العنودية والنقيب الشرس – سارة المجيد
اجيتكم وجبتلكم البارت الهدية انطلقوووا ???
#العنودية_والنق
#المحطة_العشرون
#بقلمي_سارة_الم
شهلاء ..جنت لازمه گلبي ومترقبة شراح يكول الدكتور وشنو النتيجة
الدكتور ….ممتاز النسبة 80% يعني مابيك اي شي وسليم 100% وتكدر تخلف عادي .. بس عجيب شفت تقارير زوجتك وتحاليلها وفحوصاتها هم ممتازة هم مابيها اي اشكال ..يعني اثنينكم سليمين وتكدرون تخلفون ..بقت يم رب العالمين ان شاءالله يجبر بخاطركم
شاهين ..تسلملي دكتور ماقصرت اشكرك ..يله نترخص احنه اخذت الورقة وطلعت ورفعت خشمي ع شهلاء وعفتها وراية تمشي وتحجي تريد تراضيني بس ماحجيت وياها طلعت من المستشفى وصعدت بالسيارة ..وصعدت هيه ..
شهلاء ..هسه شبيك يعني صدك جذب تزعل واتطنكر عليه هسه قابل شخسرت غير حتى نتطمن كوولشي تمام ومابينه شي اثنينه ..
شاهين ..وهسه اتطمنتي وعرفتي اني رجال وفحل وكامل واكدر احبل فيل مو مراة ..شتريدين بعد
شهلاء ..لتصيح عليه شبيك ?
شاهين ..هففففففف استغفر الله ..شغلت السيارة ورجعت للبيت وجنت متعصب حيييل من شهلاء ..يعني حطتني بموقف لا احسد عليه ..مانكر اني هم اريد طفل ويعجبني اكون اب بس شكو نستعجل خليها ع الله شوكت ميرزقنه هلا بي ..
شهلاء ..شفت حبيبي ضايك خلكو وزعلان حبيت اراضي طبيت للحمام سبحت وطلعت لبست سيت نوم احمر خفيف يحبو ..واتمددت بصفو ونمت ع صدرو كتلو احببببك
شاهين ..من طلعت شهلاء من الحمام استرقت النظر الها بس مخليتها اتشوفني جنت العب تلفوني عود ..جان تلبس السيت النوم الاحبو ويجنن يطلع عليها اني هنا عركت جان تجي تنام ع صدري ومن كالت احبببك ضحكت ماكدر ابقه زعلان منها الرجال من عدنه يصير مثل الطفل بحضن مرتو ينسه كل خلاف وزعل بجلمة حلوة منها وشهلاء تعرف شلون تكسبني وتقربني الها ..ومن هاي اني اعشقها ..حضنتها ورفعت راسها وبستها كتلها واني اموووت ع ربج ولج لعبتي لعب بيه مابقيتي شي من شاهين خليتي كوولشي بي يلهج بأسمج
شهلاء ..ههههههه فدووة اروح لكل شي بيك ياعشقي وروحي انت.
شاهين ..اووويلي عليك شاهين شتتحمل ولج اليوم اكلج اكل شو تعالي وكمت ادغدغها ادري بيها تموت ضحك وتغار من اسويها .
شهلاء ..لالالا حباب فدوووة اغار كافي كااافي الله يخليك ولك بطني كامت توجعني خرررب??
ومرت الايام والاشهر وشهلاء تنتظر حملها ..
وشيماء ولدت جابت ولد سمتو محمد والكل فرحوا بي وسوولو حفلة طهور تخبل وشهلاء صح جانت فرحانه بس داخلها يتكطع باليوم الف مرة ..وحياتها انكلبت گلاب صارت حياتها كابوس فضيع من جانت تروح لاهلها هيه وشيماء تاخذ محمد ومتخلي بالكاع تبقه تلعبو وتبوسو وتشيلو وتوكلو وتبدلو تصير امو الثانية جانت تحس بطعم الامومه من خلال محمد ومحمد اتعلق بيها ودائما جان ستار يجيبو لبيت شاهين حتى يبقه يم شهلاء وياخذو بالليل ..
..
وصار عمر محمد سنة وشهلاء ماحملت بس مافقدت الامل برب العالمين جانت تبلع الغصة من اتصلي وتدعي الله يجبر بخاطرها وينطيها طفل يملي عليها حياتها ..
شاهين جان يداوم بكلية العلوم والتهه بدراستو ومجان يقبل شهلاء اتكمل دراستها لان يغار عليها من شباب الي بالكلية ..
ومر ع زواج شهلاء وشاهين سنتين
شاهين ..شهلاء شبيج كلو معصبة ومطايقه بشر يعني حتى اهلي صايرين مايجونه بسبب اسلوبج المتعجرف ليش هيج صايرة شبيج
شهلاء ..شاهين عوفني بحالي تره احرك روحي والقران ..هسه اكوم اذب بانزين ع نفسي واحركها مو فاضيه لشراستك وعصبيتك هسه البية امكفيني
شاهين ..ادري ليش شبيج فهميني غير اعرف سامعه حاجة من احد غاثج احد
شهلاء ..اي سامعه ياستاذ سامعه امك كل متجي هنا تحجي حجي اتسم بدني بي واني اجرع وابلع واسكت مو حرام عليها يعني قابل بيدي ماديصير عدنه خلفه ..البارحة اجتي وطلعت شيماء حامل للمرة الثانية وكعدت اتدلع بيها كدامي واني اشتعل بنار واتكولها اي ماشاءلله وليدي ستار راح يصير اب للمرة ثانية وشاهين سودة بوجهي بعدو يتحصر ع اضفر طفل ..شتريدني اسوي اموت روحي حتى انت وامك ترتاحون ..كمت اصرخ واعيط وادك والطم ع وجهي وركض شاهين حظني ولزم ايدي
شاهين ..من سمعت كلامها شاغت روحي للسماء اتدمرت ليش هيج أمي تحجي اوووف الله قابل اني شاكيلها ..كامت تلطم شهلاء ركضت عليها حظنتها ولزمت ايدها وكتلها اششششش اهدي حبيبي اروحلج فدوة بداعتي لتسوين هيج بنفسج ..ان شاءالله ربنه يجبر بخاطرنه وينطينه ع كد صبرنه ..وداعتج مايفشل عبدو اذا كصدو بس ادعي وشوفي ..
شهلاء ..بقيت دافنه راسي بصدرو واناشغ وابجي جرعت لوعات يابو لوعات بهاي الدنيا ااااه ياربي فدواتك ارحم بحالي تعبت …
ومر ع زواج شهلاء وشاهين 3 سنوات وشيماء جابت ولد ثاني سموا عبدالله وشهلاء انتكست وحالتها بالنازل جانت تاكل بنفسها وضامة القهر بگلبها ومتحجي ..
وشاهين صار بمرحلة ثالثة كلية علوم بايولوجيا
وبيوم شاهين جان يم اهلو وشهلاء يم اهلها ..
ام شاهين ..اكول يمه شاهين ..ولو ماحب اتدخل بحياتكم ..بس هذا حقي كأم ..اني كبرت واريد اشيل ضناك يا ابني اذا شهلاء ماتحبل اتزوج من بنات عمك بس حتى اتخلف خما تبقه هيج انت بدون طفل يشيل اسمك والشرع حللك اربعه مو حرام من تستعمل حق مشروع الله حلله الك …
شاهين ..من حجت امي هل حجي حسيت خنجر مسموم وغرزتو بنص گلبي انتفضت من مكاني وكتلها يمه هاي حياتي واني حر بيها وامقبل اي احد يتدخل بحياتي زين
ام شاهين ..يمه شتحجي انت ياحياة هاي مابيها اطفال شتسوه ..اني حجيت ويه ابوك وكتلو نخطبلك بنت عمك حازم الصغيرة احنه اهلك وانريد انشوف بزرك لتخلينه بحسرة عليك
شاهين ..يمه شبيج ليش اتخبليني منو شاكيلج اتريديني اتزوج ع شهلاء ليش هيج قليل اصل اني وحقير وماعندي ضمير حتى اتزوج عليها ..نسيتي شهلاء الي ضحت براحتها لخاطري نسيتي من انتظرتني 4 سنوات واني بالسجن ومعافتني نسيتي شكد عانت بسبب فراكي ودمرت نفسيتها من ورايه لو ما جان هذا كلو كدامكم وانتوا الي سولفتوا الي من طلعت من السجن ..شلون تريديني هسه مانتظرها عمري كلو ..وتريديني اعوفها علمود جهال ..للاسف محد يعرف البيني وبين شهلاء شنو ..الي بينه اكبر من انو تفهموا او تقدروا ..البينه عمر وروح متصله من جنت بالسجن كلكم ايستوا مني حتى انتي يا امي وكلتوا مات ..اله هيه جانت اتحس بيه عايش ومامتت وهذا جليل شسوه بيها و وكفت جدامو واتحدت كل الدنيا علمودي ..وهسه جايه اتريديني اتزوج عليها بكل سهولة والله من انعل ابو الخلفة اذا ايخلوني افرط بحب عمري وحياتي ..
ام شاهين ..اي وانت هم صبرت عليها وهاي صارلك 3 سنوات ..مو كافي هسه ولازم اتفكر صح وهذا عمر ديمشي متخاف تصفى وحدك ماعندك ابن يسندك بكبرتك ويطري شيباتك
شاهين ..لا يمه ماريد واسف امي هل مره ماكدر اطيعج اعذريني وخلي ربي هم يعذرني واطلب منو السماح لان راح ارفض طلبج ..واذا جانت الخلفة تسبب دمار حياتي ويه شهلاء طزز ماريد جهال مراح يقدمون ولا يأخرون ولايفيدوني بشي ..اني عايش ويه شهلاء مرتاح وسعيد حتى لو ابقه عمري كلو بدون جهال مو مهم ..المهم مرتاح ضميري … و وفيت لحبيبتي وماخذلتها ..يله أمي
اترخص منج اروح لبيتي ..
عفتها وطلعت وروحي شاغت للسمه اني وداطلع شفت طفل بالشارع وسمعت صوت مراة تصيح شاهين استغربت درت وجهي واذا سما خرررب حظي هاي تطلعلي باليانصيب بله ..اتقربت عليه واخذت الطفل وكالت لتخاف مو عليك داصيح ع ابني شاهين ..اني اتخبلت لايالله هاي مسميتو ع اسمي
كتلها ومالكيتي غير اسمي اتسمين اسم ابنج عليه
سما ..لا مالكيت راح ابقه اتذكرك كلما اصيح ع ابني
شاهين ..يالله منج ومن خبالج ..عفتها وصعدت بسيارتي ورجعت لبيتي ..
شهلاء ..شبيك حبيبي شو مو ع بعضك ..
مابيه شي حبيبي لتخلين ابالج نامي انتي
شهلاء ..شلون انام وحبيبي ضايك خلكو تعال اتمدد ونام بحظني اريد الوليلك مثل طفل بحظن امو ??
شاهين ..ههههههه فديتج وفديت حنيتج عليه ..اليوم اجاني ابن عمي قيصر يريد يخطب وحدة من بنات عمنه بس اخوها معاند مينطيها يريد ينطيها لواحد زنكين
شهلاء ..يا عيني خطية وتالي
شاهين .. اجاني الولد استنجد بيه .. كالي هذا معند .. كتلو شوف .. انت تريدها من صدك لو حجي .. كال والله اريدها كتلو واهلها وهيه موافقين كال والله كلهم موافقين بس اخوها الجبير معند .. كتلو مو مشكلة نروح نحجي ويا ونشوف ..
شهلاء ..زين ليش متحجي انت وياهم بلكت يوافقون
شاهين ..اي ان شاءالله باجر راح اروحلهم واشوف شلون تصفه ..
شهلاء ..فديتك لو يخلوك شيخ العشيرة والله تلوكلك المشيخة ??
شاهين ..لاعاد مو شيخ يمعودة مالي خلك ??
شهلاء ..ههههههههه .. ياروحي جنت العب بشعرو لحد ماغفه ونام مثل الطفل اني هم نمت وماحسيت اله الصبح فزيت جان ديبدل كتلو ها حبيبي وين
شاهين ..مو كتلج راح روح ع بيت عمي علمود قيصر خطية
شهلاء ..اهاا اي صحيح ..عجل اكوم احظرلك ريوك
شاهين ..لاحبيبي ماريد شربت كهوة ارجعي نامي اني طالع ..اخذت سويج سيارتي وطلعت ورحت لبيت عمي ..
طبيت كعدت وحجيت ويه قيصر كال ..اهلها منطيها كلهم .. وموافقين بس جان اخوها معند ..والله رحت اني ويا ع بيتهم طلعنه هوه هذا الولد .. كتلو جايك بسالفة هوه رحب بيه اني معروف عد عمامي والي هيبتي .. ف طبيت كعدت .. كتلو يابا سمعنه ان انت معارض .. كال اي .. كتلو شنو السبب .. كال فلان ما عندو مال .. كتلو اني اكفلو من الدرهم الى ٥٠ مليون .. همه حالهم زين يعني .. بس يتحجج .. المهم .. كال الله كريم .. طلعنه من يمهم .. ثاني يوم اجاني الولد ابن عمي .. كال هذا لازم اختو وكاتلها .. ومخابر على ابن عمي كايلو ما انطيك وبعد لا تجيب شاهين ولا تكولو هل حجي .. كتلو ماشي بس ما جاعد افتهم ليش ما ينطيك .. كالي يريد ينطيها لابن عمنه الثاني بس شوية ابعد من هذا بلنسب .. ذاك زنكين وكذا .. كتلو والله يخسه شاربو والله اخذها منو لو بلرصاص .. بس حلو عندي .. كال شراح تسوي كتلو اليوم بلليل تعال عليه ساعة ٨ واني افهمك .. اجه عليه واخذت وياي ٢ شباب .. ورحنه لزمنالو الدرب .. كتلهم اني احجي ويا لحد يتدخل .. تلثمت ونزلت علي هوه اول ما طلع من بيتهم .. كرضتو كرضه مال موت .. نام بالمستشفى من وراها .. كتلو شوف .. نزعت لثامي كتلو دحج عليه زين .. اني فلان .. باجر تكول لاهلك ان انت موافق ع قيصر .. والا قسم بالله .. اذا جيتك المره الثانية اخذ روحك .. افتهمت .. ومشيت وخليتو والله ثاني يوم هوه بلمستشفى كال لاهلو دزوا ع قيصر اني موافق وفعلا وره كم يوم سمعنه قيصر ماخذها ..
شهلاء ..اجه شاهين وبشرني انو ابن عمنه قيصر اخذ الي يريدها الحمدلله ..
شاهين ..شمسوية غدة حياتي
شهلاء ..والله سويت باميا بضلوع الغنم.
شاهين ..اووويلي عشق سويلي دليميه عود حتى تجين تفركيلي ظهري شوية
شهلاء ..هههههه ماشي حياتي تدلل ..بهل لحظة داطلع من الهول حسيت الدنيا تفتر بيه كتلو شاهين الحكلي
شاهين ..كمزت ورحت لزمتها كتلها اسم الله حبيبي شبيج
شهلاء ..مادري فقدت توازني دخت خررب
شاهين ..تعالي حبيبي اكعدي ماريد غدة
شهلاء ..حبيبي مادري الي ديدور ابالي صح لو داحلم
شاهين ..مفهمت شتقصدين حبيبي
شهلاء ..ماعرف حبيبي بس الدورة هل شهر اتأخرت عليه 15 يوم وماهتميت الها بس صارلي اسبوع داحس باعراض حمل مثل الدوخة والتقيء
شاهين ..انصدعت من كلامها بقيت باهت بمكاني وماعرف احجي حسيت لساني اتربط مادري من الفرحة من الصدمه من المفاجئة ماعرف بس مداكدر احجي اريد اطلع كلمة من حلكي عزززة شبيه ..
شهلاء ..اريد اروح احلل بلكت الله جبر بخاطرنه ?
شاهين ..هنا اني ماكدرت اسكت انتفضت من مكاني وشلتها وكمت ابجي كتلها ولج ليش متكولين حتى اوديج للتحليل ليش شهلاء اتسكتين ع هل شي
شهلاء ..اتفاجئت من ردت فعل شاهين مجنت متوقعه راح يفرح لو جنت حامل كتلو عجل ليش مجنت تهتم من اكولك اريد طفل ..
