رواية اكحيلة

??للكاتبه زهور جمال الدين ??

??الحلقه الثالثة??

رجع سليمان لاستراحة …
لقى السيارات كيف وصلو فاتحين باب الاستراحة ويدخلو فالحمالات لداخل
درس سليمان سيارته ونزل ..خش فتح الباب وبدو فى تدخيل البضاعه وتخزينها فالديار…
قعدو النهار كله وهما ينزلو …
لما خش للصالة لقى شنطه على تركينه
-سليمان: هادى شنو الشنطه يا بشير
(بشير طبعا الشخص المسؤل على توصيل البضاعه)
-بشير: والله مانى عارف تو نسأل الشباب
لما سألهم قالوله انهم لقوها فالدار ..
طبعا هوا يخاف من متفجرات او غيره
مشى للشنطه قامها فتحها لقاها فيها ملابس نسائيه لقى مق مكتوب عليه ملاك …
ادكر البنت اللى طلعوها من الاستراحه بكرى …وتوقع طول ان الشنطه ليها …
سكرها الشنطه وطلعها حطها فالسيارة
وكمل اموره وطلعو السيارات .. وقيس المغرب سكر الاستراحة وطلع …

____________________________

وحيد يتكلم فالتليفون …

-وحيد : انتو البنت منين جبتوها
-الشاب : جبناها من المطار ..نفس نوع السيارة اللى قلتنا عليها لحقناها ونزلناةالبنت منها
-وحيد: يابهايم البنت مش هيا .. الحصلة اللى جبتوها شكون
-الشاب : تليفونهاقاعد عندى فالمحفوظات وكان تبى نجيبهولك
-وحيد: لا تجيبهولى ولا عندى ماندير بيه ..توة برة لطريق البحر واحدفه ..
-الشاب : تم اعتبره كلاه الحوت
وسكرو الخط ….
طبعا وحيد ماعنداش علم بالشنطه …لا سأل عليها ولا دورها …

______________________________

فى حوش ملاك

تعشو مع بعضهم وركبت مريم لشقتها ..
-اميرة : ملاك تعالى باتى معاى فى دارى
-ملاك: لا لا والله مانقدر نرقد برة دارى
-اميرة: تو بتباتى بروحك فالدور الاول.. وسليمه مهناش
-ملاك: لا والله عادى صحيتى امورة …
وناضت من كرسيها : تصبحو على خير
وخشت للباب الفاصل اللى يخش جهه دارها وسكراته ووراها ….

خشت لدارها وقعمزت قدام المراية وتشبح لروحها .. وتتكلم فى خاطرها: انا شنو اللى صارلى ..وهادو منو اللى خطفونى وعلاش ..زعما بيهددو خوتى بيا ..لكن وصلت للحوش ومالاحظتش اى شى عالنساوين .. ومنهوا الشاب أللى رفعوه معاى فالبوكس..وليش الضابط ناداه سليمان والشيبانى اللى معانا ناداه اكحيلة …مفهمتش …
وقررت انها ماتحكيش الحكايه اللى صارتلها لاى حد فالدنيا …وشنو الفايدة كان حكتها اصلا غير بتجيب لروحها الدوة والفضيحة …

قعدت زينب فالصالة شوى وبعتالى ركبت حتى هيا ..
طبعا كمال وخالد مايندروش على ملاك روحت ..

