احفاد الشيطان للكاتبة زهور جمال الدين

#احفاد_الشيطان

?بقلم الكاتبه زهور جمال الدين ?

❤الحلقه الثالثه ❤

.

فى حوش امنه

ميلاد قدامه الغدى وامنه مقعمزة جنبه

-ميلاد / والله مانى ساكت يا امنه خيرك عاااد
-امنه صوتها مخنوق/ اهو شهر كامل فات واحنا مش عارفيله مكان لتوة
-ميلاد / اهم شى عرفنا الجهه اللى شاداته …مكانه مش مهم ..بعد ما احنا نحلو المشكله معاهم ..هما ايجيبيهولنا
-امنه / باهى صاحبك اللى يقولوله خير الله شن قالك
-ميلاد / اووووف الجمله عاودتهالك الف مرة ..قالى اسم المحقق وصله وعرفه منهوا …وغدوة بنمشوله ونحكو معاه ان انعدلو فى اقوال التحقيقات
-بدت تبكى/ ياحليلى على وليدى زعما واكل ولا جيعان
…قلبي بيوقف وكبدى دابت
-ميلاد / اعطى احكامك لربي وادعيله…دعاء الام مستجاب
-امنه/ فى كل وقت وفى كل صلاة ندعيله …ربي يحفظه ويعمى عنه عيون اللى شادينه

خش حسن / السلام عليكم
-امه وبوه / وعليكم السلام
-حسن / ياام ترا جيبيلى كاشيك
-امنه تنادى/ ايناس جيبي لخوك كاشيك
-حسن يبيها تنوض/ فكينى منها بنتك نوضى انتى جيبيهولى
-امنه / باهى تو نجيبلك هى
وناضت من جنبهم خشت للمطبخ
-حسن تلفت لخوه / يابوى واحد صاحبى قالى الناتو الليله بيضرب مكان سري حاطين فيه المساجين السياسين
-تلفتله / وصاحبك من قاله
-حسن مع شباب المعارضه لكن داس على بوه / انا هكى سمعت من الشباب …
-ميلاد / انشالله خير واللى كاتبه ربي بيصير

جت امنه جابت الكاشيك وسكتو هما الزوز

_____________________________________

.
روقيه غيرت حوايجها وخدت المدكرة كتبت فيها رقم زكريا بيش ماتنساشى … ولبست حجابها وطلعت تشوف فى خواتها …
لقتهم كلهم متلمدات فى دار اميمه بنت عمها عبدالسلام
….ومخليين الحوايج كلهم فى دار اميرة

مشتلهم فى الدار الثانيه

-روقيه / وتيتو ارواحكم
-اميمه بنت عمهم عبدالسلام / غير كان نفهم خيركم مستعجلين بس
-سهام / والله هوا هداكه …صحيتو وسامحونا فى تعبكم
-اميرة بنت عمهم عبدالسلام/ تى شنو صحيتو ..انتو خواتنا راهو
-اميمه / بوى شكله جوه رجاله قال اصبرو شوى
-سماح / تبو الحق ستاحشت دارى وسريري
-روقيه / وين مرام
-سماح / فى الدوش قريب تطلع

روقيه افكارها مشتته و بالها مع ايوب … قعدت جنبهم ولكن سرحانه …ولما لقت المرواحة مزال… خطرت فى بالها حاجع … وقعدت مقعمزة وساكته ترا شن تفكر بدير

نزلت للمطبخ لقت استيكه متع شيش اميه …خدت اربع شيش وحطتهم فى كيسه
وخشت للدار اللى فيه بوها ..فتحت الساكو اللى فيه حوايج بوها …وطلعت تيشرت داخلى وماليا خارجيه وفوطه من حوايج بوها ..وحطتهم فى نفس الكيسه منغير مايشوفها حد…

ودستهم تحت الدروج اللى فى السقيفه ..
وخشت تراقب عمها عبدالسلام وين موجود

خشت للمطبخ لقت عمتى فتحيه اتحرك فى البسيسه

-روقيه / شن اديرى عمتى فتحيه نعاونك
– فتحيه / نحرك فى البسيسه بالحلوى الشاميه…بوك وحناك عجبتهم درتلكم سطل بيش ترفعوه معاكم
-روقيه / صحيتى وبارك الله فيك عمتى
-فتحيه / مش بجميلى …امك وبوك ياما وقفو معانا زمان لين كملنا بني الحوش هدا
-روقيه / ربي يحفظكم انشاءالله
-فتحيه / ارض بوك مش بعيدة علينا ..زمان قعد شاد فيه عمك عبدالسلام هلبا انه يبنى فيها حوش وهوا شى ماباش
-روقيه / تى احنا مافتكينا من هداكه الحرايمى اللى يبي ياخدها … كانا مش من عمى عبدالسلام وصحابه راهو ضاعت
-فتحيه / عبدالسلام قديم فى الجيش وصحابه هلبا …حتى ضباط كبار مصاحب …هدراز بسلامته
-روقيه / الحمدلله على كل حال
غطت فتحيه السطل الصغير ومداته لى روقيه/ هاك ارفعيه حطيه جنب حوايجك بيش ماتنسوشى
-روقيه / باهى

تلفتت فتحيه للحوض تغسل فى الماعين …وروقيه فتحت الدولاب من لوطا وخدت فازو وكاشيك منغير ماتشوفها فتحيه

ركبت تجرى للدار متع اميرة فوق حطت السطل وفتحاته خدت منه بسيسه بالكاشيك وحطتها فى الفازو وفتحت
شنطتها خدت منها كتاب قران وطلعت

نزلت حطتهم فى الكيسه اللى تحت الدروج …
وخشت للدار اللى فيها حناها وبوها …لقت عمتك فتحيه مقعمزة جنب الحاجه
-روقيه / اهو بنمشى بنجيب لى حناى العشبه من برة
-فتحيه / نحسابك طلعتى وجبتيها
-روقيه / طلعت ..وقبل مانوصل جيهه العشبه لقيت كلب يبان من بعيد خفت منه وروحت
-فتحيه / باهى بري غير ردى بالك

طلعت للسقيفه خدت الكيسه وطلعت ماشيه لى ايوب

_________________________________

سهام تكلم فى معاد خطيبها ..

-معاد حامق / متاكدة ولاده صغار ..انا سالت وقالولى ولده متخرجين حتى من الجامعه
-سهام / حبيبي خيرك ..هداكه عمى عبدالسلام ولد عم بوى الثانى ..لكن هدا صغاره صغيرين
-معاد / قداش اعمارهم
-سهام / ياودى الكبير فيهم يقرا صف الثالث ..خنقتنى راهو يا معاد
-معاد ايكشخ / تو نطلقك على حل شعرك بيش ماتنخنقيش
-سهام / اسمع كانا بتقعد معاملتك هكى خلينا نفوتو بعض
-معاد تدارك نفسه / لا عاد خيرك حبيبتى …يعنى غيرتى عليك بدت حاجه تزعلك توة

-سهام / انت مش غيور يا معاد …انت شكاك ..حتى قرايتى تبى تبطلنى منها غير بوى وقفلك فيها
-معاد / انا نحبك .. ونغير عليك يابنت …الله غالب هدا طبعى حاجتى مانبى حد يشبحلها
-سهام / شن قلت ..عاودهالى رانى مش ديما نسمع فيها
-معاد / خلاص عاد …انتى عارفه ومتاكدة انى نحبك
…مفروض تتحملى طبعى كيف ماهوا
-سهام / وانا شن مصبرنى عليك غير انى متاكدة انك تبينى

________________________________

فى حوش سالم جارهم

-مبروكه / مبروك عليك يا وليدى ..بالهنى والعمار انشاءالله
-صلاح فوق النفس/ الله يبارك فيك
وتلفتلها/ قولتيلهم على شروطى
-مبروكه حطت يدها على كتفه مسخفها ولدها/ ياوليدى البنيه كويسه وتو تاخدها وتعيش معاك تعرف معدنها …راهو مش ديما الحاجه اللى نبوها هيا الكويسه ..مرات الحاجه اللى تبينا هيا تكون احسن
-صلاح فاهم على امه / توة بلا مواعظ يااام …قلتيلهم انى بنسكن معاكم ومانيش طالع بكل
-مبروكه / قلتلهم امالا شنو ياوليدى.. راس اوليد وين بتطلع وبتخلينا
-صلاح / وشن ققلتيلهم عالعرس
-مبروكه / ياوليدى العرس مفاهمه رجاله .. لكن انا قلتلهم ولدى قريب ايكمل حوشه عالزواق بس .. والعرس على ظروف البلاد
-صلاح/ المشكلة متلقيتش اسطاويه متع زواق
-مبروكه / حتى متر الزواق قالو بدى غالى
-صلاح/ انشالله حتى بي مية جني الميترو غير نلقاهم
…العماله كلها روحت
-مبروكه / معاهم حق ياوليدى …ياروح مابعدك روح

واتكى عالمخده وحط يده ورا راسه وخطرت عليه روقيه قعد ايخمم فيها …

ومنغير مايحس بنفسه / روقيه روحت يااام
-تلفتتله امه / ياوليدى احنا شن قلنا …خلاص هما فى حالهم واحنا فى حالنا
-صلاح / حالهم من حالنا يااام …عمى ابراهيم هدا جارنا وماعنداش اولاد واحنا لازم انساعدوه
-مبروكه/ خلاص امالا غير السؤال وقول حوش عمى ابراهيم روحو ولا مزال
-تقاعد من عالمخدة وقعمز/ خيرك شادتهالى عالوحدة يااام
-مبروكه / لازم انبهك يا صلاح …غدوة تبدا مرتك معانا هنايل وتطلع منك الكلمه بلا وعد منك تقعد فى المناقد
-صلاح / تى منهيا هادى اللى بتحكم فيا فى اللى بنقوله
-مبروكه / حقها …لما تكون معانا هنايا تبدا انت مولى بيتها
… ومنحقها تزعل لما تجيب سيرة وحدة ثانيه
-رجع اتكى عالمخدة وحط يده على راسه / ايييه علينا عاد
..بتخلينى نندم انتى ولا شنو

___________________________________

طلعت روقيه من حوش عبدالسلام وهيا تتلفت وراها خايفه حد ايشوفها …

قربت من البراكه بدت تسمع فى صوت ايوب وهوا اينين

فتحت الباب وخشت …

قام راسه شبحلها …لقاها خاشه وهيا تشبحله ومبتسمتله
فرح لما شافها وهوا فى عز الالم …..صار كونتاكت قوى مابيناتهم …

جت جيهته عاليمين وقعمزت …

-يشبحلها باعجاب وفيه شويه صحة/ علاش رجعتى …
-تشبحله وتواطى فى راسها / جيت منشوفك دايخ ولا واعى
بكرى خليتك حرارة وعارق ..الحق جبتلك حوايج
-ايوب عارق حاله / حوايج …كيف !!
-روقيه متحشمه / تيشرتك رايح حالة شكله ليك ايام لابسه
..جبتلك تيشرت من بوى …وماليا خارجيه ..الجو يبرد فى الليل واحنا توة عشيه

-ايوب يتكلم بصعوبه / كلمتى صاحبى
-روقيه / لا مزال ماكلمتاش ..هنايا مافيش تغطيه …اهو بنطلعو توة وحنكلمه طول ماتخافش
-غمض عيونه / مانيش خايف .. واللى كاتبه ربي بيصيرر
-تشبحله ومتحشمه / تساعدنى انحولك تيشيرتك
-ايوب / انا مش قادر نتحرك …وبعتالى والله مافى داعى
..انتى فضلتى على راسى
-روقيه / لا عادى مدامنى جبت الحوايج خلى نغيرهملك بالك فى جسمك جروح تخاف يلتهبو من التراب
-ايوب / لكن انا مش قادر نتحرك
-روقيه / تو نحركك انا غير ساعدنى انت شوية بس
-ايوب / باهى

قربت من كتافه وهيا متحشمه …عيونه حارات ..وهوا ماحولهمش من عليها
حطت يدها حوالين خصره وبدت اتقيم فى التيشرت بالشوية لحد ماوصلاته لى ايديه
قاماته من جهة يده اليمين/ قيم يدك خلى نطلع منها التيشرت
بدى يقيم فى يده بصعوبه / مش قادر
-روقيه / يالشويا عليك اهو تو نحولهالك انا

ومدت يدها وحولت التيشرت من ايده اليمين وبعتالى اليسار.. وبعدها بدت تبى تسحبه من راسه …

وقفت على ركابه بيش تقرب وتحول التيشرت من راسه
…طاح وشاحها لتالى منغير ماتحس بيه … وطاحت قصتها القدام …وهيا مقربه منه …وهوا نسى كل الم …ومفيش فى احساسه غير روقيه ثم روقيه
مدت يدها وحولت رقبة التيشرت من جهت وجهه قبل وبعتالى سحباتهه التالى من شعره و ميلات راسه فوق بيش تحوله
وهوا عيونه معلقات فيها / تعبتك معاى
-روقيه مبتسمه / لااا مافيش تعب …

شادة التيسرت بيدها وتشبح فى اماكن زرقا جيهة كتفه اليمين وصدره
-روقيه / خيرك من ضاربك
-ايوب/ مش قلتلك كنت محبوس …
-عيونها دمعو/ الله يكسر ايديهم كيف مادارو فيك هكى

وهوا فى خاطره / الله ايقوى ايديهم اللى بسببها شفت الخوف عليا فى عيون بنيه حلوة زيك

حطت االتيشرت على الكيسه …وحست بوشاحها طايح ….
مدت يدها بسرعه وقعدت اتساوى فيه ودخلت قصتها

وهوا فى خاطره / خليها طالعه …خليها يا ملايكه الرحمه

قعد جسمه عارى قدامها …قلبها ايطق منها اعجاب ومنها حشمه

طلعت شيشة اميه والفوطه / شويا بس خلينى نمسحلك جسمك
-ايوب سعيد على فرحان باهتمامها على متحشم منها/ والله
مانبى نتعبك معاى

-روقيه / قلتلك مفيش تعب …عادى
صبت شوية اميه عالفوطه ….بلتها من جهه …وخلتها جافه من جهه
مدت يدها على كمامها وخرتهم التالى …وبانت نعومه ايديها …وهوا يشبح وحال فمه وخلاص?

حطت الفوطه وبدت تمسح فى بطنه وصدره
هيا ك بنت عمرها ماتعرف مشاعر الشاب كيف تتحرك…الامر كان عندها عادى مجرد انها تنظفله فى التراب
وهوا ك شاب …بنت شافها واعجب بيها من النظرة الاولى .. وكل حاجه تبان منها تعجبه سواء ايديها سواء شعرها
هيا تحرك فى الفوطه … وهوا مشاعره تتحرك ….
حس بغطه فى قلبه …حس انه يبي يحضنها …الولد يانارى اولها محروم وثانيها البنيه عجباته …
تحكم فى نفسه … وخلى الامر كأنه عادى..ماباش ايحسسها ان مشاعره تحركت..لان البنت واضح انها بالفعل ادير فى عمل انسانى

كملت المسح وحطت الفوطه فوق التيشرت متعه اللى حولتهوله ..ومدت يدها داخل الكيسه وطلعت تيشرت بوها

____________________________________

فى حوش عمتك سالمه

الحاجه مريضه حالة على خاطر اوليدها ….شهر وهما ما عارفيله مكان …مش عارفينه ميت ولا حى …

جاراتها وحوش خوها ما خلوهاش يوم

مرقدينها فى دارها على فراش ومغطيينها
هيا اول ماتخشى حوشها تلقى سقيفه فيها مربوعه وحمام صغير
وتخشى شوى تلقى صاله كبيرة وعليها ستار مشدود من الجنب منا ومنا …وقدامها مطبخ

وبعتالى تخشى شزى تلقى دارين وحمام

هيا دارها اللى عاليمين …وهيا اللى قاعدة فيا
والستار فاتحينه عالصالة …لان مرات الرجاله ايخشولها لدارها من الممر …لما يستادنو يفتحو فى الستار عالصالة بيش مايبانزش النساوين

الحاجه سالمه عرفت قيمه جيرانها …وعرفت انهم ماتخلوش عليها ….
العزايز شبه مقيمين عندها …والبنات والكناين دايرين بالدور عليها خاطر الناس تمشى وتجى والحاضر ايهنى

فى دارها مقعمزين معاها جارها عبدالنبى ومحمود خال ايوب

-سالمه / كيف درتو يا محمود
-محمود / اضنى ميلاد نسيبى عرف مكانه
-عبدالنبى/ بارك الله فيه الراجل الطيب هدا .. صبح وليل وهوا يجرى على ايوب
-محمود / البركه فيكم كلكم يا عبدالنبى …الحوش مليان بيكم جيرانها …الله ايبارك
-سالمه / الله يبارك على جاراتى وجيرانى…والله مانى عارفه كيف انوفيهم حقهم
-عبدالنبى / ماتقوليش هكى يا حاجه …هدا حق الجار على جاره

يسمعو فى زكريا يتنحنح برة / يا عمى محمود …
-محمود / خشو يا زكريا الستار مفتوح

خشو زكريا وموسى من الممر / بسم الله

وصلو للدار/ السلام عليكم
-عمتك سالمه طول ناضت تبكى وفتحت ايديها/ اهلا بوليداتى

وخشو الزوز ايسلمو/ شن حالك يا حناى

اللي ايمدلها يدها تضبطه وتبدا تبكى هيا وياه …تتفكر فى ولدها يا نارى

-عبدالنبى متأثر/ لا حول ولا قوة الا بالله ..غلط هكى يا حاجه

-سالمه حطت يدها على صدرها / جمرة نحس فيها هنايا
….ولدى مضروب مش صافى انا انحس بيه

____________________________________

.
روقيه قاعدة مع ايوب
والمشاعر بدت تتحرك بيناتهم الزوز ….
هوا مش متحكم فى نضراته ليها … وحاس بشى غريب
فى داخله …اول مرة يقرب من بنت بالطريقه هادى …اول مرة مشاعره تتحرك مع بنت ….
وهيا معجبه بي قوة جسمه وعضلاته …ونضرة عيونه اللى سحرتها …

خدت تيشرت الداخلى متع بوها وساواته بين ايديها …….
جابت رقبه التيشرت وحطتها على راس ايوب
هيا واخدة لبوها تيشيرتات رقبتهم ضيقه بيش مايقعدش صدره عريان

لما حطت رقبه التيشرت على راس ايوب ماباش ينزل
وقفت ثانى على ركابها وقربت منه وبدت اتحاول ادخل التيشرت
حاطه كل قوتها فى ايديها …نزلت التيشرت بالقوة على راسه اختل توازنها طاحت عليه من فوق …

بحركه لا اراديه حط ايوب ايديه الزوز على ضهرها / بسم الله العظيم
– تحشمت وحساته حاضنها قامت جسمها طول/ سامحنى
بالك وجعتك بطيحتى عليك

-هوا خلاص معش قدر يتحكم فى مشاعره/انتى بتوجعينى.. انتى ملايكه تمشى على الارض … الجمال هدا كله عنده الادن كان يبي حتى يقتلنى توة

وهيا وين تلقيها عاد قريب طارت من كلامه الحلو

-مدت يدها للشيشه وصبت فيها اميه / نغسلك وجهك
-ايوب / ياريت

ناضت من مكانه وقعمزت جنب الغاز اللى حاطتله عليه راسه ..
وحطت يدها تحت رقبته وقاعدتله راسه شوى ولفتت وجهه عاليمين وقعدت تغسله فيه

هوا طاير فوق السحاب

خدت الفوطه ومسحتله وجهه

وتلفتتله / تبى تشرب
-ايوب / هاتى
فتحا شيشه اميه جديده ومدتهاله فى يده

-ايوب / نتعبك قاعديلى راسى شوى
ردت يدها تحت رقبته وقاعدتله راسه وشرب الشيشه كلها

ردات راسه تحت / اسمع جبتلك بسيسه بالحلوى الشاميه
… كانا جوعت كول منها مابين جاك صاحبك

وطلعت الفازو من الكيسه وحطت فوقه الكاشيك

-ايوب / هاتى ناكل منها

وخدى الفازو وحط فيه الكاشيك وهوا يشبحلها
الولد معش متحكم فى نفسه ….والاعجاب باين عليه
وهيا مواطيه راسها وداسه ابتسامتها

-ايوب / ترا الميه
مدتله الشيشه ….خداها ويشرب …ويبي يفتح معاها مواضيع ومش عارف كيف
-ايوب / كم عمرك …باين عليك صغيرة
-روقيه / عمرى 22 سنه
-ايوب / مش قلتى انك ابله علوم .. امتى تخرجتى وامتى تعينتى
-روقيه / تخرجت العام عادى والحمدلله عمى الصادق جارنا يخدم فى التعليم طول دارلى عقد…

وتلفتت للكيسه لمت الحاجات كلها اللى جايبتها ومن ضمنها تيشيرته هوا / وانت كم عمرك
-ايوب يضحك/ انا شيبانى 34 سنه
-ابتسمت وهيا لاهبه فى الكيسه / العمر كله انشالله

بعد ما كملن تلفتتله ووشاحها طايح لتالى نص قصتها برة / خلى نمشى انا توة …
ومدت يدها عالكيسه وطلعت كتاب قران وحطاته عند راسه

-روقيه / القران هدا كفيل انه يحميك من كل سو
مد ايوب يده اليمين …وهيا منغير ماتحس بنفسها مدت يدها اليسار وحطتها فى يده

-ايوب / مش عارف بيش نكافيك
-روقيه بخجل / هدا واجبي
-ايوب / عطينى رقمك
-روقيه / اقسم بالله ماعندى رقم توة …تليفونى راح من مدة وشفرتى اتصكرت

بتسحب يدها بتنوض …. شدها هوا بحنان وماخلاش يدها تفلت من يده

-ايوب / ما تسيبينيش
-هيا متحشمه وحاسه بنفس اللى حاس بيه هوا / خلينى نمشى تو يفقدونى ويلحقونى ومفيش داعى انهم ايشوفوك

( هيا خافت ان عمها عبدالسلام يبلغ عليه لانه يخدم جندى فى الجيش )

-ايوب / احفظى رقمى وكلمينى
وقعد ايسميلها فى الرقم …شداته فى دماغها…لكن هيهات يقعد مع كل المشاعر اللى تتناحر داخلها

-روقيه عيونها مدمعات لانه مسخفها / استودعتك الله

وتلفتت للباب طلعت بسرعه …خافت من عيونه ومن نضراته … خافت رجليها ايخونوها ومعش تقدر تطلع من جنبه

مشت بسرعه للحوش …لقت اختها سماح واميرة بنت عمها كيف طالعات من الباب بيلحقوها …

شافتهم زادت انخلعت ومشتلهم تجرى / اهو جيت
-سماح / الرجاله روحو وعمى عبدالسلام فى السيارة ايراجى فينا
-اميرة / شنو الكيسه اللى فى يدك
-روقيه خلتهم وراها وخشت للحوش بسرعه / هادى عشبه تبيها حناى
مشت تجرى للدار اللى فيها حوايجها دكت هاديكا الكيسه فى حوايجها ….

سلمت على عمتها فتحيه والبنات وطلعت للصالة لقتهم ايراجو ..طلعت حناها …وخواتها سلمو وطلعو وراها هما وبوهم …
ركبو السيارة وروحو للحوش
.
_____________________________________

فى حوش على جار ابراهيم

-منير / غير كيف ياام مفهمتش فهمينى
-عزيزة مرت على / يا وليدى شن بنعاودلك ..صلاح ولد عمك سالم خطب بنت عمه
-منير فرحان / مبروك عليه
-عزيزة / العقبي ليك يا وليدى

وناض من جنبها قعمز مقابل التلفزيون

ويخمم فى خاطره / هدا صلاح وافتكيت منه .. تنحى من طريقى

ويخمم / اصلا هوا كانا راجل مايجيش فى نص الطريق ويوقف عارف بوى يبيهالى من لما احنا صغار

ويتدكر ايامات روقيه تقرا فى الثانويه وهوا لاحقها فى الشارع ….
-منير / ياروقيه وقفى
-تلفتتله / والله يا منير كان ماتتحشم على وجهك لما نعيط وانلم عليك الناس
-منير/ انا نبيك بالحلال يا روقيه …خيرك هكى انتى
-روقيه / وانا مانبيكش …مش بالسيف

ومشت وخلاته …..

ورجع ايخمم / ناخدك ناخدك يا رقيه

_____________________________________

.
اول ماوصلت روقيه للحوش …حطت حناها فى مكانها ….

-روقيه / بوى بنمشى لى عبير بنت عمى سالم شويا نشوفهم كيف حالهم مع هالضرب
-ابراهيم / باهى بري غير ماتعطليش

وطلعت من الحوش…بدل ماتتجه لحوش عمك سالم
…اتجهت جهة البريد العام لانه قريب منهم مسافه شوارع

صلاح واقف فى راس الشارع …شافها كيف تتسحب وماشيه …طلع فى جرتها ولحقها
هيا تمشى وهوا وراها

لعند ماوصلت للبريد العلم وخشت
عطت الرقم للولد واتصلها ….
رد زكريا/ الووو
-الشاب عامل البريد / خوى احنا البريد العام .. لحظه بس معاك مكالمه …

وعطاها الشاب كابينا رقم واحد ..شدت الورقه اللى فيها رقم زكريا

ومشت للكابينه / الو
-زكريا / ايووة ..تفضلى اختى
-روقيه / عندك صاحبك اسمه ايوب
-زكريا وقف / خيره ايوب
انتبه موسى / خيرك يازكريا شن فى
-زكريا / غير لحظه بس…
ورد ايكلم فيها/ خيره ايوب يا اختى
-روقيه / ايوب موجود فى مزرعه فى عين زارة …مضروب على رجله برصاصه
-زكريا / وكيف بنوثق فيك اختى…قصدى انتى متاكدة
..وكيف وصل للمكان اللى تقولى عليه
-روقيه / خيرك نحسابنى نكدب عليك ..بالامارة قالى كان محبوس ..وداير لحيه …وبالنسبه كيف وصل للمكان تو يحكيلكم هوا
-زكريا / اعطينى المكان بسرعه

وبدت روقيه توصف فى المكان اللى فيه ايوب لى زكريا

-زكريا / زبطه المكان … في قابينه محروقه جيهته ولا
-روقيه / بالزبط …تخلى القابينه على ايمينك وتكمل طول ..تلقى على يسارك براكه تبان من بعيد …تلقاه موجود فيها
-زكريا / تم …صحيتى وخيتى
-روقيه / مع السلامه

زكريا سكر الخط وفرحان / لقينا ايوب يا اولاد

اما رقيه سكرت الخط وطلعت من القابينه تلاقى صلاح قدامها
-صلاح / فى من كنتى تكلمى…
ولاحط ان يدها فيها ورقه / ومد يده هاتى الورقه

تلخبطت وقامت الورقه وقعدت اتمزق فيها اربا اربا ?..
-قامت راسها / انت مادخلكش فيا

وخلاته واقف ومشت للعامل واشرت عليه/ الشخص اللى واقف غادى رد بالك تعطيه الرقم اللى اتصلت بيه انا توة
-العامل/ من بكرى ايحاول مابيتش نعطيهوله
-روقيه/ ??
__________________________________

تمت …. ويتبع ??
الجمله اللى يكرهوها كل متابعاتى ??

توة الانسه روقيه نست رقم ايوب … ومزقت الورقه اللى فيها رقم صاحبه وهيا مش حافضاته

زعما هل مزال بتتلاقى مع ايوب ولا خلاص ?
والمحنه اللى مان فيها ايوب …هل ح تأثر فيه والا لا

وبما ان اليوم عيد … وكل عام والجميع بالف خير .. وبما انى انت عارفه مقدار محبتكم ليا زى ماعارفين انتو مقدار محبتى ليكم …حبيت نعايدكم ونهديكم حلقه اضافيه حتنزل الليله بعد الساعه عشرة ونص ليلا

نحبككككككم هلبااااااا❤