رواية اكحيلة

#اكحيلة

??للكاتبه زهور جمال الدين ??

??الحلقه الرابعه والعشرون ??

سليمان فى استراحة عمك ابراهيم شرين تليفونه
شاف الرقم لقاه كمال نسيبه
رد عليه
-كمال : مرحبتين يا اكحيلة
-سليمان : اهلا كمال شنحالك
-كمال : الحمدلله كيف حالك انت وحال بوك وملوكه
-سليمان: الحمدلله فى خيار الخير
-كمال : لقيتك مخليلى خبر فالحوش انك تبينى ضرورى
-سليمان : الكلام مايجيش فالتليفون ..ياتجينى يانجيك
-كمال : باهى تعالة انا فالحوش
-سليمان : توة مع الجماعه فى استراحة الجدر تعالة هدرز .. وبعتالى تو نتكلمو فاللى نبيك فيه
-كمال : منو فى غادى
-سليمان : انا وجلال والحاج ابراهيم
-كمال : جلال امتى جى !!
-سليمان : ماهوش كلام تليفون يا كمال .. غير تعالة هنايا وبعتالى ساهل
-كمال : باهى هى منعطلش عليكم

وبالفعل ماتمتش ساعه وكمال كان فى الاستراحة

-الجدر : غريبه يا كمال ماستدعوكش معانا
-كمال : لا استدعونى .. لكن رقمى كان مسكر ولقو منير فالحوش بلغوه ..وقاللهم مسافر ورقمه مسكر
-جلال : وخالد ماطلبوشى
-كمال : لا طلبونى انا بس
-اكحيلة : هيا الجهه مش معروفه تابعه منو …جهات وهمية عندها اسامينا ..منين عرفو اسمى اكخيلة …القصه فيها إن
-كمال : يا سليمان كل الناس تعرفه اسم اكحيلة متكونش شكاك
-جلال: عموما انتلاقو انشالله
-اكحيلة: شنو هوا هداكة ..امروح
-جلال : بادن الله
-الجدر : لا اقعد نبيك ..وغدوة الفجر توكل
-جلال : حاضر انت تؤمر يا حاج
-اكحيلة : امالا نستادن توة
-كمال : خودنى معاك حتى انا
-الجدر: خليكم خيركم هاكم قاعدين
-اكحيلة : لا هوا هداكه تشبحو فالجو كيف مكهرب .. ومعش نقدر نعطل عليهم فالحوش
-جلال : سلملى عالحاج والعويلة
-اكخيلة : انشالله يوصل
وطلعو كمال واكحيلة من الاستراحة ومشو لحوش سعيد ميلاد

____________________________

فى مربوعه حوش سعيد

-اكحيلة: هوا اعطانى الضى الاخضر انكلمها لكن انا مابيش نمشيلها لين نسألك انت قاعد تبى الموضوع ولا فوته
-كمال : تى كيف فوته ..نبيها طبعا امالا شنو
-اكخيلة : باهى على بركة الله ..تو نمشيلها ونكلمها
-كمال: مش خيرلها من قعادها بروحها
-اكحيلة : باهى عويلتك كيف بدير فيهم ..شن ردت فعلهم ..مرات مايرضوش بالموضوع
-كمال : وعويلتى من بيقوللهم ..زواجى الثانى هدا حرية شخصية
-اكخيلة : ماهو لازم الزوجه توقعلك
-كمال : انا تو نتصرف ونعرف كيف نجيب توقيعها منغير ماتعلم هيا ..انت غير شوفلى الموضوع منغير تأخير وراس وخى
-اكحيلة: يعنى حتى ملاك منقوللهاش
-كمال: لا لا وشن علاقتها ملاك بالموضوع..زينب سيورها تسمع ومش حتفوتها لملاك لو عرفتها سامعه
-اكخيلة : لكن مانكدبش عليك انقولك بندس على سلطان ..هدا صاحبي ورفيق عمرى والخونه ماتجيش بينى و بينه
-كمال : خونه شنو يا اكحيلة ..الموضوع مايخصكش انت بيش تعتبره خونه
-اكحيلة : هوا بيسمع بيسمع ..منحشمش روحى معاه انا
-كمال : غير من بيقوله
-اكحيلة : انت ناسى انها نسيبته ..ام مرته …توة معقولة فضيله بتتزوج منغير ماتخبر بناتها
-كمال : بنتها فى مصر مفيش داعى تخبرها
-اكحيلة : كلام بعيد على بعضه ..فى وحدة تتجوز منغير ماتخبر ضناها
-كمال : انت غير شوفها وبعتالى لكل حادث حديث
وطقطق باب المربوعه
-اكخيلة : خش يا مخلوف
-انفتح الباب: انا ملاك ..
-كمال وقف : اهلين ملوكه …
وجاته تجرة اضبطاته وتبوس فيه
-ملاك : كيف حال ابلة زينب وسيرين وابله مريم وباقى العويلة
وطق الباب خشت سليمه سلمت عليه حتى هيا
-كمال : العويلة غادى كلهم يراجو فيك ياملاك عالاقل حتى زيارة
-اكخيلة: والله قلتلها بري انتى وسليمه واقعدى غادى وانا نجيك مرة مرة
-ملاك : مستحيل نطلع ونخليك بروحك هنايا انت وعمى
-كمال: واللع مافيها حاجه ياملاك ..تونس معبيه بالعائلات الليبيه
-اكخيلة : امالا مصر ..يحكيلى سلطان قالى وين ماتعفس تلقى ليبي
-كمال: الليبيين شعب مرفه ..ماناش واخدين على هالرعايش..اللى عنده قرشين دارهم تحت باطه وطلع
-اكخيلة : حتى اللى ماعنداش لمد كيف مالمد وطلع
-ملاك : والله اكثرهم طالعين توسيعت خاطر ..البلاد والله مافيها حاجه
-اكخيلة: ايه مافيهاش..قالك الناتو بيضرب وفالاكيد
-كمال : ربي يهدى البلاد ويستر حال العباد
-ملاك : اللهم احقن دماء الليبيين
-اكحيلة يضحك: طيبه والله مرتى مافى اطيب منها
-كمال: ربي يحفظها انشالله
ووقف: هيا نستادنكم انا …
وسلم عليهم وطلع …سقده اكحيلة للباب
-كمال : هنينى وراس اوخى عالموضوع
-اكحيلة : انشالله …. وربي يسخر

