رواية اكحيلة

#اكحيلة

??للكاتبه زهور جمال الدين ??

???الحلقه العشرون ???

روحو ملاك وسليمان لحوشهم
سليمان ساكت ومايبيش لا يتكلم ولا يعاتب
خشت ملاك الحمام وهيا ترعش ..غسلت وطلعت بدلت رووب .. وخشت لسريرها
واكحيلة مقعمز فالصالة عالصالون ويدخن
بعد اتكت فسريرها ..ناض هوا خش دار النوم ..وجاب كرسى الزيانه حطه من جيهتها وقعمز عليه …وهيا تشبحله وترعش لكن مقررة فى خاطرها تكون قوية
-سليمان شاد دخانه ويدخن : اخرلك مرة تطلعى من باب الحوش منغير ماتكلمينى باهى
-ملاك : انا مطلعتش بعيد انا قاعدة فى نفس الحوش
-سليمان : قولى حاضر وبس
-ملاك? : انا ماغلطش ..
– سليمان : يعنى كيف بنقعدو كلمه بكلمه ..انا مش متعود على حد يناصينى هكى
-ملاك : انا مادرت شى..انا طلعت لحوش بوك
-سليمان : كأنى حسيت لسانك اطوال ولا يتهيألى
-ملاك خايفه ودايرة روحها عادية : لسانى قاعد كيف ماهوا زى زمان زى توة ..لكن مرات انت مكنتش مدقق فيا
-سليمان قارن حواجبه : يعنى مزال بتطلعى قصدك منغير ماتقوليلى ..حتى لو كان لحوش بوى
-ملاك? : حبيبي معقولة حتى بنلف لحوش بوك بنكلمك ونستادن
-سليمان : لو كنت حبيبك راهو ما درتيش هكى
وناض وقف : اللهم جيبك يا طولت البال
وخدى التوته متاعه وطلع للصاله لبسها …وعنده كنبه على تركينه لما تنفتح من تحت تبدا سرير ..فتحها ورقد عليها بالعرض وتغطى
وفاتت ساعه ..وملاك ماجاهاش نوم وهوا بعيد عليها
حولت الغطا ونزلت من السرير وطلعت للصالة
لقاته عالصالون ….
جت جنبه وقعمزت تشبحله وهوا مغمض عيونه …
عرفاته فايق لانه مايشخرش …
قامت الغطا وامتدت قدامه .. ورقدت …
-مد سليمان يده وضمها ليه هيا قدام وهوا وراها ومغمض عيونه : خيرك قاعده مرقدتيش
-ملاك : حبيبي ماقدرتش نرقد وانت بعيد عليا
-زاد ضمها ليه وقرب فمه من ودنها: ماهو كنتى بتباتى عند بوى
-ملاك : لا كنت نراجى فيك ..عارفتك بتجى تروح بيا
-سليمان : وافرضى ماجيتكش
-ملاك : كنهدا راهو قلت للمخلوف يوصلنى ليك
وتلفتت لحضنه لقاته مغمض عيونه
باساته على شفايفه : نحبك
-اكحيلة ساكت: انا رقدت من بكرى
-زادت قربت منه اكثر وباساته : راقد منغير شخير ..ياودى هادى اممممم
-اكخيلة : وانا قلتلك رقدت ..ماهو خديت دوا عالشخير وبطلته على خاطرك
-ملاك باساته : قلتلك نحبك
اكحيلة ساكت
-ملاك : باهى افتح عيونك
-اكحيلة: نعسان ومنرقد
-ملاك بدلع : افتح عيونك حبيبي هياااا
-سليمان يضحك: ياودى فكينى منك وخلينى نرقد
حطت يداها الزوز على خدوده وبدت تبوس فيه وهوا مغمض عيونه
ملاك: حبيبي متبينيش ..يعنى نحول
-سليمان ضمها اكثر : لا خليك فحضنى
رجعت ملاك تبوس فيه ثانى
..هوا معش قدر يقاومها ..بدى يبوس فيها ويحضن …
وفى لحضه وقف ..قامها بين ايديه وخش بيها دار النوم
-اكحيلة : تعالى مدامك تحاربى فيا وانا راقد تحملى مايجيك …
..وهيا تضحك وفرحانه بيه

____________________________

ثانى يوم فى حوش هشام …

غادة تحكى فالتليفون مع امها
-غادة : خودولى موعد معاكم حتى انا
-امها: يابنيتى ليش بتقصيه انتى شعرك قنين

هشام فتح باب الحوش وخش جايب قضيه ..

-غادة : لا لا بنقصه يا ماما تعبنى فى المشط ولما نمشى للمناسبات
-امها : يابنيتى والله شعرك الا قنين .. ولكن على راحتك ..
-هشام ينادى : غادة
-غادة : هيا سلام يا ماما هشام ينادى
سكرت الخط ..وناضت مشت للصالة
-هشام : جبتلك القضية اللى كتبتيهالى فى الورقه
-غادة خدت الاكياس بدخلهم المطبخ : صحيت ..
-لحقها هشام : كيف حالها الحاجه كنتى تكلمى فيها
-غادة تلفتتله : ايه كنت نكلم فيها ..حالها باهى الحمدلله
-هشام: موعد شنو .. نسمع فيك تقوليلها خودولى معاكم
-غادة ضحكت : اهو ماشالله سمعت المكالمه كلها ليش تسأل
-هشام يضحك : صوتك كان عالى ..والله ماطبعى نتسمع
-غادة : عارفتك غير نبصر عليك
-هشام : كأنى فهمت انك بتقصى شعرك
-غادة : ايه بنقصه تعبنى الحق …
سكت هشام وقعد يشبحلها…
-وبعتالى تكلم : ممكن ماتقصيشى
-غادة : ليش
-هشام قرب منها : انا حبيتك بيه ..وصورتك فى خيالى زى القمر بشعرك الطويل ..
غادة يبست فمكانها بعد ما سمعت كلمت حبيتك ?
-قرب منها هشام وحط يده على شعرها : الشعر هدا ليا انا…وحيجى يوم ونرقد عليه
غادة تشبحله وساكته

_____________________________

بعد اسبوع

-سليمه : يابنيتى انتى رضيتى بيه مع انك عارفه خدمته..توة قولى انشالله ايروحلى بالسلامه
-ملاك : انا نحبه ومنقدرش نعيش منغيره ..وخديته على اساس نخليه يسيبها الخدمه هادى
-سليمه : ياملاك هدا كبر ومعش يتربى توة ..الهى بقرايتك انتى سلم بنتى مدامك نجحتى من الثانوية بري سجلى فى كليه كويسة
-ملاك : ماخاطرى فى قراية ..انا توة بين عيونى سليمان وبس ..لاااازم نغيره
سليمه : ربي يهديك يابنيتى
__________________________

وفاتو شهور …..

ملاك ماشيه عشيه لحوش اماليها
-اميرة : شنو ملاك مافى عندك شى
-زينب : ماشالله ايمان مرت خوى تزوجت بعدك وهوينها تكركر
-سليمه : مازالت صغيرة وسيورها تحمل
-مريم تلفتت على جنب: انشالله ماتحطه فى بطن منه
-ملاك غاصه عبرتها : سليمان قالى مزال نبو نعيشو وندهورو قبل مانديرو صغار وتشقى بيهم
-زينب : ماتاخديش رايه .. غير جيبي العيل الاول وبعتالى ياحي
-ملاك : انشالله …
وتلفتت لسليمه : هيا نوضى
-اميرة : خيرك مستعجله ملوكه
-ملاك : لا والله بنفوت على غادة صاحبتى ..راجلها داير حادث بنحمدلها بالسلامه
وناضو ملاك وسليمه طلعو من الحوش …
وملاك تسوق وتبكى
-سليمه : يابنيتى غير علاش تبكى ..هلبا هكى الفترة
الاولة يقعدو مايحملوش وبعتالى ربي يسخر
ملاك ساكته وخلاص
وصلو لحوش غادة وخشو
-ملاك : سليمان مسافر للجنوب هدا علاش مقدرش يجى لهشام توة ..لكن قالى عالاقل بريلهم انتى توة مابين ماروحت انا
-غادة : حبيبت قلبي جيتك عزيزة وغاليه وسليمان براحته امتى مايجى باهى
-ملاك : سلمها الغاليه
-غادة : نورتينى فى حوشى يا سليمه
-سليمه : الله ينور عليك وانشالله خشيتلك بالخير
شربو العصير وبعده النسكافيه ..وطلعو
فالباب غادة تسقد فى ملاك
-ملاك : مزال قلبك ماحنش عليه
-غادة : صعب يا ملاك صعب عليا
-ملاك : هوا حكى مع سليمان يومها ومتألم
-غادة : والله ماقدرت يا ملاك ..اختى بينى وبينه ولتوة ما ماتتش
-ملاك : حولى عليك الوهم يا غادة ..اختك توفت ..وانتى توة زوجته
-غادة ?: انشالله خير
-ملاك : هيا تصبحى على خير
-غادة : شنو انتى ملاك مافى شى
-ملاك? : لا لا
-غادة : مازلتى صغيرة تو ربي يسخر

_____________________________

بعد اسبوع روح اكحيلة …
فى دار النوم ملاك خدت منه جاكيته وتعلق فيه فالدولاب …
وسليمان يشبحلها …
وقف …
مشى خطوات ..مسك يدها وهيا تعلق فالجاكيت ..
وضمها ليه وهوا واقف وراها
-اكحيلة : خيرها حبيبتى
-ملاك?: مافى شى
-لفتها ليها وقرب منها : بنعرفك توة …
وضمها : خيرك ياعمرى
-ملاك ?: خيرنى لتوة ماحملتش
-اكحيلة خداها من يدها وقعمزها عالسرير: غير تعالى تعالى
-ملاك : تعبت منه هالسؤال وين مانمشى
-اكحيلة ضمها ليه ويضحك : حااضر من عيونى الليله بادن الله نخليك تحملى
-ملاك : لا نحكى بجد حبيبي ..نبى نمشو لدكتور
-اكحيلة : معقولة نمشو لدكتور واحنا ماكملناش سنه
-ملاك: مادخليش سلطان صاحبك تزوج بعدنا ومرته قريب تجيب
-اكحيلة : شنو تحسابيه سباق حبيبتى
-ملاك تبكى : يعنى بترفعنى لدكتور ولا شنو
-اكحيلة : اشششش حاضر نرفعك غير اسكتى بس
..تعرفينى مانتحملش دموعك
-ملاك : حاضر
وناضت جابتله عصير فراولة مصقع
-اكحيلة : ماقررتيش اى كليه بتخشى
-ملاك : ماعنديش نيه نقرا ..ممكن ننتسب انتساب
-اكحيلة : تعرفى تعبان مانحكيلكش من السفرة
-ملاك : حتى هوا سم اللى ادخل فيه بيتعبك امالا شنو
-اكحيلة تفاجأ بردها : هيا هادى حمدالله عالسلامه
-ملاك حست انها اوفرت جاته وحضناته: انت متأكد انى مستاحشتك حبيبي..بس ماتواخدنيش مضغوطه
وخر اكحيلة واتكى عالسرير وتكاها فوقه : ومع هدا مش حنزعل منك لانى مستاحشك
اتكت ملاك على صدره وقربت وجهها من وجهه : وانا مستاحشتك فوق ماتتصور ..حياتى فراغ كبير منغيرك
قاملها اكحيلة جسمها وحط رجليها على رجليه ويضحك : ارقدى هكى عليا طول الليل
-ملاك : مش حنصايقك
-ضمها هوا : بالك انا نضايقك بشخيري
-ملاك : لاااا مستحيل اضايقنى
-اكحيلة : اهاا صار تبي تقعدى عليا
-ملاك : نبى نقعد على قلبك طول العمر
-اكحيلة ضمها : امالا ليش اضايقى فيا وفى روحك بالكلام هدا..سم ما سم
-ملاك : لانى منبيش نخسرك
-اكحيلة : تسييبى لتجارتى معناها موتى ..حطى فى بالك ان مستحيل يخلونى حى لو سيبت
-ملاك قامت راسها: انت شن تقول
-اكخيلة : نواجه فيك بالحقيقه .. نسيبهم يعنى حكمت على نفسى بالموت..بوى اللى هوا بوى مايقدرش ايدافع عليا لانها اتفاقيه وكلنا موقعيين عليها
-ملاك : حبيبي يعنى تقعد هكى طول العمر ماتوبش
-اكخيلة : مانطلعش الا بالبديل ..وانا معنديش البديل
-ملاك : كيف يعنى
-اكحيلة : يعنى بوى لماتعب حطنى انا بديل ليه بيش قدر يطلع ..توة شوفى ابراهيم بو مريم مرت خوك لتوة ماطلعش ماعنداش بديل يحطه فمكانه
-ملاك: حط خوك وحيد
-اكحيلة : لو طلبها هيا ليه ..لكن وحيد لتوة ماطلبهاش
-ملاك : لانه لاقى الصرف والسفر وكله ببلاش
-اكحيلة : يصرف من خير بوه ..لانها فالاصل تجارة سعيد ميلاد ..مش سليمان ميلاد
ملاك?: باهى توة كيف
-سليمان : توة غير خلينى ناخد موعد مع دكتورة ممتازة ونمشولها وبعتالى نفكروله الموضوع هدا
-ملاك: حبيبي يعنى انت مقتنع تسيب
-اكحيلة : والله ماعمرى فكرت فيها ..لكن بعد تنقريزك احتمال
-ملاك فرحانه : قداش نحبك ياولد
-اكحيلة : غير تعالى مستاحشك يافرخة
وحطها فى جنبه وتلفتلها
-اكحيلة : تحبينى
-ملاك : نموووت فيك
-اكحيلة : ستاحشتك يا حبي
وقعد يبوس فيها …وباتو ليله عسل