روحو مع بعضهم الساعه 1 فالليل …خشو مكتبهم طول ويتناقشو …
وصل منير الساعه واحد ونص …طق عليهم المكتب فتحوله …
وزاد النقاش تعلى فيه الصوت …
فتح خالد الباب طلع للصالة …
-كمال : تعالى جاى يا راجل للمكتب نتفاهمو
-خالد : الدور الاول فاضى مافيه حد .. وبالنسبة ليا تم النقاش
-منير: خوك ماقالش عيب يا خالد
-خالد: تى كيف ماقالش عيب يا راجل ..بيدخل ولده معانا ..امتى كبر هوا وبيحط راسه براس عمامه
-كمال: بوى دخلنى معاه وانا عمرى 15 سنه ..واحمد ولدى توة اكبر من عسرين عام
-خالد : امالا حتى انا بندخل ولدى محمد ..اللى بيتعلمه احمد يتعلمه معاه ولدى محمد
-كمال : اوووووف يا راجل شنو الحكايه ولت ولدى وولدك ولا شنو
الصوت العالى نوض ملاك من نومها ….
ناضت من سريرها ولبست شخاشيرها وطلعت من دارها بتكلم خوتها تقوللهم انها روحت وانهم ينقصو فى صوتهم
وصلت الباب الفاصل ..وحطت ايدها كيف بتفتحه ..تسمع فى كمال يتكلم
-كمال : باهى وموضوع كحيلة كيف يصير فيه
وقفت ملاك مافتحتش الباب لما سمعت اسم كحيلة …جمدت فمكانها وقعدت تسمع ..
-خالد: قلتلك اكحيلة ميت يعنى ميت
-كمال : يا راجل مانجيبيش لروحك الشبهها كلهم بيشكو فيك انت ..لانك انت الوحيد اللى تناقشت معاه يومها
-منير: متخافش يا كمال محبوكه ..وح تبان قضاء وقدر
-كمال: امالا حتى انت فيه الموضوع يا منير
-منير: انا اللى بنفده من الالف الى الياء
-كمال: سلطان ولد خالى ديما معاه ..افرضو يكون معاه فى نفس السيارة
-خالد : معناها الله يرحمه حتى هوا ..ماحد قاله يصاحب طير الشر هدا
-كمال: ياناس هدا نسيبي وخال صغارى كيف تبونى نرضى بقتله
-منير: ماحد قاله يركب معاه ..وبالنسبه ل اكحيلة لازم يتربي
-خالد: بيش يعرف كيف يطاول عليا قدام التريس ويقولى شد بضاعتك يا خالد
-كمال : سليمان ماغلطش يا خالد ..السنه اللى فاتت لقاك توزع فبضاعتك فى الشهر متاعه هوا ..ومع هدا دار الحولة وفاتك ..والعام هدا وقضك
-خالد : ايوقضنى فى مجمع!! ..وعلاش ماكلمنيش بروحى

هدا كله وملاك واقفه تسمع وخوتها يحسابوها فى بنغازى .. ولما سمعت كمال قال سليمان مغلطش عرفت ان الكلام كله على نفس الشخص اللى هيا تلاقت معاه الصبح ..لان الاسمين متطابقات ..اكحيلة وسليمان …
وبعتالى شنهوا الشهر هدا وشن قصته ..وشنو البضاعه اللى باعها خالد …هدا كله على علفه وكاكاوية …
(طبعا هيا تحساب خوتهو يتاجرو فالعلفه والكاكاوية )
-كمال: لكن ماتوصلش للقتل يا خالد
-منير: الموضوع منتهى يا كمال ..والامور ترتبت خلاص والاجهزة ركبت
-كمال : وكيف درتو ..
-منير: غدوة ماشي للخمس العصر..السيارة بتنقلب بيه بسبب عطل فالعجل اليمين ادى الى توقف السيارة وقلبها
وبدو يضحكو هوا وخالد
-كمال : ولما بيشوفو السيارة يا فالح وماهو بيلقو فيها جهاز
-منير: جهاز صغيرون هلبا …ومتحكمين فيه عن بعد بسيارة من جماعتنا تمشى وراهم ..مجرد ضغطه ادير اللازم تنقلب السيارة والجهاز يفجر نفسه داتيا ..
-خالد: يعنى ماتخافش فى الامان انشالله
-كمال: والله مع انى معترض لكن ديرو رايكم …

وخشت ملاك لدارها تجرى : يانارى عليه ..بيقتلوه …
وتفكر: لازم نساعده زى ماساعدنى…لكن كيف بنساعده وانا لا نعرفه ولا نعرف رقمه
وادكرت الكرت اللى عطاهولها وفيه رقمه
وقررت انها الصبح لاااازم اتكلمه… لكن مش من شفرتها …من شفرة جديدة
وبعتالى ادكرت ان تليفونها قعد عندهم …
طبعا مارقدتش للصبح وهيا تخمم …
الاولاد لما ركبو لشققهم لقو نساوينهم راقدات ماحد قاللهم ان ملاك روحت …
ومنير طلع لاستراحته…داير زى استراحه فالجنان متع الحوش …دارين وصالة وحمام وريسبشن وعلى قد ماقالوله تزوج مايبيش …

____________________________

الصبح الساعه 9 ….
طلعت ملاك بسيارتها ….
” ماشالله حتى فرخة فالشهادة الثانوية دايريلها سيارة??”
مشت لمحل متع موبايلات …
-ملاك : صباح الخير
-الشاب: صباح الخير اختى
-ملاك : خوى نبى نشرى شفرة جديدة بس منبيهاش باسمى
-الشاب: شفرات قديمه صعب تلقى توة راهو..لان الشفرة بدت بجنيه بس …
-ملاك : طيب اوكى اعطينى جديدة بس ماتكتبهاش باسمى
-الشاب: امالا باسم منو بنكتبها ..ماهو لازم الاستخراج يكون باسمك
-ملاك : خوى افهمنى
-الشاب قص عليها: فاهمك اختى ..مافيهاش كيف سامحينى
-ملاك باهى مشكور
وهيا طالعه تلاقت مع واحد سودانى كيف شارى الشفرة وطالع
-ملاك : خوى لو سمحت
-السودانى : انتى تتكلمى معاى
-ملاك : ايه انت ممكن شوى نبيك
جاها السودانى: اتفظلى اختى
-ملاك: انا شفرتى راحت وبحكم شغلى منقدرش نقعد منغير شفرة ومانبيهاش باسمى ..والولد لداخل قالى لازم تاخديها باسمك
-السودانى: طيب وايش المطلوب منى
-ملاك : تعطينى الشفرة اللى شريتها توة ونعطيك فيها مية دينار مدامها قاعدة جديدة ومازلت ماستعملتهاش انت
-السودانى انخلع : معقول ..مية جنيه
-ملاك طلعت الفلوس من شنطتها : اهما لو موافق
-السودانى: طبعا موافق …
وعطاها الشفرة وعطاته هيا المية …وركبت سيارتها …

