رواية اكحيلة

#اكحيلة

??للكاتبة زهور جمال الدين ??

??الحلقة الثالثه والعشرون ??

روحو ملاك وسليمان من الاردن ..
وطبعا عمك سعيد يتحشم من ولده ومايسألش فيه..لكن ديما يقصقص من المخلوف والمرزوقى
وعموما حتى سليمان يحكيلهم لما يسالو فيه عارف السؤال من بوه مش منهم …

جلال جاييهم متغدى عندهم …
خشت ملاك سلمت على خالها وهلل بيها هلبا بالرغم ماعندهاش هاديكا العلاقة بيه
حطت سفرة الشاهى وبتطلع
-سعيد : قعمزى يا ملاك خيرك ..هدا خالك مافيش حد برانى
تلفتت لسليمان كأنها تشاور فيه ..فابتسملها انه قعمزى عادى
ساوت ملاك حجابها وقعمزت عالصالون
-جلال: شن حالها بنت اختى معاكم ..زى امها ولا شنو
-سعيد : انا الحق امها منعرفهاش ..لكن بنتى ملاك ماجاب حد زيها كنه لتوة
-جلال : باهى ربي يخليهالكم بنتكم انشالله
-ملاك : وانتم شن حالكم غادى يا خالى وشن حال العويلة
-جلال : الحمدلله فى خيار الخيرر..ماشيين كلهم عمرة ..وكانو بيزيدو اسبوعين ثانيات لكن الوضع مايطمنش قلتلهم روحو ..
-سعيد : وخدو كلامك وبيروحو
-جلال : امالا مازال بيقعدو.. غدوة طيارتهم توصل انشالله
-سعيد : وانت خيرك مامشيتش معاهم عمرة ولا مزال صغير على غسل الدنوب
ملاك تضحك
-جلال يضحك : ايه اضحكى عجبك كلام عمك ماهو
-ملاك : عمى سعيد ديما هكى يحب ايبصر
-سليمان : مفهمتش انت جاى بتروح بيهم قصدك
-جلال : لا والله احنا مناديينا جماعه المقاومه الشعبية .. كل الشعبيات عندهم اجتماع بعد غدوة فى قاعه الشعب
-ملاك : والعويلة بيقعدو هنايا ولا بياخدو طيارة سبها طول
-جلال : لا والله بيقعدو قيس الاسبوع فى حوشنا فى طريق المطار ..وبعتالى بنروحو مع بعض انا وياهم فالسيارات
-ملاك : تو نقول لسليمان يرفعنى ليهم
-جلال تلفتله : تعرفه الحوش اللى شريته جديد ولا
-سليمان : زابطه ايه
-جلال : خلاص هوا هداكه اللى بنقعدو فيه

_______________________________

فى حوش عبدالعاطى

-خالد : امالا انا علاش ثلاث شهور قاعدهم برة
-منير : حولتهم الفلوس كلهم قصدك
-خالد : ايه طبعا حولتهم ..البلاد قالو بتخش بعضها والكلام فالاكيد
-منير : وخيركم ماقلتوليش
-خالد : انت موقع لكمال ولا ودايرله تفويض..خلاص اللى بيديره هوا ماشى عليك انت..ولا ماتبيش
-منير: لا شن بنقول انا اللى درتوه باهى
-خالد : كمال خيرك ..ليك ايام مش عاجبنى
-كمال قام راسه : شن قلت
-منير: حتى انا مش عاجبنى يا كمال راهو خيرك فى حاجه ..احنا خوتك ماعندك لمن بتحكى غيرنا راهو
-كمال : انا نبى نتزوج
-خالد : ااه ..شن تقول انت ..وزينب ..وكانا فوتت زينب بيسكتلك خالك
-منير: وكانا سكتله خاله بيسكت سلطان ولد خالك
-كمال : انا لا قلت بندور ولا قلت بنصيع ..انا طالب الحلال على سنه الله ورسوله
-منير: وخيرها زينب مازالت صغيرة ومهتمه بنفسها
-خالد : فضيلة !؟؟
كمال قام راسه وهزه ..بمعنى ايه
-خالد : الله اكبر…قاعد مانسيتهاش
-كمال : لا منسيتهاش ..ونزيدك ثانى انى لقيتها
-خالد استغرب : ااه لقيتها ..وين لقيتها
-منير: تى على شنو تحكو فهمونى
-كمال: شوف الدنيا مصغرها
-خالد : قالك الدنيا زى حكه الطمام وكلنا معجونين فيها ..اللى تحسابه بعيد تلقاه عند كعب رجلك
-منير: ماتقوليش عمتى فضيلة نسيبت سلطان ولد خالى
-كمال تفاجأ: قصدك تعرفها يا منير ..
وحمق ووجهه احمر: وخيرك ماقلتليش عليها من زمان
-منير: وانا منين نعرف انك تعرفها ولا عندك علاقه بيها اصلا
-وقف كمال : انا اهو بلغتكم ..وبادن الله بنحاول مع ولدها ..كانا عطاهالى بتمشو معاى
-خالد : بنمشو معاك امالا بنخلوك على خاطر سلطان ولا بوه
طلع كمال من المكتب وسكر الباب وراه
-منير: تووووة فهمنى من فضيلة وشن قصتها