_____________________________

مشى كمال بسيارته…

واكحيلة كيف بيخش ..وقفت سيارة ثانية
-الشاب: السلام عليكم
-اكخيلة بحدر: وعليكم السلام
-الشاب : احنا نفس الجهه الامنية اللى استدعاتك اليوم الصبح ..وطالبينك ثانى
ومدله بطاقاتهم وشافهم ..
-اكحيلة : لكن توة ليل
-الشاب : منعرفش خوى بس طالبينك ضرورى
-اكحيلة : باهى شوى بس انطمن العيلة الداخل ونجى
وخش لملاك…
-اكحيلة : عندى واحد صاحبي فايت عليا عنده سهرية فى حوشه مع تريس وبالك نتأخر شوى ماتنشغليش …
-ملاك : باهى حبيبي غير ماتعطلش تعرفه عمى ينشغل
-اكحيلة : لا لا ماتخافيش

وطلع ومشى معاهم لمكان ثانى مش نفس مكان الصبح ….

______________________________

فى صالة حوش سعيد

-سعيد : سليمان وين مشى
-ملاك : قال ماشى مع واحد صاحبه وتو بيجى
-سعيد : معش كلم خوه
-ملاك : لا ماقالش انه كلمه
-سعيد تلفت لسليمه : وفضيلة وين
-سليمه : فضيلة فى حوشها مابتش تطلع منه
-سعيد : توة عاجبك قعادها هكى بروحها يا سليمه مش عيب علاها
-سليمه : والله قلتلها تعالى خودى معاى انا دار مابتش ..وانا منقدرش نقعد معاها ونخلى ملاك
-سعيد : راسها كاسح زى الحيط من يوم يومها
-سليمه : الله غالب
-ملاك تبى تغير لعمها جوه : انديرو شاهى اخضر ولا احمر يا عمى
-سعيد : ديري احمر غير كثري السكر
-ملاك : باهى انشالله
وناضت خشت للمطبخ ولحقتها سليمه

