احفاد الشيطان للكاتبة زهور جمال الدين

#احفاد_الشيطان

بقلم زهور جمال
?الحلقه التاسعة عشر?

–

فى حوش ابراهيم

بوهم لما لقى الثقل على سماح وسهام… خفف عليهم ..خاطر روقيه مريضه وسيبت الدور مع خواتها حاليا
قاللهم سماح تجى الاحد وسهام الاربعاء… والجمعه يتلاقو جميع ….
وهوا ومرام ايدبرو روسهم فى اليومين اللى بيقعدوهم بروحهم …

فالليل بعد ماتعشو …
مرام فى دارها ….وابراهيم يتفرج عالتلفزيون
وقلبه غام فيه …بيكلم روقيه لقاها قريب الساعه 11 فالليل تحشم ايقلقها …
ومع هدا قعد حاس ان قلبه غام عليه وبين عيونه روقيه …
وهوا ياسبحان الله من لما كانت صغيرة لو اضايقت او كشخت عليها مدرسه فى المدرسه يحس بيها طول

قام التليفون واتصل بى سالم جاره ..
-سالم / الو
-ابراهيم / سالم شنحالك
-سالم / الحمدلله شنحالك انت يا حاج ابراهيم
-ابراهيم / حالى باهى …حال الكساد .. قلت نكلمك اتجى تقصر الليل معاى شوى
-سالم / كلاك الوحش يا حاج .. ماهو قلنالك جيب من يونسك
-ابراهيم يضحك / اييييه علينا ياسالم شكلك ماتعياش ..
ليك فوق العشرين عام وانت تزن عليا ناخد من لما المرحومه كانت حيه ???
-سالم / وجه فقر.. ننصح فيك شن بنديرلك ??
-ابراهيم / غير تعالة نشربو طويسه شاهى
-سالم / ومن بيديرهالك ..قعدت غير البنيه الصغيرة وماعارف حاجه اكثر من كتاباتها
-ابراهيم / ايييي علينا ?
-سالم / باهى تو نجى …وماتكلمش البنت خليها تقرا تو نجيبه انا الشاهى ..غير افتحو الباب بس
-ابراهيم / باهى هى

____________________________________
–

روقيه صكرت الخط وتلفتت وراها تلاقى ايوب واقف…
هوا فاتح عيونه ويشبحلها …شنو اللى صار وخلاها تتصرف هكى…
عيونها معبيات دموع ..وعيونه معبيات اسئلة
-ايوب / فى من كنتى تكلمى
-روقيه تلخبط ومنغير ماتشبحله/ معاد ولد خالتى كلمنى وقالى بوى تعبان قلتله تعالة ارفعنى
-ايوب ايقرب منها ويتكلم/ ايجى معاد يرفعك علاش انتى ماعندكش راجل
-تلفتت للشباك وعطاته بالضهر تبى تمسح دموعها/ تلخبطط
منغير ما نحسبها قلتله فوت عليا
-قرب منها / اهاا منغير ماتحسباها ..هدا علاش تقوليله متقولش لى ايوب
روقيه حست انها لو واجهاته ح ينكر …ولدلك قررت تهدى الامر
قربت منه وحضناته / حبيبي نشبح فيك مشغول ومش فاضى ..فكرت انى بهكى ح نساعدك
-مع انه مش مصدقها لكن حضنها / تبى نرفعك توة حبيبتى
-روقيه بضحكه صفرا/ الصباح رباح حبيبي
-ايوب / على راحتك …تعالى ارقدى فحضنى ستاحشتك
-روقيه / حبيبي انت عارف انى نافس وانى …
-قص عليها/ عارف ان عندك عدر ..بس نبيك ترقدى فى حضنى الليله ….
خشو السرير …رقدو فى حضن بعض …هيا راقدة فحضنه بالسيف …
وهوا حاضنها ويشم فى ريحتها …حس ان فى حاجه غير سايرها وسكت …وحس ان فى حاجه بتصير وممكن اتكون اخر مرة يرقد وروقيه فى حضنه
كل واحد فيهم مش راقد …يخمم.. لكن مغمض عيونه
روقيه تخمم كيف تتاكد بنفسها وتقطع الشك باليقين
وايوب يخمم شن اللى خلى روقيه وجهها يتغير .. واتكلم ولد خالتها …توقيعته مخطرتش عليه نهائيا …

وفجأة وقف / شوى بس ننزل نشوف حناى ونجى
-روقيه تبيش تشبحله/ على راحتك …

نزل قعد قريب ربع ساعه وركب .. حضنها ورقد

_____________________________________

–
ثانى يوم الصبح ….

روقيه فتحت عيونها ..تشوف فى ايوب كيف طالع من الحمام غاسل وجهه …غمضت عيونها مع انه لاحظ انها فاقت من النوم وتبيش تكلمه …تأكد ان فى موضوع….بس شنهوا
الله اعلم …صلى ولبس حوايجه …واتكى للزيانه خدى تليفونه من الشحن … ونحى تليفون روقيه من الشحن وحطه فى جيبه ..ونزل …

خش من الباب الفاصل لحوش حناه …

-ايوب / شنو حناى واتيه
-سالمه / واتيه ياوليدى.. غير كانا نعرف علاش تبى ترفعنى على صبح ربي بس
-ايوب / حتى روقيه بنوصلها توة لحوش بوها وبنمشى نلحق الجماعة للزردة اللى قلتلك عليها

تاريته لما نزل الليله اللى قبلها كان نازل يتفاهم مع حناه اتوتى روحها بيش يرفعها حوش خوها

جو الشغالات / واتيين بابا
-ايوب / اطلعو هى
-سالمه / وعلاش بطلعهم حتى هما
-ايوب / بنسكر الحوش بكل.. منقدرش انخليهم فيه وانتى وروقيه مهناش
-سالمه / وين بترفعهم
-ايوب / بنردهم للشركة اللى خديتهم منها اسبوع بس ..وبعد انروحو للحوش انجيبوهم
-سالمه / ياودى خلينى انا ورقيه فالحوش وانت برة وين تبى
-ايوب / يا حناى تربحى معش توجعيلى قلبى .. قلتلك نبى نمشى وانا مطمن عليكم
-سالمه/ رقيه وين
-ايوب / خليتها اتوتى فى روحها بيش نلقاها واتيه بعد انوصلك
-سالمه / باهى نطلعو مع بعصنا مرة وحدة وخلاص
-ايوب / تعرفى روقيه تعبانه شوى وفاقت متأخر .. قلت نختصر الوقت انوصلك ونجيها
-سالمه / باهى على راحتكم
وتلفتت لشغالاتها / طفيتو الغاز
-ردت البنت / ايه طفيناه وسكرنا الشباك والابواب الخلفيه

طلعت سالمه ووراها البنات …ركبهم ايوب ..ورجع للحوش سكره بالمفتاح من برة ..ومشى وصلهم

_____________________________________

–
فى دار روقيه

فاقت من مكانها …..
خشت للحمام .. غسلت وجهها وطلعت …
تأكدت من ايوب طلع …سكرت الباب بالمفتاح
وخشت للمكتب متاعه …

