رواية اكحيلة
رواية اكحيلة??
?الرواية بقلمي الكاتبه زهور جمال الدين?
??الحلقه الاولى??
قصتنا على تجار الموت …
تجار السلاح والمخدرات لما يكونو عائلات وشادة السوق ومحمية من الدولة ..
بداية قصتنا من زمااااان … من 20 سنه …
لما عيلة عبدالعاطى بوهم تزوج مراءة ثانية بعد وفاه امهم بسنوووووات …ودس على ولاده خبر الزواج هدا …
بوهم عمك حمد ملقبينه الجمل ..لانه نوعه يحمل فى قلبه هلبا وماينساش … عنده ثلاث ولاد .. كمال ولده الكبير ويده اليمين واللى عابى عليه فى كل شى
والولد الثانى اسمه خالد ماشيه اموره ومايقولش لخوه كمال لا نهائياً
والولد الاخير هوا اللى فالقه .. منير …كل مايديرو حاجه لازم يغلط ويصلحو وراه
القصه ان كمال وخالد متزوجين ..كمال اتزوج بنت خاله من عيلة الشيبانى.. بوها واحد من الروس الكبار.. ناسبه الاب خدى اخته .. وبعد سنين زادو تناسبو وخدى كمال بنته ..ماشيه امورهم ..عنده زوز بنات وولد .. احمد عمره 5 سنين ونرمين 3 سنوات واميرة 5 شهور
وخالد تزوج بنت صاحب بوه اكبر راس فيهم ملقبينه الجدر..يانارى هوا مايبيهاش ..لكن بوه سيف عليه وقاله هكى المصلحه حكمت ..خوك مناسب الشيبانى وانت مناسب الجدر ..عنده زوز ولاد محمد عمره 4 سنين وامين عمره 3 سنوات
وفى هداكه الوقت منير مزال عزرى ومش متزوج …
بوهم عمك حمد تعرف على وحدة بيضا من الجنوب.. هداكة الزين وهداكه الجمال وصفى البشرة والفم الصغير اللى لونه داكن ياخد العقل…
وكان مستغنى معبى فلوس ومشهور هلبا خاصه فجماعه الجنوب وطريق النيجر .. الخدمه والدق كلهت غادى …
جماعه الجنوب فيهم عيلة كبيرة من الروس الكبار ملقبينهم الفهودة.. عمك حمد شاف بنتهم عفاف بالصدفه فجنان حوشهم ..حبها عجباته هلبا …
تزوجوها وخلاها فالجنوب .. ماقال عليها لحد..منغير التابع متعه عمك الهادى وبعض من النقربين اللى يخدمو فيه هما اللى يعرفو بس …
وشرط عليها لا تحمل لا تضنى…وهيا وافقت
لكن يشاء القدر مسكينه انها حملت من اول شهر .. نقزت من السرير رفعت قرب الميه وشى شى هاديكه البنيه لاصقه …
كلموه خوتها وقالوله راهى بتجيها بقطع رقبتها محاولاتها للاجهاص .. خليها توصل هالعيل ومرة ثانيه معش تعاود صنعتها …طبعا هما كلهم يخافو منه موووووت ومن ولده كمال
قول رضى وسكت لكن قاللهم البنيه تقعد هنايا مع امها وماتطلعش من الجنوب نهائي ولا تمشى لطرابلس …
انولدت البنيه…وبالصدفه حمد كان حاضر الولادة فالجنوب … البنوته زى القمر هادوكه الجدوق ينقطو بالدم وهادوكه الرموش خشت قلب بوها من اول نضرة..
-حمد : شوفيها محلاها يا عفاف زى الملاك
-عفاف : الحمدلله انك تقبلتها يا حمد كنت خايفه انك تكرهها
-حمد قام البنوته فى غمره وباسها:حد يكره ضناه بعد مايشوفه يا عفاف
-عفاف فرحانه : وشن بتسميها
-حمد: اسمها نازل معاها ملاك ..
