رواية اكحيلة
??للكاتبة زهور جمال الدين ??
???الحلقة الخامسه ???
ثانى يوم الجمعه …
الساعه 10 صباحاً
زينب مرت كمال فى دار نومها …
تجهز فى نفسها بتطلع تتغدا فى حوش اماليها هيا وبناتها …
– زينب : اميرة .. اميرةة
-اميرة : نعم ماما
-زينب : نوضي اختك قوليلها تسقد روحها معش وقت
-اميرة : سيرين فايقه من بكرى ياااام …شادة تليفونها
-زينب: قوليلها تحول هالكسيرة من يدها وتنوض ..24 ساعه وهيا شادته
-اميرة : تكلم فى حياة صاحبتها
-زينب : اسمعى .. اهو نزلت انا لوطا ..سقدو روحكم والحقونى هى
وتلفتت وراها: كمال..كمال ..نوض الجمعه قريب اتأدن
-كمال راقد: مزال اكثر من ساعتين .. خلى نزيد نص ساعه نوم….
-جت زينب اتكت جنبه : اسمع بنحكى مع سلطان فالموضوع اليوم
-كمال: اييييه علينا عاد
-زينب: غير خلينى انا نتصرف ..والعربي كانا دبر نص الدبارة ليه
-كمال: ريتى هالحاجه الكبيرة خوك سلطان
-زينب: خوى سلطان اللى مش عاجبك بتبدا الكبمه كلمته هوا بعد بوى.. ماهو اضمنه وحطه تحت باطك
-كمال: ياودى ديري اللى بديريه
-زينب: ايوووه اهو قلتلك ..مش زى كل مرة تحطها فى راسى وتقولى تصرفتى من وراى
ونزلت زينب للدور الاول ….
لحقوها بناتها بعد نص ساعه …ركبو فى سيارة سيرين ومشو لحوش جدهم …
__________________________
فاق سليمان من النوم الساعه 11….
قام تليفونه لقاه مشحون ..وادكر ان اليوم جمعه …
غطا راسه بالبطانيه ودخل تليفونه تحت البطانيه وضرب رقم ملاك
شرين …. ردت من نومها
-سليمان : يا شويطينه وتقوليلى عندى مدرسة الصبح
-ملاك صوتها ناعس: صباح الخير
-سليمان مبتسم ومنسجم فى عالم ثانى?: نهارك زين .. وصباحك ورد ..اليوم احلى صباح
-ملاك : ماشالله ناشط وفايق بكرى
-سليمان : انا كل يوم انوض من السته لعلمك ..غير الاسبوع هدا ترا شن جانى وبديت نسهر للفجر
-ملاك : هاهاهاهاها
-سليمان: انشالله دووم فرحانه وتضحكى
-ملاك : وحتى انت انشالله
-سليمان : تعرفى والله صدقتك امس لما قلتى عندك مدرسة الصبح
-ملاك : ماهو لما نزعل منك ونبدا نتجكتر وزعميتا نبى نسكر معنديش سبلة غير المدرسه ???
-سليمان : ووك عالسم اللى يقطر
-ملاك : امالا تبينى نسكت …لازم ندير حركات ونسحنك
-سليمان : تصدقى اول مرة نتعرف على انسانه تلقائية وعسل زيك ..
-ملاك : امممم اعترفت بلسانك صار كنت تتعرف هلبا زمان …
-سليمان: لا والله اول مرة فحياتى نهدرز على بنت … ونتصرف براحتى ونضحك ونبصر
-ملاك: ايه ايه صدقتك ???
-سليمان يضحك : بلا جو عاد ..قلتلك ماكنتش نتعرف على بنات نهائيا ..
