العنودية والنقيب الشرس – سارة المجيد

مساء النور والسرور عليكم احبتي
???

#العنودية_والنقيب_الشرس

#المحطة_التاسعة

#بقلمي_سارة_المجيد

????????

شاهين ..خير موضوع ايش
شهلاء ..تعال نتمشه للاسطبل ونحجي هناك ..
كمت ورحنه اتمنشينه وصلنه للاسطبل
شاهين ..عندج موضوع صدك لو اتحججتي حتى تستفردين بيه ?

شهلاء ..لاوالله صدك تحجي لتخليني ارجع هسه ?

شاهين ..لالالا ? وجع اشبيج الواحد ميكدر يشاقيج شوية مو ردتي شاهين مال قبل صحتو الج ?
شهلاء ..هههههه هلا بي ..اي المهم
شاهين ..ههههه اي بله

شهلاء ..انت جنت تعرف وحدة اسمها سما

شاهين ..من جابت اسم سما انصرعت هبط گلبي لايالله شمعرفها بهل اسم ..معرفت احجي كمت اتلعثم بالكلام كتلها ها شنو سما منو
شهلاء ..شاهين لتنكر احجيلي تعرفها
شاهين ..احم ماشي بس اهدأي لتطلعين اخبالج عليه ..اي اعرفها
شهلاء ..اهااا حلووو وليش محاجيلي عنها ممكن اعرف
شاهين ..ماجتي مناسبة حتى احجيلج عنها وثم هيه علاقة عابره جانت .. من جنت مراهق يعني ..
شهلاء ..حتى لو المفروض متضم عليه هيج علاقة
شاهين ..هسه عوفج من هل حجي كوليلي منين عرفتيها وشلوووون
شهلاء ..سما ذاك اليوم جانت يمي
شاهين ..شنووووووو سما جانت يمج صدك تحجين
شهلاء ..اي شاهين ..اجتي لبيتنه وعرفتني عن نفسها وسولفتلي عن علاقتكم
شاهين ..اني الها البنت الكلب اله اطيح حظها
شهلاء ..اعصابك ترا البنية ماحجت شي بلعكس كل الحجتو من صالحك انت ..صح اني شعور الغيره انتباني وحركني ..بس سما كالت شاهين ماخدعني وصارحني من البداية انو ماكو زواج ولا اتعلق بيه
شاهين ..احم اي شفتي يعني حبيبج بريء وماعندي شي وياها
شهلاء ..بس هم مايمنع انو تحجيلي عن هل علاقة ..يله سولف شعندك بعد ضام حتى يتضح كوولشي مو اسمعو من غيرك والله ازعل هل مرة
شاهين ..والله ياحبيبي علاقات عابره ونزوات چثييره يعني عندج وحدة اسمها حسناء ? و وحدة اسمها سوسن وعبير ونوال وصبا امممممم بعد ?
شهلاء ..يربك كل هذني ياظالم ???

