رواية اكحيلة

#اكحيلة

??للكاتبه زهور جمال الدين ??

??الحلقه الخامسة عشر ??

نرجعو بالصورة للخلف شوى ….
فى استراحة سلطان …

-ابراهيم الجدر: وين اكحيلة
-سلطان : نكلم فيه تليفونه خارج التغطية ..عنده موعد مهم ..اكيدة معش يعطل
-كمال : شنو نبدو
-الجدر: لا وين نبدو يجى اكحيلة قبل
كمال تلفت لسلطان انه ماعجباتاش الكلمه
-سلطان قايم تليفونه ويتصل : المشكلة انه خارج التغطيه
-خالد : جماعه الشرق مستعجلين
-الجدر : وشن وراهم يباتو ليله ثانيه
-خالد? : هدا كله بيش يحضر اكحيلة ..
-الجدر متلفت لايوب : شوفوه فرخ صغير حاكم فى شيابين رجليهم فالقبر..
وتلفت لكمال : وانتو صغاركم امتى بدخلوهم معاكم
-كمال : مزال وقتهم يا جدر ..انا نبى ندخل بالواحد معانا ..لكن خالد قال ندخلوهم كلهم ..فأجلت شوى
-الجدر: كانا عندى ولد والله ندخله من عمر الست سنين
-سلطان : كلنا صغارك يا حاج ابراهيم
-الجدر : والنعم بيكم كلكم .. غير اكحيلة ازود شوى
-سلطان : ربي يحفظه
.
.
وفى الجهه الثانيه ايوب يوشوش مع رحمونى
-رحمونى : شن الدوة توة
-ايوب : يعطونا اربعه شهور ولا يبدا الممر جهدى جهدك
-رحمونى : وبتقدرهم يا ايوب
-ايوب : نقدرهم ونقدر جدهم ..اقسم بالله السلاح اللى عندى يصفيهم كلهم
-رحمونى : وتبدا حرب وتقعد سنين ..تو هدا كلام عقال
-ايوب : امالا ايثبتو هما السعر عندهم ..واحنا اتم مننا البضاعه ونبدو نشرو باغلى الاثمان
-رحمونى : راك غالط يا ايوب
-ايوب : انا نعرف شن ندير
.
.
ونيس مقعمز مع جلال
-ونيس: شنو يا حاج ابراهيم
-الجدر: نراجو فى ناس يا حاج ونيس
-ونيس: احنا الفجر بنتسقدو ..مفروض اليوم نكونو متفاهمين على كل شى
-الجدر: ماتكون الا راضى يا حاج وانت تعرفنى
تلفت ونيس لجلال : فيش يراجى
-جلال: انت مزال ماتعرفهمش قصدك..مستحيل يبدو واكحيلة مهناش

_____________________________

فى حوش سعيد

وحيد فالصالة يراجى فى امه وخواته ينزلو ..
المرزوقى : اهو المفتاح يا وحيد ..الشركة نضفت الشقه وجهزتها
-سعيد : عنايدية من يوم يومها
-المرزوقى : تبى الحق يا حاج قعدتها هنايا هيا وبناويتها ماليهاش معنى
-وحيد : احسن حل تقعد عندى فى شقتى معززة مكرمه
-سعيد : وشنو هنايا شاديلها العصا
-وحيد : لا مش هكى يابوى .. لكن معاه حق المرزوقى قعدتها غلط
نزلت فضيلة من الدروج ووراها بناتها
-ايناس: مساء الخير عمى سعيد
-ايمان : مساء الخير عمى سعيد
-سعيد يشبح لفضيلة : مساء الخيرات ..شنو امكم مخيطيلها فمها …ولا قاتلها بوها
-فضيلة: لا قاتلى ولدى ودافنه سنين
-سعيد : اييييه علينا عاد ..قلنالك خوتك هما صحاب الشر
-وحيد : بوى وامى توة علاش تجبدو فى مواضيع قديمه ياسبحان الله
-فضيلة : غير هيا هيا حتى انا قداش فاضية …
وطلعت بناتها واقفات متحشمين من سعيد
-ايناس وايمان : مع السلامه عمى سعيد
-سعيد : فى حفظ الله بنياتى وردو بالكم من امكم
-ايمان : انشالله
-سعيد : وانت شنو بتجى هنايا ولا بتقعد معاهم
-وحيد : لا اكيدة تو نجى ندير طلات مرة مرة
-المرزوقى يضحك : هوا من زمان دايره فندق يابال توة
-وحيد يضحك : تى باهى باهى واتى فيا عاد
وطلع من الباب ورا امه وخواته…
-سعيد يكلم فالمرزوقى : قاعدة بنفس جمالها متع زمان وبنفس قوتها
-المرزوقى : البنات مايبانوش ليها بكل

