رواية اكحيلة
اكحيلة
??للكاتبه زهور جمال الدين ??
??الحلقه الخامسه والعشرون ??
خشت ملاك للحوش لقاته هدوءءءء
وظلام الضى هارب …
يادوبك سبكشن امضوى فالمطبخ?
-ملاك فى خاطرها : شكله عمى ركب لداره ورقد
جت طالعه تشبح فى اكحيلة مولع ضى الموبايل
قربت من الباب بتطلع
سليمان فاتح ضى الموبايل حس انه فى حركه ورا الشجرة
-سليمان : منو
فى حاجه تتحرك …
-سليمان : منو اطلع
-سليمه : انا سليمه يا سيدى
-سليمان انصدم : وشنو اديري هنايا ياسليمه
..وخيرك فالجنان توة
-سليمه تساوى فى محرمتها : زوز انفار خشو من الجنان وفقعو الباب وركبو لشقتك فوق
-سليمان : ااه .. شن تقولى انتى
وفتحت ملاك الباب وطلعت ..تلقى سليمه واقفه وترعش
-ملاك : حيه عليااا …سليمه انتى شن اديري هنايا توة
-سليمه : غير قعمزونى رانى بنديرها تحتى
فتحت ملاك حوش سعيد بمفتاحها وخشو طول للمربوعه بضى موبايل اكحيلة …
وخشت ملاك تجرى للمطبخ جابتلها امية شربتها
-ملاك : غير احكيلى شن صار
-سليمه : ماشافوش بابى..ولا اللى خبرهم الله لا تربحها ماخبرهمش عليا ان بابى لوطا
-اكحيلة متكنطى: غير كيف صار
-سليمه : انا فالصالة وسمعت صوت حد راكب من الدروج ..وعارفتها مش خطوتك ياسيدى
-اكحيلة : باهى وكيف درتى
-سليمه : وقفت ورا الباب نسمع .. وهما ناخدوش دقيقتين غير وباب الحوش مفتوح وخشو وسكروه وراهم
-اكخيلة: وكيف بوى مالاحظش صوت فى شقتى
-سليمه : وين يدرى مسكين ..يحسابكم انتو روحتو ..مايخطرش عليه
-ملاك : وانتى طلعتى طول
-سليمه : هما خشو وسكرو باب الحوش وانا طلعت طول نتسحب فالظلامات لبدت ورا الشجرة
-جت ملاك قعمزت جنبها وحضنتها : سامحينى خليتك بروحك ..ياريتنى رفعتك معاى وماخليتكش للرعايش
-سليمه : بالعكس ..الحمدلله اللى قعدت وشفتهم ..كنهدا وين بتدرو عليهم
-اكحيلة : قداش قعدو فالحوش
-سليمه : قيس الربع ساعه
سليمان زبط انهم من نفس الجهاز ..ياخاشين ايدورو فى اوراقه يا حاطليه سماعات يتصنتو عليه
وفالحالتين رجوعه لحوشه هوا وملاك خطر فالوقت هدا
__________________________
سليمه خشت لدار التقعميز متع حوش سعيد وفرشت فراش ورقدت ..
وخلت ملاك وسليمان على راحتهم فالمربوعه
-ملاك : حبيبى مش حتعرف اتجيبهملى
-اكحيلة: انا كل ملابسك وخصوصياتك نعرفها ونعرف مكانهم وين ..مساله انك بتركبى معاى توة فوتيها
وقف بيمشى جيهه الباب .. جت ملاك من وراه وحضناته .. وقف وتلفتلها
-ملاك عيونها مدمعات : خلينى نمشى معاك
-اكحيلة مسك خدودها الزوز بايديه : حبيبي انا مش مستغنى عليك
-ملاك حطت ايديها على رقبته : نبيك ..نبى نقعد
معاك
-اكخيلة حط ايديه على ضهرها وحضنها : احتمال ايصير اى شى فالشقه ..احتمال انموت
-ملاك : هدا علاش نبى نركب..نبى نموت معاك
-شبحلها : تحبينى
-ملاك ابتسمت : نحبك ومعنديش غيرك فالدنيا
-اكخيلة : راهو كانا لقيت الحوش تمام وامان تحملى مايجيك فوق
-ملاك تضحك: يعنى ماتهفتش انت ولا شن قصتك ..كل موضوع ادوره ادوره وتجيبه لى هالمكان
-اكحيلة : الله غالب يجرى فالدم
-ملاك شدتله خوده قرص : عارفاتك تبى تهدينى واضحكنى ..لكن انا راكبه معاك يعنى راكبه معاك
-اكحيلة : يعنى مفيش فايدة
-ملاك بدلع : لااا
-اكخيلة : باهى تعالى يا همى
وطلعو من الجنان ولفو فالظلام منغير مايفتحو اضاءة
-قدام باب الحوش من تحت اكحيلة يهمسلها: انا بنركب توة من الدروج وبنفتح الباب .. وانتى خليك متقيه هنايا ..لو ناديتك اركبى ..لو مانادتكش متركبيش
-ملاك : باهى
وركب سليمان للدور الثانى من دروجه الخارجيات
__________________________
فى حوش عبدالعاطى الدنيا ظلام …
مزال الناس مادارتش مولدات …
منير وكمال قعمزو مع بعضهم هدرزو شوى …وبعتالى ناض منير مشى لاستراحته يبي يولع ارقيله
….ماياخدش فيها قدام خوه كمال
-منير : ربي يرحمه مسكين شكله كان شاب طيب
-كمال غاصراته العبرة : لله فى خلقه شؤون
وطلع منير .. وقعد كمال بروحه كسد وهوا متكى فالصالة عالصالون
قام التليفون واتصل بزينب
-زينب : الو
-كمال : اهلين زينب شنحالك
-زينب : الحمدلله كيف حالك انت
-كمال : ستاحشتك
-زينب مستغربه : نعمم
-كمال : ستاحشتك ..حسيت بغيابك هاليومين
-زينب : باهى تعالة لتونس
-كمال : مفيش حتى انا ستاحشتك
-زينب? : اكيدة حتى احنا ستاحشناك
” فى نساوين هكى ديما جافات فالرد ويبو الراجل يقعدلهم وميخونش ?”
__________________________
فى مصر ….
سلطان وايمان فى دار النوم
هوا يلعب فى حمودى ولده ..وهيا جايبه الخوايج من المنشر اطبق فيهم
-سلطان : كلمتى امك
-ايمان : كلمتها ايه وتسلم عليك هلباااااا
…ومستاحشه حمودى
-سلطان : وايناس شن صار فيها بتلحق لمصر ولا شنو
-ايمان : راهو السفر يبي فلوس يا سلطانو..متشوفش روحك انت حالتك كويسه لما حبيت تسافر طلعت طول ..فى ناس غيرك ماتقدرش
-سلطان : قلتلك هادو اهلك نخدمهم بعيونى غير يجو بس ..خاصه امك
-ايمان : امى صعبه شوى ..وعندها عزة نفس غريبه من زمان …
-سلطان : وين مشت توة
-ايمان : عدت للجنوب يالا صغار خالى صالح الله يرحمه
-سلطان : سكنت عندهم
-ايمان : لا سكنت فى بيت جدى .. هوا ورثه بس ماقسموه
-سلطان : ربي يهديها …لو جت هنايا خيرلها
-ايمان : يلا براحتها
حمودى بدى يعيط …
-سلطان ايلعب فيه : هيا يا ماما تعالى واهتمى بيا انا وبابا ياسرك من تطبيق الدبش
-ايمان تضحك : ياحليلى منك انت وبابا ماتشبعوش
-سلطان يضحك : تصدقى ستاحشت اكحيلة
-ايمان : بالله ماتقلب عليا المواجع ..وانا ستاحشت وحيد خويا
-سلطان : ربي يحفظهم ويجمعنا بيهم
__________________________
كمال قاعد يكلم فى زينب فالتليفون
-كمال : اهاا ..كلكم ستاحشتونى …باهى ترا اعطينى سيرين وخلاص
زينب تنادى: سيرين …سيرين .. تعالى يبيك بابا
جت سيرين تجرى لابسه توته وشعرها مزال قصير : هاتى …
وخدت التليفون : اهلين بابا
-كمال: اهلين سيرين كيف الحال بنتى
-سيرين : الحمدلله بابا كيف حالك انت فقدتك
-كمال عيونه دمعو : حتى انا فقدتكم ..ومعش نعرف نعيش منغيركم ياسيرين …واميرة صورتها فعيونى فى كل مكان فالحوش
-سيرين : باهى تعالى يابابا لتونس علاش قاعد انت
-كمال بدى يبكى : منقدرش انسيب رزقى
-سيرين : بابا خيرك تبكى ..فى حاجه …عمى منير فيه شى
-كمال : مايوجعكش صلاح اللى كان واخد اميرة حتى هوا استشهد
-سيرين عيطت : لا حول ولا قوة الا بالله ..ربي يرحمه مسكين
-زينب فى جنبها انخلعت : شكون مات ..منو
وطلعت مريم تجرى من دارها : منو مات ..منو
-سيرين تلفتتلهم : صلاح اللى كان واخد اميرة توفا …قال بابا استشهد
-زينب : هاتى التليفون
-وخدت التليفون من بنتها : ايوة كمال …وين توفا الولد يانارى
-كمال : توفا جهه معبر دهيبه ..
-زينب : ياروووووحى …مات مؤيد ولا معارض … مع منو كان
-كمال بدى يعيط : انتى هدا اللى همك …تى هدا روووح وماتت..هدا ليبي ..مزال ادورى اما جيهه يتبع
-زينب: باهى غير هدى روحك يا كمال الناس يسمعوك
-كمال : وين خالد
-زينب : خالد مهناش ..طالع لتوة ماروحش
-كمال : باهى لما يروح خليه ايكلمنى ضرورى
-زينب : باهى غير ندى نفسك بس ايجيك الضغط
__________________________
فى استراحة منير
منير يهدرز على احمد وامين صغار خوته
خاطر حتى الشباب قعدو مابوش يمشو لتونس
-امين : مش متاكدين منها الدوة يا احمد ..مفروض انت ماعاودتهاش اصلا
-احمد : اللى قالى شافهم بعيونه ..واحد مات والثانى مصاب …وما اكدليش الخبر ..تقريبا لحقه ومات
-منير: وكيف عرفوه وحيد ..صحابك مايعرفوشى
-احمد : الصورة نزلت فالفيس من تونس ..لان هنايا امسكر … اللى شافها اكدلى انه وحيد ميلاد وجهه امعبى دمايات
-امين : بس مش بالضرورة يكون توفا
-احمد : الله اعلم …ربي يطول فى عمره مسكين
-منير : لا واحنا شن نبوله .. ربي يستره
-امين : خبر وفاة صلاح سمعت بيها ملاك لما كانت هنايا بكرى
-منير : لا عمه كلمنا بعد ماطلعو هما ومشو
-احمد : وامتى جنازته
-منير: غدوة الضهر انشاء الله
-امين : بتمشى
-منير : عمك كمال اكيدة تو يمشى ..لكن انا لا ماعتقدش
__________________________
سليمه راقدة فى دار التقعميز …
وتسمع فى تخربيش فى روشن الكوجينه …
يانارى الرعايش كلهم على راسها الليله
ناضت من مكانها تسمى بسم الله …
وبدت تمشى بالشوى بالشوى …
الحوش ظلاااام …ماهناك غير ضى القمر خاش من الرواشن …
قربت من الروشن وتأكدت ان فى يد تخربش…كأنها اطقطق …
خدت عصاة المكنساة وقربت من الروشن ….
فتحاته شووووية خلاته مجوجى
-الشخص: مخلوووف
سليمه ساكته
-الشخص: كانك المخلوف قول نعم
-سليمه بصوت واطى : شكووون انت
-الشخص: انتى منو
-سليمه : منقولش لين تقولى انت منو
يانارى من الخلعه ماعرفوش صوات بعضهم
-الشخص: انا المرزوقى
-سليمه : ااه المرزوقى
وفتحت الروشن على وسعيته ..لقاته واقف من ورا الحديد متع حمايه الروشن
-المرزوقى ايكشخ :هوا انتى …انتى شن اديري هنايا..و علاش مشحورتينى من بكرى
-سليمه : وين ندرى عليك انت منو
-المرزوقى : شنو معرغتيش صوتى
-سليمه : وخيرك انت معرفتش صوتى
-المرزوقى متعصب: غير افتحى باب الحوش افتحى
-سليمه : تعالة
وطلعت من الكوجينه واتجهت لباب الحوش فتحتله
خش المرزوقى من السقيفه متعصب
-سليمه : تعالة جاى وين وحيد
تلفتلها المرزوقى وسكت ….
وبعتالى اتكلم : وين سيدك اكحيلة
__________________________
فى شقه سليمان …
ركب هوا الاول …فتح الباب مالقى شى..خش للشقه قعد يدور فالديار والصالة وفتح الحمام مافى شى
وقف عالدروج
-اكحيلة بصوت واطى :ملااااك
-ملاك : نعم
-اكحيلة: تعالى اركبى مافى شى الحمدلله
-ملاك تضحك : محلاك وانت واقف فوق ..تقول تعاكس
-اكحيلة يضحك : غير خايف تحرشى فيا خوك كمال ..كنهدا راهو بديت بيك انتى الاولى فالمعاكسه
-ملاك تضحك : انا الاولى ..معناها فى غيري … تعاكس عينك …اهو راكبه تو تشبح انت عجباتك عاد حكايه تعاكس
-اكحيلة : تعالى هى
وخش للحوش وخشت هيا وراه تجرى وهوا يجرى ويضحك وهيا تحدف فيه بالمخاد من وراه
رجع يجرى عليها وهيا هربت وتعيط بالشوى ومشى يجرى قامها بين ايديه وقعمز عالصالون وهيا فى حجره ويضحكو …
-اكحيلة : انت تحبينى
-ملاك : انت كل شى بالنسبه ليا
-اكحيلة : تبى نجيبو صغار
-ملاك : اليوم قبل غدوة
-اكحيلة : باهى كانا نقولك كلام خطير توة تفهميه
-ملاك قرنت حواجبها : كلام شنو ..قول
-اكحيلة : ماتتعصبيش خليك ريلاكس
-ملاك : مش متعصبه حبيبي احكى
-اكحيلة : بنقولك كلام ايكبرك عشرة سنين فى لحظه ..ويخليك ناضجة زى بنت الخمسين
-ملاك شغلتنى …قول
-اكحيلة : انا لازم نموووت
ملاك رعشت مع بعضها من الكلمه
__________________________
تمت …ويتبع
نحبككككم ❤