احفاد الشيطان للكاتبة زهور جمال الدين
#احفاد_الشيطان
?بقلم الكاتبه زهور جمال الدين ?
?الحلقه التاسعه ?
.
الشباب الثلاثه فى سيارتهم وايراقبوو
انفتح بااب حوش عمك ابراهيم …
طلعت روقيه لابسه سروال وماليه طويلة للركبه …ودايرة حجابها
شافوها ااثلاثه …
ايوب قعد حال فمه
-زكريا / شنو يا ايوب
-ايوب حط ايديه الزوز على وجهه ونزلو دموعه / هياااا
سكر موسى تاكو بطم السيارة …لانه مايبيش ايوب يتهور ويفتح السيارة وينزللها
هما واقفين فى الشارع من جهه اليمين
وروقيه تلفتت لجهه اليسار وبدت تمشى
حط ايوب ايده على مقبض الباب يبي يفتحه
لقاه مسكر
-يحرك فى المقبض قريب ايكسره/ تى افتح ام الباب يا موسى
-زكريا مقعمز من الخلف مد يده وحطها على كتف ايوب/ تى اهدى يا ايوب مش هكى
-ايوب / مادخلكمش فى امى …
وتلفت لى موسى / تى افتح الباب قلتلك
-زكريا / منو هدا اللى واقف عليها …
ويشبحو فيها قايمه ايدها وتكشخ
___________________________________
.
فى المدرسه متع مرام
الحصه الاولى الابله غايبه ..ومقعمزات البنات ايهدرزو
-مرام تضحك / صار حب وغراميات وماحكيتيناش يا خاينه
-ندى / من امتى قعدتو متواصلين مع بعض
-كنزى/ من اول يوم كلمته معش وقفنا رسايل مع بعض
-ندى تضحك / يا شريرة
-كنزى/ محلااااه الحب ..محلاها لما تحسى ان فى حد مهتم بيك ..ويراجى فى اتصالك ومايوقفش على بعت الرسايل
-مرام / من زمان نقوللكم ..حلو الحب وحلوة العلاقه ..بس اهم شى تكونى صادقه معاه وماتكلميش غيره
-ندى / وانتى شن معاكم انتى وعلاء
-مرام ?/ يبي يجى يخطبنى .. وانا حايرة كيف بنقنع روقيه
-كنزى / عمرى ماشفت واحد صادق زى علاء ..ربي يهنيك بيه ياااارب
-ندى / باهى وانتو كيف يصير فيك مع حبيب القلب
-كنزى / توة غير نلقى طريقه كيف نتلاقو بس.. وبعتالى ساهل ..انا تسبلتله ان عندى امتحانات توة ..وانا فالحقيقه مش عارفه كيف بنتلاقى معاه لان ماما ماتخليش فيا بروحى بكل
-مرام/ واللى تساعدك?
-كنزى فرحت / كيف
-مرام / انتى تعرفى ان امك تحب اختى روقيه هلبا ..نخليها تكلمها اتخليك تجى تقري عندى…وبعتالى انتى تصرفى
-كنزى/ لكن ماما هيا اللى بتجيبنى .. بعد انخش لحوشكم كيف بيصير
-مرام / احنا مبدئيا هادى هيا خطتنا …وبعتالى نفكرو كيف بنكملوها
-كنزى / خلاص متفاهمين ….وطلعت تليفونها بالدرقه .. خلى نتصل بيه .. شوفولى الباب بالك يخش وحدة من الابلات
___________________________________
.
فى شارع حوش عمك ابراهيم
روقيه طلعت من الباب وتلفتت على يسارها بتمشى لمدرستها
فاتت حوشين .. وانفتح باب حوش عمك على جارهم
طلع منه ولدهم منير
وسيارة ايوب وصحابه وراهم بس من بعيد ومالاحضتهاش
-منير/ صباح الخير ياروقيه
-روقيه تفاجئت / صباح الخير يا على ..حمدالله على سلامتك
-منير/ الله يسلمك ..روحت امس
-روقيه بابتسامه صفراء/ باهى سلمنا عالعويلة ..نستادنك توة عطلت على حصتى
-منير حط يده على يدها/ وين تستادنى ..وانا من بكرى انراقب فى باب حوشكم انراجى فيك تطلعى
” شورهم كلهم ايراقبو فى باب عمى ابراهيم اليوم ?”
-بحركة لا اراديه روقيه فكت يدها / حول ايدك ..وتحشم
ايوب وصحابه شافوهم ..
– زكريا لاحظها / منو هدا اللى واقف عليها
-موسى / بالك ولد جيرانهم ولا قريبها
-زكريا / وخيرها اتعيط عليه
-ايوب / واااااك ..تى خلونى نفتح الباب وننزل الهم الاحرف
-موسى / الصبر يا ايوب خلى نفهمو بالك خطيبها
-ايوب متعصب/ زمرى
وهيا تعصبت / كيف تتجرأ وتمسكلى ايدى
-منير تحشم / مش قصدى.. لكن انا من بكرى نراجى فيك ..ونبى نكلمك فى موضوع
-روقيه / تفضل قول مع انى مستعجله
وفى سيارة ايوب وجماعته …تليفون موسى مابطلش تشريين
امحمد يتصل بيه
-ايوب تعصب/ تي صكر الشاطان هدا وترنى
-موسى/ هدا امحمد ..شكله يتصل بيك وماحصلكش .. فتحته تليفونك انت ولا قاعد مسك
-ايوب / نسيته والله طار من باللى
ورجع التليفون يشرين مرة ثانيه
-ايوب متعصب/ تى صكره وترنى
-موسى/ مانقدرش انصكره عيب قدام الراجل يقول صكر تليفونه فى وجهى
-زكريا / ديره صامت وخلاص
-موسى قامه / باهى خلى اتم التشريينه ونديره سايلنت
-زكريا / انت يا سايلنت …اكيدة علمتهالك الكبيدة
-موسى ضحك / تى صكر فمك يا مصخ
-ايوب / تى اقسم بالله الا فايقين ورايقين انتو…ضمو افامكم خلى نفهمو منهوا القرد هدا اللى واقف ايكلم فيها
-زكريا مقعمز وراه بدى يغنى/ جرب نار الغيرة
ويضحكو هوا وموسى
-تلفتله ايوب وطاح فيه بونيات ويضحك / تى صكر فمك والله ماتتحشمو الزوز
موسى كيف بيدير تليفونه سايلنت ..شرينت عليه كنزى
-فتح الخط / ساعه ونكلمكم
وسكر الخط
استغربت كنزى فى تصرفه ..اول مرة يتصرف معاها بالشكل هدا
__________________________________
بنات اللى اتابعو فى الروايه فى صفحة اسمها زهور جمال الدين وداير نفس صورتى فى الصورة الشخصيه وصورة الغلاف…..
ايه ايه انتو …راكم غالطات وهدا ولد كداب مخنث داير صفحة باسمى الواطى ..
اللى تبى بروفايلى الحقيقي.. تكتب فى محرك البحث زهور جمال الدين الدين ..كلمه الدين عاوديها مرتين ..وحتلقو صورتى الشخصيه مكتوب عليها اسمى
لكن الصفحة اللى اتابعو فيها ..متع ولد دحناس بنات ..انتو تعلقو وهوا يخش لبروفايلاتكم وايفتش
ولدلك الغو الصداقه والمتابعه معاه المخنث
عموما قالو فى رمضان بدل ما يخش لمحلات البدل العربيه تلخبط وخش محلات متع قفاطين النساوين ..من كثر ماعايش الدور
هوا حمار حاشاكم ينسخ ويحط بس مايقراش..ولدلك ماتخلوشى ايحس فى تعليقاتكم انى كتبتلكم هكى
وللعلم انا والله ماعندى مانع اى حد ينسخ الحلقه ويخلى اسمى عليها وينزلها عنده ..لكن عندى مانع لما تلبس شخصيتى وتفتح صفحة باسمى …خزيه فروخ بلا ربايه
بنات اللى فى صفحتى الشخصيه …خودو رابط الصفحه ونزلوهملهم فى التعليقات عنده بيش يزبطو البنات اللى يعلقوله الصفحة الاصليه
ومنورات جميعا
نرجو لى روايتنا ????