______________________________

فالسيارة فتحت القجر….
طلعته منه تليفون قديم متاعها جاباته معاها من الحوش بيش تحط فيه الشفرة الجديدة …
ركبت الشفرة …وطلعت الكرت متع سليمان …
وقعدت تفكر..نتصل ..لا ..نتصل ..لا …
وخايفه تصير مشكلة ..وبعتالى تشجعت .الحكاية فيها موت
اتصلت بالرقم المرة الاولى ماردش …..
الثانية نفس الشى …الثالثه ماردش ….
سليمان قاعد متكى فسريره وحاط قدامه اوراق يسبح فيهم بيرفعهم معاه للخمس العشية ….
طبعا هوا يشبح فالتليفون يشرين قدامه لكن ميردش على رقم مايعرفاش لانه تليفونه هدا خاص
بعتتله رسالة ” رد عليا الامر هام جدا ”
قام هوا التليفون واتصل بالرقم ..ردت هيا طول
-سليمان : ايوة
-ملاك : صباح الخير
-سليمان يحساب وحدة باعتتها مريم فيرد بحدر: من معاى
-ملاك : انت اكحيلة
-سليمان : اخر مرة بنسألك من معاى والا بنسكر
-ملاك : لازم نتاكد انك اكحيلة قبل مانتكلم
-سليمان : وكيف بتتاكدى
-ملاك : شن اسمك الاصلى سالم سليمان وسيم
-سليمان: الوسطى
-ملاك تأكدت انه هوا : خلاص انا تاكدت …امالا اسمعنى
-سليمان : نعم
-ملاك: بعتالى العصر ..وانت ماشى للخمس سيارتك بتنقلب بيك .. يبو يقتلوك ..ولو مش مصدقنى اعرض سيارتك اللى بتمشى فيها على اى خبير وحيأكدلك كلامى
-سليمان?: ومنهما اللى بيديرو هكى..وانتى كيف عرفتى ومنين جبتى رقمى ..الرقم هدا مايعرفوشى غير خمسة اشخاص بس
-ملاك : مش مهم انا شكون ولا كيف عرفت ..المهم رد بالك تركبها السيارة لان فيها جهاز تحكم عن بعد
-سليمان حس انها نفس البنت اللى فالمركز وعطاها الرقم: انتى ملاك!؟؟
-ملاك : وكيف عرفتنى ؟؟
وسكرت الخط وسكرت التليفون طول : يا غبية زبطك …
وحاطة يديها على خدودها: حيه عليا كيف عرف اسمى …وانا زى الغبيه اكدتهوله
وطلعت الشفرة ولوحتها عالكياس وولعت سيارتها ومشت ….
وهوا قعد يعاود للرقم .مقفل ..مقفل …
-سليمان يعيط : مخزوم … يا مخزوم ..
-المخزوم: نعم يا سيدى اكحيلة
-سليمان قام التليفون وجهه للمخزوم: عندك نص ساعه نبى نعرف صاحبة الرقم هدا وشن اسمها بالكامل ووين تسكن…
-المخزوم : حاضر ياسيدى بالاتصال ايجينا كل شى
وكتب الرقم وطلع من الدار
-سليمان: منو تكون ملاك هادى.. ايه ايه اسمها ملاك لانها قالتلى كيف عرفتنى…وهيا نفس البنت الىى فالاستراحة يومها…وكيف عرفت ناس بيقتلونى …تى منهيا بالزبط البنت هادى

وقام تليفونه اتصل: وحيد تعالة نبيك توة

وجاه وحيد وبعته للسيارة وجابولها خبير وبالفعل طلع فيها جهاز للتحكم عن بعد ..
لكن منو دايرها مازبطش …لكن المهم انه تأكد ان فى واحد خاين معاه…امالا هما كيف عرفو نوع السيارة اللى بيمشى فيها

____________________________

بعد ساعه …
-المخزوم : الشفرة كيف مبيوعه وباسم واحد سودانى من مركز مبيعات السياحيه
-سليمان: ومشيتو للمركز
-المخزوم : بعتت واحد سأل عالبنت اللى شرت الرقم ..فقاله انه شخص سودانى بالفعل اللى شري الشفرة مش بنت ليبيه
-سليمان: السودانى هدا تجيبوهولى من تحت الوطا …نبيه اليوم
-المخزوم : انتى مازالك ساعه وتتسقد للخمس يا سيدى.. ومشية الخمس مهمه زى ما انت عارف
-سليمان: تتأجل.. المهم نعرف البنت منهيا وبنت شكون
-المخزوم : يصير خير يا سيدى جيبته ساهله السودانى لانهم ضرورى ياخدو رقم اقرب شخص ليه فالعقد
-سليمان : سقدنى امالا
-المخزوم : حاضر يا سيدى