_____________________________

بعد ماتغدا جلال …

مقعمز هوا وسليمان وسعيد بروحهم

-سعيد : انت متأكد يا جلال
-جلال : قلتلك بنغازى شبه طاحت خلاص ..وكانا معش قدر يردها بيخليهم ينفصلو عن طرابلس شعبيه بروحها
-سليمان : باهى انت ليش مروح فى سيارات للجنوب .. شن بطلع معاك
-جلال يضحك : ديما فالح يا اكحيلة ومايفوتك شى ..ياسيدى عندى فلوس وعندى دهب فطرابلس ..شنو كانا صار ماصار مازال تنخش هيا
-سعيد : لاااا كانا صار ماصار واعر القعاد فيها
-سليمان : لو صارت حاجه انت ووحيد وملاك اكيد بنطلعكم من ليبيا كلها يا بوى
-سعيد : وانت عابى بتقعد امالا ..تى والله رجلى قبل رجلك
-جلال : ماديرش لولدك هكى يا حاج سعيد وترهنه
..شنو بتطلعو كلكم وتخلو ارزاقكم ولا كيف
-سعيد : لا تو نخلى ولدى بعدى ايديرو فيه مايبو
-سليمان: ياودى علاش توة طايحين قبل الضربة ..غير يصير وبعتالى لكل حادث حديث
-جلال : ربك يستر وخلاص
-سليمان : انتو كيف بديرو وشن الراى عندكم فالجنوب
-جلال: لااااا لا احنا كلنا معاه قلبا وقالبا ..مش نفاق ..لا لا بقلوبنا نحبوه
-سعيد : هوا الشعب كله يحبه راهو
-سليمان : مش الشعب كله يابوى فى هكى وفى هكى
-جلال: امالا انت معارض يا اكحيلة
-سليمان : انا لا مع ل ضد ..فخار ايكسر بعضه

__________________________

ملاك فى شقتها حاطه السماعات فى ودانها ..وتكلم فى غادة صاحبتها عالنت بالفيديو

-ملاك : ماشالله بدت بطنك تطلع
-غادة : ماهو على خاطر هما تؤام ?..هدا علاش بطنى كبرت فيسع..العقبالك ياملوكه
ملاك عيونها تعبو دموع لما سمعت كلمت عقبالك ومع هدا غصتهم ماخلتهمش ينزلو
-ملاك : ماشااالله الف مبروك عليك حبيبتى غادة
..شن قالولكم ولاد ولا بنات
-غادة : مازال مش باين لتوة

فتح سليمان باب الشقه وخش ..اشرتله ملاك مايقربش لانها فاتحه الفيديو …

-غادة : منو جى سليمان
-ملاك : ايه
-غادة : سلميلى عليه وربي يحفظكم انشالله
-ملاك : سلمها حبيبتى وربي يحفظكم حتى انتو ياااارب
واستادنو من بعضهم وسكرو المكالمه …

جى سليمان قعمز ورا ملاك وحضنها …
-اكحيلة : بنقولك كلام ..ونبيك تقولى حاضر وبس
تلفتتله وقاعدة لاصقه فيه وتضحك : ومن انتى الوعارة هادى
-قرب من وجههة ويفنص : من اليوم…..
وبدى يضحك ….
-اكحيلة : لا والله نتكلم جديات
-ملاك : باهى قول هى
-اكخيلة : حبيبتى لو صار ماصار بنطلعك انتى وبوى ووحيد برة ليبيا
-ملاك ?: وانت !!!
-اكحيلة : انا بنقعد هنايا فالحوش تحسبا لاى موضوع او نهب رزق
-ملاك ببرود : تعرف شن خاطرى
-اكحيلة : شنو
-ملاك : خاطرى فى حضن منك
-اكخيلة : لوكى حبيبتى انا نحكى بجديات راهو
-ملاك : وانا اقسم بالله نحكى بجديات …
-اكحيلة يضحك : باهى تعالى
ناضت ملاك من مكانها ..وقعمزت على رجليه وفتحت ايديها حضناته بالقوة وهوا نفس الشى
-قربت من ودنه: نقولك حاجه
-اكحيلة : قولى
-ملاك : الا الحكاية هادى بعيدة على سنونك
-اكحيلة يضحك : حكاية شنو
-ملاك : حكاية ان انت فمكان وانا فمكان ثانى
…فوتها وانساها وحولها من دماغك ..انا لا ام ولا اب ..وبتزيدنى انت مهناش ..هادى واعرة عليا
وغص صوتها وبتبدا تبكى
يبي يضحكها : غير تعالى تعالى ..انتى قداش ليك يوم ماقلتيليش نحبك
-ملاك : سليمان انا نحكى بجد راهو
-اكخيلة : وانا والله نحكى بجد …
بعدت وجهها من ودنه شوى وقربت من وجهه: نحبك
-اكخيلة : نعم
-ملاك : نحبك
-اكحيلة : ااه ماسمعتكش
-ملاك تضحك : بلا جو عاااد
-اكحيلة : انت ماتنفعش معاك وسعت البال هنايا
..تعالى دار النوم تو نسمعك كويس
وقامها بين ايديه وهيا تضحك وتدلع : اهفت مبردك

______________________________

-منير: نبى نفهم
-خالد : اوووه علينا عاد قصه قديمت شن تبى تفهم فيها
-منير: القصه القديمه هادى نبى نفهمها انا …
-خالد : ياسيدى خوك كمال خدم فترة فالجنوب ..باعته بوك…شوره تعرف على فضيلة وهيا كانت مدرسة فى مدرسة ابتدائية
-منير: باهى
-خالد : شكلها تجاوبت معاه ..قالتله انجيك بالصدق انا مطلقه من سنين وعندى ولد وتوفا
-منير: باهى مليح
-خالد : شوره هوا قاللها كانا يجيك حد متزوج تقبلى… قالتله هيا مانقبلش مستحيل
-منير: باهى
-خالد : المهم كمال عجباته وقعد متواصل معاها وهيا تبى تفهم راسها من رجليها قالتله انت شن وضعك قاللها مطلق زيك …
-منير: وعلاش كدب عليها ..قاللها عالحق وقبلت ولا انشالله ماقبلت
-خالد : ماهو قوله …هوا المفروض قال الحق
-منير : باهى وبعتالى شن صار
-خالد : قول البنيه قعدت اتكلم فيه قيس الشهرين ..وبعتالى ترا منو صاحبة خير نورتها ..قالتلها راهو كمال واخد بنت خاله وعنده منها ولد
-منير: الله لا تربحهها خربت عليه…باهى وبعدين
-خالد: ولا قلبين …خوك كمال شكله عشق فيها وقاللها نطلق مرتى وناخدك ..لكن هيا الباين بنت اوصول مابتش اتخرب حوش خوك وفاتاته
..ووجعتها كيف كدب عليها وسكرت عليه الباب نهائي
-منير: صار بدت قصه العشق الممنوع باهى وبعتالى
-خالد : خلاص لما هيا فاتاته صار فيه ماصار وحالته ادهورت زى ماتشبح فيه توة ..وزينب سمعت ودارت عراكات ومشاكل وخش خالك فالموضوع ..وفى لحظه خوتها جوزوها وسافرت برة ليبيا ومعش سمعنا عليها شى
-منير: ياوالله قصه …باهى وتوة كيف
-خالد : اهو توة قالك ناخدها ناخدها …ربي يستر من خالك ومن ولده سلطان

_______________________________

وصار ماصار فى ليبيا …

وبالفعل خشت بعضها ….
واكحيلة على قد ماشد فى بوه يطلع ماباش …
وملاك طبعا نفس الشى …بالرغم مريم وزينب وسيرين سافرو لتونس ..وقالولها تعالى معانا لكن هيا رفضت …
وحيد مشى للزنتان مع صحابه ..
بصعوبة بيش حصل رقم ثريا متع واحد معاهم غادى وكلمه
-اكحيلة : هكى ادير فيا يا وحيد …هادى جزاتى معاك ..تمشى منغير ماتشاورنى
-وحيد : ماهو كانا شاورتك بتمنعنى
-اكحيلة : انا حرت فى يوم وليله عطيت اختك ايناس لهيثم صاحبك لا درتو خطوبه لا عطلتو هكى فيسع فيسع درت العرس طول
-وحيد : نبى نهنى عليها ماتعرفش الدنيا شن يصير فيها
-اكحيلة : هيا تهنى عليها وترتاح وانا ادير فيا هكى وتشغلنى
-وحيد : شن درت انا يا اكحيلة ..هادى بلادنا والناس كلهم خشو يدافعو مش غير انا
-اكحيلة : ياوحيد الجبل كله مش منه احنا ..تو كانا جو لمنطقتنا معاك حق ادافع وانا معاك ..لكن يا وخى كل ايد تمسح على وجهه مولاها
-وحيد : انت مقتنع بالكلام اللى تقولى فيه ..كيف الجبل كله مش لينا ..هادو صحابى واهلى وناسى واحبابى كيف تبينى نسيبهم ونقوللهم بلادكم مش بلادى ..تى ماهو كلها ليبيا
-اكحيلة غصراته العبرة وصوته واضح بيبكى: ياوخى روح ..اهو نمشى انا مكانك لكن انت ماتموتش
-وحيد : تى شنو بتبكى يا اكحيلة ولا كيف ..شنو انا مش راجل ..
-اكحيلة بدى يبكى خلاص: ماهو انت مش احرش ..مش متعود ..انت ادور وتسافر وتدهور وتصرف ..لكن هالخبر كله مش ليك
-وحيد يبكى: الا دموعك انت يا سليمان وانت تعرف انت شنو بالنسبه ليا …والله والله لو ماسجلت نفسى فالقوائم كنت روحت على خاطر دموعك هادى…لكن توة خلاص عفست واسمى اتسجل واعر نترجع ونطلع….نتراجع يعنى موتى فى سجونهم
-اكحيلة تعصب: وعلاش ماشاورتنيش قبل ماتمشى
…علاش ماقلتليش
-وحيد : لانك مش حتخلينى ..
-اكحيلة : باهى وامتى بتجى ونشبحوك بوك قريب يموت عليك راهو
-وحيد: تو نديرلكم زرقه انشالله المدة الجايه ماتخافش …
-اكحيلة : والمرزوقى ليش رافعه معاك ..مش عيب عليك الراجل تحصله حتى هوا
-وحيد : والله ماجى الا باردته ..على قد ماقلتله روح ومش عمرك ماباش
-اكحيلة : عطيهولى كانه جنبك
-وحيد : اهوا …
وينادى:مرزوقى .. يامرزوقى تعالة كلم سيدك سليمان
جى المرزوقى فرحان : اهلين بسيدى اكخيلة
-اكحيلة : الغدر مش طبعك يا مرزوقى
-المرزوقى : والله هوا حلفنى يا سيدى انى مانقولك
وقالى ماعاد نشوفله وجهه كانا نبلغك وهوا جاى جاى
-اكحيلة : وانت علاش ماشى
-المرزوقى : وانت تعرفنى نقدر نخلى سيدى وحيد بروحه
-اكخيلة : رد بالك منه يا مرزوقى .. حطه فعيونك ماكلته وشرابه وغطاه
-المرزوقى : منغير ماتوصى يا سيدى اكخيلة
..وسلملى على سيدى سعيد ومخلوف وملوكه
-اكحيلة : انشالله يبلغ
وحيد يكلم فالمرزوقى : اعطيهولى ترا
وخدى التليفون : اسمع نبى منك حاجتين
-اكحيلة: شنهما
-وحيد : الحاجه الاولى امى فى حد طلبها منى المدة اللى فاتت وتعاركت معاه ولزيته ..لكن توة ماصارليش غيرت رائي نبى نهنى عليها و نعطيهاله
-اكخيلة مستغرب : امك !!!!…ولمنو تبى تعطيها
– وحيد : كمال نسيبك جى طلبها منى ورفضت .. لكن توة نبيك تمشى لامى تقوللها ولدك وحيد يبيك تاخديه …الحق الراجل كويس ومطمن عليها معاه
-اكحيلة : هوا توة فل تونس … خلى يروح ونمشولها انا وياه
-وحيد : رد بالك منها امى وراس اوخى
-اكحيلة : فعيونى …ووالله على قد ماشديت فيها تجى عندنا للحوش مابتش
-وحيد : نعرفها عنايدية وراسها كاسح .. غير دير الموضوع اللى قلتلك عبيه بس
-اكحيلة : كون هانى يا وحيد ….وشنهيا الحاجه الثانية اللى تبيها
-وحيد : نبيك تدعمنا بالمال ..رؤوس الاموال كلها تدعم منغير مايندكرو اساميهم …شوف روحك وكانك موافق تو نعرف انا كيف انرتب الموضوع ونبعتلك ناس ثقة تعطيهم الكاش
-اكحيلة : انشالله خير غير رد بالك من روحك بس يا وخى

_____________________________

فى تونس

كمال ماشى لتونس يطمن على عائلته غادى
-زينب : هوا احنا نشروها الشقه افضل
-كمال: عاد انا كانا بنشري ونويت الاستقرار خارج البلاد نشراها فى مصر
-زينب: سلطان خوى شرى وحدة فى مصر تحسبا لو زادت اتبهدلت القصه ورفع مرته وامى وبوى غادى
-مريم : احسن مادار ..بوى على قد ماشديت فيه ماباش يطلع ..قال منخليش رزقى
-كمال: قولى ربي يحفظه وخلاص..والله مافى حاجه اطمن وقالو حتى الناتو بيضرب
-سيرين : انشالله لا يا بابا خسارة بلادنا محلاها
-كمال: انتى بالدات خايق عليك يا سيرين ..فى تونس هنايا لبستك مايبوهاش راهو
-سيرين تنرفزت : انا مش حنطلع الا فالملايه يا بابا.
واللى بيصير خليع يصير
-تلفت كمال لزينب : المهم زى مافهمتك ..موادك الغدائية تاخديها من المحل اللى لوطا ولما انا نجيكم تو نتحاسب معاه …
-مريم : حتى خالد قالى نفس الشى
-كمال : ماقسمناش انا وخوى يا مريم
-مريم : لا ااا ماشالله ربي يحفظكم الحاضر ايسد
____________________________

نهاية شهر 3
بعتو لاكحيلة استدعاء من جهاز امن مش معروف تابعين اى جهاز ….
اتصل بيه عمك ابراهيم الجدر وجلال يسألو فيه كيف الدبارة لانهم جوهم نفس الاستدعاءات
-اكحيلة : انا بنمشى ..ونشوفوهم شن يبو
-جلال: خلاص انا الفجر نكون فطرابلس

وبالفعل مشو للاجتماع السري 23 شخص …..
وطلبو منهم طلب غريب .. طلبو منهم ايزيدو ضخ للسوق الليبي من بضاعتهم ويكثرو البودرة ومفيش عليهم رقيب

-سليمان : انا البودرة عمرى ماتاجرت فيها…انا خدمتى عطارة واعشاب بس
-ضابط من الجهاز : انت اضخ للسوق فى بضاعتك برعايتنا احنا من زمان ..وانت عارف الشى هدا ….
واللل نطلبوه احنا بتوفره
سكت اكحيلة وماباش يناقش…
تم الاجتماع وجو طالعين ….
شوى تكلم ضابط : وين اكحيلة
تلفتو كلهم مع بعض 23 راجل
– سليمان : انا اكحيلة
-الضابط قعد يشبحله : اهاا ربي يعاونك
-سليمان : مشكور

وطلعو ….وتوجهو طول لاستراحة ابراهيم الجدر يتناقشو
-الجدر “معارض”: والجهاز تابع منو يا راجل
..ماتغطيش عين الشمس بالغربال
-جلال “مؤيد” : هادو خدمتهم من روسهم والكل غارف هكى.. هوا علاش بيطلب ابودرة اضخ فالبلاد ..شن بيستفاد
-الجدر: ماهو قلت دبارة ..الباقى نغرق السوق بيها ..ومن بيدفعلى وكلها دارت شناطيها وطلعت من البلاد
-جلال تلفت لسليمان : وانت كيف بدير يا اكحيلة هادو مايلعبوش راهو
-اكحيلة: تى هوا انا الخشخاش وليا فترة نجهز فى نفسى بنسيب التجارة فيهم وقاعد نوتيلكم فى بديل فمكانى ..تبينى ندخل بودرة
-الجدر: مدامك بتعاندهم معناها من اليوم قول على روحك المرحوم
-اكخيلة : المرحوم!!!!

___________________________

تمت …..ويتبع

نحبكم ❤❤❤