احفاد الشيطان للكاتبة زهور جمال الدين
#احفاد_الشيطان
?بقلم الكاتبه زهور جمال الدين?
?الحلقه الخامسه ?
.
ايوب يتكلم فى التليفون
-ايوب متعصب /خيرك سكتت.. خيره الرايد ميلاد ..اتكلم
-الشخص/ انت شن تقربله
-ايوب / انا ولده
-زكريا وقف وحط يده على كتف ايوب / خيرك يا ايوب شن فى..
-ايوب تلفتله وكشخ / غير راجى يا زكريا خلى نفهم يا راجل
-رجع الشخص اللى يدوى معاه رد / لكن مش مكتوب انك ولده
-ايوب / تى وين مش مكتوب …غير فهمنى
-الشخص / تعالة لى جزيرة الدرن متع قرجى بروحك ..
واقعد واقف جنب اللى يبيع فى الشاهى واللوز نص ساعه ونكون عندك
-ايوب / انت منى
-الشخص / كون فى الموعد ….وسكر الخط
قعد ايعاد للرقم يلقى فيه مقفل
اتصل برقم ميلاد لقاه مقفل
كلم خوه حسن ….
-حسن / اهلين ايوب
-ايوب / اهلا حسن شن حالكم وحال امى ..وين عمى ميلاد
-حسن / والله شن منقولك يا ايوب ..بوى مشى اولامس لبنغازى …ونتصلو بيه رقمه مقفل من امس الصبح
-ايوب / باهى تو نعاودلك
-حسن / شغلتنى خيرك تنشد عليه
-ايوب / لا مافى شى غير انا موصيه على حاجه
-حسن / غير خلينا نشوفوك
-ايوب / انشاءالله
سكر التليفون وتلفت لصحابه / هيا يا شباب
خش خدى كلاشنه اللى داسه وطلع
وركبو السيارة ومشو
__________________________
فى حوش ابراهيم
روقيه لابسه عبايه وحاطه حجابها و مقعمزة جنب راس حناها وتبكى
وجارهم عمك رمضان ..شيبانى كبير هلبا.. مقعمز جنبها وايقطرلها ..وهيا مرة مرة تحرك فى رموشها بس
-سالم جارهم / اطلعى يا رقيه خير..مفيش داعى تحضرى الموقف كله
-ابراهيم قام يده / خليها يا سالم
-رمضان مطبس فى ودن العزوز/ شهدى يا حاجه فاطمه
..اشهد ان لا اله الا الله..واشهد ان محمد رسول الله
روقيه تبكى وخدت صبع حناها وقاماته كأنها تبى اتشاهدلها
-ابراهيم يبوس على جبهه امه / سامحينى يمى
-حطت يده على كتفه وهيا تبكى / كفيت ووفيت معاها يا بوى ربي يحفظك ويكبر مقدارك
الدار فيها عبدالحكيم ولد خو الحاجه وروقيه وابراهيم وثلاثه من جيرانه بس
اما برة الحوش يردس خواتها وجاراتهم وبعض من اقاربهم
خدت روقيه المصحف وبدت تقرا فى سورة ياسين عند راس حناها والسيبانى ايقطرلها
بعد ربع ساعه قام عمك رمضان راسه/ لا اله الا الله ..الحاجه عطتكم عمرها
زادو دموع روقيه بدو زى المطر …لكن تبكى فى بكى رحمه
__________________________
.
ركب ايوب وصحابه فى السيارة …
وطلعو جهه جزيرة الدرن
-ايوب راكب من قدام / اسمع قص وارجع من جهه قاعه الشعب وامشى فى طريق قرجى غادى مفيش بوابات ..خير مانتلاقو مع بوابه وتشد مننا الكلاشنات كلهم
دارو ورجعو من طريق قرجى .. ووصلو لجزيرة الدرن درسو عاليمين ..
-موسى/ تى نخلوك بروحك ونمشو
-ايوب / قلتلك امشى يا موسى قالولى نبوك بروحك تخافهم خاطفينه ولا حاجه
-زكريا مقعمز مالخلف / انت تحلم كانك تحسابنا بنمشو ونخلوك بروخك
-ايوب يضحك/ تى والله ماكم عاديين …باهى تعرفو كيف .. برو اوقفو فى الورشه اللى مقابله غادى عاليمين
( اللى يعرف جزيرة الدرن يعرف ان فى ورشه تصليح سيارات من 2007 غادى مكانها لعند توة ??)
نزل ايوب ..ومشو زكريا وموسى وقفو السيارة قدام الورشه وقعدو ايراجو
شويا ووقفت سيارة تاكسى عاليمين قدام بياع الشاهى
…راكب فيها شاب جنب سواق التاكسى
-الشاب اللى فى السيارة / ايووب
-شبحله ايوب كأنه يعرفه / امحمد … امحمد ولا
-امحمد / هوا بشحمه ولحمه
وخلص التاكسى وفتح الباب ونزل سلم على ايوب بالاحضان وزكريا وموسى يشبحو من مكانهم وايراقبو
تلفتلهم ايوب / تعالة يا موسى…زكرياااا تعالو
ركبو السيارة وولعوها ولفو من الجزيرة ورجعو لجهه البياع ووقفو …
فتحو الباب ونزلو …لقو ايوب قاعد ايسلم وايهلل وايرحب
-ايوب / كيف حالك يا امحمد …طلعت منها وقعدت حى
-امحمد / الحمدلله هاك تشبح فيا قدامك …تبى الحق حتى انت نحسابك متت
-قام ايوب ايديه / لاااا الحمدلله هاك تشبح فيا قدامك
وتلفت لصحابه / تعالو ياشباب خيركم
نزلو موسى وزكريا من السيارة ومشو جهه ايوب
مد امحمد ايده وسلم عليهم
-ايوب / لكن انت شن علاقتك بى عمى ميلاد تسال فيا عليه
-امحمد / ماهو هدا هوا الموضوع اللى نبيك فيه ومنقدرش انجيبك الا هكى ..نخاف شفرتى مراقبه
-ايوب / مراقبه …ومن بيراقبها ..مافهمت منك شى
-امحمد / اركب معاى نمشو لمكان فيه امان ونحكيلك
-ايوب / نمشو لحوشنا
-امحمد / تم
ركب معاه وقال لصحابه خليكم فى جرتنا
ومشو جهه حوش ايوب
__________________________
فى حوش ابراهيم
فتحت روقيه باب الدار اللى حاطين فيها حناها وطلعت وهيا تبكى
-روقيه تبكى/ ياعيله حناى توفت ..ومنبوش نحرقوها
…بالله عليكم ابكو عليها بكى رحمه
-مرام / لاااا …حناى لاااا
وقعد يشدو فيها صاحباتها مقعمزين فى جنبها
وسهام وسماح مشو يجرو لروقيه اضبطوها الزوز وقعدو يبكو
وبنات اخت الحاجه وبنات خوها قعدو يضبطو فى بعضهم ويبكو
والكل ناض عزى روقيه باعتبار انها كبيرة الحوش
وبدو باقى الجيران اللى مهناش ايخشو …وتعبى الحوش
وخشو شباب الجيران قامو الحاجه وطلعوها للسيارة رفعوها للمستشفى بيش ياخدو تصريح الدفن
__________________________
وصل ايوب وامحمد لحوش ايوب
ووصلو صحابه ودرسو سيارتهم وراه ونزلو وخشو معاهم للحوش
قعمزهم فى المربوعه …وخش للمطبخ حط براد شاعى عالنار
وجى لحناه
-ايوب/ حناى حطيت براد شاهى عالنار ..كان طاب مديهولى
-عمتك سالمه مقعمزة تسلت فى شعرها / باهى
ومشى من الممر وخش للمربوعه …قعمز عالصالون وحطت تحت ايده مخدة اتكى عليها
-ايوب / توة انت فى الامان.. واللى تبى تحكيهولى قوله
..صحابى هادو كيف نفسى…احنا الثلاثه كأننا واحد
-زكريا / منور يا برو
-موسى / ماعرفتناش عالاخ
-ايوب / هدا امحمد …صديق تعرفت عليه فى 2011 ايامات حبسونى …ايامات انشالله ماعاد تنعاد
-موسى/ تشرفنا
-امحمد / تدكر يوم اللى ضربونا …وكل واحد شد الخلا وهرب …فى اللى مات وفى اللى قعد حى…اييييه ايامات
-زكريا / تقعد تجربه فى حياتكم …انشالله ماعاد تتكرر
-ايوب / قاعد ماحكيتليش انت شن علاقتك بي عمى ميلاد
-امحمد/ عمك ميلاد مخطوف عندنا
-وقف ايوب / اااه …شن تقول انت …مخطووووف
-امحمد / صلاتك عالنبى وقعمز
-ايوب / كيف بنقعمز وانت تقولى خاطفينه …وبعتالى انتو منى …
-امحمد / احنا جهه مليشيا قطاع خاص اسمنا ثمار فبراير
..وليه عندنا يومين ..تبعناه من لما طلع منماشى لى بنغازى
-نقز عليه ايوب شده من رقبته / مصح وجهك وخاش لحوشى وتقولى فيها فى وجهى ..تى هدا زى بوي يا حمار اللى تتكلم عليه
-دفه امحمد / تى حول يدك وانا هدا علاش جايك
خشت حناه سالمه للمربوعه جايبه الشاهى شافتهم واقفين انخلعت / ووك عليا خيركم
__________________________
عزى عمتك فاطمه قام …
وعلى اساس جنازتها فى العصر ..غير ايغسلوها
شباب الشارع بنو الخيمه وكملوها
-خالتها خديجه ام احمد ومعاد / نوضى يا رقيه اطلعى للخيمه انتى وخواتك الناس بتعزيكم
وقف رقيه ومعاها بنات عم بوها بيطلعو من وسط الحوش
فاتو من الممر تلفتت للمربوعه لقت مرام تبكى هلبا تبكى هلبا وصاحباتها وبنات عمام بوها ايسكتو فيها
-روقيه / يا داليا
-داليا صاحبه مرام / نعم
-روقيه / جيبيهالى برة للخيمه
-داليا / باهى
وتلفتت لمرام / نوضى يامرام انطلعوك لى روقيه برة
-ندى صاحبتها / علاء مابطلش اتصال بيك من بكرى ردى عليه حتى دقيقه
-مرام تبكى وتشلهق/ ردى عليه انتى … انا والله مانقدر نكلمه
فتحت ندى الخط متع تليفون ندى وتوشوش اترد على علاء فى التليفون
داليا صاحبتها واميرة بنت عبدالسلام ايقيمو فى مرام وطلعوها للخيمه بري
قعمزوها جنب روقيه وحضنتها وبدت تبكى هيا وياها
-روقيه / مرام حبيبتى حناى مانبوش نعدبوها ..بكى رحمه وخلاص سلم اوخيتى
ونزلتها حطتلها راسها فى حجرها وقعدت اتمسد على شعرها
وسرحت بعيد بعيد … خيالها مشى للولد اللى لقاته فى البراكه وعاوناته ….عقلها كلها مشى عند ايوب …
الانسان فى الوفيات يتدكر مواجعه كلها … وخطر عليها صلاح اللى بدت تكرهه فوق الوصف …لانه هوا السبب فى انها رمت رقم زكريا …اللى كان املها الوحيد فى انها توصل لى ايوب …
وتلفتت لقت مبروكه مقعمزة هيا وكنتها سعاد مرت صلاح
سعاد تشبح لى روقيه بعين حمراء …متحبهاش نهائيا
..راجلها مرة مرة يغلط فى الحوش وينادى فيها روقيه
..عرفاته هايم مع جارته ..ومن وقت مازبطت وهيا تكرهها
اما عبير واميمه بنت عبدالسلام واكرام بنت خالتها شادات الكوجينه وايديرو فى الشاهى للناس
__________________________
.
