رواية اكحيلة

??للكاتبه زهور جمال الدين ??

الحلقه السابعه??

مريم فالصالة مقعمزة مع زينب سلفتها …
طبعا هما علاقتهم ببعض كويسه لان ماحد يدخل فالثانى …
-مريم: تبى الحق يا زينب البنت صغيرة على خوك ..هيا مواليد 90 وهوا سبعينات ..الحق فرق العمر كبير
-زينب: امها خدت عمى وفرق العمر بينهم 24 عام ..وخيرها كانت متهنيه معاه … يحكو عليها كانت متريحه واخر دلع
-مريم: ظروف زمان مش زى ظروف توة …وانتى تعرفى نوعية شغل خوك.. يبي وحدة قوية وقلبها قوى لانها معرضه لكل انواع الادية هيا وصغارها من اعداء راجلها …مش وحدة مدلعه ماعارفه السمى مالعمى
-زينب: تبى الحق يا مريم البنت كويسة ومتربيه وعاجبتنى ..اهو اليوم ليا ثلاثه ايام على قد ماحدفت عليها من دوة ماردتش عليا كلمه
-مريم : لا هيا متربيه هادى منختلفوش فيها ..حتى خوتها يحبوها ويخافو عليها
-زينب: يلاااا نصيبات ونصيب حد ما ياخده حد
-مريم تنهدت: اييييييه بتقوليلى انا عالنصيب
…صدقتى نصيب حد ماياخده حد …
وسرحت بخيالها لسنوات لتالى لما شافت اكحيلة اول مرة ….
وتتخايل وتدكر ..كانت واقفه عالدروج وتنادى: يابوى .يابوى هاك القهوة
ويطلعلها شاب شخصيه وهيبه : هاتى الحاج قالى برة جيبها من سهام
-مريم طاحت فيه طول : انا مريم مش سهام …
وتتخايل بعد ماطلع خشت لخوها فالمكتب: هدا شكون يا بوى
-الجدر: هدا سليمان ولد سعيد ميلاد …الكل ينادى فيه اكحيلةة…الاسم مع الشخصيه مع ضحكته وهوا ياخد فالقهوة خلوها معش تشبح فى شى قدامها غيره ….مع انها كانت متزوجه …بحثت على المعلومات اللى تخصه كلها وكلماته بكل جراءة وعرضت عليه حبها …لكن هوا بكل جراءة رفض …ودارت هيا مشاكل مع خالد راجلها وجت غضبانه لحوش بوها تبى تطلق ولما كلماته رد عليها ان الموضوع هدا مايخصاش …وانها حتى لو اطلقت مش حتعنيله حتى حاجه فى حياته..كانت صغيرة هلبا تحت العشرين ..ورجعت لراجلها وكبرت وكبرو صغارها ….وقاعد حب اكحيلة مرشوق فى قلبها ..ولو يطلب منها تطلق ..تنفد طول اليوم قبل غدوة
-امين : ياااام …ياااام خيرك ماتسمعيش فيا
-مريم فاقت : اهاا شكلى سرحت يا وليدى ..خيرك شن تبى
-امين : بوى معاه رجالة قالك يبو قهوة ..قالك ديريها انتى
-مريم : باهى شوى تو اناديك ارفعها

_______________________________

بعد المغرب ….

خشت ملاك وسليمه للحوش ….
-سليمه : السلام عليكم
-زينب: وعليكم السلام ..وين كنتو
-سليمه : طلعنا شويا نشمو فهوا
-زينب: ملاك خيرك ماترديش عليا
-قعمزت ملاك عالصالون : لا عادى يا ابله وينب غير نشبح فى سليمه ترد عليك
-زينب ترطب فالامور : انتى كيف حالك
-ملاك : الحمد لله كويسه
-زينب: امور الدراسه كويسه
-ملاك : ايه الحمد لله
-زينب: باهى ربي يعاونك

وناضت ملاك خشت لدارها اتصلت بي سليمان …سكر عليها لانه كان قاعد مع سلطان ..معش عاودت هيا عرفاته مشغول

____________________________

فالمربوعه ….

-خالد : هما كلمتين …انا بندخل سلاح واللى مش عاجبه يشرب من البحر
-محمود : احنا اتفاقنا مع جلال بضاعه وبودرة
..مستحيل انه يوافق يحمينا بضاعتنا لو كانت سلاح
-اوهيبة: انت مصدقهم انهم مايقدروش ولا شنو …تى جلال والجماعه القواة اللى هنايا يلعبو فالكارطه مع بعض لما يبدا عنده زيارة غادى
-كمال : احنا مادرناش عيب ..والسلاح تجيب فيه حتى الدولة ..وكان البضاعه بمليون ..السلاح بزوز مليون وثلاثه ..يعنى الربح اضعاف اضعافه
-محمود: يعنى توة المشكلة كلها فى جلال مادامنا احنا كلنا متفقين
-اوهيبة : والجدر شن قال
-كمال : الجدر شور خوى خالد مفروض ..ماهو نسيبه
-خالد : الجدر لما نبدو كلنا كلمه وحدة ماعتقدش يرفض
-اوهيبة : ومن مازال .. اكحيلة وسلطان
-كمال: سلطان ولد خالى يبي يدخل سلاح اليوم قبل غدوة
-خالد : معناها ماقعد حد غير الدراه اكحيلة
-محمود : المشكله ان الجدر وجلال يقتنعو طول بكلمه من اكحيلة
-خالد : بمكالمه تليفون منه يوافقو طول ..
خش امين بالقهوة
-خالد : حط القهوة وسكر الباب وراك

_____________________________

سيرين فى دارها …
جتها صاحبتها ميسا ….

-سيرين : تفضلى النسكافيه يا ميسا
-ميسا : محلاها دارك يا سيرين غيرتيها
-سيرين : ايه غيرتها …هادى شفتها فالنت عجبتنى
-ميسا : احم.. بالصحة عليك يا حنه
-سيرين تضحك : سلمك يا حنه
-ميسا : قلتلك منسئلك ..عمتك اسمها ملاك ولا
-سيرين : ايه ملاك ..شن بتخطبى ولا شنو
وقعدو يضحكو
-ميسا : مالقيته لعمري بيش نجيبه لبنات الناس
-سيرين : امالا شن فكرك بيها
-ميسا : غير بنت خالى تقرا معاها ..فقالتلى يومها شفافتها راكبه سيارتك وماشيه للمطار
-سيرين : مقدمها ..هاداكه لما مشت لبنغازى
-ميسا ادقق : معناها هيا اللى راكبه سيارتك يومها
-سيرين : مفهمتكش .. وانتى اصلا علاش تسألى بتدقيق
-ميسا : لانى خاشه فى عناد انا وبنت خالى خمسين بخمسين …قلتلها سيرين مستحيل تعطى سيارتها
” مقواها ميسا مستحيلة تتلخبط ??
-سيرين : امالا خسرتى يا حبى .. ملاك لما مشت للمطار هيا اللى تسوق فى سيارتى مش انا ..
سيرين سكتت وفرحانه فى خاطرها حصلت معلومه مليحه ???

____________________________

سلطان شرين تليفونه

-سلطان : الو
-كمال : اهلين سلطان شن حالك
-سلطان : الحمدلله بخير ..شن حالك انت واختى والبنات والشباب
-كمال : الحمدلله فخيار الخير
-سلطان : باهى الحمدلله
-كمال : قتلك نبوك انت وسليمان اكحيلة ..تقدرش تحصلهولنا توة
-سلطان يشبح لسليمان : اهوا جنبى
سليمان ايأشرله بيده بمعنى خيره
-سلطان : تو انقوله وكانا ماعنداش خدمه تو يجى معاى
وسكر الخط
-سليمان : خيره كمال ولد عمتك
-سلطان : يبينى انا وياك فى حوشه
-سليمان مستغرب : وشن بيدير بينا
-سلطان : تى نوض هادى فرصتك يا عريس..خش حوش نساباتك برجلك اليمين
-سليمان يضحك : فكنى من المشى عندهم توة.. تعرفنى انا وخالد منتفاهموش
-سلطان : غير نوض هيا واللى بتقوله انت نقول انا زيه
-سليمان : بالرغم عارفها بتصير مشكله …لكن هيا
-سلطان : انشالله مايصير الا كل خير
وناضو مع بعضهم ومشو لحوش كمال

