رواية اكحيلة

??للكاتبه زهور جمال الدين ??

???الحلقه الثامنه ???

ميسا على نار من اليوم اللى قبله….تبى تشوف وحيد بأى طريقه بيش تحكيله عالمعلومه اللى عرفتها
-ميسا : تى قلتلك نبيك ضرورى
-وحيد : منقدرش نجيك توة .. انا فالاستراحةمتع نسيب نزار صاحبى وعندنا ضيوف
-ميسا تسمع فى ضحك البنات : عندك ضيوف ولا ضيفات يا خاين
-وحيد : نعم نعم… شن تقولى انتى ..خاين لمنو انشالله …
-ميسا : وشنو انا مش عاجباتك يا بابا…مش قلتلى مانلقاش زيك
-وحيد : مانلقاش زيك فالتفتين ورفع الدوة .. لكن الحب والجو اللى بالى بالك ..انتى مش البنت اللى فى بالى
-ميسا : مصح وجهك ومحقرك
-وحيد : بندير روحى مسمعتكش ..ومفهمتش الكلام اللى قلتيه ..لانى عارفك بتولى زى الكلبةة
-وحيد : الكلبة هاديكا اللى تجرى ورا بنات الناس وهما شايطينه بتيرو ملوحينه فى اخر الدنيا ….
-وحيد : تى اقسم بالله ما مسخة مزال تتصلى ولا نسمع صوتك لما نهارك لاحرف
-ميسا : برة اشرب من البحر ..حاجة والله كبيرة
وسكرت فى وجهه التليفون : تى والله لما يبانلك يا خامر
وقامت التليفون واتصلت : الو عماد كيف الحال
– عماد : باهى اللى عبرتى وعاودتى نتصل بيك الايام اللى فاتو مترديش
– ميسا تضحك: لا والله غيركنت مشغولة
-عماد: ماهو بعتلك حتى مع بشرى صاحبتك وقالتلى وصلتلها الدوة وانتى فوتينى
-ميسا: ماهو فى هداكة الوقت كنت مش فالابيض مع وحيد ..وانت قلتلها نبى من ميسا معلومات عليه ..فالحق ماكنش عندى معلومات نقدر نفيدك بيها ..لكن توة اللى تبيه انا فيه ..والمعلومه اللى تبيها تكون عندك
-عماد : وحتى انا مش حنقصر معاك انشالله
-ميسا: انشالله : باهى امتى نتلاقو
-عماد : غدوة لو تحبىى.
-ميسا ” : تمام..انا حاطه سيارتى فالورشه ..وتوة كلمنى قالى كملها يبينى نمشيله
-عماد : فوتيه .. اهو تو نمشيله انا بعتالى ونخلصها
..غير انا ردى لما نبيك
-ميسا : ياسلام ..من اليوم رقمك انت وبس
وسكرت الخط : تو تشوف يا وحيد الشياطين تى والله لما نديرك سيرتك عالاداعه زى النشرة الجوية

_____________________________

خارج المطعم واقفين اربع شباب ..تابعين حرس اكحيلة ..لان الناس هادو صعب يطلعو بروحهم منغير مرافقين حتى لو من بعيد ..
ويبان المرزوقى مقعمز على طاولة بعيد فى وسط المطعم ..ع اساس مايعرفش حد

وصلت ملاك قدام المطعم …
كلمت سليمان .. قاللها انزلى انا داخل المطعم
-ملاك : انزلى احسن يا سليمه تو بتقعدى تراجى فيا
-سليمه : لا لا خلينى هنايا وخلاص ..خليلى الراديو مفتوح ونراجيك
-ملاك : مش حتقلقى
-سليمه : لا لا خودى راحتك وسلميلى عليه
-ملاك فرحانه : من عيونى ..
ونزلت من السيارة..لابسه نضارت شمسيه ..وماسكة فى يدها كيسه ..وتليفونها فى ودنها …
-ملاك : الو
-سليمان : حبيبتى
-ملاك : اهو نزلت حبيبي
-سليمان : نشبح فيك تعالى هى منبيش نطلعلك لانك خايفه حد يشوفنا
-ملاك : باهى سكر..سكر
وتمشى بخطوات سريعه وفتحت باب المطعم وخشت
تلفتت عاليمين باب غرفه vip لقت سليمان واقف ..ولابس بدله سروال قماش ودجاكه وسوريه بيضا ..و نضارات شمسيه ..
-سليمان مد يد : تعالى
-ملاك حشمه الدنيا كلها نصبت عليها: اهاا
ومشت جيهته …
فتح الباب ..ودخلها وخش وراها …
تفاجئت بالغرفه ..كلها ورد .. وامبايل واصلين للسقف ..امبايل عالارض …
واضاءة خفيفه ..وشويه دخان
” دايرين شغل مليح جماعه المطعم ..وعلى فكرة المطعم هدا فالدهمانى موجود لعند توة…ديما ينزلو فيها البنات غرفه vip فالسناب??”
______________________________

