رواية اكحيلة

#اكحيلة

??للكاتبه زهور جمال الدين ??

??الحلقه التاسعه عشر ??

فالعشية جى وحيد …
سلم على اكحيلة وهدرزو ..وعلى قد ماشد فيه يركب معاه لشقته رفض وقاله مزال ..
ركب اكحيلة ضبح على ملاك بيش تسلم على وحيد ..
لبست ملاك سروال ومالية وحجاب …
ونزلت للدور الاول …
-ملاك : اهلا وحيد
-وحيد : اهلا ملاك..تشرفت بيك وخيتى
-اكحيلة : ملاك وحيد من اليوم خوك ..انا مهناش تطلبى الحاجه منه هوا
-وحيد : تدلل اختى واعز
مشو للصالون قعمزو
-ملاك : كيف حال خالتى فضيلة
-وحيد : حقه احنا اقارب نعتبرو صغار الخالة
-اكحيلة يضحك : والله ..شوف الدنيا مصغرها صارو انتو اقارب
-وحيد ?: صغار الخالة
-ملاك : ايه ماما وخالتى فضيلة بنات الخالة
-اكحيلة : صار طلعت انا البرانى
-وحيد : ايه انا وبنت خالتى نعتبرو جبهه وحدة
-ملاك تضحك : كيف حال ايناس وايمان
-وحيد : الحمدلله كويسات ..بنرفعهم لبنغازى توة
-اكحيلة : ليش !!؟ مش استقرو هنايا
-وحيد : لا رافعهم زيارة عندهم مايديرو وبنروح بيهم

__________________________

-سلطان : باهى وقداش بتقعدو
-ايمان : منعرفش .. مرات اسبوعين
-سلطان : لا لا هلبا ..وين اسبوعين
-ايمان تضحك : تقول علينا واحنا 24 ساعه مع بعضنا ..ياودى وجودى هنا زى وجودى فى بنغازى
-سلطان : زى وجودك فى عينك ..هنايا عالاقل مونستنى بوجودك لكن تبعدى بعيد ونقعد بروحى هدا لا يرضى الله ولا عبده
-ايمان : باهى كيف نقعد ومانمشيش
-سلطان : لا امشى وانا حنلحقك غادى
-ايمان تضحك : حيه عليا شن تقول انت ..كيف تلحقنى ووحيد شن بيقول لو شافك
-سلطان : مابيقول شى لانى قايله على موضوعنا من قبل عرس اكحيلة
-ايمان تفاجئت : لا ماتقولهاش ..حيه عليا وانا نقول وحيد ياغمز عليا شن عرفه
-سلطان : انا راجل دغرى ومنحبش حد يشد عليا حاجه .. موضوع واستريحتله نحكى فيه ليش بندسه
-ايمان : بس مفروض قلتلى حبيبي
-سلطان : لا عادى وحيد تفهم الموضوع وفرح بيه
-ايمان : وتوة كيف بيصير
-سلطان : توة بري لبنغازى وروحى عالخير وبعدها جهزى نفسك بتزورك امى
-ايمان فرحت : هدا احلى خبر نسمعه منك حبيبي

__________________________

فى حوش ملاك

غادة وهشام جايين يزورو فى سليمان وملاك
هشام وسليمان طلعو بالسيارة يديرو فى دورة
..وغادة قعدت فالحوش هيا وملاك
-غادة تبكى : مقدرتش يا ملاك
-ملاك : غادة متبكيش يا عمرى
-غادة : مفكرة نطلب الطلاق وناخد صغار اختى معاى
-ملاك : غير فهمينى بالشوى ..هوا مسيف عليك بالرقاد معاه
-غادة : لا .. لكن يحاول ويبعتلى فى رسايل
-ملاك : رسايل شنو
-غادة : وقت ايصير اى موقف فالحوش ويعجبه ..مايجيش يكلمنى ..لا يبعتلى رسالة ويعبر فيه عن اعجابه بتصرفى او بشكلى او هكى يعنى
-ملاك : يا غادة راك غالطه.. انتى مرته وهوا راجلك ..والراجل يبيك ارخى نفسك معاه مش عيب
-غادة : مستحيل ..هدا راجل اختى
-ملاك : اختك ماتت ..والراجل عزابى ..بغض النضر عن قرابتك زمان بيه ..بس توة اسمك زوجته
جت سليمه جايبه سفرة نسكافيه وكيك
-غادة : سكرى عالموضوع توة يا ملاك
-سليمه : تفضلى
-غادة : فضل عليك ويرحم والديك
-سليمه : شنو رايك فى حوش صاحبتى
-غادة: تبارك الرحمن على صاحبتى وحوشها وراجلها والدلال اللى هيا عايشة فيه
-سليمه : ربي يحفظهم بنتى وولدى
-غادة : اى والله ..هشام يحكى على سليمان انه تغير هلبا وبدى هادى وقاعد فالبلاد بعد ماخطب ملاك
-سليمه : ملاك تستاهل كل خير..وحتى انتى يا غادة
-غادة : صحيتى ياسليمه بارك الله فيك
-سليمه تضحك فى ضحكه صفرا : هاهاها قتلك سامحينى سمعتكم وانتى تتكلمى مع ملاك توة ونبى نحكيلك قصه
-غادة : احكى
-سليمه : هلبا ليبيات زيك اللى خدت راجل اختها واللى خدت سلفها ..فالاول قريب طارو بيش اقتنعو ..المشكلة انهم بعد ماعطو لنفسهم فرصه انهم يتواصلو مع رجالتهم ..ندمو على الشهور اللى ضيعوها وكل حد فمكان
-غادة واطت راسها متحشمه : فهمت عليك
-سليمه : زمان جارتنا راجلها مات فى حرب تشاد ..خدت سلفها ..حلفت قالت اربع شهور كان رقد هوا فالدور الاول نرقد انا فالدور الثانى ..وكانا هوا ركب للثانى نرقد بصغارى فالدور الاول
-ملاك تشوقت : باهى وبعتالى كيف صار
-سليمه : بعتالى الراجل طلب حقه زى اى راجل
…تحلف قالت ندمت على هداكة الوقت اللى فات من عمرى وانا نصد فيه
-غادة : ماهو انا نختلف يا سليمه
-ملاك : كيف تختلفى ..انتو مش بنى ادمية زينا
-سليمه : بنتى مدامه الراجل هوا اللى يتبع فيك ..ارخى روحك معاه ماهوا الا راجلك وانتى حلاله وعنده حقوق عليك
-غادة : والله مانى عارفه

وكملو النسكافيه وناضت سليمه تسخن فى صحون الحار

_____________________________

بعد اسبوع

وحيد مسافر بخواته لبنغازى …
وفى حوش الشيبانى سلطان يتناقش هوا وامه واخته زينب
-سلطان : مفهمتش عليك يا زينب
-زينب : كلامى واضح ..اكفى الجرة على فمها تطلع البنت لامها
-سلطان : كانا زمان كمال يبي امها انا شن دخلى بيه هالموضوع
-زينب : دخلك انك ولد عيلة الشيبانى ..وبنت فضيلة متخشش للحوش هدا كنه الا على جثتى
-سلطان : وشن جاب هدا لهدا .. البنت شن دخلها بمشكلة قديمه
-زينب : اسأل امى كيف عانينا منها ..وهيا لاصقه فيه زى القرادة ..تكلمى يااام
-امهم : يا زينب بنيتى موضوع قديم ومات ..وانتى كبرتى توة على هالمواضيع
-زينب : شن قصدك يااام انتى موافقه شكلك
-امهم : امالا يجينى ولدى ويقولى نبى فلانه نقوله لا خود بخاطر اختك فى قصه من العهد البايد
-سلطان : يازينب انا بناخد ايمان مالى ومال امها
-زينب : البنت هادى لو خشت الحوش انا والله ماعاد خاشاته ..والكلام ليك انتى يااام
-سلطان : اسمعى يا زينب كان حلفتى بتحلفى على روحك راهو..انا ايمان بادن الله بناخدها ..وانا رانى مش جاى ناخد فى رايك ..انا جاى نعطى فيك فى علم بس
-امهم : بتسيبى سلطان فى يوم زى هدا يا زينب ..حليلك على روحك
زينب قعمزت عالصالون وبدت تبكى ..سلطان اوخيهم الوحيد والمدلل
-زينب : يااام ماتضغطيش علياى..كيف مراءة طول عمرى نكرهها ونحقد عليها .. نمشيلها اليوم نضايف عندها ونشرب قهوتها
-امهم : على خاطر اوخيك يا زينب
اما سلطان خدى مفاتيحه وبيطلع : ديري رايك يا زينب ..احنا بنمشولهم الاسبوع الجاى ..ونتمنى تكونى انتى وخيتى اللى تشرفينى على راس الحاضريين ..قلتى مانقدرش مش حنزعل منك ..بالعكس حنقدر موقفك

__________________________

سلطان لحق ايمان لبنغازى ..

وطلعو مع بعضهم لمطعم مرتين بعلم وحيد طبعا
لانه حكم خاطبها منه
وبعد اسبوعين رفع امه وخواته الزوز يخطبو فيها
مع ان فضيله ماوافقت الا بستين حكمه …بو سلطان دار فيها هلبا زمان ..وماتبيش تناسبه ..لكن لما لقت بنتها متعلقه بسلطان هلبا وافقت وسكتت وخلاص ..وشرطت لن بنتها تسكن بروحها … ووافقو اهل سلطان
زينب رضخت ومشت على خاطر خوها
مع انها ماداقتش عندهم حاجه حالفه عليهم ?
جيت اهل سلطان حضرتها ملاك عزومها بنات خالتها
ام سلطان قريب طارت بايمان ..كنتها الوحيدة عاد ..وعجبها شكلها
وسلطان وين تلقيه يا حنه قريب بيطير من الفرح ..
-اكخيلة يضحك : شنو حصلت حتى انت يا صاحبى
-سلطان يضحك : ماحد خير من حد ياراس
-اكحيلة : عليك حسد
-سلطان : حسد اسود حاشاك ??

وبعد تم الشهر دخلو ملاك على اماليها ..رفعت معاها الخير كله
فالليل روحت ماخلهاش سليمان تبات عندهم

متكيين فى سريرهم ….
-ملاك : حبيبي العرايس كلهم يباتو فى حوش اهلهم الخشة الاولى
-اكحيلة : غير تعالى لحضنى خيرك مقعمزة بعيد
-ملاك فرحت ?: باهى حول يدك
-اكحيلة قام يده : تعالى
وحضنها وقرب وجهه من وجهها : هادوكه اللى مايحبوش نساوينهم يخلوهم يباتو
-ملاك تضحك : توة كلهم مايحبوش نساوينهم الا انت .. اكثرهم يباتو
-اكحيلة باسها من شفايفها : نتفق انا وياك اتفاق
-ملاك تضحك : شنو
-اكحيلة : ماتباتيش ليله خارج سريرك حتى ..حتى لو انا مسافر ولا متخاصمين
-ملاك حشت وجهها فى رقبته : معش تقول متخاصمين حبيبي
-اكخيلة : حيه عالدلع حيه ..انا مش متعود راهو يابنت الناس
-ملاك : مزال وانت شن ريت
-جابها تحته : صار انتى فالحة وخبرة
-ملاك : تى حول ياسمونى خبرة عينك
-اكخيلة يبوس فيها: اصلا انا نبيك خبرة وفالحة
قعدو يبوسو فى بعضهم ويضحكو

_____________________________

نهايه الشهر …

عرس سلطان وايمان …
-مريم : ربي يصبرك يا اوخيتى
-زينب : ريتى الهم ولا
-مريم : انا حايرة لتوة ماصارش حتى موقف ..معقولة كمال لتوة ماسمعش بفضيلة
-زينب : ومن بيقوله يا ماما ..اصلا القصه مش هلبا اللى يعلمو بيها .. ومن بيقوله عليها انا رجعت
تى هوا خوى سلطان كيف حكيتله عليها انا
-مريم : وشن قالك بعد عرف
-زينب : ياماما البنيه قادرة طالعه لامها ياحنه ..قالى شنو تبينى نسيبها على خاطر سى كمال متاعك
-مريم : ووك عليا نفس وعارة امها
-زينب : يالله ربي يهنيه اوخى ويباعد عليه نسيبته اللفعه

ودار سلطان عرسه حتى هوا سبع ايام وسبع ليالى ولعب الخيل عنده
وملاك عاد صدرت ولبست وزاطت فى عرس ايمان
وخدى سلطان العروسة وسافر بيها ادهورو فى كل مكان
__________________________

وبعد اربع شهور ….

اكحيلة موعد شهره فى الممر
وبلغ ملاك انه بيمشى للجنوب

-ملاك فى حضنه : حبيبي بتغيب هلبا
-اكخيلة يدخن : لا ممكن نقعد اسبوعين
-ملاك : هلبا يا عمرى
-اكحيلة : يفوتو بسرعه انشالله
-ملاك : ضرورى تمشى انت ..ابعث حد
-اكحيلة : لا هادى بضاعتى ولازم نشرف عليها بنفسى
حولت ملاك راسها من حضنه
-ملاك : بضاعتك !!؟؟.. قصدك ماشى بدخل السم الهارى اللى انت اتاجر بيه
-اكحيلة : سم شنو اللى تحكى عليه
-ملاك :مش قلت بدخل بضاعه
-اكحيلة : اسمعى ملاك تبى حياتنا تمشى صح ماتدخليش فى شغلى ولا تفتى فيه
-ملاك : لما يكون رزقك حلال ومش مشبوه وقتها نسكت وماندخلش
-اكخيلة مغتاظ : تعرفى لو قالهالى حد ثانى الكلمه هادى رانى دفنته فمكانه ..لكن انتى بنفوتهالك المرة هادى
-ملام : باهى شن رايك انى مش حنخليك تمشى للجنوب ولا تستلم بضاعه
-اكحيلة وقف : نعم نعم ..بتحكمى فيا انتى
-ملاك خايفه : انا زوجتى وعندى راى فى رزقك وحياتك
-اكخيلة : انتى هنايا تاكلى وتشربي بس …شغلى ماليكش علاقه بيه
-ملاك : هداكه لما نبدا صنم
اكخيلة فى نفسه غيض كبير اول مرة حد يناقشه هكى خدى كندرته وبيطلع
-ملاك : وين ماشى ندوى معاك انل ولا
-اكحيلة : خلينى نطلع خير ما تكبر الحكاية ويصير فيها حتى الضرب
-ملاك : انت تهدد فيا بالضرب ولا شنو
خدى اكحيلة مفاتيح الحوش وطلع مغتاظ
وملاك قعمزت عالصالون تبكى وجعتها الكلمه

____________________________

روح سليمان مع 12 فالليل
خش للحوش لقاه فاضى …خاف على ملاك زعما وين مشت …
نزل تحت لشقه سليمه طقطق
-اكحيلة مغتاظ من طلعتها : ملاك عندك
-سليمه : لا لا ..ملاك فوق فى حوشها ولا
-اكحيلة تحشم : هيا قالتلى ياتلقانى عند سليمه ولا عند الحاج
-سليمه : معناها اكيدة مشت للحاج لانها ماجتنيش
-اكخيلة : باهى تو نشوفها
وكلع ولف لخوش بوه وطقطق ..وفى خاطره: اقسم بالله تطلع مهناش فالخوش كله لما نهارتها السود عليها
فتح المخلوف : اهلا سيدى اكخيلة
-اكخيلة : وين بوى
-مخلوف : الحاج فوق
-اكحيلة : من معاه
-مخلوف: معاه ملاك
-اكخيلة دس غضبه : ترا ناديهالى
-مخلوف : باهى
وخش اكحيلة قعمز عالصالون …
شوى ونزل المخلوف : قالك الحاج تعالة انت فوق
ركب اكخيلة من الدروج بسرعه ..مشى لدار بوه لقى الباب مفتوح ..خش ..لقى ملاك مقعمزة عالصالون ..وبوه مقعمز عالصالون الثانى
-اكحيلة بغيضه: انتى شن مطلعك من الخوش
ملاك بدت ترعش
-سعيد : جايا تهدرز على بوها شن العيب
-اكحيلة : لا مفيش عيب يابوى
وتلفتلها: نوضى
تلفتت هيا لسعيد
-سعيد : نوضى بنتى روحى
طلع اكخيلة من الدار وطلع بوه وراه
-سعيد : سليمان
-اكخيلة : نعم
-سغيد : هات ايدك
حط اكخيلة ايده فى يد بوه
-سعيد: وعهد هالعشرة ماك دايرلها حاجه ..هيا خافت من كلمت الضرب
-اكخيلة : انا تعرفنى ضرب مانضربش..مستحيل نحط ايدى عليها ولا نضربها طول عمرى ..لكن لازم تغرف حجم غلطتها بطلوعها من الحوش منغير ادنى
-سعيد : لاااا هكى انا بنتغشش..امالا البنيه وين بتمشى ولمن بتحكى وهيا يانارى بدلا والى لا تالى
-اكحيلة : انشالله خير يا بوى
وعلى صوته : هيا وينك
وطلعو ملاك وسليمان من دار سعيد نزلو للدور الاول روحو لحوشهم

____________________________

تمت …ويتبع

توة زعما كيف بيصير معاهم بعد مابيروحو
وملاك بتقعد تنقرز على خدمته ولا بترضى وبتسكت
نحبكم ❤