رواية اكحيلة
?للكاتبه زهور جمال الدين?
??الحلقه الرابعة ??
وحيد فى استراحة وليد صاحبه….
يتكلم فالتليفون
-وحيد : انتى مفهمتيش عليا
-ميسا : باهى فهمنى بالشوى
-وحيد: يومتها اللى طلعت بالسيارة مش سيرين
-ميسا : امالا شكون
-وحيد : هدا هوا اللى نبيه منك انا.. نبى نعرف منهيا اللى طلعت بسيارة سيرين يومتها
-ميسا : وعلاش تبى تعرفها
-وحيد: لان البهايم خطفوها هيا بدل سيرين
..وشافها خوى سليمان وفددنى بالسؤال عليها منها وانا راقى الازرق قلتله مش شورى الموضوع
-ميسا: مش عارفه الحق.. وعيلة سيرين مفيش حد انخطف منهم ..تعرفها مادسش علينا شى هيا
-وحيد : تى قلتلك البنت من سيارتها خطفناها وانا متاكد انهم مش ملخبطين فالسيارة
-ميسا : تو نسألها ونشوفها …لكن قولى انت وينك ليك ايام مغطس
-وحيد : عادى مع الجماعه موجود
-ميسا: تليفونى معش ينفع
-وحيد : برى لنفس المحل اختارى التليفون اللى يعجبك خوديه وروحى
-ميسا : سلمهولى الغالى
-وحيد : غير ماتنسيش الخميس ..فى نفس الاستراحة
-ميسا : مش ناسية يا حبي
-وحيد : باهى باى
__________________________
زى ماحكينا امس …
روحت ملاك للحوش …
-ملاك : سليمه تقدرى ترقدى مع اميرة لانى انا بنسهرعلى كتاباتى بنساويهم
-سليمه : لا عادى نراجيك لين تكملى وبعتالى نرقدو
-ملاك: ماهو انا بنسهر للفجر مرات ومنبيش نسهرك عارفاتك تنوضى بكرى
-سليمه : باهى تو نصلى العشى ونركب لدارها ..
وقعمزت ملاك بروحها تخمم …شن بنقوله كان سألنى انتى بنت شكون ..اكيدة متعاديين هوا وخوتى …كنهدا مايحاولو يقتلوه
وتخمم: انا مصدومه فى خالد كيف يدير هكى..منير عارفته من زمان يحب يدير السو للناس …لكن خالد .. معقولة !!؟؟؟
-سليمه : ملاك خيرك
-ملاك : خوتى فى شن يخدمو يا سليمه
-سليمه : فالعلفه والكاكاوية ماك عارفتهم
-ملاك : تعرفى واحد اسمه سليمان كحيلة
-سليمه : لا لا اول مرة نسمعه الاسم هدا ..
سكتت ملاك وتخمم: انا مفروض توة منقولاش انى اخت خالد ..شكلهم متعاركين .. واكيدة بيفوت التعرف عليا طول …
يااااربي المشكله بينهم متكونش كبيرة ياااارب
ووصل وقت الادان ..صلت سليمه العشى وطلعت
وقعدت ملاك اتراجى واحنا كلنا نراجو معاها ??
جت الساعه 12 التليفون ماشرينش …
12 وعشرة شرين تليفونها …فتحت الخط وردت
-ملاك بكل رقه: الو
-سليمان : واخيراً
-ملاك ضحكت: واخيراً شنو
-سليمان : واخيرا عرفت نوصلك
-ملاك : انت كنت ادور فيا ?
-سليمان : مش بمعنى الكلمه بالزبط ..لكن الحق موضوع وكان شاغلنى ..