كمال مقعمز فالمكتب يحكى فالتليفون

-كمال : اسمع يا اوهيبه ..احنا الموضوع هدا كله ماليناش علاقه بيه
-اوهيبه : اسمه الجرثومة صب عليها واراكينا تو تهفت واضم فمها ومعش تكثر
” ملا ملا تشبيه…ثقافه ياC ????”
-كمال : هما كلمتين خوى خالد رد بالك ادخله فى قصه مع العقربان ..هدا غالاخير ولده ..واللى دايره حاجه يجيبه يجيبه تعرفه انت مايفوت عليه شى
-اوهيبه : هداكه زمان لما كان بصحته ..تو مقعمز على تركينا وطالق علينا ولده اكحيلة الكلب الضال هدا
-كمال : الراجل ماقالش عيب..موضوع عرضناه عليه ورفضه ..خلاص انديره بروحنا …شنو وقفت عليه
-اوهيبه : والخونه يا كمال..
-كمال: اكحيلة عمره ما كان خوان ..وكلنا نعرفو المعلومه هادى
-اوهيبه : موضوع بنديروه وطلع ..مانضمنش فيه حتى بوي كان سمع …اللى وافق يكون معانا مرحبتين بيه .. واللى رفض لازم ينقطع وينقص
-كمال : كيف بدير وكيف بتقتله ..وجماعه سيف القدافى فى كل مكان يسمعوش طلقه يلمدوها كلها
-اوهيبه : اللى بينفد صومالى محترف ..وانا متفق معاه من امس..ومستحيل تحصل وراه ثغرة
..ولاحقه عالخطوة من لما طلع من جنانكم
-كمال : معناها انت من امس ناوى تقتله
-اوهيبه : ماهو عارف رايه انا من قبل ماينعرض عليه الموضوع ..هدا علاش درت حسابى
-كمال : وامتى التنفيد
-اوهيبه : توة ..ممكن حتى قتلوه وتم الموضوع ..المهم تنفيد العمليه بين 3 و7 مساء
-كمال : صار شغل محترفين
-اوهيبه : امالا تحسابنى نلعب
-كمال : ربي يعاونكم ..بس زى ماحكيتلك خوى خالد ردو بالكم ادخلوه فى هالمواضيع
-اوهيبه : المهم بلغتك بيش تكون فالصورة
سكر كمال الخط …وقعد يخمم فى خالد مايبيشى يخش فى موضوع زى هدا ..فقرر يكلمه