فتحت القجورة وطلعت الملفات ….
وقعدت اتفتش فيهم بالواحد ….اكثرهم فيهم اوراق مختومه بختم مكتوب عليه احفادالمختار وموقع
زى المهبولة تاخد واطلع واتفتش …اتاكدت ان الملفات كلها تحت اسم المنظمه نفسها …
خدت صدمه حياتها ….مشت لطاولة الزيانه ايحطو عليها فى تليفوناتهم للشحن
دورت على تليفونها بتكلم وحدة من خواتها تجيها ما لقاتاش
شافت لوطا ..دورت ورا الزيانه شى مالقاتاش
قعمزت شوى …وقررت تنزل للدور الارضى اتكلم من تليفون عمتها سالمه
نزلت ما لقت حد… خشت للمطبخ تشبح فى شغالات سالمه مالقتهمش …
وحتى شغالاتها هيا اللى تبات لوطا معاهم مالقتهاش ..
ركبت لبست جلابيتها وحجابها وقررت تطلع من الباب واطق على اى حد من جيرانها وتاخد منهم التليفون وتتصل بخواتها ايجوها …قررت انه مجرم ومستحيل تقعد معاه ..
كملت لبس ونزلت للدور الارضى .. مشت للباب بتفتحه وبتطلع لقاته مسكر من برة ….
عرفت ان ايوب شبه فهم انها ناويه حاجه ….
فجأة انفتح الباب ..خش ايوب لقاها واقفه بجلابيتها …
هيا تفاجئت بيه وجمدت فمكانها …
-ايوب / وين ماشيه يابنت الاصول
-روقيه / وين حناك
-ايوب مسكها من يدها بالقوة / قلتلك وين ماشيه …
ووجهها للدروج / اركبى
-روقيه / حول مانيش راكبه
-ايوب عيونه حمر ومتعصب / اركبى قلتلك
خافت منه ركبت قدامه فالدروج وهوا راكب وراها
خشو للصالة متع حوشهم …
لقى المكتب بابه مفتوح …
-ايوب / من فتح مكتبى
-روقيه /وين تليفونى
-ايوب / تليفونك عندى…جاوبى من فتح المكتب
-روقيه / وليش واخده
-ايوب حمق / بتردى ولا ندير تصرف ما يعجبكش
-روقيه بأنفه/ انا فتحته …
-مسك يدها بعصبيه / وليش فتحتيه
-روقيه / ااه يدى
-رخى يدها ويكشخ / ليش فاتحه المكتب
تلفتتله بغضب/ ليش حرقت سيارتنا
-ايوب تلخبط / اى سيارة
-روقيه / ماتنكرش .. نفس التوقيعه اللى جتنى زمان فى ورقه التهديد …شفتها اليوم وقعتها انت بيدك
عرف ان شكه فى محله وهيا عرفت حاجه …مالاول بينكر
وبعتالى مقدرش ايقاومها
-غمض عيونه / مكنتش نعرف انك بنتهم
-قامت يدها / انت شن تقول ..انت اصلا كيف تتهجم على ناس وتهددهم .. وتخربلهم بيتهم وتودر رزقهم
-ايوب تلخبط / انا كتيبتى احفاد المختار تناصر فى المظلومين بس
-روقيه / هادى مش احفاد المختار…هادى احفاد الشيطان
انت كيف تتهجم على ناس وداير روحك طيب
-ايوب بقوة/ انا منضمتى اترد فالمظالم بس
-روقيه / احنا ماظلمنا حد ..انتو اللى تهجمتو علينا وتبليتو
-قرب منها ومسك يدها / حبببتى انتى مريضه هدى روحك
-جبدت يدها / حول ايدك ..يامجرم يا نصاب
-قرب منها / روقيه حبيبتى
-وخرت / ابعد عنى وماليكش بيا اى علاقه من اليوم انا لا زوجتك ولا نعرفك …والحمدلله ربي سترنى وناربطنى بيك شى .. واليوم قبل غدوة اطلقنى
-ايوب تفاجأ وصوته هرب / انتى شن قاعدة تقولى روقيه حبيبتى ..طلاق شنو اللى تحكى عليه..
-روقيه / مستحيل نقعد زوجه لنصاب زيك …انا مرضية الوالدين .. مستحيل ربي يجازينى بواحد زيك
-ايوب وجعاته / روقيه ..انا ايوب راهو

روقيه لما سمعت الكلمه هادى..انهارت وبدت تبكى …قعمزت
عالسرير وايوب قعمز جنبها …
مسكلها يدها / مستحيل نطلقك
-روقيه / وانا مستحيل نقعدلك ….
وشبحتله وعيونها مدمعات /طلقنى
-وقف وهوا حامق/ اخر حاجه تحلمى بيها انى نطلقك ..
واسمعى يا روقيه انا لا اول واحد ولا اخر واحد خدم الخدمه هادى.. انا لا سرقت لا كدبت ..مجرد ناخد فى كزيونى على خدمتى
-حطت ايديها على ودانها وتبكى/ اسكت ..اسكت..ياريتنى ماعرفتك يا ريتنى ماتعرفت عليك
-ايوب / حبيبتى والله ماتكونى الا راضيه
-مغمضه عيونها / طلقنى نكون راضيه
-وقف ويشبحلها / كل شى اطلبيه الا الطلاق ..انتى زوجتى ومستحيل نخليك تبعدى عنى
وقفت قدامه/ وانا مستحيل نقعد معاك
-ايوب/ حتى لو وقفت النشاط والمنظمه اللى مش عاجباتك
-روقيه / منظمه شنو ..انت عايش فالوهم …هادى اسمها مليشيا…تسرق وتنهب وتقتل
-ايوب / عمرى ماقتلت ولا سرقت ..انا نرد للشخص حاجته وناخد نسبه
-روقيه / انت نصاب
-ايوب / انا عمرى مانصبت على حد
-روقيه / واللى صار معانا
-ايوب / كنا بنخلصوكم …صح بالاجبار..لكن فالاخير كنا بنخلصوكم …
وبعد عنها وشبحلها / ولعلمك …حتى سيارتكم اللى انحرقت كنت بندور طريقه ونعوظكم حقها
-قامت يدها / انت مقتنع بالكلام اللى تقول فيه
-ايوب / تمااام الاقتناع
-روقيه / انت مقرف…ورد بالك تحلم انى نقعد معاك
-ايوب / انا زوجك وطاعتى واجبه عليك
-روقيه / تربح خلينى نطلع ..بوى فى حاجتى .وهدا عقاب من ربى ليا لانى سيبته
-ايوب / انا نحبك
-روقيه / وانا نكرهك
-ايوب / كدابة …
وخدى مفاتيحه ومشى للباب
-روقيه / وين ماشى …طلقنى واطلع
ماردش عليها ماشى للباب
-روقيه / تعالة ..نكلم فيك …
-تلفتلها / ساعه ونجيك …
وطلع وسكر الباب بالمفتاح

______________________________________

–
فى مكتب امحمد

-زكريا / الشحنه امتى بتوصل
-امحمد / اليوم الاثنين … وهما قالولى الاربعاء توصل للميناء
معناها بعد غدوة
-زكريا / كيف بيبعتوهالك
-امحمد / فى حاويات جايبيين فيهم غسول ملابس
-زكريا / رد بالك تنشد البضاعه ..دافعين فيها هاكى الحسبه
-امحمد / عيب عاد..عندنا تريس فى الميناء تابعينا
-زكريا / دير رايك المهم الخميس نستلموها كاملة
-امحمد / حصلتو ناس معاكم
-زكريا /احنا عندنا .. وزدنا طلبنا دعم من الحاج خليفه
..بعتنا 200 نفر
-امحمد / ولت حرب هادى
-زكريا /ورحمه موسى مانى مخليين واحد من جماعته على وجهه الارض
-امحمد / المهم زى ماتفاهمنا .. انا خلونى برة الموضوع …
لان عياد مش ساهل .. وراهو مربط حتى مع جماعه فالدولة
-زكريا / انشالله مربط مع الجن الازرق …. احنا نويناه خلاص
وبادن الله رقبة موسى برقابيهم كلهم
وشرين تليفونه …شاف لقاه ايوب …
-رد / الووو
-ايوب / اسمع… وين مفتاح شقه السراج
-زكريا / فالخزنه اللى فالمكتب
-ايوب / تمام
-زكريا / انشالله خير ..فى حاجه
-ايوب / لا سلامتك …غير نبيها فى امر شخصى
-زكريا / فهمتك …ربي يعاونك
-ايوب / سلام

________________________________________

–

بعد العصر

ايوب وروقيه فى السيارة

-روقيه تبكى / قلتلك طلقنى قبل ماتحطنى فى حوش بوى
-ايوب / قلتلك الطلاق ماتحلميش بيه
-روقيه / انت ليش ماشى من الطريق هادى …مش طريق حوشنا
-ايوب / مش تشبحى فالطريق زحمه
-روقيه / شن جاب السراج لطريق حوش بوى
-ايوب / فى واحد هنايا نبى منه فلوس .. ناخدهم ونوصلك
-روقيه / وصلتنى قبل وبعتالى جيته
-ضرب الستيرسو بالقوة / ماتعرفيش تسكتى
خافت منه وسكتت

قعد ماشى لحد ماوصل عمارة مدخلها انيق ….
-ايوب / شويااا بس ونجى
-روقيه / باهى

نزل ايوب خش للعمارة ممكن دقيقتين وطلع
فتح بابها وبسرعه حط يده عليها / انزلى
-روقيه / وين بننزل
-ايوب متعصب / تى انزلى قلتلك
-نازلة وتنقرز / ليش اتنزل فيا قلتلك نبى حوش بوى
-سكر باب السيارة وجبدها من يدها / تعالى
وحش بيها للمخل بسرعه ومشى خش بيها اول شقه عاليمين وسكر الباب
-روقيه / هدا حوش شكون
-ايوب / هدا حوشك من اليوم …بتقعدى فيه هنايا
-منغير ماتحس بنفسها مشتله تجرى تخبط على صدره/ طلقنى .. قلتلك طلقنى تسمع فيا
-ضمها / اهدى حبيبتى
-فكت نفسها / حول ايديك من عليا …قلتلك معش نبى ..
كيف تبينى نقعد مع نصاب
-غمض عيونه / نديرو اتفاق
-روقيه / واللى هوا
-ايوب / انا توة مش فاضى …عندى موضوع نعتبر فيه مسأله حياة او موت …عطينى شهر يكون بالتاكيد كامل
لو طلبتى بعدها الطلاق مستعد نطلقك
-روقيه / لا توووة وصلنى حوش بوى
-وقف زى الغول/ وافقتى عالاتفاق هدا مرحبتين ماوافقتيش
هاك مجبوسة هنايا
-روقيه /انا مرتك بتحبسنى
-ايوب / مرتى اللى تبى اتسيبنى
-روقيه / لانها اكتشفت حقيقتك
-قرب منها / روقيه انا نحبك …ماتسيبينيش
-روقيه / مبادئي واخلاقى مايسمحوليش انى نقعد معاك
-غمض عيونه / براحتك

تلفت بيطلع ….
-روقيه / انا موافقه لكن بشرط
-تلفتلها / موافقه على شنو بالزبط
-روقيه / موافقه نقعد معاك شهر…لكن تخلينى نمشى لحوش بوى عادى
-ايوب / وانا موافق..
-روقيه / باهى ردنى مع حناك
-ايوب/ حناى بنخليها فى حوش خوها ..وانت يا بتقعدى هنايا يا اما فى حوش بوك ..الفيلا خطر عليك
-روقيه / خلاص نقعد فى حوش بوك
-ايوب / باهى اخر طلب نطلبه منك …خليك هنايا فى الشقه هادى …ومرة مرة حنجى هنايا.. مش حنزعجك
-روقيه / باهى

____________________________________

تمت …ويتبع

سامحونى عالتأخير الحال من بعضه …الضى قاطع

نحبكم ❤