______________________

ثانى يوم ملاك جابتله اسم دكتورة كويسه
ومشى سليمان للعيادة وخدى موعد بعد ثلاثه ايام
وفاتو الثلاثه ايام ومشو ملاك وسليمان للعياددة
طلبت عليهم الدكتورة تحاليل ليهم هما الزوز
وبالفعل داروهم وجابوهملها فى موعد المراجعه
-الدكتورة : تحاليلكم الزوز سليمات ومافيكم شى
-ملاك : لكن ليش ماصارش حمل يادكتورة
-الدكتورة : فى ناس ياسبحان الله الزوز مافيهم شى ومع هدا مايصيرش حمل من بعضهم ..ولو كل حد تزوج يصير معاه حمل
-سليمان : كيف يعنى
-الدكتورة : ياخوفى تطلعو من الناس اللى نقولولهم مفروض تسيبو بعضكم وكل حد منكم يتزوج بشخص اخر ايجوه صغار
-اكحيلة حط يده على ملاك : ملاك مستحيل نسيبها
-ملاك : ولا انا ممكن انى نسيب زوجى
-الدكتور تضحك : غير من قاللكم سيبو بعضكم ..قلتلكم ياخوفى تكونو من الناس هادو ..وبعتالى حتى الناس عادو لقينالهم حل بالزرع
-اكحيلة : زرع شنو
-الدكتورة : عملية زرع اطفال
-اكخيلة وقف : لاااا عاد انا شن مازالى .. الا الزرع ..مستحيل نديره لو نقعد منغير صغار طول عمرى
-ملاك : ليش
-اكخيلة : لانه فيه هلبا اللى غشوهم
-الدكتورة : سامحنى خوى هدا اسمه جهل ..الكلام هدا كانو يقولو فيه الناس الجاهلة قبل سنوات ..لكن توة الناس اثقفت وعرفت ان شى اسلامى ومافيشى غش
-اكحيلة : ياستى اعترينى انا جاهل
وتلفت لملاك : هيا نوضى بالك
ناضت ملاك طلعت معاه من العيادة

______________________________

وهما مروحين فالسيارة
-اكحيلة : اوهوه عليناعاد ..قلنالك الموضوع هدا معش تجبديه
-ملاك : ليش حبيبي حد يكره الصغار
-اكخيلة : ملاك حبيبتى هدا حظك وهدا نصيبك . وبالك تحسابينى بنقولك خودى غيرى بالك يجوك صغار …انا والله مانى مسلم فيك سواء جونا الصغار ولا ماجوناش
-ملاك : غير خيرك تجرى وين ماشى انت
-اكخيلة : بنوصلك للحوش وبنمشى لهشام صاحبى نشوفه … والله روحت وقعدت لاهى حتى الحادث مامشيتله عليه
-ملاك : تى شنو بتوصلنى ..خلى نمشى معاك وخلاص نوسع خاطرى
-اكخيلة : باهى
وبالفعل مشو لحوش هشام ..وخشو وهدرزو وحمدو بالسلامه
وهشام تعبان ومستبرد ومخلط عليه حتى تعب الحادث
قعدو اكحيلة وملاك قريب ساعه يهدرزو وقيس المغرب طلعو روحو
وخش هشام لدار نومه تعبان
-هشام : غادة …يا غادة
جت غادة للدار : نعم
-هشام : الصغار وينهم
-غادة : تعشو ورقدتهم كل واحد فى سريره
-هشام : باهى نتعبك جيبيلى كيسة الدوا من الصالة
طلعت غادة جابت كيسه الدوا وجت ..خشت دار النوم لقت هشام متغطى بالبطانيه ويرعش مع بعضه
-غادة قعمزت عالسرير: هشام خيرك
-هشام يرعش: شكلى بنستبرد
-غادة حطت يدها على جبته لقاته حرارة وعرق : لا هادو قفاقف من الحادث
-هشام يرعش: مش عارف بري ارقدى خير مانعديك
-غادة : لا خلى نعطيك الدوا ونديرلك كمادات
..ماهناك تعب
وبالفعل فتحت الدوا وعطتهوله …
وجابت منديل ناعم وقعدت اديرله فى كمادات ..تعبت اتكت جنبه عالسرير واستمرت فالكمادات وهوا ولا قال نهدا
قيس الساعه 2 فالليل تعبت ..سخفها وهوا دايخ ومش فى وعيه ..حطت ايديها عليه وضماته ليها …غلبها النوم رقدت
فاق هشام الساعه 4 الفجر .. تفاجأ..قولو انصدم …لقى غادة راقدة فى جنبه وضامته ليها
مد هوا ايديه وضمها ليه بقوة ..لدرجه انها فاقت
-غادة متفاجئة ? : هشام
-هوا سعيد : ياااروح هشام
-غادة حست بحبه ليها وهيا بين ايديه: انت معش مريض
-هشام: نص مرضى من بعدك عليا وانا مانبيش الحرام ..لكن مادامك قربتى خلاص انا معش مريض وضمها ليه اكثر
-غادة حست بحرارة جسمه : هشام لوسمحت
-قص عليها : لو سمحتى انتى ما اضيعيش علينا جمال اللحظه هادى
وقرب منها وبدى يبوس فيها ..وهيا مش معارضه ..بل بالعكس كل مشاعرها متحركه معاه ومدت ايديها حطتهم على ضهره وضماته ليها وبادلاته نفس الشعور …وتهنت غادة ليلتها ?

___________________________

بعد شهور …

قدام الجامع بعد صلاة الجمعه

-سلطان : ياراجل البلاد متحركه ويقولو فى ثورة فى بدايه العام الجديد
-اكخيلة : مستحيل نصدق كل شى الا هالخبر .. الناس تخاف من القدافى
-سلطان : قالو معارضيت مدعومين من برة ياراجل
-اكخيلة : لا برة لا داخل مستحيل نصدقها
-سلطان : الله اعلم
-اكحيلة: ايمان شن حالها توة
-سلطان : حال عدوك ..قاعدة كيف ماهيافالعيادة من وقت ولدت حمودى الصغير ..اهو توة عمره ثلاثه شهور
-اكخيلة : هيا شن عندها
-سلطان : حمى النفاس
-اكحيلة : ربي يحميها انشالله
-سلطان : هيا بالسلامه وسلمنا على ملاك متعبينها حتى هيا بالزيارة للعيادة قريب يوم بعد يوم
-اكخيلة : ايمان اوخيتنا ..كيف عاد امالا .. انت وين ماشى توة تعال تغدا معاى فالحوش
-سلطان : لا والله صحتين … بنمشى نطمن على حمودى الصغير فى حوش امى وبعتالى بنمشى نشوف ايمان
-اكحيلة : ولدك نحسابه عند جداه فضيلة
-سلطان : لا والله عند امى ..طاير عقلها بيه هيا وبوى ..مكرشين فيه مايبوش ايسيبوه
-اكحيلة : ربي يحفظكم انشالله
ومشى سلطان لولده شافه وطلع للعيادة
خش من الباب …
ناداه الدكتور من وراه : خوى سلطان
تلفتله سلطان : نعم يادكتور

____________________________

تمت …ويتبع

نحبكم ❤