_______________________________

سيرين بعد ماشربت النسكافيه هيا وميسا
قعدو ايهدرزو على البنات صاحباتهم وشوية شكرانيه على شوية قرمه …وجابو سيرة وحيد
-ميسا : يعنى نفهم انك انتى ووحيد خلاص
-سيرين: لا لا خلاااااص مشى فى حاله ودرنا حب جديد
-ميسا : غير منهوا هدا خيرك مدرقاته عليناة
-سيرين : لاااااا خليه مفاجئه
-ميسا : يابنتى غير قوليلى منهوا بلكى نساعدك وتجيبيه للطريق
-سيرين : لاااا خلينى توة نزبط انا كيف نجره ونجيبه لطريقى
-ميسا وقفت : يا حنه براحتك
-سيرين : خيرك وقفتى
-ميسا : لا هوا هداكه ..بنروح مغرب ..يا دوبك
-سيرين تلبس فى التوب متع التوته : باهى خلينى نسقدك للجنان
حطت ميسا شنطتها على كتفها وطلعو …

طلعو للجنان ..بيش تسقدها …
انفتح الباب خشو سلطان وسليمان وكل واحد منهم لابس نضارات شمسيه ..ومشو طول للمربوعه الخارجيه …
-سيرين قريب طاحت : سليمان ?
– ميسا: تعرفيه !؟
-سيرين : نعرفه …وعز المعرفه
-ميسا : هدا خو وحيد راهو
-سيرين عيونها قلوب وتشبحله : عارفه
-ميسا لاحظت ان سيرين هايمه فى سليمان : قتلك ..ومنو اللى معاه
-سيرين : خالى سلطان
-ميسا : محلاه ومحلا شخصيته ???

طلعت ميسا من حوش سيرين …وخشت سيرين لداخل مع ان بودها تخش معاهم للمربوعه ??

وخشو اكحيلة وسلطان للمربوعه
-سليمان وسلطان : السلام عليكم
-الحاضرين كلهم : وعليكم السلام
-سليمان بصوت واطى: ماقلتليش ان الجماعه كلها هنايا
-سلطان بصوت واطى: وانا وين نندرى عليهم ماقاليش كمال
-كمال : اهلا بالتريس …تفضلو خشو الحوش حوشكم
وخشو سليمان وسلطان قعمزو …
-خالد : آنستونا
-سليمان : الله ايآنسك
-خالد : جيب القهوة يا امين خلى يشرب اكحيلة امية وملح قدانا ..
-سليمان زبط فى موضوع : بالجودة بيكم يا خالد حوش اكرام