وطلع المخزوم …
سليمان مقعمز عالصالون حط ايديه اليمين ورا راسه ويخمم : تو اتأجل مشية مهمه زى هادى بيش تعرف البنيه شكون …تى فوت النم …
ويخمم: قصتها غريبه وتعرف هلبا حاجات …
وضحك فى خاطره : والصراحة الصراحة لفتت نضري نبى نعرفها منهيا البنت هادى وشن قصتها …
بعد ساعه لاويته المخزوم خاش لسليمان بلغه انه جاب السودانى …
-سليمان : دخله
-المخزوم : تم
ومشى جاب السودانى وخش بيه لسليمان …يا نارى ضاربينه كفوف لين عينه زرقا
-سليمان : تى خيركم ضاربينه يا بهايم
-المخزوم : بيش يقول الحق يا سيدى
-السودانى: انا والله ماعملت شى
-المخزوم : واطى صوتك وانت تكلم فى سيدك سليمان
-السودانى: والله انا مظلوم يا سيدى
-سليمان وقف : لا لا عارفك راجل طيب ..لكن قولى انت شريت شفرة جديدة اليوم
-السودانى: نعم يا سيدى اشتريت بس بعتها على طول
-سليمان : ولمن بعتها
-السودانى : لبنت ليبيه ما اعرفها
-سليمان : وعلاش شرت منك انت .ماهو المركز متع الشفرات قدامها
-السودانى: تقول انها تريدها تبع الشغل ونا تبيها باسمها ..اشترتها منى بمية دينار
-سليمان يضحك : ريت الفالحة ماشطرها ??
-السودانى : والله العزيم هدا يلى صار يا سيدى
-سليمان : اكرموه يا مخزوم .وعطوه مونه متع شهر .وعطوه فلوس ووصلوه وين مايبي
-المخزوم : تم يا سيدى

وطلع المخزوم والسودانى ..وسليمان صلى العصر و طلع بالدرقه …. خدى تاكسى وصله لمكان معين متفق عليه هوا وخوه وحيد …ركب سيارة مجهزهاله وحيد وفات على سلطان ركبوه ..ومشى للخمس للاجتماع متاعه….واتفقو نهاية الاجتماع انهم بعد يومين ..يعنى الجمعه الصبح يتلاقو فى سبها للاجتماع الاخير …

لكن القصه اللى صارتله قاعدة دايرتله وجيج فى راسه ..منهيا البنت …ضروووووورى نعرفها …

طبعا خالد لما سمع ان كحيلة حضر الاجتماع قريب مات

وخدى سليمان تدكرة الخميس بيش بيسافر لسبها
________________________________

ملاك تلاقت مع خوتها وحكتلهم انها روحت من حوش خالتها لا جتهم بنت عمهم …
فتحلها خالد شفرتها وشرالها تليفون جديد لانها قالتلهم انه طاح منها فالمية
وقدملها كمال حجزها وبعتها لسبها يوم الخميس …
فالمطار …ملاك وسليمان مقعمزين فى نفس صالة الانتضار وما حد منهم شاف الثانى
وركبو نفس الطيارة …وماحد منهم شاف الثانى
ونزلو مطار سبها …
طبعا هوا عنده سيارة تراجى فيه رفعاته طول للمطار
وهيا لقت ولد خالها ومرته يراجو فيها ركبوها ومشو بيها طول للحوش
-جلال: يا اهلين ..يا اهلين ببنت الغاليه
-ملاك سلمت على خالها ومرت خالها : اهلا خالى جلال شن حالك
-جلال : نورتى سبها بلاد امك
-ملاك : بلاد امى وبلادى يا خالى
طبعا جلال عنده زوز ولاد ..واحد متزوج والثانى خاطب ..والزوز واخدينهم خوات ويكونو بنات خالتهم
-مفيدة مرت خالها: ماخليتى فى امك حاجه ..تقولى عفاف واقفه …
-ملاك : بلحقه يا خالتى نشبه امى
-مفيدة: ربي يرحمها قداش كانت طيبه

وتعشو مع بعضهم وسهرو معاها ….
ووعدها صلاح ولد خالها انه يرفعها لملكها وملك امها ..من حوايز واراضى …

