احفاد الشيطان للكاتبة زهور جمال الدين

#احفاد_الشيطان

بقلم زهور جمال الدين
?الحلقه الثالثه والعشرون ?

–
فى العيادة ….

روقيه سكرت الخط وهيا تبكى …كلمه الطلاق سمعتها بودانها
محرها عليها…بعد سنين الفراق وكل واحد يبحث عالثانى بسهولة ايطلقها ..
وشرين تليفون روقيه …رقم ايوب مرة ثانيه
-فتحت الخط بسرعه / الو
-مؤيد / اسعى ياماما .. ايوب ركب الطيارة وسافر ..الله غالب حاله ومحتاله انحرق .. ماعاد عنده شن يدير فيها البلاد .. قالك تشاو وشوفى نصيبك
-روقيه مصدومه وعيونها معبيات دموع / شن قلت .. قالى تشاو
-مؤيد / ايه قالك تشاو وشوفى نصيبك ..
-روقيه / انت واحد كداب .. مستحيل نصدق ان ايوب يتخلى عنى ..ويبيعنى بالبساطه هادى وبدون اسباب
-مؤيد / امالا اقعدى راجيه وهوا طلقك ودار جوازه وسافر ..هيا بالسلامه .. لانى حتى انا بنركب معاه فى نفس الطيارة .. وعلى فكرة هوا اللى عطانى تليفونه وقالى نبلغك بسفره وقالك سامحينى
وسكر الخط …وهيا قعدت شادة التليفون وتبكى مصدومه لا عارفه تصدق لا عارفه تكدب..لكن هيا ليش بتكدب الشاب اللى كلمها …وهيا بالفعل سمعاته بودانها ايطلق فيها
طق الباب وخشت الممرضه بتغير شكارة التغديه للحاجه سالمه
-الممرضه / السلام عليكم
-روقيه وجهها احمر ورايح دموع /عليكم السلام ..تفضلى اختى
-الممرضه تشبحلها باستغراب / فى حاجه اختى … لاحظى عالحاجه حاجه
-مسحت دموعها / لا لا مافى الا الخير..قل لن يصيبنا الا ماكتب الله لنا

____________________________________

–
فى حوازة زكريا …

زكريا مقعمز مع الشباب وياكل فى بعضه قريب بيموت ..كيف ايوب ماسكينه ويعدبو فيه وهوا مش قادر يوصله
-فتحى/ انا شاك فى حوازة جنب الدائري عاليمين …فيها حوش ديما مهجور وتخشله سيارة مرة مرة
-زكريا يضرب فى ايديه فى بعضهم / وين رفعوه صغار الحرام ..لا خليت طرابلس لا بنغازى لا سبها .. وين طارو بيه بس
-فتحى / غير خلينى نرفع قوة ونمشى نشوف وين ماقلتلك
-زكريا / مشطنا الجهات هاديكا كلها …ولو كان موجود كنا لقيناه
-فتحى / احنا ماخسرنا شى ..انت غير خلينا نمشو انديرو ديورة ونشوفو
-زكريا قعمز وواضح عليه التعب/ دير رايك يا فتحى
-فتحى/ تم .. عطينى ساعه ونص ونكلمك
-زكريا/ تمام
وطلع فتحى بينفد اللى اتفقو عليه
-مصطفى يهمس/ بكرى مشيت شوفت عمتى سالمه جدة ايوب ….
-زكريا / وكيف حالها والله من اول يوم ماعاد وليت ..هاك تشبح فالحال
-مصطفى? / ياودى الدكتور مش عاطى امل
-زكريا / من لقيت عندها
-مصطفى / النساوين طالعات للغرفه الثانيه ماشفت حد .. لكن الرجاله كلهم غادى..ولد خوها واقاربها وحسن وبوه وهلبا
-زكريا/ انا غير كان نلقى ايوب بس… ولا نعرف حتى مكانه
-مصطفى/ حتى حسن وعمك ميلاد مش ساكتين ايدورو عليه من مركز لى مركز …وقال ميلاد موصى عليه ناس فوق
-زكريا / لافوق لا لوطا .. هدا عند مجرمه مايعرفوش ربي

