رواية اكحيلة
#اكحيلة
??للكاتبه زهور جمال الدين ??
الحلقه العاشرة ????
بعد الضهر
سعيد ميلاد فى داره …
قام تليفونه واتصل
-سعيد : الو
-اكحيلة: اهلين يا بوى
-سعيد: ..وين طلعت توة بعتلك المخزوم قالى مهناش
-اكحيلة: عندى شغل مهم طلعتله ..تو نروح بعتالى
-سعيد : لكن انا نبيك فى موضوع ضرورى توة
-اكحيلة: منعطلش عليك انشالله يابوى
-سعيد : باهى انراجى فيك
وسكر الخط …
طق باب الدار
-سعيد : خش شكون ..
-وحيد فتح الباب: صباح الخير يابوى
-سعيد : صباح الخير القايلة حتى الضهر ادن
-وحيد يضحك : شن حالك يابوى
-سعيد : باهى الحمدلله شن حالك انت
-وحيد : حالى باهى غير نبى منك تفتوفه
-سعيد : تفتوفه شنو ..وشن بدير بيها
-وحيد : مدامه ولدك مايبيش نخش فى موضوع ضربته … قلت بيش منديرش حاجه ويزعل منى خلى نسافر مع صحابى بيمشو لشرم الشيخ
-سعيد : شوف خوك تو يعطيك
-وحيد : عالمهم كان سالنى بنقول بعلمك يا حاج
-سعيد : انت امتى ماشى
-وحيد : بعتالى المغرب
-سعيد : ااه المغرب ..لا لا نبيك انا اليوم ماتطلعش
-وحيد : انا توة عطيت كلمه والجماعه حجزولى معاهم
-سعيد: قلنالك نبيك انا اليوم وضرورى تقعد
-وحيد : وشنهيا الحاجه المهمه اللى تبينى نقعد على خاطرها
-سعيد : وحيد يا وليدى والله الموضوع مهم ليك اكثر ماتتصور
-وحيد : شوقتنى نعرف الموضوع يا حاج ..احكيلى خيرك داسه
__________________________
وصلت ملاك للاستراحه فى تاجورا
بوابه كبيرة خشت منها السيارة …لقت زوز اشخاص واقفين
بالرغم مطمنه لاكحيلة لكن جتها رهبة قوية وجسمها بدى يرعش
نزل المرزوقى من السيارة ولف لجهتها فتح الباب
-المرزوقى: تفضلى للا ملاك
-ملاك : سليمان وينه
-المرزوقي : سيدى اكحيله لداخل فالاستراحة
-ملاك : باهى
نزلت من السيارة وخشت للاستراحة
لقت اكحيلة واقف فالصالة يراجى فيها
-اكحيلة جاها بسرعه فاتح ايديه الزوز : حبيبتى
-ملاك قامت ايديها : لو سمحت
-سليمان تفاجأ: خيرك
-ملاك : لو سمحت نبى نحكى معاك
وخشت للصالون وخلاته وراها
-اكحيلة تلفتلها ?: تفضلى احكى نسمع فيك حبيبتى
-ملاك : انت شن تخدم
-اكحيلة يعيط : اوووووف الف مرة سألتينى هالسؤال
-ملاك قامت يدها : وانت لتوة ماجابوتنيش بصدق
-اكحيلة: جاوبتك وقلتلك عطار ونجيب فى نباتات واعشاب
-ملاك : كدااااب
-اكحيله قرب منها وواطى ووجه قربه ليها: اقسم بدات الله لو قالهالى واحد ثانى ماتكفينى روحه فاللى قاله
-ملاك ترعش : وليش متقولش الحق
-اكحيلة يعيط: انتى منو لاعب فدماغك
-ملاك : انا مالاعب فدماغى حد .. انت ولد سعيد ميلاد تاجر المخدرات ولا لا جاوبنى
-سليمان قام يده : اعود بالله من هالفعل..وحاشا لله انتاجرو فيما حرم الله
-ملاك : يعنى اللى قالولى يكدبو ولا شنو
-اكحيلة : لا ماكدبوش
-ملاك : باهى كيف ..معش فهمتك
خداها اكحيلة من يدها وقعمزها عالصالون وقعمز فى جنبها …
-اكحيلة : اسمعينى كوووويس وافهمى كلامى..واللى بنقولهولك سر ..وانا معتبرك زوجتى ..ومن حقك تعرفى
ملاك تشبحله ومهتمه
-اكحيلة: فى مكان فالجنوب اسمه الممر.. ندخلو منه فى بضاعتنا وبعلم الحكومه ..وهيا اللى تحمى فينا ..كل واحد عنده شهر يتحكم فى هداكه الممر ويدخل منه اللى يعجبه
-ملاك : وانت شن ادخل
-اكحيلة : اندخل فى نبته اسمها الخشخاش ممنوع زراعتها فى ليبيا
-ملاك : الخشخاش هادى مخدرات ولا تقريبا ..زمان جايبيين عليها مسلسل سورى
-اكحيلة : الخشخاش عبارة عن دخان زى التبغ
..والنفه ..جدى وجدك مش كانو ينفو
-ملاك : الخشخاش مخدرات
-اكحيلة : هداكه الكوكايين والهيروين معاك حق ..لكن انا عطار واندخل فى نبته ..وعلى فكرة حتى بوى فى بداية حياته تاجر فالمخدرات ومن لما كبرت انا ودخلنى معاه وقف كل نشاطاته وقعد عالعطارة
-ملاك وقفت : انت تزلبح فى روحك ولا تزلبح فيا …تى هيا النبته كانها سليمه ليش الدولة تمنع زراعتها
-اكحيلة : انا نستفتى قلبي مع الله ولا مع الدولة …كانا مع الله مفيش آيه تحرم التجارة فالنباتات .. ولا اندكرت هالنبته فالمحرمات …وكانا بنتبع الدولة معش نسلك
-ملاك : كلامك مش مقنع
-اكحيلة : اسألى خالك جلال اكحيلة فيش يتاجر تو يقولك
-ملاك : وانت منين تعرفه خالى جلال
-اكحيلة : قلتلك انا ملك البلاد هادى كلها ..ومفيش تركينه معنديش فيها معارف..والفهود كلهم صحابى ..وجلال بالدات رفيق
-ملاك : انا مش صغيرة ومثقفه ..تجارتك حرام يا سليمان وانا مستحيله ندير صغار من واحد رزقه مش مزبوط يوكلنى ويوكل صغارى الحرام
__________________________
-فضيلة : قلتلك طيارتى الساعه 8 مساءً
-سليمه : انتى بروحك ولا البنات معاك
-فضيله : ماحصلتلهمش كراسى اليوم وانا معش طاقنى الصبر ..
-سليمه : باهى ضرورى بتجى عندنا انا وملاك لا بتمشى هنايا لا هنايا راهو
-فضيله : لا لا فكينى ..تعرفينى كمال من زمان ماعنديش له خلوق ومنحباش ..منقدرش ننزل عندكم
-سليمه : امالا وين بتمشى وكيف بديري
-فضيله : منعرفش دماغى مستاك ..مفيش فى بالى غير ولدى
-سليمه : اسمعى فالنوفليين فى شقق ايأجرو فيهم باليوميه ..تو ناخد رقمه من سيدى خالد ونكلمه توة ..انشالله غير نلقالك شقه فاضيه
-فضيله : ديري اللى بديريه المهم انى نشوف سعيد الليله ونشرب من دمه
-سليمه : يا فضيله مدامك جايه بالعرايك والغبابير مايمشيش الحال…والراجل مش مجبور يقولك ولدك حى …بجودته جاك وبعتلك ..منبيكش تغلطى وتجيبي وجع الراس لروحك وراس وخيتى
-فضيله : يصير خير.. اول مالطيارة بطير تو نكلمك ..مزال وقت واجد
-سليمه : توصلى على خير انشالله حبيبتى
__________________________
وحيد : ياحاج خيرك ماتبيش تفهمنى ..انا حاجز خلاص صعب نوقف حجزى وانت تعرف شرم الشيخ صعب نحصلها بالساهل
-سعيد : زى ماخطر عليك اليوم خطور وحصلتها بالساهل ..تقدر تخطر عليك غدوة وتحصلها بالساهل
-وحيد : اليوم حصلتها لان الطيار متع الطيارة ولد عم اشرف صاحبي وهوا اللى حصلى
-سعيد : خلاص قول لاشرف يحصلك حتى مرة ثانيه
-وحيد : اشرف مسافر اليوم حتى هوا كيف بيحصلى
-سعيد : اوووووف ليش كتر الدوة انت ماكش مسافر ..الموضوع اللى نبى فيه سليمان توة يخصك انت ولازم تكون حاضره
-وحيد : وشنهوا الموضوع
-سعيد : لااااازم يكون سليمان حاضر
-وحيد اقتنع ? : باهى تمام خلى نمشى نكلم الشباب نقوللهم اسبقونى تو نلحقكم الايام الجايه …
وشرين تليفون سعيد ..شاف المتصل لقاه سليمه
تلفت لوحيد : شوى نرد عالتليفون
-وحيد : خلى نطلع حتى انا بنمشى نكلم الجماعه من دارى
-سعيد : رد بالك اديرها وتسافر
-وحيد : عيب عاد قلتلك تم يعنى تم
وطلع وحيد مشى لداره ورد سعيد عالتليفون
-سعيد : ايوووه
-سليمه : فضيله بتوصل من بنغازى اليوم المغرب وتوة انا طالعه بنشوفلها سكن
وحيد بيفتح داره لقى روحه انه نسى المفتاح والنضارات فى دار بوه ..رجع بياخدهم
خش بالشوى وسعيد ماحسش بيه
-سعيد : ماشوفيلها شى ..فضيله تسكن فى ملك ولدها ماتقعدش ادور فالاجارات
وحيد سمع اسم امه رعش مع بعضه
-سعيد : قوليلها قالك سعيد غير تعالى ونرمو الاوراق كلها قدام بعض واللى غالط فالثانى يبان ..واللى ليه حق ياخده
-سليمه: تو بعتالى بتكلمنى ونتفاهم معاها
-سعيد : باهى خلينا على تواصل بالاحداث اللى تجد معاكم
وانهى المكالمه
-وحيد مصدوم : كأنى سمعت اسم امى ولا فضيله ثانيه
-سعيد تلفت وراه انخلع : لا احنا نحكو على مراءة ثانيه
-وحيد : انت تحكى على امى …تقوللها تقعد فل ملك ولدها علاش ادور فالاجارات ..وينها امى جايه ليبيا ولا شنو مفهمتش
-سعيد : وحيد وليدى ماتوجعش قلبي ..خلى تجى ونفهمو منها
-وحيد : هيا هادى اللى معطلنى على خاطرها ..والله مانى قاعد امها مانبدا الا مسافر توة
-سعيد : يا وحيد امك جايه خلى نفهمو شن ضروفها
-وحيد تهستر ويبكى: انا معنديش ام ..انا امى هيا ام خوى سليمان اللى ربتنى لين وصل عمرى 8 سنين ..انا امى ماتت ودفنتها لما دفن سليمان امه
-سعيد : غير اسمع بس
-خدى نضاراته وطلع : ماسامع شى وحتى فلوسكم مانبيهمش تو يصرفو عليا الجماعه برة
-سعيد : تعالة يا وحيد …وحيد
وطلع وحيد يجرى فالدروج وسعيد يسمع فى صوت سيارة وحيد قريب تنقلب
قام تليفونه واتصل …
-سعيد : الو
-اكحيلة: ايوة يابوى
-سعيد : الحق خوك وحيد فالمطار ماشى لمصر متغشش
-اكحيلة: وشنو اللى مزعله
-سعيد : حكايه طويلة ..غير جيبه توة
-اكحيلة: امتى الطيارة هيا
-سعيد : قال المغرب
-اكحيلة : متخافش انشالله نلحق عليه ونجيبه
وسكرو الخط
وتلفت اكحيلة لملاك : شن قلتى
-ملاك : قلتلك يا انا يا خدمتك
__________________________
سيرين مقعمزة على سريرها وحياة توتى فى روحها بتروح
-سيرين: غير زيدى باتى معاى حتى الليله
-حياة: لا والله هوا هداكه
-سيرين: باهى شنو قررتى بتساعدينى ولا شنو
-حياة: لو بس تسمعى كلامى مرة وتعقلى يا سيرين ..والله وحيد الا كويس ويناسبك
-سيرين: يا حياة انا ووحيد عمرنا ماحبينا بعض ..هكى نكلمو فى بعضنا جو وتكسيرت خشم وخلاص
-حياة : وبعتالى كيف وحدة دايرة علاقه مع واحد وبعدها تبدا تحب فى خوه
-سيرين: لانى زى محكيتلك علاقتى بوحيد فوق فوق مكنش فى حب من الطرفين
-حياةة : حتى لو مكنش فى حب منكم الزوز ..كيف خوه بيسمع لنفسه يحبك وانتى كنتى تكلمى فى خوه وتسهرى معاه فالتليفون للفجورة
-سيرين: يعنى متبيش تساعدينى
-حياة تحط فى شحنها فى شنطتها: اكيدة لا
-سيرين: ملحى تو نعرف انا كيف نساعد روحى بروحى.. او نقولك تو نتصرف انا وزبطت منو بتساعدنى
-حياة: هيا سلامات توة
-سيرين : نوصلك
-حياة: لا لا خوى مهند يراجى فيا برة
طلعت سيرين سقدت حياة وخشت للحوش اتصلت
-سيرين: وينك يا خاينه معش مبينه
-ميسا : لا قاعدة.انتى اللى وينك
-سيرين : نتلاقو برة نشربو نسكافيه
-ميسا : اوووكى مع الخمسه فوتى عليا
-سيرين : تم
__________________________
-اكحيلة : ليش تصعبي فيها علينا يا حبيبتى
-ملاك : لان اللى قلتهولك كلام الحق
-اكحيلة : مفروض امور خدمتى ومنين نصرف عليك انتى ماتدخليش فيه
-ملاك : كيف ماندخلش فى اكل عيشى انا وصغارى ونعرفه حلال ولا حرام
-اكحيلة : حلال يا امراءة نقولك ..احنا عطارين ..وخدمه العطارة ليها الشرف ان اسمى انا وبوى فيها
-ملاك : نبته الخشخاش حرام ميه فالميه ..مايخلفوس عليها اثنين …قلت بتوقف نشاطك فيها مرحبتين وانا ليك ..قلت هادى خدمتى حنقولك ربي يسهلك ..
وتلفتت للجهه الثانيه : وعلى فكرة فى حال قلت بتسيب تحلفلى عالقران انك سيبتها
-اكحيلة موجه صبعه لصدره: بتحلفينى يا ملاك
ملاك متلفته للجهه الثانيه وخايفه
-اكحيلة : بنقولك اخر رائي ..
وحط ايديه اليسا على كتفها : تلفتيلى
قامت ملاك راسها شبحتله
-اكحيلة : زمان لما دارو القروض فالبلاد ..وخدتها الناس وبنت حياش ..وقتها قالو القروض ربى وحرام
-ملاك : ايه واحنا شن علاقتنا
-اكحيلة : علقتنا ان الشيخ قال لا تزر وازرة وزر اخرى وقال ان الزوجه متليهاش علاقه تسكن فالبيت معززة مكرمه وحلال…والاثم والوزر كله عالزوج مولى القرض
-ملاك : شن تبى تقول
-سليمان : نبى نقولك حتى توة انا وانتى مايلحقك منى شى لو فيها اثم ولا وزر حيكون عليا انا انتى ماليكش علاقه
-ملاك : مايتساووش القصتين لان انا عندى علم بتجارتك
-اكحيلة: تى ماهو فحكاية القرض حتى هيا الزوجه عندها علم ان راجلها واخد قرض ويلينلها فى حوش وكع هدا قالولها اسكنى صحتين عليك وتبيدى بالهنا
-ملاك فكت ايدها منه : انا مالياش علاقه ..واللى عندى قلتهولك ..
وتلفتت جهه الباب
-اكحيلة : حت لو قلتلى ان تسييبت الكار هدا ما اتمش الا بقطع رقبتى
تلفتتله : ليش ..قطع رقبتك ليش
-اكحيلة : هوا هدا ..اللى ايسيب هكى مصيره
-ملاك : متحطنيش فى موقف اختيار زى هدا ..انا اللى عندى قلتهولك
وتلفتت للباب: لو سمحت قول للمرزوقى يوصلنى
-اكحيلة : يعنى هدا اخر قرار عندك
ملاك واطت راسها
قرب منها : بتسيبينى …قلتلك منقدرش نعبش منغيرك
-ملاك : انت فكر ورد عليا
-اكحيلة: فكرت ورديت .. صعب نسيب كارى
-ملاك : خلاص …تم الكلام
-اكحيلة : شنو يعنى
-ملاك عيونها دمعو وصوتها معبى: خلاص كل حد مننا فطريق
-اكحيلة حط يده اليسار ع كتفها شعرها : حكاية انك بتكونى لغيري هادى متحلميش بيها
-ملاك : ومن قالك نبى نكون لغيرك
وحضنو بعضهم بقوةة.. هيا حاطه ايديها حوالين رقبته وهوا ماسكها بيده اليسار
قعدو دقايق حاضنين بعض …وبعدين بعدت ملاك
– اكحيلة : يامرزوقى
-المرزوقى جى فتح الباب : نعم
-اكحيلة : وتى السيارة بيش توصل ملاك
-المرزوقى : حاضر ….
وطلع مشى ولع سيارته طول
-اكحيلة دخل يده فى وسط شعرها : فكرى
-ملاك: فكرت وقلتلك رائي
-اكحيلة: زيدى فكرى
-ملاك دموعها نزلو : الحياة نصيبات
حطت وشاحها وبتطلع
-اكحيلة: وانتى بادن الله نصيبى
حطت ملاك شنطتها على كتفها وجت بتطلع
مسكها سليمان بيده : ملاك
-واطت راسها : خلينى نمشى فى حالى وربي يرزقك باللى احسن منى
وطلعت بسرعه من الباب ودموعها فعيونها… ولبست نظاراتها الشمسيه وركبت السيارة
واكحيله واقف فم الباب ويشبحلها
ومقتنع فى داخله انه يعطيها فرصه تهدا قبل مايبدا معاها فالمحاولة الثانيه
__________________________
قام سليمان تليفونه واتصل بوحيد
طبعا وحيد حتى فى عز الزعل يرد على خوه لانه عارفه ينشغل عليه
-وحيد : الو
-اكحيلة : انت وين
-وحيد : مع اشرف صاحبى بنمشو للمطار مسافرين لمصر
-اكحيلة: وانت من شاورت ماشى مسافر طول بالك نبيك انا فموضوع
-وحيد : ماهناك مواضيع يا اكحيلة وكانا باعتك بوى قوله وحيد سافر
-اكحيلة: ماباعتنى حد ولا ريته بوى من امس ..انا نبيك ضرورى فى قصه الشخص اللى ضربنى بالرصاص ولا تبى تتخلى عليا وتسافر
-وحيد : يا سبحان الله مش امس قلتلى مادخلكش
-اكحيلة: قلتلك ماتتصرفش من راسك ..مش قلتلك ماتعاونيش
-وحيد : باهى انت شن تبى توا
-اكحيلة : نتلاقو قدام حوشنا بنتفاهم انا وياك على موضوع مهم
-وحيد : والسفرة
-اكحيلة: تتأجل..شنو كانا اجلت سفرتك يومين ولا ثلاثه على خاطر خوك
-وحيد : انأجلها حتى عام غير بس تكون انت راضى
-اكحيلة: خلاص امالا نتلاقو قدام الحوش بعد ساعه
-وحيد : تم
وسكرو الخط …
__________________________
سيرين طلعت فى سيارتها فاتت على ميسا ومشو لمطعم قريب
وحكت سيرين حكاية اعجابها بسليمان لميسا لانها كانت مدرقه عليها
-سيرين : مشكلتى انه عجبنى هلبا
-ميسا : باهى ووحيد كيف ماهو خوه وكنتو تحبو بعض
-سيرين: والله ماعمرنا حبينا بعض يا ميسو ..ولينا فترة معش نتكلمو
-ميسا : يعنى لو لقيتيه يكلم فى وحدة ثانيه مش حتزعلى
-سيرين : منهوا ..وحيد ..يكلم ثانيه ولا عاشرة مايهمنيش اصلا
-ميسا : حتى لو كانت الوحدة الثانيه هادى من صاحباتك
-سيرين : من ما كانت تكون انا توة نبى نوصل لخوه بس معش ليا علاقه بيه توة
-ميسا بكل جراءة : انا نساعدك لكن متزعليش منى لو لقيتينى نكلم فى وحيد
سيرين انصدمت من جرأتها وقعدت ساكته …لكن لانها متحبش وحيد ..فمدورتهاش
-ميسا : هااا شن قلتى
-سيرين : وصلينى لخوه وماعندى مابندير بيه وحيد انا
-ميسا : تم ..امالا توة بنقولك كلام خطير حطيه فودانك وافهميه كوووويس
__________________________
طلع اكحيلة من الاستراحة وهوا متألم هلبا من التطور اللى صار بينه وبين ملاك
ركب سيارته بروحه وطلع بيها وطلعو الشباب فالسيارة اللى وراه …
اتصل بملاك .. يضبخ تليفونها ومتردش
عاود اتصل بالمرزوقى
-المرزوقى : الو
-اكحيلة : تكلم بالشوى ورد ايه والا لا
-المرزوقى : حاضر
-اكحيلة: ملاك مازالت معاك
-المرزوقى : ايه
-اكحيلة : تبكى
-المرزوقى : ايه
-اكحيلة: خودلها اميه
-المرزوقى: حاضر
وسكرو الخط …
ملاك تبكى هلبا ..دست دموعها قدام المرزوقى وبعتالى معش قدرت ..وحتى من صوتها طالع شوى
-المرزوقي زعميتا يرطب فالامور: هدا سيدى اكحيلة ينشد عليك
-ملاك تبكى
-المرزوقى : سيدى اكحيلة مافيش منه اثنين ..رجال من ضهر رجال.. الكرم والجود صفاته واللى يقول ي اكحيلة يلقاه واقف فضهره
وسكت ……..وبعتالى استرسل فالحكى: شهم ..والله شهم
وملاك مستمرة فالبكى …..
وصلت سيارتها ….نزلت من سيارة المرزوقى وركبتها
شرين تليفونها
-ملاك صوتها تبكى: الو
-سليمه انشغلت : انتى وين توة
-ملاك : اهو فى سيارتى وبنروح
-سليمه: وخيرك باكيه
-ملاك : نتلاقو فالحوش ونحكو
-سليمه : باهى تعالى نراجى فيك
وسكرو الخط ..
__________________________
اكحيلة وصل قدام حوشهم
درس السيارة وقعد فيها …شرين تليفونه
-اكحيلة : الوو
-المرزوقى: نزلت منى وركبت سيارتها
-اكحيلة : باهى تعالة للحوش طول
وسكرو الخط …
وصل وحيد لبوابة الحوش…دار كلاكس وخش
وسليمان خش وراه
درسو سياراتهم وخشو مع بعضهم للصالة
اكحيلة مش عارف موضوع بوه شنهوا …وفات فيه قال لوحيد نبيك على موضوع الضربه وهوا فالحقيقه يبيه عشان اوامر بوه
فقعد يتلكك معرفش كيف يفتح معاه الموضوع
-وحيد : ديرلى قهوة يا مخزوم
-المخزوم : حاضر
-اكحيلة: خيرك بكرى قلتلى كانا باعتك بوك …هيره بوى شن فيكم
-وحيد : اسأله هوا تو يقولك
-اكحيلة : انا نبى نفهم منك انت قبل ماينزل بوى
-وحيد : توة داير روحك بوى ما كلمكش وحكالك كل شى
-اكحيلة : لا اقسم بالله لاى.. صح قالى حطجيب وحيد لكن ليش مش فاهم
-وحيد : ياراجل داير روحه جايبلى امى .
-اكحيلة : امك !؟؟؟
__________________________
-سيرين : مفهمت منك شى …متكلمينيش بالالغاز احكى بوضوح
-ميسا: اكحيلة يحب وحدة ثانيه
-سيرين : ومنهيا الوحدة الثانيه هادى
-ميسا :عمتك ملاك !!!
-سيرين: ااه ملااااك؟! شن تخرفى انتى ..ملاك مش متعت علاقات ودوة فاضيه
-ملاك : الدوة اللى مابيناتهم مش فاضيه ..الراجل يبي يخطبها وناويين الزواج
-سيرين مصدومه : ملااااك ..ملااك يحبها اكحيلة
وبدى السواد اللى فى قلبها كله يطلع بالرغم هيا تحب عمتها لكن ماهانش عليها اكحيلة يكون ملكها
-ميسا : القصه مش هنايا
-سيرين مازالت مصدومه مالخبر: امالا وين !!
-ميسا : القصه ان اللى صار مع ملاك كله من حقك انتى ..كنتى انتى المقصودة وجت فيها هيا
-سيرين: فهمينى اكثر مفهمتكش كيف من حقى انا..لان لو طلع كلامك صح مانيش ناوية نتنازل عن حقى
-ميسا : تدكرى فى هاديكا القصه لما كنتى تبى تخطفل وحيد
-سيرين : شن فكرك فيها هاديكا القصه العبيطه
-ميسا: لان وحيد نفدها ودار روحه بيخطفك …
-سيرين : كيف كيف …ومن قاله عليها وحيد الفكرة هادى
-ميسا : شوفى روحك قدام منو داوية يا عبيطه وموصلخ الدوة ..
-سيرين : سامحينى انا مش داويه الا قدامك انتى وسرور ..وسرور مسافرة ليها مدة .. وانتى مستحيل نصدق انك تخونينى
-ميسا تلخبط : احم انا مستحيل نخون ونوصل الدوة تعرفينى..لكن اللى عاودلى الدوة قالى واحنا ندووو كان يومها خط هاتفك مفتوح على رقمه بالغلط وسمع التخميم اللى خممتيه كله
-سيرين حطت يدها على راسها : الغبابير السود هدا علاش قعد يتهرب منى
-ميسا :واحنا غافلين وماندرو على شى ..
-سيرين : كملى وشن صار
-ميسا : ويوم اللى عطيتى سيارتك لملاك بيش تمشى بيها للمطار لما بتسافر لبنغازى ..هداكه اليوم كان يوم تتفيد وحيد للعمليه..وبدل مايخطفك انتى خطفو ملاك من سيارتك
-سيرين : نهار احرش ..خطفوها ..وخيرها ماقالتش
-ميسا : ريتيها طلعت فالحه ومابتش تفضح روحها
-سيرين : باهى وبعدين
-ميسا: اللى انقدها من الخطيفه اكحيلة
-سيرين قرنت حواجبها: ااه
-ميسا: لما جت الشرطه وزعميتا بترفعهم هيا والشخص اللى معاها فالاستراحه بيش يزوجوهاله لقت معاها اكحيلة بدل من هاداكه الراجل
-سيرين بتندب: باهى
-ميسا : خلاص رفعوهم للمركز قاللهم اكحيلة هادى زوجتى واحنا كنا فى استراحتنا ..ولان اكحيلة واصل .. اتقطع المحضر فمكانه ..ومن يومها بدت قصه الحب بيناتهم
-سيرين وقفت: الحقيرة ..يعنى انا اللى كنت بننخطف..وانا اللى كان اكحيلة بينقدنى ..وانت اللى كان بيقول عليا زوجته ..وانا اللى المفروض تكون معار قصه الحب
-شدتها ميسا من يدها : قعمزى واهدى وخلينا نفكرو بالعقل
-سيرين قعمزت : تى اما عقل والله لما انشرشحها غير انروح بس ..موضوع يخصنى انا ليش تخش فيه هيا
-ميسا: نصيبها وحضها وقدرها هوا اللى جابها للطريق هادى ..وتوة انتى شوفى روحك شن بديري
-سيرين: شن بندير ..انا اعلنت الحرب خلاص عراك على خطط على تشويه سمعه ..تعرفينى انا كل الاسلحة نستعملها ماعنديش ضمير
-ميسا : انا المهم انى نورتك بيش ماتقوليش خاينه …وتفاهمنا على قصه وحيد بيش ماتقوليش خاينه
-سيرين : تى انا كان نلقى نعطيك جائزة عالخبر اللى نورتينى بيه مش غير نعطيك وحيد بس
-ميسا: خلاص معناها انتو عيلة وحدة وانا منقدرش انخش بيناتكم
-وقفت سيرين : غير خلينى انروحلها وتو نعرف انا كيف نتصرف ..هيا سلام
-ميسا : سلام ربي يعاونك
__________________________
نزل عمك سعيد من الدور الثانى لقى ولاده الزوز واقفين يتناقشو
-وحيد : اهو بوى نزل ويفهمك
-اكحيلة: شن قصة ام وحيد يا بوى
-سعيد : انتم عارفيين ان ام وحيد حية
-وحيد يعيط : لكن سيبتنى ومشت ..كيف تبينى توة نقبلها
-سعيد قعمز عالصالون : عدرها معاها يا وليدى
-وحيد جى جهه بوه : الام اللى تلوح ولدها وهوا لحمه حمرا ماعندهاش عدر
-اكحيلة مسخفه خوه : وحيد غير اهدى شوى
-وحيد تلفتله : مانهداش …افرض امك ماقبلتنيش وقالت تزوج عليا مانقبلش ولده …
-سعيد : تقبلك غصبا عنها
-وحيد : امى قبلتنى لانها مراءة شريفه وقدعه
-سعيد : ولدى انت ظرف امك متعرفاش شنهوا اصبر افهم الدوة وبعتالى قرر
-وحيد يعيط : مانصبرش ومانفهمش انا توة طالع منبيش نشوفها
-اكحيلة كشخ عليه: خلاص ضم فمك خلى نفهمو من بوك القصه
وتلفت لبوه : ادوى يا بوى شن قصتها ام وحيد
-سعيد : فضيلة ما لوحتش ولدها
-وحيد : لااا لوحتنى
-سعيد : فضيلة قالولها ولدك مات ودفناه …فضيلة ماتندريش عليك حى اصلا ولا عايش على وجه الدنيا
-وحيد طاح وبدى يبكى: كيف ..شن تقولو انتو
-سليمان يقيم فيه : اوقف يا راجل خيرك
-سعيد : والله والله يمين ماندرى انهم قالولها عليك ميت الا متأخر فالسنوات الاخيرة
-وحيد يعيط : تى هادى جريمه ..صار مش هيا المجرمه ..صار انتو المجرمين
-سعيد : اللى وصلها هيا كلام ..واللى قالوه ليا كلام …بالرغم كنت بصحتى وبقوتى ..لكن صحة ليهم خوتها لعبوها صح
-اكحيلة: توة احنا فيها هيا يابوى مالنا ومال خوتها
-سعيد : انا بعتلها مرسول ان ولدها حى وجت تجرى تبى تتاكد
-وحيد : وينها هيا وين ساكنه نبى نمشيلها بنفسى ..نبى نفهم منها
-سعيد : تسكن فى بنغازى وجايه فالطيارة ..طيارتها توصل ساعه ثانيه
وتلفت لسليمان : ابعتلها المخزوم ايجيبها
-اكخيلة: ام وحيد انا بنفسى نمشى نجيبها وتوصل معززة مكرمه
-وحيد: بنمشى معاك
-اكحيلة: لا خليك هنايا فكنا من الشوو الزايد فالمطار قدام الناس وبالك المراءة مريضه ضغط ولا قلب نقعدو فى قصه
-وحيد يبكى: باهى برة جيبها توة بسرعه يا سليمان
-اكحيلة على قد ماسخفه خوه اضبطه : حاضر وراس اوخى نجيبهالك توة
وطلع سليمان مشى لسيارته بيركبها بيش يمشى للمطار
اتصل سعيد بى سليمه ..ردت عليه
-سعيد : بلغى فضيله ان ولدى اكحيلة ايراجى فيها فالمطار
-سليمه : قصدك بتروحو بيها عندكم
-سعيد : ايه وحيد قلتله على امه وبنجيبوهاله للحوش
-سليمه : امالا خلى حتى انا نمشى للمطار بيش نكون معاها
-سعيد : باهى احسن ما اديري
وسكرو الخط …
وتلفتت سليمه لملاك : ترفعينى للمطار
__________________________
ملاك وسليمه طالعين …
وقفو قدام السيارة يفتحو فالبيبان
درست سيرين: انتى هاى نبيك
-ملاك استغربت : تبينى انا
-سيرين : ايه نبيك فى موضوع مهم
-ملاك : بعتالى قوليهولى توة انا مستعجله
وولعت سيارتها وركبت جنبها سليمه وطلعو
وهما ماشيين فالطريق سليمه حكت لملاك قصه خالتها فضيلهه كلها ……وتليفون ملاك مابطلش تشريين من رقم اكحيلة ..وهيا تبيش ترد
-ملاك : مالااك سمعه …خالتى فضيلة تكون ام خو سليمان ..قصه غريبه
-سليمه : ربي يكون فى عونها مسكينه
-ملاك : وطول هالسنين قالولها انا ميت ..يانارى عليها …
ووصلو للمطار …وملاك عندها علم ان اكحيلة موجود فالمطار
-ملاك : هاك خودى كلميه انتى انا منبيش نكلمه
خدت سليمه الرقم واتصلت باكحيلة رد عليها
-اكحيلة : الو
-سليمه : انا سليمه
-اكخيلة انخلع : خيرها ملاك فيها حاجه
-سليمه تضحك: ماتخافش مافيها شى ..اهى معاى فالمطار
-اكحيلة مستغرب : فالمطار!! ..وشن اديرو فالمطار
-سليمه : جايين لنفس الشخص اللى جاييه انت
-اكخيلة: مافهمت منك شى ..انتو وين تو نجيكم
ووصفتله سليمه المكان اللى هما فيه وجاهم
اكخيلة يشبح لملاك قريب ياكلها
-اكخيله : مساء الخير
-سليمه : مساء النور
تلفت سليمان لملاك : ردى
-ملاك حطت ايداها فى جيبها : مساء النور
-تلفت لسليمه : لمن جايين انتو هنايا
-سليمه : جايين لفضيله
-اكخيلة : وانتو منين تعرفوها فضيله
-ملاك : فضيله تكون خالتى ..بنت خالة امى
-سليمه : وعندنا علم هيا ليش جايه لطرابلس
-اكحيلة يشبح لملاك : باهى ..الطيارة مزال عليها نص ساعه
-ملاك : مدامك انتى بتروحى معاهم امالا خلى انا نروح قبل ما اظلم..وخالتى فضيله نشوفها حتى يوم ثانى
-سليمه : ايه احسن بري روحى انتى
-ملاك : مع السلامه
-اكحيلة تلفت لسليمه : نسقدها ونجى خليك هنايا
-سليمه : باهى
ومشت ملاك ومشى وراها اكخيلة …وصلو سيارتها
-اكخيلة : ستاحشتك
-ملاك متلفته الجيهه الثانيه : بكرى كنا مع بعض
-اكحيلة : اشبحيلى
-ملاك تلفتتله : خلينى نمشى
-اكخيلة : ونهون عليك
-ملاك : ظروفنا مش وحدة
-اكخيلة: لكن قلوبنا وحدة
ملاك سكتت
-اكحيلة : تحبينى
-ملاك : وقاعد تسأل
-اكخيلة : نحب نسمعها منك
-ملاك : نحبك
-اكخيلة غمض عيونه: الله محلاه صوتك وانتى تقولى فيها
ملاك مشاعرها متخلطه مابين فرحانه مابين حزينه
-اكحيلة مسك يدها : والله مايصير الا اللى تبيه ..ومايصير الا خاطرك طيب
-ملاك ابتسمت: بلحقه
-اكخيلة : تعرفى انا الضحكه اللى نشوف فيها على وجهك توة نشريها بعمرى
-ملاك فرحانه : باهى خش المراءة قربب توصل
-اكحيلة : لما نكلمك توة ردى عليا نطمن عليك وصلتى والا لا متخلينيش مشغول
-ملاك : حاضر
-اكخيلة : والليله نسهرو مع بعض فالتليفون زى زمان
-ملاك : حاضر سنفور طماع
-اكحيلة : طامع فحلالى
-ملاك : لما تصير حلالك بعتالى اطمع زى مايعجبك
-اكحيلة: لماتصير حلالى بناكلها ولا بنزمطها ..ولا مش عارف اللى بنديره انا
ملاك تضحك
-اكحيلة : سلميلى هالضحكه انشالله ماتتحولش منك طول العمر…ووالله مايصير خاطرك الا طيب
-ملاك ركبت سيارتها : تو نشوفو
-اكحيلة : ردى بالك على روحك فالطريق وردى عليا
-ملاك : حاضر
وخرت سيارتها وطلعت
__________________________
خش اكحيلة للمطار….قعمز جنب سليمه يراجو فالطيارة
وبالفعل وصلت الطيارة واستقبلو فضيله
لما شافت سليمه اضبطتها وانهارت بالبكى امالا لما بتشوف ولدها كيف
سلمت على اكحيلة عرفتها بيه سليمه انه خو وحيد
ركبوها معاهم فالسيارة ومشو لحوش سعيد ميلاد
درسو السيارة فالجنان ونزلو
خشو للحوش
اكخيلة وفضيلة وسليمه واقفين فم الباب
ووحيد وبوه فالصالة
وحيد متجمد فمكانه
-اكحيلة : وحيد تعالة سلم على امك
جت فضيله تجرى : وينه ..وينه
وجاها وحيد يجرى اضبطها : يمى
-فضيله تضبط وتبكى وتعاود : ياوليدى …ياوليدى قالولى انك متت
والكل فالصاله متأثر
__________________________
تمت …..ويتبع
صحة ليه اكحيلة فالح كلاها باللسان المصري ????
غدوة نكملو حكايه وحيد وامه …ونشوفو سيرين وملاك شن بيصير بيناتهم
رابطة الحلقة قصيرة?✂
رابطة زيدينا حلقه فالحبس طول ??
نحبكم هلبااااااا❤