وثانى يوم الجمعه دارو الاجتماع …
كمال وخالد مش من صمن الاجتماع لان مش شهرهم
-سلطان : لكن مفروض لما يكون دورك ترضى بكل شى با اكحيلة
-سليمان : انا من اول يوم قلتلكم القتل لا …لينا سنين موقفين عليه عيلة ميلاد
-جلال متكنطى: لكن بوك موافق على هالكلام ولا شنو يا اكحيلة
-سليمان : ربي يباعدنا عالحرام.. بوى اللى نديره انا ماشى عليه
-سلطان : حرام شنو اللى بتبعد عليه يا سليمان وانت ادخل فالصنف فى كل شهر
-سليمان : حاشا لله …انا خدمتى عطارة ..ندخل فى اعشاب ..الخشخاش وغيرها ..لاندخل فحبوب ولا يبارى
-جلال : انت تزلبح فى روحك ولا فينا
-سليمان : والله هاداكه حد نيتى راهو …هاتولى آيه فالقران تمنع نبته الخشخاش
-سلطان : لكن بوك زمان كان موافق وكان ينفد
-سليمان : هداكه العقربان وانا اكحيلة..وكل واحد متعلق من عرقوبه
-الجدر رئيس الاجتماع يضحك: اللى يسمعك تتكلم عالدين والقران يصدقك
-سليمان : انا الحمدلله نصلى .. والقران كلنا نعرفوه يا جدر
-سلطان : هيا صح مش مدكورة فالقران لكن فى ايه تقول بما معناه ان اى حاجه تدهب العقل محرمه
-سليمان : خلاص والخشخاش ماتدهبش العقل
..تخليك جوك مليح وخلاص ..واحنا ندقو فيها وتنباع زيها زى النفه …ليش الدولة مش مانعه النفه ماهو حتى هيا تروق العقل وتسعد الانسان
-الجدر: توة احنا ليش كثر الدوة ..يعنى الاسامى اللى عطيناهملك مش حتصفيهم
-سليمان : طبعا لا ..وهدا كان اتفاقى معاكم من لما مسكت بدل بوى .. من اول يوم قلتلكم تصفيه معش شورنا …شورنا الممر بس ..وانتو وافقتو
-الجدر: معناها يبقى الحال كما هوا عليه وتدفع ضريبه
-سليمان : ندفع وليش لا
وتم الاجتماع وركب سليمان وسلطان الطيارة وروحو طرابلس فى نفس اليوم
وسليمان قاعد شاغله موضوع البنت ومن تكون
_________________________________

ملاك تتكلم فالتليفون
-ملاك : بلحقه …اتزوجتيه
-غادة: تزوجته ايه ..بوى ضغط عليا هلبا ..قالى اختك تؤام وتوفت ..انتى اولى وحدة تربي صغارها
-ملاك : باهى اعطاهملكم فالحوش وربيهم انتى
-غادة: بوهم ماباش ..قال يتربو فى حوشى ومستعد نتزوجها خالتهم
-ملاك : باهى كيف درتى
-غادة: شرطت عليه انا فى دار وهوا فى دار
-ملاك : حيه ما حرها يا غادة ..راجل اختك
-غادة: حياة زفته يا ملوكه
-ملاك : والصغار كيف
-غادة: الصغار متعلقين بيا هلبا ..وهوا لتوة ماجتش عينى فى عينه
-ملاك متأثرة? : واااك مصعبها
-غادة: بتجينى ولا شنو
-ملاك : اكيدة بنجيك ..الجمعه انشالله
-غادة: تعاليلى اليوم
-ملاك : توة انا فى سبها ..بنروح الخميس ..نجيك الجمعه ..لان الاسبوع اللى بعده بتبدا القراية
-غادة : تمام حبيبتى نتلاقو انشالله
-ملاك : مع السلامه

وتم الاسبوع متع ملاك فى سبها ..وعجبتها المشية حوش خالها قاموها بيها
والخميس روحت هيا وسليمه فالطيارة …
والجمعه العشيه جهزت نفسها ومشت لحوش غادة صاحبتها …رفعتلها معاها هدية حلوة ومشت
وقعمزو فالصالون وهادوكا الصغيويرة يلعبو جنبهم
وملاك تصبر فى غادة ان الزواج نصيبات وانها تحاول تنسجم معاه …
غادة ماخلت ماحطت لملاك ..عصير وبعده شاهى ومدتلها صحن حار …
غادة قصتها انهم زوز تؤام غادة وغدير…غدير تزوجت راجل معبى اسمه هشام .. وديما هيا على صبغات وقص شعر وتدهوير ..وغادة ماتبيش تتزوج قعدت تكمل فقرايتها …
هما اكبر من ملاك بثلاث سنوات ..لكن تعرفت عليهم ايام الكشافه وقعدو صاحبات لين كبرو
غدير بعد ماتزوجت جابت زوز صغار اياد والين …ويشاء القدر ان يجيها المرض اللهم احفظنا..وتوفت بيه ..الصغار اعمارهم سنتين وثلاث سنوات ….
لما لقو الصغار متعلقين بخالتهم قرر الاب انه يخطبها
وبعد ضغط امها وبوها عليها وافقت وتزوجته …
بعد قريب ساعتين ستادنت ملاك وبتطلع
-غادة: شوية بس يخش صاحب هشام للمربوعه ونطلعو
-ملاك تلبس فى حجابها : باهى …
وخش صاحب هشام ….
وطلعت ملاك من السقيفه وسكرت الباب ..وتمشى فالجنان بتطلع من البوابه
المربوعه روشنها يفتح عالجنان ….
وفالمربوعه سليمان مقعمز تاريته هوا صاحب هشام …ويشبح من روشن المربوعه لقى بنت طالعه .. لما دقق زبطها ملاك …
طلع من المربوعه طول لان هشام خش لداخل بيقوللهم ديرو قهوة
طلع سليمان يجرى: اسمعى ..اسمعى ..
وهيا كيف طالعه مالباب تلفتت وراها تلقاها سليمان ينادى .. وتركب سيارتها تجرى وتولعها وتطلع طول …ويركب هوا سيارته وفى جرتها …
هيا تجرى وهيا تجرى تقول مسلسل امريكى فالشوارع …
لحد ماسبقها وحصل عليها ووقف قدامها بالعرض
نزل من سيارته مشالها
ملاك مقعمزة فى سيارتها والروشن مفتوح وترعش: شن تبى انت …
-سليمان واقف قدام روشنها وحاط ايديه فجيوبه ومبتسم ويتكلم بهدوء ورزانه: مانبي منك شى ..نبي رقمك بس
-ملاك ترعش: وليش تبيه رقمى
-سليمان : نبى نتكلم معاك
ومدلها تليفونه : اكتبيه
خدت ملاك التليفون كتبت رقمها …ضرب سليمان التليفون شرين عندها …
-سليمان : استنى منى مكالمه الليله الساعه 12 من الرقم اللى شرين عندك توة
ملاك قعدت ساكته وتشبحله …
وركب هوا سيارته ومشى ….
وهيا قعدت تضحك من الموقف اللى صار ومن الجرى بالسيارة فى جرت بعضهم
وفى داخلها فرحانه انها عطاته رقمها ..وبدت تراجى فى الساعه 12 من توة غير امتى بتجى بس

وبالفعل روحت للحوش ..نادوها للعشى ..تبيش تتعشى قالتلهم كليت عند صاحبتى …
وقالت لسليمه تمشى ترقد مع اميرة فى دارها لانها بتسهر فالليل بتراجع كتاباتها لان الاحد مدرسة

وجت الساعه 12 .. وشرين تليفون ملاك ..
فتحت الخط
-ملاك بكل رقه : الوووو
-سليمان : واخيراً

_____________________________

تمت …. ويتبع ???

الحلقه نزلتها بكرى تعتبر عارفتكم بترقدو غدوة عمل

///////////////////////

الباين المعرفه بين سليمان وملاك بتطور ..واشبح كيف بيصير بينهم …

والقصه خشت فيها شخصية غادة وعلى فكرة غادة شخصية حقيقيه ..ووحدة من الفانز اللى تقرا ..وحنشوفو حتى هيا الثانية شن قصتها ??

رابطه الحلقة قصيرة وينكم?? ??✂✂

واللى ياخدو فالقصه ويحدفو فى اسمى من فوق والله مانى مسامحتكم

نحبكم ❤❤❤