وتلفت للجهه الثانية : واصلا معنديش علاش بنكدب لان نوعى منحبش انسان يكدب عليا ..واللى نزبطه كداب معش نتعامل معاه نهائي
-ملاك : معش تتعامل معاه نهائي نهائي
-سليمان : نهااااائي
-ملاك : مفيش استعانه بصديق ولا حتى حدف اجابتين
-سليمان يضحك : هاهاها لا لا مفيش
-ملاك : واااك عالمسموم
-سليمان : ولدلك زى ماقلتلك مكنتش عندى صداقات مع بنات
-ملاك : باهى ياسيدى قول صدقتك
-سليمان : هاهاهاها واااك ع الشر …
باهى شن رايك .. تصدقى لو نحكى لواحد من صحابى نقوللهم انى ساهر مع بنت والله لما يكدبونى
-ملاك تمسسله بالدوة بالك يتحرك: وعلاش بيكدبوك يا حسرة هيا هدرزة عاديه مجرد صداقه وكيف حالك وشن درتى اليوم
-سليمان : مهما يكون حتى صداقه عمرى ماهدرزت على بنت .. تعرفى بعتالى فالجمعه اكيد حنتلاقى مع سلطان صاحبي ..لو نحكيله عليك حينصدم
( طبعا سلطان عرفتوه شكون ولا ..حكيتلكم عليه يكون ولد خال خوتها.. وخو زينب مرت خوها كمال وخال سيرين واميرة …وعنده علاقه صداقه مع سليمان )
-سليمان : طبعا سلطان الشيبانى اقرب واحد فى صحابي ليا ويعرف كل اسرارى
-ملاك سمعت اسم سلطان انصدمت ومنغير ماتحس بنفسها عيطت: لااااا رد بالك تقول لسلطان
-سليمان حول من على راسه البطانيه وناض قعمز : وانتى منين تعرفيه سلطان !!؟؟
-ملاك بدت اتمتم : لاااا انا منعرفاش..ومنين بنعرفه انا
-سليمان : ملاااك ..صارحينى بنفسك.. انتى شكون …خير مانعرف من برة ونزعلو من بعض
-ملاك : وليش بنزعلو من بعض يا سليمان ..كونى نعرف سلطان او منعرفاش فهدا شن بي ايأثر
-سليمان : معرفتك بسلطان متأثرش عليا فى شى .. لكن انتى شكون هيا اللى تأثر ..لو لقيت انك تعرفينى وتخدعى فيا او نشد كدبة من كلامك مرات معش تلقينى قدامك بكل
-ملاك : والله مانعرفك ..ولا عمرى شفتك قبل مانتلاقو يومها فالاستراحه
-سليمان : ومنين تعرفى سلطان
-ملاك تعيط : منعرفاش ..
-سليمان : انتى توة قلتى متقولش لسلطان ..معناها تعرفيه …
وهدى صوته : ملاك منبيش نخسرك ..قوليلى انتى منو ..ووالله انى ماعاد نقدر نتنازل عليك انشالله تكونى بنت عدوى…المهم منكونش زى الاطرش فالزفة
-ملاك : باهى اعطينى يومين ..ونقولك انا منو
-سليمان : يعنى تعرفينى
-ملاك : لا منعرفكش .. لكن حنقولك انا منو وبنت شكون
-سليمان : وانا مستحيل نتخلى عليك ..لو بنت من تطلعى
-ملاك : لا سامحنى ..بعد ماتعرفنى اخت من ..لازم نحدفو ارقام بعض ..ومفيش داعى للمكالمات
-سليمان يعيط : مستحيل ..مستحيل بعد مالقيتك اضيعى منى
-ملاك بدى قلبها يطق وقررت تتكلم : سلطان قريبنا
-سليمان : قريبكم !!؟؟.. منين تعرفوه انتو
-ملاك : يقرب لخوتى ..انا مايقربليش
-سليمان : كيف هادى الفزورة
-ملاك : ماهو انا ماقلتلكش ان خوتى هما خوتى من بوى …امهم وحدة ثانية ..وسلطان يقربلهم من ناحية الام ..
