رواية اكحيلة

#اكحيلة

??للكاتبه زهور جمال الدين ??

???الحلقه الواحدة والعشرون ???

فى حوش عمك سعيد …زايرينه ابراهيم الجدر وجلال ….

-سعيد : مش معقولة ..مستحيل شن تخرف انت يا ابراهيم
-الجدر: مش تخريف يا سعيد ..ومصر وتونس هوينهم ليه ليه
-جلال : لكن ليبيا بتمشى خسارة باللهِ
-الجدر معارض ?: وعلاش بتمشى خسارة
..ايحولوه علينا ويفكونا منه
-سعيد : لااااا خيره الراجل ..واقف معانا وحتى بضاعتنا مسهلها علينا هوا
-جلال : ونشهدبالله ياحاج ابراهيم ماتبدا غير قايم عباتك على ضهرك ومقلع من المطار لمصر ولا للخارج
-الجدر: وانا شن عندى ..هالبنيات الزوز متجوزات فى رقابى تريس ..وانا بروحى نمشى وين مانبى
-سعيد : ياودى هدا سيدهم ومايقدروشى ..الله اجعله نوارة فى عيون النغارة
-الجدر: الله لا تعليله شان
-جلال : بالنسبه ليا انا منطقتى بالكامل معاه
-سعيد : لااااا ياودى حتى انا معاه وباصمله بصوابعى كلها

____________________________

سلطان ماشى للعيادة بيشوف ايمان …
وهوا خاش من الباب ناداه الدكتور واقف وراه وماشافاش
-الدكتور: خوى سلطان
-تلفت سلطان : نعم يا دكتور
وشرين تليفونه ..شاف لقاه كمال نسيبه راجل زينب اخته ..
-سلطان تلفت لدكتور : لحظه بس يادكتور
وفتح الخط رد عليه
-سلطان : الو
-كمال : اهلين سلطان شن حالك وحال العيلة توة
-سلطان : الحمدلله …هوينها قاعدة حالتها بالهون
-كمال : امالا انا كيف ماشيلك لحوش بوك نحسابك طلعتها ..منها بنحمدلك على سلامتها ومنها نبيك فى موضوع مهم
-سلطان : لا والله انا توة فالعيادة انزور فيها
-كمال : تمام ..مرات شوى ثانيه نجى نشوفك فالعيادة وبالمرة نشبح بنتى ايمان
-سلطان : تفضل مرحبتين بيك
وسكرو الخط وتلفت للدكتور
-سلطان : شن قلتلى يا دكتور
-الدكتور : المريضه حالتها من سئ الى اسوأ ..لو عندك امكانيه اطلعها برة افضل ..امكانيات العيادة مش اوى الحق
-سلطان تكنطى: تى باهى ليش قعدتو اتمهو فيا وتقولولى اهو بتبدا كويسه وخليتونى انخليها عندكم
-الدكتور: انا نكلم فيك بضميري المهنى … بالنسبه لحمى النفاس فى الاردن متقدمين هلبا فى علاجها لما تستعصى
-سلطان : باهى صحيت يا دكتور

ومشى للريسبشن طول ..تكلم معاهم وخدى ورقه مدفوعات علاجها وطلع من العيادة بيش ايجيب المبلغ

وايمان فوق يا نارى ماشيه فى غيبوبه …
جنبها عمتك فضيله اتزور فيها …

________________________________

اكحيلة متكى على الصالون بعد ماروح من الجمعه وتغدى ..وملاك مقعمزة جنبه

-ملاك : حبيبي ليش ماتقتنعش بالزرع
-اكحيلة : ملاك هما كلمتين ماليهمش ثالث ..ريحى نفسك
-ملاك : انا نبى صغار ..انا راحتى فيهم
-اكحيلة تلفتلها : تبى تتزوجى واحد ثانى مثلا
-ملاك : وااااك على كلامك اللى بدى زى السم
-اكحيلة حسها تعصبت : غير تعالى تعالى
وقربت منه وحط يده على كتافها وضمها ليه وقرب وجهه من وجهها
-اكحيلة : اتحبنى
-ملاك : انت عارف
-اكحيلة : لا نبى جواب
-ملاك : ايه نحبك ونمووووووت فيك
-اكحيلة : محلاك وانتى تدلعى
-ملاك اكثر ماخشت فى حضنه : وانا من عندى فيرك ياعمرى انت زوجى وبوى وكل شى
-اكخيلة : هى تعالى سلم بنتى كبرت ودارت راجل
بدت ملاك تضحك بتموت مالضحك
-اكحيلة : ايووووووه هادى هيا ملاك اللى انحبها
..مش التنقريز اللى شادتهولى ليك ايام
-ملاك : باهى نسافرو برة
-اكحيلة : حاضر ..نمشو حتى لامريكا كانا تبى …اعطينى شهر ونص بس ..وبعتالى انا ملكك انتى وبس
-ملاك : نمشو مصر والا الاردن
-اكخيلة : تمام ..انتى شوفى واسئلى وانا ندير كيف ماتبى
-ملاك تنفست : باهى

