العنودية والنقيب الشرس – سارة المجيد
مساء الورد واطيابه ع احلا متابعين
#العنودية_والنق
#المحطة_الخامسة
#بقلمي_سارة_الم
???????????
شهلاء ..عوف البيت خرررب بي ماريد منو شي اني اريدك الك …ولك اموت لو صار بيك شي
شاهين ..حظنتها وبجيت ع بجيها حركت گلبي الله لايوفق الوكت هيج خلانه نتبهذل رفعت وجها وبستها من عيونها كتلها بداعتي لتبجين ولج دموعج نار تنزل بضلوعي لتصعبيها علينه الخاطري اخذي الجهال وروحي ويه اهلنه وصدكي مايصير عليه شي ولج اني شاهين الشرس الي خاض كل المعارك وماخفت ولج فتت بالموت لو نسيتي واوعدج واخذي من هل شارب اجي وراكم وماخليهم يسوولي شي وداعة عيونج
شهلاء ..ميخالف هل مره غير .. الناس الي داخلين علينه هل مرة مجرمين ارهاب انجاس مايرحمون بشر ايدهم والذبح واني لو صار عليك شي وداعتك فاتحتي تنصب بالباب اخليها .. وجهالك يتيتمون من اثنينه
شاهين ..لاحول ولاقوة الا بالله ..شهلاء الله يخليج روحي كافي انتي راح اتموتيني بسوالفج هاي مو الدواعش ..الخاطر اسد ولينا روحي خطية بعدهم صغار ومحتاجيج واذا صار عليه شي سولفيلهم ع مصايب ابوهم هههههه سولفيلهم كوليلهم ابوكم استشهد يدافع ع بيتو ومالو الكم ولج اني لو اروح وياكم وعفت بيتي ومالي معناها اني مراة البس فوطة امي واكعد يم النسوان شتحجين انتي ..لاوالله يخسون همه وشورابهم مو شاهين الي ينهزم وربج اواجهم ماسلم نفسي الهم واني مشهودتلي الشجاعة بميادين الزلم ..ادافع عن ارضي و وطني لاخر نفس بيه
شهلاء ..ولك انت ليش مكاعد تحس بالنار الي دتنهش بيه شاهين احنه ماعدنه بعد الله غيرك اذا ذبحوك الميخافون من الله شسوي اني وجهالك وين اروح من بعدك فهمني لتخليني هسه ادك والطم ..حس بيه فدوة لعمرك ولك والله ماريدو للبيت اني اريدك انت ..شصخم بالبيت وانت مابي ولكم اوووف الله راح اموووووت ??..
شاهين .. كلامج ترا ديكطع بيه شهلاء توكلي بالله وروحي لاربيل ويه اهلنه لتخليني اغصبج واقسم عليج يمين الطلاك ..
شهلاء ..حطيت ايدي ع حلكو كتلو كافي شاهين ..راح اروح بس هل شي راح اعتبرو بعتني اني وجهالك الخاطر بيتك ومالك لان اني كتلك ماريد من الدنيا شي بس انت …وهل مرة مو مثل ماصارت احداث 2003 واختفييت واسامحك لان فراقنه صار مو بأرادتك بس هل مرة راح يكون بأرادتك وانت متقصدك اتأذيني بنار هجرك والله حرام عليك .. يعني ذنبي حبيت انسان شرس وعنيف مايخاف الموت شلون فهمني شسوي بروحي
شاهين ..ميخالف حبيبة گلبي بعدين راح تعذريني بس اهم شي اخذي جهالي وروحي ماريد تبقون هنا ..
شهلاء ..ماشي ..ردت اروح احظر جنطنه وغراضنه جان يسحبني بقوة عليه وحظني ودفن راسو برگبتي وكام يبجي عمري مشايفه دمعة عيونو وهسه شفتها حسيتهن تيزاب ونزلن ع رگبتي اني هم ماصدكت شبكتو وطكيت بجي ردت اموت شهكات وغصات ابلعت لوعات تجويني حركتني حرك ..راح تنعاد مئسات الفراق والقهر راح تنعاد عليه اللوعات الضكتهن من قبل من جان بسجن بوكا ولكم ليش هيج ديصير بينه شسوينه حتى نتحمل كل هذا الوجع والعذاب نتجرع الضيم وصبر الفراگ ليشوكت نبقه نصبر مو حتى الصبر هم مل من عدنه ..دفعتو وركضت فوك لميت ملابسنه بالجنط واي شي نحتاجو واخذت اسد ولينا بدلتلهم ونزلت كتلو يله خابر ابويه خلي يجي ياخذنه وياهم احنه جاهزين …جنت احجي وابجي ..
شاهين ..مسحت وجهي وعيوني كتلها عفيه حبيبتي الله يجبر بخاطرج ان شاءالله ..شلت تلفوني ودكيت ع عمي ابراهيم كتلو تعالوا اخذوا شهلاء والجهال وياكم
ابراهيم ..وانت وليدي عجل مراح تجي
شاهين ..وراكم ان شاءالله الحكم عود
ابراهيم ..ماشي يله خلي اتحظر نفسها احنه بالطريق
شاهين ..محظرة نفسها وجاعدة ..
ابراهيم ..ماشي مسافة الطريق احنه يمكم ..
زهور ..شنو شاهين مراح يجي
ابراهيم ..لا هذا يريد يبقه يخاف ع بيتو لاينهب لو يفجروا الدواعش ..هذا دومو بايع روحو ماجاز من حادثة بوكا راح يرجع يعيد المئسات هسه هم
زهور ..الله يستر علي الخاطر بنتي وجهالها اووف منك شاهين هسه شهلاء تنصبلنه مناحه هناك
ابراهيم ..شنو بيدنه عليها ..نصبر والله كريم
شهلاء ..كعد شاهين يبوس بالجهال ويحظن بيهم ويشمهم حسيتو عبالك دايودعنه الوداع الاخير وكعت يم جدمو وتوسلت بي كتلو فدوة اروح لمداسك بقيني يمك لو تجي ويانه اترجاك ..
شاهين ..مسحت عيوني الي غوركن كتلها شهلاء وتالي ويه عنادج ماتكبرين يعني هههههه
ول يابه اسمعي كلامي مرة بحياتج بدون ماتلوعين چبدي
شهلاء ..خليت راسي ع چدمو وكتلو لو بيدي ولا اسمع كلامك هل مرة واعاند للموت بس اااخ منك انت
شاهين ..كومي حبيبي يمكن اجه ابوج يله اتوكلي وادعيلي اجي وراكم ماتأخر ان شاءالله
وكفنه وحظنه بعض والغصة بداخلنه ..
اني قررت ان ابقى لان كلت راح يتفرهد البيت .. هذا تعبي منين اجيب بعد واترسو .. وخفت هذول الكلاب يفجرو .. المهم اني لحيت عليها وكتلها روحي وكوه صعدتها بلسيارة .. و ودعتهم حسيت ان اني ما راح اشوفهم بعد
شهلاء ..من صعدت بالسيارة بقت عيني ع شاهين لحد ماحركت السيارة وطلعنه من المنطقه وغاب عن انظاري شاهين انوب الجهال اعياط وبجي ع ابوهم يردوا واهلي ابتلوا بينه يسكتون بيهم واني هم ابجي صار عدنه عززة بدون ميت …اوووف ع ذيج الايام الله لايعودها اشكال شفنه مصايب وضيم وقهر ..انطلقنه لاربيل احنه وبيت عمي جاسم وطلعنه فد طلعه وعفنه ديرتنه وبيوتنه وغراضنه وناسنة وطلعنه بطرك نفسنه مثل السبايا صدك انسبينه بذيج الايام اووووووف …
وصلنه لاربيل وحجزنه بفندق اخذنه احنه واهلي غرفتين وبيت عمي جاسم هم غرفتين وجان انشوف بيت عمي حازم هم بالفندق رحنه عليهم سلمنه بس ماشفت جليل مو وياهم بابا سئلهم عمو كال جليل بقه يحرس البيت اخاف يتفرهد
ابراهيم ..يالله منهم ذولي ميخافون ع نفسهم هذا شاهين هم بقه وماقبل يجي ويانه ..
شيخ حازم ..اي شيسوون عدهم غيره ع كاعهم وبيتهم خما يسلموها للانجاس حسبي الله عليهم ..مندري منين اجوي علينه الله ينتقم منهم
شهلاء ..طبيت للغرفة حطيت الجنط وطلعت كم هدمة النه بين مانشوف شلون راح نستقر بربيل طبيت للحمام سبحت الجهال وسبحت وبالي يم شاهين ..طلعت ودكيت عليه رد الوووو
كتلو هلا حبيبي ها شنو الاخبار يمك
شاهين ..والله لحد هسه ماكو شي لتخافين انتوا شلون جانت سفرتكم
شهلاء ..شلونها يعني بجي وجهالك ثبروني يريدون يشوفوك
شاهين ..ههههههه ميخالف يعمري اصبري ان شاءالله تخلص وتصير سوالف ونكعد نضحك ونحشش عليها ..
شهلاء ..ان شاءالله يارب
شاهين ..يله حبيبي لتخلصين رصيدج خلي يكفينه منريد نصرفه ع السوالف ديري بالج ع الجهال وسلميلي ع اهلج واهلي ..احبببببج
شهلاء ..اااااخ شعوط گلبي كمت ابجي كتلو اعشششقك واتنفس هواك ??
شاهين ..سديت الخط اوووف حبيبي اعذريني بس والله موبيدي
بقيت اني وبركبتي بيتي وبيت اهلي وجيراني وبيت خالي فارغات لازم احاميهن … الوضع صار من سيئ الى اسوء .. الفرهود كثر والبوك والسلب والنهب .. اول اسبوع الاتصالات جانت موجوده وجنت اتصل ع شهلاء طول اليوم احجي وياها واطمئن عليهم .. الليل طووويل عليه .. واني بهل غربة بطرك روحي لا بشر يمي لا اشوف ناس .. الكهرباء انكطعت .. والوضع مزري مزري مي قليل .. يادوب مال شرب .. عندي سيارة جديدة جنت مشتريها .. شلتها وخليتها يم ولد صديقي .. لان كال اني يجوز اطلع هل يومين لاربيل .. بيني وبين نفسي اني كلت شبقاني هنا .. ما اعرف شوكت انذبح .. بس كلت عيب عليه اعوف مالي ادافع عنه لاخر قطرة بدمي .. هذا هم مال مرتي ومال جهالي وره ما يكبرون ..
شهلاء ..مر ع جيتنه 10 ايام واني يوميه اتصل ع شاهين واتطمن عليه واخلي جهالو هم شوية يحجون ويا لان هذا اسد هواي متعلق بأبو بشكل مو طبيعي
شاهين ..سمعت من شهلاء جليل هم موجود ابيتهم خابرتو كتلو تعال يمي ليش وحدك جاعد ابيتكم
جليل ..شلون اعوف البيت ماكدر رأسا يسطون عليه يبوكوا
شاهين ..ماشي اي شي تحتاج اتصل عليه ماشي
جليل ..ماشي ابن عمي مشكور ماتقصر ..
شاهين ..سديت الخط
و بليلة من الليالي .. بعد تقريبا 10 ايام اني بهذا البيت وحدي .. اجوي الدواعش يسلبون المنطقة .. يردون يبوكون منطقتنه .. والله انجمعوا شباب المنطقة الي باقين كل من بيتو يدافع عن املاكو .. هذول ويا ما نزلوا وضرب طلقات ياهو الي يشوفوا يضربوا .. اني صعدت ع سطح ولزمت سلاحي وكعدت كلت ما منها هذول جايين يذبحون بلناس ..والله واتضارب وياهم .. وياي واهل المنطقة وكذا .. وجان انضرب بطلقة .. بصفحتي .. ضربوني والله وكعت ليوره .. ما مددت .. رجعت تحاملت ع وجعي ورجعت كعدتلهم اتجيت ع بندقيتي واضرب .. الي وكع منهم وكع والباقي انهزموا .. اجوي جوارينه اهل المنطقة الظاهر شافوني من وكعت .. حاولوا يعالجوني ومادري شلون خيطولي جرحي .. بخيط مال ملابس الطلقة الحمدلله ما باقية جانت شطح وطالعة كبل ..
اهل المنطقة كالوا ما نبقى لان هذولي راح يجيبون جماعتهم ويجون ..
اني بقه بالي يم جليل كلت بس لاصاير عليه شي جنت كوه امشي ..والله اخذوني ولد جيرانه ورحنه لبيت عمي حازم ادك بالباب محد يفتح كم مره دكينه الباب كسرناها ماكو ميفتح جليل معقولة راح لاربيل وعاف البيت مستحيل البارحة كتلو تعال يمي ماقبل شنو الفلم ..دحجت ع البيت صاير منخل من اثار الطلقات كمشني گلبي خليت واحد من الولد يعبر من الحايط لان اني ماكدر جرحي مخيط بعدو ..عاد فتح الباب وجان انطب جوه وجانت باب الصاله مفتوحه والبيت مخربط ونصه مبيوك لايالله ركضنه دورنه بالبيت وجان اشوف المصيبة الي وكعت ع راسي وكسمت ظهري نصين شفت ابن عمي واكع ومتغطي بدمو ضاربي الدواعش براسو طلقه وميت اني هنا اختل توازني ردت اوكع من الصدمة مستحيل جليل يموت انهاريت من شفتوا جدامي امدد ومتغطي بدو .. سمعنه صارت مواجهة وطلقات كلولي امشي عوفو ماتكدر اتشيلو واحنه هم نريد نفلت بجلدنه يله ..كتلهم والله ع جنازتي ماعوف جثة ابن عمي روحوا انتوا اني ادفنو واجي ..والله بقوا 2 ويايه شلنا وحفرنه بالحديقة حفرة عميقه وامنا بالكاع مال الحديقة بين ما يجون اهلو يطلعوا ويدفنون بالمقبرة مالتهم ..بس حسيت بكسران ظهر لان هذا ابن عمي صح جان يكرهني ويضوج مني ..بس يبقه من لحمي ودمي ..
والله طلعنه وصلنه لمنطقتنه شفنه الزلم مجتمعه هناك
كالوا ما نبقى لان راح يجيبون جماعتهم هيه الدولة ما كدرت تصمد احنه شلون راح نصمد كدامهم واحنه افراد وحتى عتاد ما عدنا .. اني رفضت اروح كتلهم اني جاعد هنا واقاتل .. كالوا انت اول واحد تروح انت مجروح .. وجرحك يجوز يلتهب عليك مستشفيات ماكو طب ماكو براسيتول شنو البراسيتول ماكو .. زين اني اهلي باربيل اني شيوصلني .. سيارتي ما تروح لان جديدة وبلية ارقام ما يطببوها الاقليم .. بقيتها يم صاحبي .. شفت الناس تمشي واني جاعد والله واجوي شباب من منطقتي كوووه خلوني شالوني شيل وطببوني بلسيارة المنطقة فرغت .. طالعين همه لكركوك .. طلعت وياهم بس عيني ع بيت وحسيت بخجل شلون عفت بيتي .. بس الحمدلله ع كل حال .. الطريق كلو سيطرات مال دواعش بس رحمه من الله ما وكفونه .. جان شافوني مجروح ولزموني ..
وصلنه كركوك .. كركوك قافليها ما يخلون احد يدخللها .. زين الناس وين تولي زين اني شمروني ع شارع وراحوا .. وين اولي وين انطي وجهي طبيت ع كركوك امشي ع رجلية .. رحت للكراج ..
في مكان اخر ..
شهلاء ..وره 10 ايام انقطعت كل سبل الاتصالات حتى انترنت ماكو طبيت ع الفيس اشوف اخر ضهور يوم امس ..يعني من البارحة شاهين انقطعت اخبارة ..لا فدوة شاهين لتسويها بيه وتعيد عليه مئسات سجن بوكا والله هل مرة اموت مابيه حيل هبطات وداعة عيونك مابيه ??
الكل انثبروا محد يكدر يطلع لتكريت يشوف شكو وشصاير هناك بقينه بقلق دمرنه واحنه كلنه بالفندق باقين ومحصورين لانكدر نروحلهم ولايكدرون يجونه ..جنت باليوم الف مرة اموت ..يوميه جنت اطب ع الفيس عسى ولو الاكي متصل قبل ساعة او ساعتين او حتى 5 ساعات بس ردت خيط يوصلني الو ويطمني هوه عايش والله شيب گلبي وتعب من المصايب …بس شاهين ماكو انقطعت اخبارو صارلو اسبوعين هوه وجليل محد يعرف عنهم شي ..اووووف ياربي دخيلك اوكف بجانبهم ورجعهم النه سالمين من كل شر ..
ومرت الايام وعمي وابوية اجروا كل واحد شقه الو لان الفندق غرفتو صغيرة ومتسعنه وهم مصاريف تكسر الظهر …واني وشيماء
كعدنه يم اهلنه مؤقت بين مانشوف شلون تصفه ..ومر ع فراكنه شهر واني جنت يوميه انشر بالفيس منشورات فراك وعذاب وعتب وادردم ع شاهين لان هوه السبب هل مرة لو جاي وياينه مجان صار كل هذا ..
… جنت ابجي واجرع القهر بيني وبين نفسي اخر مرة اتصلت بي وجان ع الفيس من قبل 3 اسابيع وهذا الاسبوع الرابع وماكو هسه لاحس ولاخبر جنت اكولهم خلوني اني اروح واخلي جهالي يمكم محد يقبل كلهم رزلوني وحجوا عليه …عجل شسوي ابقه مجتفه واتفرج ع شاهين وهوه يروح من ايدي ولكم حسوا بيه رجلي مالو خبر ولا اثر محد يعرف عنو شي ااااااه ياربي دخيلك والله هل امتحان صعب وداعتك مادتحملو حبيبي رجعو الي وكحل عيني بشوفتو وداعتك ربي ماريد شي من الدنيا بس رجعلي شاهين تعبت كل مرة اتحمل هل غصات واللوعات من وراك يشاهين بسجن بوكا 4 سنوات شفت الضيم والضلايم جنت ميته وجثة بلا روح وهسه انعادت عليه هل مئسات ياربي عيني ع هل بلاء ??
جنت ابجي وجان يجي اسد يكعد بحظني ويمسح دموعي بيدو ..كال ماما لتبجين باجر يجي بابا ..
اني انتفض گلبي ياربي بلكت هل طفل نطق يممه اروح فدوة لحلكك ان شاءالله يجي ونفرح بشوفتو حظنتو وبوستو واتمددت ونيمتو بحظني ونمت …
في مكان اخر
شاهين ..وصلنه كركوك .. كركوك قافليها ما يخلون احد يدخللها .. زين الناس وين تولي زين اني شمروني ع شارع وراحوا .. وين اولي وين انطي وجهي طبيت ع كركوك امشي ع رجلية .. رحت للكراج .. الدنيا ليل هل حجي شنو اني يوم كامل بلطريق … واهلي وشهلاء صارلهم اكثر من شهر ما يدرون بيه اني وين .. وصلت الكراج واذا ولا سيارة بي … يا ربي وين اروح .. تذكرت عندي صديق بكركوك صاحب محل .. كلت اروحلو حتى لو يبيتني بلمحل وثاني يوم الكه سيارة واروح … اجرت تكسي واني جاعد ويا ابو التكسي دنسولف كتلو لشارع الجمهورية .. والله مشه الرجال .. كتلو خالي .. الله يساعدك كال هلا .. كتلو ليش ما تطلع بيه لاربيل .. كال الدنيا ليل .. كتلو والله اني جاي من تكريت واهلي باربيل واريد اروح .. وشتطلب اني حاظر .. صفن هوه الرجال .. كال اريد 100 الف .. طبعا هيه الكروه 15 الف .. من كركوك لاربيل قريبة .. كتلو ميخالف .. اطلع .. والله همزين الله هدا وطلع بيه لاربيل .. وصلت السيطرة مال اربيل .. ما اكدر اطب اني وحدي ما يطببون بس عوائل لازم شهلاء تطلعلي خارج السيطرة .. شلون اخابرها وتلفوني ما بي شحن ..شراح اسوي بهل حالة اووووووف …
وللحكية بقية ..
انتظروني اليوم ان شاءالله ساعة ب9 بالليل والمحطة الاخير من محطات القصة
#يتبع ..
#سارة_المجيد?