-سليمان : يعنى تعرفوه ويجيكم للحوش
-ملاك نكرت : لا لا منعرفوشى ..هوا قريبهم من بعيد وخلاص …
-سليمان : تمام فوتى الموضوع توة. ..شنو بنشوفك اليوم والا لا
( وفى خاطره : لحد هنايا وخلاص ..صار لازم نعرف بطريقتى انتى منو )
-ملاك : لا اليوم صعب .. خليها مرة ثانيه
-سليمان : باهى
__________________________
هشام قايم تليفونه ويتصل …
يتصل بي سليمان يلقى فالخط مشغول …
-هشام : اوووف مشغول ..مشغول ..مع من مشغول الوقت هدا كله ياسليمان
-اياد يلعب جنب بوه : هات التليفون بابا
-هشام : بتلعب بيه
-اياد : ايه
وخدى التليفون من بوه ..
-غادة: إيااااد شن قلنا احنا
-اياد: صح نسيت ..اسف ماما
-هشام : خيرك بابا عادى العب بيه
-اياد : لا شكرا بابا …ماما قالت ماناخدوش تليفونات من حد
-هشام : انا مش حد انا بابا
ومشى اياد يجرى خدى ايباده يلعب بيه
-هشام تلفت لغادة: تليفوناتنا احنا عادى كانا لعب بيهم …صح تليفونات الناس عيب
-غادة تحرك فالسكر فى الشاهى: علم النفس الحديث يقول يجب انك تمنع الطفل من استعمال حاجه الب والام ..لانهم اقرب ناس ليه …فلما يكون تليفونك انت ممنوع ..فالتاكيد تليفونات الناس ممنوعه
-هشام : ماشالله حسيتك مثقفه صح
-غادة ضحكت : يعنى نحاول نقرا ونثقف نفسى
-هشام ضحك : تصدقى نقولك نكته تضحكى عليها ..انا لتوة منعرفش انتى منين متخرجه
-غادة: انا قاريه تقنية طبيه …تخصص باتولوجى ..علم الاورام
-هشام : صار دكتورة
-غادة: يعنى قول نص دكتورة
-هشام : انا بنسافر غدوة دبي ..وانتى زيدى فكرى .. فلو تحبى تسافرى معاى انتى والصغار عادى..المرحومه كانت تمشى معاى وين مانمشى
-غادة تعصبت : مفيش داعى للمقارنه
-هشام : لاااا حاشا لله انى نقارن بينكم ..بس حبيت نوصلك معلومه انه حقك زى ماكان حقها
-غادة : لا مش حقى …لانى اساسا لحد الان مش معتبرتك حقى …
-وقف هشام وحط ايديه فجيوبه : انتى غير هنينى عالصغار ..وانا مانبي منك شى
-غادة: هادو صغار اختى وقطعه منى مش محتاجه عليهم توصيه
-هشام : براحتك
__________________________
سليمان وملاك كملو مكالمه التليفون …
قام سليمان تليفونه واتصل برقم
-سليمان : الووو فرجانى
-الفرجانى: نعم معاك الفرجانى سيدى اكحيلة
-سليمان : بنعطيك اسم بنت … ومكان قرايتها .. نبى نعرف عليها كل شى
-الفرجانى: ياسلام ..حتى اللى قطعتلها الحبل السري نجيبلك اسمها واسم قبيلتها
-سليمان : فرجانى نعاود ونكررللك بالك فهمك ضعيف…البنت مايوصلها شى ..نبى معلومات عليها بس
-الفرجانى: تم ياسيدي .. الحرّك جنبها والكلام عليها .. خلاص فهمتك .. نجيبلك سيرتها الاولة وهيا لا فالعلم لا فالدرا
-سليمان : ايوووه تمام
-فرجانى : اليوم شنو هوا بالصلاة عالنبى
-سليمان : اليوم جمعه
-الفرجانى: السبت منحبش انتحرك فيه خاطر عيد اليهود ..والاحد كيفه عيد النصارى …والاثنين نجيبلك المعلومات كاملة عليها
-سليمان : تم الكلام …
-الفرجانى: المستورة شن سماها ربي
-سليمان : اسمها ملاك ..وتقرا فى المدرسة المركزيه متع ثانويه البنات
-الفرجانى: تم زبطتها المدرسه ..
