احفاد الشيطان للكاتبة زهور جمال الدين

#احفاد_الشيطان

?بقلم الكاتبه زهور جمال الدين?

?الحلقه الثالثه عشر ?

–
موسى خد المفتاح وطلع من المكتب يجرى حتى الباب ماسكراس وراه

-زكريا / تى نوض يا ايوب
-ايوب / هيا

وطلعو يجرو وسكرو الباب وراهم ونزلو من للعمارة

طلع للشارع لقو موسى راكب سيارته وطلعت

-ايوب / تى وين سيارتك ياولد
-زكريا /اهيا قدامك

وركبو الزوز للسيارة وشادينها فى جرت موسى

تليفون ايوب ايشرين ..روقيه تتصل

رد عليها / ياروقيه معش تتصلى… تو نكلمك انا

سكر عليها الخط ..وخلتها حايرة

بعد ربع ساعه …وصلو قدام العيادة مش بعيدة على مكان عملهم

درس موسى بعيد ونزل

وهما لقو مكان قريب درسو ونزلو …

شدو موسى قدام الباب

-ايوب / خير بلاك يا موسى …البنت امها وبوها معاها فوق
-موسى / اركب نزلهم يا ايوب …لانى بنخشلها هكى ولا هكى

-زكريا / باهى خليك هنايا نخشو نشوفو وانادوك
-موسى / وعلاش نقعد هنايا ..نخش معاكم من يعرفنى

-ايوب مد يده فى وجه موسى / لكن تقعد مصكر فمك …رد بالك تفضحنا
-موسى/ باهى غير خش

خشو فى الممر متع العيادة ..وايوب ايخمم كيف ايطلع امها وبوها لانه متاكد انهم معاها

______________________________________

–
فى حوش ابراهيم

روقيه قعد قلبها ياكل فيها ….

وتخمم / مستحيل ايوب ايدير فى دماغه عيلة زى كنزى
ومشت جهت الممر اللى بين الديار/ اصلا لو البنت فى باله راهو ماسألنيش عليها انا بالدات …

ومشت جهه دار بوها وقبل ماتخش/ باهى وعلاش ماردش على اتصالى بيه توا … غريبه

خشت لدار بوها وقعزت جنبه / نجيبلك الغدى يا بوى
-ابراهيم مدلها التليفون / ترا اضربيلى رقم عمك عبدالسلام عيونى معش فارزات الاسامى
-روقيه / بتكلمه من اليوم

-ابراهيم/ جيرانى وولاد عمامى اللى بناديهم كلهم بنتصل بيهم اليوم …بيش اللى عنده ظرف ايأجله .. لكن عبدالسلام نبيه ينشدلى عليه قبل مانعطيك ليهم
-روقيه جتها رهبه وعيونها دمعو / يابوى خلينى معاك ..والله قلبي ما عاطينى نفارقك

-ابراهيم / توة خلينى فرحان انى بنتهنى عليك عااااد …ليش تبكى وتنغصى عليا وانتى عارفتينى مانتحملش فيك شى
-روقيه / باهى يا بوى

-ابراهيم / وبعد ماتكمليلى اتصالات نبيك اتكلميلى الشاب اللى جى خطبك ..نبى نقعمز معاه ونشوفه قبل مانديرو اى حاجه
-روقيه / قصدك يا بوى ماشفتاش

-ابراهيم / وين بنشوفه وهوا طار زى العجاجه هوا وحناه ..
وتلفتلها / حتى انتى ماشفتيشى ماهو
-روقيه تلخبطت / لاااا وانا وين بنشوفه يا بوى

-ابراهيم / خلاص اتصلى بيه بالرقم اللى بعتهولى مع حناه بكرى
-روقيه / حاضر

وتسمع فى تليفونها ايشرين …

-روقيه / شوياااا بس يا بوى.. نشوف تليفونى ونجيك
-ابراهيمز/ باهى

ناضت روقيه خشت لدار مرام شافت تيفونها لقاته رقم ايوب

-ردت بسرعه / ايوووة
-ايوب / البنت كنزى خوها شن اسمه ..بالله اسألى اختك

-روقيه عيونها دمعو / لااااا زودتها يا ايوب ..
-ايوب / وراس حبيبي حنجيك ونحكيلك غير قوليلى بس

