رواية اكحيلة

#اكحيلة

??للكاتبه زهور جمال الدين ??

 

?☘?الحلقه السابعه عشر?☘?

واخيراً وصلنا عرس سليمان وملاك …
يانارى عليها ملاك فى كل طلعه وكل ركبه سيارة للمحلات تدكر امها …
خشت تشري فالدهب معاها زينب مرت خوها وسليمه
-زينب : يا ملاك مش معقولة الايام كلها قضيتيها بكى ..شوفى التواكم واختارى
-ملاك : باهى اهو نشوف …
شرين تليفونها …ردت
-ملاك صوت باكى : الوو
-اكحيلة : خيرك حبيبتى ياسرك بكى
-ملاك : لا عادى منبكيش
-اكخيلة : اكدبي ع الناس كلها الا علينا انا ..من صوتك نزبطك
-ملاك : البنت واعر عليها عرس بلا ام

” ربي يرحم كل ام متوفيه ويستر بناتها بعدها ”

-اكحيلة : انا امك وانا بوك وكل عيلتك
-ملاك : ربي يخليك ليا .. انا وصغارنا
-اكحيلة : اسمعى مش تجينى يوم العرس خشمك زى طماطمه من كثر البكى..نبيك قمر زى مانعرفك
ملاك تضحك
-اكحيلة : ايوووه هكى نبيك .. اضحكى وخلى الزعل لغيرك
-ملاك : واااك كلامك محلاه
-اكحيلة : انزلبح فيك من توة بيش متعبينيش بعتالى ??
-ملاك : منغير ماتزلبح ..نتمنى نكون معاك اليوم قبل غدوة
-اكحيلة : شن اخترتى حبيبتى
-ملاك : اهو قاعدة نشوف ونختار
-اكحيلة: حبيبي الدهب كنز..يعنى كل قرش فيه مش خسارة ..خودى الدهب اللى يعجبك واللى يليق بمرت سليمان
-ملاك : مشكلتى انا نحب البساطه ..وزينب مرت خوى تبينى ناخد الدهب الكبير
-اكحيلة : خودى هدا وهدا ..قلتلك كل قرش فيه مش خسارة ..
-ملاك : مش حتقول كثرتى عليا
-اكخيلة : لا كثري زى مايعجبك ..راك مرت اكحيلة
-ملاك : وحبيبته
-اكحيلة : قولى وروحه
-ملاك : روحى معلقه فيك يا ولد
-اكحيلة : بالله عليك كان تحبينى معش تبكى.. ماتدريش عليا قداش نتقطع تقطيعه لما نسمع صوت دموعك
-ملاك : حاضر
-اكحيلة : باهى بري اختارى ..وبعد تروحى كلمينى
-ملاك تضحك : حاضر

_______________________________

فى شقه وحيد …

-وحيد : منقدروش انديروه فالحوش ضيق
-ايناس: تو جنان حوشكم ضيق..بلعكس واسع بر وبحر
-وحيد : شن تخرفى انتى ..راهو هدا عرس اكحيلة الخيل بيلعب فيه عالاقل اسبوع
-ايمان : بتعزمو واجد
-وحيد : سليمان عزمهالنا من الشرق للغرب ..قلنا نمشو لاستراحة تاجورا ونديروه فيها العرس احسن عالاقل تسد
-ايناس: والنساوين وين
-وحيد : ماهناك نساوين .. عماتى الزوز وكناينهم تو يجو لحوشنا هدا اللى ساكنين فيه ..حتى انتى يمى والبنات
-فضيلة : حاضر من عيونى …انا حفلة ملاك مانى ماشيه .. والبنات بعد يحضرو تو يجو معاها
-وحيد : كان نعرف السر فى قلت مشيانك لحوش اهل ملاك يااام مع انك تعتبري خالتها
-فضيلة : انا وكناينهم من زمان مش صحبة
-ايناس: خاصه اللى يقولولها زينب..لما مشينا نباركو لملاك بالخطوبه مانزلتش حتى سلمت علينا
-ايمان : مع ان اول مرة نشوفوها قداش قامتها بينا
-وحيد : ياودى انا غير يمشى عرس سليمان على خير مانبو منهم شى
-فضيلة :ماشالله ربي يحفظكم انت ووخيك
-وحيد حط راسه على صدر امه : يااام نحس فى حنية الدنيا كلها فيك
-فضيلة : اييييه هدا كله الحن اللى داستهولك يا وليدى
-ايمان : العقبى لعرسك يا وخي
-وحيد شبحلها: ياودى شكله فى عرس فى حوشنا بيصير قبل عرسى
-فضيلة : منو قصدك
-وحيد يشبح لايمان : مندرى ..غير ترا كيف شام دوة
-ايناس : كانا النيه صافيه ربي يكمل عالخير
-ايمان : ااامين
-وحيد يضحك : وتقولى ااامين قدامى … مقواك يابنت
-فضيلة : ربي يحفظكم ليا يا صغيويرتى ..ونشوف صغاركم
-وحيد : ربي يطول فى عمرك يااام

