رواية اكحيلة

#اكحيلة

??للكاتبه زهور جمال الدين??

?الحلقه الرابعه عشر?

اكحيلة انصدم فى رد خالد ….
سكر الخط …ونزل تليفونه …ورجع قعمز وهوا ساكت …
سلطان لاحظه … ناض من مكانه وخدى طاسة شاهى وجى جنبه
-سلطان : خيرك وجهك متغير
-اكحيلة تلفتله : قالى البنت رفضت
-سلطان : منهوا اللى قالك ..ومنو بنت قصدك مفهمتكش
-اكحيلة : خالد ولد عمتك كلمنى توة ..وقالى الموضوع ميصيرش منه البنت قالت نبى نقرا
-سلطان مستغرب : والله مايتحشم ..فى حد يرد على موضوع زواج فالوقت هدا
-اكحيلة : انا خايف عليها هيا بس ..مدامه رد توة اكيدة متناقشين
-سلطان : قالولك البنت رفضت وقاعد خايف عليها
-اكحيلة شبحله وابتسم : ملاك بترفضنى…اللى بينى وبين ملاك متعرفاش انت
وساوى المخدة اللى وراه واتكى عليها
وقام تليفونه اتصل برقم ملاك لقاه مقفل …
زاد اتأكد ان الموضوع مش طبيعى
وخلاها على الله .. والصباح رباح

_____________________________

ثانى يوم …
-وحيد : ليش يااام ..انا كيف عرفتك وفرحت بيكم ..ليش تبى تمشى ثانى وتخلينى
-فضيلة : وحيد وليدى انا امك وانت ولدى
…ومايقدر حد يفرقنا على بعضنا ..لكن مش معنى هدا انى نقعد مقيمه فى حوش سعيد
-وحيد : هدا حوشى زى ماهوا حوش بوى..وانتى امى وعلى راسى من فوق
-فضيلة : حكاية قعادى هنا مستحيلة .. حتى سليمه بتعدى بيتها ..وانا استحالة مزال نزيد حتى ساعه بعد ماتطلع هيا
-وحيد تلفت لسليمه: علاش بتمشى يا خالتى
..اقعدى هنا مع امى ونسيها
-سليمه : لاااا هوا هداكه بايته معاها ليلتين ومسيبة ملاك بروحها ..والله ماعاد نقدر نقعد اكثر
– فضيلة : حتى منغيرك انتى ..اهو قعدنا معاك يومين ياوليدى وشفناك وشفتنا .. خلاص اكثر من هكى تبقى قعدتنا بايخه
-وحيد : باهى زى متحبى اطلعو من الحوش لكن ماترجعوش بنغازى ..بوى عنده هلبا حياش هنايا نسكنكم فى واحد منه
-فضيلة: والله مانسكن فى بيت من بيوت سعيد كان نموت
-وحيد : مش بيوت سعيد ..بيت ولدك ..انا فى شقه بوى كاتبهالى باسمى ..نرفعك انتى والبنات تسكنى فيها
فضيلة سكتت
-وحيد تلفت لسليمه : قولى كلمه يا خالتى
-سليمه : لااااوالله ماعندك حق كان ترفضى يا فضيلة ..مدامه حوش ولدك خلاص ..
-فضيلة : غير وين البنات ..وبعتالى تو نشوفو
-سليمه : لا بعتالى لا سو ..حتى انا مش مع قعدتك هنايا فى حوش العيلة ..فيه شاب وانتى عندك بنات ..لكن شقه ولدكة..صراحة مامعاكش حق ترفضى تقعدى فيها
-فضيلة : منقدرش نقعد هنا فطرابلس وشغلى فى بنغازى كيف ندير فيه
-وحيد : غير شغل شنو اللة تحكى عليه يااام .. مصروفك وعيشتك انتى وخواتى عليا…شنو الشغل هدا اللى تخممى فيه
-فضيلة: وشقتى فى بنغازى واثاثى اللى فيها
-وحيد : نديرلك اثاث احلى منها هنايا..وشقه بنغازى اجريها ..واعطى حق ايجارها للبنات
-فضيلة : كلفتونى والله ماعارفه شن نرد عليكم ..المشكلة انى جيت جرى لما سمعت بيك ياوليدى ..ماخممت فى شى والله عندى مية حاجه فى بنغازى
-وحيد قرب من امه : باهى زيدينى اسبوع نشبع منك …وبعتالى نمشى معاكم بنغازى ورتبى امورك كلها غادى
-فضيلة سخفها ولدها : تعالة يا حبيب امك ..
وضماته لحضنها زى العيل الصغير …
وسليمه واقفه ومتأثرة بالموقف
-فضيلة : باهى موافقه ..نعدو شقتك اليوم
-وحيد فرحان : باهى تمام

______________________________

فى حوش محمد الشيبانى …
-زينب : يابوى هيا …قلتلك هيا فضيلة
-محمد : ياودى بالك غير تشابه اسماء .. فضيلة ساكنه فى الجزائر ليها سنين
-زينب : مش تشابه اسماء .. بناتها قالولى امى كانت متزوجه سعيد ميلاد …وكلنا نعرفو العقربان كان واخد فضيلة نفسها اللى عليها الدوة
-محمد : باهى توة وين المشكلة
-زينب: مانبيش كمال يشوفها ولا يسمع بيها ..يابوى كمال زمان مش نفسه كمال توة …تشوف فيه كيف داير ريش ومعش عندى معاه كلمه
-محمد : زينب بنيتى احنا كلنا عارفين ان فضيلة ماتبيشى ..وهوا اللى تبعها ودار وراها جرة ..وكانها زمان رافضاته خمسين فالميه ..توة بعد قلتى طلعلها ولد حترفضه مية فالمية
-زينب : منيش مطمنه
-محمد : لااااا اطمنى ..
-زينب: ريتها سليمه المنافقه ولا .. تعرف فضيلة من زمان ..وعارفه مكانها ..وعمرها ماجت ووقفت عليا وقالتلى هكى فى ..وهكى فى
-محمد : وسليمه من خبرها بقصه كمال
-زينب: توة بتقنعنى ان فضيلة مش حاكيتلها
-محمد : انا تفتفيت النساوين منحباش..لو لاحظتى اى تصرف من كمال ما اديريش شى تعالى قوليلى طول …اما دوة النساوين تعرفينى منحبهاش
-زينب: انشالله

____________________________

اكحيلة الليل كله مارقدش
الجثة مع الضيوف والعقل مع ملاك
قام تليفونه واتصل …
-اكحيلة : اهلا هشام
-هشام : اهلاااااا سليمان ..كيف حالك يا غالى ليك وحشه
-اكحيلة: والله حتى انت ليك وحشه كبيرة ..كيف حالك وحال الصغار
-هشام : الحمدلله فى خيار الخير
-اكحيلة : نبيك فى موضوع ..انت فى ليبيا ولا برة
-هشام : كيف وصلت اول امس من دبي ..
-اكحيلة : خلاص امالا نبى نتلاقو اليوم نبيك فى موضوع
-هشام : تعال للحوش افضل لو موضوع خصوصى
-اكحيلة : ايه هوا موضوع خصوصى وحساس شوى ..تمام قبل المغرب نجى نزورك انشالله …
وتمت المكالمه وسكر التليفون …
فتح رقم ملاك … بعت رساله …” نحبك ”
جاه تقرير ان الرسالة وصلت …
وفى خاطره : ااه معناها فتحت تليفونها …
كيف بيتصل بيها …جى جنبه رحمونى خو ونيس بو ايوب
-رحمونى : شخبارك يا دولة
-اكحيلة : اخبارى اهيا قدامك ..الحمدلله
-رحمونى : خوى ونيس مادارش طيب لما حكّم علينا ولده ايوب علينا ونحنا اكبر منه
“سليمان حس ان فى شقاق فى عيلة ونيس.. والامور مش تمام ”
-اكحيلة : وليش بس..الولد برغم صغر سنه بس حسيته فاهم
-رحمونى : الولد خفيف وبيقلبها نار حمراء ..وقول رحمونى قال
-اكحيلة : غير بالشوى خلى نفهم منك
-رحمونى: شن تبى تفهم .. يبو يقلبوها كلها نسبه بين الشرق والغرب
-اكحيلة : كيف يعنى
-رحمونى : يبو ياخدو ويعطو ..يبو ياخدو بنت عبدالعاطى ..بيش يعطو بنتهم لحوش الشيبانى عن طريق كمال
-اكحيلة مركز : معقولة
-رحمونى : يحسابو بيدهم ..مايعلموش ان هدا نصيب وفى يد الله
-اكحيلة يجبد فالدوة: بس حسيتك انت مش راضى ولا زى كأنه فى حاجه مزعلاتك فالموضوع
-رحمونى: لاا لا لا نزعل لا شى ..لعلمك ايوب هدا يبي بنتى زكيه من وقت كان صغير ..وكيف دخله باته فى هالموال انقلب دماغه وصبح يفكر زيهم
-اكخيلة : لاااا معنداش حق يسيب بنت عمه
-رحمونى : البنية الف من يتمناها ويتمنى يناسبنى فيها ..لكن الحق كنت نبى ولد عمها ..هوا اولى بيها
-اكخيلة : مدامه ناوى النسبه ليش قلت بيقلبها نار حمراء
-رحمونى : لانه بادى بالباهية ..يناسب وتبدا المصالح وحدة ..ولو ماصارش من النسبه ..ولا فتحوله الممر ..بيخلى السلاح هوا اللى يتكلم
-اكخيلة : بس لو السلاح تكلم بتجى على راسه وراس اللى بيسانده ..لان عددنا احنا اكثر
-رحمونى : بس انتو مش يد وحدة كيفنا ..توة احنا بالرغم مش راضيين عن كونه ايوب رايس علينا ..بس منطاعيلة وكلمته ماتنزلش للوطا
-اكخيلة : وانت ليش خبرتنى بسر زى هدا
-رحمونى : عشان مانبي الدم بيناتنا بسبى شباب طايش ..حبيت نحطك فالصورة انديرو حد للموضوع
-اكخيلة : والله انك كبرت فعينى يا رحمونى

___________________________

ملاك مارقدتش من البكى …
عملة لما حبيبك يجى يخطبك وانتى تقولى منبيش ..
وخاصة ان فى مشكلة بيناتكم
ملاك خافت ان سليمان يزعل من موقفها ويفوتها …مقدرتش تكلمه ولا تتصل بيه …سكرت تليفونها وخلاص ..
الصبح قامت تليفونها واتصلت بسليمه
-ملاك : الوو
-سليمه : اهلين ملاك خيره صوتك متغير
-ملاك تبكى : صارت هلبا حاجات ..غير روحى اليوم ضرورى
-سليمه : باهى غير معش تبكى..انا اصلا بنروح هوا هداكه ..كيف قلت لوحيد يوصلنى
وصلت رسالة لتليفون ملاك من سليمان كاتلبها “نحبك”…ولانها تتكلم بالتليفون ماشافتهاش
-ملاك : سليمان وينه
-سليمه : وين ندرى يا بنيتى من اول يوم معش ريته فالحوش
-ملاك : باهى غير سقدى روحى ضرورى
-سليمه : حاضر