-روقيه / منغير مانسأل مرام…نعرفه اسمه كريم
-ايوب / باهى تو نكلمك

وسكر عليها الخط …حدفت االتليفون عالسرير وقعمزت زعلانه …وفى قلبها شوية غيرة

______________________________________

–

فى حوش امنه …

امنه وبنتها ايناس دايرين صفرة شاهى وحلويات ومقعزات ايهدرزو

-امنه / قلتلك عمتى سالمه كيف صكرت منى توة ..وقالتلى البنت بيعطوها هدا علاش مشو امس بسرعه
-ايناس/ وخيرهم ما كلموناش امس

-امنه / امس الضى هارب وطول اليوم تليفونى خارج التغطيه لين ولى الضى الساعه 2 فالليل

-ايناس/ ربي يعقد عسلهم انشاءالله اوخى ايوب وخطيبته
…قلبه كبير ايوب ويستاهل كل خيرر.

-امنه / وقالتلى الرجاله بيمشو بعد غدوة فى الغدى للفضانيه
واحنا النساوين بنمشو اليوم اللى بعده
-ايناس تقلب فى كتابها / وعلاش الاستعجال هدا كله يا ماما

-امنه / خاطر العرس بعد اسبوعين …
-ايناس / معقولة بالسرعه هادى…غير يتعرف عليها قبل .. ولا يعرفها وتوة مشى خطبها

-امنه/ حاشاه اوليدى مش متع دوة فاضيه ..قالت الحاجه قالوله عليها جماعه يعرفهم ..وشكروهاله

-ايناس سمرت كتابها / مدامه قايليله عليها ناس ..مفروض يصبر شوى يتكلم معاها ويفهمها وتفهمه ويشوفو روحهم مناسبين لبعضهم والا لا

-امنه / امالا تبيه ايشدها معاها جغ مغ ..ولدى ايوب رزين مايعرفش الدوة الفاضيه متع مفرخ هالايام
-فتحت ايناس كتابها / ربي يهنيه …

خش ميلاد للصاله / منهوا ربي يهنيه
-امنه / العقبى لوليداتى الثانيه ..توة كلمتنى عمتى سالمه ..حنا ايوب .. وقالتلى ايوب بيخطب .تو يكلمك هوا بعتالى يقولك اكيد

-ميلاد / ربي يهنيه ..يستاهل كل خير ايوب ..والعقبى لحسن وحسين انشالله
-ايناس/ وانا لا يا بابا
-امنه / سبحان الله جيل توة ..لا يتحشم لا يجعر
ايناس وميلاد يضحكو

– ميلاد / خليها يا سالمه زيها زى اندادها
-ايناس/ ربي مايحرمنى منك يا غالى ..يلى ديما واقف معاى

-امنه / هدا فيش فالحه غير فى طولة اللسان
-ميلاد / وماقالتلكش بنت شكون ..ونشدو علي اهلها ولا لا

-امنه / هيا ماتحفظش الحاجه ماك تعرفها …قالتلى تو يكلمك ولدك ويحكيلك
-ميلاد / حتى هدا راى

-ايناس / خود طاشه شاهى بابا

ونزلت راسها لكتابها اللى فى يدها …لقت جمله مكتوبه …
رقم هاتف ..وكاتب تحته زكريا ..اتصلى

اتفاجأت ايناس ..وتلخبطت ..زعما منو حصل على كتابى وكتب فيه الجمله هادى
وطول خطر فى بالها الموقف اللى صار فى المربوعه

قامت راسها / يااام ..منهوا الولد اللى جاى لخوى حسن بكرى
-امنه / هدا زكريا صاحب ايوب …شوره ترا شن يبي من حسن …

انخلعت ايناس …وقفت وتلفتت بتمشى من الممر

-امنه / خيرك نضتى مش تبى تشربى الشاهى
-ايناس/ ادكرت حاجه بنديرها فى دارى ..اهو تو نجى

وخشت ايناس من الممر مشت تجرى لى دارها
خشت الدار وسكرت الباب ..وقعمزت عالسرير وفتحت الكتاب وقعدت تقرا فى اللى كاتبه زكريا

اتكت على سريرها وقعدت تخمم .. عجبتها جرأته

قامت تليفونها وكتبت رساله

“هدا رقمى لو تبى اتصل انت ”

وزكريا طبعا ماشافش الرساله …لاهى خايض مع صاحبه ??

ومع هدا قعدت ايناس اتراجى فى اتصاله

______________________________________

–

فى العيادة

بعد ماعرفو الشباب رقم غرفه كنزى من الاستعلامات زعميتا جايينها زوار

اتفقو ايوب وزكريا وموسى اتفاق
انهم يكرو الولد البنقلاديشى بالفلوس …ويبعتوه لى عمك عبدالرحمن يخلعه

طبعا البنقلاديشى لما شاف الفلوس وافق

ومشى لى عبدالرحمن ومرته وقف عليهم

-البنقلاديشى يكلم فى عبدالرحمن / انت فى ولد اسمه كريم
-حياة انخلعت/ ايه ولدى اسمه عبدالرحمن خيره

-البنقلاديشى / هوا فى ضربه على حاجب فوق عينه ..جابوه المدرسه
-حياه خبطت / حيه عليا ولدى

-عبدالرحمن / انت من قالك .. وكيف عرفت انه ولدى
-البقلاديشى / سمعت الممرضه تقول ان الطفل اخ البنت اللى فى غرفه 17

-حياة تعيط / فى اما دور شادينه
-البنقلاديشى / اضغط m فى الاسانسير .. فى قسم الاشعه

طلعو حياة وعبدالرحمن يجرو .. وقفو قدام الاسانسير ايوقفو فيه

ايوب ضرب موسى على كتفه / يومك يا بطل
وتلفت لى زكريا / فى جرتهم ولو ركبو اتصل طول …وانا بنقعد انراقب قدام الغرفه

-موسى يضحك / سلم عزوتى
-زكريا / بيش تعرف بس

وانفتح باب الاسانسير وركبو فيه حياة وراجلها ونزلو …

-ايوب / هيا توة بسرعه

زكريا مشى يجرى نزل من الدروج بسرعه بيسبقهم من الدروج للدور الارضى …

وايوب مشى لنهايه الممر ايراقب

وموسى مشى بخطوات ثابته وقف قدام غرفه كنزى
ودق الباب..وقلبه ايدق معاه

فتح الباب وخش / السلام عليكم
-كنزى فتحت عيونها بصعوبه من تأثير الدوا وتشبحله

__________________________________

–
فى مكتب امحمد

حمزة واخد فى يده جزدان كبير شوى …ويبان معبى مسكر غير بحكمه

-امحمد / يا حمزة ماتقعدش اتنقرز ..هدا حق الدولار توة ..وبرة اسأل
-حمزة / لا منقرز لا سو ..غير ضنيتهم ايجيبولى اكثر .. راهم قريب المليون
ومد جزدانه / هدا ماجابو

-امحمد / المليون معش حاجه كبيرة فى طرابلس خوى حمزة … حق حوش راهى
-حمزة / يالله …هدا ماعطى ربي

ووقف / عموما منور خوى امحمد على وقفتك معاى
-امحمد / ماهناك ما درنا …عالاقل اهو كسبنا صديق لما نمشو لى مصر نلقوه

-حمزة / مرحبتين بيك فى كل وقت .. حوشى مفتوح ليك ولى احبابك
-امحمد / وامتى السفر انشاءالله

-حمزة / العويله بعتهم من الاسبوع اللى فات …فى مكتب موصيه ايدورلى شقه فى القاهرة وايتابع فيهم ولدى كل مرة ايوروه شقه
-امحمد / ربي يهنيك انشاءالله ..مادامك شارى معناها مقيم

-حمزة / وشن عاجبك فى هالبلاد …
-امحمد / ربي يجيبهالك زينه

-حمزة / لكن بنقولك حاجه ..خبر ايوب ان اللى اسمه عياد حاطه فى راسه .. قوله ايرد باله
-امحمد / اول مرة نسمع بي حد زعلان من ايوب …الحق عمره ماتعدا على حق حد

-حمزة / الله اعلم ..بس الخبر جانى من جماعته اللى معاه فوق
-امحمد/ ربك يستر

-مد حمزة يده وسلم على امحمد / هيا نشوفوك على خير
-حمزة / فى الامان …وموفق انشاءالله

_____________________________________

–
فى العيادة ….

موسى طق على باب غرفه كنزى وخش

-موسى / السلام عليكم
كنزى تلقتتله مش قادرة اتركز عشان عاطيينه مهدئ

قرب منها ….خدى يدها ….ومع انها بدت ترعش لكن ما مانعتش ..حست انه موسى

قام يدها وباسها / الف سلامه عليك يا عمرى
-كنزى مبتسمه / موسى …انت موسى

-موسى / ايه انا موسى……..ياروح موسى

حطت يدها على شعره/ الله محلاك ياعمرى .. ومحلا شخصيتك …رِجال

وعيونهم فى بعض لحظات غراميه

-فجأة انخلعت/ بابا وماما برة

-قام يدها وباسها ثانى/ متخافيش طلبت من الدكتور ايناديهم تحت
-كنزى تجبد فى يدها / حول …حول ماتمسكش ايدى

-حط يده على شعرها / بنبدوها بزعل …
سكتت وتشبحله

-موسى / الله عالجمال …والنعومه ..والضحكه الخجولة
-واطت راسها وابتسمت / ايه اضحك عليا بكلمتين

-موسى يشبحلها / تحبينى
-كنزى / هلبااااا …هلبا

-قام يديها الزوز وباسهم / وانا نحبك ونتمناك زوجتى
-كنزى صوتها انغص / امالا ليش سيبتنى
ونزلو دموعها / ليش خليتنى نوصل للحالة هادى

-يمسح فى دموعها / عشانك حبيبتى ..انتى تستاهلى واحد احسن منى
-كنزى / مفيش حد احسن منك

-موسى/ لاااا فى …
-كنزى / انا معش قادرة انسيبك
-موسى/ ولا انا قادر … بنتوكل على الله وبنكلم بوك ..ونشوفه شن بيرد عليا

-فرحت / بلحقه ..بلحقه بتكلم بابا عليا
-موسى / انتى امتى بتطلعى

-كنزى/ توووة منطلع ..مدامنى شفتك ..خلاص انا معش مريضه

وطق الباب طقتين …

-ايوب / سقد ..يفتحو فى الاسانسير بيركبو راهو

وقف موسى … ونزل باسها ع جبينها ..

-موسى قام يده / مستحيل مزال انتخلى عليك

وطلع وخلاها فرحانه

___________________________________

–

ايوب كلم روقيه وحكالها بالصدق عن موسى وكنزى
..مايبيهاش اتشك فيه ولو للحظه

اما زكريا بعد اعطى رقمه لى ايناس كان سلبى وما اتصلش بيها …ماخافش من حسن ..بالعكس خاف ان ايوب يزعل منه ويحسبها خونه مع انها مازالت تراجى فى مكالمته

وعمك ابراهيم بعت مرسول وسأل على ايوب ..قالوله اعطى وعيونك مغمضات حتى الرزق عنده ..جاه هديه من واحد صاحبه واحنا نشهدو..

وصارت الفضانيه وجوهم الرجالة ..وحددو العرس بعد
اسبوعين بالتحديد …وثانى يوم بالزبط جتهم امنه امه واخته ايناس وحناه سالمه ..
وحضرت هيا خالتها خديجه ومبروكه جارتهم وخواتها

وصلاح سمع قريب طار مع انع متزوج …
ومنير مزال ماروحش …ماسمعش بر روقيه انخطبت

وعمك ايوب عاااد وين تليقه …ايدور فيها فى السمى ..لقاها فى الوطى قدامه

او هديه جابلها تليفون .. وثانى هديه شرالهم سيارة نفس اللى نحرقت …بالرغم ابراهيم رفض ..لكن ايوب اصر ..قاله هادى سيارة روقيه ونبي ندرسها عندكم

امنه قريب طارت بي روقيه ..عجبتها هلبا …يومها كانت لابسه قفطان شيفون مزركس زاهى سيور وعليه جاكيت قصيرة وردى وفاتحه شعرها ودايرة مكياج خفيف..

اما خواتها الارض مش سايعتهم من الفرحة.. وقسمو الايامات بين بعضهم … كل ليلة تجى وحدة منهم تبات مع بوها ومرام …وحتى روقيه بالرغم عروسه لكن اصرت انهت تخش فالدور .. وقبل حتى مرام بيديرولها دور معاهم …
دارتلهم عياطات …قالتلهم مانقدرش نبات بروحى فالحوش

روقيه عطوها راحه العشرة ايام الاولى …لانها بتسافر ماليزيا دهوارى هيا وايوب

________________________________________

ووصل العرس …

ايوب دار عرسه فى حوش حناه طبعا …

امه وخوته كلهم غادى ..حتى من عمك ميلاد مقعمز يستقبل وخاله محمود وعمك عبدالنبى جارهم …وكل الناس عزمهم مانسى حد

وعزم ناس الجيران قريب داخو لما شافوهم فى شارعهم?

طبعا ايوب يعرف الناس العاديه والناس القويه بحكم شغله

والعوالة برة متريسين عليها ايوب وزكريا وحسن …
حسين عنده امتحانات فى الاكاديميه يجى من الليل لليل
وزكريا فرصته عاد ..اكثر ما زاد تقرب من حسن وبوه

صحابه هدوله زكرة كل ليله تضرب

وموسى رجع متواصل مع كنزى كل ليله بعد اتاكد انها تحبه وراضيه بيه كيف ماهوا …. بس اجل موضوع الخطوبه معاها لين ايتم عرس ايوب
وزكريا نفس الشى……خاطره ايخش ايعول لداخل بيش ايشوفها … عارفها متريسه عالعوالة حتى هيا ?

فى حوش عمك ابراهيم ..

الثلاثاء دارو سهريه كبيرة …عزمو فيها الاقارب والاحباب ..
والجيران.. ودربكو ورقصو وغنو

وبردو منير ماروحش ولا حد بلغه

روقيه عدت العرس كله بكى على امها و حناها …

هيا تبكى من هنايا …وبوها يبكى من غادى

بوها مش هاين عليه فراقها …كابر عليه يا نارى

ثانى يوم الاربعاء جابو القفه ….
عمتك سالمه هيا الاولى جايه فى السيارات …وخشت قبل السوابيت وعييت ماترقص …هدا النهار اللى تراجى فيه عاد
خواتها صدارات وهما اللى طلعوها بحولى الحصيرة

فالليل حنو العروسه وهيا تبكى وخلاص …ديل شاغلها بوها وديل متفكرة امها …وحتى حناها واخدة شوى من دموعها

باتت بالحنه … وحولتها ثانى يوم الصبح …

ورفعوها احمد وسماح للمزينه ….

مكيجت وتكمت ولبست الفيلو …..

جابوها للصاله دارت حفلتها … ماخلو مادارو …
بوها مهتم …عرس روقيه الغاليه راهو

وجابو زمزامات تخبط ….

وجى ايوب ومعاه سرب سيارات قويه
مرسيدسات على لبوات على بئمات …المهم سرب مقوم

طلعت روقيه لغرفه العروسه بيش ايصورو

اول ماشافها ايوب قريب طار ..قرب منها وحضنها / واخيرا بديتى مرتى
-روقيه متحشمه / تى باهى اصبر شوى
-ايوب / الصبر تم منى خلاص

-روقيه تضحك / باهى غير بعد شوى انادى المصورة معش وقت عليها
-ايوب يضحك / ياودى حتى احنا معش وقت علينا

-مواطيه راسها / تى باهى حول
-باسها على جبتها وبعد / يسلملى الخجلان

وبالفعل خشت المصورة وخدتلهم لقطات

وطلع مشو عالممر لين وصلو للكوشه ..

فاتحيلهم زفه …وشادين ايديهم فى بعض وخاشين

قعمزو شوى فتحو بروجكتر صور روقيه من لما هيا صغيرة
وواخدة بعض الصور من ايوب نزلات صورته حتى هوا

وزفوهم وطلعو ….

ركبها جنبه فى السيارة ..طول الطريق ماسك يدها يبيش ايسيبها …وفاتحلها اغنيه رومنسبه ..

ومشو لحوش حناه

لقى امه لابسه جلابيه مطرزة وتراجى فيه فم الخيمه

درس السيارة ونزل وحضن امه وبكت يانارى …واخته ايناس اترش فالزهر عليه وعلى الحاضرين

نزلو العروس…وخش حسن طلع السيارة

ودخلوها للكوشه …وجايين معاها خواتها وجاراتها ونساوين اقاربهم …

خشو من الممر لقى حناه مقعمزة على كرسى فى بدايه الكوشه …

نزل ..واطى راسه وباس على رجليها ..

وروقيه تشبحله ومستغربه ….

وحناه تضحك / يا وليدى نوض اتشوه بدلتك

وقف وعيونه مدمعات …فات عليه شريط حياته كله مع حناه ….وكيف شاريتله بانيو كبير لما كان صغير وتعبيله فيه وحاطتهوله فى الجنان ..بيش ايعوم فيه خايفه عليه من البحر

زكيف تتعارك مع جيرانها كانا ضربه حد …وكيف روح لما انحبس زمان ولقاها راقدة مغطيينها بثلاث بطاطين ترعش خايفه عليه

روقيه مسكت يده بقوة / ايوب

فاق ايوب ..تلفتلها وضحك …

روقيه واقفه على يساره وحاطه يدها فى يده …

مد يده اليمين ومسك حناه .. وركبها معاهم عالكوشه …

وامنه واقفه تتفرج عليهم وسعيدة لانها عارفه ان المكان بالفعل للحاجه اللى رباته ..مش ليها

جابو السكر ….ووكلت الحاجه سالمه روقيه كواشيك منه قبل ماتقعمز

وتلفتت/ امنه …يا امنه تعالى

مشت امنه ركبت للكوشه ..وعطتها سالمه الصحن …ووكلت امنه كنتها السكر …

قعمزو شويا عالكوشه ….

وحناه ما بطلتش رقيص …مرة مع امه …ومرة مع عمتك مبروكه جارت روقيه

ووقفوهم وطلعو ركبو السيارة وتوجهو لفندق كورنتيا ..

حاجز فيه ايوب ليله دخوله …

مشو معاها خواتها وصلوها لكن مامزلوش من السيارة ..

وصحابه ايوب وزكريا …وسيارة فيها حسن وايناس

ركبو للغرفه …..

روقيه لابسه كاب خارجى ….

فكتاته .. وحولاته …..

فيلوها حلو بالمرة …ومنفوخ وفيه ديل

بدايه الغرفه فى مرايا عاليمين ….

تلفتتلها روقيه تشبح لى تسريحتها ومكياجها

حول دجاكته ووقف وراها وحضنها / نورتى دنيتى وحياتى يا اغلى حاجه فحياتى

ابتسمت وواطت راسها ….

-يشبحو لبعضهم فى المرايا / لما خطبناك بوك قالنا تتكلم ماقالش بكوشه …ولا زعما غشنا
ضرباته على يده اللى خاطها على كتفها/ غشكم عينك?

دورها ليه وخلاها متلفتتله/ امالا ليش ساكته ااه

ونضراته بتاكلها

واطت راسها / لا مش ساكته …

خداها من يدها / تعالى

وخشو قعمزو عالصالون …

تلفتلها وضمها ليه / نحبك

وقرب منها وبدى يبوس فيها ….

وهيا تجمدت لا قبلت لا رفضت ….

خاط ايديه ورا ضهرها وضامها ليه ويبوس …وحرك ايديه فتخ السوستا متع الفيلو

-روقيه / ايوووب
-ايوب / يا عيون ايوب

-بضحكه / اصبر شوى نحول الفيلو
-ايوب / انا نحولهولك انتى اليوم اميرة ماتتعبيش …انا نتعبلك

-ضحكت / اتحشم عاااد
-ايوب / نتحشم عينك

حول الببيونه من رقبته وفتح سوريته البطم كلهم …
وفتح بطم الكمام وحولها ….

وقف…مد يده تعالى

عطاته يدها ومشت معاه .. رفعها لدار النوم

خشو ..دخلها قدامه ..فتح ايوب الضى …

وقف وراها وحوللها كمام الفيلو باعتبار انهم سيور وانه مفتوحه السوسته من الخلف

-بدت ترعش / ايوووب
-قرب من ودنها/ اشششششششش …

وبدى يبوس فيها من ودنها لرقبتها ولكتافها وهيا ترعش

حوللها الفيلو كامل

-روقيه / باهى طفى الضى
-ايوب / لاااااااا

خلى الفيلو عالارض وخداها من يدها ورفعها للسرير

وتهنت العروس

___________________________________

تمت …ويتبع

غدوة نشوفو شهر العسل ??

نحبكم ❤