وسموها ملاك ….ومشت الايام وبدت تكبر ..هاديكه البيوضيه والشعر الناعم ..والدلع وحالة ماديرة فى روحها هاديكا البنوته واخدة عقل بوها ..وقبل ماتنولد كان يجى فى كل 5 شهور مرة ..من لما تعلق بالبنية بدى يجى كل 15 يوم مرة يبات ليلتين ويروح لطرابلس وهكدا والاولاد ماسمعوش بهاديكا الوخيه اللى جت لبوهم ..
وبعد سنتين.. يوم من الايام عمك حمد مروح من الجنوب تنقلب بيه السيارة … اللى راكب جنبه مات فمكانه …. وهوا سعفوه مع السواق..ويطيرو بيه لطرابلس …قعد ثلاثه ايام فالعنايه ..رابع يوم فاق ..
ولاده خالد وكمال فى جنبه …
وهوا يتكلم بصعوبة ..
-حمد شبه منتهى: وخيتكم يا كمال
-كمال مواطى راسه بيش يسمع بوه كويس : شن تقول يابوى والله مافهمتك
-حمد : ملااااك …وخيتكم ..ماتسيبوهاش
-كمال?: ااه شن حسك قلت ..وخيتنا .. منو وخيتنا مفهمتكش يابوى
-خالد : غير بالشوى يا كمال خلينا نفهمو
-حمد يتكلم بصعوبة كلام متقطع : اختكم .. ملاك.. مع امها فالجنوب .. جيبوهم عندكم متخلوهاش عند خوالها .. اسألو الهادى تو يدلكم علل مكانها
-كمال مصدوم وعيونه دمعو : كون هانى يا بوى
وشخر عمك حمد شخرة مووووت ….وتوفى بين ولاده الزوز فالمستشفى
بكو كمال وخالد واضبطو بعضهم ..وعزو بعضهم
..بعتالى ولالهم عقلهم
-كمال : خبر وفاة بوى مزال ماتطلعش يا خالد
-خالد : حتى خبر الحادث لتوة مطلعش زى ماوصيت انت
-كمال : اصبر انشوفو امورنا والبزنس متاعنا ..تى والله جماعه طريق النيجر كان سمعو ببوى مات ماعاد يعترفو بينا
-خالد : والعقربان ..رد بالك منه يا كمال
-كمال : انا العقربان مش مدوره …لكن فرخ الربي ولده اللى طلعنا جديد
-خالد : قصدك اكحيلة
-كمال : ومن غيره
-خالد : والبنت اللى طلعتنا جديدة هادى…امها بروحها بتاخد ثمن التركه كلها منغير ورثة البنت
-كمال : توة غير حط بوك فالثلاجة هنينى يا خالد …وجيبلى للفيلا الهادى اللى يعرف طريق البنية والمحامى
-خالد ضرب كمال على كتفه: لكن سقد بالمحامى هوا الاول كان بتاخد بصمه صبع بوك قبل مايثلج
-كمال : بالزبط …انت هنى على بوك وانا تو نمشى للمحامى فى حوشه وانتكم الامور
-خالد : وبعدها نقولو على وفاة الحاج
-كمال : رد بالك لا لا مزال .. خلى نصفى امورى مع جماعه الجنوب قبل …وبعتالى نعلنو خبر وفاة بوى
-خالد : باهى سقد يا كمال
-كمال : اعطينى ثلاثه ايام بس…
وبالفعل مشى كمال للمحامى ودار عقود ان بوه حاط الورثة كاملة خالصه مخلصه باسمه هوا وخالد ومنير بس بس … ورفع الاوراق للثلاجه وطلع طبع بوه وبصمه عالاوراق وهنى عالرزق
وفالليل جاب اللى يقولوله الهادى كان سواق بوهم والمرافق الشخصى ليه مدشدش مع بعضه يانارى حتى هوا كان معاه فالحادث….
سألوه عالبنيه وقاللهم على خوالها الفهودة..وطبعا كمال يعرفهم حتى هما معاهم فى نفس التجارة .. حكالهم على امها بنت الفهودة و اسمها عفاف وان بوهم بانيلها فيلا فالجنوب وكاتبها باسمها ..وواخدلها هكتارات فالجنوب وكاتبهم باسم ملاك وامها ..
كمال قريب مات لما سمع بوه مناسب الفهودة المدة هادى كلها وهوا زى الاطرش فالزفه ..مع انه يعرفهم وعلى طول يتلاقى معاهم .. دار كمال تداكر طيارة وتسقد للجنوب
-سليمان : قلتلك يا بوى انا متاكد من الخبر حمد عبدالعاطى هوا اللى كان فى السيارة المقلوبة
…ونقص ايدى كان مايطلعش توفى
-سعيد : ..رانى العقربان بى يدرق عليا خبر موتت الجمل …
-سليمان : يابوى اللى شافوه متاكدين ان سيارت الجمل هيا اللى انقلبت
-سعيد : هالخبر مايدرق ..الا الموت فيسع يطلع خبرها
-سليمان : اهيا الايام وتو تثبتلك كلامى
سعيد ميلاد راس كبيرة حتى هوا فالتجارة السودة ..والمنافس ل احمد عبدالعاطى .. ملقبينه العقربان لان مع تجارته ماعنداش صاحب واللى يغلط يصكه صكة موت زى العقربان .. وعنده زوز ولاد ..سليمان عمره 14 سنه بطّل من القراية وواقف مع بوه ..وشرب منه الصنعه وبدى يده اليمين وملقبينه اكحيلة لانه شخصيته زى الفرس قنين هلبا ولبق وحادق ومايفوت عليه شى ..وولده الثانى اسمه وحيد عمره 9 سنه يقرا فى صف الرابع
-خش المرزوقى: سيدى اكحيلة
-سليمان : نعم
-المرزوقى : يبوك جماعه برة
-سليمان : منهما خليهم يخشو
-المرزوقى غمزله : يبوك بروحك …
سليمان استغرب وطلع ..ولحقه المرزوقى طول للممر
-المرزوقى: غير قلت تطلع بروحك بنقولك على سيدي وحيد .. انت عارف سيدي سعيد ضغطه معش يتحمل
-سليمان انشغل: خيره وحيد
-المرزوقى: ضارب ولاد فالمدرسة زوز منهم رفعوهم للمستشفى وثلاثه داووهم فالمدرسه
-سليمان مايطيقش فى خوه وحيد بكل: توووة تمشى تجيبه يامرزوقى تخافهم يضربوه المدرسات وانا اهو بنمشيلهم توة
-المرزوقى: تم اهو طالع بنجيبه
وبالفعل مشى المرزوقى جاب وحيد من المدرسه .. ومشى سليمان للادارة وعد بدفع التصليحات متع الحاجات اللى تكسرت كلها …وسكتهم بالفلوس
بعد ثلاثه ايام ….
-كمال: متوقعتهاش منك يا جلال
-جلال: حكم القوى يا كمال..بوك منعنا نقولو لحد
-كمال : عموما يصير خير .. وزى ماحكيتلك خبر الوفاة مزال مانبيش نقوله توة ..وانت نفس الشى ماتقولاش لاختك لين انا نكلمك ..ولا حكايه ان بوى عنده بنت ..موضوع مزال سابق لاوانه يطلع توة ..والمبلغ الشهرى اللى اتفقنا عليه يوصلها كل شهر بالتمام والكمال
-جلال : والله يا كمال انا اختى عندى مانفرطش فيها ..والبنيه بنتكم ومانمنعوكمش عليها
-كمال : اوراق الحوش والاراضى اللى باسم اختك شفتهم وحلال عليها ..لكن الرزق اللى غادى كله مسجله بوى باسمى انا وخوتى الزوز
-جلال وجهه تغير: بالصحة عليكم ..
وتلفتله: ماتبيش تشوف اختك
-كمال قام راسه مخلوع : لا خليها مرة ثانية موعد الطيارة قرب وانا عطلت
وروح كمال من الجنوب ..مهنى على خدمه بوه كلها ..كل المواضيع تمها معاهم وبدى هوا الرايس …وسمى روحه القعود على اسم بوه الجمل ..