-ملاك : اهاا
-سليمان : معاى حق يشغلنى ولا لا
-ملاك: منعرفش
-سليمان : لما نلقى بنت فى استراحة حاجزينها فالصبح ..مش معاى حق ننشغل البنت هادى شكون
-ملاك : معاك حق
-سليمان يضحك : وانتى هربتى يا هرابة
-ملاك : من خلعتى تخيل نفسك تخطفك ناس انت مش عارفهم شكون ..كيف بنعطى الثقه فيك وانا لقيتك فى نفس الحوش معاهم ..وبالك انت اللى خاطفنى …تلخبطت يومها ولقيت احسن حل الهرب
-سليمان: باهى انت شكون
-ملاك بدلع : انا ملاك
-سليمان يقلد فيها : عارف انك ملاااك ..المقصود بنت شكون
-ملاك : بنت بابا وماما
-سليمان يضحك: امالا بنت الجيران… شكلك شويطينه
-ملاك : خلينى ملاك ..ملاك وبس
-سليمان يستفز فيها: شنو متحشمه من اسم بوك
-ملاك?: ربي يرحمه
-سليمان تحشم: الله يرحمه .. باهى ليش ماتبيش تقوليلى اسمه
-ملاك : مش هكى
-قص عليها : باهى انتى كيف عرفتى الاشخاص اللى بيقتلونى ومنهما وشن علاقتك بيهم
-ملاك : منعرفهمش ..قالتها مراءة قدامى فى عيادة مقعمزين …ودكرت اسمك بالصدفه
-سليمان : مراءة مقعمزة فى عيادة تحكى على جريمه قتل على عينك يا تاجر
-ملاك : لا هيا كانت تحكى بالشوى عالهاتف
-سليمان: وشن كانت تقول
-ملاك : اووووف هيا مكالمة ولا استجواب ..البنت اللى قالت منعرفهاش والكلام سمعته انا بالصدفه .. وهدا اخر كلام عندى
-سليمان : باهى اهدى
-ملاك : هوا عموما الوقت اتأخر وانا منبيش نسهرك
-سليمان : بلا جو زايد عاد .. متبيش تقولى براحتك ..لكن متسكريش الخط
-ملاك هدت ?: باهى
-سليمان يضحك : شوفى هى.. ماهو قلتلك شويطينه
-ملاك تضحك : لكن مش هلبا
-سليمان : باهى نسألك سؤال مهم ونبى اجابة ضرورى
-ملاك : اسأل زى مايعجبك ..لكن انا تحط فى بالك انى بنت فقيرة ..واهلى ناس طيبيين ..
-سليمان: فقيرة وراكبه سيارة
-ملاك: واخدينهاللى خوتى عالمصرف على معاش بابا
-سليمان : اهاا صار معاش بابا…
-ملاك : اسأل هى
__________________________
خالد روح للحوش ركب لشقته طول …
لقى الاولاد صغاره قاعدين فى استراحة منير عمهم برة
حول جاكيته واتكى عالسرير
طلعت مريم من الحمام لافه فوطه على جسمها
..وفوطه على شعرها
لقت خالد قدامها متكى عالسرير
-مريم قعمزت عالكرسى قدامك الشكماجه: روحت
-خالد يشبحلها : روحت ايه …
وناض من مكانه وقف وراها وحط ايديه على كتافها وحول الفوطه من شعرها : محلااك
-مريم : حول شعرى مبلول
-خالد قرب من خدها وبدى ايبوس فيها : انتى حلوة فى كل حالاتك
-مريم بعداته عليها : اووووف ريحتك مش حلوة خش دوش
-خالد : من عيونى راجينى ماترقديش
وخش للحمام ..دوش بسرعه وطلع …
بدون اى مقدمات رقدها طول عالسرير ورقد فوقها ????
طبعا هيا مسكينه تعودت خلاص على طريقته …
حضناته من كتافه : معش تسيبنى .. انا ليك انت بس
-خالد : وانا نقدر نسيبك
طبعا هيا تتخايل فيه سليمان …وهوا يانارى هاداكه حد نيته …عمرها مارقدت معاه الا ماتتخايله سليمان معاها …وهدا سبب تعلق خالد بيها .لانها حلوة معاه فالسرير .. والسبب طبعا سليمان…وخالد مش دارى
__________________________
-سليمان: وتردى عليا بصدق
-ملاك : حاضر
-سليمان : شن كنتى اديري يومها فالاستراحة
-ملاك نقولك الحق
-سليمان : طبعا
-ملاك: انا مش يومها مشيت للاستراحه …انا الاستراحة بايته فيها ليلتين تصدق
-سليمان جاته صدمه وتقاعد قعمز بعد ماكان متكى عالمخدة: كيف …ثلاثه ايام
-ملاك : ايييه خطفونى من سيارتى وانا قدام المطار …ترا شن بخو فى وجهى ..فقدت الوعى ..وفقت ثانى يوم فالليل ..واليوم اللى بعده جيت انت
-سليمان بحدر: فى حد آداك
-ملاك : لا كنهدا منسكتش ..لكن ربطولى ايديا ..ولحمدلله ماحد مسنى ولا جى على حالى
-سليمان : باهى من خطفك ..وليش
-ملاك اضايقت : قلتلك والله مانعرف
-سليمان : باهى ماضايقيش روحك ..تو نزبط انا الموضوع بطريقتى
-ملاك : باهى
-سليمان : اهدى انا منبيش نضايقك
-ملاك : لا والله عادى مفيش مضايقات ..بالعكس تشرفت بمعرفتك
-سليمان : يسلملى الزعلان اللى يعرف كيف يتكلم
-ملاك : لا والله مش زعلانه
-سليمان : باهى سؤال ثانى
-ملاك : اوووف سنفور مزعج ..هيا اسأل
-سليمان يضحك: لو بيضايقك بلاش
-ملاك : لا عادى نبصر عليك اسأل
-سليمان : حوش هشام منين تعرفيهم
-ملاك : من هشام
-سليمان : اللى تلاقينا عندهم بكرى
-ملاك : هداكه حوش صاحبتى
-سليمان : والله ..وانا هشام صاحبي
-ملاك : بلحقه
-سليمان : صاحبي النظيف
-ملاك تضحك : وشنو الثانيين امسخين ???
-سليمان : مديريش فى بالك ..
-ملاك : باهى
-سليمان : انتى تعرفى زوجته الاولى ولا الثانية
-ملاك : الزوز صاحباتى .. لكن غادة زوجته الثانيه هيا صاحبتى الاكثر
-سليمان : تصدقى انا مسألتكش قداش عمرك ووين تقري
-ملاك : ماهو لاهى تستجوب فيا وخلاص
-سليمان يضحك: باهى قداش عمرك ووين تقري
-ملاك : عمرى 18 سنه ..نقري فى ثالثه ثانوى
-سليمان : اووف معناها انا شيبانى جنبك
-ملاك : والله..وقداش عمرك يا شيبانى
-سليمان : انا اكبر منك ب 12 سنه.. عمرى 30 عام
-ملاك : ماشالله العمر كله
-سليمان : ليا وليك انشالله
-ملاك : وشن تشتغل
-سليمان : انا عطار ..
-ملاك : فاتح محل عطارة
-سليمان : لا مش فاتح محل الحق ..لانى نجيب فى اعشاب بالجملة ..
-ملاك : باهى ربي يعاونك
-سليمان : انتى عايشة مع امك
-ملاك ?: امى حتى هيا متوفيه
-سليمان : لا حول الله .. مازالتى صغيرة امالا مع من قعدة
-ملاك : مع خوتى ..عندى زوز متزوجين وواحد عزرى وعايشين كلنا فى نفس الحوش
-سليمان : حوشكم وين
-ملاك : فطرابلس
-سليمان : طرابس كبيرة …وين ساكنين انتو
-ملاك : نعتت المنطقه مزال مش زابطاتها
-سليمان : انا ماقلتلكش انعتينى ..انا قلتلك شن اسم منطقتك
-ملاك : منعرفهاش
-سليمان : انتى خيرك خايفه منى ولا شنو
-ملاك : لا وعلاش بنخاف
-سليمان تكنطى : اسمعى يا ملاك .. انا مش صغير ولا عيل ولا تحسابينى بنضحك عليك ..ولد ناس انا راهو
-ملاك : لا والله مش هكى قصدى
-قص عليها: لعلمك معلومات كاملة عليك نقدر نجيبها الليله اقل شى من هشام ومرته … ..
لكن انا ح نحترمك ..ونخترم خصوصيك ..وحنخليك على راحتك ..ومعلوماتك الشخصيه نبى نسمعها منك مش من حد ثانى
-ملاك ?: انت زعلت
-سليمان ولع دخانه: لا لا وعلاش بنزعل …
وهوا قريب ياكل الدخان
-ملاك : سامحنى والله ماكان قصدى نضايقك
-سليمان هدى شوى: خلاص عادى قلتلك ..اضحكى
-ملاك ?: باهى تو نضحك
-سليمان يضحك : تو نضحك وانا نشبح فيك توة لاوية بوزك زى حناى حليمه زمان لما تتعارك مع جدى
-ملاك تضحك : منو حليمه هادى
-سليمان يدخن: يا حنه هادى حناى ام امى ..كانت وحدة قادرة ..لما تبى الحاجه تبدا تمثل انها مظلومه لين تاخدها ???
-ملاك تضحك : ريت ولا …
وقعد سليمان يحكى على مواقف حناه وهيا تضحك..
وهوا يحكى ويضحك
-سليمان : شفتيها ولا عزوز فالحة
-ملاك : انت اسمك سليمان اكحيلة
-سليمان: لا انا اسمى سليمان سعيد ميلاد
-ملاك : امالا شنو اكحيلة هدا
-سليمان : اكحيلة هدا لقب لقبونى بيه ..لانى سريعة..فكانو يقولو لبوي ولدك سريع زى فرس الكحيلة …ومن يومها لقبونى اكحيلة
-ملاك : معناها اكيدة صحابك كلهم اينادو فيك اكحيلة
-سليمان : لا لا اللقب هدا مش كل الناس تعرفه ..اللى يعزونى بس يعرفوه..ومن ضمنهم المراءة اللى شفتيها فالعيادة
– ملاك : اما مراءة قصدك ..مفهمتكش
-سليمان ?: مش بكرى قلتيلى انك سمعتى مراءة تنطق فى اسمى فالعيادة وقالت بنقتلوه
-ملاك : اااه ..ايه…ايه صح المراءة
-سليمان : باهى مشي امورك ???
واستمرو يهدرزو لعند ادن الفجر ..
-سليمان : اوووو سهرتك واناى الصبح عندك مدرسة
-ملاك : لا لا عادى اصلا غدوة اول يوم هدرزة وقرمه بس
-سليمان : نكلمك حتى غدوة عادى
-ملاك : باهى
-سليمان : خلاص امالا استنى منى مكالمه غدوة فى نفس الوقت هدا
-ملاك : اوكى
-سليمان : متفاهمين
-ملاك : متفاهمين
-سليمان : تصبحى على خير
-ملاك : ليلتك سعيدة
وناض كل واحد منهم صلى وهوا فرحان بالمكالمه الحلوة والتعارف ???
وبالفعل استمرو فالمكالمات كل ليله للفجر..وسليمه يانارى ترقد عند اميرة
__________________________
بعدها بأيام…
-سيرين : انت وين مختفى
-وحيد : موجود وين بنختفى يا حسرة
-سيرين : ليا ايام وانا نقولك نبى نقابلك خيرك تتهرب منى
-وحيد : وعلاش بنتهرب ..غير عندى شغل بس
-سيرين : باهى امتى نشوفك
-وحيد : غدوة خميس مسافر انا ومروح الاحد ..بعد انروح نتلاقو
-سيرين تعصبت : وخيرك ماقلتليش انك مسافر
-وحيد : ياستى اهو قلتلك
-سيرين : نبى نفهم خيرك تغيرت انت ..
وعيونها دمعو
-وحيد : ماتغيرتش قلتلك مسافر عندى عمل النم
-سيرين : باهى باى
-وحيد : بايات …
وسكر الخط
سيرين مقعمزة عالطاولة جنبها ميسا وحياة صاحباتها
-حياة تتكلم بكل حنان: انتى تحبيه ياسيرين
-سيرين بعصبيه : منحباش ياحياة
-حياة : سيرين .. دموعك يحكو هلبا
-سيرين تمسح فدموعها : هادو دموع تمثيل يا هبلة
-حياة حطت يدها على كتف سيرين: سيرين انتى بديتيها لعبة ..وانقلبت جديات .. الحب الشريف الصادق راهو مش عيب
-ميسا قريب تموت : هداكة لما يكون الشاب شريف وصادق ..لكن زى وحيد اكبر كداب
-حياة: كونى محضر خير يا ميسا ..وكونه ماقللهاش انه مسافر فهدا مش شى يخليها تزعل لهدرجه ..مرات جاته السفرة على فجأة
-سيرين : هكى تقولى يا حياة ..صح مرات انا تسرعت
-ميسا حست ان الامور بتتساوى?: ومن قالك انه مسافر…باهى شن رايك انه يكدب عليها والليله بالدات ماشيين لاستراحة وليد صاحبه وجايبيين فيها بنات
-سيرين حمقت : وانتى كيف عرفتى …ومن قالك
-ميسا: انا عندى دوة مع معتز صاحبه وهوا دوالى الكلام هدا
” الكدابة هيا كانت على موعد مع وحيد فى نفس الاستراحة يوم الخميس ..الخوانه خزيهة?”
-سيرين وقفت : اقسم بالله يطلع مش مسافر لما نغبرها على راسه
-حياة: غير ليش هكى يا ميسا
-ميسا : امالا نخلى صاحبتى على عماها ..
-سيرين : من هنايا لغدوة يبان منو الصادق ومنو الكداب
وخدت مفتاحها وطلعت من الكافيه وخلت صاحباتها مقعمزات
__________________________
فى حوش هشام وغادة
-اياد: ماما ..هيا وين العصير
-هشام : هيا يا غدير وينك الولد انخنقبالسندوتش
جت غادة جابت العصير عطاته لاياد وقعمزت جنبه تشرب فيه
-هشام : اسف مش قصدى
-غادة مواطيه راسها تمسح لاياد فى فمه: لا عادى مفيش مشكلة
وناضت رفعت السفرة للمطبخ …
لحقها هشام .. وقف اتكى عالدولاب
-هشام : يابنت الناس انا ضميري ايأنب فيا
-غادة تغسل فى الطاسه : وليش
-هشام : حاس انك تعيسة ..انا مغصبتش عليك تتزوجينى ..حاس انك كنتى تحبى شخص وسيبتيه على خاطرنا
-قامت غادة راسها وشبحتله: لا والله .. لو عندى حد ماكنتش انتخلى عليه
-هشام قرب منها : لعلمك اول مرة تشبحيلى من يوم خشيتى الحوش هدا
-غادة تلفتت للحوض تغسل فى ايديها : تقول ليا سنين هما كلهم عشرة ايام
-هشام : الطلبات اللى طلبيتها كلها نفدتها …درتلك دار بروحك ..وحديثى معاك خفيف .. لكن منتحملش انى نشوفك تعيسة وانا وصغارى مرتاحين
-غادة تلفتتله : ومن قالك انى تعيسه
-هشام : يا غادة انا منعرفكش ..ممكن شايفك ثلاث مرات زمان ..وعلى عمرى يخطر عليا ان فى بينى وبينك نصيب …
وشرب اميه : لكن مش معنى اننا مانكونوش زوجين معناها نكونو اعداء… ليش العداوة
-غادة بهدوء: حاشا لله تكون عدوى ..انت راجل غدير وبو اياد والين ..وعلاش بنكرهك
-هشام : ينفع نكونو اصدقاء
-غادة: انا نوعى …
-قص عليها : ينفع ولا ماينفعش
-غادة?: مندرى
-هشام : لا تندرى …وتعرفى اننا لو ماكناش ازواج نقدرو نكونو اصدقاء.. انا حتى منقدرش نكلمك فالتليفون نقولك شنحال الصغار
-غادة: لا كلمنى ومن منعك
-هشام : بنضرتك هادى كيف بنكلمك …والله نخاف
-غادة: باهى انت شن تبى توة
-هشام : نبى نطمن على صغارى معاك لانى مسافر بعد غدوة ..نبى نكلمك ونسأل عليكم براحتى وتردى عليا بكل رحابة صدر
-غادة?: نحاول
-هشام : احنا اصدقاء..اصدقاااااء
-غادة : تمام اصدقاء
-هشام : باهى يا صديقتى يا غادة ممكن اتجى تتعشى معانا انا والصغار
-غادة: حاضر
ومشو للصالة قعمزو جنب الصغار ….
هشام يحاول انه يخليها عادية …يبي يطمن على صغاره
وهيا قاعدة مش بالعه حكاية انه يكون زوجها
ولفي بينا يا دنيا
__________________________
الخميس العشيه مشت سيرين لمحل موبايلات تبى تحدد مكان وحيد
-الشاب : منقدرش نحددلك مكانه الا فى حال فتح الماسنجر
-سيرين: الماسنجر متعه مسكر توة
-الشاب: معنديش ليك حل اختى ..برنامج تحديد ارقام الموبايلات هدا شغل دولة وصعب تلقيه فى اى محل
-سيرين : باهى مشكور خوى
وطلعت لسيارتها لابسه سروال امريكانى لاصق وتجيبوطى قصير وحاطه الوشاح عادى نص شعرها عالشارع ولابسه نضارات …
-سيرين : تى والله ماهو بارد بيها ..كانا معرفتاشى وين معش نتسمى سيرين كمال
قعدت تفكر شن بدير ..شن بدير …خطر عليها تمشى قدام حوشهم …واللى تلقاه واقف تسأله وحيد مسافر والا لا ..
وتخمم فى خاطرها : وكان يطلعلى بوه قدام الحوش ..بايخه نسأله عليه …ترددت …لكن فالاخير قررت تمشى…وبالفعل مشت لحوش وحيد وقفت السيارة ونزلت على رجليها …
لقت مجموعه شباب واقفين على سيارة حاشيين روسهم فالمحرك القدامى يشوفو فالميه متاعهت …
وشاب واقف بروحه …
-سيرين شبحت للشاب : السلام عليكم
-الشاب : وعليكم السلام
-سيرين : منسئلك على وحيد موجود ولا مسافر
-الشاب : والله مانعرف
قام واحد من الشباب اللى غاطسين روسهم فالسيارة راسه يكلم فالشاب : شن فى
-الشاب : الاخت تسأل على وحيد
وتلفت الولد اللى قدام السيارة لشاب ثانى وقاله : تسأل على وحيد
قام سليمان راسه : تفضلى يا انسة شن تبى من وحيد
-سيرين: ومن حضرتك
-سليمان : انا خوه
-تلفتت سيرين للشاب : هدا خوه ?
-الشاب : ايه هدا سيدى سليمان
-سيرين عجبها من اول نضرة: احم.. اهلا بيك سيد سليمان ….
وبكل رقه حولت نضاراتها : ممكن لحظه من وقتك
جاها سليمان يمسح فى ايديه فى بعضهم : تفضلى
-سيرين : انا سيرين ..معرفت وحيد ..معرفه سطحية بس ..بيناتنا بزنس
-سليمان : ايه ..مفهمتش
-سيرين : جيت منسأل عليه لان شغلى واقف حاليا …فياريت يكون تعاملى مع حضرتك مدامك خوه
-سليمان : هوا شنهوا الشغل اللى بينك وبين وحيد اللى تبينى نستلمه انا
-سيرين: احنا مزال ماقررناش شنهوا الشغل بالزبط
-سليمان : وراس وخيتى مافهمت منك حاجه …كلمى وحيد وتفاهمى معاه …سلام
ومشى وخلاها فالشارع وهيا فى قمه الاعجاب بيه وبشخصيته …وقريب بتموت انه مالفتتش انتباهه بالرغم انها متعودة تافت نضر كل الشباب
وركبت سيارتها وعقلها مشى مع سليمان خلاص
شرين تليفونها …ردت
-سيرين : الو
-حياة : شنو صار ..طلع مسافر ولا كدبه
-سيرين تضحك : مسافر …قاعد ..معش يهمنى …ودرة
-حياة : تى كيف صار فهمينى
-سيرين : غير خلى نفهم انا وتو نجى نفهمك يا حبي
__________________________
فى نفس الليله فالليل
سليمان يكلم فى ملاك ..يهدرزو ويضحكو كالعادة …داروها معرفه تحت مسمى صداقه ..وكل واحد يفضفض للثانى على يومه …
-سليمان : باهى انا كملت ..وانتى احكيلى شن درتى اليوم
-ملاك : هدا يا سيدى احنا اليوم صارت فالمدرسه مشكلة كبيرة وفضيحه
-سليمان : وشنو الىى صار احكيلى
-ملاك : اليوم فالاستراحة نفطرو …ويخشو زوز ولاد يبو يشدو بنت …وهاتك ياعياط عاد البنات تهسترو …
-سليمان : كيف مدرسه محترمه يخشولها زوز شباب
-ملاك : الولد يعيط يقول لما نقتلها ..قالو انها كانت دايرة معاه علاقه وراكبهةمعاه فالسيارة و خانبه منه فلوس ..قريب ثلاثه الاف دينار
-سليمان : هدا هوا البنات ..كلهم هكى صنف واحد ..يديرو العلاقه مع الشاب يمصو منه ماكتب ربي ويلوحوه لما ابدا معش فيه فايدة
-ملاك مصدومه : مش كل البنات هكى يا سليمان
-سليمان منسجم : كلهم هكى بلا استثناء ..وليش انا منيش مستعد ندير علاقه مع اى بنت فالدنيا …كلهم كدابات وخوانات تلقيها تكلم فى عشرة ..وساهرة مع عشرين ولد قبلك وتحلفلك انها طاهرة وشريفه
-ملاك مصدومه?: قصدك اللى تسهر مع ولد مش طاهرة ومش شريفه
-سليمان : طبعا
-ملاك تشجعت : زينى انا توة
-سليمان فاق: لااااا لااا ملاك حاشاك ماتفهمينيش غلط ..انا قصدى عالبنات اللى يسهرو فى سهرات مشبوهها عالتليفون
-ملاك : السهرة هيا السهرة ..سواء مشبوهها ولا عاديه كلها هدرزة فالهوا ..معناها كلنا سوا
-سليمان : وااااك توة شن جاب الدوة هادى يا ملاك
-ملاك : انت قلتها توة
-سليمان بهدوء : ملاك انتى غير..انا مستحيل نجمعك مع اشباه النساء هادوما
-ملاك: احنا فالفكرة توة …وانت مغلطش ..صح البنت اللى تسهر بالدرقه على اماليها تستاهل كلام اكثر من هكى
-سليمان : انا مش هكى قلتلك..انا قلت ..
-قصت عليه وصوتها مخنوق بالعبرة: خلاص لو سمحت الفجر قريب ايأدن وانا عندى قرايه غدوة بنسكر
-سليمان : ماتجننينيش .. ماتسكريش خلينى نفهمك ..
وتسكر التليفون …سليمان يحسابها سكرت عليه …لما شاف تليفونه لقى الشحن تم …
وقف ولع الضى دور الشحن مالقاشى
-سليمان : اوووووف ماهو لماتجى …ديما هكى تجى مع بعضها ..
وفتح باب داره ومشى لغرفه وحيد بياخد شحنه ..
فتح الباب لقى وحيد كيف مروح
-وحيد : بسم الله خلعتنى
-سليمان متعصب: وين شحنى الف مرة نقولك معش تمسه
-وحيد: اوووف نسيته فى استراحة وليد
-سليمان : والحل توة
-وحيد غمزله وضحك : المكالمه مهمه
-سليمان ?: صراحة مهمه هلبا
-وحيد مدله تليفونه : هاك تليفونى
-سليمان خاف على رقمها : لا لا حتى غدوة وخلاص
وطلع سليمان : تصبح على خير
-وحيد يضحك: شكلها الزعلة كبيرة
-سليمان : انا لبزت هلبا فالكلام
-وحيد غمزله : رضيها ساهلات راهم
-سليمان : مشكلتى منعرفش
-وحيد يضحك : اصلا انا مستغرب كيف ساهر لتوة …غير من امتى يا روميو
-سليمان : خليها لله
-وحيد يضحك: لو الموضوع يهمك..عادى نساعدك … تعالة نعلمك انا شن تقوللها توة
-سليمان: بصراحة يهمنى ..اكتبلى كلام متع ترضايه فى ورقه مابين ماجبت الشحن من دار بوى
-وحيد : يا حليلى على روميو مش قادر حتى يمشى من الزعل
-سليمان يضحك: تى برة يا مسخ
-وحيد : غير جيب الشحن وتعالة تلاقى احلى كلمات ..ايخلوها مش غير ترضى بس …ايخلوها تركب تاكسى وتجيك توة ??
-سليمان : باهى غير هيا سقدنى
وطلع سليمان جاب الشحن من دار بوه ..وفات على وحيد عطاه شفطات بخيط الشحن على نسيته فى شحنه فى استراحه صاحبه وخدى منه الورقه المكتوبه….
حط الورقة قدامه عالسرير …بيش بيقرا منها عاد
وحط التليفون فالشحن يادوبك شحن شوى وعاود لرقمها …ينادى …ردت ملاك ..صوتها باكى
-ملاك : الو
-سليمان رقد على ضهره ونسى الورقه بكل… ويتكلم بكل حنان : تزعلى منى
-ملاك : ايه لان كلامك مش حلو
-سليمان : وتقوليلى بنرقد …تبى ترقدى قبل مانرضيك
-ملاك بدلع : ايه على خاطر شاغلاتك هلبا وتبى اترضينى ..
-سليمان : وكان مارضيتك انتى من بنرضى امالا
-ملاك : نبى نرقد باهيووو
-سليمان : نحطك فعيونى ونغمض عليك بيش ترقدى وانتى مرتاحه
-ملاك : ايه صدقتك
-سليمان :سامحينى يا ملاك وارضى …الله غالب منعرفش نرضى
-ملاك : خلاص معش زعلانه
-سليمان : باهى نبى نشوفك
-ملاك : وين بتشوفنى منقدرش نطلع اماكن عامه انا
-سليمان : نتلاقو فى حوش هشام
-ملاك : شنو بنديرو حوشهم مواعيد
-سليمان مدخليش فيك نبى نشوفك
وادن الفجر
-ملاك : باهى توة الفجر ادن خلى نسكرو وغدوة يصير خير
-سليمان : بجد مش زعلانه
-ملاك : وغلاوتك عندى مازعلانه
-سليمان: انشالله ربي يزيدها ومانفقدك يااارب .. والضهر نكلمك انرتبو للموعد
-ملاك : انشاء الله
-سليمان : تصبحى على الف خير
وسكر الخط …
وسليمان قاعد حاط التليفون فى ودنه : وين ماشى ياسليمان..دير فرينو
.
.
.
__________________________
تمت …. ويتبع ????
فى الحلقه اللى فاتت ضحكنى فالتعليقات …وحدة تقولى راسى داخ وانى نقرا طويله هلبا …وتعليق اللى بعدها طول ..مش معقولة يازهور رجعتى اديري فالحلقات قصيرة غلط هكى راهو بتخسرينا ??????
معش فهمتكم ????
عالمهم نحبكم هلبا هلبا واسفه عالتاخير ❤❤❤