رواية اكحيلة

#اكحيلة

??للكاتبه زهور جمال الدين ??

??الحلقه السادسة والعشرون ??

فى تونس

سيرين مقعمزة بروحها فالدار تقرا فالقران وتبكى
خشت مريم قعمزت جنبها عالسرير
-مريم : خيرك حبيبتى سيرين
-سيرين : صدق الله العظيم ….
وقامت راسها ومسحت دموعها : شى
-مريم : كيف شى وانتى دموعك حالة زى المطر
-سيرين : غير ادكرت اختى اميرة لما قالو على صلاح وسخفتنى اختى وسخفنى الولد
-مريم : انا بنكلمك فى موضوع ياسيرين واقبليه منى ولا ماتقبليشى
-سيرين : قولى ياعمتى مريم
-مريم : عمك واصلاته دوة انك مشتركه فى الجامع مع حلقه نساء تكفيريه ..ومسمينك ام الحارث ..صح الكلام هدا ولا كدب
-سيرين وقفت مخلوعه : شنو تكفيريه ماتكفيريه .. هما مجموعه نساء يتحاورو فى احاديث الرسول وتفسير الايات القرآنيه ..وانا نقعمز معاهم عالحو الحق ..والشيخ اللى يدير فالجلسه ميحبش اينادينا باسامينا فيقولى يا ام الحارث ..لا اكثر ولا اقل
-مريم: سيرين انتى واختك زى بناتى ..وانا تأثرت بموت اميرة هلبا ..فكيف امك وبوك ..متخليهمش يخسروك حتى انتى حبيبتى
-سيرين : لا متخافيش عليا انى نخش اى تيار مش مزبوط …مستحيل
-مريم : طول عمرى مش راضيه على وضعك ولا لبسك …بس توة وصلت لقناعه ياريتك قعدتى زى ماكنتى ولا هالحالة اللى مدايرتها فى روحك
-سيرين تضحك : قلتلك مافى شى ..متخافيش
-مريم : عموما عمك هوا اللى باعتنى نكلمك ..مايحبش يصدم بالنقاش مع حد تعرفيه انتى ..بس قالى نبلغك ان الجماعه هادى تحت مراقبه اجهزة الامن التونسيه ..ف ابعدى عليهم افضل
-سيرين : حاضر من عيونى ..طمنيه وقوليله معش بنمشى …باهى هكى
-مريم? : انشالله تكونى صادقه

________________________________

-ملاك : ووك عليا رعشتنى
-اكحيلة حضنها : اسمالله عليك حبيبتى
-ملاك : اخرلك مرة تقولها الكلمه هادى
-اكحيلة : غير كان تفهمينى بس
-حضناته بقوة: اسكت مانبى نفهم شى
-اكحيلة يضحك : حاضر
وطقطق باب الحوش ..
-اكحيلة : شكون
-سليمه : انا سليمه
-اكحيلة يضحك : باهى حولى خلى نفتح الباب وانتى مكبشة فيا
حولت ملاك وهيا تشبحله ..ومشى هوا فتح الباب
-اكحيلة : خشى يا سليمه
-سليمه : فى ضيوف يبوك لوطا
-اكحيلة : ناديهم وحيد والمرزوقى
-سليمه انصدمت : انت كيف عرفت !!؟
خش للصالة وملاك واقفه تشبحله حتى هيا مستغربة
-اكحيلة : لان يا فالحة النفرين اللى خشو للحوش هما وحيد والمرزوقى
-ملاك : بس فالبداية حسيتك خفت وحرت من يكونو
-اكحيلة : هداكه فالبداية ..بس بعد جيت وفتشت حوشى عرفت من خاشه
-سليمه : وكيف عرفت
-المرزوقى وراها : مايبداش اكحيلة كان ماعرفش من خشله بعد مافتش
-اكحيلة فتح ايديه الزوز : مرزوقى
خش المرزوقى بسرعه واضبطه
-اكحيلة يخبط على ضهره : مرحبتين بالتريس
-المرزوقى : مرحب بيك ياسيدى
-سليمه ?: حرت كيف فتحتو الباب بسرعه
..تاريتكم بمفتاحكم
-تلفتلها المرزوقى : انتى احمدى ربي اننا احنا اللى خشينا ..كنهدا راهو فاتو عليك انتى قطعولك راسك ولسانك هما الاولات
-سليمه ترعش: حيه عليا وانا نحسابهم مالاحظوش بابى
-المرزوقى : اي لا حق
-ملاك : شن حالك يامرزوقى
-المرزوقى :: اهلين بنتى ملاك شن حالك يا غالية على قلبي
-ملاك : الحمدلله شن حالك انت وحال خوى وحيد
-المرزوقى : الحمد لله شن حال خوتك وصغارهم
-اكحيلة : كويسين..غير اختصر عليا ..وين وحيد ..توة كنتو فالحوش وين مشى
-سليمه : نموووت ونعرف كيف عرفتهم
-اكحيلة : اولا لقيت مبلغ كبير فى دارى فى مكان انا ندس فيه مايعرفه حد غير وحيد والمرزوقى وبوى وملاك والمخلوف ..
ثانيا خطوة خوى وحيد بكندرته المعبيه تراب نزبطها من بين الف رجل …مش اليوم انا بنتوه عليها
ثالثا وهدا الاهم : لقيت الورقه المكتوبه اللى مخلينهالى لداخل فى نفس المكان وقريتها
-ملاك فى خاطرها : وانا نقووول الراجل يحضن ويعاود وواخد راحته ..متاكد الحوش مافيشى شى
-تلفت اكحيلة للمرزوقى : وين وحيد خيرك متردش
-المرزوقى : وين سيدى سعيد

_____________________________

فى حوش فضيلة ….

فضيلة مقعمزة مع جارتها ام المير فى الجنان
…ويتناقشو على احوال البلاد
…منحكيلكمش 90% من النساء الليبيات الكبار فالعمر يموتو عالقدافى طبعا
-فضيلة تحكى عالناتو : الله طيح طياراتهم فالبحر واجعنها ماتوصلش برنا
-ام المير: كله من هالمفرخ اللى ينادى فيهم الله لا تربحهم
-فضيلة خايفه على ولدها : لاااا يا ام المير ماحبيتهاش منك .. هادو صغارنا وهادو صغارنا
-ام المير : ربي يحفظهم كلهم .. والدعوة فالظالم انشالله منين ماكان يكون
-فضيلة : قولى اللهم اجعل كيدهم فى نحرهم .. وربي ردعلينا اليهود والكفار
-ام المير ماعجبهاش الكلام? : ربي ينصر الحق ..واجعله نوارة فى عيون النغارة
-فضيله فى خاطرها : بعيد السو على وليدى ..ناهو عارف ام المير تدعى عالجهه اللى فيها هوا ??
شرين التليفون … قامت فضيله شافت لقاته رقم غريب
-ام المير : ردى خيرك
-فضيلة : رقم غريب ..مانبيش نرد عليه ..نخاف
طبعا هيا خاطر عليها كمال خايفاته يزبطها وين ويلحقها فمتبيش ترد
-ام المير: هيا انا بهناكم توة
-فضيلة : هاك قاعدة خيرك ماشيه
-ام المير: لا لا قوليلى زينه ..هوا هداكه بنرقد ..عندى نوضه بكرى الصبح ..تعرفينى منحبش النوم
-فضيلة : باهى زينه وربي يساهلك
-ام المير : وانتى من بيبات معاك
-فضيله : صغار محمود ولد صالح خوى الثلاثه بدو يروحو هنايا ويباتو عندى
-ام المير : باهى ربي يحفظهم …
وطلعت وسقدتها فضيله للباب …
ورجعت للجنان بدخل الفراشات ..لقت تليفونها يشرين ثانى ..ونفس الرقم
قامت التليفون تمت التشريينه كيف بتحطه بدى يشرين ثانى…
قعدت تخمم ترد ..لا ..ترد ..لا … بعتالى فتحت التليفون وردت
-فضيله : الوو…
تسكر الخط ثانى لان التشررينه تمت وهيا تفكر
_____________________________

-اكحيلة : وين وحيد يامرزوقى
-المرزوقى : تعالو وانا نرفعكم ليه
وطلع من الباب ووراه سليمه وملاك وفى جرتهم اكحيلة سكر الباب كويس ونزل
مشى المرزوقى جهه باب حوش سعيد …
تلفت لملاك : افتحى الباب
وفتحاته ملاك بالمفتاح وخشو …
ومشى المرزوقى جهه الدروج متع الدور الثانى وكلهم وراه بلهفه …
وسليمان بدى يجرى فالدروج يتخطى الدرجات زبط وحيد وين
خش يجرى لدار عمك سعيد يلقاه متغطى فى سريره ووحيد مقعمز جنبه ويهدرزو
وخش اكخيلة يجرى فتح ايديه وجاه وحيد يجرى
-اكحيلة : وحيد
-وحيد يبكى يانارى : اعلين بسيدى اكحيلة
-اكحيلة يضحك: ديما نقولك انت سيدك ربي بس
-وحيد يبكى : لا سيدى وسيد الناس كلها ياوخى
-اكحيلة بدى يبكى : هكى ادير فى خوك يا وحيد
-وحيد : القلب الاحرف يا وخى .. الله غالب تبعت الجماعه اللى تنصر فالحق
-اكحيلة : انت مقتنع باللى تقول فيه يا وحيد
-ملاك تبكى : غير اعطينا معاك فرصه انسلمو عليه
-وحيد : اهلين وخيتى ملاك شنحالك وحال اهلك
-ملاك تسلم عليه باليد : الحمدلله كويسين يا وخى مشغولين غير عليك انت
-وحيد : الحمد لله يا ملاك ..كل حد وعمره
-ملاك : ربي يطول فى عمرك
-وتلفت وحيد لسليمه : تبيش تسلمى عليا خويلة
-سليمه مدت ايديها تبكى : تعالى يا غالى ياولد الغالية واضبطاته وقعدت تبكى وهوا يبكى معاها
-وحيد : ستاحشت امى وخواتى يا خالتى
-سليمه : وامك بتموت عليك وعلى شوفتك ياوليدى
-وحيد : توة كنت نكلم فيها متردش ..شغلتنى
-سليمه : غير اكيدة ترا شن ادير ماشافتش تليفونها
-سعيد : قعمزو واهدو وتهنو اهو وحيد روح .. غيبك شعلت النار فقلوبنا يا ولد
-وحيد يبصر: بيش تعرفنى قداش مهم عندكم يا بوى
-سعيد : لااا شفنا وصدقنا …
وقعمزو عالصالون اللى فى دار سعيد ويهدرزو على الحرب وكيف دايريين
ووحيد عاد وين تلقيه …يحكى ويتحاكى عالضرب والجرى والبطولات
-وحيد : تى اليومين اللى فاتو قريب مشيت فيها
-ملاك : علاش
-وحيد : لماستشهد صلاح صاحبى انا كنت معاه وانضربت لكن جتنى خبوش على وجهى بس ..تعبى دم لكن مفيش كسور
-ملاك مصدومه : منو صلاح صاحبك !!؟
…متقوليش…….
-المرزوقى : ايه هوا …رحمة الله عليه
-سليمه : قصدكم اللى كان واخد اميرة
-المرزوقى : اى نعم هوا
-سليمه : ياسبحان الله …..لما خطبها كان من قالنا بيموتو فى جرت بعض راهو كدبنا
-ملاك تبكى : لا حول ولا قوة الا بالله
-اكحيلة : مترعشيش روحك يا ملاك
-وحيد : امالا انا ليش جاى..جبت الجثمان متاعه لاهله ..وبنحضرو الجنازة غدوة وبنروحو
-اكحيلة تلفتله : غدوة مولى
-وحيد : ايه
-اكحيلة تلفت لملاك : ديرو حتى دحى مقلى لوحيد اكيدة راهو جعان
-سليمه ?: دحى شنو .. بنديرله كسكسى بالبصله
-وحيد : والله كبدى طابت منه يجيبونا فى كل شى ماشالله …لكن الحق نبي عصيدة بشكشوكه الدحى
-سليمه : حاضر من عيونى هيا يا ملاك
-ملاك : هيا
وطلعو الزوز من الدار وخلوهم …
” عصيدة بالشكشوكه نحس فيكم بتنزلو عليها مناشير بعتالى ???”

____________________________

لما طلعت ملاك لحقها وحيد برة
-وحيد : ملاك
-ملاك تلفتت : نعم
-وحيد : قتلك منسئلك على سيرين كيف حالها
-ملاك : الحمدلله بالف خير .. مشت لتونس مع امها ومريم مرت خوى
-وحيد : وشنو احوالها وكيف دارت فقرايتها
-ملاك : والله شن بنقولك هيا من وفاة اميرة اتحسها نوعا ما ادينت ..ومعش تبى الاختلاط وبدت تطلع بالزى الشرعى
-وحيد متفاجئ: معقولة !!… سيرين
-ملاك : اهاا تخيل
-وحيد : ربي يثبتها انشالله ..ولو كلمتيها قوليلها انى سألت عليها
-ملاك حاضر
ونزلت تحت ورجع وحيد للغرفه ..
-وحيد : نستادنكم شوى بس يا جماعه نعاود لرقم امى
قايم التليفون ويتصل : هيا شفرة جديدة ..اكيدة مازبطتهاش وخافت
-اكحيلة : سكر وكلمها من رقمى تو ترد عليك
بالصدفه ردت فضيله على رقم وحيد
-فضيلة : الووو
-وحيد : يماااا
-فضيله طول بدت تبكى: وليدى ..شن حالك يا وحيد ..ربي يحفظك يا ولدى ..قداش ستاحشتك
-وحيد يبكى: غير بالشوية يمى خلينى نقول معاك كلمه
-فضيله تبكى: ياوليدى ..ياوليدى قلبي نااار عليك ..راهى الكبد واعرة
-وحيد : ربي يحفظك يمى مشيت لشقتك هيا الاولى طقيت مافتحتيش ..شوى جيت هنايا
-فضيله : انا فالجنوب يا وحيد
-وحيد : ااه فالجنوب …وشن اديري غادى
-فضيله : قصه طويله تو يحكيهالك سليمان .. انت ماشفتاش
-وحيد : شفته توة بس مالحقش يقولى
وقعدت فضيلة تحكى لولدها عاللى صار كله
مش اقل من ثلث ساعه وهوا يكلم فيها وينشد عالحال والاحوال
-وحيد : يمى تو نعاودلك ..خليك نايضه …خلى نحكى مع سليمان وبوى وبعتالى نفضى نعاودلك
-فضيلة : نراجى فيك ياوليدى منيش راقدة
وسكرو الخط …
وتلفتلهم وحيد
-اكحيلة : توة خلى نحكو كلام ناس كبار وعقال
-سعيد : احكى
-اكحيلة : يابوى البلاد اتغيرت ..والنظام بدى يرقص فى رقصه الديك المدبوح …ومدامها خشت فيها الامريكان ومجلس الامن يعنى طايح طايح
-سعيد : مستحيل
-اكحيلة: يابوى انا مانتكلم فى كلام العواطف..انا نتكلم بخبرتى ..النظام بيطيح وبتطلع شكالات جديدة …تجارتنا الاولى كيف الحال فيها
-المرزوقى: وخيرها تجارتنا
-اكحيلة : الناس الاولين متفاهمين احنا وياهم وكل واحد عارف اللى ليه واللى عليه ..لكن بزق الليف الجدد شن بيشبعهم
-سعيد : كلامك صحيح
-اكخيلة : معناها لازم تجارتنا تنمحى من على وجه الدنيا
-وحيد : لو محيتها من على وجه الارض ونكرتها كيف بتمحوها من عقولهم
-اكحيلة : بموتى
-وحيد ينط يجى واقف : اااه شن تقول انت

______________________________

سليمه فالدور الاول اتعصد فالعصيدة ..
وملاك تخمم ..وتدكر فى كلامها مع اكخيلة
-ملاك : حبيبي انت فيك شى
-اكحيلة : لا ليش
-ملاك : شنو تموت امالا .. انت هبلت ..فى حد فالدنيا يقرر الموت
-اكحيلة : انتى افهمى الكلام قبل
قطعت عليها سليمه افكارها …
-سليمه :ملاك خيرك نكلم فيك ..مديلى الصونية
مدت ملاك لسليمه الصونيه وحطت فيها هاديكه العصيدة وبدت اتملس فيها …
-سليمه : ياروحى على فضيله كان تخسر وليدها
-ملاك : متقوليش هكى ياسليمه ربي ايطول فى عمره
-سليمه : ربي يعطيه كل خير.. يستاهل الحق وحيد
-ملاك : تصدقى نشدنى على سيرين
-سليمه : شكله قاعد مانساهاش
-ملاك : قصدك كان يكلم فيها
-سليمه : زمان ..شنو انتى ماعندكش علم
-ملاك : لا والله ماعندى

______________________________

فى دار سعيد

-سعيد : شن تخرف انت ياسليمان
-اكحيلة : لااازم اتقولو اكحيلة مات يابوى بيش يكمل موضوعنا مع الجدر والجماعه الثانيين
-سعيد : معقولة حتى الحاج ابراهيم بتلعب عليه
-اكخيلة : الموضوع هدا مايسمع بيه حد الا بوى وخوى وزوجتى بس ..والمرزوقى اهو واقف ويسمع وعنده العلم لانه بيساعدنا …
وعلى ابعد تقدير سليمه ..باعتبار انها مربيه ملاك وحتزبطها انها عندها شى مدرقاته عليها
-المرزوقى: مفيش حل بديل
-اكحيلة : مفيش
-سعيد بدا يبكى: كيف ياسليمان تبينى بايديا نقول ولدى سندى مات ..وانا من بيا بعتالى
-اكحيلة : انا قاعد على وجهه الدنيا واللى يدوسلك على طرف نحرقه بالنار
-سعيد : النار احنا اللى بنلعبو بيها يا سليمان
-اكحيلة : نقولهالك بالعربيه يابوى…اجهزة هنايا تلاحق فيا وتبينى انزل الصنف ..وانت تعرفنى مستحيل نخدم فى غير العطارة
-سعيد : ومنهما هادو
-وحيد : من تابعين ..اما جهه
-اكحيلة : وانا وين نعلم عليهم … ماقعدليش حل ثانى يابوى …نبى ننظف ..خلينى
-سعيد يبكى: دبر روسكم … ديرو اللى تعرفوه صح
-وحيد : باهى كيف توة الخطوة الاولى
-اكحيلة: اول خطوة انى لازم نطلع معاك غدوة برة طرابلس … واتكون ملاك وبوى خارج ليبيا فى نفس اليوم
-وحيد : هادى ساهلة
-اكحيلة : تقدر اطلعنى غدوة معاك منغيب مايشوفنى حد
-وحيد : ياسلام ..هادى شغلتنا ..الديتات الكبار كلهم طلعناهم احنا من طرابلس بمساعدت عائلات خارج الشبهه
-اكخيلة : تم امالا متفاهمين ..ونقدر نخش طرابلس طبعا
-وحيد : ياسلام ..اهو تشوف فيا قدامك وانا مطلوب
-اكحيلة : باهى مليح بوكل
طقطق الباب …جابت سليمه لوحيد العصيدة
-ملاك : ترا تعالى نبيك
وخداها من يدها ونزلو للدور الاول وطلعو مشو لشقتهم

_______________________________

فى شقه اكحيلة

ملاك تبكى …واكحيلة يحضن فيها ويهدى فيها
-ملاك ترعش: انت كيف هونت عليك تقولى الكلام هدا وانا حتى عيل مادرتاش منك
-اكحيلة : انتى تبينى انا ولا تبى الصغار
-ملاك حضناته : نبيك انت ياعمرى
-اكحيلة: وانا بيقتلونى ..ماهو خلينى ننفد بجلدى ونموت بيدى قبل مايقتلونى هما
-ملاك : باهى عالاقل قول هارب ..قول اى كلمه لكن ميت لا
-اكحيلة : بيجيبونى هكى ولا هكى يا ملوكه خيرك نعرفك عقلك كبير
وهوا ياحنه ايرضى ويفهم ..وهيا ترعش وتحضن فيه …
وفالاخير خيرها يا حياته معاها وموتته الحقانيه قريبه .. يا موته ويرجع ايعيش معاها طول العمر
ورضخت ملاك ووافقت انه ايدير اللى فى راسه
-اكحيلة : هيا نوضى نرجعو حوش بوى
-ملاك : هيا
-اكحيله يغمزلها : لكن راهو بنرجعو نرقدو هنايا ..لان المشيه غير فالعشيه
-ملاك : باهى
-اكحيلة مسك خدودها : اضحكى عاد
-ملاك ابتسمت : باهى

وبالفعل رجعو لحوش سعيد ..وقالو لسليمه وماعييت اتحلل وتبكى حتى هيا

__________________________________

ثانى يوم وصل اليوم اللى نراجو فيه كلنا
هربة اكحيلة

مشو كلهم للجنازة متع صلاح …
طبعا وحيد وجماعته متخفيين فى عبايات وعمامات كأنهم شيوخ فالجامع بيش مايزبطوهمش ….
وقبلو مع اهله العزى
وروحو للحوش لقو ملاك دايرة عزى فالحوش
مانحكيلكمش عاللى صار فالبنيه والكل ايسكت فيها حتى عمها سعيد …
واكحيلة مقعمز على كرسى ويشبحلها مسخفاته
-اكحيلة : خلوها …
وكلهم يبكو معاها ….
-اكحيلة : ملاك فى امانتك يا سليمه هنينى
-سليمه تبكى : منغير ماتوصينى على ملاك هادى بنتى
-اكحيلة : رد بالك عليها يا بوى ..ورد بالك على روحك ..وانا مش حنعطل عليكم
-سعيد : متخافش عليها ولدي غير اشقى بروحك
اكحيلة يشبح لملاك …
والغرفه بدو بالواحد يطلعو منها خلوهم بروحهم الزوز
-تنط ملاك تتعلق فى رقبته : رد بالك تسيبنى حبيبي
-اكحيلة : والله مانعطل عليك يا عمرى
-ملاك : انا منغيرك نموت
-اكحيلة : وانا هدا كله عال خاطر منو ندير فيه ..واللع كانا بروحى وماتعرفت عليك رانى مادورت ..زايدة ناقصه عندى..لكن بعد انتى خشيتى حياتى تغيرت ..وبدت عندى حاجات نعيش على خاطرها
-ملاك : نحبك
-اكحيلة: نبيك قويه وتتحملى المسؤلية ..عابى عليك وانتى مع بوى
-ملاك : حاضر من عيونى …
-وحضناته وتبكى : قولى انك تحبنى
-اكحيلة : نحبك ونموت على خاطرك

__________________________________

وجت العشيه وطلع اكحيلة مع خوه بعد ماسلم على بوه ومرته …وتكملهم امورهم وحجزلهم رحلة لمصر -قبرص …
ومشى مع خوه وحيد …
مقعمزين فالسيارة ومتسقدين ..وهاديكا السيارة امزينه وكلاكسات …وحالة
-اكحيلة مقعمز فالوسط وينخص فى وحيد فالكرسى اللى قدامه : مالقيتش طريقه احسن اطلعنى بيها
-وحيد يضحك ويتكلم معاه فى ودنه : اسكتى يا عروسه الليله دخلتك
تاريتهم دايرين عرس وماشيين سيارتين بيرفعو العروسه للجبل
واكخيلة لابس فيلو وداير طرحه ..مطلعينه بالطريقه هادى من طرابلس
كلاكسات وحالة …وفالسيارة من قدام مقعمز وحيد متخفى طبعا
ومن الخلف اكحيلة ومعاه مراءة محجبه ..ماهو عائلة اللى عاونتهم
وسيارة ثانيه فيهة سواق وزوز نساوين فاتحين اغانى ثورية و ايصفقو
وقفتهم بوابه
-الشاب: وين ماشى خوى
-السواق اللى جنب وحيد : بنت عمى متزوجه بعيد رافعينها
-الشاب: حتى السيارة اللى وراكم ليكم
-السواق : هادوكه حوش العريس
فتشت البوابه هاديكه السيارة مالقت شى …
-الشاب : تفضلو ..وربي يهنيكم
-السواق : العقبى ليكم
ومشو السيارتين فالطريق

_______________________________

تمت … ويتبع

نحبكم ❤