______________________________

فى الاجتماع …

-الجدر : مابين ماوصل اكحيلة ..ترا اعطونا نقاط الاختلاف اللى جيتو على خاطرها
-جلال : الجهه الشرقيه اختارو واحد بس يتكلم عليكم ..والجهه الغربيه نفس الشى اختارو واحد
-ونيس: نحنا يحكى علينا ايوب
-الجدر : واحنا يحكى علينا خالد
-خالد تفاجأ: كلنا من بعدك عمى ابراهيم
-الجدر يكلم فى سلطان بالشوى خايف على زعله لانه اختار خالد : مدامه اكحيلة مهناش اللى من قداهم يتكلم
-سلطان : لاااا وخيره ..خالد وكمال اكبر منى ومن باقى الجماعه
-خالد : شنو !!؟ كيف يصير
-الجدر : قلتلك توكل يا خالد
-تلفت خالد : شنو طلباتكم

_____________________________

ملاك قدام حوش غادة صاحبتها واقفه قدام سيارتها هيا وسليمان
-اكحيلة : عندك علم انى معش نقدر نعيش دقيقه من غيرك
-ملاك : ربي يحفظك ويخليك ليا وتعيش ليا ولصغارنا
-اكحيلة: اسمعى معش نبى زعل
-ملاك : حاضر .. باهى وخوى خالد شن بدير معاه
-اكخيلة : خليتها للى اكبر منى ومنه ..خليتها لربي ..تو يحلها من عنده ..لا ح نكلمه ولا ح نجى على طريقه
-ملاك : والنعم بالله
اكحيلة شد ايديها الزوز: اوعدينى معش فى زعل ولا تنقريز
-ملاك : من اليوم انا بنعطى ودن من طين وودن من عجين
-اكحيلة: تو شوفينى انا عمرى مانجيب اخبار نخرب بيها عليا وعليك ..ولا عمرى نبدا زعلان من حاجه فى شغلى ونحطها فيك..فاصل كل المواضيع انتى عندى حالة خاصه
-ملاك : واااك على شكار روحه…باهى حفظته الدرس وفهمته خلاص
-اكخيلة : باهى اركبى سيارتك وفى حفظ الله
-ملاك : حاضر
ركبت سيارتها وصكر اكحيلة الباب ووقف على الروشن
-اكحيلة : محلاك وانتى هادية وتقولى حاضر
-ملاك : ومن اليوم معش بتلقى غير كلمه حاضر
ولبست نضاراتها ومشت بالسيارة وركب هوا سيارته متوجه لاستراحة سلطان

____________________________

-ايوب : نحنا مطلبنا العدل
-خالد : ومن ظلمكم…. مقسمين الوقت فالممر بيناتنا بالعدل
-ايوب : وين العدل واحنا كله عاطيينا فيه ثلاث شهور
-خالد : هوا هداكه ..ثلاثه انتو وثلاثه الجنوب وسته لينا باعتبار اننا اكثر منكم
-ايوب : وهدا عدل فى نضرك
-خالد : وخيره جماعه الجنوب راضيين وماشكوش
-ايوب : لان عندهم بدل الممر عشرة وبدل التاجر عشرين ومتكمين امورهم البلاد اللى اضخ للسوق الليبي قريبه عليهم ماعندهمش مشكله
-جلال : لاااا غالط يا ايوب
-ايوب : يا جلال انتو العائلات الكبيرة مازالت عالعهد ..لكن الشباب الجديد يخدم بالسريات ومنغير علمكم حتى انتو ..ويدخلو من اماكن ثانيه ممرات والله احنا مانعرفوها ..لكن لانها بلادهم هما عارفين اماكنها السريه كلها ..وعلاش بيشكو !؟؟
-خالد : لكن هادى معاهدة من سنوات وبوك وعمك موقعين عليها
-ايوب : توة كلامك معايا انا مش مع بوي وعمى
تلفت خالد لونيس ..لكن ونيس تلفت للجهه الثانيه انه موافق على كلام ولده..والمشكلهةخالد عصبي
-خالد : انت عارف اللى ينقض العهد شنو عقوبته ولا
-ايوب : العهد اللى بين الشيابين الكبار مايلزمنيش انا
-خالد : لكن العقوبة عالجميع ماتحددتش على شيابين ولا صغار
-ايوب تعصب : يعنى انت بتعاقبنى
-خالد : طبعا بنعاقبك لو حاولت تنقض شى من اتفاقات الكبار
وتلفت لرحمونى : جيبولنا تريس نحكو معاهم
..خيركن ملمدين عواويلكم جايبينهم وجايين
-ايوب رقاله الدم لدماغه ووقف : منو العواويل يا امسخ ..تى والله كان ما ادير اللى نبيه انا مانقلبها الا نار حمرا
-الجدر : شنو الكلام هدا يا ونيس
-ونيس : ايوب قمعز خلى نفهمو
-ايوب : مانيش مقمعز لين يسحب كلمته ويعتدر المسخ هدا
-خالد واقف : مانيش ساحبها ..والحق مش فيك الحق ..الحق فى بوك اللى نسى يجيبلك مرضعتك معاه
وتلفت بيطلع ويقيم ايوب مدسدسه ويضرب خالد طلقه تجى فى كتفه ..
ويقيم كمال مسدسه ويضرب ايوب تجيه الطلقه فى رجله …
وهما عادة لما يصير ضرب سلاح يطلق الجدر طلقات فالهوا بيش الكل يوقف
وبالفعل قام سلاحه واطلق طلقات فوق يبست الجماعه كلها
لكن خالد وسط الهرج والمرج من حرارة الروح طلع خارج الاستراحة …
والحراس متع الشخصيات اللى لداخل ماعرفوش منو ضد منو هاجو فى بعضهم
لما طلع خالد من حرارة الروح والضربه قعد يمشى بسرعه يبي يطلع من الاستراحة وصل لعند الباب وطاح
خوه كمال لداخل يدور عليه فالاستراحه لانها واسعه ماعرفاش وين مشى
واكحيلة لما جاى قريب يوصل الاستراحة سمع الطلقات اللى ضربهم الجدر فالهوا عفس على سيارته ووصل للاستراحة …
وهوا خاش من الباب نادى عليه خالد من وراه
قامه على كتفه زى شكارة السكر ” عجبتكم انتو امس شكارة السكر ولا??
وطار بيه للدكتور ورفعوه للطبي ودخلوه طول للعمليات..صح الرصاصه فى كتفه اليسار لكن جت قريبه من القلب
واكحيلة يتصل بسلطان يبيش يرد عليه …
يمولج معرفش كيف يدير ..اتصل بملاك ..ردت عليه
-ملاك : حبيبى
-اكحيلة : اعطينى رقم كمال
-ملاك مخلوعه : خيرك حبيبي انشالله خير تعاركتو
-اكحيلة : متعاركناش حبيبتى.. سلطان يبيه ضرورة وتليفونه رايح منه
-ملاك : لكن صوتك ميطمنش
-اكحيلة : يا ملاك اعطينى رقم كمال تربحى
-ملاك : باهى سجل عندك
وبالفعل سجله عنده وسكر المكالمه واتصل بكمال
-كمال يعيط : الووو
-اكخيلة : خالد معاى
-كمال : منو انت
-اكخيلة : انا اكحيلة ..وين سلطان والجدر
-كمال : خالد وين .. انتو وين توة ..خالد انضرب برصاصه
-اكحيلة : احنا فالطبي وخالد دخلوه للعمليات ..شن صار وسلطان وينه
-كمال : اهو جايك انا فالطريق …وسلطان فالمركز
-اكخيلة : ومن رفعه سلطان للمركز …وقصدى علاش
-كمال : ضرب الرصاص انسمع ..والجيران بلغو وجت الشرطه طول
-اكخيلة : خالد قالى ايوب ضربه ..
-كمال : وانا ضربته برصاصه جت فرجله
-اكخيلة : ولما وصلو الشرطه لقوه
-كمال: لا طارو بيه بوه وعمه طلعوه الله لا ترده
-اكخيلة : الجدر شن صار فيه ..وجلال حاضر هدا كله ..
-كمال : الجدر طلعوه الحرس متعه طول قبل ماتوصل الشرطه ..وجلال مشى للمركز مع سلطان
-اكخيلة : حشمه الزح ..جلال اكبر من افعال المفرخ هادى
-كمال : انا قريب نوصل ..اطلع انت برة لسلطان عادرك يا اكحيلة
-اكحيلة: لا لا غير اوصل وخلى يطلع الدكتور يطمنا على حالة خالد …سلطان نعرفه يقد روحه

________________________________

سلطان طلع من المركز لانهم كلهم معارفه …
والجدر روح لحوشه ….
وكمال وصل للمستشفى لقى اكحيلة واقف قدام غرفه العمليات ..
طبعا كمال وصل منهار خايف على خوه …
لما شاف اكحيلة اضبطه طول
وسليمان مستغرب وحاير فيه منين هالمشاعر هادى كلها ..
-كمال : خالد شن صار فيه
-اكخيلة : متخافش عليه يا راجل خالد قوى
قعمز كمال وهوا يبكى: اقسم بالله اتصير لخالد حاجه حوش ونيس كلهم مامخلى واحد فيهم على وجه الدنيا
-اكحيلة : شن صار بالضبط احكيلى
وقعد كمال يحكيله فى اللى صار كله ..
-اكخيلة : يبي رباية ايوب هدا
-كمال : هوا صحيح خالد كبر معاه فالدوة..لكن ماتوصلش لضرب السلاح
-اكحيلة : اللى تجى فيه صبره…تو غير خلى نشوفو خالد وبعتالى ساهل
وقام تليفونه اتصل بجلال
-جلال : اهلا بالناس الباهية
-اكحيلة : اهلين بالتريس
-جلال يضحك : وين مشيت وخليتها تقلى وراك
-اكخيلة : كنت نحل فى موضوع مصيري بالنسبه ليا ..بس انت وين توة
-جلال : انا فى طريقى لبلادى …عيّلت يا ولد عمى
-اكحيلة : هوا نشهد بالله الولد فالح وشاطر ..لكن اكيدة خالد استفزه
-جلال : طول عمرنا نستفزو فى بعض ..لكن عمره السلاح ماناض بينا ..لكن لما خشو فيها المفرخ معش بدت قعدت كبار
-اكحيلة : توة بالصلاة عالنبى نبيك تولى
-جلال : انا توة قريب نوصل طريق الرابطه
-اكحيلة : تلاقى على يدك اليسار فتحه تقدر ادور منها وتولى
-جلال يضحك : فوتتها من بدرى
-اكحيلة : ماكثر ربي غير الفتحات متع الرجوع … اول فتحة لف وارجع خلى نديرو خل
-جلال : انت تعرف خاطرك عندى ..منقدرش انردك
-اكحيلة : تسلم يا راس ربي يحفظك …نتلاقو عند الجدر
-جلال : انشالله
وقام تليفونه واتصل بالجدر اطمن عليه ..لقاه روح لحوشه …
وشرين تليفونه لقى سلطان يتصل ..اطمنو على بعضهم وقاله اهو جاى للمستشفى بنلحقكم

_____________________________

ملاك فى حوشهم تمولج تحساب سليمان تعارك مع خوتها ..
طلعت للصالة وقعمزت …لحقتها سليمه
-سليمه : خيرك
-ملاك : كلمنى توة سليمان يبي رقم كمال ..وانا زى ماحكيتلك انهم كلموه ورفضوه ..خايفاته تعارك معاهم
-سليمه : انتى مش قلتيلى توة قابلتيه وقالك تو نتصرف
-ملاك : ايه هكى قالى
-سليمه : معناها هوا تصرف ..وانا متاكدة من اكحيلة ومن اخلاقه مستحيل يغلط
-ملاك ابتسمت : حتى انتى بديتى تقوليله اكحيلة
-سليمه تضحك : تغرفى لما مشيت لحوشم وشوفته كيف …اووووف شخصيته قوية ومؤثرة على كل اللى فالحوش
-ملاك : واااك قداش نحبه ..ربي يحفظهولى
-سليمه : ربي يوصلكم لبعض بالحلال يااارب
وسمعو صوت باب حوش خالد انفتح بالقوة ..ومريم نازلة بسرعه
-مريم : وين منير
-ملاك : خيرك شن فى
-مريم : خالد انضرب بالرصاص ودخلوه للعمليات توة
-ملاك ضربت خدودها : لا خالد لا
-سليمه شدتها : صلى عالنبى يا ملاك خيرك
-مريم : ارفعينى للمستشفى هيا نوضى
-ملاك : انتى من قالك
-مريم : بوى توة اتصل بيا
وطلعو الثلاثه فالسيارة ومشو للطبي
ركبو لقسم العمليات …مريم وملاك فى صدمه وحدة لما شافو اكحيلة واقف مع كمال
مشت ملاك تجرى لكمال ..حضنها
-ملاك : خيره خالد
-كمال : ماتخافيش ..مافيه شى الرصاصه فى كتفه ..بسيطه انشالله
-مريم تشبح لاكحيلة وتكلم فى كمال : خيره خوك يا كمال
-كمال: تعارك هوا وواحد واضاربو بالسلاح
-ملاك تشبح لسليمان وسليمان يشبحلها …خاطره يحضنها ويطمنها على خوها لكن مش قادر قدامهم ومايبيش حد يلاحظ انهم يعرفو بعض
قام تليفونه واتصل …
شرين تليفون ملاك ..لقت الاتصال منه هوا …مشت لاخر الممر بيش ترد عليه
-ملاك : الو
-اكخيلة : نحبك
-ملاك : ربي يخليك ليا.. وانا نحبك يا كل عمرى …بس علامه استفهام انت شن ادير هنايا
-اكحيلة : انا اللى انقدت خالد يا فالحه
-ملاك : بجد
-اكحيلة : شفتى ربي ..
-ملاك : ربي يخليك ليا ومشكور انك انقدت خوى برغم كل اللى داره
-اكحيلة : انا انسان ونحس راهو ..معقولة نلقاه فى وضع زى هدا ونسيبه
-ملاك : ربي يخليك ليا
جتها سليمه : سكرى التليفون تو مرت خوك تلاحظك
-ملاك : باهى
وخش سلطان سلم عالموجودين كلهم ..ووقف جنب اكحيلة …
ومريم مقعمزة ع الكراسى فى نهايه الممر …وعيونها مانزلتش من اكحيلة
وهوا عنده نيه يشبح لملاك وخايف مريم تلاحظه
-سلطان : الايام ايامك
-سليمان يضحك : شن قصدك
-سلطان : توة حتى كانا انت مارجعتش خطبتها ..بيجو هما يخطبوك
سليمان يضحك وخطف نضرة لملاك …لقاها تشبحله ومبتسمه …
طلع الدكتور وطمنهم على وضع خالد
-كمال : يعنى الرصاصه طلعتوها
-الدكتور : طلعناها لكن ياريت اطلعو المريض على طول ..لانه انتو عارفين هادى رصاصه ولازم من تحقيق فيها
-اكحيلة : خليه عالاقل الليله وعلى مسؤليتى
-الدكتور : المهم لو صارت اى اشكالية انا اسمى مايطلعش
-اكحيلة : بادن الله
خش منير : السلام عليكم
-الموجودين : وعليكم السلام
-منير : شنو صار يا عيلة ..خيره خالد
-سلطان : متخافش رصاصه طايشه وطلعوها
-اكحيلة : نستادن انا توة
وطلع من جنبهم …مريم معش متحكمه فى نفسها ..لما هوا لف من الممر ومعش يبان ..لحقاته
-مريم : سليمان
-اكحيلة تلفتلها : ايوه
لقاها مريم ….
-مريم : شكرا لانك انقدته
-اكحيلة : الحمدالله على سلامته …
ومشى وخلاها

____________________________

طلع سليمان من المستشفى لحوش الجدر طول …
وتناقشو عالموقف اللى صار
فهم منو اللى معاه الحق ومنو اللى غالط
واتصلو بونيس بيشوفوه وين رفع ولده
فرد عليهم انه رفعه لمستشفى الزهراء عنده فيه معارف وشالو الرصاصه طول
-اكحيلة : نتلاقو الليله فى حوش الجدر
-ونيس : انشالله كانا قدر ايوب
-اكحيلة : وايوب من مناديه ..انا قلتلك انت تعالة بروحك كلامى واضح
-ونيس : كمال بيحضر
-اكحيلة : لا ..انا وانت والجدر وجلال بس
-ونيس: الساعه كم
-اكخيلة : مع الساعه عشرة فالليل
-ونيس : تم
-اكحيلة : ابروحك ..واضحة كلمتى
– ونيس : قلتلك تم
طلع اكحيلة من حوش الجدر وروح لحوشهم

______________________________

تمت …ويتبع

الحلقه الجاية نشوفو خالد شنوبيقول لاكحيلة
وونيس شن بيحكمو عليه

نحبككككم 

 

error: