رواية اكحيلة

اكحيلة

??للكاتبه زهور جمال الدين??

???الحلقه الثانيه والعشرون ???

فات شهر على وفاة اميرة ..عيلة عبدالعاطى كلهم حزانه ومتأثرين …
لكن ياسبحان الله ديما ربي ينزل الصبر فى قلب الام والاب
فى دار النوم متع زينب متكيين زينب وكمال
-كمال يمسح فدموعه : نبي نبنيلها جامع ..واندير فيه اميه سبيل
-زينب : وين بديره
-كمال : فى القطعه متع عين زارة ..
-زينب : غير حاول تفضى نفسك وتكمله بسرعه
..الجامع اللى فات قعدت فيه اربعه سنين
-كمال :لا شنو نفضى نفسى.. بنسلمه لشركه وهيا ادير كل الاوراق وتبنى وتكمل وتسلمه للاوقاف ..انا ندفع بس.. وقالولى بادن الله عشرة شهور وتلقاه واتى
-زينب : باهى ربي يعاونك انشالله
ساوى كمال رقدته وامتد عالسرير …
وعلى طول جت فضيلة فخياله .. قاعدة فى عقله .. وفى قلبه
مازال يخمم فالزواج منها.. ويخمم كيف يقنعها ويقنع ولدها وحيد انه يعطيهاليه
-تلفت لزينب: سيرين شنحالها من امس الصبح ماشفتهاش
-زينب : انا شاغلتنى غير سيرين.. تغييرتها غريبه .. معقولة سيرين اللى قالبه الدنيا على راسها تلبس الملايه ..لاااا ومفكرة تتخمر.. ياااربي احفظهالى كان يصيرلها حتى هيا حاجه نهبل
-كمال : وعلاش بتشغلك ياريتها من زمان ..شنو عاجبك فحياتنا يا زينب ..اهو بنديرو جامع لاميرة زعم ربي يقبله ولا لا
-زينب : احنا نساوين ..وهادى حياتنا اللى طلعنا عالدنيا لقيناها ..الله يقبل كل زكاة علينا منين ماكانت تكون
-كمال : ربي يتقبل انشالله

_____________________________

فى حوش اكحيلة

سليمان راقد على ضهره ومتكى ملاك على صدره وحاط يده اليمين على ضهرها .. وهيا تبكى
-اكحيلة : حبيبي ياسرك من البكى ..عيونك تعبو وتورمو
-ملاك : راهى اميرة بنت خوى وصاحبتى وصندوق اسرارى وليها مكانه كبيرة فحياتى
-اكحيلة حاط يده على شعرها ويحرك فيه : تصدقى نحمد فى ربي ان الوفاة صارت واحنا متزوجين كنهدا رانى موتت من الشغلة عليك وانتى بروحك
-ملاك زادت حشت راسها فى صدره : وانا نحمد فى ربي انه رزقنى براجل حنين زيك مدللنى
-اكحيلة : انا نشوف فالدنيا كلها فيك ..امالا من بندلل كانا مادللتكش انتى
-ملاك : لكن الموت حارة ..والمفروض الانسان يرجع ايعيد النضر فى كل تصرفاته وخدمته ..اخرتها شبرين راهو
-اكحيلة : صدقتى
-ملاك : ربي لما بيحاسب الانسان وهوا داير سيئات وآثام شن بيرد على ربي بعد يسأله ويحاسبه
-سليمان? : انشالله ربي يغفر
-ملاك : غير بس كانا ربي يمن علينا ويرزقنا بعيل
-اكحيلة حول يده من ضهرها وحطها على جبهته : اييييه علينا بدينا فالنكد عاد
ملاك حست روحها زودتها وتبى اتغير الموضوع
-قامت راسها وقربت من وجهه: توة انا نكد.. حول ايديك هى معش منرقد على صدرك امالا
-اكحيلة شبحلها ويضحك : انا ايديا محولهم وحدة على جبهتى ووحد لوطا ???
-ملاك : قلتلك حووول ماتشدنيش والله لما ننزل
-اكحيلةيضحك : باهى اهو حولتهم ايديا انزلى هى
-ملاك: صار هكى ولا عندك عادى ..امالا والله لما نقعد على قلبك ومش حنحول باهى
-اكحيلة حط ايديه الزوز على ضهرها وحضنها : انتى مزال ماستوعبتيش كلمة انا نشوف فالدنيا كلها فيك ..معناها نبيك تقعدى على قلبي وروحى وعمرى وكل شى
-ملاك مبتسمه : اممممم باهى سخفتنى هى سامحتك ومش حننزل لمكانى
-اكحيلة يضحك : شكرا شكرا لكرم حضرتكم
ملاك حاشية راسها فى رقبته وتضحك
-اكحيلة : سلملى هالضحكة ومولاة الضحكة

___________________________

سيرين فى غرفه نومها شادة مصحف القران وتقرا
طق الباب …
-سيرين : صدق الله العظيم ..وسكرت المصحف
وقامت راسها : تفضلى
-خشت سالمه : شن اديري سيرين
-سيرين : ندير فى ختمه لاميرة
-سالمه : باهى بالك تبينى نديرلك حاجه
-سيرين بهدوء: لا لا صحيتى
-سالمه ?: باهى على راحتك
ومشت للباب بتطلع
-سيرين : تعالى
-سالمه تلفتت : نعم سريوة
-سيرين : خيرك
-سالمه قربت قعمزت على سرير : تبى الحق واجعنى حالك يا سيرين
-سيرين استغربت : بدل ماتفرحيلى ان ربي هدانى وردنى للطريق المستقيم
-سالمه : نخافك تتعمقى هلبا ومعش نلقوك ياسريوة
-سيرين: لا متخافيش عليا ..بادن الله ربي مش حيخلينى .. ومدامه كتابى فى يدى معش تخافى
-سالمه : باهى وقرايتك
-سيرين: معش خاطرى نمشى اللبس لاصق هلبا وانا تعرفينى لسانى متبرى منى ومنعرفش نسكت
-سالمه : ياسبحان مغير الاحوال
ووقفت : باهى نخليك براحتك توة ..وكان تبى حاجه نادينى
-سيرين : باهى ..
وطلعت ..وشرين تليفون سيرين …رقم غريب
فتحت التليفون وردت …
-سيرين : الو
-صفوان : اهلين سيرين
-سيرين : اهاا صفوان .. اهلين بيك
-صفوان : تى وينك يافرخه ستاحشناك .. خيرك معش جيتى للجامعه
-سيرين : ممكن معش تكلمنى بالراحة هادى خوى صفوان .. لو سمحت كلمنى بطريقه اكثر حشمه
-صفوان : حيها حيه .. شن جاك يابنت ..صار الموضوع اللى حكوهولى صح
-سيرين : وشن حكولك
-صفوان : حكولى انك هبلتى وبديتى تلبسى فى الهرك
-سيرين: بالله انا اللى فاضيه ونرد عليك ..هيا بالسلامه
وسكرت الخط وفتحت كتاب القران ورجعت تقرا

____________________________

فى استراحة مؤيد صاحب وحيد
-صلاح يبكى: فيسع ماقالو عرسها فيسع ماقالو ماتت
-وحيد : وحد الله يا راجل..انت مؤمن ..وكل انسان فينا عنده ساعه
-صلاح يمسح فدموعه : ياراجل نبى نعرغ علاش الطيب ماعنداش حظ فالدنيا ..والمحترمه عمرها قصير
-هيثم : يا صلاح راك بكلامك هدا بتوصل للشرك بالله .. المومنه ماتت وماعليك تقول الا كلمه انا لله وانا اليه راجعون
-صلاح : حاشا لله ..اللهم لا اعتراض ..
-مؤيد : ايووه هدا الكلام الصح ..نعرفك متدين يا صلاح ..
-صلاح : اللى يحيرك ان البنت ماتستاهل الا كل خير والله ثلاث شهور وانا انراقب فيها منغير ماتدرى هيا عليا ماشفتها دارت غلطه وحدة نشدها عليها ..بنت
فى غايه الاحترام
-وحيد : عكس اختها يا سبحان الله
-هيثم : قصدك سيرين .. اسكت ساكت قالك شادتها صلاة وعبادة ..حتى الجامعه بطلت معش تمشيلها
-وحيد : معقولة !!؟؟ …سيرين
-مؤيد : صح حتى انا سمعتها

__________________________

وقررو ملاك وسليمان انهم بيمشو للاردن

قبل موعد سفرهم بيوم

مشت ملاك لحوش اماليها بيش تشوفهم قبل ماتسافر
قعمزت مع زينب وسيرين تهدرز .. شويا ونزلت مريم ..
وسليمه طبعا مشت معاها بيش بتقعد عندهم لانها مش حتسافر مع ملاك
هدرزو عليها كلهم ودعولها..ماعدا مريم تشبحلها وساكته وفى خاطرها تتمناها ماتجيبلاش صغار
كلمها اكحيلة بالتليفون …
-سليمان : هيا حبيبتى انا برة اطلعى
-ملاك: باهى هى غير مع سليمه فى دارى ترتب فى حوايجها
-سليمان : تو تكملهم بروحها وخلاص … مش قلتى عندك حاجات ناقصه بتشريها
-ملاك : باهى اهو طالعه هى
وتلفتت لسليمه : هيا سلامات توة يا سليمه نشوفك بخير
-سليمه تبوس فيها : لازم تكلمينى من غادى من اول ماتوصلى
-ملاك : باهى انشالله ..
وطلعت ملاك وماخلتش سليمه تطلع معاها ..عشان صقع الجو برة ..
طلعت للصالة سلمت على زينب وسيرين …
ولقت مريم واقفه جهه الباب مشتلها سلمت عليها
-مريم : لا خلى نسقدك برة
-ملاك استغربت فيها : باهى تعالى هى
وطلعو للجنان برة ..لقو سليمان واقف بعييييد
..خاطر جنانهم كبير هلبا …
تلفتالها ملاك : صحيتى يا ابله مريم خشى صقع عليك
-مريم : لا والله مانبدا مسقداتك الا للسيارة …
-ملاك ?: هى تعالى
ومشو جهه السيارة وسليمان فاتح باب السيارة ومتكى عليها وواقف يراجى في ملاك
شاف معاها مريم جايه عرف جيتها مش بلاش …
-مريم : السلام عليكم
-اكحيلة : وعليكم السلام
-مريم : شن حالك يا سليمان
-اكحيلة : من يوم ربي منّ عليا ببنت الناس وانا احوالى من حسن لاحسن
-مريم وجهها راح احمر : اهاا
-سليمان تلفت لملاك : شنو نمشو
-ملاك : ايه هيا واتيه انا
-مريم : تمشو وتجو بالسلامه غير ردبالك عليها
-اكحيلة : بتوصينى على ملاك … ملاك هادى عيونى الزوز ..منغيرها الدنيا نشبح فيها ظلام
-مريم : اهاا … ربي يعقد عسلكم
-اكحيلة : هيا ملاك
وركبت ملاك للسيارة ..ولع اكحيلة وطلعو طول
قامت مريم تليفونها وبعتتله رسالة
“داير روحك تشكر فيها ..امالا خيرها هيا تشكى وتبكى منك ”
قام اكحيلة تليفونه قراها ..وفى خاطره : لعنه الله عليك يا فتانه ..ومسح المسج طول

_________________________________

وسافرو ملاك وسليمان من ليبيا للاردن
يوم 1/فبراير

وصلو للاردن على طول مشو لعيادة كبيرة فيها دكتور شيبانى كبير شافت من حالتهم ياااما

-الدكتور: تحاليلكم ممتازة.. لا انت ولا المدام محتاجين مقويات
-اكحيلة : باهى ليش ماصارش حمل يا دكتور
-الدكتور : فى كثير مثلكم .. بس الزرع بيجيب معكم نتيجة فى الاكيد
-اكحيلة : الزرع مستحيل
-ملاك : ليش يا سليمان
-اكحيلة تلفتلها بعصبية : احنا قلنا لا ..خلاص عاد
-ملاك : بس الزرع مش عيب وهلبا حالات صارلهم حمل عادى بعد اول عملية زرع
-اكحيلة هدى نفسه : حبيبتى انا قلتلك الموضوع هدا مش حناقشه مرة ثانيه ولا
-الدكتور : والله على راحتكو ..بس انا رائي مافى داعى لأى تأخير ونبدا على طول
-اكحيلة وقف : مشكور يا دكتور …
وتلفت لملاك : هيا
-ملاك وجهها احمر وعندها نيه تبكى: هيا
وقفت لبست شنطتها على كتفها وطلعت
قدام العيادة هوا يمشى وهيا مخففه خطوتها وتمشى وراه
-مد يده وتلفتلها : هيا خيرك
-ملاك مواطية راسها ? ومابتش تعطيه يدها: هيا اهو وراك انا
-اكحيلة : هاتى يدك
قامت راسها ومدت يدها حطتها فى يده
-سليمان يضحك : غير تعالى تعالى بلا جو زايد ..تو دايرة روحك زعلانه
-تلفتتله وبعصبية وبصوت عالى : ايه زعلانه باهيوو
اكحيلة غص عيطتها عليه فالشارع وسكت وقام يده اشر للتاكسى …وركبو
عطاه اسم الفندق وروح بيهم …وصلو قيس العصر قدامه
نزلو من السيارة ..ملاك مشت بسرعه خشت للفندق فتحت الاسانسير وركبت للدور اللى هما فيه منغير حتى ماتتلفتله لانها مغتاضه منه
فتحت الغرفه بالكرت متاعها وخشت