_______________________________

فتح سليمان الباب: تفضلى
خشت ملاك للغرفه وخش وراها سليمان ورد الباب
لقت الغرفه متجهزة ومتكمه
-ملاك واقفه ومبتسمه: الله امتى احقت درته هدا كله
-سليمان : عجبك
-ملاك : اى شى منك يعجبنى
-سليمان بعد الكرسى : تفضلى قعمزى
-حطت ملاك الكيسه عالطاولة وقعمزت : مشكور
-قعمز سليمان : هدا كله داره المرزوقى اللى مشى معانا للمركز يومها ..بعتله رسالة وهوا دار اللازم قال شركات ادير هكى
-ملاك تشبح للغرفه وجمالها : ايه شركات متخصصه
-سليمان : انا تقول مش عايش فى ليبيا ماعمرى سمعت بيهم الحاجات هادو
-ملاك مبتسمه : بلحقه
-حط سليمان يده على يدها فوق الطاولة ويشبحلها : آنستينى
-ملاك واطت راسها : الله ايآنسك
-حط سليمان يده على دقنها وقام وجهها فوق : استاحشتك ..واستاحشت نشوفك
-ملاك مبتسمه : وانا اكثر
-سليمان يشبحلها : حاسه باللى حاس بيه
-ملاك : اكيد حاسة
-سليمان : انا كأنى توة نزلت للدنيا مولود جديد ..يابنتى حتى لون الشجر والورد تغير فعيونى …معاملتى للى يشتغلو عندى بدت احسن وكلهم ملاحظين الشى هدا عليا
-ملاك : وانا حياتى كلها تغيرت بيك.. وفى شى متحرك فى داخلى اول مرة نحسه
-سليمان : حلو الحب ولا
-ملاك : يهبلللل
-سليمان : نحبك …
وطقطق باب الغرفه …خشت بنت وولد جايبيين عصير طبيعى فى كيسان قنينات وفيهم تيوب قنين على شكل قلب .. وشوكلاته قريب ثلاثه انواع وطلعو
-سليمان : تفضلى
-ملاك متحشمه : تو ناخد ..
-سليمان خدى كاسها وقامه بيده : انتى اليوم الملكة ونشربك انا بيدى
وقربلها الكاس شربت من التيوب وضحكت ..
-سليمان : شنو الكيسة هادى
-ملاك مبتسمه : هدية لواحد غير كان صبر بس
-سليمان : وانا وين مزال نعرفه الصبر بعد عرفتك
خدت ملاك الكيسه طلعت منها ساعه ماركه ..وبرفان ريحته حلوة …
-ملاك : الساعه هادى منبيكش تحولها من يدك ..والريحه نبى نشمها عليك اليوم بيش تقعد ريحت اول لقاء بينا
فتح سليمان باكو الساعه طلعها : الله عالدوق الحلو
وحول ساعته من يده ولبس ساعتها …
وخدى البرفان فتحه وبخ منه
-ملاك : محلاااها الريحه تقتل …
-سليمان قام التليفون واتصل : يا مرزوقى وين الهدية البنت سبقتنا
قعدت ملاك تضحك …
طق الباب خش ولد حامل فى يده بوكس فيه شوكالاتات وورد ..وفيه هدايا من ضمنهم تليفون وساعه ماركه وسلسال بسيط فضه
-ملاك فرحانه قامها بيها : هدا شنو
-سليمان: منكدبش عليك ..هادى هديه متكمتها الشركة اللى دايرة الجو هدا كله …هدية بنوتيه حلوة …بس الحق انا هديتى غير
-ملاك : هديتك !!.. مزال اكثر من الهدايا هادو
-سليمان : شوفى حبيبتى انا انسان الحمدلله ربب رازقنى بالمال ومنعم عليا ..منها وارث وربي يطول فى عمر بوى .. ومنها خادم على راسى
-ملاك مستغربه : ايييه
-سليمان : وانتى قدرك عندى عالى ومايرضينيش انك تفهمى كلامى غلط وتزعلى منه زى مازعلتى بكرى
