رواية اكحيلة
??للكاتبه زهور جمال الدين ??
??الحلقة السادسة??
ملاك فى دارها مضايقه من تصرفات زينب مرت خوها
طق باب دارها
-ملاك: تفضلى شكون
-اميرة: انا اميرة يا لوكا
-ملاك : خشى مرمورة
-اميرة : غير شنو العيون منفخات والحالة حالة ..قعدة زعلانه من امى
-ملاك : الزواج نصيبات وهيا كبرت الحكايه
-اميرة : انتى تعرفيها امى قداش طيبه وقداش تحبك.. غير ماهانش عليها خوها ردت فعلها طبيعيه راهو
طق الباب وخشت سيرين
-سيرين: غير خيره القمر
-ملاك : لا لا عادى مافى شى
-سيرين : توة يا مهبولة فى وحدة فالدنيا ترفض خالى سلطان
-ملاك : انا مرفضتاش هوا يا ناس افهمونى..انا موضوع الزواج فى حد داته مش مفكرة فيه توة
-سيرين : لاااا اما انا بالنسبه ليا مفكرة فيه وجد الجد
-اميرة متكيه جنب ملاك فالسرير: صار بيجينا نسيب توة
-سيرين: ومش اى نسيب ..حيه كانا تشوفو شخصيته ..حيه كانا تشوفو كلامه ونضرت عينه
-ملاك : شكلك غاطسه
-سيرين: غاطسه ونعوم ونسبح بلا نضارات عوم ??
-اميرة : يا حليلى
-سيرين : اول مرة نحب يا ناس ..اول مرة نجرب الحب من النضرة الاولى
-ملاك : كل واحد تحبه تقول اول مرة نحب يا ناس
-سيرين : لا هدا غير..وبأدن الله حنجاهد لين نوصله ..ويكون نسيب بابا
-اميرة : انشالله ..صار نبدو نوتو فى قفطان العرس والعدسات من توة
-سيرين : وتى يا حبي من توة ..لانى بأدن الله اعلنت الجهاد وحنوصله يعنى نوصله
-اميرة : باهى كويس يا ابومصعب الزرقاوى
وقعدت تضحك …
وبدو يسمعو فى صوت زينب : اميرةةةة …سيرييين
وينكم
-سيرين : اهو احنا هنايا يا ماما
-زينب: تعالو
-اميرة تضحك : باى توة خلى نمشو للجهه الثانيه من الجبهه ??
وطلعو وقعدت ملاك تخمم : اكيدة سليمان يتصل ويلقى فيا مقفل …خلى نفتح تليفونى …استاحشته
و تفكر: انا لازم نعترفله ونقوله انا بنت منو …وخلى الحكاية يا توقف يا تستمر ..
لانه لتوة مزال ماحكى شى على مشاعره تجاهى
..بالرغم انا حاسه بحبه ليا ..لكن هوا يبيش يتكلم لين يزبطنى انا شكون وبنت شكون …
قررت انها تفتح تليفونها وتكلمه
__________________________
سليمان قاعد مقعمز والفرقه تغنى …
المطرب يغنى: خليها ..خليها ..خليها بالنصيب ..
-سليمان يعيط عليه: قلتلك غنى عالخوووونه
-المطرب غير اللحن طول ?: وصلتينا لنص البير وقطعتى الحبلي بينا ويلى ويلى
??????
