رواية اكحيلة

#اكحيلة

??للكاتبه زهور جمال الدين ??

??الحلقة التاسعه??

سيرين صاحبتها حياة بايته عندها …جايبيين قهوة فى الدار ويهدرزو

-سيرين : قلتلك انا بنمشى يعنى بنمشى ..بتجى معاى مرحبتين ..بتخلينى بروحى والله ماعاد مكلماتك
-حياة: انا مفمتش شن قصه الخفة اللى انتى فيها يابنت
-سيرين: هادى مش خفه ..هادى جراءة ..امالا كيف بنلفت انتباهه ونخليه يشوفنى
-حياة: هادى مش جراءة ..هادى اسمها خفه يا سيرين..هوا الشاب يجرى وراك ويبي يقابلك ويالله ترضى ..فمابالك تمشيله لحد عنده
-سيرين : انتى مسمعتيش اللى هدرزتهولك ولا شنو..قلتلك مضروب وقريب مات
-حياة: ولو .. انتى ماتعرفيشى ولا عندك دوة معاه ..معقولة اول مابتتواصلى معاه تمشيله فى حوشه ..مفكرتيش انه بيهزا عليك
-سيري: بتمشى معاى ولا مش ماشيه
-حياة: يعنى اللى خرفته كله ماسمعتيش منه حتى كلمه
-سيرين : جاوبينى بتوقفى معاى ولا بتخلينى
-حياة: انتى تعرفينى مستحيل نخليك
-سيرين : امالا نوضى وتى روحك هيا ..نمشو الصبح عالاقل اكيدة ماعندهم حد
-حياة: اهو بنسايرك ونشوفك لوين بتوصلى
وناضو يوتو فى روحهم بيطلعو بيمشو لحوش اكحيلة يشبحوه
______________________________

المرزوقى وصل قدام الحوش
-سليمان : انتو وين
-المرزوقى: احنا قدام الحوش …
-سليمان : خلاص اركبو من الباب الخلفى
-المرزوقى : تم
وتلفت لملاك .. سيدى اكحيلة يبينى نركبكم فوق طول للدور الثانى
-ملاك : عادى وين مايبي
-المرزوقى : تمام توة بنخشو من الباب ونركبو من الدروج الخلفيات
-سليمه : انا خلونى هنايا فالسيارة انراجيك لين تطلعى
-المرزوقى : لااا اختى .. الا هادى
-ملاك : كيف بتقعدى فالشارع يا سليمه ..وكانا يشبحك حد
-سليمه : السيارة مظلمه من الجناب..ومن بيشوفنى
-المرزوقى : لااا اختى انزلى واقعدى فوق معززة مكرمه فى مكتب سيدى اكحيلة ..ولما تبو تروحو نوصلكم انا بنفسى
-ملاك : اصلا كانك مش نازلة حتى انا مش حننزل
-سليمه تضحك : ايه صدقتك ..انزلى هى تو ننزل معاك
-المرزوقى : خلى نتاكد من البوابه مافيها حد معروف ونجيكم هى
ونزل المرزوقى ولقى ثلاث شباب متع الحراسة واقفين فالبوابة ..حياهم .. وطلع للسيارة قاللهم انزلو ..
ونزلو سليمه وملاك من السيارة وخشو للبوابة للباب الخلفى طول …
ملاك لابسه سروال امريكانى اسود وجاكيت شتوى طويل لركبه ووشاح وحاطه شنطه على كتفها
لقو باب خشو منه قدامه دروج يركب للدور الثانى
ركبو من الدروج خشو زى ممر صغير قدامه باب …انفتح الباب لقو اكحيلة واقف .. رابطيله يده اليمين اللى جهه العمليه فوق واليد الثانية ايحرك فيها عادى …
وقفت ملاك ..شبحتله .. ابتسمت
-سليمان: اهلين
-ملاك واطت راسها تحشمت من سليمه والمرزوقى : اهلا بيك والحمدالله على سلامتك
-سليمان تلفت لسليمه : اهلا سليمه انستينا
-سليمه : الله ايآنسك يا وليدى والحمدلله على سلامتك …
مد اكحيلة يده وخدى ملاك من ايدها : تعالى
وتلفت للمرزوقى : دخل سليمه لمكتبى وجيبلها فطور
-المرزوقى : حاضر…
وتلفت لسليمه : تفضلى اختى
-اكحيلة رافع ملاك من يده : يعنى الا درتى اللى فى راسك وجبتيها شاويش سليمه ??

______________________________

سليمان خدى ملاك من يدها ورفعها لداره
فتح الباب ..خشو وسكر الباب وراه
داره 4×6.. فيها سرير زوجى ودولاب كبير على يسار السرير وشكماجه بالمرايه على يمين السرير
ومقابلها صالون فخم كنبه وزوز كراسى وطاولة
-ملاك بدت تصفق مع بعضها : حبيبي مش كانا قعدنا فالمكتب خير
-سليمان : لا لا هنايا استر .. تعالى قعمزى عالصالون ..
ويضحك : شنو خايفه منى انا نصى مربط
قعمزها عالكنبه وقعمز جنبها ولفتها ليه …
-ملاك : خوفتنى عليك
-سليمان : هلبا
-ملاك : فوق ماتتصور
وحطت يدها على يده : انا خلاص بدت حاسة انك زى نفسى
-سليمان قام يدها وباسها : احنا واحد ياعمرى
-ملاك واطت راسها : منبيش تقول عليا نكدية .. وعارفه كلام مش وقته بس منقدرش منقولاش ليك
-سليمان : قولى ومتخليش حاجه فى خاطرك
-ملاك : انت منو
-سليمان يضحك : انا سليمان
-ملاك : عارفتك سليمان .. شنو تخدم ..وليش يبو يقتلوك ..هادى ثانى مرة من لما تعرفت عليك
-سليمان : انا زى ماحكيتلك عطار
-ملاك : عطار يهدى استراحة .. فى ليبيا اللى عنده استراحة مع حوشه يعتبر نفسه من اصحاب الاملاك ..انت الاستراحة زايدة عندك وتهدى فيها ..معناها انت من اصحاب شنو
-وقف سليمان مشى خطوتين وتلفتلها : انا ملِك البلاد هادى كلها ..والمُلك لله
-ملاك : انت تخدم مع القدافى
-سليمان : لا ..ولا ليا علاقه بالبلاد ولا بالسياسه
-ملاك : امالا منين ليك مِلك البلاد
-سليمان : انا ملكها اقتصاديا ..انا الطفل المدلل للديتات والقناقن فيها
-ملاك :وهدا كله دايرهولك شغل العطرية
-سليمان : بالزبط ..شنو انتى هازية عليها العطارة
-ملاك : شنو تحسابنى عيلة صغيرة
-سليمان مبتسم : طبعا عيلة صغيرة بندللها ونلعبها ونعيشها ملكه
ملاك : سليمان انت تبى تتزوجنى
-سليمان : طبعا ناوى معاك الحلال ونبيك اليوم قبل غدوة
-ملاك : خلاص امالا اتقولى حقيقتك وتخلينى نقرر نرتبط بيك والا لا
-سليمان قرب منها ومبتسم : واللهِ.. صار قاعدة بتفكرى وبتقررى تاخدينى والا لا
-ملاك : ماهو يا حبيبي انت متبيش تصارحنى
-سليمان يضحك : منها بنفكر ناخدك والا لا ..ومنها يا حبيبي ..معش فهمناك
-ملاك : اكحيلةة.. انت عارفنى نبيك ونحبك
-سليمان : الله الله محلااااه اسم اكحيلة من فمك ..اول مرة تنادينى بيه
-ملاك : شوف نقولك حاجه .. انا اتفاقى معاك وحبي ليك على اساس انك عطار .. صدقنى لو اكتشفت موضوع ثانى مش حتلاقى ملاك اللى تعرفها
..حتلاقى ملاك ثانية
-اكحيلة واطى وجهه وحطه قدام وجهها لانه اطول منها ويضحك : انتى تهددى فيا
-ملاك خايفه : افهمها زى مايعجبك
-سليمان : هادى هيا حمدالله عالسلامه وانشالله لاباس ..
وطق باب الدار …
-سليمان : شكون
-المخزوم : الفطور ياسيدى
-سليمان : هاته
وخش المخزوم وابتسم لملاك : صباح الخير
ملاك سكتت
حط الفطور عالطاولة وطلع
-ملاك : محسيتهمش مستغربين فيا ولا …زى متعودين
-سليمان : متعودين عينك ..
ومسك يدها : انا قلتلهم ست البيت هدا بتجى اليوم وحتشوفوها
-ملاك فرحت من التعبير: حيه عليا لمن قلت
-سليمان : قلت للمرزوقى والمخزوم … ولو خوى وحيد موجود كنت قلتله غير بايت برة
-ملاك: خوك لا عاد نتحشم ..شن بيقول عليا يلقانى جاياتك لحوشكم
-سليمان : يفرحلى ويقولى ربي يهنيك بيها
-ملاك : عند علم
-سليمان : بشنو
-ملاك : انى نحبك هلبا
-قرب منها سليمان : وانا والله نموووت فيك ..وقصه تكونى لغيري هادى حوليها من بالك
-ملاك : ننتحر قبل مانكون لغيرك
-سليمان : قعمزى نفطرو
-ملاك : لا منبيش نعطل خلى نمشى
-سليمان : انا مريض وليا ايام ماكليتش كان نهون عليك تخلينى هكى بري
-ملاك : ياحليلى الحلفة هيا الاولى ..ميه مرة نقولك معش تحلف
-سليمان : يعنى بتفطرى معاى
-ملاك : امالا بنخليك اتصيم ثلاثه ايام بعد حلفت
-سليمان يضحك: وتقولى بنفكر ناخدك ولا لا ..تى نقتله اللى بيفكر يقرب منك
-ملاك : غير هيا نفطرك بسرعه خلى نمشى
-سليمان : راهو بتوكلينى انتى
-ملاك : باهى يا همى غير ماتاكلش صبعى
-سليمان يضحك : لا لا متخافيش .. انا عندى نيه ناكلك كلك مش غير صبعك بس
-ملاك تضحك وواخدة الخبزة تبى توكله : بيش نبدو …دحى ولا جبنه ولا زيتون
-اكحيلة: هدا كله ليك انت ..انا نفطر فى خبزة وزيت زيتون وطاسه شاهى كل صبح
-ملاك تضحك : وووك عليا كان نفطر زيت الزيتون عالصبح اندوخ
-اكحيلة: شنو زى انا زى انتى

وقعدو يفطرو فى بعضهم

______________________________

سليمه فالمكتب جابولها فطور
لكن مامست منه شى ..خايفه على ملاك ماتبيهاش تعطل ..
خدت فنجان القهوة وقعدت تشرب فيه ناضت وقفت تتمشى فالمكتب وقفت عالروشن تتفرج …
جنانهم كبير هلبا .. والبوابة بعيد …
تشرب فالقوة وتخمم وتشبح فالبوابة انفتحت زوز بنات يكلمو فالشاب اللى واقف ..
الباين عليه قاللهم راجو هنايا شوى …
هما قعدو واقفات والشاب جى جهه الحوش
خشت البنت هيا وصاحبتها للجنان …
لما قربت شوى قعدت سليمه ادقق تلقاها سيرين
رعشت مع بعضها وحطت الفنجان عالمكتب
ومشت جهه الباب فتحاته وطلعت للممر
-سليمه : مرزوقى …يا مرزوقى
مفيش حد يرد …
عمك سعيد بو سليمان مقعمز فى داره عالصالون
يسمع فى صوت مراءة تنادى عالمرزوقى ..
الصوت مش غريب عليه…
ناض من مكانه …فتح باب غرفته وطلع
وقف فالممر يلقى سليمه مقابلاته
-سعيد : سليمه
-سليمه : سيدى سعيد
-سعيد مستغرب : انتى شن اديري هنايا ياسليمه
-سليمه انخلعت: انا نخدم فى عيادة وباعتنى الدكتور انا وممرضه لواحد اهنايا مريض اسمه سليمان
-سعيد : سليمان ولدى
-سليمه قريب طاحت: انشالله هوا سليمان ولدك انت
-سعيد قرب منها : وين فضيلة يا سليمه
-سليمه: وانا وين نعلم عليها يا سيدى سعيد
-سعيد : انا متاكد منك عارفتها وين ..دلينى على مكانها ضرورى
-سليمه : ياسيدى سعيد الولد مات وانتو تفرقتو وشن مزال تبى فيها
-سعيد : الولد ماماتش ..وحيد قاعد حى
-سليمه : من وحيد ?
-سعيد : وحيد ولد فضيله
-سليمه : مش قلتولها ولدك مات
-سعيد : انا ماقلتش ..خوها صالح هوا اللى قاللها
-سليمه : انا جيتك ليلتها يا سيدى ..بعتتنى لالتى عفاف وانت قلت اللى قاله صالح هوا هداكه
-سعيد : نبى نفضها مع خوتها فى وقتها .. ومشت هيا فالرجلين ..لكن بفمى ماقلتش ولدى مات ..قلت اللى قاله صالح هوا هداكه
-سليمه مكمشه ايديها الزوز فى يعضهم قدام فمها: حيه عالعملة …ليه عليكم تفرقو ضنى من امه
-سعيد : انا ماتلومش عليا…تلوم على خوتها ..وعلى قد مادورت عليها مالقيتش من يدلنى
-سليمه : تو انت كايد تلقاها يا سيدى سعيد وانت عروقك واصلات فى ليبيا كلها
-سعيد : اعروقى وصلو كل مكان ..الا المكان اللى فيه فضيلة لا السمى قالت ريته ولا الوطا قالت ريته …وبعتالى قالولى تزوجت ودارت صغار ..قلت ربي يهنيها
-سليمه : لكن هدا ضناها وقاعد حى كيف تقولولها مات
-سعيد : ياستى على ايديك انحجو
ركب المرزوقى .. شبح لسليمه يبي يفهم شن قالت لسعيد ..انه هما منو
-سليمه : لو سمحت نادى الممرضه خلود من داخل
-المرزوقى: باهى
مشى سعيد بيخش لداره ….جاب كرت ورجع لسليمه
-سعيد : اهما ارقامى كلهم
-سليمه : اعطينى يومين لانها فى بنغازى مش هنايا
-سعيد : وانا نراجى فيك
ومدلها كرت ثانى: اكتبيلى رقمك
كتبتله سليمه رقمها وحطه فى جيبه وخش داره

_____________________________

المرزوقى وقف قدام باب دار اكحيلة وطقطق

-اكحيلة: شكون …افتح الباب
-فتح المرزوقى الباب : عندك ضيوف ياسيدى
-اكحيلة: منهما ..
-المرزوقى تلخبط : منعرقهمش ضيوف برانيه
-اكحيلة : دخلتوهم
-المرزوقى : قاعدين فالجنان
جت سليمه : دخلهم يا مرزوقى مانبوهمش يشوفونا
-ملاك : شنو هما يعرفونا يا سليمه
-سليمه : سيرين وصاحبتها حياة
-اكحيلة: منو سيرين
-ملاك : سيرين !!!… وسيرين شن جاية ادير هنايا
وتلفتت لاكحيله : انت تعرفهم ياسليمان
-اكحيلة: لا منعرفهاش ولا عمرى سمعت بيها
-ملاك : زعما لاحقتنا
-سليمه متكنطيه : وين نعلم انا …
وتلفتت لملاك : قلتلك هيا
ملاك استغربت فيها خيرها ..
-سليمان : ما ادخلهمش الضيوف …انا لا نعرف سيرين ولا غير سيرين
-سليمه : لا خلى يخشو بيش نطلعو احنا من الجنان منغير مايشوفونا
-ملاك غارت وتلفتت لاكحيلة : بتقابلهم ؟
-اكحيلة : اكيد لا …
وتلفت للمرزوقى : دخلهم ..بيش تطلع ملاك ..وبعتالى قوللهم انى مش موجود
-المرزوقى : تم …خلى ندخلهم وانجيكم
نزل المرزوقى من الدروج
-سليمه : هوا خوك وحيد كم عمره
-اكحيلة : عمره 25 سنه …علاش تسألى ؟؟
-سليمه وجهها تغير : لا شى غير نشدتك
وتلفتت لملاك : انا واقفه فى نهايه الممر سقدى روحك
مشت لنهايه الممر ….
وسكر اكحيلة الباب …
-ملاك : افتح يا مجنون خلى نطلع
-اكحيلة : بنستاحشك
-ملاك : وانا بنستاحشك اكثر
-اكحيلة : عندى نيه نحضنك
-ملاك : حتى انا
وقام يده اليسار قامها فووق حضنها ..وغمض عيونه ..وهيا علقت ايديها فى رقبته وقعدت حاضناته وهيا ساكته
قعدو لحظات … وبعتالى نزلها
-اكحيلة: ردى بالك اتغيبي عليا
-ملاك : مستحيل
-اكحيلة: نحبك
-ملاك : وانا اكثر
-ملاك : بتقابلهم
-احكيله يضحك : قلتلك لاااا ياغيور
-ملاك تضحك: مش من حقى نغير
-احكيلة: انتى اللى من حقك كل شى
-ملاك : غير كانا نفهم بس ليش جاياتك
-سليمان : كانا فهمتى خبرينى
ملاك شبحتله وضحكت
وفتحو الباب وطلعو هوا وياها لنهاية الممر لقو سليمه والمرزوقى واقفين يراجو
فتحو الباب نزل المرزوقى ووراه سليمهة
وسليمان شاد يد ملاك : امتى بتجينى المرة الجايه
-ملاك : مش عارفه خليها عالظروف
ونزلت وسليمان واقف يشبحلها لين كملت الدروج وتسكر الباب
وطلعو من الجنان بسرعه ..غطو وجوههم بالوشحات وركبو سيارة المرزوقى …وصلهم للمكان من وين ماخداهم ..نزلو من سيارته وركبو سيارتهم
ولعت ملاك السيارة وتلفتت لسليمه : خيرك
-سليمه : خلى نوصلو للحوش وبعتالى ساهل

اما سيرين جابولها عصير شرباته هيا وصاحبتها وبعتالى قالولها احكيلة بيعطل فالغيادة
-سيرين : مش قلتولى فوق وبينزل
-الشاب: احنا قلنالك تفضلى ماقلنالكش انه موجود
-سيرين : باهى وتوة كيف
-الشاب : لو تقدرى تراجيه للساعه 5 العصر عادى
-سيرين : عليك حظ
وتلفتت للشاب: خلاص امالا تو نرجعله وقت ثانى
وطلعت هيا وصاحبتها حياة وروحو للحوش

_____________________________

نقفلو الحلقه ونقولو تمت ولا نزيدو شويا ..

هيا خلى نزيدلكم شويا حتى الليله ????

خشت ملاك وسليمه للحوش …
-ملاك : غير قوليلى خيرك
-سليمه: انتى وين حاطه رجلك يا ملاك
-ملاك : خيرك مفهمتش
-سليمه : انتى عارفه هادو تجار شنو
– ملاك : تجار عطارة واعشاب
-سليمه : تى هادو تجار مخدرات
ملاك انصدمت اتجى مقعمزة عالسرير : شن تقولى انتى وكيف تقوليهالى هكى مرة وحدة
-سليمه : امالا شنو تبينى انجاملك وانجزئهالك .. بوه سعيد ميلاد اكبر راس فى توريد المخدرات لليبيا
-ملاك : وانتى كيف عرفتى ومنو اللى قالك
-سليمه تلخبطت : اللى قالى قالى ..المهم انا متاكدة
شرين تليفون ملاك …سليمان يتصل
-ردت عليه : الو
-سليمان : وصلتى حبيبي
-ملاك مصدومه وصوتها هارب : وصلت ايه
-سليمان : باهى حمدالله على سلامتك
-ملاك : نبى نشوفك
-سليمان : بالرغم توة كنا مع بعض بس حتى انا خاطرى نشوفك ثانى
-ملاك : نحكى جد ..نقدر نشوفك العشية
-سليمان : خيره صوتك متغير فى حاجه
-ملاك : نقدرو نتلاقو
-سليمان : العشيه نخاف نعطيك موعد ويجونى ناس يشدونى انتى عارفه الناس قاعدة تجينى عالضربة ..غدوة الصبح نتلاقو شن رايك تعالى هنايا
-ملاك : لا نمشو للاستراحة متعك اللى عطيتهالى
-سليمان : خلاص تمام غدوة نبعتلك المرزوقى يجيبك غادى
بس طمنينى فى حاجه
-ملاك : لما نشبحك تو نقولك …سلام توة
-سليمان حاير : سلام
وسكرو الخط ..

________________________

ملاك طول حطت راسها فالسرير يانارى وبدت تبكىى
-سليمه : يا ملاك نقولك الكلام اللى يبيكيك .. خير مانقولك الكلام اللى يضحكك ونضحك عليك
-ملاك : انتى متاكدة يا سليمه
-سليمه : الولد مانعرفاش ..لكن بوه سعيد ميلاد نعرفه وعززز المعرفه
-ملاك تبكى : وانتى منين تعرفيه ..ومنين تعرفى تجار المخدرات انتى
-سليمه : قصه طويلة يا ملاك …غير اعطينى رقم خالتك فضيله
-ملاك مستغربه : خالتى فضيله ..وشن بديري بيه رقمها
-سليمه : خيرك بديتى تنشدى هلبا انتى
-ملاك خدت تليفونها وطلعاته : اهوا
خدت سليمه تليفونها وكتبت الرقم
ملاك خافت ان سليمه تسألها ادا كانت ملاك جتكم وتقوللها ما جتناش
ماهو فضيله هادى نفسها بنت خالت عفاف ام ملاك اللى تقوللها ملاك خالتى ..واللى خطفوها يوم كانت ماشيتلها لبنغازى
وبالفعل اتصلت سليمه بابرقم طلبت فضيلة فردت عليها بنتها
-ايناس: ماما معديه للعمل وناسية تاليفونها العشيه تلقيها فالحوش
-سليمه : باهى تو نكلمها بعتالى
-ايناس : منو نقوللها
-سليمه : قوليلها كلماتك سليمه تو هيا تزبطنى
-ايناس: سليمه اللى عايشه مع ملاك
-سليمه : ايه بالزبط
-ايناس: كيف حالها ملاك وشخبارها ليها وحشه
-سليمه : تستاحشك العافيه اخبارها تمام …خلاص امالا تو نكلمها بعتالى امك
وسكرو الخط

وملاك شادتها دموع وبكى
-ملاك : معقولة يا سليمه رميتيهالى هكى زى القنبلة الكلمه…مخدرات
-سليمه : لا تو نقولك مخدرات بالسامينسة …ماهو نقولك كلمه الحق تبكى مشوار وتنسى

___________________________

العشيه مجتمعين اكحيله وبوه وسلطان والجدر ..ومعاهم وحيد
-وحيد : تى اقسم بالله مانى ساكت
-سلطان : يا وحيد الحلف قدام التريس الكبار عيب راهو
-وحيد : كانا مات احكيلة بيسدو عليا التريس الكبار
-سعيد : وحيد مش هكى الكلام
-الجدر : خلوه يقول اللى يبيه
-سعيد : امسحها فيا يا ابراهيم
-وحيد : شنهيا اللى بيمسحها فيك يا بوى .. انا ماقلتش عيب يا عم ابراهيم …بالنسبه للى دار العملة فى خوى سليمان ميت ميت ..حتى لو كان سلطان صاحبه اهوا …والله مانى راحم واحد
-اكحيلة : كملت يا وحيد
وحيد داهش
-اكحيلة: اللى ضربنى انا عارفه منهوا
سكتو كلهم مندهشين
-وحيد : تعرفه وساكت يا اكحيلة
-سلطان : منهوا
-اكحيلة: تو انا ناخد منه حقى بطريقتى ..ولدلك الموضوع هدا معش ينفتح نهائي
وسكتو كلهم ….

___________________________

بعد المغرب …

اكحيلة يكلم فى ملاك …لقى تليفونها مقفل
قعد يمولج ماعرف كيف يوصلها …
وندم انه ماخداش رقم سليمه ..
وهيا يانارى تموت بالبكى مصدومه …معقولة …سليمان الراجل الشهم يطلع تاجر مخدرات …
سليمه طلعت من الغرفه ومشت للجنان ضربت رقم فضيله …
-سليمه : الو
-فضيله : اهلين سليمه شن حالك وعاش من شافك ومن سمع صوتك
-سليمه : اهلا بيك يا فضيلة ليك وحشه
وقعدو يهدرزو قيس العشرة دقايق يسألو عالحال والاحوال
وبعتالى
-سليمه : قتلك انتى من جنبك توة
-فضيله : جنبى البنات
-سليمه : خشى دارك نبيك بروحك
-فضيله تضحك : دارى شلتها من يوم توفى المرحوم
-سليمه : غير نوضى بروحك الموضوع ضرورى
-فضيلة : حاضر
وخشت دار المسند….
-فضيله : نعم احكى
-سليمه : تدكرى فى سعيد ميلاد
-فضيلة: الله لا يدكره بالخير ..كنه مات
-سليمه : لا مات لا شى هوينا قاعد طوله طول عصاته
-فضيله : امالا شن خطره عليك
-سليمه : والله شن منقولك يا فضيله اليومين اللى فاتو شفت معاه ولده ..عمره زى عمر حميدة ولدك المرحوم
-فضيله : ولدى حميدة الله يرحمه توفى بعد ولادته باسبوعين ..زعما هوا تزوج على طول
-سليمه : هوا ما تزوجش يا فضيله وانا سألت واتأكدت … امالا السؤال ..الولد اللى معاه ولد من
” سليمه خايفه عليها مابتش تجيبهالها مرة وحدة”
-فضيله : انا مش فاهمة عليك راهو
-سليمه : انا لما شفت الولد ويقوله يا بوى وهوا فى عمر ولدك قلت بلكى الولد مامات وخوك صالح كدب عليك
نطت فضيلة وقفت وعلت صوتها : انتى شن يا سليمه
جو ايمان وايناس يجرو : كنك يا ماما شنو فى
-فضيله : اسكتن الزوز خلى نفهم
-وتبكى: يا سليمه عاودى اللى قلتيه اللى يربحك
-سليمه : قلتلك خودى اول طيارة لطرابس وتعالى
-فضيله : وين بنمشى ووين بنعدى ماعندى حد فطرابلس
-سليمه : عندك ولدك يا فضيله
-فضيله : ولدى مات انتى شن تقولى
-سليمه : نقولك انى اليوم تلاقيت مع سعيد ميلاد وقالى هدا ولد فضيله وخوها كدب عليها ..والولد اسمه وحيد مش محمد
طاحت فضيله من طولها داخت
ايناس بنتها تنوض فيها وايمان خدت التليفون
-ايمان : انتى من وشن قلتى لامى كنها
-سليمه : مانخافيش يابنيتى …هيا غير انصدمت بس ..فوقيها وبعتالى قوليلها تعاود تكلمنى نفهمها
وسكرو الخط وهادوكا البنات ايفوقو فى امهم

________________________

فى نفس الوقت فالمغرب
شرين تليفون مريم …
طبعا هيا حافضه كل ارقام اكحيلة عن ظهر قلب
لما شافت الرقم نطت جت واقفه مش مصدقه
جنبها زينب واميرة
-مريم : عن ادنكم
وركبت من الدروج تجرى لشقتها خشت لدارها وسكرت بالمفتاح وتأكدت ان الحمام مافيشى حد وفتحت الخط
-مريم : واخيراً
-اكحيلة : كنت نبيك فى حاجتين فقلت لازم نتصل
-مريم : قول مليون حاجه .. انا اليوم اسعد انسانه فالدنيا .. اول مرة تتصل بيا على رقمى
-اكحيلة : عطينى معاك كلمه خلى ندوى
-مريم : انت تؤمر عليا امر
-اكحيلة : الاولة لازم نشكرك انك انقدتى حياتى
-مريم : انااا
-قص عليها : خلينى ندوى عاد
-مريم : حاضر
-اكحيلة: الثانيه راجلك هوا اللى داير مكيدة قتلى
-مريم : لا خالد ماليشى اى يد
-اكخيلة : كمال
-مريم : ولا كمال ..كمال هوا اللى اتصل بخالد وقاله رد بالك تخش فيه الموضوع هدا …بس لو تحب نعرفلك منو نقدر
-اكحيلة : لا صحيتى انا تو نعرف بطريقتى ..بس حبيت نشكرك وبالمرة نسألك على راجلك بيش مانظلماش
-مريم : حبيبي انا …
-قص عليها : تصبحى على خير
-مريم : استنى
وتسكر الخط ..عودت القت الرقم مقفل

_____________________________

ثانى يوم القايلة اكحيلة مشى للاستراحة بيش يتلاقى مع ملاك
وهيا طبعا بعد روحت من المدرسه صلت ويادوبك قعمزت معاهم بس ماقدرتش تاكل …
وستادنت من كمال بتمشى تحضر دورة انجليزى فقاللها بري
وبالفعل لبست وبتطلع ..كلمت المرزوقى تفاهمت معاه على مكان
-سليمه : ياودى خلينى نمشى معاك
-ملاك : قلتلك لا …بنمشى بروحى
وبالفعل طلعت وصلت المكان درست سيارتها وركبت مع المرزوقى من الخلف …
ومشى بيها للاستراحة

الحلقه الجاية نحكيلكم عالمواجهه اللى بتصير بين ملاك واكحيلة

_____________________________

تمت ….ويتبع

نحبكم هلبا ❤