وصل كمال طرابلس وسجل الرزق كله فالشهر العقارى ليه ولخوته .. وبعد يومين واعلن خبر وفاة بوه فى حادث …
ودارو لبوهم جنازة تليق بيه
من ضمن اللى جو عزو ..عمك سعيد ميلاد وولده سليمان وباقى الحاشيه متاعه
كمال وخالد واقفين يتقبلو فالعزى
-خالد نخص كمال : شوف منو خاش من الباب
-كمال نضره ضعيف : شكون
-خالد : العقربان
-كمال: معاه كحيلة
-خالد يوشوش : طبعا معاه لاصق فيه زى القرادة بيش يعرفه عالروس الكبيرة كلها
خش سعيد وولده وصلو لكمال وخوه
عزاهم سعي الزوز ..وبعده سليمان وقف يعزى
– سليمان : عظم اللى اجرك يا خالد
-خالد معنداش ليه خلوق: شكر الله سعيك يا سليمان
-سليمان : عظم الله اجرك يا كمال
-كمال : شكر الله سعيك
-سليمان : مش زى كأنكم تأخرتو فى اعلان خبر الوفاة
-كمال بدى يزرط دار روحه ماسمعاش: تفضلو عالصالونات اللداخل ياحاج سعيد
خشو سليمان وبوه للصالونات لقو الروس الكبيرة كلها ..
-سليمان : مش قلتلك يابوى
-سعيد : لابدة عندهم مايلمو قبل مايقولو بوى مات ..
وضحك : تى ماهو ياداير يا لاقى حتى بوهم هكى دار..دس وفاة بوه و قال عليها بعد مت مات ب 15 يوم
سليمان مقعمز هاتفه الثريا شرين .. فتح الخط
-سليمان : الو
-مريم : جيت للوفاة
-سليمان: انتى بي اما لغة تفهمى
وسكر الخط : الرباية الناتنه ?
-سعيد اتكى عليه : منو
-سليمان : ماديرش فى بالك يابوى ناس فاضيه
وعند النساوين ..
طبعا خالد وكمال الزوز متزوجين وساكنين مع بوهم …قاعدين ياكلو على طاولة وحدة
-سهام اخت مريم : يا مريم
-مريم : نعم
-سهام : ولدك محمد من بكرى وهوا يضرب فى نرمين بنت عمه راهو
-مريم : وينه جيبيهولى
-سهام : هوا لوطا فالجنان
وسرحت مريم .. ادكرت لما شافت سليمان اول مرة فى حوش بوها …
مريم متزوجه خالد ولد حمد عبدالعاطى.. بوها الجدر على سن ورمح .. بنت عيلة وبنت اوصول ..لكن القاب الاحرف مرات يرفعك لحاجات فوق ارادتك ..تزوجت خالد وفرحانه بيه لقاته انسان بارد وهيا يا حنه شهلولية ..لقاته لا يدلع ولا يتكلم ولا يحب يطلعها ..خدمه وخلاص ..تباع لخوه كمال وهيا مايدرى عليها وين حاطها ربي ..
فى يوم هيا فى حوش بوها وتلاقت مع سليمان بالصدفه ..شاب قنين وملفت للنضر..صح صغير فالعمر لكن الله غالب القلب كبد خلاص ..
كل ارقامهالثريا والارضى..والثريا السري عندها
..تخنب فيهم من تليفون بوها ..
لكن هوا ماستجابش معاها نهائيا ..ولا عطاها وجه ..وهدا اللى مهبلها …
وتمت الوفاة وقعدت هاديكا البنية مع امها فى فى الجنوب … طبعا عفاف ربطت على راجلها …وقاعدة مع خوتها وتربى فى بنتها …خوها جلال الفهد راس كبيرة والكل يديرله فى الف حساب
وبعد سنتين …عفاف جاها الورم عافانا الله …
وفى اياماتها الاخيرة جلال كلم كمال ..قاله انا عندى ولاد وخوى نفس الشى ..واختكم بنيه وسيورها تكبر ..ديرو حل من توة انكم ترفعوها معاكم فى حال ربي خدى امانته وامها توفت
والمشكله ان كمال وخالد ماقالو عليها لحد
فقاله خالد اسلم شى نرفعوها للفيلا اللى فى تونس..نحطولها خدم ..ومربيه ..وتقعد تقرا غادى ..هيا توة عمرها اربعةسنوات ..وتخيلو لهده اللحظه خوتها ماشافوهاش …
وتوفت عفاف .. ودارو خوتها العزى ..وبعت كمال الهادى السواق وكلفه انه ايأمن على ملاك ويرفعها لتونس .. رفع معاها المربية اللى كانت تعاون فى امها عمتى سليمه …ومشت ملاك لتونس ..
وبعد سنتين يشاء القدر ان يجى للشرطه عميد قوى شادها فى جرت تجار السموم
وداير قائمه باسامى المشتبه فيهم ويبي يشدهم
…فكان لازم من طلوعهم من ليبيا ..
وكان من ضمنهم كمال وخالد وسليمان …
وبالفعل طلعو كمال وخالد مشو لتونس وخلو عائلاتهم فى ليبيا لين يهدا الوضع ويشوفو حل للعميد الجديد هدا ..لان هنا اصلا الدولة هيا اللى تحمى فيهم … اما سليمان مشى لسوريا …
لما مشو الخوت الزوز لحوشهم فى تونس ..يتفاجئو بالبنوته العسل اللى هيا وخيتهم ملاك ..
البنية قنينه وكلها حياة وحيوية ..وضحك وجرى …هبلتهم فى جرتها ..قاعدة كيف تقرا فى صف الاول
-ملاك : خاند هيا نوض
-خالد : قلنالك اسمى خالد خيرك هكى.. كبرتى وبديتى تقرى فالمدرسه وقاعدة خنه …وبعتالى خلينى نرقد مزال الوقت
-ملاك : تى باهى عمى كمال وينه
-خالد يضحك: كمال خوك قوليله خوى كمال مش عمى
خش كمال الغرفه…مشتلها ملاك تجرى قامها فى غمره …
والمشاعر متع خوتها كلها تبدلت ..وحسو بشعور الاخت اللى هما مايعرفوشى حتى لو كانت صغيرة …
مريم دارت صغارها ومشت لتونس كلمت خالد قالتله بنمشى نوسع خاطرى انا والصغار
بدل ماتلحق راجلها ..لاحقه الحب❤
وياريته حتى معدل عليها ولا حاسبها ..هيا جت لسوريا وكلماته دار تدكرة وطلع للجزائر ..
اما عمتك ملاك خشت خاطر خوتها وقررو الزوز انهم يروحو بيها معاهم ليبيا …لما تنتهى الازمه
وبالفعل بعد اربع شهور طيرو هاداكة العميد النظيف وحطو واحد متع لهط فلوس وروحو الروس اللى طالعه من البلاد كلهم لحياشهم
وخش كمال شاد اخته ملاك اللى عمرها 6 سنوات فى يده
– زينب مرت كمال انخلعت تحسابها بنته : هادى منو يا كمال
-كمال : ملاك برى سلمى على عمتك زينب
-مريم كيف بتتشمت : تى منو هادى فهمونا
-كمال : هادى اختك
-زينب : كيف اختك بسم الله
-خالد : بوى كان متزوج وجاب البنوته هادى …
-مريم : ووين امها
-كمال: امها توفت
-سيرين تشبحلها : انتى بكوشه
-ملاك : لا لا نعرف نتكلم
-خالد : تى هادى لسانها لايد برقبتها غير اصبرو عليها شوى
زينب ومريم يشبحولها وخلاص
تمت .. ويتبع??
القصه كيف بدت ومزالو الحلقات طوال …
نحبكم ❤❤