العنودية والنقيب الشرس – سارة المجيد

مساؤؤؤؤؤؤ ورد وفل ??
#العنودية_والنقيب_الشرس
#المحطة_الحادية_عشر
#بقلمي_سارة_المجيد
❤

❤❤❤❤❤❤❤❤❤❤❤❤

شاهين ..شنوووووووووووو بربج صدك تحجين !!!؟؟
عذراء ..اي والله ع غفلة وكعت بنص المطبخ وشالها جليل واخذوها لمستشفى(….)
شاهين .. اوويلي يالكعبة انوب جليل شايلها يعني لامسها لعد اني وين عنها انعل ابو حظي اخذت سويج سيارتي وركضت للمستشفى وصلت نزلت وطبيت شفت عمي وجليل واكفين يم الطوارئ كتلو ها عمو شنو شبيها شهلاء .
ابراهيم ..مانعرف هسه ديفحصها الدكتور
شاهين ..وليش ماصحتلي اني اخذها وياك شنو تخلي جليل يشيلها
جليل ..ليش وشنو واذا جليل شالها مو ابن عمها اني لو بس حظرتك ابن عمها
شاهين ..اتقدمت عليه ورفعت ايدي وحطيت اصبعي ع خشمو وكتلو انت ماسمع حسك وهاي ايدك اكسرها اذا لمستها بعد افتهمت
ابراهيم ..صحت بيهم كااافي الخاطر الله احنه بيا حال وانتوا دتتعاركون انطموا شوية ترا مو ناقصكم اني ..امشي رجعوا للفاتحه ماريد منكم شي ..بهل لحظة طلع الدكتور وركضنه عليه كنالو ها دكتور بشر شبيها مريضتنه
الدكتور ..ما بيها شي ان شاء الله خفيفة .. مجرد انخفاض بالسكر بسبب قلة الاكل وشكلنالها مغذي وان شاء الله وره مايخلص المغذي تكدرون تطلعوها
شاهين ..اووووف من عنادها شكد كتلها اكليلج لگمة واكعدي شوية ارتاحي بس هيه ابد تعاند ..
الدكتور ..هسه نطيتها مغذي وضربتها ابره من ترجع حاولوا تخلوها تاكل شوية حتى تستعيد قوتها لان جسمها تعبان ومحتاج طاقة
ابراهيم ..ان شاءالله دكتور اشكرك ..اكدر ادخل عليها هسه ..
الدكتور ..اي تكدر بس انت ادخل من يخلص المغذي عود طلعها للبيت
ابراهيم ..ان شاءالله دكتور عاشت ايدك ماقصرت ..طبيت ع شهلاء شفتها نايمه ووجها اصفر شاحب ..