__________________________________
.
روقيه واقفه فى الشارع …
-منير/ انتى ليش ديما تتعاملى معاى هكى
-قامت يدها / هوا هدا الموضوع اللى تبينى فيه
-منير / اكيدة لا .. لكن نبى لما ندوى معاك تكونى هاديه ورايقه وتفهمينى
-روقيه / منير .. نقولك تأخرت وحصتى بتفوت ..وانت قاعد اتخش فى مواضيع ثانيه
-منير / انا نبيك من زمان ..وانتى عارفه الموضوع هدا…
خلاص نبى ندير حاجه رسميه معاك ..ونبعت اهلى يخطبوك
-روقيه قايمه يدها وتفهم فيه بالشوى/ يا منير انت الف بنت تتمناك … والحق ولد ناس وولد عيله وحتى جيبك عامر..لكن
-منير / لكن شنو ؟
-روقيه / انا اولا مانبيش نبعد عن بوى…انت عارف انه محتاجنى فى عمره هدا
-منير/ وانا بنمنعك عليه …بالعكس يشهد اللله انى حاسب عمى ابراهيم زى بوى ..وانتو ماشالله اربع خوات ..
-روقيه / اولا انا منقدرش نعتمد على حد فى خدمه بوى…
ثانيا حتى لو لقيتك انت مناسب وقريب من حوشنا منقدرش نوافق عليك لان اهلك هما اللى فى شارعنا لكن انت فى اخر الدنيا اتجى اسبوع فى الشهر
-منير/ الاسبوع اللى نجى فيه قضيه كله مع بوك .. انتو اربع خوات وكل وحدة تاخد اسبوع
-روقيه تعصبت /ومقسم الحكايه ومتكم الامور وحاسبنا قداش وموزع علينا الادوار
-منير / ليش تعصبتى…لانك لقيتى كلامى منطقى
-روقيه / اسمع ..انت جاى تكلم فيا على موضوع خطوبه ..
وجوابى هوا لا …انتهينا
وجت بتمشى
-منير/ اللى حارقنى انك حاطه بوك سبله ..مع انى متاكد ان فى موضوع ثانى
-تلفتتله / موضوع شنو ؟
-منير مربع ايديه على صدره/ حب قديم مثلا
-قامت صبعها / انت والله ماتتحشم .. وانا الغالطه اللى وقفت عليك
ومشت كملت الشارع ماشيه لى مدرستها.. اللى تبعد على حوشهم 5 دقايق
____________________________________
فى سيارة ايوب وصحابه
-ايوب شافها مشت / امشى وراها يا موسى
-موسى / اصبر شوى ..خلى يمشى الفرخ اللى كان واقف معاه
-ايوب متعصب/ واااك …والله كان مشيت لما نكصر المرش وانقز منه …امشى خيرلك
-موسى / باهى خلى اندور من الخلف وانلف عالشارع الثانى ونلحقها
-ايوب / اوقف قدام المدرسه ..انراجيها توصل
-زكريا / اسلم راى
وخر موسى بالسيارة بالشوى لان الشارع معبى سيارات
وروقيه وصلت قريب لى نهايه الشارع وبتلف تلاقى صور المدرسه تكمله توصل للبوابه
موسى لف بالسيارة من الشارع اللى قدامهم
وجى من الجهه المقابله لصور المدرسه
تلفت عاليسار يشبحو فيها قريب توصل
ويعيط زكريا / واطو روسكم امحمد واقف قدام المدرسه
-تفاجأ ايوب / امحمد ؟؟ .. امحمد شنو ايدير هنايا
فاتت روقيه من قدام سيارتهم …لكن مش قدامها بالزبط
…بينها وبينهم كياس …
حط ايوب يده على وجهه مايبيش امحمد ايشوفه …
وقعد ايراقب…لين قريب توصل روقيه فم الباب …
فتح امحمد باب السيارة ونزل ناداها / ابله روقيه
تلفتت/ اهلا استاد امحمد
-موسى / خلينا انلفو وانروحو يا ايوب ..المهم شفت مكانها وعرفت انها هيا ..
-ايوب / باهى وخر …
وخر موسى بالسيارة لنهايه الشارع ولف ومشى
______________________________________
فى حوش ابراهيم
فى دار البنات …
سماح وسهام راقدات فى سرايرهم
-سهام تبكى/ معقولة ايجى لحد عندنا للحوش ..ومايروحش بيا
-سماح / عالاقل انتى جاك …امالا انا اللى لا عبرنى ولا جانى
-سهام / مش امس قلتى اتصل بيا
-سماح / مارديتش عليه …انرد على عينه ..ماسد املوحنى ..
ويبينى انرد عليه
-سهام / حتى حملى مافرحتش بيه
-سماح / اتوقعت خالتى اتجى امس
-سهام / الموضوع فيه ان …معقولة حتى روقيه تقولى عادى وسيورك اتروحى لى حوشك
-سماح / كأن عندها علم بي موضوع وماتبيش اتقولنا
-سهام / حتى انا حسيت هكى
-سماح / خلى انوض انفطر بوى
-سهام / فطراته روقيه من بكرى ..قبل ماتطلع
-سماح / مشت للمدرسه هيا
-سهام / ايه
_____________________________________
قدام المدرسه …
-روقيه / كيف حالك استاد امحمد ..وكيف حال ابلة نوريه
…شنو رجلها توة انشالله احسن
-امحمد / الحمد لله احسن بهلبا …خدت علاج وانتضمت عليه اتحسنت …ولما لقيت الصغار متاعبينها جبتلها شغالة
-روقيه / الف سلامه عليها انشالله …معش بتولى للمدسه
-امحمد / لا لا طلعتها من التعليم و نقلتها لجهه ثانيه
…امبحبه معاشها ماشى توقع يوم بس فى الاسبوع
-روقيه / ربي يهنيكم
-امحمد / انا كلمنى استاد الصادق جاركم امس..وزاد كلمنى هوا وسالم جاركم
-انتبهت / مفهمتش
-امحمد / على موضوع التهديد اللى جايك عالارض متاعكم
-روقيه / وصلو حتى السيارة حرقوها شارينها زمان قريب بي سبعه الاف ..لما كانت السبعه لاف تسوا
-امحمد / خدت سوكم … المهم انا عندى معارف قواة
…ودرت التدابير اللازمه وكلمتهم عليكم
-روقيه باهتمام / باهى وشن قالولك
-امحمد / خلاص الموضوع تم …وقالولى اتأسفلنا منها
-حطت روقيه يدها على قلبها / الحمدلله … تصدق وصلو هددو رجالة خواتى ..وخلوهم ايجيبولى خواتى غضبانات
-امحمد / تو نزيد انكلمهم ..ويساوو حتى الموضوع هدا
-روقيه / ربي يحفظك استاد امحمد .. مش عارفه كيف بنشكرك
-فتح باب سيارته وبيركب فيها / ماتشكرينيش انا… اشكرى استاد الصادق
-روقيه فرحانه/ مشكورين كلكم …. وربي يحفظكم وسلملى على ابله نوريه
-ركب فى السيارة وسكر الباب/ يبلغ انشالله …سلميلى عالابلات وموفقين جميعا
-روقيه / مع السلامه
ولع السيارة ومشى وهوا يتصل بي موسى يبي يتأكد منه ادا كانه بلغ ايوب بالموضوع والا لا ..اينادى مايردش ..لانه دار تليفونه سايلانت وحطه فى قجر السيارة
وخشت للمدرسه فرحانه قريب اطير
________________________________________
ايوب وصحابه ماشيين فى السيارة
-ايوب اكتئب / ارفعنا للبحر
-موسى / فى هالصقع …فى شهر 12 راهو كانا ماتندريش على روحك
-زكريا / ارفعه يا موسى خيرك …
ودور السيارة ومشو لطريق الشط
وعمتك كنزى من لما سكر عليها موسى الخط وقاللها ساعه ونكلمك وهيا تراجى فى المكالمه وهوا ناسيها
وصلت الاستراحة خدت تليفونها وتتصل بيه .. وهوا مايردش …لانه مايسمعش فى تشريينها التليفون صامت
وهيا يانارى وين تلقيها البنات ايسكتو وهيا تبكى
اما على شط البحر
ايوب مقعمز عالبحر بعيد عليهم …
وهما مقعمزين على نهايه الدروج اللى دايرينه من صخور وينزل لتحت
ايوب يتدكر فى الموقف اللى صار كله لما ساعداته ..
