احفاد الشيطان للكاتبة زهور جمال الدين

#احفاد_الشيطان

?بقلم الكاتبه زهور جمال الدين ?

?الحلقه الحاديه عشر?

.
اليوم اللى بعده ..

فى حوش خديجه ..

احمد فى داره هوا وسماح …
متكيين فى سريرهم ….سماح عاطيه بالضهر وهوا وراها

-احمد/ والله لولا انى نحبك مانسكت ونفوتلك
-سماح / ضربنى وبكى سبقنى واشتكى

-احمد / تى ماهو تأسفنا عااااد
-سماح / ومن قالك قبلته اسفك …مانقبلاش لين اتقولى ليش رفعتونا انا واختى

-احمد / لعلمك ..تصدى راجلك ليله حرام عليك من ربي.. فمابالك انتى اللى تصدى فيا ثلاثه ايام
-سماح / خلينى انا وربي نتفاهمو

قام البطانيه وحدفها / اقعدى فيها …

وتلفت لبس تيشيرته وناض خدى مخدته و طلع من الدار

سماح قلبها نخصها / تى وين ماشى
-احمد / بننخمد برة …بالك اندير تصرف يوجعك ويجرحلك شعورك زى ما قلتى امس

طلع للصاله …حط المخدة عالكنبه الكبيرة وتغطى بى شرشف محطوط جنبه

وهيا وين تلقيها لا نبيه لا نطيق فراقه

لحقاته / خيرك جيت هنايا
-مغمض عيونه وحاط يده تحت خده / هكى احسن

مشت قعمزت على نفس الكنه …واتكت ومدت رجليها ورقدت قدامه بالزبط ولاصقه فيه

مد يده وضمها ليه وهوا يضحك / تى ماهو مالاول…..ليش العناد

___________________________________

ايوب وروقيه ساهرين ايهدرزو
بل بالاحرى يتعاركو?

ليهم اربع ايام يتكلمو مع بعض …وهوا شاد الصحيح فى الخطوبه

-ايوب / حبيبي اعطينى الصراحة ليش ماتبيش توة ..فى فحياتك حد يبوه اهلك وخايفه منهم وداسه عليا
-روقيه / طبعا لا

-ايوب / امالا خيرك ياروحى…ليش تتصرفى معاى هكى
-روقيه / نفتحلك قلبي ونحكيلك …بس ماتصغرش القضيه

-ايوب / شكلنابدينا فى محكمه? …احكى هى
-روقيه / هااا ريت…بديت تهزا من توة

-ايوب / لااا وراس حبيبي ماصارت ..انا نبيك تحكيلى كل اللى فى قلبك …نحكوه مع بعض ونتناقشو فيه ..تفهمينى ونفهمك …المهم غايتنا ان ناخدو بعض

-روقيه / شوف انا حياتى تختلف عن باقى الناس…انا لما ولدونى بوى وامى كانو ليهم قريب عشرين سنه متزوجين او اكثر تقريبا
-ايوب / اهاا مشاءالله

-روقيه / بوى توا عمره 74 سنه ..منقدرش انخليه
-ايوب / توة معقولة هيا هادى القضيه ..انتو 4 بنات قلتيلى صح

-روقيه / مانقدرش نعتمد عليهم …والله صعب
-ايوب / ناخدوه يسكن معانا معانا
-روقيه / مستحيلة ايوافق

-ايوب / ماشالله ردودك كلها جاهزة …روقيه انتى فى حد فى حياتك وقاعدة تختارى بينى وبينه
-روقيه / ايوب والله نزعل منك

-على صوته وهوا متعصب/ ماهو ماعندهاش تفسير ثانى انا نقولك بنخطب وانتى اديريلى فى اعدار
-روقيه/ حبيبي مش اعدار .. والله هدا ظرفى

-ايوب / يابنت انا فوتت مرحلة الحب…انا نعشقك ..شوفى بس قلتى حبيبي كل الزعل اللى فى نفسى طار.. روقيه ارجوك ماتسيبينيش
-روقيه / باهى شويا بس انصكر الخط انشوف بوى ونرجع نعاودلك

-ايوب / نراجى فيك ماتعطليش
-روقيه تضحك / حاضر ..باى توة
-ايوب / غير اسمعى
-روقيه / نعم
-ايوب / تحبينى
-روقيه / نحبك هلبااااا فوق ماتتصور

وصكرت الخط وطلعت من دار امها ….مش للدار اللى راقد فيها بوها

______________________________________

موسى وزكريا بايتين فى المكتب

-زكريا متعصب/ لكن هادى مش حركه راجل
-موسى / لانى راجل لازم انسيبها …لانى نحبها لازم نخليها تشوف حياتها

-زكريا واقف وقايم ايديه / انت غير شاورها …وقوللها انك اكبر منها وشوفها شن رايها
-موسى / عارفها ماتسيبنيش

-زكريا / لان عندها اخلاق …وبنت عيله وناس ..ماترخيش بى ولد عطاته كلمه
-موسى / اسمع انا تحملتك هلبا

-زكريا وقف قعمز عالكنبه جنب موسى/ يا موسى انا اكبر منك …واكبر منك بليله اعلم منك بحيلة ….معقولة تسيب البنت هكى وتخليها تعوم ماعارفه راسها من رجليها

-موسى / ممكن انا ما اخترتش الطريقه الصح اللى نبعدها بيها عليا ..لكن انا مستحيلة نربطها بيها ومتاكد من بوها مستحيلة يعطيهالى
-زكريا / حسستنى مية عام بينك وبينها .. قلنالك هلبا ليبيين فرق العمر بينهم زيك انت وياها بالزبط وماشيه امورهم

-تكى موسى راسه عالكنبه/ والله مانى عارف .. لكن انا من كثر حبي ليها نتمنالها واحد احسن منى
-زكريا / وخيره ايوب ماقالش ان من كثر حبه ليها يتمنالها واحد احسن

-موسى / غدوة حنكلمها ونفهمها الموضوع

_____________________________________

.
روقيه استادنت من ايوب و سكرت الخط …

تبى تمشى تشبح بوها ….طلعت من الباب تسمع فى بوها ايكح مخنوق …
مشت تجرى .. شداته من كتفه وقاماته شوى / خيرك يا بوى

-هوا شارق حاله…جابت شيشه الميه وشرباته

قعد يشرب بالشوى لين تحولت الشرقه

-روقيه / خيرك يا بوى …شن جاك
ايأشر ابراهيم على ضرهه يبيها تضربهوله بالشوى لانه انغص

خدت روقيه طاسه الميه وشربتهلله / خيرك مانديتنيش با بوى
-ابراهيم / ناديت عليكم الزوز انتى ومرام ماسمعتونيش
-روقيه / والله ما سمعتك يا بوى…وبدت تبكى

-ابراهيم / غير ليش البكى توة …مصدقك يا بنيتى..معش تسيبينى مرة ثانيه وخلاص
-روقيه / واللهى ماعاد نسييبك مرة ثانيه

ورداته لمكانه وحطتله راسه عالمخدة ….ومشت هيا لمكانها وحطت راسها على مخدتها وتخمم

افكار ترفعها وافكار اتجيبها / معقولة تمشى يا روقية ونسيبى بوك .. افرضى زى اليوم انشرق ..افرضى ينوض يمشى للحمام يزلق ايطيح …مرام منقدرش نعتمد عليها

وهدا كله وايوب ايراجى فيها تعاودله المكالمه

وقفت وخشت للدار خدت التليفون وكتبتله رساله

“سامحنى يا ايوب مفيش نصيب … ربي يجيبلك بنت حلال احسن منى يااارب” ..

وسكرت تليفونها …

ايوب قري الرساله قريب اهبل…يتصل برقمها يلاقى فيه مقفل

___________________________________

ثانى يوم

فى المدرسه

مرام وندى وكنزى مقعمزات ايهدرزو

-مرام / تى انقولك شكلها غاطسه لودانها …كل يوم تخش دار امى وتقعد قريب ساعه
-ندى / ومن قالك تتكلم فى التليفون ..وبلكى اضم فى حوايج امك

-مرام اضحك / وراس ياحبيبه انها تحكى فى التليفون
…وانه حب ..انفى لا يخطئ ??

ندى / كنزى خيرك اللطف ليك يومين غايبه …وتوة ساكته وتشبحى وخلاص

-كنزى وجهها شاحب / لا لا مافى شى
-مرام مستغربه / كيف حال موسى

-حطت كنزى راسها عالمقعد / سيبنى

-شهقو البنات الزوز / اااه …علاش
-كنزى تبكى/ منعرفش

_____________________________________

فى حوش ابراهيم …

روقيه بتطلع تبى تمشى للمدرسه

فتحت الباب لقت عمها الصادق قدام الباب وكيف بيطقطق

-روقيه / صباح الخير عمى الصادق
-الصادق / صباحك بالخير يا رقيه ..وين بوك

-روقيه / بوى لداخل تفضل ..
-الصادق / كانا بنعطلك بري

-روقيه / لا لا عادى مزال عشرة دقايق خلى نديرلكم فيهم شاهى
-الصادق / باهى

وخش الصادق لى جاره ابراهيم .. صبح عليه ونشد عالاحوال

وهدرز شوى وجابت روقيه شاهى وطلعت

-الصادق / انا قاصدك يا ابراهيم
-ابراهيم / وصلت يا صادق ..واللى نقدر عليه هوا ليك

-الصادق / انا جايك نحطب فى رقيه
-ابراهيم / تحطب فى رقيه …لمنو

-الصادق / لى ولد خوى…بحوشه بخدمته بسيارته باللى تطلبوه كله

-ابراهيم / ياريتها توافق ونتهنى عليها
-الصادق / طول ما انت عاطيها الحريه فى قرار الزواج
…استحالة روقيه تسيبك وتتزوج

-ابراهيم / لااااا وانا خيرنى …ماقلتلهاش تقعد معاى انا غير نتهنى عليها مانبى شى من الدنيا
-الصادق / خلاص امالا ..بعتالى بعد العصر نجيبه ونجى
…ايديرو مقابله شرعيه ..عجبو بعضهم كانا بها ماعجبوش بعض كل حد يمشى فى طريقه

-ابراهيم / تم هوا هداكه الكلام
-الصادق/ لكن انت شد فيها تحط عقلها فى راسها وتفهم مصلحتها وين
-ابراهيم / تم

_____________________________________

العشيه …

زكريا يتكلم فى التليفون

-زكريا / اهلين يا حسن
-حسن / اهلا زكريا …كيف حال ايوي وموسى

-زكريا / الحمدلله فى خيار الخير …قتلك شن صار فى محلك
-حسن / شن بيصير اهو قاعد واقف ..مولنى ايوب فترة وماوقفش على رجليه المحل…كنت بنكبره وبنديره سوق

-زكريا / وعلاش ماوقفش على رجليه المحل مدامه مولك ايوب
-حسن / المحل يبي شريك ايشد معاى .. العماله ايدهم والخنبه …وانا نبى شريك صاحب رزق

-زكريا / باهى شن رايك نتشاركو
-حسن / ياريت …عللاقل انت معرفه وثقه

-زكريا / امالا غدوة نتلاقو بعد الضهر
-حسن / تلقانى فى الحوش

-زكريا ?/ تمام غدوة نتلاقو

وصكر الخط وهوا فرحان انه اتخد اول خطوة فالتقرب من حسن عشان اخته …لانه عارف ان اللى يربط وايحل فى حوش ميلاد هوا حسن مش ايوب

موسى مقعمز فى جنبه ويكتب فى رساله لى كنزى
“نبى نشوفك ”

ردت عليه ” وانا مانبيش انشوفك

رد عليها ” نتلاقو غدوة بعد ماتكملى مدرستك فى مطعم الفروج القريب من مدرستك”

ومعش ردت عليه

____________________________________

فى حوش ابراهيم
.
روقيه بعد ماروحت من المدرسه ..سمعت بخبر الخطيب

-روقيه متعصبه / ومن قالك نبى نتزوج يا بوى
-ابراهيم / انا نبيك تتزوجى ..نبى نتهنى عليك ونشوف صغارك

-روقيه تتجدا فى بوها / منقدرش نسيبك يا بوى
-ابراهيم / ماقلتلكش اقعدى معاى…ياسر اكثر من عشرين سنه متحملة المسؤليه .. خواتك ياخدو رجالة وانتى تقعدى تضفرى فى الشيب

-روقيه / يابوى تربح فكنى منها هالمقابله هادى
-ابراهيم / وكانا قلتلك على خاطرى ديريها

-روقيه / ماخدة الخواطر مش فى الموضوع هدا يا بوى
-ابراهيم / يا بنيتى …اتزوجى وديري عويله عالاقل لما نموت نبدا مستريح فى قبري

-روقيه / ربي يطول فى عمرك يا غالى
-ابراهيم / واما من خواتك ….تتزوجى انتى تبدو بالدور الاربعه …كل يوم وحدة الكيد مايجيش على حد

-روقيه / لكن انا …
-ابراهيم / انتى خشى وشوفيه ..وبعتالى لكل حادث حديث

ووصل العصر …

قامت روقيه تليفونها وبعتت لى ايوب رساله

“بوى غصب عليا نقابل شخص مقابله شرعيه …حنخش نشوفه عشان خاطره …سامحنى يا روحى ”

وبعتتها

وكتبت رساله ثانيه

” لو اصر بوى انى نتزوج ..فانا مانبيش غيرك ”

ووصل العريس …

فتحت مرام الباب وخشت ..

خش الصادق …دخل العريس للمربوعه …

وتعدا لدار عمك ابراهيم يستادن فيه اينادى روقيه للمقابله

ساوت روقيه وشاحها ومشت باتجاه المربوعه

____________________________________

تمت …. ويتبع

 

نحبكم ❤