وشرين تليفون زكريا شاف الرقم لقاها روقيه تتصل

_________________________________________

–

فى حبس ايوب

مؤيد مقعمز يسكر .. ومولع منظومه اغانى قويه ..وقدامه ايوب مقعمزينه على كرسى ومكبل بالسلاسل وواضح عليه تعبان ….
-مؤيد / انت عارف بوى علاش قتل موسى
ايوب قام راسه تعبان لكن مهتم يبي يعرف
-مؤيد ياكل فالعنب/ بوى كان يبي يقتلك انت يا مصخ ..لكن يشاء القدر ان يموت هوا
نزل ايوب راسه تعبان
-وقف مؤيد مش جنبه شد شعره وقامله راسه/ هيييه انكلم فيك ولا
فتح ايوب عيونه
-مؤيد / بوى يبي ينهى وجودك فالخدمه متاعنا
..وماينتهيش وجودك الا بموتك
ورجع لمكانه / الدولة كنا شادين مصالحها احنا وخالى عزالدين بس…طلباتهم كلها عندنا احنا وماحد شريكنا
قعمز وحط رجل على رجل/ لكن انت عطوك مهمه مرة وسكتنا .. عجبتهم بدو يميلو ليك ..واخرها عطوك مهمه خطف نايب..هدا كله كان شورنا احنا ..ولما خشيت انت وبضايقنا كان لازم ينتهى وجودك

جى حسام يمشى بسرعه / مؤيد
-مؤيد / نعم ..
وشوشله/ الشباب خبرونى ان فى سيارة واقفه برة الاستراحة وتبى بنزينه
-مؤيد/اطلعله بنفسك و فتشه وكانها مافيها شى اعطوه بنزينه ورافقوه للرئيسى
-حسام / تم

انتبه ايوب ان فى حاجه صارت …وجاه امل ان زكريا بدى يتحرك … عالاقل يلحق مرته قبل ماتفيق من صدمتها

_____________________________________

–
فى حوازة زكريا

تليفونه يشرين .. قامه لقاه رقم روقيه
-فتح الخط/ الووو
روقيه تبكى
-زكريا/ اختى روقيه خيرك …شن فى تكلمى
-روقيه تبكى/ توة كلمنى ايوب …
-زكريا متعصب/ قولى …احكى شن قالك
-روقيه / ايوب طلقنى
-زكريا / مستحيل …مستحيل انتى شن تقولى
-روقيه تبكر حالة / نقولك طلقنى طلقنى …وقالى بنسافر
-زكريا / بيسافر …تى وين بيسافر هادو اكيدة الكلاب ضاغطين عليه ايقول هكى
-روقيه / مش هوا اللى قالى بنسافر .. واحد عاودلى من نفس رقمه ..وقالى راهو بيسافر وبري تزوجى

-زكريا / انزليلى قدام الباب توة ..اهو جاييك بناخد تليفونك ونمشى لشركه المدار انحدد موقع الاتصال منين جى
-روقيه/ تمام ..اهو بننزل تلقانى تحت

وبالفعل اقل من ربع ساعه كان عندها لان حوازته فى صلاح الدين قريبه من الخضرا قص من حى دمشق
وصلها خدى منها

_____________________________________

–
ف الاستراحة المخطوف فيها ايوب

طلع حسام من جنب مؤيد بعد ماخبره عن السيارة اللى تبى بنزينه وقاله برة شوفه
مشى للسيارة…لقاه راجل زوالى مش عارف الجيهه وضيع الطريق ..
-حسام / انت منين جاى يا حاج
-الشيبانى / انااا من جهه ثانيةة وبنمشى لولادى نروح بيهم قالو ساهرين مع صحابهم فى استراحة ترا وين اهنايا
-حسام يضحك / باهى باهى.. اهو تو نعطيك بانقه بنزينه عبيها واتسهل
خدى الحاج بانقه البنزيه وصبها فى تنك السيارة
-الشيبانى/ كانا فى حمام نغسل ايديا و انتوضأ ونصلى .. الضهر بيفوتنى
-حسام / تعالة …
دخله من باب القراج .. فتحله الحمام عاليمين جنب الباب
-حسام / انا عريس .. وزوجتى لداخل … بروحنا …. كنهدا راهو قلتلك تفضل للاستراحة
-الشيبانى / لااا ربي يحفظكم ..حتى انا مستعجل ..الاولاد ايراجو فيا