-ملاك : كلام شنو حبيبى
-سليمان : لما قلتلك عندى استراحة وتعالى نتلاقو فيها وانتى زعلتى
-ملاك : خلاص انا نسيته الموضوع حبيبى ليش قاعد مدكره انت
-سليمان : لانى مزال بنقولهولك مرة ثانيه متاكد من نفسى ..ولدلك بدل ما ح نقولك عندى استراحة وتعالى نتلاقو فيها ..حنقولك عندك انتى استراحة واستقبلينى نتلاقو في استراحتك
-ملاك : مفهمتش عليك راهو
-سليمان : هيا هادى هديتى ليك …
وطلع اوراق : هادو اوراق استراحة ليا فى تاجورا …بعتهالك باوراق رسميه بيع وشرا ..
ووراها الاوراق وحاط صبعه عالكتابه : شوفى هنايا اسمع البائع سليمان ..واسم المشترى ملاك ..وانا كاتب كل بياناتى ..مزال انتى نبيك تكتبى بياناتك ونعطيها للمحامى يسجلهالك رسمى
-ملاك فاتحه فمها : لااااا والله ماصارت
-سليمان : نقولك انتى مرتى يا هبله ورزقى كله ليك ..سواء اليوم ولا غدوة
-ملاك ?: واحنا وبن نعلمو هالنصيب
-سليمان شدلها يديها الزوز : الشر برة وبعيد انشالله ربي يكتبك نصيبى .. انا يابنت الناس مع نقدر نعيش منغيرك
-ملاك قامت راسها : ولا انا مزال نقدر منغيرك
..نمووت احسن لو انت مش فحياتى
وطق الباب ثانى …لم سليمان الاوراق
خشو زوز اولاد وبنت … حطو الهديه متاعها على تركينه ….
وحطولهم نسكافيه وكيك وحاجات شوكلاته كلها حلوة قريب اربع انواع …
وقامو الكيسان ومشو
-ملاك : بس انا منقدرش نقبلها هديه زى هادى
-سليمان يبصر عليها : توة الساعه سهل نسلبها ..لكن الريحه كيف بنحولها من حوايجى
-ملاك تضحك: ليششش
-سليمان : بتردى هديتى بنرد هديتك
-ملاك : ونهون عليك
-سليمان : لا والله ماتهونى يا غالية ..خلاص خودى الاوراق وحطيهم فى شنطك وعبى البيانات فالحوش والمرة الجايه جيبيهملى بيش نكملهم فالشهر العقارى
-ملاك : بس لو ماكنتش تحلف باليمين …
وبدو يضحكو الزوز
-سليمان : محلا دمك وماخفه
-ملاك : باهى انا موافقه ناخدها ..بس تتسجل بعد مانكون زوجتك
-سليمان : بس هيا ليك من توة
-ملاك: ماهو قلتلك مشكلتك الحلفان ??
-سليمان : معناها يوم اللى نقولك يا ملاك تعالى نتلاقو فى استراحتك مش اديريلى عيطه وبكى وخناين نازلة ???
-ملاك : باهى مش حندير عياط …لكن معش تحلم انك تخشها الاستراحه لين تكون زوجى
-سليمان : زوجى.. محلاها الكلمه …
ويضحك : باهى توة موافق يا زوجتى …بس خليها للايام
-ملاك : باهى
-سليمان : يبهى ايامك ..تفضلى النسكافيه ..ولا تبى نشربهولك حتى هوا
-ملاك : لا انا اللى بنوكلك الكيكه بايديا
-سليمان : توة معقولة اليدين الناعمات هادو بيوكلونى انا …..
-ملاك : يوكلوك ويخدموك ويغسلولك حتى رجليك لما تروح من الخدمه تعبان
-سليمان : اسمعى راهو كانا نقزت عليك توة مش مسؤل
-ملاك تضحك : تنقز عينك
-سليمان : كلامك محلاه ..يزيد يحببنى فيك اكثر
-ملاك : يعنى انت تحبنى
-سليمان مسك يداها الزوز وباسهم : فوق ماتتصورى