مانساش منه ولا لقطه …كأنه صار امس
جوه صحابه قعمزو جنبه
-موسى / نحس فيك كان تحصل على حمزة فى تركينه تخليه هوا والوطا سوا
-ايوب / تعرف كان نتلاقى مع حمزة الشياطين لما نبوسله على راسه ..لانه هوا اللى كان السبب فى انى نلقاها
-زكريا / لكن نقولك حاجه يا ايوب
-تلفتله / قول
-زكريا / انت توة بديت صاحب مال…وامورك ممتازة
…سامحنى مفروض لما تتعرف عليها …تمشيلها وانت مستغنى…مش تستغنى بعد ماتعرفك …
-موسى / تصدق يا زكريا الكلام اللى قلته صح …ونقطه مهمه
وتلفت لى ايوب / صدقنى حتشك فيك بعد ماتستغنى
-ايوب رقد عالرمله وحط ايديه تحت راسه / ممكن صح ….كلام واقعى
-موسى / والله صدقت …حتى انا بعد نتعرف عالكبيدة ..
المفروض انكون امورى مستفه
-زكريا / خاطرى نعرف اسمها .. وانت مدرقه علينا
-موسى يضحك / سيورك تتعرف عليها
-ايوب / يعجبنى فيك يا زكريا …انك مادسيتش فلوسك وتصرف فيهم عالعلن
-موسى / ايوب مالاول اموره امستفه ..واهله معبيين
..مفيش حد بيسغرب فيه
-ايوب / لكن تصدق …كلامك صح … مفروض ندير تدابير…
وانا عارف كيف نديرها
-موسى / وكيف بدير
-ايوب / اصلا انا الفكرة ليها هلبا خاطرة عليا …واليوم العشيه بنفدها …
وقف ونفض حوايجه / ترا ارفعنى لمكتب امحمد …
-موسى / هى
___________________________________
مشو لمكتب امحمد …دارو شغلهم معاه …
وماباش ايوب يسأله عليها ولا يخليه يلاحظ انه يعرفها اصلا
بل بالعكس وعده انه يخليها فى حالها
وروحو لحوش ايوب قيس الساعه 3 القايله
نزلو ايوب وزكريا …وموسى قعد فى السيارة
-ايوب / انزل يا موسى خيرك
-موسى يطلع فى تليفونه من قجر السيارة / شويااا بس
-زكريا / خليه ..عارفه انا يبي يكلم الكبيدة
-موسى يضحك وشاف للتليفون / الله الله 21 مكالمه منها
-زكريا / الزعل بالشوالات توة …دور كيف ترضى
-موسى يضحك / شن يحزها توة
-ايوب / برة نادى الجيران يا زكريا زى مافهمك
-زكريا / تم يا قلم …غير تعالة انزلو الساكوات من الكوفينو قبل مايطلع حد منهم
-ايوب / هى
وضرب موسى رقم كنزى وسكر روشن السيارة
-موسى / الو
كنزى فاتحه الخط وتبكى
-موسى / الووو..خيرك ردى عليا ماتشغلينيش
-كنزى/ مانبيش نكلمك
-موسى يضحك / امالا علاش رديتى
-كنزى/ هكى
-موسى/ باهى سامحينى حقك عليا والله انشغلت
-كنزى/ لاااا .. نبيش نسامحك …عالاقل بعتلى رساله
اتكى موسى عالكرسى / عندك علم
-كنزى / شنو
-موسى / انى نحبك