وجابو القهوة …وبدو فى نقاش الموضوع متع السلاح …
سلطان يناقش ومأيد الموضوع ..لكن سليمان ساكت وخلاص مافقصش كلمه
-خالد : شن قال اكحيلة ..ماسمعناش صوتك يا راس
-سليمان : ماعندى مانقول الموضوع مش شورى
-خالد : كيف يعنى
-سليمان : يعنى رائي فالموضوع هدا انت تعرفه من زمان يا خالد ..منغير العطارة مانجيب شى
-سلطان شبحله : كحلها ماتعميهاش يا سليمان
” قصده تكم الامور على خاطر تاخد بنتهم ”
-كمال : سعيد العقربان كان يسمع الراى هدا بيعجبه واكيد ح يوافق عليه
-سليمان : امالا ليش مناديينى انا دونكم منكم للعقربان
-محمود : احنا كلنا عارفين ان الراى لاول والاخير فى حوشكم ليك انت
-وقف سليمان : انا ليكم عليا انى ندير روحى لا ريت لا سمعت …بل بالعكس لو جتنى خبارة ان حد مخبر فيكم نجى نبلغكم طول ..لكن كونى نشترك معاكم وناخد شهر فالممر على سبة السلاح لاااا …سامحونى
-خالد : باهى ماتستركش معانا …اقنعنا الجدر يوافق وبرة فى حالك
-سليمان : كيف عاد ..الجدر شورك يا نسيبه
-خالد : فالخدمه لا فى صاحب ولا فى نسيب ..وكلنا عارفين ان خاطرك عنده كبير
-سليمان : شوف يا خالد …هالموضوع طلعنى منه ..لكن ليك عليا لو قصدتنى مرة ثانية منردكش حتى لو كان الموضوع اكبر منى
وتلفتلهم : نستادن منكم توة ..وانشالله خشيت حوشكم بالخير
-سلطان : هدا اخر كلام عندك
-سليمان : للاسف ايه اخر كلام .. شنو نوصلك ولا مازلت انت
-سلطان تكنطى: لا تو يوصلنى حد من الجماعه .. تسهل انت
-سليمان : هيا تصبحو على خير
وطلع وسكر الباب وراه ..ركب سيارته ..
بعت لملاك رساله ” لو تعرفى انا وين توة ”
-ردت عليه برساله” ربي يحفظك ليا وين ما كنت ..هااا وين انت توة ”
-سليمان بعتلها ” راجينى ماترقديش بالكثير ساعه ونكلمك تو نقولك وين كنت ”
-بعتتله رساله ” باهى ”
-رد عليها برساله ” باهى بس ..مفيش نحبك ”
-ملاك ” نحبك ونعشقك وكل شى ”
-سليمان ” نحبك هلبا ..مسافه الطريق ونكلمك ”

وفالمربوعه خلاهم يطبخو وراه زى البركان
-اوهيبه: اكحيلة الباين عليه يجرى على قطع رقبه
-سلطان تكنطى : تى والله اللى يجى شور اكحيلة مانبدا الا قاتله بيدى
-كمال : مش هكى التفاهم يا جماعه
-سلطان وقف: اسمعو كلكم بما فيكم صغار عمتى.. حتى انا زيكم مش راضى باللى قاله اكحيلة ..لكن اقسم بجلالة الله لو نزبط ان واحد منكم حاط سليمان فى راسه مانبدا الا قاطعله رقبته بايديا هادو ..حتى لو كانو صغار عمتى بما فيهم نسيبى
-خالد : غير اهدو يا جماعه الخير مش هكى الكلام يا سلطان خيرك
-سلطان قعمز: انا اللى عندى قلته وخلى حد منهم يتعرضله
-كمال : صلو عالنبى
-الجميع : عليه الصلاة والسلام

_____________________________

وصل اكحيلة للحوش …
قعمز جنب بوه شويا فى داره ..وحكاله عالموضوع اللى صار كله …وبلغه انه رفض
وطبعا بوه مستحيل يخالفه …
وستادن منه …وخش لداره …سكر كل تليفوناته ماعدا اللى بيكلم بيه ملاك …
غير حوايجه …وطفى الضى.وولع السهارة جنبه واتكى فى سريره
اتصل بيها …ردت على طول
-ملاك بكل رقه : الووو
-سليمان : يسلملى هالصوت الحلو ..وصاحبة الصوت الحلو
-ملاك : بالشويا عليا رانى مش قدك
-سليمان : انا اللى مش قدك ولا قدك سحرك ..انتى غيرتى حياتى يا ملاك .. انا كنت كأنى مش عايش على وجه الدنيا
-ملاك : حتى انا حياتى تغيرت بيك ..وصارت احلى
-سليمان : نحبككككك
-ملاك : هلبااا
-سليمان : فوق ماتتصورى ..وانتى
-ملاك : ايه حتى انا
-سليمان : حتى انتى شنو ..قولى ..سمعينى رانى مسكين
وبدو يضحكو الزوز
-ملاك : انت مسكين .. تى انا المسكينه ونحساب روحى فالحه
-سليمان : لاااا فالحة ..وفالحة هلبا ..غيرتى الدنيا فعيونى ..بديت نحب الحياة ونبى نعيش ..بدى عندى هدف نبى نوصله
-ملاك : شنهوا هدفك
-سليمان : هدفى انتى ..وصغارى منك .. وهدفى قلبك اللى نبيه ليا انا وبس ..وعقلك اللى منبيش يخمم فى حد غيري
-ملاك : منغير ماتوصى حبيبى
-سليمان : محلاااه الكلمه منك ..
ويضحك: زيدينى رانى جيعان
-ملاك بدلع : خلاص يا سليماان
-سليمان : انت تؤمرى امر يا روح سليمان
-ملاك : حقه تعالة جاى وين كنت بكرى
-سليمان : مش حتصدقى
-ملاك : شوقتنى ..وين
-سليمان : فى حوشكم.. فى مربوعتكم الخارجيه
-ملاك قلبها بدى يطق وفمها تسبت وصوتها تغير: مستحيل ..شنو ادير فى مربوعتنا انت
-سليمان : خيرك انخلعتى حبيبتى .. شنو متبينيش نجيكم
-ملاك : مش هكى ..لكن انت قلتلى انك انت وخوتى مش تمام
-سليمان : باهى اهو انا بنبدا نحاول من توة نخليها تمام
-ملاك : غير رد بالك على روحك وراس حبيبي
-سليمان : خايفه عليا
-ملاك : نخاف عليك اكثر مانخاف على روحى
-سليمان : باهى تعالى فحضنى
-ملاك تضحك : لاااا تحشم عاااد
-سليمان : لاااا منيش متحشم .. اصلا من الليله بتبدى كل ليله تباتى فحضنى
-ملاك : مشكلتك تحلف طول
-سليمان يضحك : هاهاها تعالى يا شريرة
-ملاك : باهى حول يدك .. نتكى جنبك شوى وبنوض راهو
-سليمان : كانا قدرتى تمشى بعد نحصل عليك صحة ليك
-ملاك تضحك : ومن قالك ناويه نمشى
-سليمان بكل رومنسيه : غير وين كنتى بس ..تاريت الدنيا حلوة وانا ماكنتش عايش فيها نحسابها شينه
-ملاك : ربي يخليك ليا حبيبي
-سليمان : ومايحرمنى منك يانور عيون حبيبك

وقعدو يحكو للفجر كالعادة ….

______________________________

الصبح سليمان فاق مع الساعه عشرة

قعد يخمم : منبيش نخسر خالد …لان كمال ساهل .. بس زعما شنهيا الطريق اللى نخشله بيها
بالرغم ماعنديش ليه خلوق وواطى …لكن شن بندير على خاطر الزيت تتاخد الفيتورة