________________________________

كمال خايف على خوه خالد يخش فحكاية مقتل اكحيلة ..عارف بوه مش ح يسكت كان صارت لولده حاجه
قام التليفون واتصل بخالد
-كمال : انت وين
-خالد : غير قول السلام عليكم
-كمال: باهى السلام عليكم انت وين
-خالد : انا فى حوشى
-كمال : بروحك
-تلفت لمريم مقعمزة جنبه عالسرير: ايه بروحى شن فى
انتبهت معاه مريم
-خالد : ينصر دينه راجل من ضلع راجل
زادت انتبهت مريم اكثر
-كمال : لو كلمك انت ماليكش علاقه اهو قلتلك رد بالك نسمع بيك خشيت معاهم
-خالد : المهم نفتكو منه الضلع الخامر هدا سواء اشتركت معاهم والا لا
-كمال: قلتلك رد بالك يا خالد اديرها من وراى ..لان سلطان ولد خالك مش ح يسكت
-خالد : نوعدك لو حطيت يدى فى حاجه ح نحطك فالصورة من اول لحظه
-كمال: تم
وسكرو الخط …
-مريم : خيركم شن فى انشالله خير
-خالد يضحك: امأجرين واحد صومالى
-مريم : خيرك تضحك
-خالد : لانى سعيد وفرحان
-مريم : دومها يا حنه ..وعلاش
-خالد : الصومالى هدا محترف وبيقتل اكحيلة
-وترعش مريم مع بعضها وتجى واقفه: وعلاش بتقتلوه اكحيلة
– خالد: وانتى خيرك رعشتى مع بعضك وفمك تسبت
-مريم : انت تعرفنى منحبش الدم والقتل
-خالد : اللى يسمع مايقولش بنت الجدر
-مريم معش متحكمه فى نفسها : هادى روح وحرام عليكم ..امتى بتقتلوه ..حاول توقفهم
-خالد : انا مالياش علاقه .. والعمليه يا تنفدت يا بتتنفد توة..المهم قالى كمال موعدهم من 3 ل 7
لبست مريم شبشبها بتطلع من الدار
-خالد : وين ماشيه
-مريم : انغمت نفسى بعد ماسمعت بحكايه القتل بننزل لوطا شوى للصالة
وطلعت من دارها ..مشت لباب الحوش طلعت منه وسكراته وراها..ومشت تجرى للجهه الثانيه وين باب شقه سلفتها زينب …
واطقطق عالباب بالقوة …
فتحتلها اميرة واستغربت : عمتى مريم خيرك
-مريم : امك وين
-اميرة : امى لداخل
-مريم : ناديها
-اميرة : حاضر
خشت للشقه : ماما ..ماما
طلعت زينب : خيرك يا مريم وجهك اصفر
-مريم شدتلها يديها الزوز: ياوخيتى اعطينى الامان وماتعاوديش عليا
-زينب مستغربه: عليك الامان يا مريم خيرك
-مريم : اعطينى رقم خوك سلطان
-زينب : وعلاش
-مريم : منغير ماتنشدينى ياوخيتى اعطيهولى توة
-زينب: اكتبيه انا حافظاته
وقعدت تمل فيه عليها ومريم تكتب …
-مريم : ياوخيتى الكلام بينى وبينك
زينب طبعا متوقعه المشكله تخص بو مريم
وخدت مريم هداكه الرقم وطلعت لجنان الحوش فالجردينه بيش مايسمعها حد ..واتصلت برقم سلطان رد عليها
-سلطان : الو
-مريم : الحق صاحبك يا سلطان بيقتلوه
-سلطان : انتى منو …ومن صاحبى ..فالكاشف طلعلى اسمك مريم ..منو مريم انتى
-مريم : ياودى انا مريم مرت خالد عبدالعاطى استريحت
-سلطان : مفهمت منك شى يا مريم
طبعا سلطان ماستغربش فى اتصالها ولهفتها على اكحيلة لانه سليمان صاحبه وحاكيله على قصه مريم
-مريم : الحق اكحيلة ..فى جماعه امأجريله صومالى محترف بيقتله توة …اكيدة لاحقينه وزابطين مكانه
-سلطان يعيط : وانتى كيف عرفتى ..من ناوى يقتله بوك ولا خالد
– مريم : لا بوى لا خالد ..توة جماعه كلمو كمال وخبروه … وكمال خبر خالد انه مايدخلش فالموضوع …لكن منهما معرفتش..تربح ياسلطان الحقه تربح
-سلطان : باهى سكرى ….
وبدى يتصل بكل ارقام اكحيلة اللى عنده يلقى فيهم مقفلات …لان سليمان مش فاتح اللى الشفرة اللى دايرها خاصه لملاك وماعاطيها لحد طبعا
اتصل سلطان بالمرزوقى …رد عليه
-المرزوقى : اهلا يا حاج سلطان
-سلطان ايعيط : اكحيلة وين
-المرزوقى مستغرب : سيدى اكحيلة معاى اهو
-سلطان : اعطيهولى ..امتو وين
-المرزوقى وقف : احنا فالمطعم وهوا بعيد عليا معاه ناس …خيرك يا حاج انشالله خير
-سلطان : طلعه توة با مرزوقى باعتيله ناس بتقتله توة …سقد يا راجل طلعه
-المرزوقى : ومنو اللى بيقتله
-سلطان : واحد صومالى..دور فالمطعم اكيدة تلقته مقعمز لانه لاحقكم
-المرزوقى : تم
وسكر الخط طول فى وجه
وناض مشى لفم باب المطعم اشر للاربعه اللى واقفين برة حمايه …جوه يجرو طبعا …
ومشى جهه الغرفه اللى فيها سليمان وملاك

________________________________

-سليمان : نبيك تجيبيلى عشر صغار
-ملاك : ياعينى
-سليمان : لكن نبيك ادلعينى انا اكثر واحد فيهم
-ملاك : عاد انت ولدى الكبير فيهم والغالى
وقعدو يضحكو …
وانفتح الباب بالقوة منغير طقان انخلعو ملاك وسليمان
-سليمان تلفت للباب: شن فى يا مرزوقى
-المرزوقى : نوض بنطلعك يا سيدى المكان مش تمام
-سليمان متع واحد فاهم ومحترف : قتل ولا تفجير
-المرزوقى: قتل يا سيدى
-سليمان قايم ايده فى وجه المرزوقى : ملاك
مايوصله شى .. ولا يشبحها حد
-ملاك انخلعت : شن فى يا سليمان
-وقف قدامها سليمان وشد كتافها الزوز: حبيبتى ماتنخلعيش .. توة بنطلعك بنركبك سيارتك ..تولعيها وتطلعى تجرى طول اتروحى حوشكم ..نكلمك فالتليفون ردى طول ماتشغلينيش عليك
وقام دجاكته جهه اليسار وحط ملاك تحتها وغطاها
بيها …وطلعو بسرعه بسرعه مغطيلها وجهها بيده خايف الناس اللى يبو يقتلوه يشوفوها ويبهدلوه بيها … ركبها فى سيارتها
– وانخلعت سليمه : شن فى
-سليمان يعيط : اطلعى بسرعه
-ملاك شبحتله: رد بالك من روحك حبيبى على خاطرك
-سليمان : ماتخافيش عليا …اصلا انا بديت عايش فالدنيا على خاطرك …
وشبح لسليمه : ملاك فى امانتك ردى بالك عليها ..وخودى تليفونها توة بيش لما نكلمكم تردى ….وضرب الباب بيده : اطلعى بسرعه
وخرت ملاك السيارة ومشت باقصى سرعه

-المرزوقى : هيا ياسيدى اركب السيارة نطلعو بسرعه ..
-سليمان : هيا …
وركب المرزوقى يسوق وسليمان فى جنبه ….
وطلعو بسرعه من المطعم وطلعت السيارة الثانية وراه
ملاك تجرى بسرعه بالسيارة
-سليمه : غير شن فى مفهمتش
-ملاك : انا بروحى مش فاهمه
وبدى تليفون ملاك يشرين فالشنطه وتلفتت سليمه بتجيبه

وسليمان فى السيارة قايم التليفون فى ودنه: ردى ….ردى
وردت سليمه : ايوة
-سليمان : وين وصلتو
-سليمه : قاعدين فى نص الطريق السيارات زحمه
-سليمه : فى سيارة وراكم
-تلفتت سليمه لملاك : فى سيارة تمشى ورانا
-ملاك : لا
-سليمه : لا مفيش
-سليمان : اعطينى ملاك
-تلفتتلها سليمه : يبيك
-ملاك : طلعى السماعات من شنطى وحطيهم فالتليفون
تلفتت سليمه للشنطه طلعت السماعات وحطتهم فالتليفون ..واعطتهم لملاك ركبتهم فى ودانها
-ملاك : الو
-سليمان : خلى الخط مفتوح لين توصلى ونطمن عليك
-ملاك : حوشنا معش بعيد حبيبي ..غير انت رد بالك من روحك ..ومنو يبي يقتلك هدا
-سليمان : منو بيقتلنى حبيبتى مترعشيش روحك ..من قال قتل
-ملاك : ما ادرقش عليا انت توة قلت قتل ..بالله عليك طمنى يا عمرى
-سليمان : وراس الغاليه مافى حاجه ..غير سوقى بالعقل مانبيش نخسرك
-ملاك : خلاص احنا نعتبرو وصلنا جيهتنا
-سليمان : متسكريش لين تخشى جنان حوشكم
-ملاك : حاضر
والمرزوقى يسوق بسرعه …مروح بي سليمان للحوش …
وسليمان يدعى فى خاطره انشالله غير ماشافوش ملاك
وصلت ملاك
-ملاك : حبيبى وصلت
-سليمان : باهى الحمدلله طمنتينى…توة خشى دارك ومتخليش حد من خوتك يلاحظ حاجه عليك
-ملاك : باهى وانت
-سليمان : انا تمام …غير انتى ماتشغليش روحك بيا …وماتتصليش لين انا نفضى ونتصل بيك باهى
-ملاك بدت تبكى : لا كلمنى متخلينيش هكى خايفه عليك
-سليمان : حاضر حبيبتى نكلمك غير توة خشى للحوش ومتخليش حد يحس بحاجه
-ملاك: لا اله الا الله
-سليمان : محمد رسول الله
وسكرو الخط …
ونزلت ملاك وسليمه من السيارة وخشو للحوش ولدارها طول

-سليمان تلفت للمرزوقى : من بلغك انت
-المرزوقي : سلطان
وصلو قدام بوابة الحوش …وقفو السيارة
-سليمان : وسلطان من بلغه
وتجيه رصاصه من جهه الروشن ..خشت فى رقبته واستقرت
-سليمان : ااه
المرزوقى شاف اللى ضرب السلاح …
ولكن ماقدرش يلحق عليه لانه لهى فى اكحيلة
والشخص اللى ضربه دور السيارة واختفى
تاريته الشخص اللى باعتينه يراجى فيه قدام الحوش مش فالمطعم …
ستر ربي كنهدا راهو شاف ملاك واصبحو فى عملة ثانيه….
طبعا المرزوقى نزل من مكانه ولف للجهه الثانيه : -المرزوقى: سيدى اكحيلة …ومس يده يلقاها كلها دم …
زوز من جماعه البوابه جو يجرو لقو سليمان مضروب وماشى فى غيبوبه …
نزلوه من السيارة وطارو بيه بسرعه لمستشفى الحوادث متع بوسليم …قالولهم كنا فى عرس…
وطبعا المرزوقى اتصل طول بوحيد وسلطان …
لحقو الزوز للمستشفى ….

____________________________

تمت …..ويتبع

نحبكم ❤

____________________________
.
.
.
.
.
حسكم سخفتونى ???

باهى على خاطر الكلام الحلو اللى عطيتونى بيه طاقه ايجابيه فى بوست اللومان ?? اللى نزلته انا بكرى ..اهو تو نزيدكم شوى ??

ملاك على نار تراجى فى مكالمه من سليمان …
وسليمان دخلوه طول للعمليات لان الرصاصه ماخشتش فى رقبته…لا استقرت بين الكتف والرقبه
طلع الدكتور….
وحيد مقعمز يبكى زى العيل الصغير
-سلطان والمرزوقى مشو يجرو للدكتور : شن صار يادكتور
-الدكتور : منكدبش عليكم ..الرصاصه مستقرة فى مكان خطير ..ومقدرناش نطلعوها
-سلطان : باهى وكيف يصير يا دكتور
-الدكتور: عندكم من هنايا لغدوة تقدرو تتصرفو وتطلعو بيه برة
-سلطان : تم يا دكتور
-وحيد يبكى: منهوا اللى دار فى اكحيلة هكى ..تى والله ليبيا لما نحرقها كان ماطلعته
-سلطان شده من وجهه: توة احنا فى اكحيلة مش فاللى قتله ..لازم نتصرفو توة ونطلعوه فى طيارة
وياكبدى اسمع وافزع ..سمعو اكحيلة انضرب كلها تحركت ..من طرابلس لسبها لبنغازى كلها استنفرت …
طلعوه فى نفس الليله فى الاسعاف الطائر ..من ليبيا لمصر باعتبارها الاقرب مسافه …
وهما فالمطار قبل ما يطلعو ..قيس الساعه 4 الفجر ….
تليفون سليمان الخاص اللى يكلم بيه فى ملاك عنده …
قامه واتصل بملاك …شرين التليفون
شافت ملاك رقم سليمان يتصل قريب طارت بالفرحه
ردت طول لانها لتوة ماجاهاش نوم تراجى فيه

-ملاك : حبيبي
-المرزوقى : انا المرزوقى
-ملاك : وين سليمان
-المرزوقى : بنتى سليمان يشكر فيك ويقول عليك بنية قوية وعاقلة ..اسمعينى بالشوى
-ملاك طول دموعها نزلو : سليمان وين
-المرزوقى: سيدى اكحيلة انضرب برصاصه وطلعنا بيه برة
-ملاك عيطت : ااه انضرب برصاصه
-سليمه : خيرك شن فى بالشويا خوتك بيسمعوك
-المرزوقى : الو ..الو
-ملاك : هوا وين توة نقدر نجى نشوفه
-المرزوقى : احنا فالمطار معاى وحيد خوه وسلطان صاحبه …
-ملاك : وراس عمى كلمنى وطمنى اللى يصير معاك كله
-المرزوقى : حاضر ..وراس بنتى غير نوصلو واللى يصير معاى نكلمك طول
وسكرو الخط وملاك وين تلقيها عاد …هاتك يا بكى

سليمان وصل مصر وداروله عمليه مستعجله طلعوله الرصاصه
وقعد ثلاثه ايام وهوا فى غيبوبه مافاقش منها
رابع يوم فاق …وشافهم وكلهم واول حاجه سأل عليها ملاك ❤
كلمها من مصر …وطمنها على نفسه
طبعا هيا كانت متابعه مع المرزوقى اولا بأول ..
-سليمان : خفتى عليا
-ملاك تبكى : امالا على من بنخاف كان مش عليك انت
-سليمان يتأوه من الالم : معش تبكى حبيبي
-ملاك : توجع فيك العمليه حبيبي
-سليمان : شوى مش هلبا …اللى يوجع فيا قلبي لانه مستاحشك
-ملاك تبكى: وانا مستاحشاتك اكثر يا عمرى
-سليمان : بالرغم والله ماهاين عليا تبكى ..لكن والله فرحان هلبا بدموعك اللى خايفات عليا
-ملاك : انت روحى وقطعه من قلبى …كيف مانبكيش عليك
-سليمان يبي يضحكها : هادو المطاعم اللى تبينا نتلاقو فيهم ..قلتلك نمشو لاستراحتى درتيلى بكى وحولتيها قضيه اخلاقيه
-ملاك تضحك: انت جاتك عالجرح عاد
-سليمان : نحبكككك
-ملاك : نموووت فيك
-سليمان : غدوة بنروح.. بتجى بتشوفينى
-ملاك : اكيدة نبى نشوفك بس وين
-سليمان : فى حوشنا طبعا
-ملاك : منقدرش نمشيلك لحوشكم ..حيه علياااا وبوك كان شافنى شن يقول عليا
-سليمان يضحك : محلاااها كيف قلتيها تهبللللل
-ملاك : انت غير روحلى بالسلامه..و بعتالى نلقو الف طريقه نشوفو بعضنا بيها

ثانى يوم المغرب روح اكحيلة لحوشهم فى ليبيا
بوه وخوه يغلو يبو يعرفو منو اللى دار فى اكحيلة هالعملة .. ولكن هوا قاللهم اسكتو توة نكملو جيان الناس ونفضو باللى دار العملة
الحوش يملا ويفرغ …نحس فيه الشعب الليبي كله جاه ..لدرجه مش لاقى وقت يكلم فيه ملاك
وهيا يا نارى مستاحشاته …وهوا يلوم عليها يقوللها تعالى زورينى ❤?
-سليمان : نبعتلك المرزوقى يجيبك الصبح نشبحك ويروح بيك طول ..الصبح ديما فاضى الحوش وماعندى حد
-ملاك : حبيبي منطقيا ماتجيش كيف تبينى نجيك لحوشكم
-سليمان : عاديه زعميتا انتى ماشيه للمدرسه
..نشوفو بعضنا ويروح بيك .. وتوصلى فى الامان لحوشكم ..اوثقى فيا رانى قدها ..
-ملاك : عارفاتك حبيبي قددها وقدود .. بس مشكلتك تحلف طول
-سليمان يضحك: يعنى موافقه وبتجى
-ملاك : امالا بنخليك تصيم ثلاثه ايام بعد الحلفه وانت مريض
-سليمان : نحبككككك هلبا يا بنت..وكان ماجيتى وروحتى بلا شوشرة معش نبدأ اكحيلة رانى نخاف عليك اكثر من روحى
-ملاك : اسمع راهو بنجيب سليمه معاى ..نخافك تخطفنى
-سليمان : بااااهى جيبيها فندى سليمه معاك بالك تحميك منى
-ملاك تتسهوك : باهى تو نتفاهم مع المرزوقى امتى يجينى ونقولك
-سليمان : مصحك ..عاد انتو ارقامكم عند بعض ومكالمات على طول
-ملاك : تى انا كانا مش من المرزوقى معبرنى ويطمن فيا لما انت فغيبوبة رانى هبلت ورفعونى المستشفى المجانين
-سليمان : بارك الله فيه المرزوقى زايدة معاه…
وتفاهمت ملاك مع المرزوقى يجيها قدام سوق كبير بعيد على حوشهم نعتتهوله هيا
وبالفعل ثانى يوم غابت عن المدرسه وطلعت هيا وسليمه الساعه 9 وصلو للسوق ..درسو سيارتهم ونزلو لقو الرزوقى يراجى فيهم ركبو معاه الزوز من الخلف ورفعهم لحوش سعيد ميلاد بيش تشبح ملاك سليمان ..وملاك وين تلقيها ترعش مع بعضها
-سليمان : هاا وينكم
-المرزوقى : اهو وصلنا

_____________________________

تمت ……ويتبع

انا ماشاغلنى غير بوكس الهديه اللى جابها سليمان لملاك قعد فالمطعم زعما من خداه ???

رابطه الحلقه قصيرة وينكم ترا علقو اليوم وقولو قصيرة هى ?✂✂???

نحبككككككم هلبا ❤❤