احفاد الشيطان للكاتبة زهور جمال الدين

#احفاد_الشيطان

?بقلم الكـــاتبه زهور جمــال الديــن?

?الحلقه العــاشــرة ?

.

، في حــوش ابراهــيم ســماح وســهام متكــيين علي ســرايرهم
-سهام/ نوضى ديريلنــا قهـــوة

-سماح / نفطــرو قبــل وبعــتالى نشــربو قهــوة ..ولعــلمك انــتى المفــروض اتبطــليها تــوة
-ســهام / مــش علــى طــول هــكى ..بالــشوى عليــا تو نبطلـــها

-قعــمزت ســـماح على سريرهـــا / انتى مش الـــمفروض مــشيتى للدة توة ولا مدامك فى التحليل طلعتى حامل
-سهام/ غير ايجى البي وبعتالى ساهل نمشى للعيادة وندير تحاليل كامله

وطقطق باب الحوش

-سهام / اللطف منو جاينا توة عالصبح
-سماح/ ردى من ورا الباب

وسمعو بوهم اينادى/ يا سماح ..افتحو الباب

-سماح/ تى نوضى افتحى بوك اينادى
-سهام / باهى خلى نلبس حجابي بس

– سماح / قلتلك ردى من ورا الباب
-سهام / تى باهى فهمنا

وطلت من ممر الديار/ هيا يابوى… اهو طالعه بنفتح

مشت للباب ردت منغير ماتفتح الباب / شكووون
-احمد / انا احمد ولد خالتك

فتحت الباب فيسع / اهلا احمد كيف حالك
-احمد / اهلا بيك سهام شنحالك.. ومبروك ماسمعنا
-سهام / الله ايبارك فيك وعقبالكم
-احمد /امى تبى تجى معاى لكن انا نبى نشوف سماح فقلتلها عندى شغل نمشيله وتو نجيك نرفعك لحوش خالتى
-سهام/ تفضل
-احمد/ نخش لى عمى ابراهيم انسلم عليه وبعتالى ناديهالى باهى
-سهام مبتسمه / باهى

وخش احمد لغرفه عمك ابراهيم سلم عليه وقعمز فى جنبه

__________________________________

فى مدرسه روقيه …

موسى واقف يتفرج على كنزى وهيا تمشى مع مرام
جمالها تبارك الله

-تلفت لى زكريا / كنزى
-زكريا قام راسه من الملف / وينها

-موسى/ اللى لابسه وشاح رصاصى
-زكريا / وكيف عرفتها

-موسى / صح مانعرفش شكلها… لكن نعرف صوتها كووويس
-زكريا / وخيرك زعلان

-موسى?/ وشنو اللى بيزعلنى

وتلفتو الزوز طلعو من المكان ومشو للسيارة

اما ايوب مشى جهه روقيه

وقف قدامها / روقيه …انتى روقيه ولا

قعدو جامدين و عيونهم فى بعض كأنه الزمن وقف

-تشبحله ومش متاكدة انه هوا ويديها يرعشو / ايوب ..انت ايوب ولا انا غالطه

ايوب مبتسم / لا مش غالطه ..ايوب بشحمه ولحمه …

ومد يده وهيا مدت يدها ..صافحها وشد على يدها معش يبي يطلقها?

ساكته وتشبحله وخلاص .. وسحبت يدها تحشمت منه

-ايوب مش متحكم فى مشاعره/ واخيرا لقيتك

وهيا قاعده ساكته ..و كأنها نصدمت

-ايوب مبتسم / عين زارة كلها قلبتها عليك .. ومالقيتكش
-صوتها هارب منها / مش مصدقه انك قدامى ..وين كنت

-ايوب / كنت اندور فيك.. ماخليت مكان ماسألتش عليك فيه.. وانتى شى مختفيه

-روقيه / كنت فاقدة الامل انى نشوفك مرة ثانيه
-ايوب / انا عمرى مافقدت الامل وكنت عارف انى ح نلاقيك

-روقيه متأثرة / ورجلك توة كيف حالها
-ايوب / الحمدلله .. بفضل الله وفضلك انتى امورها مشت تمام توة

-ايوب / تعالى نطلعو قدام الباب
-روقيه ولا كأنها شايفه حد من زميلاتها/ هيااا

مشو جنب بعض جهه الباب متع جهه الادارة اللى يطلع للساحه …

بعد طلعو مشو عالجنب جهه الظل

-ايوب مبتسم / حاس روحى نحلم ..معقولة انتى واقفه قدامى من جديد
-روقيه واطت راسها ومبتسمه / لاصدق

-ايوب / قعدت انراجى فيك تتصلى ..ولكنك ما اتصلتيش برقمى…ولا برقم صاحبي
-روقيه ?/ ربي مش كاتب..لما طلعت من عندك لقيت اختى وبنت عمى كيف بيلحقونى ..ومن تلخبيطى صار من دماغى رقمك ..ورقم صاحبك كنت كاتباته فى ورقه ..وضاعت طول بعد ماتصلت بيه

-ايوب / حصل خير…واهو شفنا بعضنا من جديد ..

وابتسم / تعرفى وشاحك اللى ربطى بيه رجلى قاعد داسه لتوة
-قامت راسها / وتعرف ان تيشرتك قاعد عندى لتوة

طلعت ابله من الباب/ ابله روقيه عندك حصه
-روقيه انتبهت/ باهى اهو جايه غير ولد خالتى يبينى فى موضوع

الابله مبتسمه / ماتعطليش
-روقيه / باهى

-ايوب / ياريتنى ولد خالتك
-ابتسمت / توة خلى نمشى …

-ايوب / لاااا المرة الاولى ضيعتك …لكن المرة هادى مستحيل
-ابتسمت / اهو عرفت مكان مدرستى…. امتى ماتبى تلقانى

-ايوب / نبى رقمك
-روقيه / حاضر

عطاها تليفونه كتبتهوله …دارله حفظ وشرينلها

خشت للمدرسه وهيا ساكته ومشى هوا للسيارة لصحابه
متوجهين للمكتب
____________________________________

فى حوش ابراهيم

احمد / نستادنك عمى منشوف سماح قالت ترا شن تبى نشريلها
” زعميتا متحشم منه ?”

-ابراهيم / نحسابك جاى بتروح بيها …شن قاعدة ادير هنايا ليلتين
-احمد / بالنسبه ليا انا كنت مزرد مع صحابى ..قلت نخليها تستريح يومين عندكم

-ابراهيم / هاك روحت .. بالك خود اهلك وروح بيها واشريلها اللى تبيه فالطريق

شرين تليفون احمد …

شاف لقاه نفس الرقم اللى كلمه المرة اللى فاتت ..ولما عاودله هاديكا الفترة لقاه غير مستعمل

-رد بسرعه / الو
-الشخص/ احنا بنتأسفولك ..غلطنا فى اسم الشخص اللى اندورو فيه ..احنا موضوعنا على شخص ثانى ..تأسفلنا
من زوجتك ..ومن اختك ..واسفين

وصكر عليه الخط.. عاودله يلقى فيه مشغول
كلم خوه معاد لقاه انتضار زبط انهم ايكلمو فيه

ناض وقف / معاك حق عمى ابراهيم خلى انروح بيها بالمرة علاش نق
عد نشرى ونرجع ثانى
-ابراهيم / فى الامان ولدى

طلع من دار ابراهيم ومشى للمر متع الديار

يسمع فى سماح وسهام يتناقسو

-سماح / والله مانى طالعتله
-سهام / هدا راجلك وواجب عليك تطلعيله ..خيرنى انا امس طلعت لى معاد

-سماح / هداكه انتى قلبك ميت ..

وقف احمد ورا الباب / سهام …يا سهام

ضحكت سهام وتبى تحط اختها فى الامر الواقع / افتح يا احمد خش

فتح الباب وشبح لى سهام وضحك

-سهام / نستادنكم …

وطلعت وخلتهم …

-احمد / قداش ليا خاطرى نخشها الدار هادى ..من لما احنا صغار معش خشيتها

هيا متلفته للجهه الثانيه وساكته

قرب منها وقف جنب السرير/ هى نوضى كان بتروحى

تلفتتله فرحانه / بلحقه ?

-مد يده / ايه بلحقه امالا مرت معاد طلعت حامل وانا تبينى نقعد نتفرج ??..هيا نوضى عاااد

مدت يدها فرحانه / هياا

“نست كل زعل وماجابتش سيرة لوم ليش جابها ولاجابت سيرةة ونكد بل بالعكس حسساته انه قراره صح.. والمراءة الشاطرة تعرف امتى تلوم”

-سماح / اطلع هيا خلى نغير حوايجى
-احمد / شنو متحشمه منى

-حطت يدها على كتفه وادف فيه وتضحك / تى اطلع تحشم عااد شنو تحساب روحك فى حوشنا
-احمد / تى باهى هيا اهو منطلع ..

طلع للممرر وخلاها تغير فى حوايجها ….

-احمد / سهام وينك
-سهام / انا فى المطبخ
-احمد / تعالى

طلعت سهام / ايووة
-احمد / بنروح بى سماح
– سهام ? / خاطرى نعرف انتو علاش جبتونا اصلا

تلفت ماشى للصاله / حتى انتى وتى روحك.. اكيدة معاد جايك

وشرين باب الحوش

-احمد / مش قلتلك

وبالفعل فتحت سهام الباب لقت معاد وخالتها خديجه فم الباب

سلمت عليهم ودخلتهم …

-خديجه / انت هنايا وانا من بكرى انراجى فيك

واتصلو بي اختهم روقيه وخبروها بي جيه خالتهم

_____________________________________

.
فى سيارة ايوب

ايوب يتكلم فى التليفون / المهم كلمتوهم الزوز

وسكت شوى واسترسل/ باهى باهى ربي يعاونكم

وسكر المكالمه …

ضرب رجل موسى / هااى نحن هنا
-تلفتله / نشبح فيك

-ايوب / امالا خيرك ساكت من لما طلعنا
-زكريا يضحك / يشوف فيك كيف فرحان

-ايوب / غير بجد نتكلم
-زكريا / شاف ست الحسن والجمال

-ايوب / منو قصدك
-زكريا / كنزى هانم

-ايوب / متقوليش حتى هيا فى نفس المدرسه اللى فيها روقيه
-زكريا / شفت الدنيا مصغرها

-ايوب تلفت لى موسى / وخيرك ضاربك سهم الله
-موسى متلفت للروشن / مافى شى
-ايوب / باهى براحتك

وقام تليفونه ضرب رقم حمزة وعطاه موعد فى مكتبه بعد ربع ساعه

___________________________________

.
روقيه مروحه من المدرسه ومش حاسه بنفسها

بطير من الفرح

معقولة فجأة وبدون سابق اندار تلاقي ايوب قدامها

وصلت للحوش …فتحت الباب وخشت ..زادت فرحتها لقت قدامها خالتها وولاد خالتها عندهم

-روقية / اهلين يا خالتى .. آنستينا
-خديجه / الله ايآنسك يارقيه شنحالك
-روقيه / الحمدلله يا خالتى ..خشيتى لى بوي
-خديجه / توووة بس كيف طلعت من جنبه … ونستادنوك فى خواتك عاد خلى ايروحو لحياشهم ..تعودنا عليهم والله الحوش منغيرهم امظلم
-روقيه فرحانه / شكله يوم سعدى اليوم …هدا ثانى خبر نسمعه قنين
-خديجه / ربي يسمعك غير الاخبار الحلوة يا غاليه

وتلفتت لكناينها / هيا شنو واتيات
-الزوز ضحكو / هيا

خشو كلهم سلمو على عمك ابراهيم وطلعو …
سقدتهم روقيه وخشت

_____________________________________

بعد الضهر …

ايوب وصحابه خشو للمكتب…..

قعمزو عالمكتب …. شوى وخش حمزة

-حمزة / السلام عليكم
وقف ايوب خداه بالاحضان / يا اهلين بالناس الباهيهى

-حمزة مستغرب/ اهلا بيك ايوب …
وتلفت للشباب/ شن حالكم يا جماعه
-ردو عليه / الحمد لله

قعمز ايوب على مكتبه / كانا نقصدك فى حاجه عجبتنى
..تعطيهالى ولا تردنى
-حمزة / انت يا ايوب نعطيك عيونى
-ايوب / يسلمو عيونك

وتلفت لى موسى/ ترا جيب الساكوات الزوز اللى فى الدولاب اللى جنبك
وقف موسى جاب زوز ساكوات وحطهم عالطاولة قدام حمزة

-حمزة مستغرب / هادو شنو
-ايوب / صلى عالنبى
-حمزة / عليه الصلاة والسلام

-ايوب / زيد صلى مرة ثانيه
-حمزة / عليه الف صلاة وسلام

-ايوب / البنيه باعتنا الارض …او بالاحرى هيا وافقت اتبيع
-حمزة فرح / باهى الحمدلله

-ايوب / لكن انا تبى الحق ..مشيت للارض وشوفتها ..
….عجبتنى
-حمزة / كيف يعنى
-ايوب / يعنى نبيها… هدا بعد موافقتك طبعا
-حمزة تفاجأ بيه وحسه طمع فالارض/ لكن انا

-ايوب/ توة قلنالك صلى عالنبي وصليت
-حمزة / عليه الصلاة والسلام

-ايوب / اسمعنى للاخيرر
-حمزة متكنطى / سامعك قول.

-ايوب / ارض البنت بي سبعين وبتعطينا احنا 35 هادو مع بعضهم 105
-حمزة / صح

-ايوب / انا بنعطيك فيها 140 وتسيبهالى

-حمزة?/ كيف
-ايوب / ومزال …حتى ارضك بنشريها…قداش عاطيينك فيها

-حمزة/ عطونى 180 الف
-ايوب / وانا شريتها بي 220

-حمزة فرحان/ وانا بعت
-ايوب / يعنى توة قداش ليك عندى

-حمزة / 220 و140 يعنى 360 الف
-موسى يضحك / فيسع حسبتهم

-حمزة / ومنو مايعرفش يحسب الفلوس
-زكريا جايب فناجين القهوة / فالح يا حمزاوى

-حمزة يضحك / وامتى بتعطونى الفلوس
-ايوب / تستغبى يا حمزة.. اهما من بكرى جابهملك موسى

-حمزة / تم الكلام ..وامتى تبو انسجلكم
-ايوب / غدوة زى اليوم ايجيك زكريا وتمشى انت وياه اتسجلهاله

-زكريا / ماشالله راضى علينا
ايوب يضحك ..وتلفت لى حمزة/ والبنت باعتلى لكن مخليهالهم توة ..لا عاد تمشيلها ولا تجى على حالها
-حمزة/ لا لا وانا شن عندى قداها ..

وقام الساكوات / هيااا بسلامتكم
-زكريا / غدوة نجيك الساعه عشرة نلقاك واتى
-حمزة / نصلى الفجر ونلبس ونقعمز فى الصالة انراجيك… وانت امتى ماتبى تعالة

قعدو يضحكو الثلاثه…وسقدوه …وطلع

ايوب تلفت لى موسى / تليفونك من بكرى ايضوى راهو
-موسى انتبهله / اهاا

وقامه شاف لقاها كنزى تتصل …وحطه فى جيبه

_____________________________________

.

بنات اللى فى صفحة الولد امس نبهتكم ولقيتكم معلقيله وكاتبين تم …انتو تعرفو ان فى صفحتى لازم انزل منشور نكتب فيه الحلقه فى التعليقات
ايه انتو اللى زهور جمال الدين ماتنزلكمش فى الحلقه فى التعليقات انتو المقصودات هادكه ولد يضحك عليكم ويلمد فى صور صغاركم من ايميلاتكم انتبهو وردو بالكم منه حرايمى ومريض ..
زبطو روحكم توة ..انتو الفئه الل نحكى عليها …شوفو الاكاونت ماتلقوش الحلقه فى التعليقات …اسمى ايميلى زهور جمال الدين الدين ردو بالكم …هوا حمار وعبيط ينسخ فى الحلقه منغير حتى مايقراها الحرايمى

____________________________________________

قيس العصر ….

روقيه كملت غسل الماعين بعد ماعطت الغدى لى بوها ومرام

طلعت للصاله تسمع فى تليفونها ايشرين …مشت تجرى حست انه ايوب

وبالفعل لقاته رقم ايوب ….
خشت لى دار امها …..وقعزت عالسرير …وردت

-روقيه بنعومه / الووو
-ايوب / واخيرا حصلت عليك …هدا اجمل يوم فى حياتى

-روقيه سعيدة/ كيف الحال
-ايوب / حالى باهى مدام لقيتك

-روقيه / كيف حال اهلك وعويلتك
– ايوب / توة معقولة بنقعدو نتكلمو هكى بالرسميات

-روقيه / مفهمتش قصدك …. علاش شن تبى اتقول
-ايوب / نبى نقولك انك خديتى عقلى من يوم تلاقينا.. نبى نقولك انك طلعتى ورفعتى قلبي معاك

وهيا ساكته تسمع فيه وسعيدة ومش قادرة اترد

-ايوب / خيرك ساكته …لو الكلام اللى نقول فيه يزعجك نسكت…لو انك متزوجه او مرتبطه نقدر ضرفك
-روقيه بهدوء وحشمه / لااا مش هكى قصدى

-ايوب / انتى مرتبطه
-روقيه / لا

-ايوب / انا نحبك ونتمناك تكونى زوجتى اليوم قبل غدوة
-روقيه تلخبطت / ااه

-ايوب / قلتلك نحبك من اول يوم شفتك فيه ..شنو اول يوم ..قولى من اول لحظه
-روقيه / انااااا

-ايوب / لو فى قبول منك ما ادسيش مشاعرك ..ولو مفيش قبول قولى
-روقيه / لا مش هكى لكن انت تدوى بسرعه لخبطنى

-ايوب / خشيت فيك زى الحادث
-روقيه / واحلى حادث

-ايوب / ماشالله صار حتى انتى تعرفى تعاكسى
-روقيه تضحك / عينك …شنو تحسابنى نعاكس فيك

-ايوب / ايوووه هكى نبيك …ارخى نفسك معاى شوى واضحكى
-روقيه/ حاضر
-ايوب / قتلك

-روقيه / نعم
-ايوب / نبى رقم بوك
-روقيه فرحت / نقترح عليك اقتراح

-ايوب / اقترحى هي
-روقيه / شن رايك نتعرفو على بعضنا ايامات او اسابيع بلكى مانعجبوش بعض ..وبالرغم انى كنت ديما مترددة فى حكايه التعارف عندى ضروف خاصه فى الحوش

-ايوب / صار عندى حظ ماترددتيش معاى …اسمعى بالنسبه ليا انا معجب بيك منغير تعارف وحاسم امرى …قتلك ليا عامين اندور فيك .. وبالنسبه لى ضروفك بالتفاهم نتغلبو عليها

-روقيه مبتسمه / باهى
-ايوب / هيا تعرفى هى …واحكى
-روقيه / سن تبينى نقول

-ايوب / اهو تو نقول انا …انا اسمى ايوب العارف .. بوى متوفى …وامى تزوجت وعندى خوت منها …وانا عشت مع حناى ام بوى هيا اللى ربتنى
-روقيه / بالجودة بيك وبيها

وقعدو مستمرين فى الحديث قريب ساعه خاطر بوها واختها مرام راقدين

___________________________________

.
فى المغرب ……

زكريا وموسى مقعمزين فى قهوة ..

شرين تليفون زكريا …رقم غريب …رد عليه

-زكريا / الووو
-كنزى / مساء الخيرر…انا كنزى

-زكريا شاور لى موسى حرك شفايفه / كنزى

اشرله موسى يفتح المايك ..وفتحه زكريا

-كنزى / الووو
-زكريا / اهلا بيك اختى

-كنزى / نبى نسألك على موسى ..طول اليوم نتصل بيه تليفونه ميردش بالرغم مرتين خشيت عليه انتظار

اشرله موسى بمعنى انا مهناش

-زكريا / طول اليوم ماشفتاش …وتليفونه ناسيه فى الحوش
-كنزى صوتها انخنق/ وكيف عرفت تليفونه فى الحوش لو كنت ماشفتاش اليوم

-زكريا / ماهو كلمته بكرى ورد عليا خوه قالى ان موسى ناسى تليفونه فى الحوش
-كنزى/ بس موسى ماعنداش خوت اولاد

-زكريا / قصدى اخته غير تلخبطت
-كنزى صوته مغصوص وبتبكى/ بالله عليك اول ماتشوفه قوله كنزى ادور فيك

-زكريا / حاضر

وانهو المكالمه

-تلفت لى موسى / خيرك ماتردش عالبنت
-موسى / خليها اتشوف حالها…انا ماننفعهاش
-زكريا متفاجأ/ معقولة !!!… مش مصدق اودانى …معقولةةانت بتسيب صاحبتك

-موسى متأثر / البنت صغيرة وانا ناوى الحلال…وبوها والله مايعطيهالى كان نجيبله ليبيا كلها جبهيه
-زكريا / تبى الحق من ناحيه صغيرة فهيا صغيرة …فرق العمر واضح مابيناتكم

-موسى / هوا هدا اللى لاحظته حتى انا
-زكريا / لكن هلبا يتزوجو هكى وتمشى حياتهم عادى ..

-موسى تلفتله / تعرف قداش فرق العمر بينى وبينها
-زكريا / قداش
-موسى / 19 سنه

-زكريا / تصدق خالى ومرت خالى فرق العمر بينهم 19 سنه …ومتزوجين علاقه … وامورهم تمام

-موسى / انا مانبيش نظلمها
-زكريا / سامحنى فى هالكلمه …انت عارف فرق العمر اللى بينك وبينها من اول يوم …ومع هدا خليتها تتعلق بيك

-زكريا / الخيال مش زى الواقع …لما شفتها قدامى انصدمت فى الجمال والبراءة وفرق العمر

وشرين تليفونه جاتة رساله من كنزى

قراها” حبيبى قلبي يغلى عليك …طمنى حتى برساله بس ”

سكر تليفونه ورده لى جيبه وهوا متأثر هلبا

_____________________________________

وفاتو ثلاثه ايام

موسى يتعدب …وكنزى قريب تهبل

وايوب عايش فى العسل ….بدو المكالمات بينه وبين روقيه كل ليله للساعه 2
تقعد فى دار امها تتكلم معاه …وبعد ماتسكر تمشى لمكانها اللى فى دار بوها وترقد …

فى الليل يهدرزو فى التليفون

-ايوب / هيااا توة اعترفى ليش قعدتى داسه تيشيرتى ومالوحتيشى
-روقيه / خلاص عاااد ايوب …قلتلك حتى انا قعد نراجى انك ادورنى

-ايوب / نبى الحشمه هادى تتنحى منك ..ونبيك تتكلمى براحتك …حاس ان الشعور متبادل بينا
-روقيه / اكيد زى ما قعدت انا فى بالك ..حتى انت قعدت فى بالى

-ايوب / تحبينى
-روقيه / ايه

-ايوب / لا قوليها بي فمك
-غمضت عيونها / انحبك

-ايوب / وانا نموووون فيك يا كل حياتى ….الاسبوع الجاى نبى نجيبلك حناى وامى
-روقيه تضحك / حيلك حيلك …على طول هكى

-ايوب / عامين وانا نراجى وندور تبينى نفقدك مرة ثانيه …من توة ردى عليا موافقه والا لا
-روقيه / موافقه ومش موافقه

-ايوب حاير/ كيف هادى
-روقيه / منكدبش ..انا نبيك .. وحتى انا زيك سنتين انراجى فيك …لكن ضروفى فى الحوش

-ايوب / حبيبتى انتى ..وروحى وعيونى.. الجملة اللى قلتيها هادى سادتنى …ولو الف ضرف فى حوشكم حنتغلب عليهم ونربح بيك

روقيه فرحانه بكل كلمه ايقوللها فيها

______________________________________

تمت….ويتبع

غدوة انشوفو روقيه حترخى شوى وتوافق على ايوب ..ولا حتصده زى ماصدت غيره والسبب حنيتها على بوها

نحبكم ❤