_____________________________

قعمز عالكرسى وقدامه طاولة
-الضابط : احنا عارفينك مؤثر فيهم
-اكخيلة : انتو تابعين القدافى
-الضابط: لا
-اكحيلة : انتو تابعين المعارضه
-الضابط : لا
-اكحيلة : متخافش انبلغ فيكم
-الضابط : من بتبلغ ..احنا زى الاخطبوط فى كل مكان عندنا يد
-اكحيلة : وليش تبو تغرقو البلاد بالبودرة
-الضابط : لا يانارى هيا مش غارقه بيها ..غير احنا بنغرقوها
-اكحيلة : ماهو انتو لازم اتكونو تابعين جهه معينه بيش نعرف مع من نتعامل…لكن هكى صعب والله
-الضابط : احنا نشبوهو الشركات قطاع خاص..نمولو اللى يبي …اى جهه معارضه والا مؤيدة احنا نمولوها
-اكحيلة : صار الجيهتين يطلبو
-الضابط : حتى هما مش معروفين من تابعين
..يطلبو وخلاص ..مرة يقولونا احنا تبع المعارضه ومرة يقولونا احنا تبع المؤيدين
-اكحيلة : مدامها خلطبيطه انا الحق صعب انخش فيها
-الضابط: انا مش نشاور فيك ..انا قاعد نعطى فيك فى امر ..
-اكحيلة باستهزاء : امر شنو
-الضابط : حنعطوك ورقة مكتوب فيها اللى نبوه
…وانت دير الميزانيه الى تبيها … والوقت الىى بتوصل فيه البضاعه
-اكحيلة : ماشالله معبيه عندكم الحكايه
-الضابط : بالدولار وحياتك
-اكحيلة : وكانا رفضت
-الضابط : ماعندناش حد يرفض ويقعد حى على وجه الدنيا
-اكحيلة: هدا تهديد صريح
-الضابط : اعتبره زى مايعجبك ..المهم رد بالك من سيارتك ومن غاز حوشك
-اكحيلة بهدوء: هاتها الورقه
-الضابط : اهيا قدامك فالملف من بكرى
خداها وناض روح للحوش
وعقله يودى ويجيب

________________________________

بعدها بيوم مشى اكحيلة لفضيلة وحكالها عاللى قالهوله وحيد
-فضيلة : وحيد حى ياوليدى ..قولى الحق
-اكحيلة : والله حى يا عمتى فضيلة خيرك تفاولى
-فضيلة تبكى: امالا معقولة مايكلمش امه وعارفنى قلبي على نار
-اكحيلة : والله ماحصلته الا بالثريا ..قاطعين عليهم الضى والاتصالات وكل شى
-فضيلة تبكى: ياحليلى على وليدى مش متعود على هالشقى هدا كله
-اكحيلة قلبه يعصر فيه : شنو وحيد مش راجل ولا كيف .. الانسان فى بعض المواقف يرجل..وهدا اللى صار مع وحيد
فضيلة: يمشى لا يشاورنى لا يشاور خوه ولا بوه ..كيف غلط هدا مارضا الله الا برضا الوالدين
-اكحيلة : انتى غير ارضى عليه ..وانشالله ربي يطول فى عمره ويجيك ويزورك
-فضيلة : انشالله ياااارب
-اكخيلة : توة كيف يصير فى موضوع كمال ..ولدك عطاك الادن ..بل بالعكس شاد فيك يبيك تنسترى معاه
-طلعت فضيلة قصتها : توة بعد هالشيب هدا كله ..وبعد ما حصلت وليدى ..ندير حوش ثانى ونتزوج
-اكحيلة : لكن الحلال عمره ماكان عيب
-فضيلة : انت تبي تخدمنى
-اكخيلة : انا نعطيك عيونى كانا تطلبيهم ..انتى ام الغالى راك
-فضيلة : تساعدنى كيف نوصل صغار خوى المرحوم صالح فالجنوب
-اكحيلة : تبى تمشى لاهلك
-فضيلة : قعادى بروحى داير لولدى شغله …احسن حل نمشى لاهلى ونقعد معاهم لين يروحلى ولدى
-اكحيلة : وكمال
-فضيلة : قوله مالقيتهاش
-اكحيلة : تخافيه ايراقب فيك وعارفك قاعدة
-فضيلة : باهى قوله لقيتها وقالتلى خلى نفكر..
وساعدنى وطلعنى من طرابلس
-اكحيلة : تم متفاهمين …

وبالفعل طمن كمال ورقده فالعسل ..وقاله قالت خلى نفكر.. وفى ظرف ثلاث ايام كان مطلعها من طرابلس وبعتها لاهلها ..واختفت فضيلة من طرابلس واكحيلة دار روحه مش عارف مكانها وين

________________________________

نهايه شهر 4 النيتو يضرب فى ليبيا ليه ليه

اكحيلة حصل خوه وحيد بالثريا
وقعدو ايهدرزو مشوار بالالغاز على حال البلاد ووحيد يسأل على طرابلس كيف ..ويسأل على بوه وملاك وعلى احوال الناس كلها ..وبعتالى جاب سيرة امه …
-وحيد : على راحتها مدامها ماتبيش تتزوج..المهم انها هنتنتى ومش لمكان آمن
-اكحيلة : انا حاصل فى قصه ونبيك ضرورى
-وحيد : خيرك انشالله خير
-اكخيلة : امتى تقدر اتجينى هنايا
-وحيد : انا اصلا كنت بنزوركم فى العشرة ايام هادو
-اكحيلة : خلاص تعال ضرورى نبيك
-وحيد : تم الكلام ونحاول نجى اسرع
-اكخيلة : متفاهمين

____________________________

فى حوش اكحيلة

ملاك وسليمان فى دار النوم
ويسمعو فى صوت الضرب ..وملاك خايفه
-سليمان : غير تعالى فى حضنى وانتى خايفه
جت ملاك ورقدت فى حضن سليمان ..وضمها هوا بكل حنان
-اكحيلة يضحك : ياودى هالحرب دارت خير ودارت شر فالناس
-ملاك قامت راسها تلفتتله : الشر وعارفينه شنهوا الخير اللى داراته فالناس
-اكحيلة : خلت كل راجل ايروح لحوشه بكرى
-ملاك تضحك : انت بالك رايق
-اكحيلة : والله زى منحكيلك ..حتى الكارطه اللى النساوين كلهم يدعو عليها وقفت ..تجمعات التريس فالحياش والسهر خلاص
-ملاك : لا هادى معاك حق فيها
-اكحيلة : وفى فايدة ثانيه
-ملاك : شنهيا
-اكحيلة : من كثر مالرجالة فحياشهم ..ثلاث ارباع الليبيات حوامل فالشهور هادى ..شنو هدا مش رزق
-ملاك بتموووت مالضحك : ياحليلى منك ماخف دمك
-اكحيلة : انتى اللى دمك خفيف ..ونتمناك ديما تضحك
-ملاك : باهى ارقد خلاص بلاش دوشه
ووخرت شوى تبى ترقد فمكانها
-اكحيلة : تعالى تعالى ..توة ساعه وانا نشرحلك وانقولك التريس فحياشهم والنساوين حوامل..يعنى هما يحصلو وانا نرقد هكى جعان
-ملاك تضحك : توة اانت محتاج لكل المقدمات هادى
-اكحيلة : تى هيا بالمقدمات ومن بكرى وانا ننحى
وماحصلنا شى ..امالا كانا بلا مقدمات كيف
ملاك تضحك وخلاص
-اكحيلة : غير تعالى اقربي خيرك بناكلك انى ولا شنو
وهيا بتموووت بالضحك

________________________________

بعد 8 ايام ….

اكحيلة فى حوش نساباته هوا وملاك ..رافعها تشوف فى خوتها كمال ومنير بروحهم والنساوين وخالد فل تونس
الساعه 8 ناضو بيروحو …طلعو للجنان
ملاك ركبت السيارة
واكحيلة قعد واقف على كمال …
-كمال : هدا عمل اديره فيا فضيلة
-اكحيلة : انا اللى عليا درته يابونسيب …وعيا دارت رايها
-كمال: انا غير كانا نعرف منو ساعدها لين وصلت للجنوب..والله مانبدا الا مفرغ فيه مخزن
-اكخيلة : ربي كريم ومايخلى حد ..واصحاب الخير هلبا
-كمال : هادو اصحاب خير .. قول اصحاب شر
-اكخيلة : عموما هيا نصيبات ..هيا تصبح على خير
-كمال : ليلتك سعيدة وسامحنا فى تعبك
ومشى اكحيلة لسيارته وركبها ….
وماشيين فالطريق
-ملاك : خوى كمال حسيته ابصر كيف.. زى اللى داس حاجه واجعاته
-اكحيلة : كل حد فالدنيا عنده خصوصيه
-ملاك : ربي مايوجعه اوخى ..ويعطيه ويرضيه
-اكحيلة ضحكلها : وانا ماعنديش دعوة حلوة زى هالدعوة
-ملاك : انت ?.. انت قلبى كله ..ربي يرزقك من واسع ابوابه يااارب
وصلو للحوش ….
خشت ملاك لحوش عمها سعيد تطمن عليه قبل ماتركب لشقتها …
وسليمان ايدرس السيارة بالكويس وبيلحقها
نزل مالسيارة
سكر الباب بالارم
وتلفت حس بحركه ورا الشجرة اللى قدام الحوش
-اكحيلة ?: شكووون
وولع ضى موبايله

________________________________

تمت …..ويتبع

اللى ساهرة الليله متأخر حنزل الحلقه 25 ..واللى بترقد تقراها غدوة وخلاص

نحبككككم ❤