خوه وحيد يشبح كيف صاير فيه جاه قعمز جنبه
-وحيد : سليمان خيرك شن فى
-سليمان : مافى شى غير طلعت حمار وغبى و مضحكة بس
-وحيد : ماعاش من يضحك على اكحيلة ..غير هيا نوض انروحو وبعتالى ساهل
وشرين تليفون سليمان …شافه وحيد لقاه ملاكي يتصل بك …
قام سليمان تليفونه وسكر عليها …
عاودت مرة ثانيه رد
-سليمان : شن تبى
-ملاك انصدمت من الرد : من معاى
-سليمان : معاك اكحيلة ..تفضلى شن تبى
-ملاك تسمع فى موسيقى: سليمان ..انت وين وليش ترد عليا هكى
-سليمان : انا فى حفله يغنو عالخونه والخوانات
-ملاك: انت سكران
هوا يبي ياخد راحته فالدوة ..تلفت للجه الثانيه وخلى وحيد وراه
-سليمان معش متحكم فى نفسه : عجبك سلطان
-ملاك انصدمت : من سلطان
-سليمان : سلطان العريس..يا ملاك حمد عبدالعاطى
-ملاك تلخبطت : سليمان انا مالاول قلتلك اعطينى يومين وحنقولك انا شكون
الفرقه كملت الاغنيه وسكتت
-بالصدفه سليمان وقف : انا مايهمنيش انتى شكون …انا اللى يهمنى الضحكة ..اللى يهمنى الخونه
وهادوكا البنات والاولاد كلهم يتفرجو عليه وساكتين
-ملاك تعيط : سليمان اهدى خلينى نفهمك اللى صار
طلع من الاستراحة للجنان ..
-سليمان : لكن تعرفى انتى ماغلطيش …انا اللى غالط …هوا اصلا مفيش خونه فالموضوع ..صحه ليك انتى فالحة ومن الاول تعاودى وتكررى فيها اللى بينا صداقه …صح وين الخونه فالموضوع غير انا حمار وطحت قبل الضربه
-ملاك: سليمان اعطينى فرصه نتكلم تربح
-سليمان : انتى مش قلتى بعد مابنعرفك اخت شكون كل واحد مننا يمسح رقم الثانى …
خلاص انا عرفت انك بنت حمد عبدالعاطى
واخت كمال وخالد …امسحى رقمى وبري فى حالك
-ملاك تبكى?: يعنى هدا رايك
-سليمان : لاااا هدا رايك انتى ..مش انتى هكى قلتى اول امس ولا
-ملاك : متاكد معش تبى تسمع صوتى
-سكت سليمان شوى ..وغمض عيونه: ايه معش نبى نسمع صوتك
-ملاك وجعها خاطرها وناضت عليها كرامتها : باهى براحتك ..
وسكرت الخط ….
حطت تليفونها عالسرير وقعدت تبكى …
__________________________
سيرين فى دارها ….
جايتها حياة صاحبتها….
-سرين: تدكرى الخطة اللى حكيتلك عليها وكنت نبى نديرها لوحيد غير محصلتش عليه
-حياة: ايه مدكرتها
-سيرين: بنديرها لخوه
-حياة: مفهمتش بديريها لخوه بيش تتزوجى انتى ووحيد ولا
-سيرين باستهزاء: لاا لاااا منو وحيد هدا ..معش عندى ليه خلوق ولا نشبحله حتى بنص عين
-حياة: امالا شنو الحكاية فهمينى
-سيرين: الحكاية ان وحيد زى ما انتى عارفه كان عناد وتكسيرة خشم ..اما خوه حيه عليا قلبي طاح من اول نظرة شفته فيها
-حياة: سيرين يا حبيبت قلبى ..خودى كلامى واسمعى رائي بطليها حركه ان اللى تحبيه تجيبيه بلوية الدراع
-سيرين: امالا كيف
-حياة: مفيش خير من الحب والانسجام والحنية
-سيرين: باهى انا منعرفاش كيف بندير
-حياة : شوفيه وين يخدم ..خودى تليفونه ..تعرفى عليه..مش كل شى جهدى جهدك راهو
-سيرين: تصدقى كلامك عجبنى ..
وتلفتتلها: باهى تساعدينى
-حياة: نساعدك باللى نقدر عليه ..لكن ننصحك خلى الكلام بينى وبينك ..لان فى من صاحباتك اللى حاسدينك ومايتمنولكش الخير راهو
-سيرين تفكر: انشالله خير
__________________________
خشت سليمه للدار لقت ملاك تبكى ..
-سليمه : ملاك خير
-ملاك : شى
جابت طاسه اميه وشربتها لملاك
-سليمه : غير معش تبكى..وكانك على ابلة زينب عطاها بكرى سيدى كمال على راسها ماخلى ماسمعها قدامنا كلنا
-ملاك : انا مش على ابلة زينب
-سليمه : ملاك جاوبينى بصدق..انتى تكلمى فى واحد ؟؟
-ملاك تفاجئت: منو واحد ..كيف يعنى
-سليمه : بالك تحسابينى مانفهمش .. الليالى اللى فاتو كلها نمشى نرقد مع اميرة عارفتك تتكلمى فالتليفون مش تقري
-ملاك: لا والله ..
-سليمه: غير علاش تحلفى ..انا منحاسبش فيك راهو
-ملاك اتكت على سريرها وتلفتت للجهة الثانية: اهو سيبنا بعضنا خلاص وكل حد مشى فى حاله
-سليمه تضحك: سبحان الله زى امك بالزبط لما تزعل
-تلفتتلها ملاك وابتسمت : انتى تعرفيها هلبا ياسليمه
-سليمه : ماعرفتش حد فالدنيا زى ماعرفت عفاف
…لكن عفاف كانت قوية مش زيك انتى شادة المخدة وتبكى
-ملاك : بلحقه ..باهى احكيلى بابا وماما كيف تعرفو .. وكيف تزوجو
-سليمه : قصه طويلة
-ملاك : احكيهالى
-سليمه : بوك اكبر من امك ب24 سنه …لكن بوك كان شخصيه ..بالرغم مش هاداكه الزين ..لكن الرزن زايد فيه النص
-ملاك : باهى
-سليمه : من لما شافاته امك فى جنان حوشهم واقف مع بوها وهيا قالت هدا هوا اللى بناخده ..واللى خش عقلى وقلبي
-ملاك : وهوا ?
-سليمه: هوا ولا حاس بيها ..ولا دارى عليها..نوعه ماكانش نسونجى
-ملاك : باهى وبعتالى
-سليمه : خلاص عفاف كانت مصرة انها تلفتله انتباهه …مرة وهوا مروح تبعتله فطير تقوله روح بيه طرابلس ومرة تبعتله تمر
-ملاك: مع من تبعتله
-سليمه تضحك : معايا انا ..
ملاك بدت تضحك : معقولة
-سليمه : الحمدلله انك ضحكتى
-ملاك : ولفتت انتباهه
-سليمه : لا مزال ثانى ماعطاهاش وجه
-ملاك : وهيا سكتت
-سليمه: قلتلك امك فالحه ..وقوية ..مش زيك انتى بكايه ..وكانت تقولى انا متاكدة انه يبينى يا سليمه غير شاد روحه
– ملاك : كملي
-سليمه: خلاص ..وفى يوم كان الجمل فى سبها
..عفاف دارت روحها مريضه وقالت للسواق ارفعنى للعيادة ..وبعتتنى انا ليه وقلتله عفاف فالعيادة بين الحياة والموت ..ولع سيارته وطارلها
-ملاك : حيه عالفالحه
-سليمه: مش قلتلك امك قوية وتوصل للحاجه اللى تبيها بدكائها .. غير ربي خدى امانته بكرى..زى النفيسة وتقربعت فيها
-ملاك ?: الله يرحمها ويوسع عليها يااارب
-سليمه : اااامين
-ملاك : باهى شنو انا بتساعدينى ولا كيف يصير
-سليمه : فى شنو بنساعدك
-ملاك: حتى انا قررت نكون قوية ..ومانتنازلش عالحاجه اللى نبيها زى ماما وزى سيرين
-سليمه : وكيف بنساعدك
-ملاك : نديرو نفس الخطه ونفس الفكرة ..وتقوليله ملاك بين الحياة والموت بدل من عفاف بين الحياة والموت ??
-سليمه : زمان انا الحاج حمد نعرفه …لكن هدا انا منعرفاش
-ملاك : زمان مافيش تليفونات ولازم تمشى بنفسك بيش المعلومه توصل ..لكن توة فى اختراع اسمه تليفون حتى لو متعرفيشى تقدرى تكلميه
-سليمه: باهى وكيف نديرو
-ملاك : غير البسى نطلعو .. وبعتالى كل شى نديروه برة فالسيارة
-سليمه : هى
وبالفعل لبسو ملاك وسليمه وطلعو فى سيارة ملاك …
هيا تسوق وسليمه فى جنبها
__________________________
فى الاستراحة..
-ميسا : خيره خوك ياوحيد
-وحيد : لا لا شى غير ضغط شغل جاى يوسع فل خاطره
-ميسا : شنو ضغط شغل داير روحك ادرق علينا… خوك مقهور من وحدة خايناته
-هيثم: الحب واعر
-وحيد: تصدقونى والله مانغرف .. ممكن بنت فايتاته او هوا فايتها ..مش فاهم انا
-ميسا: غير شوفه انت كيف يعيط عليها فالتليفون ..شكلها الحكاية كبيرة
-وحيد انسجم : لااا ومسميها ملاكى فالتليفون
-هيثم: معناها احتمال يكون اسمها ملاك
ميسا لما سمعت الاسم يدت تفكر واربط فالاحداث
-وحيد : والله صدقت يا هيثم الحب واعر
-ميسا: غير راجى.. انت قلتلى ان خوك شاف البنت اللى خطفتوها يومها وسألك عليها .. وان البنت اللى يكلم فيها احتمال تكون اسمها ملاك
-هيثم: وليش الاسئلة هادية كلها
-ميسا : انا زى اللى فهمت حاجه
-وحيد : ادوى شن فهمتى
-ميسا : اعطينى يومين بس نتاكد وبعتالى نحكيلك
-وحيد : باهى انا نستادنكم توة خلى نروح بيه
-ميسا : بترجع هنايا ولا معش بترجع
-وحيد : لا تو نجى متروحيش راجينى
-ميسا : باهى ?
وطلع وحيد للجنان يكلم فى سليمان
-وحيد : نوصلك للحوش
-سليمان : وصلنى ايه
ونزل وحيد من الدرج بيركب فى سيارته …
وتلفت للمرزوقى: حسابك معاى بعتالى انت
وركبو للسيارة هوا وسليمان وروحو …
حطه فم الحوش ودور ولى للاستراحه
خش سليمان للحوش لقى بوه فالصالة قعمز هدرز عليه شويا وبعتالى ستادن منه ركب لانه تعبان
عمك سعيد يشبح لولده وحاير …اول مرة يشوفه منهار هكى بالطريقة هادى
خش سليمان داره تلوح عالسرير منغير مايغير حتى حوايجه
__________________________
__________________________
ملاك وسليمه فالسيارة واقفين قدام عيادة الهناء
-ملاك : فهمتى توة
-سليمه : فهمت انشالله غير مانغلطش
-ملاك : المهم ماتتلخبطيش وماتخافيش
خدت ملاك تليفونها واتصلت برقم سليمان..ينادى
سليمان متكى على سريره شاف رقمها مقدرش يقاوم انه ميردش ..حتى كانا بيرد عليها بالتكشيخ والهزيبه ..المهم انه مقدرش يقاوم
-فتح الخط حامق : قلتلك معش ترنى ولا
-سليمه تعيط : الحقنى يا سيدى خالد ملاك بضيع منى دايخة عليا بين حياة وموت
-سليمان ينوض يجى واقف جنب السرير: خيرها ملاك وانتى منو ..هدا رقم ملاك ولا
-سليمه : انت منو ..سامحنى شكلى غلطت فالرقم …نحساب اخر رفم كلمته خوها الد ..شكلى تلخبطت ..مع السلامه خلى نكلمه
وملاك اتأشرللها: سكرى
سكرت سليمه الخط فى وجهه …
وسليمان وين تلقيه عاد شعلت فى قلبه نار وعاود طول لرقم ملاك
شرين فى يد سليمه ..
ملاك : ردى وزى مافهمتك
ردت وفتحت المايك : خوى سكر لحظه خلى نحصل خوتها
-سليمان : ماتكلمى حد ..اهو تو نجى انا .. انتو وين
-سليمه : انت منو خوى ..منقدرش نقولك مكانا
-سليمان : اسمى سليمان مكتوب قدامك ولا ..اوثقى فيا يا اختى
-سليمه : انا منعرفش نقرا شويا بس خلى انتهجاه
-سليمان : تى شنو تتهجيه قلتلك اسمى سليمان
-سليمه : لا يطلع مكتوب رووووحى ..انت اسمك روحى
سليمان انصدم بالاسم وفرح فى نفس الوقت وجاته لحظه صمت
وملاك تسمع من المايك وفرحانه قريب بطير انه خايف عليها
ملاك اشرت لسليمه انها تتكلم
-سليمه : الو خوى
-سليمان : ايوة اختى اعطينى مكانكم وين
-سليمه : احنا فى عيادة الهناء …
وسكر سليمان ونزل يجرى من داره للسيارة طول
-سليمه : هيا ديري روحك دايخه خلى ندخلك
-ملاك : اللى حفظتهولك كله قوليهوله بعتالى
-سليمه : ياودى باهى غير هيا بس الولد قريب يوصل يلقانا مازلنا فم الباب
وبالفعل ملاك دارت روحها دايخه ودخلوها لاسعاف العيادة …
والدكتور حاير..ضغطها كويس وسكرها كويس ..امالا خيرها البنت دايخه ???
بعد ثلث ساعه وصل سليمان للعيادة …اتصل برقم ملاك ردت عليه سليمه نعتتله الجهه اللى هما فيها
مشالهم يجرى …
لقاهم فالاسعاف .. اسرة جنب بعضهم يفصل بيناتهم ستاير
وصل سادس سرير زى ماوصفتله سليمه
-سليمان : السلام عليكم
-سليمه : وعليكم السلام
لقى ملاك راقدة عالسرير … وقف جنبها وشدلها يدها وتلفت لسليمه: خيرها ملاك شن صارلها
-سليمه : منعرفش .. صايرلها ضغط فالحوش اثر عليها لين داخت …
-سليمان: ضغط .. ضغط شنو !؟؟
-سليمه: .مضايقيينها فالحوش على خاطر رفضت عريس ..قلت نطلعها ندير بيها دورة تشم الهوا النظيف شوى داختلى واحنا فالسيارة
شبح سليمان لسليمه وعيونه حمر: كيف فهمينى توة كيف حكاية العريس هادى
وحكتله سليمه ان ملاك رفضت اصلا تقابل العريس .. وماشافهاش …وصارلها ضغط من خوتها والعيلة
..والشى هدا دارلها ضغط اعصاب لين داخت منها …
وسليمان يسمع و افكار ترفعه افكار تجيبه من بيصدق ومن بيكدب ….
لكن توة همه كله ملاك ..خيرها وشن صارلها …
مدتله سليمه الكرسى : تفضل قعمز وانا تو نراجى برة
-سليمان : لا تقدرى تقعدى عادى
-سليمه : لا هما سامحيين بمرافق واحد بس .. خليك انت وتو نطلع انا
هدا كله وملاك هانم دايرة روحها دايخه …
طلعت سليمه …
-ملاك : امممم اممممم..سليمه جيبيلى ميه
-سليمان : استريحى تو نجيبلك انا
-ملاك تلفتتله زعميتا مخلوعه: سليمان ..انت شن ادير هنايا
-سليمان : ربى جابنى بغلطه من المراءة اللى معاك .. غلطت فالرقم بدل ماتتصل بخوك خالد اتصلت بيا انا ..
ويشبحلها ومبتسم : ربي عارف ان هدا مكانى
-تلفتت للجهه الثانيه: حول منبيش نكلمك
-حط سليمان ايده على شعرها : تلفتيلى هيا وبلاش دلع عاد..خيرك سن صايرلك علاش دوختى
-ملاك : برة منبيش نكلمك ..مش قلتلى بري فى حالك بكرى ولا
-سليمان : ملاك خلاص
ناضت ملاك من عالسرير ونزلت قعمزت على كرسى جنبه …هيا وهوا بس ..والستارات دايرة بيهم
” ماصارش من الدوخه ??”
-ملاك : لا مش خلاص .. لعلمك انا سلطان هدا اللى تحكى عليه ماقبلتاش اصلا
-سليمان : عارف
-ملاك : باهى مدامك عارف ليش تعيط عليا بكرى
-سليمان : لانى عرفت بعد عيطت عليك
-ملاك : ومن قالك
-سليمان : العصفورة قالتلى
-ملاك بتنوض : حول مانبيش نقعد معاك
-سليمان قعمزها مسك يديها الزوز : لكن انا نبيك…ونبى نقعد معاك
-ملاك : ليش ..
-سليمان: لانى …….نحبك
-ملاك انصدمت من جرائته ومتوقعتش فيسع يصير هكى ..وتلخبطت : ااه
-شبك صوابعه فى صوابعها : نحبك …ونحبك هلبا لين تشردت من غيرتى
-ملاك : سليمان انااااا
-سليمان : انتى شنو
-ملاك تلخبطت ثانى : ااه
-سليمان : تحبينى ولا لا
-ملاك خجلانه لانه قدامها : مش عارفهه
-سليمان : محلااااك وانتى خجلانه..تنحبي اكثر
-ملاك ناضت عليها وجيعت خاطرها : كسرة الخاطر مش حلوة
-سليمان : فوتى الزعل توة وخليك معاى …قلتلك نحبك ..والله نحبك
-ملاك : لكن انا اخت خالد وكمال
-سليمان : انشالله تكونى اخت الجن الازرق انتى ليا ..الا فى حال انتى ماتبنيش هداكه منقدرش نغصب عليك
-ملاك : شن تقول انت كيف مانبيكش
-سليمان : يعنى تبينى
-ملاك : طبعا نبيك ونحبك
-سليمان: ااه شن قلتى
-ملاك خجلانه : خلاص عاااد
-سليمان : سلملى حبيبي الخجلان وعيون حبيبي
الخجلان ..والله يا ملاك مايوم نتخلى عليك الا بقطع رقبتى
-ملاك : لاااا متقولش هكى ربي يخليك ليا
-سليمان : تحبينى
-ملاك : نحبك ونموت فيك
-سليمان : تتزوجينى
-ملاك فرحانه : طبعا موافقه
سليمان قام ايديها وباس عليهم : نحبك يا نور عينى
ولبسها وشاحها .. وطلعها من الانتظار
__________________________
وهما طالعين الممر فاضى …مسك يدها …وشبك صوابعهم فى بعض …وتلفتلها
-سليمان : حبيبتى.. الموضوع كله خليه سري بينك وبينك لانه مش سهل نهائي
-ملاك : كيف
-سليمان : انا وخوتك مش فالابيض .. خلينى انروق الامور ونتصاحب معاهم على خاطرك
-ملاك فرحانه : على خاطرى ?
-سليمان : على خاطرك نحرق الاخضر واليابس
-ملاك : الله قداش نحبك ..وقداش مشاعرى معاك
-سليمان : بلحقه ماشفتيش سلطان
-ملاك : انا مش شايفه راجل غيرك ..ف بالله عليك معش تسألنى على حد
-سليمان : منو دايرلك مشاكل فالحوش
-ملاك : مرت كمال …لانه خوها
-سليمان : باهى على خاطرى معش تزعلى نفسك
-ملاك : انا من اليوم بديت ملاك ثانيه ..الاولى خلاص
-سليمان : نعشقك
-ملاك : نحبك هلباااااا
-سليمان : خاطرى انضمك
-ملاك تحشمت : لاااا الناس
-سليمان يضحك : معناها حتى انتى خاطرك غير خايفه من الناس
-ملاك تضحك : لاااا خلاص
-سليمان : برى اركبى سيارتك وراجينى نخلص ونجيك
-ملاك : لا والله معاى
-سليمان : مدامك بديتى معاى خلاص ..انسى ان انتى عندك …منو يسوق انتى ولا المراءة اللى معاك
-ملاك : انا
-سليمان : خلاص اهو بنمشى وراك لين توصلى حوشكم
-ملاك : والله مافى داعى
-سليمان : يعنى مش من حقى نخاف عليك
-ملاك : انت اللى من حقك تخاف عليا
-سليمان : خلاص امالا اطلعى وراجينى شوى تو نجى
وطلعت ملاك مشت لسليمه خدتها من يدها..وهيا قريب بطير من الفرح …ماشيين للسيارة
-سليمه : شن صار
-ملاك : قالى نحبك
-سليمه تفاجئت : هى اشبحى هى
وركبو للسيارة وطلع سليمان من العيادة ركب سيارته وهيا تمشى وهوا يمشى وراها لين وصلها جيهتهم ومشى …
بعد ما اطمن عليها سليمان …
لف بسيارته …وقام تليفونه واتصل
-سليمان : الووو
-سلطان: اهلا سليمان
-سليمان : وين نتلاقو
-سلطان : انا فالقهوة تعالة
ومشى سليمان للقهوة …لقى سلطان مقعمز…
-سليمان : السلام عليكم
-سلطان : وعليكم السلام
-سليمان : سلطان نبى نتكلم معاك فى موضوع حصل فيه لبس
-سلطان حاير: موضوع شنو
-سليمان : انت صاحبي ورفيقى وتعرفنى انت بالدات قلبي معاك ابيض
-سلطان : هدا كله عارفه ..بس اللبس فى اما موضوع صاير
-سليمان : انت ماشفتش ملاك صح
-سلطان : من ملاك
-سليمان : ملاك اخت كمال نسيبك
-سلطان تحشم : البنت رفضتنى
-سليمان : احنا يا سلطان صحاب وكل شى بيناتنا بالصراحة…انا البنية نبيها و نكلم فيها ليا ايام
-سلطان تفاجأ: متقوليش نفسها اللى تكلم فيها ليلتها
-سليمان : هيا نفسها
-سلطان : وعلاش ماقلتليش
-سليمان : لانى مكنتش نعرف ان هيا نفس البنت..فى هداكه الوقت قاعد مسألتهاش بنت شكون
-سلطان : والله انك راجل يا سليمان
-سليمان : لا نحب نجى ورا حد ..ولا نحب حد يجى من وراى ..
-سلطان : كل شى بالبركه يا سليمان…وربي يهنيكم
-سليمان : والقلوب صافيه يا صاحبي
-سلطان : الله اكبر ..اصفى من هكى معش فى وانا اول واحد بيوقف معاك ..وكمال وخالد خليهم عليا انا
-سليمان : هادى مشكلتى توة
-سلطان : مفيش مشاكل وصغار عمتى طيبيين غير يتنرفزو بسرعه
-سليمان : انشالله خير
__________________________
-ميسا : اهلين سيرين عاش من شافك
-سيرين : هلا ميوسه
-ميسا : نبيك فى موضوع ضرورى
-سيرين : تعالى
-ميسا: انتى وين
-سيرين : فالحوش ..اهت نراجى فيك
-ميسا : مسافه الطريق
__________________________
تمت …..ويتبع ??
نحبكم ❤