هيا تقرا علمى ولا ادبى بيش منتلخبطش
-سليمان : تقرا علمى
-الفرجانى: متفاهمين وعلى بركة الله ..
ويضحك : هاها ها ومخطرى عارفه بقداش انت عاد
-سليمان : انت غير جيبلى المعلومات الصح وشوف التنغنيغه اللى بتاخدها منى
-الفرجانى: تم
وسكرو الخط ….
واتكى سليمان عالمخدة ويخمم: اهو بنعرفك من تكونى يا ملاكى ..
ويتخايل فى ضحكتها فالتليفون وكيف تبصر معاه ويضحكو وكيف تغيرله فى جوه
-سليمان : تى والله كان تكونى زى سالى الخدامه متع رسوم زمان مانى مسلم فيك
__________________________
فى حوش الشيبانى …
طبعا امالى زينب اغنياء هلبا …
وهما زينب ووداد وسلطان ..
امهم وبوهم حيين …وداد وزينب متزوجات وبصغارهم
اما سلطان قاعد لتوة عزابى …مواليد 74
-سلطان : ياودى البنية صغيرة عليا هلبا يا زينب
-زينب : وشن صغر بيها ..فالشهادة الثانويه والعام الجاى بتخش الجامعه
-سلطان : البنت اصغر من بناويتك الزوز …وانا حتى فى عمر بناتك نعتبرهم صغار عليا
-زينب : انت غير تعالة شوفها وبعتالى ساهل
-سلطان : تى كيف غير تعالة شوفها : شنو مشيه سلطان الشيبانى تحسابيها ساهلة
-زينب : هما الاولة والاخيرة حوش عمتك يا سلطان ..معناها جيتك ليهم عاديه مش مستحقه رسميات
-سلطان : الاولاد صغار عمتى …لكن هيا البنت مش بنت عمتى ولا نعرفها حتى كيف شكلها من وقت كانت صغيرة وتلعب مع اميرة
-زينب: توة انا طرحت الموضوع على كمال وفرح …وقالى قوليله يتفضل يشوفها ..وانت درتلى عظم فالريه
-سلطان : والبنت قولتولها
-زينب تتنحنح : احم ااه ..ايه طبعا قلنالها …وفرحت قريب طارت بالفرحه …شنو هيا اطول تكون مرت سلطان الشيبانى
-سلطان : يصير خير
-زينب: لا اعطينى كلمه بتجى غدوة ولا شنو
-سلطان : انا الليله عندى اجتماع مرات نعطل …خليها الاحد وخلاص
-زينب : تمام
عمتك عيشه امهم تنادى: كان نعرف بس شن توشوشو بروحكم غادى ..تعالو اهنايا بحدانا
-سلطان : اهو جايين يااام
وشربو الشاهى مع بعضهم ..وتعشو وروحو ….
__________________________
فالليل الساعه 9….
ملاك مقعمزة فى دارها كالعادة تراجى فى عقاب الليل امتى يجى بيش يكلمها سليمان …
شرين تليفونها …شافت لقت سليمان يتصل…استغربت انه متصل بكرى … جنبها سليمه مابتش اترد
شرين مرة ثانيه …ردت
-ملاك : الو
-سليمان : خيرك مترديش شغلتينى
-ملاك بصوت واطى: ماهو مش بروحى
-سليمان : باهى اسمعى انا خاش اجتماع توة …واحتمال تلقى تليفونى مسكر ماتنشغليش ..
-ملاك : اجتماع توة
-سليمان : ايه وراس ملوكه توة …وكلمتك بيش منبيش تقعدى تراجى فى مكالمتى احتمال نتاخر ..ولدلك ارقدى تو نكمل انا ونكلمك
-ملاك تلفتت للجهه الثانيه : مش حنرقد … ح نراجيك
-سليمان فرحان : نجيلى اللى بتراجينى .. لا ارقدى نوم العوافى ..وانا نشرينلك وانوضك اول مانكمل خلى تليفونك هزاز
-ملاك : كلمنى بعد تكمل مس تنسانى
-سليمان : ننسى روحى وماننساكش .. اصلا مستحيل يجينى نوم قبل مايكون صوتك اخر صوت نسمعه
-ملاك قلبها يطق : باهى فى امان الله
-سليمان : فى امان الله …
وسكرو التليفون
وملاك فرحانه قريب اطير حست باهتمامه .. وانه حاس انها تراجى فيه وفى مكالمته ..واهتم انه مايخليهاش تراجى وفهمها ضرفه …
… سليمان كان على تركينه يتكلم فالتليفون ….بعد ماكمل مشى لسلطان صاحبه كان واقف بعيد عليه شوى ..
-سلطان : غير شنو شنو الوجه يضحك والعيون دبلانات .. بتقنعنى انك ماكنتش تكلم فى وحدة
-سليمان يضحك : ياودى انا نكدب عالناس كلها الا عليك انت منعرفش …
وضربه على كتفه : الحق الحق ..المكالمه كانت مع وحدة يا صاحبى
-سلطان : ياودى شكلها مش اى وحدة ..شكلك غاطس لودانك
-سليمان يضحك : مش عارف
-سلطان : تصدق الضحكة اللى فعيونك توة ..اول مرة نشبحها عليك
-سليمان : زعمااا هكى تقول
-سلطان : غير خلى النهاية سعيدة يا اكحيلة ..خير مايصيرلك زى مابيصيرلى انا
-سليمان : وخيرك انت
-سلطان : خواتى يبونى نخطب ..وسمولى وحدة منعرفهاش ..وبعد غدوة الاحد بنمشى نشوفها
-سليمان : بنت شكون
-سلطان : اخت كمال وخالد ماك تعرفهم
-سليمان مستغرب : كمال وخالد عندهم اخت !؟؟ اول مرة نعرفها المعلومه هادى …
وتلفتله : ومدامها بنت عمتك كيف ماتعرفهاش
-سلطان : هما صغار عمتى .. لكن هيا اختهم من بوهم مش بنت عمتى
-سليمان : انت توكل وبرة شوفها ..واللى فيها الخيرة يأتى بها الله
-سلطان : انشالله خير
وخشو الاجتماع …وانتهى الساعه 5 الفجر …
سليمان ركب سيارته بيروح وجنبه سلطان بيوصله معاه
قام سليمان تليفونه واتصل برقم ملاكو…ردت طول
-سليمان : مارقدتيش
-ملاك : لا لا قعدت نراجى فيك
-سليمان : باهى انا طلعت من الاجتماع ..مسافه الطريق ….نوصل ونكلمك
-ملاك : تمام …
وسكر الخط
-سلطان : لقيتها فايقه
-سليمان فرحان : قاعدة تراجى فيا
-سلطان : نيالك يا سليمان … ويعيط : اوعدنا يا ربي بحد يهتم بينا هكى …
وقعدو يضحكو الزوز
سليمان حط سلطان فى حوشهم ….