_________________________

اكحيلة صلى الضهر جماعه مع الضيوف …وجى بيطلع ..
غمز لسلطان ..طلع وراه
-سلطان : شنو الجديد
-اكحيلة: شنو السلاح اللى فالمخزن
-سلطان انتبه ان فى حاجه : اموره طيبة انشالله
-اكحيلة : انا طالع شوى ..ابعث الشباب يطمنو عالعدة ..شاام ريحه مش تمام
-سلطان : احكيلى قبل ماتطلع
-اكحيلة : كنت بنمشى المغرب.. لكن لقيت ضرورى نطلع توة ..
-سلطان : غير وين ماشى طمنى
-اكحيلة : ماشى لهشام
-سلطان : هشام متع دبي
-اكحيلة : بالزبط
-سلطان : وهشام شن علاقته بموضوعنا
-اكحيلة : نبيه فى موضوع ثانى شخصى
-سلطان : اهاا ..تمام ..غير متعطلش
-اكخيلة : تم..غير دير اللى قلتلك عليه
وركب سيارته وطلع …

________________________

وصل اكحيلة حوش هشام صاحبه …
كلمه فالتليفون
-اكخيلة : انت وين
-هشام : انا فالخوش
-اكخيلة : باهى افتح الباب
-هشام : مرحبتين بيك يا راس
وطلع هشام فتح الباب ..واضبط سليمان ليه فترة مش شايفه …
وخشو للحوش وطلب من غادة اديرلهم قهوة …
دارت غادة القهوة ..وطقت عالباب ..
-هشام : تعالى يا غادة ..تعالى سلمى على سليمان
-سليمان تحشم : خليها براحتها يا راجل
-تنحنحت غادة وخشت : السلام عليكم
-سليمان وقف : وعليكم السلام ..اهلا بيك اختى
-غادة : اهلا بيك خوى سليمان تشرفت بمعرفتك
قعمز سليمان : مشكورة
حطت غادة سفرة القهوة وطلعت ..
-سليمان : شنو الامور اطورت يا هشام
-هشام ?: الباين عليها اطورت يا اكحيلة
-سليمان : باهى كويس وليش زعلان امالا
-هشام : يا راجل البنت عجبتنى ..رزينه وتصرفاتها مش زى تصرفات اختها ..الحق فرق السمى عالارض
-سليمان : المدة اللى فاتت لما جيتك مكنش فى هالموضوع
-هشام : بعد ماجيتنى انت سافرت ل دبي ..ورجعت يومين وطلعت ثانى سافرت للمغرب
-سليمان : باهى
-هشام : طول السفرتين وهيا معاى بالتليفون وبالسكاى ..كان تعبت معاى وكانا زعلت معاى وكانا مرضت معاى وكانا فرحت معاى
-سليمان منتبه ويضحك : باهى كمل ..
-هشام : شن بنكمل .. انا طحت وهيا ولا حاسه بيا
-سليمان : لماتبدا فى حضنك حسسها بحبك ليها
-هشام : حضن شنو ياراجل وكل حد مننا فى دار
-سليمان : قصدك قاعدين لتوة كل حد منكم فى دار
-هشام ?: قاعدين لتوة
-سليمان : اسمع يا هشام ..هما مايعرفوش يكونو جريئات زينا ويبدو بالموضوع ..لازم انت تبدا وتفرض نفسك وحبك عليها
-هشام : انا الحق مخليها براحتها
-سليمان : تى راحة شنو ياراجل وانت ضاعف النص وحالتك حالة ..هادى مرتك ولا ..حلالك
-هشام : الحب واعر ..لكن حلو ..ربي يدوقهولك يا اكحيلة ..
-سليمان تكى راسه لتالى عالصالون : امالا انا ليش جايك توة
-هشام : احكى شن فى