شاهين ..طب عمي يم شهلاء واني كوه لازم اعصابي ع هل نذل كتلو شوف ولك شهلاء بالنسبة الك خط احمر افتهمت اياني وياك تفكر مجرد تفكير بيها
جليل ..لا والله خوفتني ..والله يالله دروح عيني روح منا العالم لتعلي صوتك
شاهين ..كلامو عصبني وكورت قبضة ايدي وردت انفضو ابوكس انيمو بالطوارئ ..كتلو والله لو ما احنه بالمستشفى لا اراويك سواية الله بيك
شهلاء ..فتحت عيني كوه وراسي يريد ينفجر شفت بابا يمي جاعد شافني حظني وكال الحمدلله ع سلامتج بنيتي خوفتينه عليج
شهلاء ..ليش هوه شصار
ابراهيم ..انتي ليش مماكلة من البارحة صار عندج هبوط حاد بالسكر واتخربطتي ..هسه من نرجع اخلي امج بيدها اتوكلج ولتعاندين اكلي
شهلاء ..ماشي بابا ان شاءالله
ابراهيم ..يله خلص المغذي خلي اصيح الممرضه تشيلج الكانونه حتى نطلع
طلعت بره وجان اشوف ذولي الديوك بعدهم يتناكرون من خررب يومكم انتوا شنو بابا متعرفون تتفاهمون بس تتعاركون ترا عيب والله فضحتونه لميتوا العالم علينه خلي ارجع اله اكول لابهاتكم عليكم ..
شاهين ..عمي عوفنه هسه طمني شهلاء شلون صارت
ابراهيم ..صحت الحمدلله صارت احسن هسه اصيح الممرضه حتى تشيللها الكانونه ..
شاهين ..راح عمي وراد جليل يطب ع شهلاء صار كدامي شيطان لزمتو ودفعتو كتلو اكفي شري ترا اجنزك وحق الحق امشي ارجع للفاتحه محد هناك
شفتو خاف من نبرة صوتي لان صدك اتعصبت نفض ايدي منو وعافني وطلع وراح اني طبيت شفت غزالتي نايمة سودة بوجهي هاي شصاير بيها عبالك وحدة ميته اتقربت عليها كتلها شفتي عنادج شلون وكعج كم مرة كتلج اكليلج لكمة ولاسمعتي كلام …
شهلاء ..سمعت صوت شاهين يدردم باوعت عليه وبعدين محجيت ويا درت وجهي من الناحية الثانية
شاهين ..شبيج حبيبي شنو زعلانه مني
شهلاء ..لتحجي ويايه تعبانه
بهل لحظة اجه بابا وويا ممرضه اجتي شلعت الكانونه من ايدي وعقمت مكانها وحطت بلاستر وكالت هاي هيه تكدرون تاخذوها ..سندني بابا وراد شاهين يكمش ايدي وخرتو مقبلت شفتو ضاج طلعنه من المستشفى
ابراهيم ..عجل جليل وين
شاهين ..خليتو يرجع مو بحاجتو احنه ..
ابراهيم ..هههههه اويلي عليك ..
شهلاء ..صعدنه بسيارة شاهين ورجعنه للبيت اول ماوصلنه طبينه للبيت شفت ماما ركضت عليه جانت قلقانه
زهور ..ها يمه خيرج شبيج جنت بلسوك داجيب دشاديش سوده ومن رجعت كالوا شهلاء اتخربطت ظل بالي يمه
ابراهيم ..لتخافين مابيها شي بس خليها تاكل لان من البارحة مماكلة شي وصاير عدها هبوط بالسكر ..
زهور ..اووف منج ومن راسج اليابس شكد صحتلها ع الريوك ولا قبلت وحتى ع الغدة هم ماقبلت شو كدامي امشي داسويلج لكمة حتى غصب تاكلين
شهلاء ..اي شبيكم هسه اكل بس لتصيحون راسي ديوجعني والله
شاهين ..اي هذا من الهبوط خانم امشي اكلي يله ..عمة لتعوفيها اله تاكل
شهلاء ..دحجت عليه وخزرتو بعيوني كلت بگلبي والله كلو بسببك اني وكعت الاكل شعلي ..عفتو طبيت مدرتلو بال ..
شاهين ..يله عمي امشي نرجع للجادر العالم التمت
ابراهيم ..اي ابني يله .
جليل ..ها عمي شلون صارت شهلاء
ابراهيم ..الحمدلله احسن هسه
جليل .ممحتاج شي اسوي الها اني حاظر
شاهين ..اللهم طولج ياروحي ..ياعمي كفينه خيرك مانريد ترا صبري طفح عليك امشي اكعد منا العالم ماريد اطلع البيه عليك ..
جلال ..ادري مخبل ويكدر يسوي اي شي عفتو وطبيت للبيت
شاهين …كضه النهار واني واكف ع رجلي اجيب واودي للجادر بهل الاكل والجايات لحد ماظهري انكسم نصين ..هلكنه هلاك

شهلاء ..يله ماما شبعت والله اريد انام تعبانه
زهور ..ماشي يله اصعدي فوك نامي هنا هوسه متكدرين
شهلاء ..ماشي ..كمت وصعدت كوه .. جنت دايخه حييل بدون وعي وانتباه مني اني الثولة فتحت باب من الغرف وطبيت وسديت الباب واتمددت ع الجرباية وغطيت بالنوم

شاهين ..ستار حروح اسبح واناملي ساعة تره انتهيت
ستار ماشي خوية روح احنه موجودين
شاهين ..صعدت بالحمام الفوك طبيت سبحت وكملت لفيت المنشفه ع خصري ورحت لغرفتي حتى اتمدد شوية هلكت من التعب …فتحت الباب وهنا اني جمدت بمكاني ? هاي منو نايمة ع جربايتي يممة گلبي ممصدك غزالتي نايمة جنها ملاك ع كيفي سديت الباب واتمشيت يمها بهدوء بقيت صافن عليها كمبصت وكعدت يمها بالكاع وقربت وجهي ع وجها استنشقت عطرها افيشششششش بووويه يالهل عطر شلع گلبي وحركني حرك بقيت دحجت عليها وع وجها .. گلبي كام يدك بقوة صار عبالك طبل اتخبلت بدون وعي مني قربت وجهي جان تحس بيه فتحت عيونها هنا هيه جنت رسمي ماكولكم شسوت ..طفرت من الفراش وكفت ع الجرباية وكامت اتكمز ??
شهلاء ..جنت نايمة وغاطه بسابع نومه وماحس الا ع صوت انفاس حارة بوجهي قريبه كوولش فزيت وشفت وجه شاهين قريب ع وجهي هنا اني اتخبلت ماعرف شسوي طفرت وكفت ع الجرباية وكمت اكمز واصيح عليه كتلو شجابك يمي متستحي متكول هاي بنت عمي شلون اتعدا عليها ماعندك غيرة اتخبلت شبيك
شاهين ..نصي صوتج شبيج وجع انزلي من الجرباية لتتخبلين عليه
شهلاء ..غطيت عيني بايدي لان شبه عاري واكف كبالي كتلو امشي وخر..
شاهين ..اتقربت عليها مديت ايدي كتلها تعالي نزلي شبيج سادة عينج شنو شايفه جني
شهلاء ..اذا انت مصلخ واكف متستحي ابتعد عني اني انزل معليك بيه وخر
شاهين ..اللهم طولج ياروحي ..يله وخرت انزلي
شهلاء ..نزلت ركضت ع الباب جان يلزمني من ايدي وشمرني ع الحايط ..حسيت گلبي يريد يطلع من الخوف منو هوه طويل وضخم بتك ايدو لزمني وجتفني وقرب وجها عليه واني ارجف غمضت عيني وكمت اتوسل بي لان العناد والراس اليابس بهل موقف مراح يفيد ويه الشرس ..كتلو اترجاك شاهين خليني انزل اني مريضه ومالي خلك
شاهين ..انتي الي طبيتي لوكر الذيب ومو من السهل تطلعين منه صاحية
شهلاء ..فدوة حبيبي والله مو وكته خليني اروح اترجاك
شاهين ..حرام عليج سلبتي گلبي وعفتي عطشان يلهث مارحمتي حالو صبرت 4 سنوات عليج وكل يوم اكول الله كريم شاهين مصيرها تكبر وتفهم وتعرف حقي عليها وانتي كل ماتكبرين تزيدين الفجوة البينه ..
شهلاء ..ردت اقاومه وافلت من قبضة ايدو جان يعيط بيه ولزم فكي بقوه وكال ابقي بمكانج خلي اكمل كلامي ولج لو ماحبج وربج اعوفج وادور غيرج لان الف وحدة جوه ايدي يتمنن بأشارة وحدة هسه اجيبهن هنا ينامن وهنه الممنونات …بس انتي غير انتي هذا الي اختارج وحطيت ايدها ع صدري هذا الي كسر ظهري كل ماريد اروح انام بحظن غيرج واعوض عن الحنان الي فقدتو منج هذا يمنعني وضربت بايدها ع صدري ..
شهلاء ..فتحت عيوني وصارت نظرتي ع صدرو شفت داك وشم ع صدرو ..كتلو هاي شنو
شاهين ..هذا اسمج يالغبية دكيت اسمج ع صفحة گلبي من كثر حبي الج كمت ماعرف شسوي بروحي صرخت بوجها كتلها والله فلا تستاهلين هل حب .. شفتها ترجف وخايفه ودموعها كامت تنزل وشفايفها ترجف استخطيتها وهديتها وكتلها روحي يابنت الناس ادعيلي النفس عنج تطيب حتى ادور حظن غيرج لان تعبت ..
هديتها وكتلها امشي طلعي من غرفتي الله ينتقم منج ومن گلبي الي عشكج
شهلاء ..اصخام هاي غرفتك ??
شاهين ..هففففففففف لا غرفة ابوية امشي طلعي يله
شهلاء ..فتحت الباب وركضت نزلت جوه جان جسمي ينتفض مثل السعفه عزززة العزاني شلون منتبهت اني طابه لغرفتو من خررب حظي ..نزلت شفت الدنيا مكلوبة وبعدها الناس تروش ..
رحت للصالة كعدت شافتني ماما سئلتني شلون صرت كتلها الحمدلله احسن شوية ..
شيماء ..ولج ستار خبلني كولساع يجي يدحج عليه ويضحك ويأشرلي شسوي اخاف …الووو داحجي وياج يمعودة وين صافنه
شهلاء ..ها شكلتي ..
شيماء ..هلا هنيالي هاي مو ويايه اصلا الماخذ عقلج يتهنا بي خية ?
شهلاء ..احم وجع شبيج غير جنت مريضه وراسي ديفتر ?
شيماء ..اي صحيح حبيبتي سلامتج ..
شاهين ..ردت انام مكدرت بقيت اتكلب بفراشي وبقيت افكر بشهلاء وشكد بنفسي بقت حظنتها وشمتها هل مخلوقه صارت حسرة بالنسبة الي شكد صعبة صارتلي ..حب ايش هذا بس حرمان ..
وانوب هسه لازم ننتظر دورة سنة جديتي حتى نتزوج اووويلي يالكعبة شراح يصبرني حمووت هففففففف شمرت الغطة وكمت خررب هل عيشة لبست دشداشتي السودة ونزلت طلعت للجادر كعدت بالفاتحة
ستار ..ها شو اجيت مو كلت انام ساعة
شاهين ..ستار عوفني بحالي مالي خلكك ..
ستار ..خير خيي شبيك احجيلي ..
شاهين ..احم هيج ماكو شي بس باجر لازم التحق دزوا عليه ..
ستار ..اهاا مسهل خيي ربي يحفظك من كل شر
شاهين ..تسلملي بعد اخوك
صار الليل والناس خفت شوية بقينه بس احنه وبيت عمي ابراهيم وعمي حازم ..طبيت للصالة اتمدد ع الدوشك حسيت رجلي مورمه من الوكفه ..طبت شهلاء وعذراء للصالة صحت عذراء سويلي جاي راسي يوجعني ..
شهلاء ..اني هسه اسويلك
شاهين ..ماريد اكعدي كومي عذراء انتي سويلي جاي
عذراء ..صار هسه دقايق
شهلاء ..راحت عذراء كتلو ممكن اعرف شنو هاي الحركة
شاهين ..نعم تحجين وياي
شهلاء ..لا ويه خيالي ..شنو هل اسلوب وياي شبيك
شاهين ..ردت اعاملج بنفس اسلوبج وياي حتى تعرفين الي دتسوي بيه شنو
شهلاء ..وشمسويتلك اني ..اشو انت الي قهرتني واذيتني اليوم وسكتت محجيت
شاهين ..عدلت كعدتي واتربعت وكتلها شنو عيني قهرتج واذيتج وشلون بله
شهلاء ..اهااا نسيت وكفتك يم اطياف خانم وجنتوا تتمضحكون ويه بعض ومطنشني و
وتدري كوولش زين موقفي من اطياف شنو
شاهين ..طكيت ضحك من حجت هيج يعني هاي انتي مطنكرة وكالبه خلقتج لان شفتيني ويه اطياف كل عقلج
شهلاء ..اي كل عقلي ..ممكن تكول شجنتوا تحجون
شاهين ..ولج البنية طلبت مني طلب ولعلمج تدري بعلاقتي بيج يعني تعرف اني احبج واريدج ..
شهلاء ..اي فهمني شرادت منك احجي
شاهين ..ماشي تعالي بسدي خلي احجيلج لان هذا سر ولازم تكعدين هنا اشرتلها بيدي ..
شهلاء ..??
