احفاد الشيطان للكاتبة زهور جمال الدين

#احفاد_الشيطان

?بقلم الكاتبه زهور جمال الدين?

?الحلقه السادسه ?

.
ايوب يحكى مع صحابه ويتفقو

-موسى / باهى كيف بتخطفو عالحظ هكى وخلاص ولا ناس معينه
-ايوب / انا والله مانزبط …تقريبا احنا انراقبو واللى نسمعو عنده فلوس نخطفوه

-زكريا / ياودى خلينا فى حكايه وسيط خير …نسعو وندورو على ناس انخطفلهم حد..نجيبوهم ليهم وناخدو الكومسيون
متاعنا

-ايوب يضحك/ الكومسيون !! منيت جبتها هادى
-زكريا / سمعتها امبارح فى فيلم عادل امام ??

-موسى/ معليشى تعرفونى فهمى رزين شوى ..ومنعرفش ننطق الكلمات اللى نحسهم عيب ..ترا قولى شن معناها الكلمه
بالك عيب واديرو عليا فى الجو ?

ايوب وزكريا يضحكو

-زكريا / معناها نسبتنا من الفلوس اللى بيطلعونا
-موسى / حتى انا فاهمها غير نبصر عليكم
-زكريا / ترا احلف
-موسى / مدام حلفتنى ..والله كان ماقلتلى معناهاالكلمه رانى فكرتها عجل سيارة كبيرة نوع طانطا?

وقعدو يضحكو الثلاثه

-ايوب/ شوى نكلم امحمد نفهم منه ونقولولكم

“امحمد الشياطين هدا ??”

______________________________________

.
اما فى حوش عمك ابراهيم

فى نهايه 2013 حناهم فاطمه فات على وفاتها عام

سماح وسهام كملو امتحانات الثانويه العامه …وطلعت نتيجتهم ونجحو

خالتهم خديجه اصرت انها ادير عرس اولادها مدامه البنات كملو الثانويه …واللى تبى تكمل جامعه عندهم براحتها

حجزو الصاله للحفله يوم 25/9/2013

وبدو فى السهريات … ودارو الكعك فى الحوش

جارتهم مبروكه وفتحيه مرت عمهم عبدالسلام وبناتها مقيمين عندهم من بدايه الاسبوع
عارفين روقيه بروحها مافيش حد كبير معاها… امها متوفيه
..وحتى حناها لحقت ..

مبروكه من الساعه 9 تكون عندهم وتروح فى الليل يادوبك غمضه العين ..ومن الصبح ترجع ثانى
اما عوال البنات فى الطلوع والقضيه متع العرس كله هوا عمهم عبدالسلام
احمد ومعاد مانعين عرايسهم يطلعو مع اى شاب من جيرانهم حتى لو عرض خدماته

نص الاسبوع جابتلهم خالتهم الرزق والخرفان …
وثانى يوم بعتتلهم القفه وفالليل لحقت هيا حنتهم ..سبرهم العرايس اتحنيهم عزوزتهم

ويوم الحفله …
مشو الخوات الزوز لنفس المزينه….
وكل وحدة طلبت من عريسها انه يدخلها للصاله

احمد نوعه صخوفى ومايدورش قاللها باهى ..وخش معاها وقصو حتى التورته وسهام قعدت تراجى فى غرفه العرايس

اما معاد قاللها مستحيل نخش ندرج معاك فى صاله نساوين
على قد مابكت ..وعلى قد ماترجت وهوا شى

وروقيه العرس نوض عليها المواجع..كل شوى تخش لهاديكا الدار وتسكر على روحها واطلع تيشرت ايوب وتشمه

بالرغم تلاقو مرة وحدة …لكن حب كبير فى قلبها من ناحيته

وتمت الحفله …وجت اكرام بنت خالتهم وعماتها بيروجو بالعرايس
وهما ايغنو ” زوز كناين ياسعدودى والحنه حنه عبودى”

وروحو العرايس لحياشهم …
خالتهم بانيه زوز شقق متقابلات لولادها فالدور الثالث

عندها راس بنيه ..والحوش كبير ماشالله

____________________________________

وفات شهر ….

ايوب والشباب صحابه قراهم عمك امحمد كووويس
وقاللهم انشدو وراقبو فى صمت… لين تلاقو ضحية معبيه ..اخطفوله حد من صغاره وساوموه..

طبعا هما مايزبطوش … فقررو ان ايخلو امحمد هوا اللى ايجيب الضحية اللى بيطلبو منها فلوس …وايراقب ويشوف كم عنده صغار واعمارهم ويعطوه 20% من العمليه

وبالفعل جابلهم اول عمليه …بينفدوها فى قاضى سابق
عنده زوز حياش واراضى…
قعد امحمد الشياطين ايراقب ..لين زبط انه زوجته اتسوق وتمشى لحوش اماليها كل خميس …وصغاره يلعبو مع صغار جيران جدهم فى الشارع لما يمشو

رفعهم امحد …الثلاثه ايوب وصحابه بيش ايشوفو المكان …
وجابلهم صور الولد الصغير اللى عليه العين وبيخطفوه
واسمه واسم خواله

“ماشالله صار حتى هما يتعبو جماعه الخطف?”

وجى الموعد …كان يوم خميس..

زوجه القاضى ولعت سيارتها وركبت صغارها ومشت لحوش بوها …
ايوب وزكريا وموسى مقعمزين فى السيارة ويراقبو …
موسى يسوق وايوب جنبه وزكريا من الخلف
طلعو الصغار يلعبو …
وهما مازالو ايراقبو ….

خش الولد للحوش … عطل …قعد ساعه …لين صبرهم نفد ..وتخاصمو فى بعضهم

-زكريا/ تى قلتلكم خلونى ننزل انجيبه الفرخ من بكرى .. اهو خش معش طلع افرحو توة
-ايوب / الصبر يا زيكو …اصبر مازال

بعد شوى طلع الولد الصغير …مغير حوايجه وشاد فى يده فلوس وماشى للدكان …..

-ايوب / ولع والحقه يا موسى

الولد ماشى فى الشارع لابس شورط وتيشرت …
عمره فى الثمانيه سنوات … .
يمشى فى الطريق يبي يوصل لى نهايه الشارع..واخد من امه فلوس وماشى للمحل..
وهما ماشيين فى نفس الشارع امرخيين فى السرعه

بعد عليه شوى …خلوه وراهم …لقو اخر حياش فى الشارع ما قدامهم حد

درسو السيارة عالجنب ….

قعدو شوى حوالى الدقيقه ونص ..لما قريب يوصلهم الولد

-ايوب / زى مافهمتك يا زكريا
-زكريا / تم يا حاج

سكتو شوى ….وبعدها

-ايوب / توة انزل يا زكريا

فتح زكريا الباب ونزل بسرعه …
وقف عالولد / انت محمد ولا
-الولد شبحله / ايه
-زكريا / معرفتنيش ..انا خالد صاحب خالك مؤيد
-محمد / مانعرفكش

-زكريا / شن بتشري
-محمد/ خديت من ماما فلوس بنمشى للمحل نشري تشيبس
-زكريا / مافيشى تشيبس المحل هدا خسارة ..اركب معانا فى السيارة نرفعك للمحل البعيد ناخدلك
-محمد / ماما قالتلى ماتمشيش مع حد مانعرفوشى
-زكريا / تى كيف ماتعرفوشى …انا قلتلك صاحب مؤيد
…تعالة نمشوله ههوا اصلا فى المحل قاعد خالك
-محمد / باهى ننشد ماما ونجيك
-زكريا / امالا سلامتك انا مانقدرش انراجيك
(الاتفاق كان ان لو الولد ماباش ايجي معاه ايخليه يمشى مسافه ..وبعدها يلحقه ايسكرله فمه بيده ويقيمه ويحطه فى السيارة )
-محمد / باهى باى
-زكريا / باهى

وتلفت زكريا بيمشى للسيارة …

-محمد / يا عمى
-تلفتله زكريا/ نعم
-محمد / باهى خلى نمشى معاكم لى خالى
-زكريا فرح / باهى تعالة هى

خداه من يده وركبه فى السيارة …وولعوها وهما الثلاثه فرحانين …ومشو والولد معاهم

___________________________________

فى حوش خديجه …

سماح وسهام كيف طقو شهر …عرايس قاعدات
مقعمزين فى الصاله وخالتهم ادرس عليهم

-خديجه / انا مايساعدنيش الحال هدا … بنتى اكرام تقرا فى الطب … وقرايه الطب واعرة ..بتلهو بتريسكم واطيبولهم باهى …ماتبوش انا معش تعملو عليا …شيبانيكم ناكل انا وياه حتى الزميطه

-سهام / يا خالتى اول امس نزلت ماخلتنيش اكرام انطيب .. واليوم لقيتك انتى حاطه الغدى من الساعه 10 ..
-حديجه / ووينك فى ساير الايام .. نزلتى بطيبي غير
اولامس بس
-سهام / نزلت حتى قبلها وهيا ماخلتنيش انطيب اتقولى انتى قاعدة جديدة
-خديجه / ياودى يوم امس مشى فى امس ..واحنا صغار اليوم …من اليوم اديرو دور بدور فى الطياب والكوجينه .. وحتى انا بناخد معاكم دور
-سهام / ياخالتى ماعنديش مشكله انطيب حتى بروحى كل يوم ..وانتى معش فى داعى اتعبي روحك
-خديجه / لا عادى مازلت بصحتى ..ونطيب معاكم ايدي بيدكم …
وتلفتت لى سماح / وانتى شنو يا سماح
-سماح / انا كيف ماتبى انتى ياخالتى
“سماح عابيه على احمد اللى مدللها وواعدها انهم اول مايكملو الشهر بيبدو ياكلو فوق فى حوشهم واطيب هيا فى كوجينتها ”

_____________________________________

.
فى حوش ابراهيم

روقيه مقعمزة هيا وبوها وعمها عبدالسلام
ومرام فى المدرسه ..تقرا شهادة ثانويه

-روقيه / يا عمى احنا من زمان قولناله مانبوش انبيعو..من وقت جاب بلوك زمان وداير روحه يبي ايدير عليها صور
الارض…جبناله البلديه ولزاته
-عبدالسلام/ يا بنيتى توة مش زى زمان ..توة ايقولو ليبيا حرة .. وتشبحو فيها ..كل واحد يحكم من راسه
– روقيه / هدا جوابنا الاخير .. الارض مش حنبيعوها ..وبلغه الكلام هدا …وقوله رد باله نلقو حاجه متغيرة فيها …طول بنشكو فيه
-عبدالسلام / غير وين بتشكى بس يارقيه …وين المحاكم وين الشرطه وين الامن …هاك تشوفى فيها بعيونك
-ابراهيم / حسيتك زى تبينا انبيعوها يا عبدالسلام
-عبدالسلام / والله كانا انا فى مكانكم ارض حاطين عليها العين من زمان نعطيهالهم وعيونى مغمضات ..شن مستغنى على روحى .. هادو مجرمه وخاشين فى مليشيات وايدهم طايله
-وقفت روقيه / هدا اخر كلام عندنا….واحنا مانخافو من حد غير من ربي

تلفت عبدالسلام لى ابراهيم وشبحله

-ابراهيم / اللى قالتهولك رقيه راهو راينا كلنا ..
-عبدالسلام / انا نصحتكم وانتو براحتكم

______________________________________

.
ايوب وجماعته ماشيين فى السيارة يجرو
دارو مكان معين ..استراحة مهجورة مولاها هارب .مشو اجروها من خوته

الولد حتى كانه صغير فهم انهم رافعينه معاهم وبعيد على امه

-محمد يبكى/ وين رافعينى…تو ماما تقعد ادور عليا وكانا ماتلقانيش تضربنى

ايوب قلبه بيتقطع عالولد لكن متحملها وساكت ….
زكريا مقعمز جنبه ايسكت فيه / اهو ماشيين لماما احنا يا محمد
-محمد يضرب فيه / انتو كدابين ..وين رافعينى ..
ويبكى دموعه حاله

ايوب وزكريا وموسى الثلاثه قلوبهم بتتقطع عالولد
وركبهم نوع من الخوف …الموقف رهيب … واكبر من تحملهم

بالرغم واخدين عالمشاكل والعراك …لكن انهم يخطفو هادى كبيرة هلبا

عملة زى هادى تبى شباب زارطين …ماتبيش شباب فايقين وفى عقولهم

السيارة تجرى والولد ايعيط ويبكى

-ايوب / لف وارجع يا موسى
-موسى شكله ماصدق سمعها / باهى

-زكريا / شنو ماصارش ..ولا وين ماشيين
-ايوب / طلعونى منها والله ماقدرتها

-موسى / وانا زيك …واااك حاير اللى ايديرو فيها قلوبهم من شنو متكونه
-زكريا / شنو انا بس اللى بنكمل …خلاص حتى انا معاكم فوتو الموضوع

وتلفتت للولد الصغير/ اسمع احنا كنا بنرفعوك لى خالك مؤيد …لكن توة اتصل بيه صاحبي وقاله انه طلع …معناها انردوك لحوش جدك خير
-محمد / باهى ردونى ..اكيدة ماما ادور فيا

وبالفعل لفو بالسيارة لين وصلو لشارع حوش جد الولد
…ونزلوه فى بدايه الشارع

-زكريا / تعرف توصل لحوشكم توة
-محمد / ايه نعرف …باى

ومشى يجرى عيونه منفخات واضح انه كان يبكى
لما وصل قدام حوش جده.. لقى امه واقف من ورا الباب وادور عليه
-ولد جيرانهم / هوينا محمد جاى من نهايه الشارع يا عمتى عفاف
-عفاف تلفتت شافاته / تعالة اجرى وينك..وين كنت

وصل محمد خايف من امه

-عفاف تفنص فيه / وين كنت انت
-محمد خايف / رفعونى الاولاد فى السيارة
-عفاف خافت / غبر فيك منهما الاولاد هادو اللى رفعوك
-على طلعت خوها مؤيد / خيره ولدك ..ومنو الاولاد اللى رفعوه
-محمد خايف / صاحبك انت يا خالى …قالى بيرفعنى ليك ولما قعدت نبكى ردونى للحوش
-عفاف ترعش / حيه عليا …يا غبارتى …تعالة ولدى نخشو لداخل واحكيلى بالشوى عليك

عفاف حكالها ولدها عاللى صار كله ..وقعدت اتوصى فيه مايعاودش لبوه اللى صار كله…. وزلبحاته قالتله هادو صحاب خالو بلحقه .. وماتقولش لى بابا انك مشيت معاهم …

اما مؤيد قعد يتصل باصحابه بالواحد ويسال فيهم …كلهم قالوله انهم مايعرفوش ولد اخته ولا ركبوه معاهم فى السيارة

____________________________________

ايوب وجماعته روحو للحوش

وكل واحد فيهم قاعد مصدوم من عضمه الموقف …
وكلمو امحمد وحكوله اللى صار كله…
قعد يتعارك معاهم …وماخلى هوا ماسب فيهم وماخلو هما ماسبو فيه
.
.
.
بعد ثلاثه ايام

-امحمد / عادى لحظه غضب ومشت فى حالها انت عيطت عليا وانا عيطت عليك وتمشى عادى
-ايوب / ما ادور شى يا امحمد ..احنا اوخيين
-امحمد / باهى الكتيبه الخاصه متعكم كيف بديرو فيها
نوعا ما بدت تنشهر كتيبه احفاد المختار
ايوب/ كتيبه شنو يا راجل ..هوا احنا ثلاثه انفار
-امحمد / المهم دايرين كتيبه بروحكم … والمفروض ترفعولها هيبتها والكل يحترمكم
-ايوب / انا مش حنصكرها الكتيبه ..لكن حنغيرلها اتجاها
-امحمد / وشنهوا الاتجاه اللى تبى اديرهولها
-ايوب / بنديرها كتيبه لى رد المظالم
-امحمد / كيف يعنى
-ايوب / يعنى اللى عنده ارض واخدينها منه …يدفع وانردوهاله .. واللى عنده مصنع امسكرينهوله من زمان نفتحوهوله بقوة السلاح ..وهلبا انواع ثانيه
-امحمد / فكرة حلوة …وخاصه توة الليبيين عايشين فى حارة كل مين ايدو ايلو ?..
-ايوب/ يعنى بايدك اترد حقك ثالث ومثلث
-امحمد / والمفروض احنا ماليناش علاقه الحكايه اللى بنفدوها للشخص حقه ولا لا …احنا شغلنا انردوله الحاجه اللى عطانا عليها فلوس سوا كانت ليه ولا مجيش عليها
-تلفتله ايوب / قصدك انت بتخش معانا
-امحمد / طبعا انا اللى بنأمنلكم السلاح والرجالة
-ايوب / تمام

______________________________________

بعد اسبوع ….

فى حوش سماح واحمد ….

-سماح / نبى نفهم ليش فى دارنا نتفقو على كلام والزوز راضيين عليه ..ولما تطلع لامك برة يتغير كله
-احمد / اسمه خالتى مش امك
-سماح / انا لوطة مش مطيبه …انت وعدتنى ..وانا مادخليش
-احمد يترجا/ وراس حبيبتى فكينى من المشاكل مع امى
…تعرفيها قادرة واالى تتغشش منه يحصل
-احمد / عمرى ماتوقعت انك ضعيف الشخصيه مع امك
…ليش امالا زمان دايرلى البحر طحينه وعلى قولت ماحد يدخل فينا
-احمد / اووووف مكثر دوتك بديتى…من اليوم تاخدى دور مع امى واختك وتبدى اطيبي …هى فكينى من المشاكل الزايدة
وخدى دخانه وطلع خلاها تبكى لانها انصدمت فيه وشافاته على حقيقته
.
.
.
.
اما فى حوش معاد وسهام …

-معاد / اسمعى مش على خاطر انتى مرتى …لكن انا الظلم مانحباش …الكل فى الحوش هدا ايعول مش حد تاعب وحد راقد
-سهام / باهى زى مايريحك
-معاد / الطياب انتى وسماح وامى …لان اكرام فى الجامعه
..وامى خلاص مفروض تستريح لكن طياب يومين فى الاسبوع مايديرلها شى ..اما ضمان الكوجينه يتقسم بينكم الثلاثه ..انتى وسهام واكرام .. وتسييق الجنانات كل يومين وحدة …
-سهام / انا قلتلهم ماعنديش مشكله حتى لو نطيب كل يوم
-معاد / الحوش تبيه يمشى لقدام لازم ايكون منظم ..وحتى
امى قالتلى اللى درته ماشى علينا اكل
-سهام / تمام زى ماتحب

الساهل مع مرته ساهل مع الجميع بسهولة تقدر امه تركب عليه وتاخد ودنه تميلها عندها ..اما الواعر مع مرته واعر مع الجميع ..حتى لو كانت امه …شخصيته اللى فارضها تخلى امه وكل الناس ايديروله الف حساب

__________________________________

وفات شهر …..

ايوب بدى قطاع خاص??… وكتيبه احفاد المختار انشهرت هلبا
… وبدت فروع …قائدها الاعلى امحمد

وكل فرع دايرله رايس…كتيبه احفاد المختار..تقتل ..وتخنب وتخطف … كل فرع وعنده مهمه

بالنسبه لايوب دايرر روحه امتبع الحلال …

وماسك فرع رد المظالم …اللى عنده دكان واخدينه منه زمان .. ايردهوله بقوة السلاح
واللى يبي ارض يرفعلها بلوك ويديرلها صور ويكتب عليها ورثه المرحوم فلان …جياشه ..والمتضرر يمشى للمحكمه
…وطبعا مامحصلين منه شى .. الحاجه اللى ايجيش عليها خلاص تم فيها الكلام يستولى عليها ويعطيها للشخص اللى موصيه عليها وياخد نسبته اللى هيا نص سعر الحاجه ..سواء كانت ارض او محل او عقار منزلى …كل شى يخدم فيه

السلاح ايضخ عليهم من جهه امحمد صاحبه …لانه ريسه على الكتيبه …وعطاه شباب تباعه وتحت امره منهم ليبيين
ومنهم افارقه ….

دارو ثلاث سيارات تندرا خاصات بيه هوا وجماعته بس والتباعه متاعه
زكريا وموسى واحد يده اليمين والثانى يده اليسار
مش ناسيهم ويقسم عليهم شركه هما وامحمد
اما التابعين ليه ..امدايرلهم امحمد معاش رسمى…ومسلمهم سيارة كل واحد

طبعا شخصيه ايوب وصحابه مش كلهم يعرفوها ..وخافيين ارواحهم وشخصياتهم عن العامه .. اسم ايوب مشهور لكن وجهه مش كل الناس تعرفه
واى موضوع شغل ايجيهم عن طريق امحمد او عن طريق الشباب اللى تحته

.
لحد ما يوم جاه واحد اسمه حمزة عن طريق امحمد ….
دخله لمكتبه وقعمزه
قاله انه يبي ارض فى عين زارة من زمان …وصاحبها مايبيس ايبيعها تعبنى

–ايوب ايشوف فى مسدسه وحاط دخانه فى فمه / هيا باسم منو ..وشن ضروفها وكم تسوا
-حمزة / هيا لواحد ايقولوله ابراهيم .. وعنده فيها حجه …
وانا نبى ناخدها باوراق قانونيه نبيه ايوقعلى عليها
-ايوب/ اعتبر الاوراق توقعو والارض بدت ليك..قتلك كم تسوا
-حمزة / هيا تسوى فى حوالى 70 الف ..
-ايوب / معناها مش كبيرة ..انت شن بدير بيها
-حمزة/ عندى جنبها ارض ..نبى نكبرها بيها.. وتبى الحق ..المساله بدت مسأله عناد …بنتهم هيا اللى رافضه
البيع ..وانا ماتمنعنيش بنت على انى نشرى حاجه عجبتنى
-ايوب / ووين خوتها البنت …ليش تتكلم معاها هيا
-حمزة/ ماعندهاش خوت ولاد …وبوها مريسها على كل شى .. الكلمه كلمتها والشورة شورتها
-ايوب /لا تمام فهمت …خلاص اعتبر اوراق الارض بدو فى جيبك ..غير وتى نص ثمنها كاش
.حمزة/تم???

_____________________________________

تمت ….ويتبع

زعما كيف بيصير …حسيته زى اللى يتكلم على روقيه ولا ?????

نحبكم ❤❤