وقام التليفون واتصل بملاك
-ملاك : هاا وصلت
-سليمان : موصلتش الحق لكن معش عندى صبر
-ملاك : حتى انا من بكرى انراجى
-سليمان : ستاحشتك
-ملاك ?: اول مرة تقولهالى
-سليمان ?: ستااااحشتك
وقعدو يهدرزو لين وصل سليمان حوشهم ودخل السيارة للقراج وخش داره …وهوا يكلم فيها
__________________________
ثانى يوم كمال يشاور فى ملاك على سلطان
-ملاك : مستحيل …شن تقول انت يا كمال …انا مزال مانبيش نتزوج
-كمال: ملوكه ..بنتى ..انتى غير شوفيه وبعتالى ساهل
-ملاك : منغير مانشوفه يا كمال الموضوع مرفوض بالنسبة ليا
وجى خالد وحكوله عالقصه …وهما فى طولك فى عرضك يا بنت …وهيا شى شى رافضه الفكرة من اساسها …
وركب كمال لداره فالليل وقعد يتناقش هوا وزينب
-زينب : وشن تحساب روحها هيا اللى ترفض خوى سلطان …لقاته فى قرارها
-كمال : على قد ما اقنعت فيها شى ماتبيش
-زينب حاطه يدها على خدها : وخوى اللى عطيته الموعد غدوة .. يا غبارتى ويا حشمتى قدامه
-كمال : هوا هدا انتى كل مرة اديري من وراى ومعش تلقى كيف تلفقيها
-زينب : عارفاتك بتقولهالى فالاخير … اصلا انا هدا علاش قعدت انأكد عليك انه بعلمك قبل مانطلع
-كمال: انا قلتلك قوليله ..مش قلتلك ديري موعد وناديه
-زينب: اووووف توة شنهوا اخر كلام عندك بتربي اختك ..ولا بتعوم على عومها
-كمال : انا بالدات منقدرش انسيف عليها .. موقفى محرج لان سلطان نسيبى
-زينب : يعنى شنو بنقول لخوى توة
-كمال : قوليله اجل الموعد شوى مزال
-زينب: تى شنو تلعبو بينا انتو …تو نعرف انا شن نقول لخوى
فى نفس الليله ملاك مضايقه هلبا ..وعندها نية تكلم سليمان ..لكن هوا زى الليله اللى قبلها كلمها قاللها امه مش فاضى وغدوة بعد الضهر حيكلمها
__________________________
ثانى يوم زينب كلمت خوها سلطان …
ومابتش تكدب عليه ..بل بالعكس حكتله الحق كله وقالتله ان البنت رفضت ومش مفكرة فالزواج حاليا
وبعد ماروحت ملاك من المدرسه
زينب مش ناوية خير …كيف كيف ملاك ترفض خوها سلطان ..وصارت مشكله فالحوش …
خشت ملاك لدارها تلاقى كمشه مكالمات من سليمان …وهيا صوتها مضايق …لو حتكلمه حتبكى طول …
بعتتله رساله ” شحنى فاسد ماباش يشحنلى التليفون ..واتسكر منى..يادوبك توة فتحته بيش نبعتلك الرسالة .. اول مانشحن تو نكلمك”
سليمان اول ماوصلاته الرسالة ..عاودلها طول يلاقى فالخط مقفل …مقفل …
قيس المغرب مشى للقهوة … تلاقى مع سلطان …
وبالطبيعه ان سليمان يسأله شن صار فى موضوع مقابله اخت كمال …
سلطان انحرج انه يقوله البنت رفضت
-سليمان: شنو انشالله عجباتك البنت
-سلطان : توة بس كيف طلعت منهم ..والحق البنت ماعجبتنيش
-سليمان : يا سلطان راهو الزواج مش بجمال البنيه ..الزواج بطيبتها وعفويتها واخلاقها
-سلطان : الحق البنت ميه ميه ..لكن انا مستريحتش لما قعمزت معاها
-سليمان : وهيا
-سلطان : هيا فرحانه قريب بطير …وموافقه
-سليمان : ربي يجيبلك اللى فيه الخير يا صاحبى
وروح سليمان للحوش …ويتصل بملاك …وهيا شى تليفونها مقفل
وجعه خاطره : كانا انا راهو دورت اى وسيله نكلمها المهم منرقدش قبل مانسمع صوتها
وهيا يا نارى راقدة بدموعها …وسليمه مقعمزة جنبها وتبكى حتى هيا ما اطيقش فى ملاك بكل
وملاك وجعها تحديف الكلام اللى حدفاته زينب طول اليوم …
طبعا زينب نوعها كويسه وخلوقها طيبات …لكن كانا دوستيلها على طرف شدى روحك …
ثانى يوم الساعه 11 جى الفرجانى …
تعالة يا فرجانى كلنا نراجو فيك …
نادو سليمان …جى للصالة قعمز هوا وياه
-سليمان : شنو جبتلى المعلومات
-الفرجانى: يا سلام ..يا عينى والله
-سليمان : نسمع فيك قول
-الفرجانى : ياسيدى اسمها ملاك احمد عبدالعاطى …
بوها حمد عبدالعاطى ..اكيده تعرفه جنابك
-سليمان استغرب : ومنين بنعرفه انا بوها
-الفرجانى : الاسم كأنه مش غريب عليك ولا
-سليمان انصدم : متقوليش بنت الجمل
-الفرجانى: هوا بداته …واخت كمال وخالد
-سليمان شده من حوايجه جهه الرقبه: شن تحكى انت يا فرجانى …ويعيط: متأكد
-الفرجانى يرعش: متاكد يا سيدى متاكد ..هيا بنته
-سليمان : حوش الشيبانى خوالها ولا شنو
-الفرجانى : لا ..هيا من ام ثانيه …حوش جلال خوالها
-سليمان دماغه بيتفجر: منو جلال !!؟.. متقوليش جلال الفهد
-الفرجانى : هوا ياسيدى اكحيلة
سليمان حاط يده على راسه : انا بنهبل راهو …انت شن قاعد تقول
وشده مرة ثانيه بيخنقه : يعنى هيا اللى ماشى امس سلطان يشبح فيها وقابلاته
حيه حيه ..وقالتلى تليفونى مفيشى شحن …شحنى فاسد …وهيا اتكم وتساوى بتقابل سلطان
الفرجانى يرعش: منعرفش اللى تقول فيه يا سيدى مش فاهم عليك انا
-سليمان : معقولة …معقولة الطفلة البريئة الطاهرة تعرف تخدع …تعرف تلعب
تلعب بيا انا اكحيلة …منيش مصدق
-الفرجانى يرعش: تبي منى حاجه ثانيه يا سيدى
-سليمان قعمز عالصالون وحط راسه على ايديه : لا لا برة فى حالك …
قعد عالوضع هدا قريب ربع ساعه …ويخمم … كدبتها عليا انها بنت حمد عبدالعاطى واخت كمال وخالد كوووم …وخونتها ليا وماشيه ادير فى مقابله كوووم …لا وسلطان قال ان البنت موافقه وفرحانه …معقولة يا ملاك هكى ادير …تى انتى اسمك ملاك الزح
وبعتالى قام راسه وينادى: يامرزوقى…مرزوقى
-المرزوقى جى يجرى : نعم يا سيدى اكحيلة
-سليمان: وين وحيد
-المرزوقى: وحيد فى استراحة معتز صاحبه
-سليمان : وشن يديرو
-المرزوقى: زى ماعارف انت شباب ..جايبيين فرقه ..ودايرين حفله صغيرة فالاستراحة
-سليمان : ارفعنى ليهم
-المرزوقى : معاهم بنات راهو يا سيدى
-سليمان : قلتلك ارفعنى
وبالفعل ركبو السيارة ورفعه …لما خش عليهم الاستراحه وحيد خاف واستغرب فى نفس الوقت لان سليمان مش جوه …
-وحيد : اهلا سليمان
-سليمان : قلت نجى نغير معاكم جو
-وحيد متحشم من خوه لان فى بنات : اهاا مرحبتين بيك
-سليمان : خيركم وقفتو الفرقه ..غنو خلو البنات يرقصو
-وحيد : شن تحب تسمع
-سليمان : خليهم يغنولى كلهم خوانات
-مولى الفرقه: لعيون الضيف نغنو ..هيا شباب عزف كلهم خوانات …
وبدت الفرقه تغنى عالخونه
وسليمان قريب يتقطع
__________________________
تمت …..ويتبع
على فكرة اللى يدور فى رواية قلبي شاريك( قصة حسين وحنان )
يلقاها فى صفحتى الشخصيه الايام هادى انزل كل يوم فى ثلاث حلقات .. بناءً على رغبة الفانز
نحبكم ❤❤