____________________________

مريم انخنقت ..وخافت دموعها تفضحها قدام خالد
-خالد : انا اختى نعرفها مستحيل تبدلنى بحد وخاصه كلب زى هدا
-مريم : انا مفهمتش منو سليمان اللى عليه الدوة
-خالد : تى ماهو قلتلك اكحيلة
-مريم راسه قريب يدوخ : وهوا اكحيلة منين يعرف ملاك
-خالد : ميعرفهاش ..اختى ملاك ماتتنازلش وتتعرف عالشكالات هادى
-مريم : وانت من قالك انه خطبها
-خالد : خيرك تودرى يا مريم ..تى ماهو قلتلك هوا بنفسه خطبهامن كمال
-مريم : وكمال شن قال
-خالد : كمال موافق
-مريم : وهيا شن قالت
-خالد : اوووووه تحقيق هوا …هيا قالت اللى بيديره كمال ماشى عليا ..لكن انا خيرتها يا انا يا هوا …قالتلى والله مانتخلى عليك يا خوى
-مريم تتأكد : يعنى رفضتوه خلاص
-خالد : انا قمت التليفون وعطيته جوابنا اننا رافضينه
تنفست مريم شوية هوا ..وارتاحت
-خالد : ترا ديريلى قهوة
-مريم لقتها فرصه بيش تنوص : باهى
وناضت بدل ماتخش للمطبخ خشت للحمام ..ومعش تحكمت فى نفسها …بكت بالعبرة .. بكت عالراجل اللى تحبه وتتمناه يقعدلها راهب ليها هيا بس ..حتى لو ماحبهاش وماتواصلش معاها ..المهم يقعد ليها وبس

_________________________________

-هشام : وانت من قالك انها صاحبة غادة مرتى
-اكحيلة : المرة اللى فاتت تلاقيت معاها وهيا طالعه منكم ..وسألتها عليكم قالت ان زوجتك صاحبتها
-هشام : ماشالله الله يبارك معناها ليكم فترة مع بعض
-اكحيلة : بالزبط ..وانا ضرورى نشوفها بسبب الاشكاليه اللى صايرة ..ومعنديش الا حوشكم نشبحها فيه
-هشام : خلى نخش نشوف غادة ونحكيلها وانشالله خير
وبالفعل خش هشام لغادة وحكالها ورحبت انها تكون هيا وهشام ضلع فالموضوع ويساعدوه
-اكحيلة: اختى انا مانبى منك شى الا تجيبيهالى هنايا .. منغير حتى هيا ماتعلم ..لانها مرات تخاف تصيرلها مشكله وترفض انها تجى ..فهمتى عليا اختى
-غادة : فهمت عليك
-هشام : خيرك شادهالها اختى اختى…عارفينها اختك .. بس تقدر تناديلها غادة
-اكخيلة : باهى هيا يا غادة ورينا شطارتك
-هشام : بالشوى عليك وانت مستعجل
-اكخيلة : معش عندى صبر
-غادة : لحظه بس نخش نتصل بيها ونجيكم
وبالفعل خشت غادة واتصلت بملاك
-ملاك : خليها غدوة وراس غادة
-غادة : نقولك مسألة حياة او موت خيرك ماتبيش تفهمينى
-ملاك : حبيبتى والله مانبى نشغلك ..انا والله صايرة معاى قصه وعيونى منفخات من البكى ..خلينى نجيك يوم ثانى
-غادة: مالاخير انا مسافرة الليله طيارتى العشرة فالليل ..بتجينى ولا كيف ..قلتلك الامر مهم هلبا ..وكانا على عيونك مش اول مرة نشوفهم منفخات خيرك
-ملاك : باهى تو العشيه نجيك
-غادة : قلتلك توة ..العشيه بنمشى لامى نسلم عليها..وبنمشى للمطار طول
-ملاك : واااك منك ياغادة كانا شديتى فالحاجه ..باهى اهو تو نجى
ناضت ملاك دارت دوش .. وسرحت شعرها ..ولبست وطلعت بتمشى لغادة..وكالعادة كلمت كمال بلغاته بطلعتها …
وهيا طالعه لقت سليمه كيف خاشة
-سليمه : وين ماشيه
-ملاك مكتئبة : ماشيه مشوار صغير لغادة صاحبتى ..خشى انتى وتو نروح انا منعطلش
-سليمه : خلى نمشى معاك
-ركبت ملاك سيارتها : لا لا مفيش داعى مانيش معطله..خشى انتى اكيدة راك تعبانه …
خشت سليمه للحوش ..وولعت ملاك سيارتها ومشت لحوش غادة

______________________________

كمال قدام استراحة سلطان
-كمال : هيا وينك
-خالد: هانى جاى فالطريق قريب نوصل
-كمال : بسرعه ..الاجتماع الثانى قريب يبدا ..حتى الجدر نسيبك وصل
-خالد : انت خشيت
-كمال : لا ..لكن نشبح فى سيارته والحرس متاعه
-خالد : اهو شوى وبنخش فتحة الاستراحه …
خش خالد ووقف بسيارته جنب سيارة كمال
نزلو مع بعضهم وخشو للاستراحة …سلمو عالتريس المقعمزين …وقعمزو
سلطان يتكلم فالتليفون
-سلطان : خلاص الكل حاضر حتى صغار عمتى جو
-اكحيلة : اهو قريب نكمل الموضوع اللى فى يدى ونلحقكم
-سلطان : الجدر من بكرى يسأل عليك ..ومش حلوة فى حقه يقعد يراجى فيك
-اكحيلة : مديرليش الجو يا سلطان ..انتو بتتغدو قبل ..وانا مش لازم نحضره الغدى ..نكمل اللى فى يدى ونجيكم
-سلطان : اللى فى يدك اهم من اجتماعنا ومن الجدر
-اكحيلة : اهم من حياتى كلها
-سلطان : انت مع ملاك
-اكحيلة : ياريت .. اهو ندير فى محاولة وانشالله تنجح
-سلطان يضحك : ربي يعاونك يا رومنسى .. وإلك عليا معش نزعجك لين تجى بروحك ??
-اكحيلة : انشالله منعطلش عليكم …
سكرو الخط ..وشرين جرس الباب متع حوش هشام …
وبدى قلب سليمان يطق..مايحسابش روحه ضعيف هلبا هكى قدامها
طلعت غادة وفتحت الباب …سلمت على ملاك ودخلتها للصالة
-ملاك : شنو مسألة الحياة والا الموت اللى تبينى فيها
-غادة : مش انا
-ملاك : مفهمتش كيف يعنى مش انتى
-غادة خدت ملاك من يدها ورافعتها للمربوعه : يعنى مسألة الحياة والموت مش معاى انا …مع ناس ثانيه داخل المربوعه يراجو فيك من بكرى ..
-ملاك زى اللى حست : منو قصدك
-غادة مبتسمه : خشى وشوفى بنفسك
رجعت غادة للصالة …وفتحت ملاك باب المربوعه تلاقى اكخيلة قدامها …
-منغير ماتحس بنفسها مشتله تجرى : سليمان
-قامها سليمان فى حضنه ..وقعد حاضنها وقت : حبيبتى
-ملاك : يا عمرى انت
-سليمان : حبيبتى انتى ومانتحملش فراقك يوم
-ملاك حاضناته : نحبك يا سليمان ..
ونزلت من حضنه وقعمزو عالصالون …وايديهم فى بعضهم …
-اكحيلة : ستاحشتك
-ملاك : وانا اكثر يا عمرى
-اكحيلة : تحبينى
-ملاك : قول تموتى فيا والا لا
-اكحيلة : انتى حبي ونور عيونى
-ملاك عيونها دمعو : والله اللى صار مع خالد ..
-قص عليها : انا فاهم كل اللى صار ..وعارفك تحبينى زى ما انتى عارفه ومتاكدة انى نحبك
-ملاك : معناها عادرنى حبيبي
-سليمان باس ايديها الزوز: قلتلك انتى روحىىىىى…راهو مش ساهلة الكلمه هادى
-ملاك : وكيف بنديرو توة
-اكخيلة : الفعل فعل الله ..وخالد عندى ليه الف طريق نقدر نخشله منها
-ملاك تبكى : بس منغير ادى
-اكحيلة يمسحلها فدموعها : ياعمرى انتى ..لهدرجه تحبي خالد
-ملاك : خالد وكمال روحى وقلبي
-اكحيلة يغيرلها فى جوها : بنبدا فالغيرة ..وانا سنو امالا
-ملاك مبتسمه : انت حياتى وكل عمرى
-اكحيلة : تتزوجينى
-ملاك فرحانه : وقاعد تسأل
-اكحيلة : ماهو اعطينى الراى بيش على اساسه بنتصرف موافقه والا لا
-ملاك : طبعا موافقه
-اكحيلة : باهى …انتى معش تتصرفى اى شى ..وخلينى انا اللى انتصرف
-ملاك ?: حبيبي سامحنى عالكلمة اللى قلتها لك يوم غدا المطعم متع خوات وحيد
فتح سليمان ايديه وضمها ليه: انتى تمونى فوق راسى ..
-ملاك فحضنه : بالرغم جتنى وحدة ثانية وقالتلى انك مرافق وحدة وتطلع معاها لما تكون متخاصم معاى
-سليمان حاضنها ويضحك : انا حاير علاش الناس تجيك انتى بس وتعبي فى راسك عليا ..علاش مايجونيش انا ويعبولى راسى عليك ??
-ملاك : بيش تعرف بس انى عاقلة ومايقدروش يقولو عليا شى
-سليمان : والله والله مافى فحياتى غيرك حبيبتى
-ملاك : نحبك
-سليمان : معناها متفاهمين ..نبدا انسق امورى بحيث انى نخلى خالد يوافق
-ملاك : على طول …
وقعدو فى حضن بعض يهدرزو ..رد لملاك الروح بعد ماكانت حاسه ان عمرها ضاع منغيره …
كملو هدرزتهم ونادو غادة وهشام وقعدو يهدرزو معاهم …وتعارفو الاربعه على بعض عالمزبوط ..
خداهم الوقت للعشية ماحسوش
لما قرب المغرب ..ستادن اكحيلة منهم ان ملاك معش وقت عليها ولازم تروح ..
وطلعت ملاك بتروح وشكرت غادة على وقفتها معاها ..
وركبت سيارتها وروحت ….واكحيلة نفس الشى ركب سيارته ومشى لاستراحة سلطان

_____________________________

اكحيلة ماشى فالطريق ويتصل بسلطان يبي يسأل عالاجتماع بدى والا لا ..
وسلطان ميردش ….
قرب من الاستراحة يسمع فى ضرب رصاص …
عفس عالسيارة سقد روحه ووصل قدام الاستراحة وقف السيارة ونزل بسرعه
يلقى هداكه الجنان يهوج ويموج ضرب سلاح بين جيهتين مزبطش منو
فتح البوابه وخش وقف من الصدمه
فى صوت وراه ينادى: يا اكحيلة ..يا اكحيلة
تلفت يلقاه خالد مضروب بالرصاص والباين كان لداخل وطلع
-مشاله اكحيلة : خيركم يا خالد شن فى
-خالد قريب يدوخ : ضربنى الكلب ايوب ..اسعفنى يا اكحيلة دمى بيتصفى
مشاله اكحيلة وقامه على كتفه زى شكارة السكر …ومشى بيه لسيارته رقده عالكرسى اللى جنبه
وطااااار بيه لمستوصف صغير فيه دكتور معين يمشوله لما حد منهم ينضرب ..بيش مايكونش فى سين وجيم
وبالفعل الدكتور دخل خالد …ولكن خالد يحتاج لعمليه جراحية ..معناها لاااازم ينقلوه للطبي او مستشفى الحوادث ….
وبالفعل جابو الاسعاف ونقلوه على مسؤليه الدكتور لانه عنده معارف
ودخلوه للعمليات …..
واكحيلة يتصل بسلطان باله مشغول عليه وسلطان ميردش …..وانشالله خير

_____________________________

تمت …ويتبع

اوووووف دهشت …غدوة نشوفو خالد شن بيصير فيه بيطلع من تحت العملية ولا بيودع
وسلطان الغزال ..غبارة خيره ميردش عالتليفون
..نهارات البيض كان ماضربوه حتى هوا بالرصاص
عموما غدوة نعرفو ???

نحبككككم 

error: