رواية اكحيلة

#اكحيلة

??للكاتبه زهور جمال الدين ??

? ??الحلقه السابعه والعشرون??? 
ماقبل الاخيرة

ومشى كحيلة فى هاديكة اللبسه وركبه خوه الجبل ومن الجبل لدهيبه ومن دهيبه لتونس العاصمه

وملاك وسعيد وسليمه سافرو ..ركبو الطيارة وطارو لمصر ..ونفس اليوم ركبو لقبرص .. لما هيا فى مصر اتصلت بخوتها وقالتلهم انها ماشيه لروسيا مع عمها علاج ..وان اكحيلة قعد فى ليبيا جوازه طايح ايجدده ويلحقهم …
مع ان خوتها ماقتنعوش بالكلام ..معقولة اكحيلة مش قادر ايجدد جوازه فى يوم ..ومع هدا فاتو الموضوع فهمو انه عنده بضاعه بيدخلها وميقدرش يلحقهم لين يستلمها بنفسه
ملاك وهيا فالطيارة مسكينه وجهه رايح اسود عزيها تقبل العزى لان اكحيلة مانعهم من اى مكالمه معاه
نهاااائي ..ولا يفكرو ايكلموه ولا يفكرو يطمنو عليه ..
لانه ناوى يرجع ليبيا فى الخفاء عنده ترتيبات ثانيه بيديرها
الحوش خلو فيه زوز شباب من اللى كانو يخدمو عنده زمان …وجوهم جماعه هداكه المكتب على مرتين للحوش يستدعو فى اكحيلة يلقو فى الشباب هما اللى قاعدين فالحوش ..فقالولهم مايعرفوش مكانه وين ولاعندهم اتصال بيه حاليا
ثالث يوم جو رفعوهم الزوز وحققو معاهم ..عطوهم كفوف املاح وفلقه ..وحلفو انهم مايعرفوشى وين
..وهما بالفعل مش عارفين مكانه..اللى عطاهم المفتاح عمك سعيد ..وبعدها مشى سافر لمصر..هما اكحيلة اصلا ماشافوشى من ايام
المهم طلقوهم ورجعو للحوش مع انهم اغروهم بالفلوس ..اللى عنده معلومه يقدر يقولها مقابل مبلغ مالى وقدره …
بعد ثلاثه ايام رجع وحيد للفيلا ..وتفاهم مع الشباب ان تصير الخونه …ويبلغو فى اكخيلة ..مع الشهادة لله الشباب عارضو ..وقالوله هادى اخرتها انبلغو فى سيدى اكخيلة
-وحيد : تى خير بلاكم ..هوا اللى قاللكم بلغو فيا ..بلا جو شباب عاد
-الشاب : باهى شنو المغزى من التصرف
-وحيد : يبي يدهشهم
وعطلهم احداثيات الخطه كلها …
وبالفعل مشى واحد من الشباب وبلغ

__________________________________

ومشى الشاب بعد ماتفاهم مع وحيد على كل شى لنفس الجهه اللى رفعتهم الايام اللى فاتو
-الضابط: احنا عندنا ناس امعممين صورها عالمطار والبوابات ..ومن ضمنهم هوا ..ولدلك احنا متاكدين انه قاعد داخل البلاد منغير اخباريتك انت
-الشاب : لكن انا عندى معلومه انه بعد ثلاثه ايام بيجى للمخزن متع تاجورا عنده بضاعة ويبينا نستلموها وبالتاكيد هوا ح يكون حاضر
-الضابط : انت متأكد من الاخبارية
-الشاب : اعطينى المبلغ اللى وعدتنى بيه المرة اللى فاتت قبل ..ونعطيك مكانه بالتمام
العريف واقف وراه ضربه كف : رد على سيدى الضابط كويس يا حمار
-الشاب : باهى
-الضابط : اما مخازن قلتلى
-الشاب : يوم الخميس عنده بضاعه بيستلمها فى مخزن تاجورا
-الضابط : كيف شكله مخزن تاجورا هدا ووين مكانه بالزبط
-الشاب: هوا عبارة عن استراحة دايرها لتخزين البضاعه ومكانها فى حوايز تاجورا
-الضابط : وكانا يطلع كلامك كدب وماجاش
-الشاب: عمره ماكدب علينا فى موعد لانه واثق فينا …الا ادا كانا غير نضامه توة
-الضابط : امالا كيف جاى اتبلغ عليه مدامه واثق فيك
-الشاب : الفلوس حلوات يا سيدى الضابط …
-الضابط : باهى برة توة مع العريف غرفه الضابط الثانى واركب معاهم واعطيهم النعته بالزبط ..ولو حسينا بتلاعب منك ..روحك حتكون هيا البديل
-الشاب : تمام

ومشى معاهم ووراهم المكان اللى بيجى فيه ااكخيلة الخميس الصبح …
وبالفعل استنفر الجهاز ودارو خطه محكمه بحيث يطربقو عليه لما يخش …

______________________________

فى قبرص

-ملاك : توة معقولة هكى يا عمى ثلاثه ايام مانعرفوش عليه حتى حاجه
-سعيد : ردى بالك سلم بنتى ..الكلام اللى قالهولك ديريه بالحرف احسن مانقعدو فى كلام ثانى
-ملاك تبكى : ياااربي ساعدنى
-سليمه : كانك تبيه يرجع ردى بالك تغلطى ولا تتصلى.. الدنيا فيها هلبا سلم بنتى
شرين تليفون ملاك شافت لقتها سيرين
-ملاك : اهلين سيرين كيف حالك
-سيرين : تمام ملوكة شنو اخبارك انتى كيف حال سليمه
-ملاك : كويسة وبخير ..كيف حال ابله زينب وابله مريم وخوى خالد
-سيرين: والله كلهم تمام فخيار الخير.. عمى خالد روح ليبيا ليه يومين وبيرجع ثانى
-ملاك : المهم كلكم كويسين
-سيرين : الحمد لله تمام ..قتلك فى وليد ليبي متعرف على خولة صاحبتى هنايا فى تونس .. شوى قاللها كلام قلت نسالك قبل
-ملاك انخلعت : خيره شن قالك
-سيرين : هوا فى لجنه الجرحى ..ويحكيلها عالشباب المصابين اللى ينقلو فيهم لتونس ..من ضمن الاسامى اللى دكرهملها قاللها فى ولد اسمه وحيد مصاب فى عيادة فى صفاقس
-ملاك: غير احكى بالشوى بيش نفهمك ..
-سيرين : غير افهمينى ..البنت تعرف وحيد …لما قالتله يتأكدلها من الاسم قالها اسمه وحيد سعيد ميلاد..معناها وحيد سلفك … شنو وحيد مع الثوار يا ملاك ولا كيف ..مفهمتش راهو
-ملاك وجهها تغير طول خافت على وحيد ناضت طول خشت للدار
-ملاك بدت تبكى : خيره وحيد ياسيرين فهمينى..وكيف تأكدتو انه وحيد سلفى بالك تشابه اسماء
-سيرين : لا هوا وحيد ميلاد فالاكيد …وبعتالى ماتنخلعيش وحيد ماماتش.. داروله بلاتين فى رجله وعنده كسر فى ايديه الزوز وراقد فالعيادة
-ملاك : وراس وخيتى طمنينى عليه بريله يا سيرين
-سيرين : بنمشيله منغير ماتقولى يا ملاك خيرك اهدى …لكن مفروض تبلغى خوه ولا
-ملاك تلخبطت : ااه سليمان قاعد فى ليبيا
..وتليفوناته الثلاثه خارج التغطيه حال هروب الضى ماقدرناش انحصلوه
-سيرين : مش قلتى بيلحقكم .. مزال مالحقش
-ملاك : لا ملحقش مزال لين ايجدد جوازه
-سيرين : تمام انا غدوة الصبح بنركب فالقطار انا وماما بنمشو لصفاقس تو نخطف رجلى ونزوره
-ملاك : وراس سريوة كلمينى لما تكونى جنبه
-سيرين : حاضر حبيبتى ماترعشيش روحك
سكرو الخط .. وجت سليمه للغرفه لقت ملاك تبكى ..
-سليمه : خيرك اللطف ..هادى سيرين اللى كانت اتكلم فيك ولا
-ملاك : ايه هيا ..
-سليمه : خيرك تبكى شنو قالتلك
-ملاك اضبطت سليمه : وحيد متصاوب
-سليمه شهقت : مااات
-ملاك : لا الله لا تقدر … سيرين قالتلى انه مصاب فى وحدة من عيادات صفاقس
-سليمه : يااااربي الطف بينا شن هالمصايب اللى بدت تجى للشعب الليبي كلها ورا بعضها
-ملاك تبكى: زعما ربي غضبان علينا
-سليمه : حاشااانا من غضب ربي..احنا بلد المليون حافظ للقران ..غير عين وتكسرت فينا
-ملاك : يااااربي ارحمنا

” الناس فى هداكة الوقت حالتها النفسية بالويل الاموات كل يوم ..حتى الحنه ثلاث ارباع الليبيات ماحنوش هداكه العام حزن عالبلاد واللى صاير فيها”

________________________________

فى نفس اليوم اكحيلة وقف على محل خضرة فى تونس
-اكحيلة: ممكن نحكى تليفون مكالمه خارجيه
-البياع : تدفعلى الدبل كاش حاضر توة
-اكخيلة : تمام
ومدله دولارات البياع قريب داخ
اتصل بمصر
-سلطان : الوووو
-اكحيلة : اهلين ولد خالتى
سلطان انخلع ..هادى شفرة مابيناتهم ..قعد مركز فالصوت بيش يزبط منو فيهم
-اكحيلة: شن حالك ولد خالتى معرفتنيش ولا شنو
-سلطان زبطه : الحمدلله ولد خالتى شنحالك انت
اللى حير سلطان ان اكحيلة قبل يومين مكلمه ويحكو فى اسامى بعضهم الحقانيه عادى
-اكحيلة : شنحالكم غادى وشن الدوة
-سلطان : ماشية الامور
-اكخيلة : الكرت الاحمر حرقته
-سلطان انصدم : هكى بكرى بكرى
-اكخيلة : هوا هداكه ياولد خالتى
-سلطان : باهى بتجى لولد خالتك ولا كيف
-اكخيلة : ساهل ..ارض الله واسعه
-سلطان : زى ماتحب انت ياوليد خالتى
-اكخيلة : سلملى عالحاج راجل خالتى ..وبالسلامه
-سلطان : فى حفظ الله ولد خالتى

سلطان عرف ان اكحيلة بينهى حياته على وجه الارض .. وكانت فى شفرات بيناتهم من زمان بيش يفهمو على بعض ..وفهم سلطان على اكحيلة
بالرغم اتأثر هلبا بالموضوع

_______________________________

من غدوة مشت سيرين للعيادة اتزور فى وحيد
اما زينب قعدت تراجى فيها فالريسبشن تحت مابتش اتزوره ..مهما ايكون وحيد صح سلف ملاك وواجب زيارته ..لكن ولد فضيله عدوتها ومستحيل تزوره ولا تواسيه ..هيا ايمان بالعتها بالسيف
وحيد راقد تعبان فالغرفه مجبس من كل تركينه
…طق الباب
-وحيد : تفضل
-خشت سيرين لابسه ملايه وماسكه فى يدها بوكيه ورد: السلام عليكم
-وحيد تفاجأ : سيرين !!!
-سيرين ابتسمت : ايه سيرين خيرك مستغرب ..زيارة المريض واجب
-وحيد : ماشالله كيف تغيرتى .. تعرفى هكى احلى
-سيرين تبيش ترد بكلام حلو زى زمان : الف سلامه عليك يا وحيد خيرك داير حادث
“زعميتا بدير الحوله سيرين”
-وحيد : لا انا مع الثوار فى الجبل
-سيرين : اهاا ..وشن استفدت يا وحيد غير كنت بتخسر روحك
-وحيد : هادى بلادى وروحى ترخصلها
-سيرين : وراس وحيد الكلام هدا قوله لوحدة نتعرفكش زمان ..انا تاريخك وتاريخ اهلك كله نعرفه
-وحيد تعصب: وخيره تاريخنا يا ماما قتلنا ولا نهبنا
-سيرين : تاجرتو فالممنوع ودخلتو السم للبلاد ..وتوة صبحت عزيزة وغالية عليك ..وينكم عليها زمان
” مواجهه????”
-وحيد : كانا اهلى تاجرو فالسم دراع انتى اهلك تاجرو فالسم باع
-سيرين : انا عندى علم بكل شى ..وما شى مدرق عليا .. لكن ميزة اهلى شدو الحيط وقالو الحال حال الله مش زيك انت رافع شعار والكلام مفيش منه
-وحيد : كل ايد تمسح على وجهن مولاها ..لكن انتى يلى درتى روحك ادينتى وقاعدة تاكلى من رزق الىى حاى من تجارة السم
-سيرين : ماعنديش كيف انصل نفسى من اهلى الا بالزواج ..احنا ليبيين وماعندناش بنت تطلع وتقول لا نبى ناكل اكلكم ولا نلبس لبسكم
-وحيد : مفلحكم فيه الكلام
-سيرين هدت : المهم انت شن حالك
-تلفتلها : اهو تشبحى فيه حالى زفت ..وبعد زيارتك انتى حالى ولى قطران
-سيرين تضحك: توة انت بالدات عارفنى لسانى متبري منى ..مفروض خلاص زابط اسلوبى
-وحيد يضحك : اصلا مهما تلبسى من اقنعه انا الوحيد اللى تتكلمى معاى بوجهك الحقيقي
-سيرين : صح
وقعدو يهدرزو …وادكرت سيرين ملاك وانها مفروض بتكلمها …
وبالفعل كلمتها …وخبرت ملاك عمها سعيد بحال وحيد لانه توة مش حينشغل ويحسابه مات يقدر يكلمه ويشوفه فيديو
وبالفعل اتصلو ببعضهم فيديو
-سعيد : لازم تطلع المانيا اليوم قبل غدوة يا وحيد
-وحيد : هيا كسور عادية راهو يا بوى متخافش
منقدرش نطلع بروحى ونخلى جماعتى
وبعد ما انهى مع بوه المكالمه طلب من سيرين رقمها وعطاها رقمه
_______________________________

يوم الخميس الصبح اكحيلة دايريله كمين فى استراحته …
-الشاب : جى من امبارح ياسيدى وخشلها
-الضابط : انت تلعب بينا ولا شن حكايتك .. من امس الاستراحة مراقبه مفيش نملة خشتها
-الشاب : الاستراحة عبارة عن سراديب من تحت ..تربطها بالاستراحتين اللى جنبها
-الضابط ضربه كف : وخيرك ماقلتناش الكلام هدا من امس يا حمار
-الشاب : مانحسابش انه بيخش منهم … ديما يجى من الباب الرئيسى
-الضابط : لانه حس انه فى خونه ..
وتلفتله : تعرف تطلع الخونه هادى لينا ومدبرها معاه لمانشرب من دمك
-الشاب : تى كيف نلعب بروحى ياسيدى
-الضابط : اهو تو نشوفو ..والبضاعه امتى بتوصل
-الشاب : وصلت ودخلوها من السراديب وايخزنو فيها
-الضابط مبهور : هدا شغل عصابات على مستوى
وضرب الشاب على كتفه : تعرف كان يطلع كلامك حق ونطربقو عليه مانبدا الا مخدمك معاى ضابط
-الشاب : وحتى المبلغ ياسيدى
” بيش مايجيبش الشبهه لروحه ”
-الضابط : تى باهى فددتنا
وجمع القوة متاعه وتوجهو لتاجورا بالدوشكات ووصلو للاستراحة
الحكاية هدوء كأن مافى حد .. حاولو يقتحمو الاستراحة وتتفجر قنبله يمشو ضحيتها ست اشخاص …
بدو يجرو ويبعدو …وتزيد تتفجر اكثر زى الحزام الناسف … وشعلت نار فى هاديكه الاستراحة وجابو المطافى وخشو فتشو فالعشية …
لقو جثث محروقه ..كانو جايبينهم مسبقا من المشرحة الشباب اللى يخدمو عند اكحيلة وحاطينهم فى الاستراحة
لقو جواز اكحيلة محروق .. وبطاقته الشخصيه
مع انهم حاسين بوجود لعبه ..لكن المشكلة كل التقارير اللى رفعوها للجهاز ان اكحيلة فالاستراحة وانهم متاكدين ..فميقدروش تتغير الاقوال وهيا تقارير مختومه وخاصه لقو جوازه فالمكان كدليل
وبالفعل اعلنو خبر موت سليمان سعيد ميلاد

_______________________________

وروحت ملاك وعمها سعيد للحوش وقبلو عزاه
وداروله جنازة مهيوبة تليق بمقامه
حتى الشخصيات القوية حضرتها
والكل يسأل وحيد وينه فقالولهم داير حادث فى المانيا …وملاك يانارى تبكى جديات تقولى راجلها توفا حق .. الموقف كان اكبر منها واقوا منها
الجدر بكى ماغسله على اكخيلة كان يعتبر فيه ولده وكان يجهز فيه بيش يشد مكانه
وجلال نفس الشى كان معتبره صديقه برغم فارق العمر
وفضيلة من لما سمعت الخبر جت طول لملاك ماحبتش تخليها بروحها
واهل ملاك جوها من تونس حضرو الجنازة والعزى …
مريم قعدت يوم وليله وهيا تبكى موعها ماجفوش تقولى خالد راجلها مات ..واللى استغربو فيها قالتلهم متأثرة على حال البلاد ونبكى عليها
وسيرين عادى بكت وخلاص ماتقوليش هداكه اللى زمان زعميتا تحبه وتبى تجاهد على خاطره ..لا لا عادى بل بالعكس رجعت تواصلت مع خوه وحيد من جديد ..حتى ادينت قاعدة تصرف مراهقات اضحك ?

___________________________________

تمت …ويتبع

اووووف دهشت ..غدوة الحلقه الاخيرة انكملكم شن بيصير
وعلى فكرة ماحبيتش انصكر الثلاثين ..حتى 28 حلقه حلوين

نحبككككم هلبا ❤