شاهين ..? واشبيج انصدمتي ..عجل شعبالج عيني حبيبج جان مصفي بنات المنطقه هنه يجن لعندي ويطلبن علاقة كلهن جانن يموتن عليه ??
شهلاء ..اي خوووش ??
شاهين ..خلي اسولفلج ع مغامراتي لابعدين هم تسمعين من غيري وتاكلين گلبي بس خلي ابالج كلهن علاقات عابرة ونزوات يعني مو حب مثل حبج وعشكج يابنت العم ?
شهلاء ..ههههههه ماشي اذا حجيت هسه اسامحك عادي يله غرد يا ابن العم …
شاهين هههههه ماشي ياعشقم ?
شوفي هاي اني جنت طالع ويه وحدة اسمها ياسمين تخبل صاروخ وتتفيك براسي جنه رايحن ع مزرعة .. ف اني كاعد وياها كعدت تسمعني حجي تحسسني ان اني ما اكدر اعرف غيرها او بس هيه بحياتي يعني هيج قبيل اني ضجت .. المهم .. اني ما جاوبتها كتلها يله نمشي ركبت هيه وطلعنه وجان اروح ع بيت بنية اعرفها .. هاي فري فري حيل .. دكيت هورن طلعت .. اجتي من يمي اني حتى ما نزلت من يم السيارة .. وجان تكولي هلو عيني شاهين مشتاقين وين ما نشوفك … وجان تبوسني كدامها .. كالتلي ها .. ما تجوز من سوالفك هاي صيدة جديدة من صيداتك وجان تغمزلي .. كتلها معليج بيها يله بيباي .. ومشيت .. هاي دكت راسها بلدشبول مال السيارة .. وبجي ولطم .. تخبلت .. ليش هيج تسوي بيه ومن هل سوالف … وساعة اني اراضي بيها ?
شهلاء ..شلت ايدي وضربتو حييل ع صدرو كتلو ابو النسوان بعد ماحبك ??
شاهين …?طكيت ضحك ع ردت فعلها فدييتج يابنت گلبي امووت ع غيرتج جانت حاطة ايدها ع سياج الاسطبل حطيت ايدي فوكاها وسحبتها وحطيتها ع صدري ع صفحة گلبي وكتلها بس المهم هذا المن اختار المهم هذا المن نبض
شهلاء ..هههههه حييال تعرف شلون تتهرب من الموقف
شاهين ..اعشششششقج اموووت ع ربج بس لووو تنطيني بوسة ااااخ جان خليتج تعيشين بغير عالم
شهلاء ..احم يله نرجع ديصيحونه ع الغدة لتنسه نفسك ترا اهلنه كدامنه
شاهين ..واني مراح اخذ شي منج بالغصب بعد ..اله انتي بأرادتج تنطي الي ..امشي نرجع يله ?
شهلاء ..ههههه ايييي عفيه يله ..

ستار ..جنت جاعد والعشق مالتي كبالي جاعدة جنت طاير من الفرحة اشوفها شلون تحجي وتسولف وفرحانه ..بمدي اخذها واروح ليغاد مثل شاهين وشهلاء ..اوووف شوكت اني هم اخطبها حتى كدام اهلنه احجي وياها كمت وكعدت بصفها كتلها شلونج بالدراسة
شيماء ..يممه وكع گلبي من كعد بسدي ستار اوويلي .كتلو الحمدلله ماشي حالي انت شخبار السادس وياك ههههه
ستار ..والله متبهذل كل وكت اروح يم جليل حتى نقراء سوه والله اتدمرنه دنتعب هواي لان تعرفين هذا مصير لازم انشد حيلنه ونطلع معدل زين حتى ندخل كلية بيها خير
شيماء ..اي والله صحيح ..الله يكون بعونكم ويوفقكم ان شاءالله
ستار ..امييين يارب ويوفقج ..انتي هم ديري بالج ع دراستج ترا محد يفيدج
شيماء ..ان شاءالله ابن عمي ?
شاهين ..ها بعد اخوك شو كاعد تضحك وتسولف لعد اشبيك بالبيت جنك بومه معبس ?
ستار ..اي عمي اضحك بخخخت قابل مثل حظي
شهلاء ..ههههه شبي حظك عيني شو جنك البخت
ستار ..لا والله خيتي اخوج متبهذل بالحب وميكدر يحجي وضام بكلبو ?
شاهين ..اهاااا هيج كول ..اي اتسبع وصارحها اشبيك فاهي جاعد بس تسولف عبالك شرطي صير ذيب مثل اخوك ?
شهلاء ..ضربتو لشاهين ع كتفو وخزرتو كتلو كافي اهلنه تايدحجون شبيك
شاهين ..وجع هسه قابل شكلت اني ..داعلم اخوية خطية فقير خام ماعندو سوابق مثل اخو الذيب ?
شهلاء ..اي طبعا ذيب مامخلي وحدة تعتب عليك ..دمشي اكعد لاادفنك يم الخيل مالتك ?
شاهين وستار ????
شيماء ..ههههههه جنت ساكته من الخجل وجان يدنك راسو ستار ويهمس بأذني بحركة سريعه كال احببببج وجان يوكف وراح ليغاد اني جمدت بمكاني هذا شكال ??
دحج عليه وضحك وغمزلي اصخام ?
يعني ديأكد الكالو يمممه گلبي راح يوكف عزززة
شهلاء ..كعدت يم شيماء .كتلها اشبيج ولج جنج وحدة شايفه جني
شيماء ..ها لالالا ماكو شي هيج
شهلاء ..ع اختج ..لتغشمين نفسج ترا شفت ستار شلون حجه شي بأذنج من كام معبالج مانتبهت
شيماء ..??
يعني مجنت احلم صحيح الي سمعتو
شهلاء ..شسمعتي ولج شبيج خبله
شيماء ..ستار همسلي وكال احببببج ??
شهلاء ..لا والله صدك تحجين نطق ابو الهول يالله يالله واخيرا ?
شيماء ..كفختها ع راسها انجبي وجع لتحجي ع ستوري اموتج يممه فدوة لطولو باعيهم شلون اثنين جنهم فرسان العرب فديتهم?
شهلاء …ههههههه ديله عيني كومي امي دتصيحلنه حتى انحظر الغدة وياهم كومي
شيماء ..اي اي هسه جاية ?
شهلاء ..يا اصخام البنية اتسودنت ?
…..
ومر اليوم وجان اسعد يوم كضينا بالمزرعة بين الخضار والحيوانات الاليفه بقينه نلعب ونركض ونضحك واتونسنه جثير …
ومرت الايام
واجتي امتحانات البكلوريا والنفسية مصفرة من الخوف ..بس الحمدلله امتحنت وكدرت اجتاز كل الاختبارات ونجحت وشاهين هم جاب معدل جيد جدا وجليل نجح ودخل كلية حقوق وستار نجح ودخل نفس كلية جليل وشيماء صارت بالثالث الحمدلله كلنه اتقدمنه سنة …ومرت العطلة وبدأ الدوام وسنة دراسية جديدة مندري شنو المضموم بيها

شاهين ..بعد ما نجحت ورحت للمرحلة الثانية بلكلية او مثل ما نسميها المتوسط .. كانت الضغط بلتدريب اقل علينه .. لكن دخلنه دوره التدريب العنيف او مثل ما نسمي الصاعقة .. وهاي اشد دورة في الكلية العسكرية .. بيها جثيير فعاليات .. طبعا نكعد الدنيا شتاء برد .. الساعة 4 الصبح نتريك الريوك الاول الي كان كلاص حليب ساخن وصمونه .. ونطلع ننزع السترة الفوك نبقى فقط بلفانيلة الداخلية .. ويبدي التدريب العنيف .. ركض ويا الركض مدربين ويانا يركضون .. وشايلين وياهم خيزرانات على كيبلات على صوندات ما حب گلبكم واشتهى .. ياهو الي يلوحك ما يقصر بيك .. جثييير مفارقات جانت بلدورة .. اتذكر جان من ضمن المدربين مطرب مشهور حالياً .. معروف بقساوتو بلتدريب .. التقيت بي في البهو مال الضباط شكم مره .. و صارت بيني وبينو سلام ومرحبة قبل الدورة .. وسئلتو .. كتلو انت اكيد راح تطلع علينه بلصاعقة كال اي .. كتلو هالله هالله بيه عود .. كال اني وياك هنا اصدقاء وسوالف وضحك .. لكن بلتدريب ما اعرفك .. وفعلا شفتو بلتدريب .. مسوي حبال ثنين ولافهن سوه .. بيهن براسهن مسوي عقدة كبيرة .. ضربني ضربه بظهري بقيت يومين ظهري ما اكدر اعدلو هههههه …جنت من ارجع اكعد اسولف لشهلاء مرات تبجي ع اثار الضرب والتعذيب مال التدريب ومرات تضحك ..والله بزمن قبل الجيش يسوي زلم خشنه ..
مره كالوا انتوا اليوم ما عدكم شي .. جابونه على جملون .. كالوا هذا الجملون .. ما عندك شي غير بس تطب من هذا الباب واكو ضابط بنهاية الجملون .. توقع يمو يم اسمك وتروح هاي هيه .. والله فرحنه شنو تفوت تركض طيارة .. كبل يم الضابط توقع وتطفر .. حتى اذا اكو مدربين شيلحك يضرب صونده صوندتين زلاطة ههههه … اجه دوري .. وجان اطب اركض .. ويا ما طبيت انسد الباب .. واذا اني وين الجملون متروس رمل .. يعني تطمس رجلي 3 ارباعها .. وشكو على يميني ويساري .. مدربين 8 .. اني كوه اتحرك وهذول واكفين كل من اطب من يمو يضرب بيه والضابط كاعد باخر الجملون يدحج علي .. واحد من المدربين شفتو بيدو سجين .. صارت عندي خوفة منو .. هوه طبعا القصد كان للتخويف اني عبالي راح يطعني .. ويا ما تقرب مني .. ضربتو .. وعينكم ما تشوف الا النور .. انجمعوا عليه كلهم .. وكتل واني وياهم مضارب هههههه .. الضابط صاحلي كالي شاهين عوفهم تعال عليه وقع .. اني تذكرت رحتلو وهذول وراية وسمط ع ظهري .. انوب اسمي ادورلو ما عاد الكا هههههه .. والله لكيتو و وقعت وطفرت ههههه .. تدريب جدا عنيف ومؤذي .. جثييير طلاب طفرت من الشدة .. هاي غير يوميا لازم ننزل بحوض متروس خيسة وبس حيوانات ميته والكصير يطمس كلو .. شي متعب ومجهد جدا .. لكن النتيجة يخرج ناس تتحمل اصعب الظروف ..
شهلاء ..بابا اليوم راح يصورون شاهين بقفزة الثقه ويذيعوها ع التلفزيون
ابراهيم ..اهاا والله ابن اخوية سبع وذيب هل قفزة محد يكدر يسويها بس البطل من تنعرض عود كولينه حتى ندحج وياج خلينه نفتخر بي
شهلاء ..ان شاءالله بابا

شاهين ..اخر يوم من ايام دورة الصاعقة وكان مدتها 40 يوم
. اجتي قفزة الثقة او ما تسمى بقفزة الصرافية .. القفز من جسر الصرافية .. اني رحت لامر فوج طلبت منو ان اقفز الاول .. لان الي يقفزل الاول .. هوه الوحيد الي يلبس العلم العراقي .. واغلب الانظار الو تكون .. ويكسب الاحترام الاكبر بهذا الحدث .. ف وافق .. كعدنه الصبح الدنيا باردة ثلج .. واخذونه هناك .. لكينه اهلنه والناس مجتمعة اتدحج بترقب .. ف رتبوا المكان والقفزة .. عاد كالولي تقدم اني لبست العلم .. وصعدت على منصة القفز .. كتلهم اني المقاتل فلان ابن فلان .. فوج عمر سرية المثنى الفصيل الاول جاهز للقفز سيدي .. كالي اقفز يا بطل .. والله شلت روحي وطفرت .. انتظر انتظر اريد اوصل المي الطريق شو بعيد هههههه .. اخاف ادحج جوه خاف المي يضربني بوجهي ومن هذا الارتفاع يجوز يذبحني .. والله وجان اوصل المي وطمست وجان اطلع .. ع الشط .. والنسوان تهلهل وتشمر عليه جكليت .. موقف ابد ما ينسي في حياتي .. عاد كعدت اتفرج .. على جماعتي واضحك ههههه .. اكو بيهم تراجعوا ما ققزو وهل شي بلكلية صعب .. يبقى وصمت عار علي .. الى هسه الناس تتذكر فلان ما قفز .. ويتهمونه بلجبن .. ورحنه اجازه اسبوع ارتاحينه يم اهلنه بعد هذا التعب والارهاق ..
شهلاء ..من ذاعوا تسجيل القفزة مال شاهين گلبي راد يوكف ركضت ع بابا كتلو تعال طلعوا البرنامج صحتهم كلهم واتجمعنه كلنه ع شاشة التلفزيون ..
طلعوا الجسر وطلعوا الجنود وجان يطلع اول جندي قفز هوه شاهين وكف ع سياج الجسر وعرف عن نفسو ولاف علم العراق ع جسمو وجان يقفز بالمي حسيت گلبي تلكاه بهل قفزه يمممه متت ظليت ادعي يطلع بالسلامة ومايصيبو مكروه لان الجسر عالي جدا والدنيا ثلج المي جامد ..اووويلي حبيبي شصار بيك هسه ?
والله وجان ينرطم بالمي وبقينه نترقب طلوعو ضليت ع اعصابي وبقيت واكفه وارجف وحابسه انفاسي وادعي وجان يطلع من المي وبدت الهلاهل والتصفيق الله عليك يابطل ماكذب من كال عليك شرس وتتحدى المخاطر ومتخاف من شي يمممه ظليت اكمززز من الفرحة وكلبي يصير هذا البطل حبيبي ???
جنت فخورة بي عن جد بطل ..
ومن اجه بأجازتو جنت فرحانه بي والدمعة بطارف عيني ..
جنت انتظر اليوم الي راح يصير بي زوجي وابو اطفالي …

#تسريع_الاحداث ..
كمل شاهين كليتو العسكرية الي كضه بيها 3 سنوات من التدريب والتعذيب والتعب واتخرج اسد ذو مخالب حادة قاسي القلب عنيف وشرس اتخرج برتبة ملازم يعني نجمة وعندو قدم لان طلع الاول ع دفعتو يعني سنة كاملة مشه بالترقية القادمة ..وشهلاء صارت سادس علمي وجليل صار بمرحلة ثالثة كلية حقوق وستار كذالك وشيماء صارت صف خامس علمي ..واجه يوم التخرج والكل محتفل وبالاخص شهلاء كانت الفرحة مسايعتها لان اخيرا راح يعلنون خطوبتهم وتصير رسمية كدام كل العشيرة ..

شاهين ..ادري يابوية شسوي بالحفلة مال تخرج ليش هل مصاريف وانوب تعب وهوسه
جاسم ..لابوية لاتعب ولاهوسة هيه اصلا راح انسويها خطوبة وحفلة تخرج بنفس اليوم اني بذاك الساع من افتخر بأبني صار ضابط واسويلو حفلة اعزم العشيرة كلها وداعتك لاخلي كل تكريت تحجي بيها وها ترا شهلاء جايبتلك نجمات ذهب عيار 21 خطية اشترتهن شوفتهن النه من جنه يمهم ذاك اليوم كالت بالحفلة البسو الرتب ههههههه
شاهين ..فدوة لعمرها اروح صبرت ويايه هواي وعانت الفراق هواي ان شاءالله اكدر اجازيها ع تحملها وصبرها
جاسم ..ان شاءالله وليدي ..خلينه نحجز بقاعة احسن حتى كبيرة والعشيرة كلها تكفيها ..
شاهين ..ماشي بوية براحتك ..
ومر اسبوع ..
وتم تحظيرات حفلة تخرج شاهين ..
شهلاء ..ماما علبة النجمات الذهب حطيهن يمج عفيه اخاف اضيعهن
زهور ..ماشي يمه جيبي
شهلاء ..عفيه احجولي شلون طالعه اني حلوة لو جكمة
ام جاسم ..مادام ملابسه شي مايضوج شاهين يعني حلووة وتخبلين
شهلاء ..هههههه والله يومين افتر بالسوك ياله عجبني هل فستان راهي ومو حصر حتى لينزعج سيادة الضابط ?
ام جاسم ..هههههه اي عفيه بنيتي الحبابة صايرة تسمعين كلام يعني نصيحتي جابت نتيجة وياج
شهلاء ..اي جدة الحمدلله انتي وين اكو منج فديتج كمت ابوسها وهيه اتصيح ولج اكعدي خربتي فوطتي شلون اروح بيها مخربطه بله ..هههههه كتلها انتي اتخبلين بيبي انزعي فوطتج شكو قابل منو اكو ?
ام جاسم ..ياااا عززة العزاج شلون هيج تحجين ولج هذا عمري وانزع فوطتي شبيه اخرفيت بهل لحظة حسيت راسي يوجعني ودخت
شهلاء ..ههههه اشاقيج بيبي …اسم الله شبيج بيبي حبيبتي شو انخطف لونج
ام جاسم ..لا يمه مابيه شي لتخافين يمكن لان مابالعة حابية الضغط هسه اروح اخذها …
شهلاء ..مابيج غير العافية بيبي حبيبتي
شيماء ..شهلاء شوفيني عفيه حلوة طالعه
شهلاء ..همست بأذنها كتلها اليوم ستار يستقتل عليج ?
شيماء ..اششش فضحتينه خرررب ??
زهور ..يله كملتوا دنطلع بعد ..
شهلاء ..احم اي اي ماعدنه شي كملنه
رحنه كلنه للقاعة جانوا بيت عمو جاسم بعدهم مجايين بس الاقارب كلهم جايين وديترقبون حظور حبيبي اليوم مثل عرسة فدييتوو حظرت علبة الرتب الذهب وبقيت انتظر اتأخروا خررب ..شوية وجان يدخل حبيبي بملابسة العسكرية اووويلي ردت انجلط ?
الكل كاموا وراحوا يمو يحظنوا ويبوسوا ويباركولو اله اني بقيت جامدة بمكاني وعيوني مغوركة ممصدكة اجه هل يوم وشفت شاهين بزي العسكري وبيدي احطلو الرتبه واليوم راح يعلنون خطوبتنه كدام الحظور اليوم حكون خطيبتو رسميا كدام كل العالم اوووف ممصدكة ياعمري …
شاهين ..من دخلت الكل اتقدموا نحوي يباركولي جنت فرحان فرحتين فرحة تخرجي وفرحة اعلان خطوبتي ع حب عمري وحياتي شهولتي ..
دحجت شهلاء مو من ظمن المباركين جان اشوفها واكفه ليغاد وعيونها مغوركة ودتبجي ضحكت صحتلها تعالي ..
شهلاء ..ركضت ع شاهين ومسحت دموعي ..كتلو بصوت ناصي الف مبروووك وبدوا العالم تنطي الهداية وبدت الموسيقى تعزف اغاني وطنية مال قبل ..وكف ع الستيج وكاموا ولد عمنه يركصون ويا ويشيلوا ويركصون ..وراحت بيبي حظنتو وكامت تبجي وهوه حظنها وباس راسها وايدها واجيت اني بيدي علبة الرتب الذهب من وصلت يمو نزلوا و وكف وطلعت نجمة وحطيتها ع كتفو الايمن وطلعت نجمة الثانية وحطيتها ع كتفو الايسر

والكل كامت اتصفك والنسوان اتهلهل وتتطشش جكليت وذبوا كولات ولد عمنه …وبهل لحظة اجه عمو جاسم وبابا وكالوا يله نعلن الخطوبة مادام شهلاء لبست الرتب لشاهين ..

واخذ المايكرفون عمو جاسم وكال للحظور سكوووت لو سمحتوا انتبااه رجاءا ..وجان بهل لحظة ???

وللحكاية بقية ..

قولوا للحظ اننا احياء ف ليطرق بابنا يوماً ????

#يتبع….

#سارة_المجيد?

 

error: