رواية اكحيلة

#اكحيلة

??للكاتبه زهور جمال الدين ??

?الحلقه السادسه عشر ?

فالمستشفى …

سلطان : مدامه الدكتور طمنا وحالته افضل نستادن توة انا
-منير: ادنك معاك ياسلطان
-الدكتور : خوى مفيش داعى لوجودكم هنايا حتى انتو ..نخاف مالشبههة وانت تعرف
-كمال : معاك حق تو نقوللهم ايروحو
-الدكتور: خاصة النساء ..انت تعرف احتمال تدهور حالته وهما ما يتحكموش فى مشاعرهم
-كمال : اوكى تمام
سلطان طالع من الممر تلاقى هوا وزينب اخته وبناتها سلم عليهم ونزل

خشت زينب هيا وبناتها
-سيرين : خيره عمى يا بابا
-زينب خشت طول لمريم : خيره خالد يا مريم الف سلامه عليه
-منير : مافيه شى انشالله يا جماعه الخير .. طلقه جت فيه بالغلط
-اميرة : اااه مضروب بالسلاح ..ومن ضربه
-ملاك : ماتخافوش الدكتور طمنا عليه توة
-كمال : هيا كلكم بالكامل روحو للحوش توة
-مريم : انا مش طالعه يا كمال لين نطمن عليه
-ملاك : ولا حتى انا مستحيل نروح ونخليه
-كمال : اييييح علينا عااد … تبو نفهمكم بالعربي ولا كيف ..كلمهم يا منير
-منير : خالد مضروب بطلقه رصاص .. ومفروض ايجو ايحققو معاه .. لكن احنا مدرقين الموضوع والدكتور مايبيش شوشرة على نفسه
-مريم : ياناس منقدرش نطلع ونخليه
-كمال : الاولاد وينهم
-زينب : مزردين مع بعضهم مع صحابهم
-كمال : احسن ومفيش داعى تكلموهم لين ايروحو بروحهم
-مريم : كيف منكلمهمش نقوللهم بوكم انضرب وفالمستشفى
-كمال : ومنين تضمنى الولد اللى ضربه يسكت
ومايردهاش فالاولاد ..حتى احنا ضربناه برصاصه لما هوا ضرب خالد
-منير : انت كنت معاه
-كمال : ايه
-منير : امالا ليش جابه اكحيلة
-كمال : قصه طويلة
سيرين سمعت اسم اكخيلة ركزت فالدوة تبي تفهم
وهدا كله مزال ماسمعتش انه خطب عمتها ???

_______________________________

فى شقه وحيد
-ايناس : محلاها الشقة
-فضيلة : ادير فيها غير الافراح ياوليدى
-وحيد : اهو اول فرحة دخولك انتى ليها يااام
-ايناس: لا لا بنديرولك انت عرس فيها
-فضيلة : العرس بيديره فى هالشقيقه الصغيرة
..بسلامه حوش بوه بر وبحر
-وحيد يضحك : معش فهمناك تبي تشكرى بوى ولا تبى ادميه
-ايناس تضحك: والله خديتها من لسانى
-فضيلة : بوك شن بنشكر فيه عزى معزى .. انا نشكر فيك انت ياوليدى عندك حوش اهل كبير وواسع ادير فيه كان الفرح
-وحيد يشبح لايمان : هااى نحن هنا
-ايمان : نسمع فيكم ..غير الباين انى بنستبرد ..وين الغرف بتاعنا نبى نخش نرقد
” وهيا يانارى تخمم فى سلطان اللى من يوم خدى رقمها معش تلفت عندها ”
-وحيد : هيا الشقه توة فيها دار نوم وحدة بس .. غدوة نطلعو وناخد لكل وحدة فيكم دار نوم ..والدار الاصليه خلوها لامى ..وحتى هيا حنغيرها
-فضيلة : متكلفش على روحك يا وحيد ..حتى الموبيليا هادى نرقد فيها انا والبنات
-وحيد : لاا يمى ..وانا شن وراى ..تو نتكمهالكم ..غير انتى اصريتى تطلعى اليوم يادوبك نضفتها وخلاص ..لكن الاثاث والمطبخ ضرورى يتغيرو
-ايمان : انا من عندى تصبحو على خير ..
وخشت دار النوم …فتحت شنطتها وطلهت بيجامه النوم لبستها ..وفكت شعرها ..نزلاته تحت
وشرين تليفونها …شافت من لقاته سلطان
قلبها قريب طلع من مكانه

_____________________________

فى حوش الجدر …

وصل اكحيلة لحوش ابراهيم الجدر
تلاقى هوا وجلال قدام الباب.. خداه بالاحضان
-جلال : اهلا بمديرهم كلهم
-اكحيلة : اهلا بسيدنا كلنا
-جلال : والنعم بيكم كلكم سيدنا ربي
-اكحيلة : ماشالله وصلت بسرعه
-جلال : سيارتى صحراوية وتجرى واجد
-اكحيلة : شن العمل اللى صار هدا
-جلال : تعالى خش الداخل وتو نحكيلك اسكت ساكت
وخشو للحوش ..لمكتب الجدر طول لقوه يراجى فيهم
قعدو يهدرزو وحكو لاكحيلة اللى صار كله …
-اكحيلة : يا جماعه الخير الولد صغير لكن تفكيره كويس ..والكلمه الطيبه صدقه
-الجدر: حتى خالد نسيبى عصبي هلبا
-جلال : انا حرت فيك ياحاج قدمته هوا ..مفروض خليت سلطان هوا اللى يتكلم
-الجدر: سلطان الناس ضيوفه ..مقدرتش نحطه فى موقف زى هدا
-اكحيلة: عموما ونيس قريب يوصل تو ندوي معاه انا
-الجدر: ولده كيف صار فيه
-جلال : ضربته بسيطه فى رجله
-اكحيلة : قال رفعه لمستشفى الزهراء وطلعوله الرصاصه
-الجدر : ياريتها جت فى دماغه وافتكينا منه ..تحسابه بيسكت انت توة ..كان ماتنوض حرب بينه وبين صغار عبدالعاطى
-جلال : لا الله لا تقدر ونيس نعرفوه اعقل من هكى
-الجدر: ونيس نعرفوه لكن ولده لا
-اكحيلة : لا لا بادن الله مايصير الا خاطرك طيب
-الجدر : انشالله
جى الشاب متع الحراسه اللى عالباب برة
-الشاب : ونيس وصل
-الجدر : من معاه
-الشاب : بروحه
-الجدر: خليه يخش

_______________________________

سلطان مقعمز فى سيارته فى بيركيدجو الطبي
..متكى الكرسى للخلف ويكلم فى ايمان …

??♩?

-سلطان : تو ليا ساعه وانا نشرحلك فى ضروفى خلاص عاد ..قلتلك اعدرينى
-ايمان: لا لا براحتك .. مفيش حد جابرك عالاتصال
-سلطان يضحك : هى شوفى هى..قلتلك والله جونى ضيوف من الشرق مافضيت نحك راسى
-ايمان : انا ماحاسبتكش
-سلطان : على هالحال معناها مش حتقدرى تتحملينى ..ولا حتقدرى تعدرينى ..لان انا باستمرار هدا حالى
-ايمان : لو حطيتنى فالصورة نعدرك ونخليك براحتك لين تفضى ..بس هكى مانعلم عليك شى مجرد انك خديت الرقم ومشيت
-سلطان : ممكن فى هادى معاك حق …ووالله كنت بنكلمك بنقولك …
-ايمان : باهى علاش ماقلتليش
-سلطان : حسيتها بايخه اول مكالمه بينا نتعدر دقيقتين ونسكر
-ايمان : باهى معش تعاودها ..ولما تبدا لاهى قولى
-سلطان يضحك: حاضر ومن عيونى
وقعد يضحك …
-ايمان ?: خيرك
-سلطان : عمرى ماتخايلت نفسى نرضى فى بنت ونترجا فيها
-ايمان : اهااا…تستاهل ???
-سلطان : المهم رضيتى
-ايمان : اممم رضيت
-سلطان : باهى وين الضحكة
-ايمان بتسهويك : هاهاها سمعتها
-سلطان : نجيلى الضحكة ومولاة الضحكة
وطقطق روشن سيارته بالقوة

____________________________

-منير: اهم طلعو ..احكيلى كيف صار
-كمال : كنا فى اجتماع مع الجماعه ..وتناقش خوك خالد مع واحد منهم واحتد النقاش وانضرب خالد بالسلاح
-منير : باهى وبعتالى
-كمال : وبعتالى انا قمت السلاح وضربت اللى ضربه بطلقه
-منير: وين جاته الضربة
-كمال : فى رجله
-منير: هوا منهوا اللى ضربه
-كمال : واحد وخلاص مفيش داعى لدكر الاسامى
-منير: تى كيف مفيش داعى شن تقول انت يا كمال ..انا مش خوكم ولا كيف
-كمال: خونا …لكن هادى حاجات انت مابيتش تخش فيها بارداتك
-منير : تى خوك مضروب بالسلاح يا راجل شن تقول انت
-كمال : اووووه علينا عاد .. قلنالك اطلع منه يا منير ..

____________________________

غادة رقدت الصغار فى غرفتهم …وجت للصالة دايرين زى الريسبشن وقدامه كراسى يطل ع المطبخ ..خشت منه بضم حوسة العشى …
جى هشام قعمز على كرسى
-هشام : عندك نسكافيه واتى
-غادة : خلى نشوف ترا
وفتحت الثلاجه لقت عندها فازو نسكافيه مخدوم
-غادة : ايه فى شوى اهو تو نسخن حليب
-هشام : ملاك ما كلماتكش بعد ماروحت
-غادة : لا لا ..قلت خلى تو تكلمنى هيا
-هشام : شفتى الصدف ..هيا صاحبتك وهوا صاحبى
-غادة : تعرف كانا صاحبك يحصل ملاك ماخلى ربي ماعطاه
-هشام : انا متاكد منها كويسة ..لانك كويسه ومعندك طيب ومش حتصاحبي الا اللى زيك
وشبحلها : وحتى انتى ياسعد اللى بيطيح فيك
-غادة طلعت فازو النسكافيه من الثلاجة وتضحك : اهو انت طحت فيا
-هشام : لاااا حرام عليا ندفنك معاى ..انت تستاهلى واحد احسن منى
-غادة طاح منها فازو النسكافيه : انت شن قصدك
وصوت طيحت الفازو وتكسيرته كان قوى هلبا
-هشام : بسم اللع العظيم
-نزلت غادة تلم فيه : اسفه مش قصدى
-نزل هشام من الكرسى ولف خش للمطبخ : غير بالشوى ايديك ينجرحو
-غادة عيونها مدمعات : لا عادى حصل خير
هشام عنده نيه يضمها لما شاف عيونها مدمعات لكن مقدرش خافها تصده …
وقف : باهى براحتك ….وطلع من المطبخ …خش لداره …

______________________________

روشن سلطان طقطق بالقوة
وتلفت مخلوع يلقاها اميرة بنت اخته ..حول التليفون من ودنه وفتح الروشن
-سلطان : بسم الله فجعتينى
-اميرة : انت شن ادير هنايا يا خالى ..مش نزلت من بدرى
-سلطان : وانتى شن دخلك ..وين امك
-اميرة : ماما فالسيارة مع سيرين وانا شفتك جيت طقيت عليك
-سلطان : لا جيتى فجعتينى مش طقيتى عليا
-اميرة : تى باهى وانت بديت حساس معش متحمل شى ..
ومشت خطوة وبعتالى رجعتله : انت فى من تكلم بالطريقه الرومنسيه هادى فالليل
-سلطان يضحك : قولى لزينب قالك خوك لمى بناتك خير ماندير جريمه
-اميرة تضحك : باهى نبيش نعكر عليك ..وغمزتله : كمل مكالمتك وسلملى عليها
-سلطان يضحك : والله ماتتحشمى خالك اكبر منك
-اميرة تضحك : باهى باااايات توة
ومشت للسيارة ركبت مع امها وسيرين
قام سلطان تليفونه : الووو
-ايمان تضحك : منو هادى
-سلطان : اميرة بنت زينب اختى
-ايمان : انت وين فى حوشهم
-سلطان رجع اتكى عالكرسى: كانا نقولك انا وين تستغربي
-ايمان : وين !!
-سلطان : فى مستشفى الطبي
-ايمان : بلحقه ?.. وشن ادير فيه
-سلطان : خالد ولد عمتى انضرب برصاصه وجابوه هنايا داروله عمليه
-ايمان : قصدك خالد خو ملاك
-سلطان :ايه خو ملاك ..وماعلينا منهم توة..المهم انتى كيف اخبارك
-ايمان : تمام الحمدلله اخبارى كويسه مدام سمعت صوتك
-سلطان : ايوووه اهوا الكلام الحلو اللى ناقصنا ونبو نسمعوه
-ايمان : والله

وقعدو يهدرزو وولع سلطان سيارته وروح لحوشهم وهوا يحكى معاها طول الطريق

____________________________

فى حوش الجدر خش ونيس …وتكلم معاهم كلهم واعتدر عن تصرف ولده
-ونيس: شباب طايش ..الله غالب امسحوها فيا
-اكخيلة : الراجل قريب رزاه فى عمره وتقولى امسحوها فيا
-ونيس : حتى هوا ضربوه يا اكحيلة وتمشى هادى فى هادى وخلاص
-اكحيلة : شوف كمال لما تهور وضربه وين صاوب
..ضربه فى مكان مايرزيش فالعمر
-ونيس : والله شن بنقولك توة عاد.. انتو الموس وانا اللحم
-اكخيلة : يبقى الامر كما هوا عليه الان ..وتاخدو بعضكم وتروحو لبنغازى ولا كأن حاجه صارت ..وبعد شهر نتلاقو عند جلال
-ونيس : تم الكلام..امالا نشوفوكم بخير
-الجدر : فى حفظ الله …
وطلع منهم …وقعدو اكخيلة وجلال يهدرزو للساعه 3 وروحو …
لما جو بيروحو اكخيلة قعد شاد فى جلال يجى يبات عنده لكن جلال رفض وقاله بنشد الطريق وبنروح نوصل قبل مالشمس تقوا
.
.
.____________________________

غادة لحقت هشام للدار جابتله نسكافيه جديد خدماته
طقت الباب
-هشام : تفضلى
-غادة خشت لقاته مولع السهارة فمحبتش تفتح الضى : جبتلك نسكافيه
-هشام : ليش متعبه روحك مدامه هداكه تكسر خلاص
-غادة : لا عندى غيره عادى …
حطت النسكافيه وجت بتطلع وصلت لفم الباب …
-وتلفتتله : قتلك
-هشام قام راسه : نعم
-غادة: شن قصدك بالكلام اللى قلته بكرى شوى
-هشام : انك تستاهلى احسن منى
-غادة عيونها دمعو ثانى : ايه
-ناض هشام من مكانه قرب منها : لانى توة عاشرتك وعرفتك .. انتى انسانه قمه فالروعه ..وتستاهلى تمونى سعيدة
-غادة : ومنو قالك انا تعيسه
-هشام: شكلك وتصرفاتك
-غادة حطت يدها على خدها : خيره شكلى مش حلوة
-خدى هشام يدها وباسها من كفها: بالعكس زى القمر
رعشت غادة مع بعضها وحست كأنه يعاكس فيها
“ماتقوليش راجلها ??? ”
-غادة: بااهى مش مشكلة دير الىى يريحك
-مسك هشام يدها : خليك
-غادة : بنشوف اياد خليته رقد وهوا يقولى صقع
-هشام جبدها ليه وحط ايديه على كتافها : وبو اياد يقعد هكى ملوح ما يحسش بالصقع حتى هوا
-غادة : حول هشام شن صارلك
-هشام : ليش بنحول هدا مكانك الطبيعى ليش تبى تطلعى
-غادة فكت نفسها : قلتلك حول
ومشن تجرى لنهايه الممر خشت غرفتها من رهبة الموقف لان هشام اول مرة يطاول عليها هكى

“كله من اكحيلة الحلقه اللى فاتت قاله كون جرئ?”

___________________________

وصل اكحيلة لحوشهم قيس الفجر ….
يبي يكلم ملاك ..لكن سخفاته قال خليها راقدة توة
غير حوايجه .. وجى اتكى على سريره
تعبان يبي يرقد ..ومع هدا مشاعره غلباته واتصل بيها
-ملاك : حبيبي قاعد ساهر
-اكحيلة : والله كيف وصلت للحوش توة تصدقى
-ملاك : تصدق ماجانيش نوم ..بنكلمك قلت حرام خليه راقد
-اكخيلة يضحك : هاهاها والله نفس الكلمه ..قلت حرام عليا خليها ترقد شوى
-ملاك : القلوب عند بعضها
-اكحيلة : طبعا عند بعضها ..
-ملاك : انت وين كنت لتوة
-اكحيلة: كان عندى شغل وعطلت ..وكان نقولك من كان معاى
-ملاك : شكون
-اكحيلة : خالك جلال
-ملاك استغربت : انت تعرف خالى
-اكحيلة : جلال من اعز اصدقائي
-ملاك : سبحان الله الدنيا مصغرها
-اكخيلة : ريتى ولا محاصرك من جميع الاماكن
-ملاك : باهى توة جاوبنى ..انت وين لقيت خوى خالد وقت انضرب ..وشن جابكم لبعضكم ..الامر غريب ولا
-اكخيلة : شدى عندك القصه الصح ..انا فايت فالطريق ..نزلت على كشك دخان بنشرى منه باكو ..سمعت زوز يتعاركو تلفتت نلقى واحد منهم خالد ..فى تلفيتى انا ضربو بعضهم بالسلاح ..خديت انا خالد وطرت بيه للمستشفى
-ملاك : ايه زى اللى صدقتك
-اكحيلة : باهى هدا اللى صار ..بنكدب ونجيب قصه ثانيه بيش تصدقينى
-ملاك : توة كان بمن نحلفك القصه الاصليه ماك قايلهالى
-اكخيلة : خلاص امالا ليش اتعبي فى روحك
-ملاك : صار فيه حق قصه اصليه
-اكحيلة : اهيا اللى حكيتهالك توة
-ملاك تضحك : انت مفيش فايدة فيك
-اكحيلة : نقصى صوت ضحكتك الحلوة …الحكايه فجر والناس مسكته ..ومانيش مسؤل عن اى تصرف نديره توة
-ملاك تضحك : ادير عينك
-اكخيلة : توة شوف هى ..اتزيد تضحك ..بيش انا نتهور

وقعدو يهدرزو ويضحكو لين ادن الفجر

_________________________________

بعد اسبوع

خالد طلعوه من المستشفى لحوشه
ودرقوها عالناس حكاية ضربته بالرصاصة
وهوا متكى فى داره قام التليفون واتصل
-خالد : الوووو
-اكحيلة: اهلا خالد ..كيف حالك وحمدالله على سلامتك
-خالد : شنو تقولى فيها فالتليفون امالا ماتبيش تجينى
-اكحيلة : لا مش هكى والله ..لكن انت روحت للحوش..ومطمن عليك من الجدر ان احوالك باهية
-خالد : هما كلمتين ..يا بتجينى يا نجيك
-اكخيلة : لا حقك علينا انت نجوك
-خالد : خلاص امالا صلى العصر وتعالة نراجى فيك
-اكحيلة : بادن الله بعد العصر نكون عندكم
مالاول كان يبي يقول لملاك ..بعتالى قالك نشوف كلامه وين يصب بعتالى نخبرها
وبالفعل صلى اكحيلة العصر ومشى لحوش عيت عبدالعاطى
خش للمربوعه البرانيه …لقى منير وخالد ..وامين ولد خالد ..
خش من الباب
-اكحيلة : السلام عليكم
-الجميع : وعليكم السلام
مد يده سلم على منير وامين ..ولما وصل فى خالد
-خالد : بالاحضان يا اكحيلة
حضنه سليمان وسلم عليه ..وقعمزو
-خالد : يا منير ترا وصلينا على شاهى اخضر
فهم منير انه يبيه يطلع
-منير : حاضر تو نوصيهم …هي نستادنكم انا
-اكحيلة : بدرى
-منير : بدرى من عمرك ..والله عندى موعيد
وطلع هوا وامين وخلى خالد واكحيلة بروحهم

_____________________________

خش منير للحوش الداخل
-منير : ترا ديرو شاهى اخضر
-زينب : كم شخص
-منير : خالد ومعاه اكحيلة
سمعت مريم الاسم انتفضت …
-مريم : اهو تو ندير انا
ومشت سليمه تجرى لدار ملاك ..بتخبرها كيف عاد
خشت مريم للمطبخ …
-سالمه : شنو تحبى ندير
-مريم : لا لا غير وتيلى السفرة اهو تو نطيب انا
-وخشت ملاك للمطبخ : من عندنا
-مريم : ضيف
-ملاك : اهاا ..وجت بتطلع من الباب
-مريم : ملاك
-ملاك : نعم
-مريم : لا لا شى
-ملاك : شن فى يا ابلة مريم قولى
-مريم : لا لاشى
وطلعت ملاك وقعدت مريم تخمم فى خاطرها : البنت تضحك من عيونها ..زعما تعرفه …زعما عندها علاقه بيه هدا علاش خطبها …
حطت نعناع فالشاهى : لا لا شن جاب سليمان لملاك ..وبعتالى منصدقش ان سليمان يكلم بنت
وتلفتت للروشن وتخمم: هوا فالاخير بيتزوج ملاك ولا غيرها ..ماهو ياخد ملاك ويبدا راجل حماتى وامتى مانبى نشبحه ..خير ماياخد وحدة مانعرفلهاش خليقه ومعش نلقى كيف نشوفه
لمعت عيونها : صح صح ..ملاك اولى بيه مدامه فكر فالزواج عالاقل نشوفه امتى مانبى وضربه خالد جت فى صالحى ..عالاقل نحاول نقنعه
-ملاك : ابله مريم الشاهى فاض
-مريم ضحكت : انتى مش طلعتى
-ملاك : ورجعت وانتى ماحسيتيش بيا
-مريم : ملاك منسئلك ..انتى كنتى بتوافقى على اكحيلة لولا راى خالد ..والا انتى اصلا رافضاته
-ملاك : وليش بنرفضه ..لكن ناخده وخالد رافض مستحيل
-مريم : اهاا يعنى انتى موافقه
-ملاك : بصراحه ايه

______________________________

فالمربوعه …
جابولهم الشاهى …

-خالد : تعرف انا ليش ناديتك اليوم
-اكحيلة : ليش
-خالد : نبى نتعدرلك على سبب رفضى موضوعك اللى كلمت عليه كمال على اختى
-اكحيلة : طبعا يهمنى نعرف السبب
-خالد : مايخفاش عليك يا اكحيلة اننا احنا كلنا مجرمين ..وتجارتنا تجارة مجرمه
-اكحيلة : انا عطار يا خالد
-خالد : اياً كان ..بس منختلفوش اننا شبهه ..كلنا بدون استثناء
وتلفتله : لكن اختى طاهرة ..نقيه ..نبيها تتعرف على واحظ خارج جونا …وانا نفرحلها …لكن واحد جوه نفس جو خوتها ..ياودى ماكنتش نتمناهولها من لما كانت صغيرة
-اكحيلة : الاخت اختكم وانتو حرين فيها
-خالد : غير رد بالك تزعل
-اكحيلة وقف : تبى الحق ..لاااا بنزعل ..ترفضنى وتقولى متزعلش
-خالد متحشم من جميله : تى ماهو انا فهمتك يا اكحيلة
-اكخيلة : شغلنا حاجه ونساوينا حاجه ثانية ..واختك لو عطيتهالى حنحطها فعيونى الزوز …وحنحافظ عليها ..لانها بتولى شرفى
-خالد : مفهمتش قصدك
-اكخيلة : قصدى انا جاى نخطب فيها منك للمرة الثانية وانت دير رايك
” يا سلام عليه هجمه مرتدة ??”
خالد انفحم مسكين ..يحسابه بيجامله ويقوله براحتك .. شوى قلب عليه الطاولة وقاله زعلان
ماقواه اكخيلة ??????
-خالد : رائي شنهوا عاد ..انا ليا ساعه نشرحلك
-اكخيلة : شرحك كله ماخشش راسى ..هادى ربي جابها بنت عبدالعاطى وكتب عليها تكون بنته واختك واخت كمال اللى اتاجرو فالصنف ..جت قداى انا وتبى تنضفها
-خالد : يا اكخيلة افهم الكلام
-اكخيلة وقف : خالد..انا جاى نطلب منك فى يد اختك رسمى … تشاورو انت وخوتك ثانى ..وشاورو البنيه ثانى ..ورقمى عندكم ردو عليا
خالد فى خاطره : ياريت ماناديتك ?
-خالد : تو نشاور خوتها وانرد عليك
وطلع اكحيلة منهم فرحان ..انه منغير تعب منه حصل فرصه ثانيه

___________________________

خالد ركب لداره متكدر …شدت فبه مريم قالتله خيرك وشن جاك الصبح كنت كويس
حكالها اللى صار بينه وبين اكخيلة كله
-مريم : انت اصلا من مصلحتك انك توافق
-خالد : انا مانبيشى منعرفش علاش..والله غير الجميلة اللى دارها فيا قلت اناديه ونفهمه موقفى
-مريم : عندك علم ان بوى بيورثه مكانه
-خالد : انا اصلا متاكد انه بيورثهوله
-مريم : وليش ميكونش المعلم الكبير راجل اختك وانت خال صغاره
-خالد : مانيش مستحقه
ولكن مريم قعدت تزن وتناقش فيه انه يقتنع …
مريم من مصلحتها يكون اكخيلة راجل حماتها
وطبعا الزوجه ديما اتأثر ..اقتنع خالد
وخبر خوته ..ونادو على ملاك من جديد ..وووافقت ملاك وفرحت بعد مالقت ان خوتها الثلاثه موافقين

سيرين لما سمعت قربب شاطتت فيها النار حست ان البساط انسحب من تحت رجليها لانها ماسمعتش حتى بموضوع الخطوبه الاول
اما اميرة فرحت لعمتها هلبا …

واكحيلة عاد وين تلقيه

-ملاك : انا مش مصدقه يا سليمان
-اكحيلة : لا صدقى ..قلتلك بادن الله انتى ليا
-ملاك : باهى كيف توة
-اكخيلة : كيف يعنى ..توة بنبعت بوى يخطب
..وبعتالى انتى عندك امتحانات ديريهم عالخير وبعدها طول نتزوجو
-ملاك : باهى خلاص زى ماتبى

______________________________

سليمان عنده عماته الزوز وخالته بعثهم يخطبو فيها …
فضيلة رفضت تمشى معاهم لحوش كمال

وبعدها باسبوع جابلهم اكحيلة جاها فيها قريب مية شخص
كلها شخصيات كبار …
جايين يخطبو فى ملاك …
وخوتها حتى هما نادو ناس قوواة وكبار
ودارو خطبه مليحه..
وحددو العرس بعد شهر …فترة امتحاناتها
.
.
بعد ماكملو الخطوبة وعطوهالهم خوتها ..
اتصل اكحيلة بملاك
-اكحيلة : الف مبروك حبيبتى
-ملاك فرحانه : مبروك عليا وعليك يا روحى
-اكحيلة : مش قلتلك انتى ليا
-ملاك : انا ليك انت وبس
-اكحيلة : حتكونى معاى ملكة ..ومفيش حد فالدنيا يدوسلك على طرف
-ملاك : بس موضوع خدمتك منسيتاش راهو
-اكحيلة : مش قلتلك غير كونى ليا ..وماتكونى الا راضيه
-ملاك : يعنى انت عارفنى مزال بناقشك فالموضوع صح
-اكحيلة : لما تناقشينى وانتى مرتى وفحضنى غير لما تناقشينى وكل حد مننا فمكان
-ملاك : باهى نحبك
-اكحيلة : انا خلااااص معش عندى صبر راك دوبتينى يابنت
-ملاك : ولااا انا مزال عندى صبر لكن خلاص هانت مزال هالشهر
-اكحيلة : شهر ويبدا اسمك مرت سليمان
-ملاك : مرت حبيبي

وبدو يوتو للعرس ?

وملاك لا لاهية بقراية ولا بامتحانات …
فرحانه بعرسها وتجرى وتحجز هيا واميرة وسليمه
اما سيرين ماخشتلهاش فى مخيط
سليمان تكم الدور الثانى من جيهة دار نومه ومكتبه ودار صالة ومطبخ صغير وفتح من الباب الخلفى اللى دخل منه ملاك لما جت اتزور فيه
بوه هوا اللى طلب منه هكى ..قاله مدامك تبى تسكن معاى ومتبيش تسيببنى دير للمراءة خصوصيه وديرلها باب بروحها تخش منه …
وغير سليمان هاداكه الحوش كله زواق وسقف معلق خلاه يبرق برق …وجاب دار نوم جديدة واثاث جديد للحوش بالكامل
اما ملاك خوتها عاد قاموها بيها كل واحد عطاها هادكة المبلغ هدية …
وحجزو فى المهارى يوم حفلتها …وحجزو زمزامات يبدو من يوم السهرية …

____________________________

تمت …ويتبع ???

غدوة نحكو على عرس اكحيلة وملاك انشالله

وكانا حتى الحلقه هادى بتقولو قصيرة مانبدا الا فاتحه ملف رسمى فى قرقارش وقولو زهور قالت ??

نحبكم ❤❤?