ساحه جنان الاستراحة خالى تماما … مافيش غير حسام اللى واقف ايراجى فيه …
الاستراحة تبان نظيفه وابوابها مصكرة .. لكن عالجنب كراتين موز معبيات بالخضرة ….
خش الشيبانى للحمام وسكر الباب … وحسام واقف ايراجى فيه …
طلع من الحمام ووجه جهه الكراتين / نصلى غادى فالظل
-حسام بحدر / برة يا حاج …
مشى الشيبانى لجهه الظل
-حسام / ترا تليفونك
-الشيبانى طلع من الفرملة / اهو ..علاش بتكلم منه
-حسام / لااا غير ماعنديش رصيد بندير اتصال
خدى حسام التليفون …والحاج كبر بيصلى …
كمل الصلاة وقعمز يسبح .. وبدى ايراقب فى هادوكا الكراتين .. لقى عالحيط طنجرة كبيرة مكفية .. وركاب وبومبة غاز ..
وحسام ايفتش فالارقام..لقاها كلها عاديه… وشاف الاتصالات لقاهم بارقام بالاسماء…واخر اسم محمد ولدى ..اتصل بيه
اتفتح الخط..بدى الولد محمد ايصيح / يا بوى احنا روحنا …
تسمع فيا …الووو … الوووو ..بوى راهو طلعنا من الاستراحة
مع الجماعه …
وحسام يرد / الووو..نسمع فيك … الوو
واتسكر الخط …
-حسام معش عنده شك / يا حاج ولدك قالك انه روح مع صحابه
-الشيبانى/ شفت الحلوف ولا …ومخلينى نجيه من هاكى الدنيا
-حسام /معليش مامشتش الخطرة بلاش .. هاك حصلت بانقه بنزينه
-الشيبانى/ صحيت وربي يحفظكم كلكم

وركب سيارته وطلع ….لما وصل عالرئيسى ..ضرب رقم زكريا
-الشيبانى/ 80% يكونو هما يا زيكو
-زكريا فرحان / صحيت يا عمى يوسف ربي يحفظك .. حتى انا وصلت قدام شركه المدار نبيهم ايطلعولى موقع مكالمه طلعت من هاتف ايوب …نتلاقو فى الحوازة واحكيلى بالتفصيل
-الشيبانى/ انا شبه متاكد انهم هما يا زكريا .. ماتخشش للشركه بالك عندهم فيها عيون ويمشى فيها ايوب
-زكريا / تم …. اهو جايك غير نرد التليفون لمرته

______________________________________

–
فى مستشفى الخضراء

روقيه مابطلش بكى … خشت امنه وبنتها ايناس ايزورو
روقيه اضبطت عمتها امنه وقعدت تبكى …طبعا امنه تحساب البكى هدا كله على عمتك سالمه …جايبين معاهن فواكه …
-روقيه / ليش متعبه روحك يا عمتى ..حناى فى غيبوبة ماتاكلش
-امنه / عارفتها الحاجه ماتاكلش .. جبتهولك انتى …عارفاتك ماتاكليش والليل ماترقديش.. وحتى شدينا فيك انا وزكيه مرت المبروك نبدلو عليك مابيتيش
-روقيه / ربي يحفظكم .. انتو عندكم عائلات اتعانو فيها ..وانا هدا واجبى …الحاجه فى رقبتى مدامه ولدها غايب
-امنه / ربي كملك بعقلك يابنيتى
-ايناس/ خلى نغسلهم برة عند البنات وتو نجيبهم
وبالفعل خدت ايناس الكيسه ومشت للبنات الممرضات تبى تغسل عندهم الفواكه
-امنه / بوك واختك وين توة يا روقيه
-روقيه/ بوى واختى فى شقتنا متع السراج اللى كنا فيها
-امنه / حوشكم عطيتوه لعمال ايطلحو فيه ولا شن درتو
-روقيه / لا لا …خدينا منه الحاجات المهمه ومصكر..تشبحى فالوضع بعيونك ايوب من جهه وعمتى سالمه من جهه
-امنه / ربي يكون فى عونا كلنا
طق الباب
-امنه / تفضل
-خش زكريا / السلام عليكم
-روقيه وامنه / وعليكم السلام
-زكريا / لقيتها فرصه نجى نشوف حناى …
ونزل على جبتها وباس عليها
-امنه تبكى/ وين صاحبك يا زكريا
-زكريا / بادن الله نلقاه …ونشرب من دم اللى دارو فيه هكى
وتلفت لى روقيه / ترا شوية اختى روقيه
طلع من الغرفه وطلعت روقيه وراه عطاها التليفون وبشرها انه ممكن عرف مكان ايوب وخشت روقيه للغرفه …
وتلفت زكريا طلع من الممر يتلاقى هوا ايناس
ماسكه فى يدها مترد فيه الفواكه طاح منها تكصر
واطى زكريا راسه ومشى…
-مسكاته من يده / زكريا
-زكريا / ايناس انا اللى عندى قلتهولك .. وربي يجيبلك نصيب احسن منى
-ايناس تبكى/ والحب اللى بيناتنا .. والوعود
-زكريا شبحله ومتألم / انى حبيتك …فهدا شى اكيد

وقاعد لعند توة نكنلك مشاعر مايعلم بيها حد الا ربي…لكن وضعى اهو تشبحى فيه ..واهم شى فحياتى توة انى نلاقى ايوب وننتقم من اللى دارنا هكى
-ايناس/ متسيبنيش انا نحبك ..ومستعدة انراجيك طول العمر
-زكريا / ربي يرزقك بالنصيب الطيب …نستادنك
وطلع بسرعه قلبه قاعد معاها لكن الله غالب الضرف اكبرمنه

_____________________________________

–
وجى وقت الجد

زكريا طلع كل سياراته .. وكل سلاحه وماشى للاستراحة اللى متوقع فيها ايوب ….يا قاتل يا مقتول …مفيش حتى تفاهم ولا ارسال تهديدات …

مشو بالسيارات ..من لما وصلو للرئيسى وصل الخبر لى مؤيد وبدى يتصل يطلب فالدعم من باقى جماعته.. ومشى بسرعه دس ايوب فى الريفودجى السري ..وقامت الحرب بينهم …
ضرب بالخفيف والثقيل …دوشكات تضرب فى الاستراحة
ووصل الخبر للردع …دارت قوة ولحقتهم
ضرب ضرب ضرب …شى غريب …كلاشناتك بين بعضهم
كلها شادة السلاح وتضرب .. حتى مؤيد ..لكن القوة اللى جايبها زكريا قوية .. وباغتت جماعه ايوب ..ولانهم غافلين مش مجهزين السلاح بالكامل …
خشو جماعه ايوب اللى ينضرب ايطيح واللى ماينضربش يتقدم .. وزكريا اولهم .. انضرب فى كتفه برصاصه لكن تقدم وخش للاستراحة لداخل …شاف كرسى الكهرباء ومن حرقة قلبه قام الكلاشن وقعد يضرب الكرسى لين دار ماس وصوت قوى ….
جماعه مؤيد اكثرهم ماتو ..لان العدد اللى جابه زكريا اكثر منهم …ممكن ثلاث رجاله براجل …
حاصروهم ….ورمو السلاح .. مشى زكريا لى مؤيد ..
-شده من شعره / وين ايوب
-مؤيد يشبح فى شبحة فخر/ ايوب انساه خلاص
-تلفت زكريا / يانادر هات الحربه
جابله نادر الحربه واللى هيا زى الموس الماضى…شدله ودنه من تحت وشلطها …وبدت اتصب فى الدمايات ومؤيد ايعيط
-زكريا / وين ايوب يا خامر
-مؤيد / فى الريفودجو …
-شده من شعره وهوا يعيط من ودنه اللى انقصت/ وين بابه يا مصخ
-مؤيد / فتحه دائريه تحت الطاولة
لوحه زكريا وتلفت لجماعته / عينكم عليه
وخش هوا واربعه انفار للمكان اللى قاللهم عليه مؤيد ..قامو الغطا لقو ايوب ملوحينه على ضهره ..متهالك مش قادر يتحرك …نقز زكريا . وقام ايوب من كتافه …وباس عليه من جبهته وخدوده
-زكريا / الحمدلله يا صاحبي …الحمدلله لقيتك حى
-ايوب متهالك يفتح فعيونه بصعوبه / زكريا
وقامه مده للشباب اللى فوق ونقز زكريا طلع ….
وبدو يسمعو فى ضرب سلاح …
-خش مصطفى يجرى / دعم جاى للكلب مؤيد
-خدى زكريا الكلاشن وتلفت لجماعته / طلعو ايوب بأى طريقه …
طلع برة وضرب السلاح شى غريب ….
وخشو سيارات الردع .. بدو يضربو ويلقو فالقبض …لموهم كلهم …زكريا وايوب ومؤيد والجميع رفعوهم فالبوكس ..
زكريا سلم نفسه بارادته لان الردع يعنى دولة ..ومايبيش ايحارب الدولة عارف روحه بيتعب
ركبو كلهم فالبوكس ومشو بيهم للحبس ….
لما يركبو فيهم ..البوكس اللى فيه ايوب وزكريا نفسه البوكس اللى فيه مؤيد …مرقدينه عالارض.. ويشبح لى ايوب
-مؤيد / ورحمه بوى وصهيب اللى قتلتهم يا ايوب … لو ربي كتبلى عمر …مانخلى مرتك الا رقاصه فى كبريهات مصر ياواطى
يقيم زكريا رجله ويضربه فى نص بطنه / صكر فمك ياحمار

جوهم جماعه الردع حزوهم ونزلو مؤيد ركبوه فى سيارة ثانيه بيش يرفعوه للمستشفى تحت حراسه محددة

ورفعوهم للحبس

_______________________________________

–

فى العيادة ….

طلعو النساوين كلهم من جنب الحاجه … روقيه وامنه وزكيه وهلبا من اقاربهم جايين زيارة…روقيه تبكى حالة .. غاصه حكايه الطلاق وساكته ماعاودتها لحد ..وزكريا الثانى تليفونه يضبح ميردش …
طلع المبروك ولد خوها يبكى …
مشتله زكيه تبكى/ خيرها الحاجه يا مبروك
-المبروك / الحاجه عطاتك عمرها
وصارت دوشه اللى يبكى واللى ايسكت
-المبروك / يا جماعه الخير.. ايوب ولد عمتى غايب وحوشه تعرفو اللى صارله …عزى الحاجه بادن الله عندى
وروحو كلهم لحوش المبروك …وقامو عزى الحاجه…وخلوها تبات فالمستشفى بيش من غدوة ايغسلوها ويدفنوها

______________________________________

–
بعد شهرين

عرف ميلاد مكان ايوب….لقاه محبوس فى جهه امنيه عند الردع ….طلب زيارة ليه…وبالفعل عطوه موعد بعد اسبوعين
وسأل ميلاد واستقصى على قضيه ايوب وليش شادينه …
طلعو شادينه على خاطر قضيه قتل عياد ..لانه فى شهود عالقضيه .. ويبو الاوراق اللى استورد بيهم السلاح
ميلاد انصدم فى خدمه ايوب …معقولة ايوب مليشياوى..
مش بس مليشياوى يعتبر فى حكم الارهابى …
تعافت صحته فى الشهرين هادو لكن مكانات حرق جزمه بالكهرباء مازالو باينات .. حاطينه هوا وزكريا فى زنزانه وحدة … حتى مؤيد قاعد حى .. ولكن بيطلع …بوه واصل هلبا مع الحكومه …وقاعد يبعتله فى تهديدات على بيته وزوجته …
.
.
وفاتو اسبوعين …

وجت روقيه مع ميلاد تبى تزور ايوب …
خش ميلاد هوا الاول تكلم معاه شوى وطمنه انه مش حيسكت وانه حيوقف معاه …

وخشت بعده روقيه …تبى تحضنه ماخلاهاش ..لانه كان مقرر بالقابله هادى يخليها تكرهه وتبعد عليهة… عشان مصلحتها .. يبي يحميها من المجرمه اللى يهددو فيه مابين بيها ماطلع من الحبس ..لانه كان متوقع نفسه بيطلع بسرعه
..قعمزت تبكى لما حست بصده ليها …
عزاته فى حناه … وتترجا فيه يتراجع عالطلاق وانها مستعدة تراجيه طول العمر
-روقيه/ حبيبي انا مرتك ليش اطلقنى ..ليش تنهى حياتنا ..
حبيبي حتى لو انحبست انت تعرف انى مستعدة حنراجيك
واستحالة نتخلى عليك
-ايوب خاطره يحضنها ويقاوم / وانا يا اختى ما نبيكش …
قعدت تبكى بحرارة ..وايوب قلبه بيتقطع
-ايوب / يابنت الناس افهمى انا اعدائي هلبا …وانتى مش حتسلمى منهم …مدامك على دمتى ..منبيش ندير رقبه فى رقبتى
-روقيه متأثرة / ايوب ماتبعدنيش عليك وانا ماصدقت لقيتك..حتى لما صاحبك قالى انك سافرت ماصدقتاش
..بالله عليك حبيبي خلينى معاك
ايوب لقاها مستحيل تتخلى عليه او تسيبه
قعمز جنبها / بالعربيه انا معروض عليا شغل مع الردع و سفرة للخارج .. منقدرش ندير فى رقبتى اسرة منعرفش الظروف اللى بتواتينى
-روقيه / نمشى معاك وين ماتبى حتى خارج البلاد
-ايوب يعيط / قلتلك مانبيش حد معاى ..منبيش اندير عليه افهمى
-روقيه تبكى/ عارفاتك تكدب تبينى نبعد عنك … ماتتخلاش عليا يا ايوب.. حتى الطلاق لتوة ماقلت عليه لحد الا بوى بس
-ايوب / اووووه علينا عاد …
وبدى ينادى/ يافندى …يافندى
انفتح الباب / خيرك تعيط
-ايوب / ناديلى الراجل اللى معاها …
جى ميلاد وقف / خيركم
-ايوب / البنت هادى انا مطلقها من شهرين ..ومعش نبيها …

يبي يسمع اللى فالحبس كلهم …لان عارف ان فيهم جواسيس لى مؤيد
ميلاد مصدوم وروقيه مصدومه كيف فضح الموضوع

-ميلاد / كيف …..كيف طلقتها
-ايوب / ايه انا مطلقها من شهرين …حتى عدتها قريب تكمل
-ميلاد حمق/ قبل شهرين يعنى قبل ماتتوفى حناك .. يا افندى معناها بنت الاوصول هادى اللى تقول انك مطلقها …
قعدت فالعيادة مع حناك لين توفت وهيا مش على دمتك وسكتت وماقالتش
-ايوب عيونه تعبو دموع وتلفت لى روقيه وعلى صوته / اسمعى يا بنت الناس ..انا طلقت ليا شهور توة …ومستحيل نردك …انتى لا قريبتى ولا مرتى …وانا مش عارف نفسى ننحبس ولا نطلع ولا شن ايصيرلى ..وانتى ربي يوفقك بزوج وصغار غيري

وطلعت روقيه من جنبه مكسورة الخاطر…معقولة يتخلى عليها بالسهولة هادى …عشان مصالحه وعشان يسافر..مش هاينه عليها نفسها …ومش هاين عليها تسيبه وتبعد عليه

روحت للحوش تبكى …
-ابراهيم / يابنتى المفروض قلتيله انك حامل
-روقيه متعصبه / نقوله انا حامل وهوا يقولى اطلعى من حياتى …ويقولى انى حمل علي ضهره
-ابراهيم / ياودى الكلام فيه ان ..معقولة يبعدك عليه هكى بدون سبب

وفاتو شهرين ثانيات ….

روقيه منها وحم ومنها واجعتها رويحتها ….
ايوب معش مشتله … وزكريا ومؤيد حتى هما قاعدين محبوسين معاه فى نفس الحبس
-روقيه / يابوى خلينا نمشو لتونس عند عمى عبدالسلام ..
نشرو حوش ونعيشو فيه …انا نفسيتى تعبت
-ابراهيم/ اهو عرضت الحوش والارض متع عين زارة للبيع ..نشوفهم كانا دارولنا راى نمشو

بعد شهرين ثانيات …

ايوب قاعد فالحبس… وروقيه فى الشهر السادس..قريب تخش السابع ….
سمعت بي امنه وميلاد دارو حادث كبير…وقلبها مش عاطيها ..ضرورى تمشى تشوفها ..لبست كاب كبير ايدسلها بطنها ومشت هيا واختها سماح ….
-ايناس / سمنتى ياروقيه هلبا
-روقيه / ضهرى يوجع فيا ناخد فى حبوب كورتيزون
-امنه / وانا نقول شنو هالنفخه اللى انتفختيها هادى كلها
قعدت قريب ساعه وخبرتها انهم ماشيين تونس هيا وبوها واختها مرام …بيقعدو مقيمين غادى جنب حوش ولد عم بوها
وروحو هما الزوز …سماح اتسوق وروقيه فى جنبها
-سماح / ليش ماقلتيش لى عمتك انك حامل
-روقيه تشبح للطريق / مش لازم
-سماح / تى هادى حناه يا روقيه …نعرفك اكبر من هكى
-روقيه / اللى مايبينيش حتى انا منبيشى ..ولا صغارى يبوه
-سماح / والولد اللى بتجيبيه وين بتسجليه وباسم منو
-روقيه / خلاص عاااد يا سماح ..خلينى فى حالى

وباع ابراهيم حاله ومحتاله ودار للفلوس تحويل لولد عمه فى توتس …وودع جيرانه وبناته …
-روقيه / زى ماوصيتكم …اللى يسأل عليا روقيه تزوجت ..
وبعد عام قولو جابت ولد
-سهام / حاضر يا وخيتى
-روقيه/ اى حد يسألكم …انشالله حتى ايوب ..او امه ..او اى حد من جيرانه
-احمد / زى ماتحبي يا روقيه ..حاضر

________________________________________

–

سافر ابراهيم هوا وروقيه ومرام ….
شرو حوش فى تونس …وجابت روقيه ولد زى القمر …
-مرام / شن بتسميه يا روقيه
-فتحيه مرت عبدالسلام / احسن الاسماء ماعبد وحمد
-مرام / انسموه ابراهيم على اسم بوى
-ابراهيم / لاااا خلى امه اتسميه
-روقيه منغير ماتحس/ بنسميه ايوب
-عبدالسلام / معقوله بيبدا اسمه ايوب ايوب
-ابراهيم / نبيك تكلم صاحبك اللى فالسفارة ايسجله فى كتيبي.. يخدمك ولا
-عبدالسلام / ايه اكيد يخدمنى ..

وتلفت لى روقيه / انتى جبتى عقد القران ولا
-روقيه / ايه جبته
-عبدالسلام / ربي يفك حبس بوه يااارب
طبعا عبدالسلام ماعنداش علم ان روقيه اطلقت …ولا يعرف شكل ايوب ولا شافه لانه فالعرس مسافر لتونس او بالاحرى طلع من البلاد بعد الثورة

بالفعل سجله عبدالسلام عن طريق معارفه ..لانه كان حاجه قوية فالجيش قبل الثورة .. ف ليه مكانه … سجلو الولد ايوب ايوب العارف … وعبو كل البيانات …بس سجلوه فى كتيب جده ابراهيم
.
.
.
.

بعد اربع سنوات …..

_______________________________________

تمت ….ويتبع …

 

نحبكككككم ❤