رواية اكحيلة
?للكاتبة زهور جمال الدين ?
??الحلقة الثانيه ??
-سليمان : انتى متبيش تفهمى ..
-مريم : لوشفتك انت الاول كنت جاهدت بيش ناخدك
-سليمان: يا اختى انتى على اى حال اكبر منى
-مريم: اربع سنوات تحسب عمر..
وعيونها دمعو: انا نحبك يا سليمان
-سليمان: تعرفى انتى مرت منو..مرت عدوى..
-مريم : وعدوى حتى انا ..منحبااااش منحباش يا سليمان ونحبك انت ..انا مرات نفكر انى نقتله ولا نقتل روحى ونفتك
-سليمان : انشالله تموتو الزوز انا مالى بيكم
-مريم : انا مستعدة نطلق على خاطرك
-سليمان : وانا منبيكش يا اختى ..انا جو النساوين كله مش ليا ولا يغرينى راهو
-مريم : وهدا اللى مخلينى بنموت عليك..حبيبي انا ليك حتى منغير زواج لو متبيش ترتبط ..المهم تكون ليا انا وبس
-سليمان : انتى شكلك هبلتى .. يامراءة فيقى راك تخونى فى راجلك
– مريم : وهوا مايخونش
-سليمان : هوا حتى كانا خان مايعيبه شى ..لكن انتى اللى عيب فيك قدام صغارك والناس
-مريم : اما منطق هدا اللى يحلل للراجل الخونه وللمراءة لا
-سليمان : انتى وحدة مجنونه والدوة معاك زايدة
-مريم : انت اللى جننتنى وطيرت عقلى منى
-سليمان : تعرفى كانا راجلك يسمعك مايبدا الا دابحك
-مريم : يدبح عينه تبى بوى يقتله ..خدانى بنت 13عام فرخة صغيرة ماعارفه السمى مالعمى ..جبتله ولدى محمد عمرى 14 عام مانعرف حتى كيف نقمطه
-سليمان : وتوة عمرك 23 عام ..معناها مفروض تحترمى نفسك وتشدى حوشك وصغارك وتحطى عقلك فى راسك
-مريم : الاولة مالاخيرة انا مستحيل نفرط فيك لأى وحدة غيري .. تبينى هكى متزوجه باهى تبينى نطلق باهى المهم تكون ليا حلال ولا حرام
-سليمان : اقسم بالله ماتتحشمى على وجهك وارجوك لما نغير رقمى معش ادورى عليه وتجيبيه وتتصلى ..شنو اللصقه هادى
وسكر فى وجهها الخط
__________________________
ملاك تقرا فى صف الاول ابتدائي …
واميرة بنت خوها كمال سابقتها بسنه.. لان اميرة لماتزوج جدها عمرها 5 شهور ..وملاك انزادت فالسنه اللى بعدها ..
دخلوهم لنفس المدرسة وحدة صف الاول ووحدة صف الثانى ..ودايريلهم سواق يرفع فيهم
اما احمد وسيرين صغار كمال حاطينهم فل مدرسة بروحهم احمد صف السادس وسيرين صف الرابع
وخالد حاط صغاره فى مدرسة قريبه محمد صف الخامس وامين صف الثالث ..
طبعا ملاك تابعه سليمه بس اكل ولبس ونظافه كل شى سليمه …
هما الفيلا متعهم زى المناسيب ..كمال واخد جهه ثلاث ديار وزوز حمامات وصالة وخالد نفس الشى فى جهه ثانية ..اما المطبخ وصالة الاكل فالدور الاول مشتركه .. ملاك قعدت هيا سليمه فالدور الاول ..دارولها زى الجناح غرفه وحمام وصالة صغيرة وخلو باقى الصالة فيها مكتب على جهه ممنوع يخشه حد غير الاولاد الثلاثه
وفى نفس العام دارو الاجتماع السنوى فالجنوب ..
لكن سعيد العقربان المرة هادى مامشاش ..وتسبل بانه مريض
-جلال الفهد: تى غير كيف ماتحضرش يا حاج سعيد
-سعيد: والله يا جلال الكلوة دايرة فيا وحاجز بنمشى لالمانيا ..صعب نحضر
-جلال : باهى كيف بدير فموعدك فى شهور الممر
..وامورك لازم توكل واحد من الشباب يوقع عليك
-سعيد : وشنو انا قليل والى اللى بنوكل حد من الشباب
-جلال : كيف يعنى
-سعيد: تو نبعتلكم حد ينوب عليا
-جلال: ومن امتى احنا نبعتو فالبرانية فى اجتماعاتنا يا حاج …وانت تعرف الجدر واعر ويبي كل شى سري
-سعيد : ومن قالك بنبعت برانى
-جلال : ومن بتبعت
-سعيد بفخر: بنبعتلكم اكحيلة
-جلال : كأنى سمعته الاسم هدا المدة اللى فاتت
..من يكون
” طبعا هما الالقاب هادى سرية ينطقو فيها بينهم بين بعضهم بس مش قدام عامه الناس”
-سعيد : كحيلة يكون سليمان ولدى
-جلال :ماشالله وصل السن اللى يقدر يحضر بيه الاجتماع
-سعيد : امالا انا ليش باعته ..وصل العشرين
-جلال : الله يبارك ..تمام تو نبلغ الجماعه
اللى كانو حاضرين الاجتماع 12 شخص من ضمنهم جلال وكمال ..وكان سليمان اصغر واحد فيهم
طبعا هما يسمو فيه اجتماع الممر ..كل شهر يستلمه واحد فيهم ..وسليمان خدى سابع شهر …
هما تدخيل البضاعه مايتعاركوش عليها ..المشاكل كلها فالتسويق ..المناطق ملونينهم بالالوان على خريطه ليبيا … وكل لون مستلمه شخص ..ماحد يبيع فى منطقه الثانى …لكن الخونه ديما موجودة وكل مرة واحد منهم يشد حد يبيع فى منطقته …
طبعا سعيد بو سليمان وحمد بو كمال من زمان مايتفاهموش ..وقعدت العداوة هادى والكره حتى بين صغارهم ..فالاجتماعات القرار اللى يوافق عليه كمال يرفضه سليمان ديما ضد بعض …والعكس
وخش معاهم سلطان الشيبانى ولد خال كمال وخو زينب مرته حتى هوا بدى يحضر بدل بوه …المشكلة ان سلطان صاحب سليمان للجلدة وديما معاه عالخط حتى لو ضد صغار عمته
اما منير خو كمال ووحيد خو سليمان بعااااد عن الموزقو هدا كله…صرف وفلوس وسفر ونسوان وبس
وسليمان لما يخش فعناد مع حد وعارف المشكله بتكبر طول يقيم التليفون للمرزوقى اللى يخدم عندهم ويقوله طلع وحيد برة ليبيا ..عارفهم بي يلوله دارعه بيه ..لكن ميزتهم عمرهم مايدخلو فالنساوين فى مواضيعهم ..ديما العائلات برة الحساب
واستمر طول السنوات اللى بعدها سليمان هوا اللى يحضر فالاجتماع بدل بوه
__________________________
وفاتت 12 سنه …ووصلنا سنة 2009
ملاك عمرها 18 عام تقرا فالشهادة الثانوية
واميرة بنت خوها كمال معاها فى نفس الفصل لانها عاودت اولى ثانوى ..
اما سيرين الانيقه عمرها 21 سنه ..فى اخر سنه فى معهد كمبيوتر.. قرت اى قرايه تبى تتخرج بسرعه وخلاص
مقعمزة فالسيارة تتكلم فالتليفون
-سيرين : يا وحيد انت تبينى ولا لا
-وحيد : تى نبيك ونحبك ونموووت عليك امالا شنو
-سيرين : وشنو نهاية الحب هدا
-وحيد : سوسو حبيبتى.. من اول يوم تعرفنا فيه قلتلك احنا مش لبعضنا ولا
-سيرين : فى هداكة الوقت كنا كيف متعرفين ومزال منحبوش بعض ..لكن توة الحكاية تختلف
-وحيد : انا هدا الكلام اللى عندى وانتى ديري رايك
-سيرين دايرة روحها تبكى: امممم نهون عليك حبيبي
-وحيد : سكرى شوى خوى سليمان يكلم فيا
وسكر الخط بيش يفتك منها ..
وحيد مقعمز فى مربوعه صاحبه
-معتز: خيرك سكرت عليها
-وحيد: تى هادى تعرف تحب اصلا ..تبى اطيحلى خشمى ونجى نخطبها وبوها وخوتها يرفضونى وخلاص
-معتز: وعلاش بيرفضوك انت اى عائلة تتمناك
-وحيد : العيلة هادو اعدائنا من زمان ..مانتحابوش ومستحيل نتناسبو
-معتز: وعلى شنو متعاركين
-وحيد : والله مندرى قالى سليمان على اراضى زمان تقسيم الدولة ..موضوع زى هكى والله مافاهمه انا
” طبعا وحيد مايعرفش تجارة بوه وخوه شنهيا كلها سرية ويحسابهم يتاجرو فالبطاطا ”
-معتز: باهى مدامك عارف روحك العيلتين متعاركين ليش التعب مالاول
-وحيد: هكى جت النية نكسر خشوهم ببنتهم كلمتها وكلمتنى وخلاص كل حد يمشى فى حاله
-معتز: بعد ماعشمتها يا راجل
-وحيد: هادى عشمتها ..تى هادى تبيع القرد وتصحك عاللى شاريه ..شن تخرف انت ..عندها صاحبتها تحكيلى على كل شى ادير فيه
وتلفتله: وبعتالى انا من اول يوم قلتلها حب وطلوع ومطاعم وهدايا وبس ..اكثر من هكى مافى شى
-معتز : خلاص امالا مدامك من اوا يوم كنت معاها واضح
اما سيرين
تفتفت فالسيارة ..تسوق فالمطر وتجرى : تو نوريك يا حقير ..انا يضحك عليا عقاب شلافطى زيك ..تى والله لما نجيب خشمك للوطا ..
وصلت قدام كافيتيريا افطار ..درست السيارة ونزلت
خشت لقت صاحباتها سهير وميسا مقعمزات يراجو فيها
-سهير : تى خيرك قالبة هالوجه
-ميسا: من يوم تعرفت على وحيد الشياطين هدا وهيا جوها ولى اخىىىى
-سيرين: بالله ماعاد تفكرونى فيه الحقير هدا
-سهير: سيرين انتى تعرفينى قداش نحبك ومنحبش انافقك ..الولد من اول يوم قالك زواج لا
-سيرين: ومن قالك نبى ناخده..لكن انا قلت يكسر خشمه ويجى يخطبنى يعنى يجى يخطبنى
-ميسا: مش قلتى خوك محمد يكرههم
-سيرين: يابنتى بأى لغة تفهمى ..منبيش ناخده المهم انه يجى يخطب
-سهير: هيا بالله فوتونا من هالموضوع غير كملينا منشوراته الولد
-سيرين: من هوا الولد هدا
-سهير: ولد مالاخير ينشر فى منشورات اتموت بالضحك والناس كلها تعلقله
-سيرين: انا كيف فتحته الفيس والله مازابطاته كيف ..غير اقري خلى نضحكو شوى
وبدت ميسا تقرا فالمنشورات وهما يضحكو …
لحد ماوصلت قرتلها منشور غير مجرى قصتنا كله
-ميسا : غير اسمعو اهيا ? اخطف من تحبه لمدة 72 ساعه وسيزوجه لك القانون بحسب المادة 395
-سيرين ركزت : كيف مفهمتاش عاودى اقريهولى
وعاودت ميسا قرتهولها
-سهير: بمعنى البنت اللى تهرب مع ولد لمدة ثلاث ايام من وقت البلاغ ..لازم القانون يزوجهاله
-ميسا: لكن الولد فالمنشور بمعنى قالك اخطفى انتى من تحبي لمدة ثلاث ايام وبلغى انه خطفك وحيخليه القانون يتزوجك بالسيف عليه??
-سيرين?: حيه عالفكرة يابنات .. كانا نديرها لوحيد !؟.. شن رايكم
-سهير: تى والله الا فكرة ..ركبيه معاك فالسيارة ووكليه اى حاجه فيها منوم وارفعيه لوحدة من استراحات بوك واقعدى معاه ثلاث ايام ..وسيتزوجكى
وبدو يضحكو الزوز
-ميسا وجهها تغير: هدا هبال
-سيرين: غير خلونى نطبخها طبخة مليحه قبل وبعتالى ساهل
وناضو الثلاثه طلعو من المطعم كل وحدة ركبت سيارتها
ميسا قامت تليفونها واتصلت
-ميساء: الو
-وحيد : هلا ميوستى
-ميسا: عندى ليك خبر بمليون دينار
__________________________
فى نفس الشهر هدا… كان دور بضاعه سليمان فالممر
كان كله امن ليه هوا بس
طبعا وصلت البضاعه من النيجر وخشت ليبيا
وامنوها وتكموها وبيرفعوها لطرابلس فى سيارات كبيرة …
سليمان عادةً اي بضاعه يخزنها فى استراحته فالحوازة القبليه .. هما عن قصد يشرو فى استراحات كيف مبنية ومش كاملة بيش متجيبش الشبهه
والبضاعه بتوصل بعد اسبوع وبتتخزن ..طبعا التوصيل مش على سليمان لطرابلس ..عندهم ناس توصلها لمكانها وياخدو عمولتهم
__________________________
-كمال : وين ملاك
-سليمه: فى دارها
-كمال : ترا ناديهالى
-سليمه : حاضر شوية بس
وخشت سليمه من الباب الفاصل اللى يخش لدار ملاك
لقتها فى دارها توتى فى شنطتها
-سليمه : ملوكه
-ملاك : نعم يا سليمه
-سليمه : سيدى كمال ينادى فيك
-ملاك : باهى شويا هى تو نمشيله
وخلت ملاك شنطتها مفتوحه وطلعت لكمال
-كمال : اهلاااااا ملوكه
-ملاك داسة ضحكتها : ايه صدقتك
-منير مقعمز ياكل: ماعندها كيف تتقى عملتك يا كمال
-كمال : والله جتنى السفرة على غفلة
-ملاك : انا ليا اسبوع مكلماتك وقلتلك نبى نمشى معاك بنغازى ..اديرها عينى عينك وتمشى وتخلينى
-كمال : ياسرك من اليبارى يا منير ..والله مشيت على غفله ..لكن تهو احنا فيها ..درتلك تدكرة ونركبك بروحك وخالتك تستقبلك هيا وبناتها غادى
-منير: انا نحسابك ماعندكش خالة يا ملاك
-ملاك : هادى بنت خالت امى وبناتها نعرفهم من زمان وماشيتلهم مرتين مع خالد لبنغازى ..وتوة عطلة 15 يوم بنمشى لخوالى فى سبها
-كمال : عاديه اقسميها اسبوع هنايا واسبوع هنايا
-ملاك : ماتجيش منقدرش نحرم سليمه من خواتها وهيا فرحانه انها بتشوفهم بعد سنين
-منير: وهيا سليمه شن مرفعها بنغازى تركب بتدكرها لسبها وانتى اركبى لبنغازى
-ملاك : اى كانا هكى عادى
-كمال : لكن هيا رحلتها السبت وانتى رحلتك الاحد
-ملاك : ايه عادى مش مشكلة ومن غادى نمشى لسبها ونروح انا وياها
-كمال : تمام متفاهمين
__________________________
-وحيد يخبط فى ايديه فبعضهم : شبحتها بنت الكلب ولا
-معتز : يا ودى غير كلام والله ما اديرها
-وحيد : تى هادى قادرة الف من يتمنى يخدمها
ويعظ فسنونه وقريب يموت
-معتز : تى خلاص يا راجل فوتها
-وحيد : تى كانا ماخليتهاش تاخد المرزوقى معش انتسمى راجل
-معتز : شن تقول انت
-وحيد : بنتغدا بيها قبل ماتتعشى بيا
-معتز : كيف
-وحيد : مش كان خطفها حد وباتت معاه ثلاثه ايام يزوجوهاله بالسيف
-معتز : باهى
-وحيد: تى والله لما نخلى الشرطه تشدها مع المرزوقى ..
وكان ماخليتهمش يقرولها فاتحتها عليه فالمركز معش نتسمى وحيد ميلاد ولد العقربان
-معتز : يا ودى هادى الحكاية خطيرة
-وحيد : مش اخطر من اللى بديره هيا الواطيه
__________________________
ووصل يوم الاحد
جماعه وحيد يراجو فى سيرين تطلع بيلحقوها وبيخطفوها لانها جمعه وسبت ماتطلعش
-ملاك : ياسيرين هيا معش وقت عالطيارة وصلينى وروحى ارقدى
-سيرين : والله امبارح ساهرة للفجر ماقادرة نقيم راسى
-ملاك : يا مراءة نوضى الطيارة بطير
-قامت سيرين راسها: تعرفى كيف امشى انتى بالسيارة للمطار ودرسيها برة تو نمشى بعتالى انا وسهير صاحبتى نروح بيها
-ملاك : باهى تلقيها وين درسناها المرة اللى فاتت لما مشينا للعمرة
-سيرين: لكن اسمعى
-ملاك : نعم
-سيرين : راهو اللى يسئلك تقوليله انا وصلتك
..فكينى من تلكليك بابا
-ملاك : تم ..هيا سلام
-سيرين غطت راسها : سلام
سيرين قاصه سعرها قصير لودانها صابغه الاطراف بالاصفر وضعيفه هلبا
اما ملاك جدوقها معبيات وفمها صغير وشهرها قهوى ومعبى وناعم لعند اكتافها ..طولها 165ووزنها 55 ضعيفه حتى هيا
يا حنه قولو حطت ملاك شنطتها فى سيارة سيرين و ركبت فيها وطلعت متوجهها للمطار …
هيا تمشى وهما فى جرتها يحسابوها سيرين .. يبوها توصل للمكان اللى تبى تمشيله وتنزل من السيارة ويبخو على وجهها مادة ادوخها منغير شوشرة ….
طبعا هيا لين وصلت للمطار وملاحظتهمش ان فى سيارة اتبع فيها …
درست السيارة فالبريكيدجو .. وفتحت الكوفينو نزلت منه الشنطه وسكراته وحطتت المفتاح فمكان معين تعرفه سيرين ..لانهم ديما يديرو فيها ..
وتلفتت بتمشى تلقى واحد قدامها بخ فى وجهها بخاخ غابت عن الوعى
وقام الشاب تليفونه واتصل
-الشاب : ميه ميه
-وحيد : صحة للتريس ..يلا ارفعوها زى ما قلتلكم للاستراحة القبلية طول وسكرو تليفونها
-الشاب: تم
معتز فى جنبه : شنو داروها الشباب
-وحيد : تحسابنى انبصر امالا
-معتز : وتوة شن بدير
-وحيد فرحان وحاس بالانتصار: الخطه كالاتى ..توة بنمشى بندير بلاغ كأنى انا خوها احمد ..ان اختى مختفيه وطبعا الضابط صاحبي
-معتز: باهى وبعدين
-وحيد : ولا قبلين ..اليوم الاحد ولا ..نعطوهم للثلاثاء وهما يحوسو على روحهم خوتها وبوها ..مايحسابوش ان الشرطه عندهم بلاغ على بنتهم …
الاربعاء يتم التبليغ من مجهول .. وتمشى فرقه تجيبها هيا والمرزوقى .. ويقرولها فاتحتها عليه..وبعدها يبلغو بوها
-معتز: تى ماهو بيعرفو الحكاية من طرفك لما بيشوفو المرزوقى
-وحيد : وانا هدا اللى نبيه …غير هيا نوض نمشو لفندى علاء يتكمنا الامور
__________________________
الاثنين فالليل فاقت ملاك …
مكان زى المهجور وايديها مربوطات ..
خوتها يحسابوها مشت بنغازى عند خالتها ..ورقمها مسكر يحسابوها على خاطر الدهوارى ولا التغطيه مفيش
وسيرين مشت جابت سيارتها من المطار ولا من شاف ولا من درى .. قالتلهم وصلتها بنفسى للمطار
..ومالاحضتش اى حاجه غريبهة..لقت سيارتها ركبتها وروحت …
اما وحيد متكلمش فيه لانها زعميتا زعلانه منه بعد اخر نقاش …وقاعدة تطبخله فى طبختها هيا وسهير صاحبتها ..وماتحسابش الكلام وصله من اول يوم
ملاك تنادى فى هاديكه الدار وهيا خايفه: وينكم ..من فى هنايا ..
وتتفرج الدار املعقه بس ..ويبان باب مفتوح فيها فيه سيراميك عالحيط ..وهيا ممدودة على سرير محطوط على تركينه
جاها واحد مغطى وجهه : شن تبى
-ملاك قعمزت : انتو منو وشن تبو منى
-الشاب: قلتلك شن تبى
-ملاك : نبى الحمام
-الشاب: اهو الباب متع الحمام قدام عيونك
-ملاك : بنخش هكى وايديا مربطات
-الشاب : دبري راسك هكى ولا نخش معاك انا ..لكن ايديك ماتحلميش نفكهملك
-ملاك : مصح وجهك ..اطلع برة
-الشاب : شويا ونجيبلك عشاك …
وباتت ملاك هاديكا الليله يعلم بيها غير ربي…
وفالفجر خشلها الشاب وحول الرباط من على ايديها وقاللها اسكتى ومديريش شوشرة وانا بنهربك لاهلك
وهوا طبعا لا بيهربها لا شى غير يبي لما الشرطه ترفعها مايلقوهاش مربطه
__________________________
ثانى يوم الثلاثاء …
مشى المرزوقى للفيلا …وقال للشباب كلهم ايروحو ..ويراجى عاد فالشرطه بتجى ..المرزوقى من حبه لوحيد مستعد اينفدله اى طلب ولو حتى يقوله طيح فالبير …
المرزوقى يعتبر كبير عمره قريب 55 عام ..ولتوة مش متزوج ويعتبر هوا اللى مربي وحيد
خش للمطبخ لقى غاز بريمس محطوط على تركينه دار بيه طاسة شاهى ومقعمز يراجى فالشرطه حسب الاتفاق …
دريت سيارة برة … وانفتح باب الاستراحه …
ويشبح المرزوقى يلقى سليمان قدامه… قريب جاته سقطه قلبيه
-سليمان : انت شن ادير هنايا يا مرزوقى
-المرزوقى يتمتم يبى سليمان يطلع قبل ماتجى الشرطه : سيدي كحيلة انت شن ادير هنايا توة
-سليمان : انا جايتنى بضاعه بتوصل توة
-المرزوقى: الشرطه جاية يا سيدى
-سليمان يعيط : شرطه شنو يا مرزوقى وعلاش الشرطه جاية
وبدو يسمعو فى صوت العوايات متع سبارت الشرطه …ثلاث سيارات جايات بيش يرفعو المرزوقى والبنيه ..طبعا فندى علاء مامشاش بنفسه …بعت دورية بعد البلاغ
نزلو خشو للحوش… لقو المرزوقى وسليمان
-الضابط: البنت وين
-سليمان يشبح للمرزوقى : البنت !!! فى بنت هنايا يا مرزوقى
-المرزوقى: اهى لداخل فالدار
-الضابط: خش يا عسكرى جيبها
وخش الضابط طلع ملاك من الدار …
وطلعت ملاك لقت الضابط قدامها ..
-ملاك : خطفونى يا ضابط ..منعرفهمش خطفونى
-سليمان يشلحلها : انتى شكون
-الضابط : سكوت الكل …طلعهم للبوكس يا عسكرى
-سليمان حاير عالبضاعه اللى جاية : سقد روحك يا مرزوقى اطلع للبوكس
-الضابط : حتى انت معانا يلا
-سليمان : هيا نمشى معاكم …
وركبو للبوكس سليمان وملاك والمرزوقى ومعاهم ضابط …
فالبوكس سليمان يشبح لملاك وحاير شن القصه وشن جاب البنت للمرزوقى …
-سليمان اتكى جيهتها ويتلكم بالشوى: انتى اسمك سلوى وتكونى زوجتى ..تمام
-ملاك مخلوعه مش عارفه شن فى : باهى
ووصلو للمركز وخش سليمان قدام ملاك والمرزوقى بهيبته …
-سليمان : خير شن فى يا فندى
-الضابط : تفضلو قعمزو لين يجى ضابط التحقيق
وشرين تليفون المرزوقى …
قام التليفون لقاه وحيد يتصل ..رد عالتليفون
-المرزوقى : الو
-وحيد يعيط : طلع البنت يا مرزوقى مش هيا …البنت اللى نبى نخطفها توة كلمتنى قلتلها انتى وين قالتلى انها فالحوش
-المرزوقى : احنا فالمركز توة
-وحيد : اهرب يا مرزوقى
-المرزوقى : انا مش بروحى
-وحيد : من معاك
-المرزوقى: معاى سيدى اكحيلة ..
-قامت ملاك راسها وشبحت لسليمان.. كأنها سامعه اسم كحيلة زمان: لقبك اكحيلة
هيا تحساب اسم عيلة لقبهم كحيلة
-سليمان فنص: فى من تكلم يا مرزوقى
-وحيد يعيط فالتليفون : رد بالك تقوله يا مرزوقى..انكر معرفتك بالحكايه كلها ..وعلاء لما قلتله ناض روح طول ..البنت احنا منعرفوهاش منهيا وماليناش علاقه بيها …
وسكر الخط …
خش الضابط …
وبدى يستجوب فيهم
-سليمان : هادى سلوى زوجتى وهدا المرزوقى صاحبنا … ولحظه بس عندى مكالمه بنديرها ممكن
-الضابط متساهل: باهى كلم هى خلى نشوفوك وين بتوصل
-سليمان : مدامك خليتنى نتكلم فالتليفون معناها انت فالامان ومش حنضرك…
وقف على تركينه دار مكالمه لشخص مهم…وعطى التليفون للضابط لما سمع الصوت وعرف الاسم قريب جاته جلطه …
وقطع المحضر كله وتأسف من سليمان …
سليمان تلفت لملاك : سامحينا وتقدرى تروحى ..
وسخفاته يحسابها مسكينه مدلها كرته : وهدا رقمى الخاص لو ستحقيتى اى حاجه كلمينى
– ملاك اتكلم فالضابط : ممكن نغسل وجهى
-الضابط : طبعا دورة المياه فى اخر الممر
وطلعت ملاك من الغرفه ورجليها فى غمرها وتشدها هرولة للكياس …وقفت اول تاكسى وركبت فيه ..
وسليمان قاعد واقف فالممر يراجى فيها
-المرزوقى خايفها تحكيله: ياسيدى هيا نروحو مالنا ومالها
-سليمان : كيف نروحو ونخلوها فالمركز
-عسكرى واقف وراه: كانكم عالبنت اللى جت معاكم طلعت من بكرى راهو
-سليمان : وين مشيت
-العسكرى: منعرفش وقفت تاكسى ومشت
سليمان شد المرزوقى من سوريته جهه الرقبه : منهيا هادى يا مرزوقى وسن قصتها
-المرزوقى: والله يا سيدى هادى ما نعرفها..الكلام على بنية غلطو وجابو وحدة ثانية ..لكن منهيا والله مانعرفوها
فكه سليمان وخلاه فالمركز وطلع رجع لاستراحته لقى جماعه البصاعه كيف وصلو
اما ملاك يا نارى نزلت من التاكسى …وخشت اول كافى ..و للحمام طول غسلت وجهها وهندمت حوايجها … وفكرت انها تقول لخوتها انها قطعت رحلتها من بنغازى وروحت للحوش
وبالفعل خشت للحوش لدارها طول وماكلمت حد ..
بعد مادوشت وغيرت طلعت
-زينب: بسم الله العظيم .. امتى روحتى
-ملاك : وصلت بكرى ..كلمت نزهة صاحبتى جتنى هيا وامها روحو بيا
-سيرين : وخيرك ماكلمتينيش انا
-ملاك : تليفونك مقفل حبي
-سيرين : لا مفتوح
-مريم : وخيرك روحتى
-ملاك : جتهم بنت عمهم وانا متعاركه معاها تسبلت بمشيه سبها وقلتلهم نبى نروح للحوش قبل
-زينب : وخيره تليفونك مقفل كمال كلمك قداش مرة
فاقت ملاك ان تليفونها وحوايجها قعدو فالاستراحه
-ملاك : تليفونى???
__________________________
تمت … ويتبع ???
اووووف دهشت …حوشنا جمعه يردس طول اليوم كتبتهالكم المغرب لين دهشت ???
جماعه اللى تعلقو فى منشور الحلقه فالتعليقات بيختوها راهو حسنى بنبدا نحضر بلحقه
نحبكم ❤❤