وكانت اول مرة ايقولهالها
-كنزى فرحانه نست الزعل كله / شنووو
-موسى / نحبك …ونحبك هلباااا
-كنزى تمسح فى دموعها / وانا نمووووت فيك …من زمان
-موسى / وانا من اول مكالمه عجبنى صوتك ودلعك وكل شى فيك
كنزى فرحانه وساكته
-موسى / معش تبكى…مانتحملش دموعك
-كنزى/ تبينى معش نبكى اعطينى رقم اى حد من اهلك
…بس لما ننشغل نسأل عليك
-موسى / والله اهلى ماحيزبطو مكانى وين لما نغيب…لكن نعطيك رقم صحابى الزوز كترضيه ليك …لو انشغلتى كلمى واحد منهم بالتاكيد حيعرف مكانى وين
-كنزى/ نحبك ياللى تبى ترضينى
-موسى / وانا من عندى غيرك يستاهل نرضيه يا حبي
ومل عليها ارقام اصحابه وكتبتهم هيا فى مفكرة خاصه بيها
-كنزى / اهم حاجه توة نتلاقو ونشوفو بعض
-موسى / اكيد يا حبي
________________________________
خش ايوب ودخل الساكوات للمربوعه
-ايوب / حناى وتينا شاهى بيجونى الجيران
-سالمه / انشاءالله خير علاش جايينك …وشنو هالساكوات
-ايوب خدى يديها وباسهم / اهو جايينى واحد صاحبى معاهم وتو تفهمى يا حناى
-سالمه / باهى
وخشت ادير فى الشاهى
.
.
بعد ساعه …
جو جيرانهم عمك عبدالنبى وسعد والطاهر وغيرهم
ونادى حتى ميلاد راجل امه حضره
وجى امحمد …خش وسلم عالجميع
ايوب مقعمز جنبه موسى …وزكريا واقف على الباب
-ايوب ووجه يده على امحمد / انا يا جماعه الخير…
الشخص اللى قدامكم هدا عاطينى فلوس امانه داسهمله من 2012… وتوة طلبهم منى يبي انسلمهمله .. فقلت انحضركم بيش تكونو شهود
-عبدالنبى/ ربي يحفظك يا ايوب .. راجل وتصون الامانه
-ايوب / ويشهد الله انى لا فتحتهم الساكوات هادو ولا مسيتهم ولا طلعت منهم حتى قرش
-امحمد / زايدة معاك يا ايوب …داس حتى عند ناس غيرك ولقيتهم لاهفين منهم …لكن انت نعرفك مستحيل اديرها
-ايوب / هات الساكوات يا زكريا
بدى زكريا اينقل فى الساكوات قريب 12 ساكو وحطهم فى الوسط …وهادوكا الرجالة عيونهم قريب يطلعو ?
-ايوب / هادو فلوسك يا خوى ربيع
” غيرله اسمه ?” …
” وساكوات الفلوس كلهم جابهم من امحمد ..وبيردهمله ..لان هوا فلوسه كلهم فى حسابه فى المصرف يبيلك بيش ايطلعهم ”
-عبدالنبى / صاحب امانه يا ايوب …راجل من ضهر راجل
-امحمد / هادو 600 الف …ومدامك صنت الامانه …نبى نكافيك ونعطيك 150 الف منهم
بدت المربوعه كلها اتكبر??
وتلفت للحضور/ وانتو يا وجوه الخير ليكم منى كل واحد الف دينار
فى اللى فرح …وفى اللى تكبر ?
وخش ايوب لى حناه وخبرها …وطاحت اتزغرط
______________________________________
فى الليل فى مكتب ايوب
-ايوب / زايدة معاك يا امحمد …وهادو فلوسك وصحيت يا غالى
-امحمد / ولو ..راك ايوب
وطلعو معاه الساكوات للسيارة …وجايب معاه سيارة ثانيه حمايه
بعد ماطلع امحمد ..
تلفت ايوب لى موسى/ شنو توة…خلاص عاد معش عندى صبر
-موسى/ باهى وين بتتلاقو
-ايوب / فى مدرستها
-زكريا / وكيف بدير
-ايوب / بندير روحى ولى امر طالبه عندها ونسال عليها
-موسى/ شنو تحساب الحكايه ديس بيس .. تى ماهو بيسألوك على اسم البنت فى الادارة شن بتقوللهم
-زكريا / صح ..مش مزبوطه الفكرة
-ايوب / باهى نرفعو ملف اى بنت وزعميتا بنسجلوها فى المدرسه …ونشوفها بأى طريقه
-زكريا / ومنين بتجيب الملف …ومنهيا للبنت
-ايوب / تعرف كيف.. اختى ايناس السنوات اللى فاتو عطتنى ملفها بيش نسجلها فى مدرسه وراح منى الملف ودارولها واحد ثانى
-موسى / وكيف باهى
-ايوب / لقيته بعدها الملف وهوينا مدسوس فى حوش حناى.. غدوة نجيبه ونتوكلو ..
وتلفت لى موسى / انت اللى بترفعه الملف للتسجيل …بيش انت تلهى فى التسجيل وانا ندورها
-موسى / تم
__________________________________
ثانى يوم …
جاب موسى ملف اخته ايناس ….
وتلاقى مع صحابه قدام مكتبهم …ركبو السيارة وتسقدو للمدرسه …وايوب قلبه ايطق
وكلنا قلوبنا اطق انراجو فيهم كيف بيتلاقو ??
فى الطريق ايوب حاط الملف فى الكرسى الخلفى
هوا يسوق وموسى جنبه وزكريا كالعادة من الخلف
قام الملف ويتفرج عليه …لقى صورة بنت صغيرة
قعد يتفرج عالدرجات ولقى ظرف صغير فيه صور
فتحه وطلع صورة ايناس
-زكريا فى خاطره / بسم الله ما شاء الله ..عندك غزالة زى هادى وداسها علينا يا ايوب ..
وصلو للمدرسه قيس الاستراحة …
اللى فالبوابه سألوهم فوروهم الملف وقالولهم جايين بيسجلو بنت
خشت السيارة ودرسو وايوب قلبه فى الميتين
خشو قدام الادارة …وقعدو واقفين ايراجو فى المديرة لانه وقت استراحة وطالعه ادير فى دورة
ايوب ايدور بعيونه لحد ماشاف روقيه واقفه ..وتتكلم مع زوز طالبات …
وحدة مشت والثانيه قعدت واقفه عليها
ضرب جرس الاستراحة..
الطالبات اللى كانو واقفات عليها هما مرام وكنزى…
لما ضرب الجرس مرام قعدت اتنادى فى كنزى
-مرام / كنزى …يا كنزى… هيا الجرس ضرب
انتبه موسى للاسم لقى بنيه صغيرونه وجميلة جدا هيا اللى تقول هيا هانى جايه …
معناها هيا كنزى …
انصدم فى فارق العمر اللى بينه وبينها ..هيا صغيرة وهوا الشيب كلى نص راسه
قدم لى روقيه / روقيه …انتى روقيه ولا
قعدو جامدين و عيونهم فى بعض كأنه الزمن وقف
-ورعشت مع بعضها وتشبحله ومش متاكدة ميه فى الميه ومدت صبعها / ايوب ..انت ايوب
ايوب مبتسم / بشحمه ولحمه …
ايوب مبتسم وفرحان … وموسى مصدوم ..وزكريا فاتح الملف وهايم فى صورة ايناس اللى عمره ماشافها قدامه
____________________________________
تمت ….ويتبع
وقولو مش اطول من طريق تشاد باهى
نحبكم ❤