شاهين ..تعاي عاد تره اسحلج كوه
شهلاء ..كمت وكعدت بسدو ..كتلو احجي
شاهين ..شوفي حبيبي اطياف تعرفين بيها تشتغل معلمة بالمدرسة اليمنه واكو معلم يحبها ويريدها ..بس هيه قبل رفضتو لان جانت تحبني وعبالها اتزوجها ومن شافتني اختاريتج الج من بعد ماكتلها حتى لاتتعلق بيه خطية ..عاد اضطرت تقبل بهذا المعلم
شهلاء ..اي وشنو الربط بوكفتك وياها اليوم
شاهين ..جاييج بالسالفه ..اليوم اطياف جاييها الولد ومفاتحها بالموضوع مرة ثانيه وهيه كلتلي اريدك تسئل عنو بحكم شغلي بالاستخبارات اعرف شلون اطلع تاريخ الواحد ??
شهلاء ..اممممممم ماشي
عذراء ..اتفضل ابن عمي
شاهين ..احم اي عفية عاشت ايدج ..
شهلاء ..شوكت راح تلتحق
شاهين ..باجر ان شاءالله
شهلاء ..ليش شو من وكت مو عساس اسبوع اجازتك
شاهين ..اي بس خابروني صايرة شغلة بالمقر ولازم اروح
شهلاء ..خير ان شاءالله
شاهين ..ان شاءالله خير همست بيني وبينها كتلها راح اشتاقلج
شهلاء ..دنكت راسي وسحبت نفس عميق واتنهدت ..وكفت دمعة بطارف عيني بيدي مسحتها مكدرت ابقه كاعدة كمت من يمو ورحت للمطبخ حتى اشرب مي شفت شيماء بره بالكراج دتحجي ويه ستار اتخبلت هاي شبيها الادبسزز طلعت صحت عليها كتلها شيماء تعالي
شيماء ..عزززة هسه اتخزيني يله حبيبي راح اروح
ستار …خرررب هسه شبيها شهلاء وين شفتج اني ..توج اجيتي
شيماء ..متعرفها الشهلاء متحب هل سوالف يله حروح قبل لتتعصب ..عفت ستار ورحت يم شهلاء كتلها شبيج هسه قابل شمسوين ابن عمي وكاعدة اسولف ويا شكو بيها.
شهلاء ..كدام الناس يكولون ابن عمها وعادي يسولف وياها ..بس اني اعرف البينج وبين ستار شنو واخاف عليج خيتي ..اعرفج انتي متفكرين بعقلج اتفكرين بعاطفتج والوحدة من تكون عاطفية تكون ضعيفه مو قوية …
طبينه جوه ورحنه فرشنه بغرفة ستار نمنه وستار راح بغرفة عبدالرحمن نام ..
اتمددت بفراشي ومن التعب راسا نمت وماحسيت الا ع اصوات اتروش بره طلعت شفت عمة ام شاهين وعمو جاسم ديسولفون ويه شاهين ..طلعت صبحت عليهم شفت شاهين لابس ملابسة العسكرية وشايل جنطتو وتايطلع من صبحت عليهم دار وجهو عليه وكال واخيرا كعدتي شكد انتظرتج تكعدين ياتنبل ههههه
شهلاء ..هههههه شسوي جنت تعبانه محسيت ع نفسي
شاهين ..ديله اودعناكم
ام شاهين ..الله ومحمد وعلي وياك محصن بأسم الله وليدي توصل بالسلامة ان شاءالله ..
شهلاء ..جانت عمة شايلة دولكة مي رشته وره شاهين عوايد اهلنه حتى يرجع المسافر بسلامة ..جنت واكفه وبگلبي غصة وشوق اتهد جبال كل مانريد ننجمع يفرقنه القدر والله يسلمو هوه ماعندو صبر ويريد اعيشو باحظاني .واني ماتربيت اكون ضعيفة نفس واسلم نفسي لحبيبي بدون الحلال ..
اني مؤمنه بربي انو راح يكون شاهين من نصيبي ويجي يوم ونزوج ونعيش ابحضان بعض وللابد ان شاءالله ..
عيني غوركت من شفتو ببدلتو العسكرية وشايل جنطتو وطلع وصعد بسيارتو وراح لبغداد اخذ گلبي ويا اوووووف

شاهين ..طبعا شهلاء اتكابر ادري بيها تتمنى تحظني بس للاسف متكدر اكو شي بيها يمنعها واكيد كبريائها ..اوووف منج يشهلة اوووف ..بعد مسافة الطريق وصلت لبغداد ورحت للمقر طبيت كتلو للجندي طلال اخذ سيارتي وعبيها بانزين واغسلها
طلال ..صار سيدي
شاهين ..طبعا جنه دنحجي اني واصدقائي الضباط ع المدرسة وايام قبل وكلمن يسولف مواقفو الي صارت ويا ف اني سولفالهم هاي السالفه هههههه انتوا هم اسمعوها
.. هاي اني جنت كاضب مدرس خصوصي مال رياضيات .. الله يذكرو بلخير استاذ تحسين .. استاذ تحسين اني كاضبو مو حتى يدرسني لا .. حتى اكعد احشش علي .. اسوي بي مقالب .. مره خبطتلو مسهل ويا الجاي وخليتو كاعد بلحمام .. وطفيت الضوه علي .. وهو بلحمام اشمر علي طرقات .. ومره افشش تايرات سيارتو .. ومره جمعتلو قواطي وشديتهن بخيط مال سمج وبراسة سنارة وهو يمشي بلساحة وشكلتها بذيل السترة مالتو هوه يمشي والطركعة وره .. وهواي الامور .. لكن اخر شي .. بنهاية السنة .. طلعت معدل ٨٩ بلرياضيات .. لزكتلو استاذ زودني درجة .. حتى انعفي .. هوه كال ابد .. لو تموت .. سويت بيه عمل الله تريدني اعفيك .. اني كتلو ما تعفيني كال ابد روح .. كتلو خوش .. هوه يطبك سيارتو جوه الشجرة مال قلم طوز عالية .. افتريت عليها كسرت اللايتات كسرت الكلوبات المري .. كلبي ما برد .. شلت بلوكة وصعدت ع شجرة كوه اني شايل البلوكة .. وجان اهدها من فوك وتسحك الجامه الكدام وتكعد بلكرسي مال السايق وخليت وانهزمت … ثاني يوم مكلوبة الدنيا يردون يعرفون منو كسر السيارة .. منو رجال واخو اخته من الطلاب الي يكدر يكول هذا شاهين الكسرها .. يبتلي انا اخو هدلة الكل تخاف منو .. المهم ضلت سكته .. ومن تجي النتايج خطية طلع عافيني .. ومن كملت الاعداية والكلية واتعينت مانسيت العملة مالتي خطية حرام عليه خسرتو سيارة وهوه عافيني بدرس الرياضيات ..تالي من نزلت هل نزله رحت علي ع المدرسة كالوا طلع تقاعد .. اني اندل عنوانو ف رحت ع بيتهم .. دكيت الباب طلعلي طبعا ما عرفني .. كتلو شلونك استاذ اني شاهين .. هوه شافني بملابسي العسكرية فد فرح .. كال ما شاء الله ضابط شاهين .. كتلو اي استاذ .. طببني وكعدنه بلحديقة نتذكر المدرسة وهيج وعاد ذكرتو بلحادثة .. ضحك هوه .. كال اني كلت والله هل سوالف فلا يسويها غيرو بس انت الموكف المدرسة ع حيلها جنت ..ضحكت كتلو وجيت اعتذر منك هسه .. وجبتلك هاي السيارة هديه .. اشتريتها اله والله .. خطية فد فرح وبوسني ..
اصدقائي الضباط كلهم ضحكوا ع الدكايك مالتي
تالي كلمن راح لمكتبو
ورحت لمكتبي حطيت جنطتي ع السرير وطب عليه الجندي قيس كال سيدي اختاروك ويه كم ضابط بتفتيش هداية جايه لسيادة الرئيس صدام حسين ..

وللحكاية بقية ..

لتنسوون التصويت حبايب گلبي

#يتبع …

#سارة_المجيد?