_____________________________

فى حوش هشام
-غادة : حبيبي انا منبيش انسيب ليبيا
-هشام : يا عمرى انا مش مطمن عليكم وانا قاعد بالشهور فى دبى
-غادة : ياهشام زمان كنت تطمن علينا والامر ماشى عادى …حبيبي برة لخدمتك ودير علينا طلات زى ماكنت ادير زمان
-هشام خدى يدها وقامها باسها : زمان يختلف على توة حبيبتى ..زمان انتى دايرة حاجز بينى وبينك فمطمن عالصغار معاك ومخليك على راحتك ..لكن توة خلاص والله ماعاد طايق فراقك انتى والصغار
-غادة : باهى نمشو معاك لكن تخلينا انجو مرة مرة حتى بروحنا لما تكون انت مش فاضى
-هشام : باهى يا همى منك انتى
-غادة : ??
-هشام : شن صار نزلت الدورة
-غادة مبتسمه : باهى اللى سألت من بكرى وانا نراجى فيك تسأل
-هشام ضحك : شنو درتى التحليل البيتى قصدك
-غادة بابتسامه حلوة : ايه
-هشام : باهى وشن طلع
-غادة : حامل
-هشام قرب منها وحضنها : بااااهى حبيبتى الحمدلله ياربي

_____________________________

سلطان ماشى فالطريق ..

يبي ايطق فالحوش ايجيب الفلوس وايطلع ايمان طول من العيادة
ووراه فالعياده بعده بنص ساعه وصل كمال …
هوا فالحقيقه يبي سلطان ضرورى بيتفاهم معاه على موضوع قبل ما يروح جلال للجنوب ..فمفيش وقت ايراجيه ..مشاله للعيادة طول
لما وصل كمال اتصل بسلطان لكن سلطان مخلى تليفونه فالسيارة وماردش
وقف كمال عالريسبشن وسأل على رقم غرفه ايمان دلوه عليها …
وركب فالاسانسير للطابق الثالث …وصل قدام غرفه ايمان وطقطق
-فضيلة : اشكون تفضل

___________________________

سليمان مشى هوا وملاك لحوش بوه
-اكحيلة : شنو الجماعه روحو يابوى
-سعيد : روحو ..وانت خيرك ماجيتش تغديت معاى
-اكحيلة : قلت بتهدرزو على بعضكن انت وياهم ..واخين على بعض وتسبو وتضحكو ..وانا الحق انتحشم منهم عندى حدود معاهم الزوز
-سعيد : باهى على راحتك
وتلفت لملاك : شن حالك بنيتى
-ملاك : الحمدلله عمى بخير شن حالك انت
-سعيد : الحمدلله كويس ..خوك خالد روح ولا مزال
-ملاك : لا مزال ..قال عنده خدمه برة
-سعيد : لكن عطل ..ثلاثه شهور هلبا
-ملاك : والله ماندرى عليه
-جى المخلوف : شن حالك ابله ملاك بنيتى
-اكحيلة: شنو ابلة ملاك هادى ..مية مرة نقولك ناديلها ملاك بس يا مخلوف
-المخلوف : ماهو على خاطر قدرها
-اكحيلة يضحك : امالا خيرك انا تنادى فيا سليمان حاف ..ولا ماعنديش قدر
-مخلوف : لا حشومه قدرك كبير ..كيف عاد ..لكن انت ربيتك على ايديا ..وهيا بنية الناس كيف ريتها توة
-ملاك : لا لا نادينى ملاك مسامح عادى
-مخلوف : باهى كيف ماتبو …
-سعيد : وين الشاهى الاخضر
-مخلوف : عالنار اهو شوى ويطيب
-ملاك : اهو تو انوض انديرهولك انا عمى
-مخلوف : ريحى روحك بنتى سيدى سعيد مايشربش غير شاهى المخلوف
-سعيد : اى والله
وشرين تليفون ملاك شافت لقتها سليمه تتصل
..ردت عليها
-ملاك : ايووه
-سليمه : شنو مازلتى
-ملاك : واتيه انتى
-سليمه : ايه واتيه
-ملاك : اهو جايه هى
وسكرت الخط
-سعيد : تى شنو طالعين
-اكحيلة : لا ملاك بتمشى لاهلها شورة ترا شن عندهم
-ملاك تشبح لاكحيلة وتكلم فى عمها : انشالله منعطلش انا بعد المغرب طول انروح
-سعيد : باهى سلمينا عليهم
وطلعت ملاك وطله معاها سليمان للباب
وجاب المخلوف الشاهى حطه قدامه
-سعيد : شنو يا مخلوف شكله مزال ولا شنو
-المخلوف : توة ربي يسخر
-سعيد : نبى نشد صغارهم فى حجرى قبل مانموت
-مخلوف : انشالله ربي يطول فى عمرك
-سعيد : امالا وحيد وين !؟؟

__________________________

وحيد هوا واصحابه فى استراحة مؤيد صاحبه

-وحيد : صلاح وينه عطل مش قال بيجى
-مؤيد : صلاح غاطس لودانه يحب
-وحيد : ماشالله العقبالنا
-مؤيد : وكانا نقولك فى منو يحب
-وحيد : منو !!؟
-مؤيد : سيرين عبدالعاطى …مدكرها
-وحيد ?:سيرين ..طيحته على ركابه..شنو البلاد تمت من الصبايا مالقاش غيرها
-مؤيد : والله زى مانحكيلك وليه مدة يبي يبعت امه
تخطبهاله
-وحيد : غير كانها عقلت ربي يعقد عسلهم
-مؤيد : اهو بيجى هوا شوى ثانيه وراس اوخى ماتجبد الموضوع قدامه فكنا ماتقولاش كنت تكلم فيها
-وحيد : لا لا شنو تحسابنى مش راجل امالا
-مؤيد : باهى
وسمعو صوت سيارة وقفت …
وخشو صلاح وعماد اصحابهم ..
-عماد وصلاح : السلام عليكم
-وحيد ومؤيد : وعليكم السلام
-مؤيد : جيتو فى وقتكم كيف بنتبلو طرحة الشوا
-صلاح : هوا هداكا صلينا الجمعه وجينا
-عماد : قول هوا هداكه شريت لامى الورد والشوكلاته وجيت
-مؤيد : ورد شنو ..سبقتنا ودرتها يا صلوحه
-صلاح : امى بتمشيلهم اليوم تخطب انشالله
وتلفت لوحيد : بنبدو انا وخوك سليمان حكم عدايل
-وحيد : سيرين بنية كويسه وربي يعقد عسلكم انشالله
-صلاح: سيرين !!؟ ..منو سيرين
-وحيد : سيرين عبدالعاطى ..مش انت قالو تبى تخطبها انت ولا
-صلاح : لا لا ..انا باعت امى تخطب فى اميرة عبدالعاطى .. مش سيرين
-وحيد فرح : تصدق كنت حاير كيف بتاخد هاديكه الفاسدة ..لاااا اختها ماشالله
” فيسع غير اقواله ??”
-عماد : سيرين تاريخها كله عندك عاد
-وحيد : لا عاد اختها حاجه ثانية العفة والاحترام ..لكن هاديكه ماننصحش بيها شاب محترم ..عندها مرض العظمه ..وتحساب روحها مافيش فى ليبيا غيرها
-مؤيد : ياسيدى كل شى بالبركه انشالله
-صلاح : صحيتو يا جماعه

__________________________

كمال واقف قدام غرفه ايمان
طقطق
-فضيلة : شكون تفضل
فتح كمال الباب …يلقى ايمان راقدة ..وفضيله واقفه جنبها
-كمال انصدم : فضيلة !!!؟؟؟؟؟
-فضيلة : انت شن جاى ادير هنايا
سكر كمال الباب وخش
-كمال : فضيلة ولا انا نتخايل
-تلفتت للجهه الثانية : فضيلة ايه ..لا ماتتخايلش
-كمال : وين كنتى كل هالسنين ..وشن اديري هنايا فى غرفه مرت سلطان
بعدين زى اللى فهم : ماتقوليليش بنتك
-فضيله قايمه خشمها : ايه بنتى ..
-كمال : الله عالدنيا مصغرها ..توة انتى ام ايمان يا فضيلة ..وليش ماقلتيليش
-فضيلة : اسمع يا كمال اهو سنين ماريتش خليقتك وفكنى الله من مشاكلك
-كمال مزال فى صدمه : زينب شافاتك ..عارفاتك ام ايمان..ويضحك وفرحان انا مش مصدق عيونى راهو
-فضيله : لا مصدق عيونك ولا مصدق ودانك ..كانا زمان خوتى ماقدروش ايردك …توة عندى ولدى راجل ويردك عليا لتالى
-كمال : غير راجى فهمينى ..وحيد خو سليمان هوا نسيب سلطان ..انتى شن تقربيله
-فضيله : وحيد ولدى
-كمال بيهبل : تى كيف ولدك …وحيد ولد سعيد ميلاد
-فضيلة : وانا كنت مرت سعيد ميلاد ولا نسيت
-كمال : مش قالو ولدك مات وقتها
-فضيلة : وربي اكرمنى وبقدرة قادر طلع ولدى حى …شكلى ترا وين دايرة عمل خير
-كمال طبس وحط جبهته بين ايديه : انا مش مصدق ..سلطان ليه اكثر من عام متزوج كيف ما لاحظتكش ..كيف ماريتكش
-فضيلة : اسمت يا كمال لو يصدر منك اى تصرف مايعجبنيش رانى طول بنبلغ ولدى وتحمل مايجيك منه
-كمال : انا مازلت نبيك يافضيلة ..اهو ربي كريم وردك ليا ليش تبى تحرمينى مرة ثانيه منك
-فضيله : لانى مانبيكش لا فالمرة الاولى ولا توة
وانفتح الباب خشت الممرضه
-الممرضه : سامحونى اطلعو اولا صوت دوشه ..ثانيا بنجهز المريضه زوجها يخلص تحت ويبي يطلعها
-كمال تلفت لفضيلة : سلطان يعرف بالقصه القديمه
-فضيلة ماتبيش تشبحله : يعرف ايه
-كمال : امالا خلى نمشى انا ومفيش داعى تقوليله كمال جى ..ولا فى داعى تبلغيه اننا تلاقينا
وطلع بخطوات سريعه يبي ينزل قبل مايشوفه سلطان
-فضيله : درب يسد مايرد

وبالفعل الممرضه جهزت ايمان …وركب سلطان
-فضيلة : شنو ياوليدى بطلعها
-سلطان : حجزتلها فالاسعاف الطائر للاردن …يادوبك نمشو للمطار توة
-فضيلة : منو بيمشى معاها
-سلطان : ماتخافيش ياعمتى انا معاها
-فضيلة : خليتنى نمشى معاها
-سلطان : ديري رايك والحقى انتى ووحيد ..لكن توة غير خلينى نسقد بيها ..وبعتالى كل شى ساهل
-فضيلة : حمودى وينه
-سلطان : حمودى عند انى ماتخافيش عليه

وطلع سلطان بايمان وركبها للاسعاف بيش يرفعها للمطار
وفضيله اتصلت بولدها قالتله ايجيها ايروح بيها من العيادة
وبالفعل جاها ولدها وركبها ومشو للمطار سقدو ايمان وقالو لسلطان بانهم بيلحقو

____________________________

اما فى حوش عبدالعاطى
زينب شارقه لودانها ..جايينها ناس يخطبو فى بنتها اميرة …
امالى صلاح ماهو حكيتلكم
محضرة اختها وسلفتها مريم وحماتها ملاك
امها ماقدرتش تحضر خاطر شادة ولد سلطان …
ومازالو ماسمعوش بسلطان سافر بمرته …
مدو للناس الحاجع الراقيه …
المراءة جايبه معاها بناتها الزوز متزوجات ..وحماتها واختها …
وعمتك اميرة لابسه قفطان قصيرر وفاتحه شعرها
..وطالعه زى القمر
-ملاك : انتى ديما بتقعدى هكى منكدة يا سيرين
-سيرين تكشخ : انا اكبر منها ..كيف يعطوها هيا قبلى
-ملاك : تى ماهو جوك هلبا وانتى ترفضى
-سيرين : تراجينى لين انت نلقى الشخص المناسب وننخطب وتنخطب هيا بعدى
-ملاك : تو هدا منطق ياسيرين
-سيرن : ايه باهى …
من الدروج اللى يفتح من الجهه الخلفيه ..ملاك وسيرين يشبحو فى كمال راكب لحوشه فوق
وجهه رايح اصفر زى الليمه
-سيرين : خيرك بابا
-كمال : شى غير شكلى بنمرض قلت نستريح فى حوشى
-ملاك : شن حالك يا كمال
-كمال : الحمدلله شنحالك انتى ملوكهو
-ملاك : الحمد لله

وياحنه روحو الناس وعجبتهم البنيه هلبا هلبا …وع اساس ان زينب ثلاث اربع ايام وترد عليهم
تضربهالك اسبوع وهما يسألو عالولد ..وشكروهولهم وردت زينب عالناس وقالتلهم قاللكم بوها تفضلو امتى ماتبو

وبالفعل بعد اسبوعين دارو الفضانيه..اللى هيا الدفع بالشرقاوى …

وفضيله لحقت بنتها للاردن هيا ووحيد وبنتها ايناس ..وبالفعل حالتها تحسنت ولقت بيه علاجهم

___________________________

بعدها بشهر

الساعه عشرة ونص فالليل
اكحيلة وملاك مروحين من حوش هشام كانو يسلمو عليهم لانهم بيسافرو لى دبي بيقعدو عامين
-ملاك : حبيبى قلتلى اعطينى شهر ونص واهو الشهر ونص فاتو وانت مازال مافضيتش
-اكحيلة : غير كان صبرتى شويا بس ….
وضحك: حاضر حبيبي ..نرفعك وين ماتبى
-ملاك : نمشو للاردن …شوف ايمان بعد مانتكست ولت حالها ماشالله ..الصبح كلمتها حتى صوتها كويس
-اكحيلة : لا الاردن ماشالله حتى انا امس كلمت سلطان شكرلى علاجهم ..بالرغم قال غاليين هلبا فالمعيشة لكن مش مشكلة
وتلفتلها وضحكلها : على خاطر ملاك كل شى يهون
-ملاك : ربي يحفظك ليا حبيبي..لكن شن قصدك كان صبرتى ..اكيدة موتى حاجه
-اكحيلة يضحك : شن رايك انى كنت دايرهالك مفاجئة
-ملاك ?: شنو
-اكحيلة : كلمت سلطان حجزلنا فندق فى يوم 7 الشهر الجاى
-ملاك : ريتى ولا.. وداس عليا
-اكخيلة : هوا انا نعرف اندس عليك ..اهو اول ماسألتينى قلت المدسوس كله ..العرس قداش مازاله
-ملاك : عشرين يوم
-اكحيلة : هوا العرس امتى
-ملاك : يوم 1/1
اكحيلة : معناه مازاله عشرين يوم …ايتم العرس بعده بسبعه ايام انطيرو احنا طول للاردن…باهى هكى
-ملاك : قداش انحبك يا ولد
-اكحيلة : انتى شنو كملتى طلوع مع بنت خوك
-ملاك : مزاللها حاجات بسيطه ..امس شرينا البدله البودرية متع القفه
-اكخيلة : مش انتى شريتى وحدة ..تلبسها هيا وخلاص
-ملاك : لا براحتها هيا تبى وحدة جديدة مالبسها حد قبلها ..وعلى مافرحت بيها لبستها من لما روحنا طول ..وعقدت هاداكه الحولى البودرى وتشم فيه وتعاود على ماعجبها
وشرين تليفون ملاك ..زينب مرت خوها تتصل
ردت عليها
-ملاك : اهلين ابله زينب
-زينب صوتها مشغول : ماجاتكش اميرة
-ملاك : لا لا ماشفتهاش اليوم
-زينب : لتوة ماروحتش ..وخوتها من بكرى وهما يتصلو بيها ويعاركو وتليفونها يضبح وماتردش
-ملاك : ياحليلى على بنت خوى ..والله ماعندى فكرة وين هيا توة
-زينب : باهى غير عاونينى واتصلى بصاحباتها كانا عندك ارقامهم
-ملاك : باهى اهو تونتصل بيهم
وسكرت الخط
-ملاك : ارفعنى لحوش اماليا يا سليمان قلبي مش مطمن
-اكحيلة : باهى غير اهدى وحاضر نرفعك
غير اكحيلة طريقه ومشى جيهت حوش نساباته
خشو من شارعهم زحمه رجالة قدام الحوش
قرب اكحيلة وخش بيها بالسيارة من البوابه لداخل
وملاك تخبط على رجليها : ياربي استر
نزلت ملاك من السيارة تسمع فى صوت العياط
خشت تجرى وسليمان شاد يدها
لقو كمال كيف طالع من الباب ويبكى
-ملاك : شنو فى يا كمال
-كمال : اميرة عطاتك عمرها انقلبت بيها السيارة فالوادى اللى جهة طريق السور
طاحت ملاك على ركابها
قاموها سليمان وكمال …
-كمال : سيب يا سليمان اهو تو ندخلها انا لداخل
ودخلها كمال وجتها مريم تجرى قامت معاه
لقت زينب وبنتها سيرين فى عيطه وحدة
لا حول ولا قوة الا بالله
وقام عزاها يانارى عروسة مازاللها عشرين يوم
ثانى يوم جنازتها …جابوها لامها دخلوها للمربوعه بيش تشبحها .. وخشت معاها عمتها ملاك وسيرين ومريم وخالتها وحناها ..وسليمه ..وحتى سالمه اللى اطيب دخلوها تشوفها وتسامحها
-زينب حاطه يدها على وجه اميرة يانارى ناير مافيشى حتى خبش : بنيتى ..بتفارقينى لحوش راجلك وحايرة منها مع انى مرة مرة بنشوفك ..شوى هاك بتفارقينى بوكل
-مريم : وحدى الله يا زينب ..وقولى لا اله الا الله واطلبى الصبر
-اتكت زينب على كتف مريم : لااااا اله الا الله …غير منين بيجينى الصبر بس بعد بنيتى
-اما سيريت انقلبت 180 درجه ..لابسه حجابها ومقعمزة عند راس اخختها وتقرالها فى سورة ياسين
وملاك شادتها سليمه وتبكى تبكى مش صابرة بكل على بنت خوها ..ومدخلة معاها هاداكه الحولى البودرى اللى عجب اميرة ..ومداته لسليمه ..ولفاته سليمه على هداكه التابوت وهيا تبكى وتدعيلها ..وفالمربوعه بوها وعمامها خالد ومنير وخوها احمد وولاد عمها خالد الزوز ….
الكل مصدوم ويضبطو فى بعض ويعزو فى بعض ..ياحنه الموت حارة واول مرة يجربوها على حد صغير فى عيلتهم …
وفالجنان لبرة خالها سلطان ماقدرش يخش عشان مريم وملاك لداخل …
وسليمان ووحيد حتى همت فالجنان ..وخطيبها صلاح يبكى عليها زى المراءة
وطلعو التابوت من باب المربوعه قايمينه بوها وعمامها وخوها وصغار عمها وهوا ملفوف بالحولى البودرى
منضر يخلى القلب يبكى ….
زينب طلعت وراهم ووقفت فم باب المربوعه مشالها سلطان يجرى واضبطها وبكى معاه على ماواجعاته بنت اخته عروسة ..وجت سيرين لخالها واضبطها وبكى معاها حتى هيا
وقعدو فى هاداكه العزى شهر وهما ماقعد عليهم والى فالدنيا ماجاهمش . صاحباتها قريب يموتو عليها
..معمزين جنب ملاك ويصبرو فيها وفى نفسهم
..ماهو قاريات حتى مع ملاك …وحتى غادة صاحبتها اجلت سفرتها وقعدت على خاطر ملاك فى اسبوع العزى
وهاداكه الحوش يملا ويفرغ ..فى نساوين مايعرفوش زينب جو عزوها ..العروسه اللى ماتت قصتها انشهرت فطرابلس
وحتى خوال ملاك جو عزو …وفضيلة جت عزت زينب …وايمان حالها باهى شادة ولدها ومقعمزة جنب عزوزتها ومتأثرة هلبا بموتت اميرة
لكن اللى يحيرك سيرين كيف ادينت وانقلب حالها للافضل .. …صابرة على وخيتها …ولابسه ملاية الحجاب ..وماشادة غير كتاب القران وتقرا ..

سليمان مرة مرة يكلم فى ملاك ويطمن عليها
وهيا حالها ايقطع القلب شادتها دموع وخلاص ..
جتهم صدمه كلهم بموتت اميرة

______________________________

تمت ….ويتبع

نحبكم ❤