شاهين ..حبيبي ماجنت اريد اقهرج ..مسحت عيوني كتلها امشي انروح للتحليل ماصبر بعد
شهلاء ..واذا طلع ماكو حمل شتسوي ?
شاهين ..مو مهم حبيبتي المهم انتي عندي بالدنيا كلها
شهلاء ..لفيت ايدي ع رگبتو ورفعت نفسي وبستو من خدو بوسة قوية كتلو الله يحفظك الي ولايحرمني منك
شاهين ..دنكت عليها لان رادت اتبوسني قزومتي فديتها ??كتلها ويحفظج الي ويخليج شمعه تضوي حياتي ..يله امشينه مابقه بيه صبر ههههه
شهلاء ..ههههه يله ..رحنه للمختبر اخذوا مني دم للتحليل ..وره نص ساعة صاحوا بأسمي اني جمد الدم بعروگي اريد امشي عبالك انشليت جنت كوه اسحب رجلي خطوة خطوة وبكل خطوة ادعي الله يكون النتيجة ايجابيه ?.
وصلت واخذت الورقة ونطيتها لشاهين وغمضت عيني واحس دكات گلبي صارت طبول حتى صدري احسه يصعد وينزل من القلق ..ومن شاف الورقة شاهين انصدم وجان يصرخ بعلوا صوتو ولج شهلاء انتي حااااااااااامل حااااااااااامل اشكرك ياربي اشكرك يالهي ماقصرت فدواتك ربي وبهل لحظة شفت شهلاء لزمت راسها ورادت توكع من الصدمة عززة خربت البنية رأسا حضنتها وكعدتها ع المسطبة ..كتلها حبيبي اهدئي هاج هذا مي شربي لتنفعلين اهدئي فدووة
شهلاء ..من سمعت شاهين كال شهلاء انتي حااامل ماستوعبت ردت اوكع حسيت صاعقة وضربتني ع راسي يعني واخيرا حبلت ..ربي جبر بخاطرنه وراح يكون عندي طفل كمت ابجي واضحك وشاهين حاضني ويبجي ع بجيي ويهدي بيه ويكول كافي حبيبي يله نرجع للبيت …
شهلاء ..مسحت دموعي كتلو خلي اروح لاهلي ابشرهم
شاهين ..لا عندي غير طريقه ..شوفي راح اعزم اهلج واهلي باجر ونفاجئهم بالخبر شتكولين ?
شهلاء ..ووااااوو انت فدشي حتى انشوف الفرحة ع وجه الكل بوقت واحد ??
شاهين ..عفيه عليج حبيبتي ? يله دنرجع لبيتنه ونتصل بيهم ونعزمهم ع باجر ..
شهلاء ..يله ههههه وفعلا اول مارجعنه للبيت شاهين اتصل ع اهلو عزمهم سئلوا شنو المناسبة كلهم من تجون احجيلكم ..واني هم اتصلت ع ماما وكتلها باجر معزومين عندي ع الغدة هم سئلت شنو المناسبة كتلها من تجون احجيلكم ههههههه
وصار ثاني الصبح ردت اكوم اسوي الغدة للعزيمة وشاهين اتخبل ..
شاهين ..شنوووو يمه شنوو دكعدي حبابه ولاتمدين ايدج بأي شي
شهلاء ..يا شبيك حبيبي الناس عازميهم ع الغدة شنوكلهم بيض سلك بله ?
شاهين ..ومنو كلج انوكلهم بيض سلك انتي بس ارتاحي وريحي ابني الي ابطنج كوولشي جاهز تلكي
شهلاء ..ليش شراح اتسوي ?
شاهين ..لتخافين ع ذيبج وصيت غدة معدل من تجهيزات مطعم فخم يسوي اكلات فدشي ..يعني مثل اكل البيت ساعة ب12 يجيبوا للباب بس انت ارتاح ياحلووو ??
شهلاء ..هههههه فديييتك حياتي يعني راح اتدللني ?
شاهين ..انتي المدلله مالتي دومج وحبيبة گلبي وعمري حياتي كلها
شهلاء ..عيني عيني راح احسد نفسي هاااا ?
شاهين ..اتقربت عليها وحضنتها من خصرها وكتلها وداعتج كل بنات عشيرتي يتمنن بمكانج يصيرن وانتي حضيتي بهل مكان وعضيت شفتي وغمزتلها ?
شهلاء ..ادري وهنيالي بيك ?
شاهين ..دحست راسي برگبتها وبقيت اشم بيها يبووووي ع هل عطر يخليني اشتعل بنااااار اااااه ولج تعالي خلي اكلج متت جووع
شهلاء ..اصخام لاتتهور ياذيب الناس ع جية ?
شاهين ..اي خليهم ينتظرون بالباب شوية شكو قابل طارت الدنيا شو تعالي مو حركتي اجدادي كلهم حضنتها وووووووووووووو
شهلاء ..كمزت اندكت الباب اصخام كوم كوم
شاهين ..ووووجع شبيج كطعتي خلفي شبيج واذا اندكت الباب قابل بايكين
شهلاء ..ديله عاد وخر دفعتو وكمت دحجت من الجام كتلو ذولي خدمة التوصيل جابوا الاكل كوم اطلع عليهم اني حطب اسبح ابو المصايب ..
شاهين .. ولو ماشبعت بعدني جوعان بس يله ?
شهلاء ..امشي طماع عود صب من الاكل واشبع ?
شاهين ..شو تعالي ولج تقلدين عليه
شهلاء ..كمزت وركضت للحمام كتلو لالالا والله اشاقيك شبيك دومك عصبي ?
شاهين ..احتركوا اهلج لج لتركضين الولد ابطنج هبلة ..شلون بله بهل مراة راح تجلطني ..كمت عدلت نفسي ولبست ملابسي وطلعت فتحت الباب شفت الولد شايل الاكل اخذتو منو ونطيتو الفلوس طبيت للمطبخ حطيتو ع الكاونتر اممممممم شي تحفه المنظر يخلي الواحد ينتحر ?
طلعت شهولتي من الحمام كتلها نعيما يروحي
شهلاء ..نعم الله عليك حبيبي شو الاكل وخرت السيليفون واااااو يجنن خابر اهلك استعجلهم تره ميته جووع
شاهين ..سحبتها بقوة ع صدري كتلها ليش ميته جوع مو قبل شوية شسمه ?
شهلاء ..يا شو انت متستحي وخر عابت صاير فدنوب ضربتو ع ايدو ورحت صعدت فوك سمعتو طك من الضحك هههههه اوووف من سوالفك .اتوضيت قبل لا ابدل وامكيج طلعت ثوب طويل محتشم لان اخوان شاهين كلهم راح يجون ..وحظرت شال ومكيجت ونزلت ..كتلو امشي اسبح قبل ليجون اهلنه اني راح اصلي وبعدين اسوي اللبن والزلاطه
شاهين ..ماشي حبيبي ..
شهلاء ..دك تلفوني جانت شيماء كالت ها حبيبتي داكه عليه
كتلها اي شوكت حتجون بعد
شيماء ..اي بس انصلي الظهر ونجي هذا محمد موتني كولساع ابدلو ويطلع بره يوصخ نفسو وعبدالله لاطش بيه يريد يرضع موتوني
شهلاء ..اوووي فديتهم حبايب خالتوو ولج اموتج اذا ضربتيهم يله استعجلوا تعالوا بعد
شيماء ..اي هسه خلي اصلي يله باي
شهلاء باي ..اني هم رحت فرشت سجادتي و وكفت صليت واجه شاهين وكف كدامي هم كام يصلي خلصنه الصلاة لفينه سجاداتنه وحطيناهن بمكانهن نص ساعة واندكت الباب طلع شاهين فتحها وجانوا اهلي طبوا سلمت عليهم وبوستهم وكعدوا بالصالة ..وراهم اجوي بيت عمي جاسم واختي شيماء وياهم ..بوست عمتي وشيماء وسلمت ع عمو وبست راسو وسلمت ع الولد كلهم طبوا للصالة وكاموا يتسالمون ويه اهلي ..
شاهين ..همست بأذن شهلاء كتلها انبشرهم لو وره الغدة ..
شهلاء ..لا حبيبي خلي نتغدة عود انبشرهم لان راح يصير بجي ولطم ادري ?
شاهين ..ديله عجل خلي ننصب السفرة ..
شهلاء ..ماشي حبيبي ..صحت ع شيماء تعالي ساعديني خاتونه ..
شيماء ..ههههه اي جاية ..ستار اخذ ابنك لتخلي يتحرك لايوكع تحفيات العالم ويكسرهن
ستار ..ههههه ليش شنو ابن شاهين قابل ابني فقير مو شرس ??
شاهين ..دنجب ولك شفايتلك يطلع ع عمة شرس والله لاينذاع صيته بكل تكريت ..عجل تريدة خنثه ينام بالبيت
ستار ..لا عمي ماريد يطلع عليك استر عليه اني مو بحيل ابوية عليك خطية الرجال خليت بي امراض الدنيا بسبب شراستك ??
الكل ضحكوا ههههههههه
شاهين ..ديله كوموا اتفضلوا اتغدوا
ابراهيم ..ماكلتوا شنو سبب هل عزومة وليش جمعتونه خير ان شاءالله ..
شهلاء ..ان شاءالله خير باباتي حبيبي
شاهين ..بدينه اتغدينه وبقينه نسولف وكذا وراها خلصنه وشهلاء سوت الجاي شربنه ..واني جبت الفواكه وحطيتها ع الطاولة و وكفت كتلهم انتباه رجاءا ضليت احشش عليهم ..وكتلهم ابنائي فلذات اكبادي اليوم اني اجتمعت بيكم حتى اخبركم خبر راح يفرحكم كلكم الكل ضحك وكالوا يله بابا طلعها للدرة عاد احجي ?
شاهين ..كمشت ايد شهلاء ودحجت عليها وكتلهم ابشركم راح يجيكم حفيد ثالث
صار الصمت والهدوء بالصالة والكل واحد يدحج بوجه الثاني مديعرفون شنو قصد كلام شاهين
زهور ..شنو تقصد شاهين مفهمنه ..
شاهين ..عمة يعني راح يكون عدكم حفيد من شهلاء ..لان بنتج شهلاء حاااااامل
الكل انتفضوا من مكانهم و وكفوا فد وكفه وحطوا ايدهم ع حلكهم من الصدمه وجان يصرخون عاااااااااااااا
شيماء ..يممممه خيتي ممصدكة فدوة لعمرج راح اصير خالة الله شكد حلوو هل احساس الف الف مبروووك حبيبتي عسسى ربي يتمم عليكم بالخير وتشوفينه يلعب بحضنج يارب
شهلاء ..اشكرج حياتي تسلميلي
زهور ..طكيت بجي وحظنتها لشهلاء مكدرت احجي شي بس دموعي تنزل ع خدي
شهلاء ..مسحت دموعها لامي كتلها لتبجين ماما حبيبتي الحمدلله ربي استجاب دعائج الي وحقق حلمي ان اكون أم ادعيلي الله يتمم عليه بالخير يالغالية
زهور ..اوووف يمه هم وجان طابك ع صدري وهسه انزاح بهل خبر الحلو عسى ربي يتمملج ع خير ويكومج بالسلامة يارب واهم شي اتمام الخلقة ..
شهلاء ..امييين يارب ..ومرت الايام والاشهر وجنت احس بثقل فضيع ابطني وصار ع حملي 5 اشهر ولازم اخذ سونار حجزت يم الدكتورة رحت اني وشيماء خلت ابنها يم ماما ورحنه حتى اتجيكني وصل سراية ودخلت وكلتلي الدكتورة اتمددي ع السرير حتى اخذلج سونار ..كشفت عن بطني وحطت الجل وبدت اتمشي الجهاز …وجانت المفاجئة ..
وللحكاية بقية
خو مدللتكم اليوم اني يله اريد تفاعل قوي حتى اروح اصالح الحب مالي ??
#يتبع…….
سارة المجيد?