فى حوش عمتك سالمه
-ايوب / مافى شى يا حناى ..خيرك جيتى انتى
-سالمه? / نجيب فى الشاهى اللى درته عالغاز.. وبعتالى الاصوات واصلتنى لداخل كيف مافى شى
-ايوب يضحك فى ضحة صفراء / سلمى على امحمد صاحبي يا حناى
-امحمد مد يده / اهلا شن حالك يا حاجه
-سالمه تشبحله من تحت ضرسها / اهلا بيك ..خيركم متخاصمين
-امحمد / ربي مايجيب خصام ..ايوب صاحبي من زمان ونحب نتعافر انا وياه بالبصارة
-الحاجه مش مصدقه / صار بالبصارة قتلى …باهى ربي يعقد عسلكم
-ايوب / قعمزى معانا يا حناى
-سالمه / ايه فهمتك …تو نطلع هى …
وتلفتت و طلعت …
قعدو يضحكو زكريا وموسى ..لانها من زمان تحب توقف تتصنت شن يحكو لين ينخصها ايوب ويقوللها قعمزى معانا بيش تفهم وتطلع ??
-تلفت ايوب لى امحمد / قول شن كنت تبى تقول ..وانت علاش جاى اصلا
-امحمد / ميلاد مخطوف عندنا …واحنا طالبين فيه خمسين الف …ولما قريت اسمك فى تليفونه ..قررت نتلاقى معاك ونتاكد ادا كنت ايوب اللى نعرفه والا لا
-ايوب يعيط / تى انت بتهبلنى..افرض طلعت مش هوا ..تى كيف مزال بنسيبك بعد قلتلى شن تقرب لى ميلاد
-امحمد / امالا علاش قلتلك اوقف جنب متع الشاهى..بيش نشوف وجهك ونتاكد انك هوا والا لا …لو مطلعتش نفس
ايوب اللى فى بالى كنت بنكمل فى الطويل منغير مانكلمك
-ايوب / خمسين الف منين بنجيبوهم .. هوا حالته عاديه راهو مش لدرجه المبلغ هدا
-امحمد / انا لما لقيته قريبك ..وهوا قالى انك ولد مرته
..قلت لو تاكدت انه ايوب نفسه بنعطيهوله بنص المبلغ وبنفيده
-زكريا مدهول من اللى قاعد يسمع فيه / وانتو ليش خاطفينه
-امحمد / لانه واحد من الضباط اللى انقلبو مع الثورة فى اللحظه الاخيرة ..فأكيدة معبي وداير قرش
-ايوب / معقولة تغيرت يا امحمد من مدرس ..لى مجرم .. شن االى خلاك ادير هكى
-امحمد / لقمه العيش يا صاحبي
-ايوب / باهى كيف ايصير توة
-امحمد / المبلغ هدا تقدر انت اتحصل منه عشرين الف لو كنت وسيط لاهل الضحية …يعنى بدل ماتقوللهم طالبين خمسين تغير المبلغ وتقول طالبين ستين..تاخد منهم هما عشرة ومنى انا عشرة ..يعنى تأمنلى 40 الف وتسلمهملى نعطيهم لاصحاب المليشيا
-ايوب / كيييف.. كيف وسيط …كيف يعنى وسيط
-امحمد / يعنى لو اهله بلغو …تقدر تكون انت الوسيط اللى بيطالب بيه … وتكون على تواصل معانا ..وتقوللهم عالمبلغ اللى احنا طلبناه
-موسى/ وانت شن بتستفاد
-امحمد / انا بنقسم عليه العشرين الف …لانى انا اللى بنعطى اسمك ليهم كوسيط …وهما الحقيقه طالبين اربعين
…جيتك مالاخير وبالصدق يا ايوب..لكن لو وافقت حقاتى يوصلونى قبل مانسلمه ليك
-ايوب / امالا تحسابنى خسيس وماعنديش ضمير نطلب من خوتى خمسين الف ونلهف منهم عشرة
-امحمد / خلاص انت ماتلهفش …ردهم ليهم العشرة لاف ..لكن انا عشرتى نبيها
وقف ايوب عالشباك ويتفرج عالشارع
-لحقه امحمد / اسمع يا ايوب .. انت صاحبى ومعرفه قديمه وتعز عليا ..وانا لما لقيته قريبك الحق تحشمت منك وكان المبلغ كبير ونقصته على خاطرك ..قلتلهم عادى عندنا ناس ثانيه مخطوفه نحصلوهم منهم مبالغ اكبر
-زكريا / معقولة قى ناس بالوقاحه هادى
-تلفتله / هادى مش وقاحة …هدا بزنس …
وتلفت لى ايوب / انا توة بنستادنك …خمم ورد عليا ..
وقام تليفونه / رقمى الشخصى بنشرينلك بيه ..ديرله حفظ وكلمنى عليه
ومشى للباب بيطلع
-ايوب / راجى يا امحمد ..خلى نوصلك
-ضربه على كتفه / لا لا عادى تو ناخد تاكسى..خود راحتك وخمم باااهى ودير مصلحتك بين عيونك
وتلفت لصحابه / عقلو صاحبكم وقولوله شوف مصلحتك
وطلع وخلى ايوب وصحابه حايرين فى الموضوع اللى صار معاهم والكلام اللى سمعوه
__________________________
بعد ثلاثه ايام …..
-حسن / مدامك عندك تعرف واحد منهم.. راس اوخى كلمه قوله يعطينى اسبوع بس كيف نبيع الارض وبعتالى ساهل ..خمسين الف مش مبلغ بسيط
-ايوب / حناى عطتنى حدايدها الكبار وخراصاتها وزنتهم جابو سبعه الاف
-حسين / بارك الله فيها عمتى سالمه ..زايدة معاها لكن ردهملها …لكن لو بنبيعو دهب…فدهب امى اولى
-ايوب / حناى مستحيل تنسى جميل حد دارلى حاجه باهيه
-حسن / لكن قوللها رد بالها تقولها قدام حد ..قصدى على حكايه الخطف
-ايوب / علاش قصدكم…..
جت اختهم ايناس جايبه فنجانين قهوة قصت عليهم
-ايناس / اهلا ايوب كيف حالك مانحسابكش هنايا
-ايوب / اهلاااا انوسه كيف حالك
-ايناس / الحمدلله
-ايوب / وين امى خيرها ماجتش سلمت
-ايناس / احنا مانندروش عليك هنايا .. خشيت بالسكيت
-ايوب يضحك / باهى بري ناديها
-ايناس / هوينها شادة التليفون وتتصل برقم بوى وخلاص ..تلقى فيه مقفل …
-ايوب عرف انهم ماقالوش لامهم ان بوهم مخطوف / باهى غير ناديها
-ايناس / حاضر…خود انت الفنجان متع القهوة..وحسين تو نديرله فنجان ثانى
وطلعت نادت امها ….خشت امنه
-امنه / اهلين اوليدى
-ايوب وقف وسلم عليها بالوجه / اهلا امى شنحالك
-امنه / حال الشغله يا وليدى ..عمك ميلاد من لما سافر لى بنغازى ماكلمناش …انشغلت عليه
-حسن / مش امس كلمنا يااام .. لكن الله غالب لما عطيتك التليفون الخط انقطع
(حسن ماسح اسم صاحبه محمد عالرقم ..وكاتب بداله بوي..واتفق مع محمد يتصل بيه ولما بيعطى التليفون لامه يفصل الخط )
-ايوب فهم انهم ايسايرو فيها / انت سمعت صوته يا حسن ولا
-حسن / سمعته امالا شنو
-امنه / ماهو ربي يهديه …من لما اتصل وانا انقوله يا حسن هات انكلمه …قعد شاد التليفون لين الخط انقطع
-حسن / تى انا شن قلتله غير كيف حالك وخلاص ..وانقطع طول الخط
-امنه / لا والله قعدت شاده قريب خمسه دقايق لين انقطع
-ايوب / المهم انت شن حالك ايدك قاعدة توجع فيك
-امنه / الحمدلله احسن حال ..نراجى فى عمك ميلاد ايروح من بنغازى وبيرفعنى لتونس
قعدو يشبحو لبعضهم هوا وخوته
“صغار ميلاد خلو حكايه خطفت بوهم سريه ومابوش ينشروها للناس.. وايوب تحشم من خوته ومن عمه ميلاد اللى وقف معاه ..ماباش ياخد العشرة لاف اللى عطاهمله صاحبه امحمد كادو”
__________________________
بعد يومين ثانيات
عزى متع عمتك فاطمه ليه سته ايام …وشبه بدى يفضى
الجيران واقرب الاقارب وخلاص
حتى الخيمه حولوها
وقعدو شاهى وخبزة فرن وخلاص من الليل لليل
.
.
.
اما فى حوش ميلاد
-حسن / مابي حد يشريها يا راجل .. لازم من توقيعت بوى عالبيعه
-حسين / تى باهى افرض مايردوناش بوى على ابعد احتمال
منين بتخلص الراجل
-ايوب / قصدك ماعندكش حل ثانى
-حسن / ماعنديش حل غير انى نرهنها الارض ..تى هوا الراجل بارك الله فيه كانه مش صاحبي والله مايرضى يعطينى خمسين الف وانا راهنله ارض مش باسمى
-حسين/ لكن يا حسن
-ايوب / خلاص يا حسين …حسن معاك حق …ماعنداش حل ثانى المهم المبلغ يقعد بين ايديه
-حسين / انا خايف عليه يا ايوب زى ماخايف على بوى
-ايوب / قدر الله وماشاء فعل ..لف الفلوس فى شكارة كناسه ثانيه واطلع بيها حطها فى كوفينو سيارتى كأنها كناسه بيش ماحد ايلاحظ
-حسن / وانت كيف بدير ..افرض اتشدك بوابه
-ايوب / انشالله لا …وبعتالى معاى زكريا وموسى برة
وفعلا طلع ايوب بالفلوس …وكلم امحمد …وسلمه الخمسين الف ….
وثانى يوم الصبح حطو عمك ميلاد فى سيارة مسلفرة مايبان منها شى لداخل ..وهما مغطييله عيونه .. وكل ماتوقفهم بوابه ..ايمدو تعريفاتهم وانهم تابعين مليشيا ثمار فبراير طول ايقولولهم اتفضلو
ونزلو ميلاد فى شارع الجمهوريه …وخلوه ومشو
وقف على شاب طلب منه تليفونه واتصل بى حسن جاه روح بيه
وفهمه فى الطريق انه ماقالش لامه ولا لاخته على انه كان مخطوف … لان مافيش داعى للشوشرة
وصل ميلاد للحوش …هداكه الوجه مضروب …قاللهم درت حادث فى بنغازى والسيارة بعتها رابش غادى…لان المليشيا صادرتها ومعش بيردوهاله فقاللهم مشت رابش
خش دار دوش…وجاه ايوب وحمدله بالسلامه …وعيي عمك ميلاد مايشكر فيه عالصنيع اللى داره …وكيف جرى مع خوته لين طلعه …
وبلغه حسن انه رهن الارض ..وقاله عادى انشالله ماروحت
__________________________
بعد شهرين …
فاق ايوب على تليفون من خوه حسن ..
رد عليه وسال على احوال امه واخته وخوه ..وهدرزو شوى .. وبعدها
-حسن / والله نبي نوصيك تسالنا صاحبك على خو واحد صاحبى…صاحب عيادة كبيرة خاطفينه …ولتوة ماعرفوش طريقه ولا طلبو عليهم فلوس
-ايوب / حاضر نساله لو عندهم حيقولى طول
طبعا ايوب طول كلم امحمد صاحبه وسألع عليه..
-ايوب / هوا صاحب عيادة كبيرة راهو…غير زيد فتش عليه بالك جابوه وانت ماشفتاش
– امحمد / لا والله ماعندنا …لكن مش مشكله تو نشوفه الجماعه الثانيين كان لقيته عند واحد منهم تو نبلغك
-ايوب / خلاص غدوة نكلمك زى توة وتجيبلى الزبدة
-امحمد / لا زبدة لا حليب…عطينى ساعه ونرد عليك نجيللك الفايدة
-ايوب / على ايديك انحجو..خلاص ساعه وانعاودلك
وبالفعل بعد ساعه اتصل امحمد وخبره انه لقاه عند جماعه يعرفهم …وكانو مأجلين مكالمه اهله لان فى مخطوفين قدامه …وبواسطه هوا قدمو دوره …وطالبين فيه ميه الف ..
-ايوب / تمام تو نبلغ خوى ايبلغ اهله
-امحمد / بلغهم ان طالبين 120 الف
-ايوب / مش توة قلت انهم طالبين ميه الف
-امحمد / انا وسيط وهدا حقى …امالا عابى بنجيبهولك بلوشى
-ايوب / يانارى منين بيجيبوهم 120 الف
-امحمد / اللى يجيب الميه ايجيب 120
-ايوب / باهى تم …نكلمه وتو نعاودلك العشيه انقولك شن صار ..وسكرو الخط
لكن ايوب ماتصلش بصاحبه طول …قعد سرحان …ويخمم
فى جمله اللى يجيب الميه ايجيب 120
وقعد سرحان ويخمم / واللى يجيب 120 الف …يقدر ايجيب 150 الف
وشرين التليفون قطع حبل تفكيره…قام شافه لقاه خوه حسن يتصل ..رد عليه
-ايوب / ايه لقيته … ويبو 150 الف !!!!
__________________________
وفاتت سنه ….
سنه 2013 ايوب ليه سنه يشتغل حتى هوا وسيط .. ضاق الفلوس ولقاهم حلوات …
غير سيارته …ويصرف ببدخ على حناه
كل شخص مخطوف ياخد عليه نسبه لما بيطلعه لاهله
نصحه امحمد يفتح مليشيا قطاع خاص حتى هوا
زكريا وموسى من لما تعرف عليهم وهما قابلين للانحراف
والطريق اللى يمشى فيها ايوب لازم يغطسو فيها حتى هما
-ايوب / هما مش خير مننا ..اهو تشبحو فى المبالغ …احنا اولى اننا ناخدو المبلغ كامل …علاش ناخدو فى فتافيت
الحمدلله قدامكم وما مدرق عليكم شى
-موسى/ بالنسبه ليا انا معاك …حتى احنا نلبسو بدالى عسكريه ونديرو مقر سرى ونخطفو ونحصلو مبالغ زينا زيهم
-ايوب تلفت لى زكريا / وانت يا زيكو
-زكريا/ شنو بنخليكم تعفسو بروحكم ..حتى انا معاكم
-موسى / لكن المليشيا شن بنسموها
تلفتلهم ايوب / نسموها #احفاد المختار
__________________________
تمت …ويتبع ?
زعما حاق ايوب بيبدا مليشياوى??.. ويخطف فى الناس? فهمتو توة منين جى اسم الروايه ??
التعليقات احبااااط تام … خودو رابط ايميلى ونزلوه فى القروبات فى الى يدورو فيا ومالقونيش
وبالنسبه للصداقه نقبل فيها من التعليقات ..كل وحدة معلقه نخش بروفايلها لو لقيتها باعته اضافه نقبلها طول
واللى تقري وماتعلقيش والله والله مانى مسامحاتك طول عمرى
نحبكم ❤