____________________________

فضيله دايرة شاهى ومقعمزة هيا وصغارها
-فضيلة : وين كنت بكرى نكلم فيك متردش
-وحيد : خشيت للجامع لقيت عمى كمال ايصلى قدامى بعد كملنا قعمز معاى وهدرزنا
-فضيله انخلعت : شنو هدرزتو !!؟
-وحيد : شى جبدنا منا ومنا ..وجبدنا على ايمان اختى ومراجعتها المدة الجاية فالاردن
-فضيلة : وخيرها مراجعه ايمان
-وحيد : يحكى ان البلاد امشكشكة وسلطان مايقدرش يطلع وايخلى اماليه بروحهم
-فضيلة : عادى كنهدا نرفعوها حتى لنا وياك
-وحيد : هيا غير دردشه بس مع عمى كمال ..سلطان ماقالش انه مايبيش يرفعها
-فضيلة : انا كمال هدا والله ماعندى ليه خلوق ..كان نلقاك معش تخالطه
-وحيد : غريبه يمى ..وهوا ماخلى ماشكر فيك
-فضيلة : يشكر قهرته وطياح سعده منين يعرفنى هوا بيش يشكرنى
-وحيد : مفهمتش خيرك تعصبتى يااام
-ايناس جت من دارها: كنكم ..اصواتكم عالية
-وحيد : انا صوتى عادى .. امك هيا اللى تعصبت طول لما سمعت اسم كمال
وسكت وحيد …شك ان فى إن فالموضوع

____________________________

فالفندق …

سليمان باله واسع .. لكن تصرفها ماعجباش…
ماركبش ..قعد مقعمز فالهول ( الصالة الكبيرة اللى فيها الريسبشن )
ولع دخانه وقعد يدخن ..يمتص فى غضبه
وهيا فوق حست انها غلطت .. لكن تكابر…توضت وصلت المغرب ..فتحت ثلاجه الغرفه خدت منها شوكلاته وعصير كلتهم
شوى وادن المغرب صلاته حتى هوا ….وهيا تراجى فيه …
اهو يركب ..اهو يركب..وهوا شى ..اتصلت بالموبايل متاعه مقفل ….كلمت الريسبشن تسأل عليه ..فقاللها الشاب انه مقعمز فالهول
مالاول جت بتلبس وتنزله تقعمز معاه..وبعتالى خافت كانا يكشخ عليها يقوللها خيرك نزلتى من غيري ..
غيرت حوايجها …وبدى قلبها يغلى وهوا قاعد مركبش
قيس الساعه 10ونص ركب للغرفه ..فتحها وخش..
طفى الاضاءة خلى ضى بسيط …
وفتح الشنطه طلع منها توته النوم ..غيرها ورقد فى سريره …
وهيا راقدة فى جيهتها وخايفه منه ..عرفت انه زعل من تصرفها او ردت فعلها
وهما فالسرير كل واحد فايق ….
وملاك صوت بطنها ادير فى اصوات يا نارى اليوم كله ماداقت شى
وبدى الصوت يزيد ويعلى .. سليمان غصراته الضحكه
-تلفتلها وهيا عاطيه بالضهر : اقربي منى
وخرت لتالى شوى قربت منه منغير ماتتكلم
حط يده على بطنها وزاد سحبها ليه لصق عليها
-اكحيلة حط فمه جنب ودنها : المكابرة فالشتى تقتل
ملاك ساكته
-حط ايديه الزوز على بطنها وضمها : خيره بطنك اتزوى ماكليتى شى ولا
-ملاك حاشية راسها فمخدتها: لا لا كليت
-سليمان : شن كليتى
-ملاك : شوكولاته وعصير
-سليمان : حسستينى واكلة خروف
-ملاك : ومن بيوكلنى وانا طول اليوم بروحى
-سليمان : وعلاش مانزلتيش للمطعم متع الفندق وتعشيتى
-ملاك : ايه حق صدقتك ..كانا نزلت وانت مش معاى راهو قمت عليا الحد
-سليمان يضحك : لا هوا مش لدرجه بنقيم عليك الحد ..لكن اكيدة غدوة الجرايد كلها بتكت عالراجل اللى كلي زوجته ??
-ملاك تلفتتله : بتاكلنى حبيبي
-سليمان باسها من شفايفها : ايه بناكلك ..وتوة توة …
وضمها ليه وبدى يبوس فيها
وهيا تتمنع : حول ..قلتلك حول
-سليمان : اما انتى قداش فالحة ..مفروض انا الزعلان وانتى اللى ترضى شوى بديتى الزعلانه وانا اللى انرضى
-تلفتت على ضهرها وتدلع : ايه بترضينى باااهى
-تحرك سليمان ورقد عليها : انرضيك وندلعك ونقولك يا تاج راسى ..وانا من عندى غيرك
-ملاك تدلع : وين ندرى عليك شن عندك وانت مقعمز لوطا من العصر ..بالك حتى ترا وين حادف عينك
-تلفت لجسمها تحت الروب كله مقيوم فوق: لا هوا انا من ناحية ترا وين حادف عينى .. لااا حادفها لحاجه حلوة وتهبل توة
-ملاك تضحك : تى قلتلك حول
-سليمان : توة بعد ماحصلتى خلاص
ونزل يبوس فيها وهيا نفس الشى حطت ايديها على ضهره وضماته ليه وحست بحرارة جسمه وحبه ليه
-سليمان : سامحينى حبيبتى خليتك بلا عشى
-ملاك : نحبكك
-سليمان يبوس فيها : هدا جوابك بس ..يعنى تبيش تتعشى
-ملاك : الوقت اتأخر وين بنتعشى توة
-سليمان : امالا تحسابى روحك فى ليبيا .. شوى ثانية نطلعو نرفعك لشارع اسمه شارع السلطان كله عشاوات وارقيله وحفلات ..نتعشو فيه يقعدو فاتحين حتى متأخر
-ملاك : نمشو توة
-سليمان : انتى توة ليا انا
وقام الغطا حطه عليهم وتغطو …
وقعدو مع بعضهم وقت حلو ❤ ….
وقيس الساعه واحد فالليل
-سليمان : هيا نوضى وتى روحك نمشو نتعشو
-ملاك تضحك : انت خليت فيها طلعه ..والله ماقادرة نتحرك .. اطلنا عشى هنايا ديليفرى وخلاص
..ومطاعم الشارع هدا نمشولهم حتى يوم ثانى وخلاص
-سليمان تلفتلها يضحك: باهى حتى هدا راى
واتصل بالكونتاكى وطلب منهم عشى

_______________________________

وقعدو هاداكه الاسبوعين كلهم دهوارى ومطاعم ومولات وتبضيع وشرى …
ومشو لزوز عيادات ثانيه مشهورة نفس الطريقه قالولهم مافيكم شى ..ونصحوهم بالزرع كأسرع حل …وسليمان طبعا معارض ورافض
كانو ناويين يقعدو برة شهر فبراير كله ومارس …
وكانو مخطرين يمشو حتى لتركيا واليونان …
لكن يوم 17 فبراير جاه نتليفون من بوه
-اكحيلة : مستحيل يصير هكى فى ليبيا يا بوى شن تحكى انت
-سعيد : نقولك بنغازى متحركه بكرى شوى كنت نكلم فى ونيس …والجيش معبى الشوارع واضح انه طوارى ..تخاف يسكرو المطارات معش تلقى منين تخش
-اكخيلة : لا لا وانت ووحيد لمن بنخليكم ..لا خلى مروح وخلاص
-سعيد : تمام توصلو بالسلامه انشالله

____________________________

تمت ……ويتبع

الحلقه 23 بتنزل بعتالى انشالله فى موعدها العادى

نحبككككم ❤