قام تليفونه واتصل برقم خالد
شرين والتليفون فى دار النوم …
مريم قاعدة فالدار ..لما شافت المتصل لقاته اكحيلة
وين تلقيها عاد …هيا مادا بيها خالد واكحيلة يتصاحبو …بيش تبدا عندها فرصه تشوفه اكثر ….
طلع خالد من الحمام
-مريم : تليفونك كان يشرين
-خالد : خليه توة ماخاطريش نحكى مع حد
-مريم : اكحيله المتصل
-خالد : وخيره شن يبي زعما البلوة هدا
-مريم بحداقه : لااااا يا خالد ..نعرفك لماح ودكى وتزبطها وهيا طايرة
-خالد : شنهيا
-مريم : اكحيلة فرصتك يا خالد تشد بيدك مفتاح القناقن الكبار كلها
-خالد تلفتلها : كيف
-مريم : انت عارف انهم كلهم يحبوه لله فى لله …مش مستحقينه فى مصلحه ..
-خالد : صح صدقتى
-مريم : باهى ومن يحبو توة ثانى معاه ترا
-خالد : منو
-مريم : يحبو سلطان ..لانه رفيقه وديما معاه ..وكل مايمشى للصحرا يرفع فيه ليهم ..
-خالد : والله صدقتى فيها ..امتى هوا سلطان اللى دار الشعبيه هادى كلها
-مريم : الرزق هدا كله والشعبيه جاته من ورا تتبيعه لى اكحيلة
-خالد : انتى شكلك نسيتى بوه منو
-مريم : وانت بوك منو يا خالد .. حتى عمى مش شويا ومع هدا سلطان فاتكم غادى
-خالد : مفهمتش قصدك
-مريم : قصدى من جاور السعيد يسعد .. ومن جاور اكحيلة وصل فوق فوق
-خالد يخمم : والله كلامك صح …
-مريم : خود تليفونك عاودله ..لانه مستحيل يعاودلك اكثر من مكالمه
-خالد اقتنع: هاتى التليفون نشوفه شن يبي ..بالرغم والله ماعندى ليه خلوق
-مريم : انت غير شوفه شن يبي..وقلبك مامفركسه حد ..اللى فالقلوب مايعلم بيه حد الا ربي
خدى خالد التليفون واتصل ب اكحيلة ..رد عليه طبعا …
هوا مايبي منه شى .. غير يدير فالجو ويبي يفتح معاه صفحة جديدة وخلاص ..وقعد يتعدرله على موضوع امس …
وخالد زعميتا يمشى فالامور : امس مشى فى امس..واحنا صغار اليوم
-سليمان : وانا يا خالد خوك وصاحبك فاللى تبيه
-خالد : والنعم بيك اخ عزيز ..وانشالله ما يجى بيناتنا الا كل خير
-سليمان : انشالله
وسكرو الخط
-مريم : خيره شن يبي
-خالد : يتعدر على موضوع امس
-مريم : وموضوع امس شن دخله فيه هوا
-خالد : ماهو جى قدانا امس وتناقش معانا فالموضوع
-مريم انصدمت: قصدك امس اكحيلة جى عندنا وشرب من قهوتى
-خالد : شن تقولى مسمعتكش
-مريم : لاااا شى سلامتك …المهم يا خالد زى ماوصيتك شوف مصلحتك .. وفوتها حكايه انك تنفخ على اكحيلة وفايته ..لانه كله فوايد
-خالد: انشالله خير

_______________________________

الساعه 11 ونص ….

اتصل سليمان بملاك
-سليمان : الووو
-ملاك : صباح الورد والفل حبيبي
-سليمان : شنو صوت الدوشة جنبك
-ملاك : انا فالمدرسة ..استراحة توة
-سليمان يضحك : اااه حقه نسيت انتى قاعدة بيبي وتقري
-ملاك : بيبي عينك .. انا طالبة شهادة والعام الجاى فالجامعه
-سليمان : واحلى طالبة شهادة فى ليبيا .. غير انجحى بس وشوفى الحفله اللى بنديرهالك
-ملاك : تبى خوتى منير وخالد يقتلوك ???
-سليمان : باهى شن رايك توة كنت نحكى مع خالد
-ملاك استغربت : خالد خوى
-سليمان : طبعا خالد خوك.. شوى شوى لين نوصل العيلة كلها ..ونخطف منهم وردتهم
-ملاك : سلمهولى اللى يبي يخطفنى ??
-سليمان : نبى نشوفك
-ملاك : وين بنشوفو بعضنا صعب برة فى الاماكن العامه ..اقسم بالله يشوفنى خوى منير يقتلنى
-سليمان : انا عندى استراحة نتلاقو فيها
-ملاك انصدمت من الكلمه : قصدك انت تحسابنى الجو هدا
-سليمان : جو شنو يا هبلة انتى مرتى
-ملاك : لو شايفنى مرتك ماتقولى تعالى معاى استراحات
وطق اتسكر التليفون فى وجهه ..ووجهها احمر ..وعيونها مدمعات وحالتها حالة ..تفكيرها زى اى بنت 18 لما الشاب يقوللها تعالى معاى الاستراحه معناها يلعب عليها
وهوا يانارى يعاود ويتصل ويبعت فى رسايل “غير ردى يا هبلة ”
وهيا دايرتها جو كرامه وماتبيش ترد عليه ..بعتتله رساله ” الاستراحة تمت وانا فالفصل معش تتصل ”
وكمل دوامها فالمدرسه وروحت للحوش وهيا مغصوصة …وتبى تبكى …
خشت دارها …وبدى عمى سليمان فالاتصال
طبعا هيا ماتقدرش تقاوم …ردت
-ملاك : الو
-سليمان : نحبك يا هبلة
-ملاك: سقدنى شن تبى عندى قراية
-سليمان : باهى غير اغسلى وجهك وامسحى خشمك اللى رايح كله خناين
-ملاك : ما غاسلة شى وما ماسحه شى ..ثول شن تبى هيا شحنى بيتسكر
-سليمان يضحك : قالك البنت رد بالك تقوللها نحبك ..كان قلتهالها جاتك الايام تبدا طول تتجكتر
-ملاك : اممممم ..باهى كملت
-سليمان : لا مزال
-ملاك : شنو تبى ثانى
-سليمان : نبى نشوفك .. حقى ولا مش حقى
-ملاك : لا مش من حقك
-سليمان : مش قلتى انك تحبينى
-ملاك هدت طول ومشى الزعل: ايه نحبك
-سليمان : مدامك تحبينى معناها من حقك تشوفينى ..وانا من حقى نشوفك
-ملاك : كيف نهون عليك تقولى تعالى لاستراحة ..تو انا متع استراحات
-سليمان : يا حبيبتى انا نبى نشوفك ..وفى نفس الوقت خايف عليك لانك خايفه من خوتك …فعرضت عليك مكان مستخطى بيش العين ماتشوفناش
-ملاك : لا يا بابا ..حكايه نشوفك فى استراحات هادى فوتها
-سليمان : باهى نشوفك فى مطعم فى مكان عام ..نخاف عليك
-ملاك : اسمع نعرف مطعم فيه غرفه اسمها vip..مخصوصه لو تبى اتأجرها ونشوفو بعضنا بامآن
-سليمان : يعنى استراحة غير بمعنى انيق
-ملاك : شن قصدك
-سليمان : قصدى موافق ..اعطينى عنوانه المطعم ونبى نشوفك اليوم
-ملاك تتجكتر: اليوم مندرى نقدر نطلع والا لا
-سليمان : قلتلك اليوم ..ولا والله مانبدا الا جاييك حوشكم وخاش لدارك???
-ملاك : ماهو قلتلك مشكلتك انك طوول تحلف …باهى الساعه كم نتلاقو
-سليمان : اعطينى المكان ..وخلى نبعتهم يحجزوها ال vip هادى??..وانتى عندك طول اليوم مفضى نفسى ليك ..اى وقت يناسبك تعالى
-ملاك : تمام …اكتب اسم المطعم هى
وقعدت تعطى فيه فى اسمع المطعم وتوصفله فل جيهته

________________________________

مع الساعه 4 العشيه

ملاك كلمت خوها كمال بالتليفون واستادنت منه انها بتمشى عيد ميلاد صاحبتها وبترفع معاها سليمه وبتقعد للمغرب ..وغطاها الادن وقاللها بري
طبعا هيا مجهزة
نفسها ..مكياج خفيف على عدسات ولبسه حلوة انيقه …
-سليمه : غير منعطلوش عندى مسلسل نتابع فيه
-ملاك : توة وقت مسلسلاتك يا سوسو
-سليمه : بنراجيك فالسيارة راهو
-ملاك : باهى زى متحبى..واللى يسألك قوليله زى مافهمتك ..عيد ميلاد صاحبتى

وطلعو ركبو السيارة ومشو للمطعم …
وقفت السيارة قدام المطعم ..وقامت التليفون اتصلت بسليمان
-ملاك : انا برة ..قدام المطعم
-سليمان : انزلى خشى ..اهو نراجى فيك لداخل
-ملاك : باهى …

نزلت من السيارة وقلبها يطق لابسه وشاح اسود وحاطه شال بيربري على كتافها وشادة فى يدها كيسة كأنها هدية


تمت …. ويتبع

اول لقاء ليهم بعد الحب…زعما حتى هوا بيهديلها حاجه ولا بيطلع ماعنداش دوق ???

غدوة نكملو

نحبكم 

error: