ايجي
واشويه اخري وطلع مراد شايل اكياس وبيده يمشي جنبه وماسك كيس واركبو
نا ؛ ليش هذين كلهن
مراد ؛؛ اهو جو وبيده ايكر ونا كل حاجه ناخذ منها اثنين بيش الافندي هذا ما يزعلش
نا ؛؛ كيف فطنته انه وراك
مراد ؛؛ هههه سمعت فتحت الباب ونزلته شخصيته قويه بيده
نا ؛؛ ههههه اها بكل حتي هو تربية رجاء وطارق
مراد ؛؛ ههههههه وابنيتي نا كنها قابله وجها
نا ؛؛ جعانه
نور ؛؛ تمت تنتش فيا جعانه
نا ؛؛ اشويه يا ماما نمشو للحوشنا بس
ارحيمه ؛ ههههه تبي تضع
مراد ؛؛ هههههههههه والله ماهم غافلين علي حاجه
نا ؛؛ بكل زمان في بداية ترضعي لها ايقعمزو قدامي ويقعدو ايبحتو فيها
مراد ؛؛ هيا حبيبي انزلي
نا ؛؛ هيا
نزلنا وخشينا للجنان وخش بيده يجري و وراه ارحيمه
مراد ؛؛ حبيبي المفاتيح في جيبي تعالي خوذين نعرفش كيف انطلع ايديا ملينات
نا ؛ قربت منه وحطيت يدي في جيبه
مراد ؛؛ باسني علي خدي
نا ؛؛ انحرجت ونزلت راسي وفتحت الباب وخشو يجارو
طول خشيت وحطيت نور علي السرير وبديت نسلح وايخش بيده عليا
مراد ؛؛ خش وراه
حبيبي حطيت الحاجات في المطبخ ……
ويتي
نا ؛ ههههه كنك
مراد ؛، من جدك هكي قدام بيده
نا ؛؛ هههه مش فاطن لاهي في نور
مراد ؛؛ حبيبي عاد فكينا مادريش هكي قدامهم
نا ؛؛ ياعمري نور امركه عليا تبكي جعانه
لابست روب علي السريع
وقعمزت علي السرير وبديت انرضع
حبيبي وين ارحيمه
مراد ؛؛ طلع وشافه ايولع في تي في قرب منه وخذا الجهاز وولعه التي في وجاني
نا ؛؛ حطيتله علي طيور
مراد ؛؛ قاعد عليها التي في
غير دبشه وجا قعمز جنبي وقعد ايبحت فيا وقرب وباسني علي الشوفه
بيده ؛؛ صبا وبحت في الشوفه وباسها
مراد ؛؛ ههههههه شنو اداعكو فيا انتو
نا ؛؛ معش ادير هكي قدامهم كل حاجه يعرفوها
بيده ؛؛ ماما عطني بوسه سريه
نا ؛؛ هههه ﻻﻻ بابا عيب
مراد ؛؛ لا خليه نبي انشوفها
نا ؛؛ به ماما تعال
بيده ؛؛ قرب مني وحط ايديه علي اجنب فمه وباسني علي فمي
مراد ؛؛ وعليش ايغطي فيها بيديه
نا ؛؛ بوسه سريه هيا مانبوش حد ايشوفها
مراد ؛؛ ربي يحفظكم ليا
نا ؛؛ ويحفظك
كملت لنور وغيرتلها وحطيتها في المشي وغيرت العويل ودرت عصريه وقعمزنا كلينل ووكلت العويل
مراد ؛؛ حبيبي نبي انخش نرقد ما رقدتش امس
نا ؛ باهي خش
مراد ؛؛ خش معي
نا ؛؛ والعويل
مراد ؛؛ رقديهم
نا ؛؛ حبيبي عشيه تو
مراد ؛؛ نرجا فيك راه
صب وخش بسرعه
نا ؛؛ شالت السفره ولميتها والقيت ارحيمه راقد غطيته والقيت نعسانه حطيتها في سريرها طول ارقدت حسيت بيده نعس خليه في مكانه وغطيته وطفيت الضيء
وخشيت في الدار والقيت مراد راقد نوم خشيت معه وقعدت رقده قدامه وانبحت فيه واذكرت المشاكل اللي صارن وخلني نبتعد عليه حسيت روحي هبله اللي كنت انقول معش نبيه ومانبيش انروح معه كنت هبله مفروض مامشيتش وماخليتش سنه ونص تمشي هكي وووووو كانت اصعب سنه ونص عليا اصعب ايام فقدت فيهن حبيبي وحوشي وامي ووووو يا دنيا ما شينك وماوعرك لما تبي اتكوني علي انسان معين اتهديه هد سنه ونص كسرتني فيهن
قربت منه وحبيته علي اللحيه وقعدت اقريب وانبحت فيه ونملي في اعيوني منه كيف ما ملهن هو امس من جيتي هنا في الحوش وهو ايبحت فيا نين مشينا للهله وهو ايبحت فيا كانن اعيونه ملينات شوق واراياف وحب
حبيته اخري ومسكت يده ورفعتها وخشيت في حضنه ونزلتها وجا وجي علي قصاد ارقبته وتميت انحرك في اخشيمي عليها وانشم في بنته
مراد ؛؛ فتح اعيونه وبحت فيا ولقني في حضنه وخش فيها كيف البيبي ابتسملي وباسني علي راسي وبصوت واااااطي بكل
امرايفه عليا
نا ؛؛ خنقتني العبره ونزلت دمعتي بصوت واطي حنون
بكل امرايفه بكل نا كيف قعدت بلاك كيف نا كنت هبله صاح
مراد؛؛ همسلي همس غرقتني فيه اخري
اسسسس حبيبي انحبك وانتي تو جنبي هذه اهم حاجه خلاص ما تفكريش
نا ؛؛ انحبك
مراد ؛؛ مش اكثر مني
نا ؛؛ ﻻ نا اكثر
مراد ؛؛ ويتي
نا ؛؛ اكبيدتها
مراد ؛؛ هههههه حبيبي نسالك
نا ؛؛ نعم
مراد ؛؛ انتي فتحتي نت صاح
نا ؛؛ اها
مراد :؛ ليش
نا ؛؛ موضوع طويل
مراد ؛؛ احكيه
نا ؛ مش انت تبي ترقد
مراد ؛؛ طار النوم لما ناس خشت وتمت اتنابش فيا
نا ،؛ هههه احسن اصلا نبيكش ترقد
مراد ؛؛ ليش
نا ؛؛ نبي انكون هكي
مراد ؛؛ مادوريش واجد جاوبي
نا ؛؛ نبي نفتح مع اميره مكتب ديكورات للمناسبات وكروت وحاجات زينه للفرح
مراد ؛؛ كيف
نا ؛؛ وليد عنده صاحبه زمان ساعدته اميره واعجبه حاجات اميره وقاله خليها تخدم واميره اتحب الشيء هذا قالت نبي اناجر محل وانديره ونا زمان كنت انقول نبي نخدم قالتلي خشي معي وقالتلي افتحي النت وابرمي عليه وخوذي الافكار اكتر
مراد ؛؛ انتي تبي تخدمي فيه المجال هذا
نا ؛؛ اهااا خاطري فيه
مراد ؛؛ لعند تو
نا ؛؛ اها عندي مبلغ نبي انخش معها شريكه نا قالتلها
مراد ؛؛ ماتبيش تسالني
نا ؛؛ حبيبي عمري عندي اختي تبي تفتح مكتب ديكورات نبي انخش معها شريكه ممكن
مراد ؛؛ والله شن انقولك نقاني رافض الحق
نا ؛؛ فتحت اعيوني عشره علي عشره
شن حبيبي
مراد ؛؛ اها عنديش مراه تخدم
نا ؛؛ حبيبي
مراد ؛؛ نعم
نا ؛؛ خاطري فيه
مراد ؛؛ اهو قاعده في الحوش ومش ناقصتك حاجه وعندك اعيالي اقعدي عليهم
نا ؛ حبيبي تحكي جد
مراد ؛؛ اها نحكي جد
نا ؛؛ به شكرا
نزلت راسي علي قصد صدري وسكتت
مراد ؛؛ هو انك اتخشي شريكه لا خشي انديرلك نا مكتب كبير وحلو من اولها
نا ؛؛ رفعت راسي وبحتت فيه بالاستغراب
حبيبي تحكي جد
مراد ؛؛ بس بشرط تخدمي انتي في العشيه بس والموعد التاني اميره
نا ؛؛ بس نبي اميره معي شريكه لان هي صاحبة الفكره سامطه ناخذ منهاالفكره وانقوللها نبي نخدم فيه اوحدي
مراد ؛؛ به تو انقول حاتم ايدورلكن محل كبير اتشوفنا وايكون راقي في مكان راقي
نا ؛؛ نجك ليا والله انحبك
مراد ؛؛ نا كم ويه عندي
بس راه شرطي ان ماتخدميش الا في عشيه ولعند المغرب يعني انتي كان تقعدي في الحوش واتصمني وتشرفي مره مره وخلاص
نا ؛ هي حتي نجاح تبي اتخش معنا يعني ح ايخفي العمل علينا
مراد ؛؛ شوفي جوك انتي
وحط يده علي وسطي وقربني اخري منه وباسني علي ………
نا ؛؛ هههه ارقد
مراد ؛؛ ههه فيش طيرتلي النوم من اعيوني انتي
نا ؛؛ حبيته علي خده
مراد ؛؛ رفع البطنيه فوق وخششني تحتها ونزل عليا و…………..
……………………..
هدي ؛؛ هيييييي تعالنا شوفنا غاده طالعه بشناطيها
هاجر ؛ ازي تستاهل هذا خراب البيوت ازي اتساعد في سناء علي دمار اسره
الهام ،؛ قيسها عابيه علي تطويله عرم الشناطي
هاجر ؛؛ سامطه
هدي ؛ والله تقول حد عطينا عين كل مره حدفينا صايرله جو شين
الهام ؛؛ ربك يستر تو نحكي لحاتم
هاجر ؛؛ ازي قللت هنانا ومشت كنا امرايفن عبي ايه والاعيال
هدي ؛؛ رجاء لا حس ولا خبر
هاجر ؛؛ تو نركبلها اكيدع طارق مش قاعد
وركبت هاجر ودقت علي شقة رجاء
رجاء ؛؛ صبي افتح
طارق ؛؛ مش وقته
رجاء ؛؛ يا صايع صبي عيب
طارق ؛؛ عليك قصه الواحد حتي في شقته مااتريح
رجاء ؛؛ هههههه البس تيشرت ماتطلعش هكي
طارق ؛؛ هو صقع بره صاح
رجاء ؛؛ هههههه في حضني مافيش
طارق ؛؛ طلع فتح الباب ولقها هاجر
هاجر ؛؛ انت قاعد
طارق ؛؛ ﻻﻻﻻ هذه عفيرتي مش نا
هاجر ؛؛ هههههه نحسابك في الصاله
طارق ،؛ جمعه مانمشيش ديمه
هاجر ؛؛ بعد الزواج
طارق ؛؛ ها كنك
هاجر ؛؛ وين رجاء نبيها لوطه نبي انهدرز معها
طارق :؛ راقده
هاجر ؛؛ اتوزع فيا
طارق؛ ؛؛ هههههههه خشاك تو انشوفها لكي
خش ولقها تلبس في الروب
ﻻﻻ تطلعيش عليها هكي
رحاء ؛؛؛ نلبس الطرف ماعليكو
طارق ؛؛ نبي ندوش نا
رجاء ؛؛ عدي
ولابست طرف كويل ومم فوق الروب وطلعت علي هاجر
هاجر؛؛ وينك ياشينه
رجاء ؛؛ هههههههههه اللي خششني طارق امبدري
هاجر ؛؛ اطلعت حرجانه شفنها
رجاء ؛؛ تستاهل اكيده ح يحشمو فيها عيت مراد
هاجر؛؛ باهي تبي تنزلي
رجاء ؛؛ ندوش بس وانجي
هاجر ؛؛ هههههههههههه هابا منك انتي
رجاء ؛؛ ههههههه مش ح انطول
هاجر ؛؛ نرجو فيك
رجاء ؛؛ سكرت وخشت وتمت ادق علي طارق
هيا ابسرعه حبيبي
طارق ،؛ فتح الباب وهو البس ديشنبر
رجاء ؛ ههه كملت
طارق ؛؛ كان صبرتي راكي حجتي
رجاء ؛؛ ههههههه نبي ااحمام خلاص
خشت رجاء وادوشت علي السريع وطلعت ولقت طارق ادير في جل في شعره
رجاء؛ طالع
طارق ،؛ اهاااا كنك
رجاء ؛؛ خاطري في سنتره كبيره بكل
طارق ؛؛ تو
رجاء ؛؛ اهااااا
طارق ؛؛ تو انجيبك باهي
رجاء ؛؛ حبيبي نبي فيها مكسرات واجد
طارق ؛؛ حاضر
رجاء؛ ؛ طلعت لابستها وبدت تلبس بسرعه
طارق ؛؛ بشويه علي اوليد بابا
رجاء ؛؛ يعني مش عليا
طارق ؛؛ قرب منه وباسها علي راسها
عليكم انتو الاثنين
رجاء ؛؛ نجك ليا
لابست بسرعه وطلعت هي وطارق
طارق ؛؛ تبي انجيبلك حاحه اخري
رجاء ؛؛ ﻻﻻ شكرا حبيبي بس بيش اتجيب حتي للبنات
طارق ؛؛ تم
……………………..
نا ؛؛ نور تبكي
مراد ؛؛ ييييييييي
نا ؛؛ هههههههههه حرام عليك
صبيت ابسرعه ولابست وطلعت وخذيتها وتميت انسكت فيها
مراد ؛؛ طلع دار دوش وجاني في الدار
نا ؛؛ حبيبي وعيهم بدال مادرت دوش
مراد ؛؛ باهي صبي والبسي حاجه دافيه صقع عليك هذا
نا ؛؛ حاضر
نزلت نور وخليتها تسحف طول مشت ل ارحيمه وتمت اتوعي فيه
مراد ؛؛ بيده خلاص يا بابا صبي
ارحيمه ؛؛ اهاااااااااااااااااا يا ماما يا ماما
مراد ؛؛؛ بحت فيه ولقي نور اتنتش في شعره
ﻻﻻﻻ يا نور ﻻﻻﻻ
قرب منها وحولها ورفعها
شن انديرلك تو
نور ؛؛ امشعبط في مراد
مراد ؛ نجيلي ابنيتي ياربي
ارحيمه ؛؛؛ صب وتما ايدور فيا ويبكي
ماما ماما ماما
نا ؛؛ عرفت ان نور ديرلته جو شين كملت ابسرعه وطلعت ومسكته وخشيت به الدار
مراد ؛؛ خش علينا وفي يده نور
عيب يا بابا تبكي
ارحيمه ؛؛ اح يا بابا
نا ؛؛ نور مايضربوش فيها لكن هي زايطه فيهم بذات في ارحيمه اتنتفله شعره ومااتريح
مراد ؛؛ تو انقصه له اللي يقدر ايجي ايكره له
نا ؛؛ ﻻﻻﻻﻻ نبيش نا
مراد ؛؛ شوفي العيل كيف يبكي
نا ؛؛ ﻻﻻ ما تقصش حبيبي نا نبيه هكي
بيده؛ ؛ خش علينا
ماما ابي حمام
نا ؛؛ هيا هيا تعال خش
مراد ؛؛ هههههههه
وطلعو وقعدو يلعبو في الحوش وخليت حتي نور تزحف ونا ومراد امقعمزين انراقبو فيهم
مراد ؛؛ كنك اتبحتي ومبتسمه
نا ؛؛ قاعده في حوشي ومع اعيالي وراجلي حبيبي ماتبينيش نبتسم
مراد ؛؛ كرني وحطني علي كرعيه
انحبك انحبك انحبك انحبك انحبك
نا ؛؛ حطيت راسي علي صدره
حبيبي دخن
مراد ؛؛؛ خلاص انتي معش اتحبني الا بالدخان
نا ؛؛ والله مازالت امرايفه عليه
مراد :؛؛ نزلني ومشي جاب الدخان وولعه وجا قعمز جنبي
نا ؛؛ جيته طول وقعمزت علي كرعيه وحطيت راسي علي كتفه وجي جاي في ارقبته
مراد ؛؛ حبيبي اسمني اشويه
نا ؛؛ ليش جسمي شين
مراد ؛؛ ناقصه واجد ياحبيبي
نا ؛؛ الله غالب
خطرت عليا نبي انشوف ايمان
مراد ؛؛ فونك امشي جيبه وجيبلي لاب توب
نا ؛؛ حاضر
مشيت بسرعه وجبتهن وجيت
نا ؛؛ ايوه ايمان
ايمان ؛؛ باهي اللي فتحتيه الفون مبروك
نا ؛؛ يبارك فيك
ايمان؛؛ شن اخبارك
نا ؛؛ تمام الحمدالله وانتي شن صار فيك
ايمان ؛؛ مازالت هي نا نوم وسجودي
نا ؛؛ معش اتحسي في حاجه
ايمان ؛؛ صداع بكل
نا ؛؛ طبيعي يا روحي
ايمان؛ ؛ اها ما علشان نقرا حتي
نا ؛؛ لاباس ان شاءالله
ايمان ؛؛ هههههه عقبالك
نا ؛؛ بحتت في مراد وانصدمت
اوكي سلام
ايمان ؛؛ سلام
نا ؛؛ صكرت وبحتت في مراد وامرفعه حاجبي
حبيبي
مراد ؛؛ عرف قصدي مابش ايرفع راسه من علي لاب توب
نعم
نا ؛؛ عارف انت
مراد ؛؛ شن حبيبي
نا ؛؛ نبي احبوب مانع
مراد ؛؛ ﻻﻻﻻ خلاص
نا ؛؛ شن ﻻﻻﻻ خلاص نبيش حمل تو نا اعيالي اصغار
مراد ؛؛ مش ح تحملي
نا ؛؛ انت تبي اخر صاح
مراد ؛؛ بحت فيا وسكت
نا ؛؛ حبيبي ديرلي حل
مراد ؛؛ ماتبيش تحملي انتي
نا ؛؛ حبيبي راه عندنا 3 ماشاءالله تبارك الله وماتنسهش عندك 5
مراد ؛؛ عارف بس احبوب تو انتي اترضعي مش ح تحملي
نا ؛؛ وكان حملت
مراد ؛؛ كتبلنا هكي تعالي كسدي علي النت وشوفي التصاميم
نا ؛؛ تقربت منه وتميت انبحت
مراد ؛؛ شن
نا ؛؛ عارف خاطري نمشي نا انجيب اكسورات الديكورات من بره لان نا متاكده هنا فيش
مراد ،؛ انسافرو
نا ؛؛ وين
مراد؛؛ تركيا هي اللي فيها حاجات هذين ومش غاليه واجد
نا ؛؛ به انت احكي لحاتم
مراد ؛؛ حاضر تو انشوفلك مكان ايكون كبير
نا ؛؛ شكرا حبيبي
مراد ؛ انا انديرلك اللي تبيها بس المهم اتكوني جنبي هنا
نا ؛؛ ربي مايحرمني منك
ومشن الايام ونا ومراد جونا ايهبل كان ارايفه عليا وعلي العويل ملفت واجد
بدرجة كرهت روحي لاني كنت حرمته منهم ومني ومن جو الاسره
لما انشوفه كيف ايلعب فيهم ويمل في اعيونه منهم وايبوس فيهم واللي يبوها اتجيهم سبحان الله كيف كنت وكيف قعدت
مراد ؛؛ ويتي رجاء جت اهي
نا ؛؛ تعالي هنا
طارق ؛؛ طلعني العويل نبيهم
مراد ؛؛ تاخذهم معاك للصاله
طارق ؛؛ اها هيا
مراد ؛؛ لابسهم كنادرهم وطلعهم للطارق
رجاء ؛؛ اهااااااا عليك بنه سمحه
نا ؛؛ هههههههه عشاء سمحه دايرته
رجاء ؛؛ عزمتيهم كلهم
نا ؛؛ خوتي وخواتي واعربي
رجاء ؛؛ باهي تمام هي انساعدك
نا ؛؛ اميره ونجاح في الطريق جيات
رجاء ؛؛ مع بعضهن
نا ؛؛ اها جيبهن وليد
رجاء ؛؛ حولي تو نحشي انا
نا ؛؛ خلاص كملت كل حاجه درتها
رجاء ؛؛ اوحدك
نا ؛؛ امس كسدت علي الموالح واليوم في الصبح جرت سلايط وامسير وحطيتهن في الثلاجه وتغدينا وبعدها برمت علي الحوش وبديت في المحشي قالت تو ايجن البنات ايساعدني عليهن
اميره ؛؛ ونا جيت
نا ؛؛ اهلا خشي
اميره ؛؛ اضبطتني طول وتمت تبكي
رايفت عليكي واقريب انطير من الفرحه
نا ؛؛ نجك ليا والله حتي نا
نجاح ؛؛ والله مراد يقدر عليك شوفي روحك كيف قعدتي
رجاء ؛؛ سامنه صاح
اميره ؛؛ من حقها تسمن هذه من الراحه النفسيه جت جنبه خلاص معش تبي شيءالا هو
نا ؛؛ هههه حتي نا لاحظت روحي سمنت
رجاء ؛؛ هو السر فيهم لما انجوهم نسمنو ههههههههههههه
نجاح ؛؛ هههههههههههه امتي اتجيبي
رجاء ؛؛ خشيت للشهري خلاص
نجاح ؛؛ الايام يجارن انحس فيه فرحك اول امس
رجاء ؛؛ اها مش امغير
هاجر ؛؛ ابعي
نا ؛؛ ههههه خشي خشي
هاجر ؛؛ هيا هيا نسلح عبايتي بس
هدي ؛؛ اهلا
اميره ؛؛ خيييييييير
هدي ؛؛ جت ابسرعه واضبطت اميره
وينك معش شفتك
اميره ؛؛ ههههههههه مش عارفه من اللي غاطسه مع محمد
رحاء ؛؛ لا هي الوحده اتجي جنبهم تنسي الدنيا ومافيها
نجاح ؛؛ هوبي منك انتي
رجاء ؛؛ نا ماحد يحكي معي خليكم مع ايه اللي ايبوس فيها في البحر
نا ؛؛ ضربتها علي كتفها
ياسامطه استري
رجاء ؛؛ والله مافيها ستره ناعليا قعدت انمص في الليم
هاجر ؛؛ اتمصي فيه وبطنك قدامك
رجاء ؛؛ ياخيتي الاعيال اقعدو معي ماعرفتش انبوس طارق
هدي ؛؛ صايعه ياهو
درنا المحشيه وحطيته علي النار ودرنا القهوه ومشينا قعمزنا واتجي امل وايمان والهام
نا ؛ عمتي وين
الهام ؛؛ في لمه تو اتجي بعدين علي العشاء
نا ؛؛ اهاااا الهومه راه حطيت الحم واكيده اقريب ايطيب بيش ترمي الرز انتي باهي
الهام ؛؛ رز بشنو
نا ؛؛ بخلطه
الهام ؛؛ به ماعليك
وقعدنا انهدرزو لعند ماجو الباقي وجت نعيمه و حطينا العشاء وتعشينا
نا ؛؛ الهام شن صار في غاده
الهام ؛؛ منتصر امسكر راسه وقال ماحد يدخل في موضوعي لما هي تعرف غلطه اتجي اوحدها
رجاء ؛؛؛ وانتي كنك تسالي
نا ؛؛ نسال شن فيها مشكله
رجاء؛؛ حرقه تحرقها هي سالت ولا دورتك
نا ؛؛ ماحكي معك شيء طارق
رجاء ؛؛ ﻻﻻ ماقالي شيء حبيبي ايخاف عليا ومايبيش ايزعلني
نا ؛؛ حتي نا مراد ماحكليش عليه بكل
هاجر ؛؛ طارق قال بدال هي اللي تضرب خلوها لكن كان غاده جت شورها نركبلها
رجاء ؛؛ هههههه عارفته هبل امتعي هو
الهام ؛؛ خطرها يا اميره ويا ايه راه حاتم حصل مكتب
اميره ؛؛ واخيرا
الهام ؛؛ قالي جا علي قصاد نيتهن جنبه محل امتع ورد طبيعي
نجاح ؛؛ اوووووو
اميره ؛؛ خلاص معناتها تو نطلعو نشرو
نا ؛؛ ماشيه لتركيا نبي نشري حاجات من غادي
اميره ؛؛ صااااح
نا ؛؛ اكسورات غادي احسن تو انجيب حاجات عرم
اميره ؛؛ خلاص املاه نعبو عليك
نجاح ؛ اي حاجه اتخص الزينه جيبها جيب حتي اقطع اقماش تو انخيطوهن وانزينو بيهن الكراسي والطاولات
نا ؛؛ تم اصلا شفت كم ديكور عجبني نبي اتدير كيفه هنا
اميره ؛؛ خلاص صاحب وليد قاله تو نعطيك مجموعة شباب يخدمو في الجو هذا
نجاح ؛؛ نبو حتي بنات
نا ؛؛ اكيده نبو بنات
اميره ؛؛ دعاء قالت نبي انصبي معاكن
نا ؛؛ قصدي وحدات اديرن معنا مناديل الحاجات الدقيقه
اميره ؛؛ شوري نا تو انجيب
ايمان ؛؛ ويه جيبي حتي اكروت من تركيا
نا ؛؛ اها ان شاءالله
امل ؛؛ شن تبن اتسمنه المكتب
اميره ؛؛ مسايا
نجاح ؛؛ تمام حلوه
الهام ؛؛ نقانكن شطرات
نا ؛؛ فكرة اميره ووليد المكتب
اميره ؛؛ نا اول ماعرفتك ح اتخشي معي عرفتك تو اديره كبير وفرحت اكتر لما عرفت ان حتي مراد امساعدك قالت ح ايجي كبيؤ كيف ما في خاطري
نعيمه ؛؛ الحوش عرضنا للبيع
كلنا التفتنا ل نعيمه وانصدمنا
رجاء ؛؛ بسرعه هكي
نعيمه ؛؛ اها حال الغايه انحولو في هالصيف
اميره ؛؛ بحتت فيا واعيونها ملينات ادموع
نا ؛؛ به اصبرو انلمو دبش
نعيمه ؛ ﻻ مازال امغير تو عرضنا بس
ايمان ؛؛ تمت تبكي
يعني حوشنا خلاص معش يقعد حوشنا طفولتنا ح تنبع معه
هدي ؛؛ لما شفت كلمة للبيع وجعتتي يا بال انتو حتي عمتي دارت نهار وتمت تبكي ومحمد ياما وجعته قالي جيران عمر هكي ايعدو
رجاء ؛؛ وهي تبكي
مافي ناس اتهمها الفلوس بس
نعيمه ؛؛ رجاء كان انتي قاعده في شقه كبيره ومتريحه ومازالتي مادرتي الاعيال راه غيرك راه قاعد في شقه اصغيره وبعيالهم
نجاح ؛؛ ووووووووو يا دنيا زمان بابا ايقول الحوش عذا ماينبعش
نعيمه ؛؛ زمان مش تو وكان تو ايشوفه كيف فضي تو ايقول بيعوه احسن
امل ؛ خنقتها العبره وتحكي بصوت مقطوع وواطي
بنات راه حتي نا ضد بيعت الحوش بس الحق لما شفته فاضي وامظلمه كرهته معش عندي فيه نيه نبي نطلع منه مش متحمله انكون في مكان متعوده انشوف خالتي وانشوفكن فيه ومانشوفكنش مش متعوده
عارفات خالد من بعد طلعت ايه كل ما يخش للحوش والله ايخش ودمعته علي خده ايقولي حوش امي اظلم والله والله يوم اللي جت رجاء ولمت الدبش ونا سعدتها هو قاعد يبكي فوق وجعته كيف ايش لان الحوش يبي يسكر حتي اني قالتله ننزلو لوطه نسكنو فيه هو رفض قال مانقدرش انحول سرير امي ولا انحول سراير البنات الحوش يانشوفه كيف ما امي سيبته يا نطلع منه
كلنا قعدنا نبكو كلام خالد واعر بدرجة حتي الهام وهدي وهاجر وحنين وعمتي قعدن يبكن
ايمان ؛ نبي انروح
نا ؛؛ خليكي
ايمان ؛؛ انسحنت من البكاء خلاص ما ميتت ماما ونا نبكي وانحس في قلبي منكسر كسر علي غيبتها والله مازالنا اصغار علي الفقد
نا؛؛ تذكرنا في فرحي كيف رقدت ماما وخالاتي في الدار وحنينهن كلنا نضحكو وانهدرزو مش خاطره علينا اتغيب واتخليني بدمعتنا وبخاطر مكسور والله مهما نشغل روحي ونفرح ونضحك انحس فيا حاجه مكسوره جو حتي لما كلمت خالتي فاطمه وقالتلها تعالي قالتلي الاعيال عندهم امتحانات ومش فاضيه عارفتها اتهرب منا
اميره ؛؛ عارفه هذاك اليوم جت لخالتي اقغدت ساعتين وهي تبكي واتقول انحس في عائبتنا اتتهت اهم وحده ماتت قالت كيف انعيدو وانصيمو بلاها نا متعوده انعيد عندها نا من يوم عندها
هدي ؛؛ خلاص يا بنات ماتمثرش علي اروحكن ادعلها
كل وحده من البنات صبت بسرعه ولابست وروحت مع راجلها روحو كلهم ماعاد هدي
هدي ؛؛ ويه نبيك في موضوع ضروري
نا ؛؛ نعم كنك حسيت وجك مش تمام
هدي ؛؛ عارفته هو طلب سامط بس والله انتي الوحيده اللي نقدر نحكيلها ونطلب منها
نا ؛؛ شن ناقصتك حاجه
هدي ؛ ﻻ والله الحمد الله متريحه
نا ؛؛ باهي خشي في الموضوع شغلتني
هدي ؛ …………………
يتبع