_______________________________

عرس ملاك واكحيلة حددوه خميس وجمعه …

ووصل اسبوع العرس ❤

يوم الاثنين

..العرس قايم فالحوش .. واسراب الضى معلقات فى كل مكان من حوش عبدالعاطى …والكواشف والعات هداكة الجنان تقول نهار مخليينه
ودايرين زى خيم بالقواعد متاعهم متفرقات كل خيمه تحمل طاولة بخمس كراسى …
وجايبيين زمزامات ….
والبنات يرقصو
-حياة : ياسيرين بدلى الساعه بساعه وافردى وجهك الناس بتلاحظك راهو
-سيرين : لا لا متخافيش قلتلهم موعد الدورة وعندى الم مش قادرة حتى نتحرك
-حياة : لكن غلط اللى اديري فيه
-سيرين : شوفيها كيف فرحانه وبطير من الفرح مع صاحباتها .. مفروض انا اللى نرقص فمكانها توة
-حياة : منو اللى مصورهولك فدماغك الوهم هدا ..تى كيف مفروض انتى اللى فمكانها …هادى ارادة ربي
-سيرين : وراس حياة خلينى فى حالى
-حياة : لا مش حنخليك فى حالك لين تقتنعى .. منضرك مش هوا قدام الناس وانتى تهمينى

___________________________

سليمه امأنقه ولابسه .. دايرة روحها المسؤلة الاولى والاخيرة على ملاك …
-سليمه : شن صار فى ايديك
-ملاك : لا الحمدلله بردت شوى
-سليمه : قلتلك فكينا منه المركز هدا وانتى شديتى فيه كريمات جلسات مغربية..انشالله غير يبردو ايديك قبل الحفلة
-ملاك : اهو من توة بدو يبردو حتى اللون الاحمر خف
صاحباتها يرقصو عالزمزامات ينادو فيا : ملاك تعالى
شرين تليفونها ..سليمان يتصل
-ملاك : شويا بس نرد عالتليفون ونجيكم
وقامت تليفونها بعدت شوى عالدوشه وردت

_____________________________

-ملاك : الو
-اكحيلة : انا لتوة قاعد مش مصدق ان عرسنا راهو
-ملاك : ولا انا حبيبي .. معقولة ثلاثه ايام وبنبدا معاك فى نفس الحوش
-اكحيلة : وفى نفس الدار
-ملاك : اسكت تحشم
-اكحيلة: ارخى روحك معاى شويا يا بنت ..خير مانحرش فيك شاويش سليمه راهو ??
-ملاك : شنو كملتولها تركيب دارها
-اكحيلة : ياسلام ..دار سليمه ركبتها قبل دارى ?
-ملاك : مع ان خوى كمال يبيها تقعد فى حوشنا هنايا
-اكحيلة : لا لا نبوها احنا وين نحلوهالهم ?.. حتى انا نبدا مطمن عليك لما نطلع مادامها معاك
-ملاك : وين بتطلع يا فالح ..عندك عام كامل مفيش طلوع من برة باب الحوش
-اكحيلة : قولى عامين …ثلاثه ..تى رانى مسكييين سنين وانا نخدم زى الثور اللى معلقينه فى ساقيه يحرثو عليه ..توة خلااااص بنسافر بنحب بنعيش بنتفسح
-ملاك : قاعد ماتبيش تقول وين بتسفرنا
– اكحيلة : وين نحصل عليك بروحك ومايلقانا حد
-ملاك : نحبك
-اكحيلة : نمووووت فيك

_______________________________

يوم الثلاثاء …

اكحيلة ايكلم فى خالد بالتليفون
-خالد : اهلا بو نسيب
-اكحيلة : انشالله غير راضى علينا يا راس
-خالد : لا لا راس اوخية وين بنلقولها خير منك

“خالد ماعنداش طارقه فيسع غير اقواله ??”

-اكحيلة : قتلك ..مفكر نعزم جماعه الشرق
-خالد سكت ..وبعدين رد : دير رايك يا اكخيلة نعرفك ماتغلطش
-اكخيلة : فالاخير بالسيف علينا بنتصالحو معاهم ماهو المصلحه وحدة..لما فكرت قلت خليها عزومه عرس وكل واحد يجبر بخاطر الثانى
-خالد : انت الموس وانا اللحم ..واللى درته انت ماشى
-اكخيلة : مرات حتى الولد بيجى مع بوه
-خالد : كلمتى وحدة ..قلتلك اللى درته انت ماشى عليا
-اكحيلة : ونعما النسيب يا خالد كل يوم تكبر فى عينى
-خالد : شنو اليوم بنجوكم فالجامع ولا فى حوشكم للفاتحه
-اكحيلة : انا والله ماندرى على حاجه ..التنسيقات كلها عند وحيد وسلطان ..تو نشوفهم ونقول للحاج يتصل بيكم ايأكدلكم
-خالد : تم
وسكرو الخط

______________________________

ملاك لابسه سروال امريكانى وبدي سماوى ولامه شعرها فوق وشادة عبايتها ووشاحها فى يدها
طلعت من دارها للصالة لقت سليمه ومريم يتكلمو

-سليمه : شنو يا ابله مريم ماكش ماشية معانا الحمام
-مريم : انا والله يا سليمه رانى فى سينه مش سينتى …برو انتو وانا خلى نقعد هنايا
-طلعت ملاك للصالة : ابلة مريم خيرك ملبستيش البنات ايراجو فى الجنان
-مريم بدت تبكى : وراس ملوكه ايديا مربطات ..
-ملاك : خيرك اللطف
-مريم تنحنحت :والله غير بوى مريض شوى ونخمم فيه
-ملاك : لا الف سلامه عليه ..لكن هدا مايمنعش تمشى معانا الحمام
-مريم: معليش حبيبتى بالصحة عليك حمامك .. وتروحى بالبودرى عالخير انشالله وتلقينى قدامك ..هوينا زينب وسليمه ماشيات معاك مهنيينى
-ملاك : باهى على راحتك ..
وطلعو لقو البنات يراجو فيهم فالسيارات ..
حتى من سيرين الغضبانه راكبه سيارتها فالسرب وشادتها كلاكسات ??
لبست ملاك عبايتها وركبت مع محمد ولد خوها من قدام …رابط حولى بودرى فالرواشن من الخلف
وركبت معاها سليمه من الخلف وهيا شادة السابات اللى فيه بدلتها البودريه
وطلعو من باب الحوش .. الطريق كلها كلاكسات وجو وتسطريب بنات على اولاد
ملاك وهيا فالسيارة كلمها خوها كمال
-ملاك : ايوة كمال
-كمال : شنو يا عروسة امورك امتكمه
-ملاك : ايه الحمد لله..ربي يحفظكم ليا اوخيينى
-كمال : بنمشو بعتالى للفاتحه ..وانا وكيلك ونبى نسمع موافقتك بودانى
-ملاك تحشمت : ماهو من يومها قلتلك موافقه
-كمال : باهى كل شى بالبركهةيا ملوكه ..
وعيونه دمعو : راك انتى بنيتى مش غير اوخيتى بس
ملاك طول عاد الدموع وين تلقيها …
ووصلو للحمام البخارى … وخشو قعدو فيه قريب ثلاث ساعات …
ولبسو ملاك البودرى .. طلعت زى الغزالة
ولبستلها زينب سوارات دهب هديه خوها كمال
وطلعو بيها ونفس الشى دارو جو فالطريق
بعد وصلو لقو خوالها من سبها واصلين …سلمو عليها وباركولها …وحطو الرشدة المبكبكه سبر يوم الحمام عند جماعه طرابلس ..موصيين عليه عند مراءة اطيب جابتهولهم امسلفر …
والعشيه مشو خوتها وامتاعين حوش بوها وخالها جلال وواولاده للاستراحه متع حوش ميلاد بيش يقرو فاتحه سليمان وملاك
هوا وكيله بوه …وهيا وكيلها خوها كمال
وهما يقرو فالفاتحه وجلال بين عيونه اخته عفاف فى ايامها الاخيرة وكيف صارعت المرض …
وقرو الفاتحه وتمو …
سلطان قام تليفونه واتصل
-اكحيلة : الو
-سلطان : مبروك عليك يا عريس تمو الفاتحة
-اكحيلة فرحان : الله يبارك فيك والعقبالك
-سلطان : لا بأدن الله قريبا ..ياودى شكلنا شوشنا كلنا
-اكحيلة : باهى مع السلامه
وسكر الخط قبل حتى مايرد سلطان ??
واتصل بملاك
-ملاك : الووو
-اكحيلة : مبروك عليك يا مراتى يا تاج راسى
-ملاك فرحانه : كملووو
-اكخيلة : كملو وبديتى من اللحظه هادى مرت اكحيلة
-ملاك : الله يبارك فيك ..ومبروك عليك حتى انت
وتسمع فالزغاريط ناضت فى صالتهم ..شوره كمال كلم زينب وقاللها
-اكحيلة دمعو عيونه : الله عالزغاريط .. ياريته امى حيه
-ملاك : ماتفكرنيش وراس حبيبي
وبدت تبكى ….
-اكخيلة : خلاص عاااد .. حتى فرحة عمرنا بتقلبيها بكى .. تووووة نبيك تزغرطى حتى انتى
-ملاك تضحك : لاااا تبيهم يهزو عليا???
-اكخيلة : الحمدلله اللى ضحكتى
-ملاك : حبيبي اليوم صغار خوى بيرفعو بتاتى للحوش
-اكحيلة : يا مرحبا بحالك ومحتالك كله ..تو نكلم وحيد يهتم بالموضوع هدا
-ملاك : باهى تو انأكدلهم حبيبي
وداروها ليله مليحه فى حوش ملاك ورقصوها صاحباتها وهيا بالبودرى

اما مريم وجهها زينقو احرف من وجه البنت اللى ادير فى بلاغات على بروفايلى ??…..
شادتها اتصالات لرقم سليمان وهوا مايردش
وتبعتله فى رسايل ” غير رد بس نباركلك ”
المشكلة انه مايقدر يسكر رقمه الناس تعرفه وتكلم فيه عليه
بالرغم فرحانه لملاك وترقص عالزمزامات مع الناس …لكن الجثه معاهم والعقل معاه

____________________________

يوم الاربعاء

” يوم القفه ”

اكخيلة دايره يوم عزومه الغدى متاعه
وجت المعازيم ..جايبيين شركه امطيبخ وتمد …
جوه ناس من الشرق والغرب والجنوب
زحمه غريبه منحميلكمش ….
والعشيه مبخبخين الساحه اللى قدام الاستراحه
جاييبين الخيل بيلهد
مقعمزين التريس كلها .. سعيد ميلاد مقعمز مع الجدر وجلال وومجموعه من اقاربه والشيابين كلها
حتى كمال وخالد مقعمزين معاهم عازمينهم عالخيل
واكحيلة داير لحية متع العراسه .. ومقعمز مع سلطان وخوه وحيد والشباب من جهه ثانيه
وجماعه الخيل يجهزو فالعقد بيلهدو …
وصلو حوش ونيس …ونيس وخوه رحمونى وولده ايوب ..ومجموعه من صغار خوته
وقف سليمان رحب بيهم ..وطبعا الكل عندهم علم ان ايوب بيجى بيما فيهم صغار عبدالعاطى
سلم عالتريس كلها وصلو فى خالد
-ايوب : السماح بيناتنا يا عمى خالد
-خالد : السماح بيناتنا
واضبطو بعضهم وقعمزو …
وايوب قعمز جنب وحيد يتعرف عليه لانه يعتبر من عمره
وبدى الخيل يلهد والناس اتشجع
-سعيد : لما كنت انا كان الخيل يرقص رقيص
-الجدر : راحت عليك يا حاج سعيد
-جلال : لاااا عز الشباب الحاج سعيد
-سعيد : تعاندنى يا ابراهيم ونرقو الخيل
-الجدر : دونك يا سعيد والله مانولى فيها
وناضو الكبارية سعيد وابراهيم الجدر وكمال وجلال وخالد وونيس ومعاهم مجموعه ثانيه ….
وركبو الخيل ودارو صف وبدو يلهدو
-وحيد يضحك : انشالله غير بوك مايطيحش ينكسر
-اكحيلة : ياواقى فى هالعرس
وجايبيين مصورين يصورو فالعرس فيديو وثابت
ودارو جو هادوكا الشيابين …
والساعه 10 فالليل رفعو القفه …ودارو بالعروسة بحولى الحصيرة السبع دورات …
ومدولهم الراقى والقنين ..حتى من صحون الحار مدوهم
واحكيلة مش مبطل على ملاك مكالمات حب وغزل
وهيا قريب اطير من الفرحه …
حتى نتيجه امتحانها متع الثانوية ماطلعتش وهيا لا شاغلتها ولا مدورتها لاهيه بعرسها وبعمك اكحيلة وخلاص ????

______________________________

تمت …ويتبع ?

يوم الخميس الحفله …

نحكيهالكم فى حلقه غدوة انشالله

نحبكم ❤

.
.
.
.______________________________

ياودى حسكم سخفتونى …
نكملو يوم الحفله ونسكرو الحلقه وخلاص ???

يوم الخميس الحفله ❤

ملاك ناضت من الصبح وتت حوايجها فى شنطتها الصغيرة اللى بترفعها معاها للمزينه
وبكت ماغسلها على طلوعها من حوش بوها ..بكيت كل بنية فى هداكه اليوم
ومشت للمزينه ونفس الشى اكخيلة معاها عالفون اولا بأول
-ملاك تضحك : ياحليلى معش تكلمنى ..نبيك تستاحشنى
-اكحيلة يضحك : منقدرش .. نخاف عليك لازم نكون معاك اولا باول ??
-ملاك : شنو ادير
-اكخيلة : مزال راقد فمكانى
-ملاك : تى شنو تقول انت الساعه 10 نوض
-اكحيلة : انا لا بنزين ولا بنمكيج .. بعتالى بنمشى لاستراحة سلطان بنلبس غادى دايرين شوا وجو وجايبيين زكرة
-ملاك : اما انتو جو عليكم
-اكحيلة : عرس اكحيلة راهو ..انتى مزال ماتعرفيش اكحيلة كويس
-ملاك : خوى منير قالى امس زى المهرجان
-اكحيلة : تى حتى بوى اللى ديما مريض رجعتله صحته وركب عالخيل يلهد
ملاك تضحك ..وتسمع فيهم ينادو ..ملاك ..يا ملاك
-ملاك : خلاص باى حبيبي ينادو فيا
-اكحيلة : باهى اسمعى
-ملاك : نعم
-اكحيلة : نحبك هلبا
-ملاك تهمس: وانا اكثر باى باى
ومشت للبنت اللى مع المزينه تنادى فيها

_______________________________

فالعشيه مشى اكحيلة لاستراحة سلطان
لبسوه وتكموه وجابوله الحلاق ..
وضربتلهم الزكرة …
ورقصو الشباب اكلهم …وحيد طبعا مابطلش رقيص
ورقصو سلطان …وجابو اكحيلة رقصوه حتى هوا
قيس المغرب ركبو السيارات ومشو للاستراحة اللى دايرين فى ساحتها العرس
لقى بوه متكم الامور …
ووحيد متفق مع فرقه مالوف صغيرة جايه وباديه تعزف …
والشيابين كلها مقعمزين ….والفرقه تعزف
وجى اكحيلة قعمز بعيد على بوه متحشم منه زعميتا
وقعد العزف قريب للساعه 10 فالليل
بعدها ناض اكحيلة ركب السيارات هوا وخوه وحيد وسلطان وجماعته بيجيب العروسه

___________________________

اما ملاك خشت للصاله متع فندق المهارى الساعه 9
فيلوها فخم ..وطرحتها حطه خليجيه …
وشعرها اسود مادارتش ميش …
ومكياجها متع عرايس قنين …
وفاتحيلها زفه خليجية وهيا خاشه بباقه الورد وتحيى فالناس …
وصلت للتخت متاعها وسليمه رجل برجل هيا وياها مش مسيبتها بكل والبخور فى يدها
كملت الزفه وبدو الزمزامات يضربو عاد
هاللى حازك يا شمامه انشالله مبروكات ايامه
ورقصو صاحباتها ونساوين خوتها ومدو الروزاطه والعبمبر ومدو النسكافيه معاه تورتة على كل طاولة …
والعشى داروه منسف باللحم والحاجات الحارة

ووصلت الساعه عشرة ونص ووصل العريس

طلعته للغرفه بيش تخش هيا وياه
وشافها .. وعجباته وكبر على جمالها
-اكحيلةة: محلاااك ..قل اعود برب الفلق
-ملاك تشبح لعيونه : وانت زى القمر يا روحى ربي يحفظك ليا
-اكحيلة مد يده : هيا نخشو لصالتك بسرعه ونطلعو ..معش عندى صبر نقعدو مع الناس ..خلاص نبى نقعدو بروحنا
-ملاك : هيا …
وحطت يدها فى يده وخشت هيا وياه للصالة بالتدريجه الخليجيه
طبعا هوا شخصيته مش عادية البنات كلهم حلو فمهم فيه
ومريم تشبحله بعين الحسرة
وسيرين تشبحله ومتمنيه نفسها هيا اللى شادة فى ايديه
قعمزو شويا …ووقفو فتحولهم اغنيه انا كلى ملكك متع شرين …
وجابولهم التورته وقصوها …
وخداها وطلع ….
ركبها فالسيارة ومشو معاها زينب وسليمه فى سيارة وجماعته هوا فى سيارة
وصلو للحوش …روحو المرافقين …
وخش سليمان وملاك للحوش

________________________________

الحوش طبعا فاضى …بوه قاعد فالاستراحة مارجعش للحوش
ماهناك حد الا هما الزوز….
ركبها من الدروج المخصص ليهم للدور الثانى
وهوا فى قمه الفرحه والسعادة
وصلو قدام الباب
-اكحيلة : خشى بي رجلك اليمين يا اميرة الحوش
وملاك تصفق مع بعضها ..رهبة كل عروسه اول ليله
ومشو فالممر …
خشو للصالة …
-اكحيلة حط يده على ايديها : اهدى ..خيرك
-ملاك فمها يرعش: لا شى غير صقعانه
-اكحيلة : انطفى المكيف
-خشت ملاك قعمزت عالصالون : ايه طفيه
-اكحيلة : حاضر
وخدى الجهاز وطفى المكيف ….وحول دجاكته
وقعمز فى جنبها ومسك ايديها
-اكخيلة : كلهم حاسدينى فيك
-ملاك فرحانه : انا اللى حاسدينى فيك يا عمرى
قرب منها وباسها على شفايفها بوسه بسيطه ..
-ملاك واطت راسها : سليمان
-اكخيلة : يا عيون سليمان …
وقاملها راسها بيده : متحشمه منى
-ملاك : لا مش هكى لكن اصبر
رجع يبوس فيها
-جبدت ملاك نفسها بدلع : حول ?
-اكخيلة : تعالى نخشو دار النوم
-ملاك : ايه احسن …
وناضت وقفت مشت طول لدار النوم خشت فيها
قعد حاير فيها هوا شن هالسرعه والرضوخ طول ?
لحقها للدار ..فتح الباب لقاه مسكر بالمفتاح
-اكخيلة يضحك : افتحى
-ملاك ورا الباب : اصبر لين انغير حوايجى
-اكخيلة يضحك : ونهون عليك نقعد ملوح برة
-ملاك : حبيبي اصبر شوى باهى
-اكحيلة : منين نجيب الصبر معش عندى
-ملاك : باهى شويا بس
ومشت قعمزت عالسرير وتحرك فرجلها بطريقه سريعه من التوتر ?
– رجع سليمان يطق من جديد : حبيبي وينك
-ملاك : باهى غير اصبر شوى بس
-سليمان : ملااك افتحى
خافت منه وفتحت طول …
-سليمان : مش قلتى بنبدل !!?
-ملاك : ماهو انت اطقطق بالقوة خلعتنى
-سليمان حط يده على كتافها : غير تعالى تعالى ..انتى شكلك خايفه منى ..
-ملاك ترعش: لا والله مش هكى
-سليمان : غير اهدى بس …ونوعدك والله مانقربك الا وانتى راضيه ..صح انا غلطت وتسرعت ومتحكمتش فى نفسى
-ملاك هدت شوى : بلكى زعلت منى حبيبي
-اكخيلة : انا نزعل منك انتى يا عمرى ..
وقعمزو عالسرير واضايقت هيا من الفيلو كبير هلبا
-اكحيلة : اوقفى نفتحلك السريته من الخلف نعاونك
-ملاك : باهى …خلى نحول الطرحة والتسريحه هما الاولات
قعمزت قدام الشكماجه وبدت تحول فالتسريحه …وقف وراها اكحيلة وبدى يحول فالتوكات من شعرها ….
وهوا يحول فالتوكات طاح شعرها على ضهرها
قامه بين ايديه وبدى يشم فيه : محلااااك
ضحكت ملاك …كملت تحويل التوكات
وفتحلها السوسته وشبحتله : ممكن بس شوى نغير
-اكحيلة : اهاا قصدك نطلع ..مش قالو المتزوجين يبدلو قدام بعضهم
-ملاك : منك نسمع ..ماحد قالهالى
وقعدو يضحكو …
-اكحيلة : حاضر حنطلع .بس معليش تغسليه المكياج ..انا حاب نشوفك على طبيعتك زى مانعرفك
-ملاك : حاضر
وبالفعل طلع اكحيلة للصالة ورد الباب …حولت هيا الفيلو ولبست روب …
وخشت للحمام اللى فالدار وغسلت وجهها …
خش اكحيلة للغرفه حول احوايجه وبدل قدامها …
-اكحيلة : تبى تاكلى حاجه
-ملاك : لا ماخاطريش
-اكخيلة : خلاص امالا بنطفى الضى ..تعبانيتدن وبنرقدو
-ملاك بخجل : باهى
وطفى اكخيلة ضى الدار وخلى ضى الصالة بس مفتوح …
ورد باب الدار خلى ضى بسيط خاش فيها
ورقد جنبها ….وتهنت العروس

وثانى يوم بعد الضهر طيارتهم …سافرو للمغرب
ومن المغرب لاسبانيا …وبعدها ايطاليا
عاشو احلى شهر عسل

_____________________________

تمت ….ويتبع

انشالله انكون حكيتلكم صح ..حلقه اطول من ليلة بلا عشى ????
وشكر كبير كبير اااااد الدنيا لفانز قروب للسيدات فقط على منشوراتكم الحلوة وتفاعلكم مع الرواية …نلقانكم مش عاديات

نحبكم ❤