رواية اكحيلة

اكحيلة

??للكاتبه زهور جمال الدين ??

☘?الحلقه الحادية عشر?☘

سيرين مقعمزة فالحوش تاكل فى بعضها
وتحكى فى خاطرها : معقولة اللى نحط عينى عليه نلقاهم كلهم زى الدبان يدورو فوقه
وتخمم: لكن هدا بالدات حقى وانا اللى كانو المفروض
بيخطفوها..هدا مكانى ..وانا اللى مفروض كنت نكون فيه وهوا ينقدنى
اما نخليهولها هكى عالجاهز والله ماصارت
وقفت فالباب : سالمه ..يا سالمه
جتها البنت اللى تخدم فالمطبخ مش ليبيه لكن تحكى ليبي صافى : نعم
-سيرين : شن حالك اليوم من البردة
-سالمه : الحمدلله يا سريوة ..والله امس قريب متت
-سيرين: عاد الا انتى يا سلومه بابا يرعش عليك رعيش
-سالمه : سلمه يا ربي سيدى كمال ..والله حتى زياد راجلى يقول انه مغرقه بكرمه
-سيرين : بابا يقول انتو عشرت عمرنا ومعش نقدرو نستغنو عليكم
-سالمه : اؤمرينى يا سيرين
-سيرين : نبى قهوة بنعدل مزاجى
-سالمه : من عيونى
“ميزتهم طيبيين مع الجميع ومتواضعين اهل ملاك ”
-سيرين : سقدينى راسى بيتفجر منى
-سالمه : شنو شكلك تخممى فى موضوع
-سيرين : موضوع قوى هلبا ..ونبى نديرله دبارة تقلبه الفوقى لوطى
-سالمه : اللطف اللطف.. شنو الموضوع شكله مسألة حياة او موت
-سيرين : بالزبط .. والخصم متاعى مش ساهلة
..ومواجهتى معاها حتكون قوية..بس حتى انا مش ساهلة وتعجبك خططى
-سالمه تحط فالقهوة فالسزوا ومتلفته لسيرين : تسمعى كلامى لو نصحتك فموضوعك
-سيرين : شنو انتى تعرفيه الموضوع
-سالمه : مش قلتى ان المواجهه حتكون قويه
-سيرين : ايه
صبت سالمه القهوة فالفنجان ومدته لسيرين : خلى خصمك غافل .. بيش لماتعطيه الضربه اتجيه فى مقتل وهوا مش محسبلك
-سيرين: غافل!؟؟
-سالمه: اى نعم غافل ومايعلمش عليك انك ادبريله
-سيرين : تصدقى اقنعتينى …تى والله الا تحكى درر يا سالمه
“سيرين اى حد يفتى عليها يقنعها وتقوله كلامك حق ?”
-سالمه : طبعا ..امالا تخبري خصمك بموضوعك تلقيه مجهز كل انواع الاسلحة بيش يدافع على نفسه ..بس لما اداهميه على غفله مرات حتى السكين مايلقاشى
-سيرين : صح كلامك ??.. والله عجبنى
-سالمه : خاصه لما يبدا الخصم معرفه ..تلفى من وراه واداهميه منغير مايشوفك ..وتشيلى البساط من تحته يطيح طول ومايعرفش من اللى طيحه
سيرين قربت من سالمه وعطتها بوسه على خدها : انا توة عرفت علاش بابا يعزكم ..لان كلامكم يخش الدماغ
-سالمه : غير بري بالنية وماتظلميش بيش ربي مايطيحكش فى شر اعمالك
-سيرين : لا لا انشالله خير
وخدت القهوة ومشت لدارها وهيا تخمم فالكلام اللى قرتهولها سالمه

________________________________

فضيله حاضنه ولدها وولدها حاضنها
واللى فالصاله كلهم يبكو سليمان وسعيد وسليمه
حتى المرزوقى لما سمع العياط جى طول فتح الباب وخش وشاف الموقف
والمخزوم طلع من المطبخ لان حس ان فى شى مش تمام فالصالة …
اكحيلة جى لخوه مسكه من كتفه : صلو عالنبى يا جماعه ..وحيد خيرك ياراجل
فضيله بطيح قعدو يكرو فيها اكحيلة ووحيد قعمزوها عالصالون
وجتها سليمه : يافضيله صلى عالنبى
وفضيله يانارى حاطه يديها عالوشاح فمكان الخلال ترخى فيه بصعوبه : حسبيا الله فيك يا سعيد
…حسبيا الله فى خوتى ….
وشادة وحيد : لاه …لاه عندى سيد الشباب وتحرمونى منه
-سعيد : ياسليمان سكتها ولا والله نفرغ فيها مخزن
-وقفت فضيلة: فضيله اللى تخاف منك زمان ماتت يا سعيد ..توة سلم ماجابت بطنى يوقفولك فى وجهك..ويردك عليا
وتلفتت لوحيد وتبكى : خدوك منى ياوليدى وقالولى مات
-وحيد يحضن فيها : باهى غير اهدى ياااام
-اكحيلة: غير يا حاجه ماتظلميش بوى ..خلى نفهمو منه …
وتلفت لبوه : تكلم يا بوى ..شن القصه
-سعيد : القصه ومافيها انها لما هيا حامل فالشهر السابع خداها خوها صالح وهرب بيها للسودان لانى اختلفت معاه
وتلفتلها: هرب بيك ولا مهربش يا فضيلة
-فضيله : هرب بيا من افعالك السودة الى تحشم
-سعيد : وانتى شن دخلك بخدمتى وافعالى ..كيف تركبى مع خوك وتمشى وتخلى حوش راجلك
-فصيله : انت عارفه رافعنى بالسيف عليا وبعتلك مع جلال ولد خالتى
-سعيد : ايه نعم جانى جلال .. وقالى ياسعيد فضيلة تبى تروح معاك ومشيتلك وناداك خوك وقلتيلى فى وجهى مانبيش نمشى معاك وطلقنى ..صار ولا ماصارش
-فضيله : صار ..لانه كان ضاربنى ومهددنى نقولك هكى
-سعيد : وانا منين بنعلم ولا بنوحى ..مراءة قالتلى معش نبيك شنو بنقوللها غير سلامتك..وشرطت عليكم ولدى نبيه ..وبالفعل بعتيهولى
-فضيله : نبعتلك قهايرك .. انا ناخد ضناى بيدى ونبعته ..هدا الكدب بعينه … بعتلهولك بتشبحه نحسابك راجل وعند كلمتك وبتردهولى..جونى خوتى وقالولى خداه بالسيف علينا وخطفه
-سعيد وقف: مصح وجهك ووجه خوتك معاك

_____________________________

وصلت ملاك للحوش وقت المغرب
درست سيارتها ومشت لاستراحة خوها منير
طقت عالباب ..
فتح احمد ولد خوها خالد
-ملاك : والله حاسدتكم على هالقعدة الرجالية مع بعضكم ??
-منير: اوووو ملاك .. غريبه كيف رجليك جابوك هنايا
-ملاك خشت : مالغريب الا الشيطان ستاحشتك يامنير ليا قريب اسبوع ماشفتكش
-منير يضحك : كنت فى تونس
-ملاك : سبحان الله ماتقولش خوت وساكنين فى حوش واحد
-منير: كانا خوت راك وافقتى عاللى قلتهولك
-وقفت ملاك : شورى كله عندخالد يا منير والله مانقدر نتصرف فى حاجه منغير مانقوله
-منير: الارض باسمك وورثة امك وخالد شن دخله
-ملاك : انت ماتعرفش كمال وخالد شنهما بالنسبه ليا …هادو الزوز عوضى عن اليتم اللى انا فيه ..لولاهم هما ولولا حنانهم عليا ماكنتش ملاك اللى شايفها قدامك …ممكن نفسيتى كانت فالزيرو واعصابى مفلوتات
-منير: و منير مش خوك يعنى
-ملاك : لا والله حتى انت تاج راسى ..لكن انت تعرف علاقتى بخالد بالدات غير.. انت شوفه وكانا قالك باهى خلاص
-منير: باهى يا حنه ربي يعقد عسلكم ..ولا نشوفه لا يشوفنى بلاش

_____________________________

فى حوش سعيد قاعدة خاشه بعضها والنقاش زاد تعلى وقوي …

-سعيد : كيف بعتيهولى بنشوفه وانتى باعته معاه زوز ساكوات وحليبه وحوايجه وقلتيلهم ياخده مانبيشى لما لهفتى الفلوس
-فضيله مشت تجرى لسعيد بتريشه: شدوها اكحيلة ووحيد
-اكحيله : يا حاجه خيرك
-وحيد : يمى اهدى انا مصدقك فاللى تقولى فيه كله
-فضيله شدت ولدها: انا نعطيك ليه يا وليدى ..شنو قالولك امك مهبولة ولا مجنونة تسلم فى ولدها
وتلفتت لسعيد : بعدين فلوس شنو اللى تحكى عليهم
-سعيد : يا فضيلة انا مديتلك يدى توة ووريتك طريق ولدك وانتى مازالتى زى زمان واعرة ولسانك طويل
-فضيلة : وانت قاعد كيف زمان قاعد عرقبان
…لاوى صكاياتك وتراجى غير من تلدغ
-اكحيلة : ياحاج فهمونا القصه بالشوى بلا عياط خلى نفهمو
-وحيد : انت يابوى قلت لامى ولدك مات ..ولا كيف صار انا معش فهمت راهو
-فضيله : ايه هوا قالى اشهدى يا سليمه
-سليمه : يافضيلة غير خلينا نفهمو من سيدى سعيد شن صار
-فضيلة : لااااا اشهدى توة قدام ولدى لمابعتك ليه شن قالك
-سليمه: قالى اللى قالهولكم سيدى صالح هوا هداكه
-سعيد : لانه انا قالى كلام ..وانتو قاللكم كلام ثانى
-اكحيلة : احكيلنا يابوى
-سعيد : صالح الله لاتوجهله الخير جانى وقالى فصيلة تبى تطلق .. ووحيد وقتها كان عمره اسبوعين
قلتلهم نطلقها لكن نبى ولدى
-فضيلة : كداب انت وياهم ..انا لا بعتلك ولا قتلك طلقنى
-سعيد : ماهو خوتك اللى قالوه ..ووقتها قولتيهولى حتى انتى فى وجهى زى لما مشيتلك بعد مابعتيلى جلال ولد خالتك …وانا بعدها ماعرفتش كيف نوصلك
-وحيد : باهى وبعتالى
-سعيد : قالولى قالت منسلمش فولدى لين يعطونى فلوس ..سألتهم قداش تبى ..قالولى عشرة لاف …وعشرة لاف وقتها يسوو زى نص مليون توة …ووافقت وعطيتهملها وبعتتلى الولد
-فضيله وقفت تعيط : حسبيا الله فيك يا كداب ..انا بعتلك ولدى يا خامر
-وحيد يشد فيها : تربحى يمى خلينا نفهمو منه
-سعيد : بعتلها الفلوس وجابولى الولد ومعاه زوز ساكوات وحوايجه كلهم جدد
-فضيله : حوايج ولدى قاعدات عندى لتوة مالوحتهمش نشم عليهم فالصنه
-سعيد : ولما جانى خوها صالح بعد ثلاث شهور قالى فضيلة تبى تتزوج ومعش اتجى فطريقها ..قلتله سلامتها ..
وتلفت لسليمه : ولما انتى جيتينى يا سليمه ..قلتيلى بعتتنى عفاف مرسولة من فضيلة …وقالتلك فضيله حق الكلام اللى وصلنى مع خوى صالح رديت عليك وقلتلك اللى قالهولكم صالح هوا هداكه ..
-فضيله : انا ننشد على موتت ولدى حق الكلام ولا لا
-سعيد : انا بعتلك موافقتى على زواجك مع خوك صالح…لما سألتنى سليمه قلتلها اللى قالهولكم صالح حق ..وقصدى بري وتزوجى
-اكحيلة : الله اكبر.. يعنى تنشد فيك ولدى مات ولا لا …وانت تحسابها تنشد فيك تتزوج ولا لا
-سعيد : بعد عشرة سنين وصلنى خبر انهم كدبو عليك وقالولك ولدك مات …دورت عليك وبنقولك ..فقالولى انك متزوجة وبعويلتك وصغارك قلت ربي يهنيها
-فضيله : ربي بيهنينى وانت داس عليا ولدى يا ظالم …منك لله وربي ياخد فيك الحق
-وحيد قرب من امه: المهم احنا توة مع بعضنا وفهمنا الغلط اللى صاير
-فضيله اضبطت ولدها: الحمدلله يا وليدى انك بين ايديا توة ..والله يجعل الدعوة فالظالم
-سعيد : كانك تدعى على خوتك انشالله ربي ياخد فيهم الحق ..وكانك تدعى عليا انا انشالله فى راسك تلقيه وتتلقيه
-وحيد : تعالى يمى قعمزى وارتاحى ..بوي طيب وعمره مادكرك بشر
قعمزت فضيلة وهيا تبكى ..جابلها اكحيلة طاست امية …
وطلع للجنان …ولع دخان واتصل بملاك
_____________________________

ملاك طلعت من استراحة خوها منير وخاشه للحوش
ادكرت ان سيرين قالتلها تبى تشوفها
مشت لدار سيرين طقت عالباب …
-سيرين : شكون …خشى
-ملاك فتحت الباب : السلام عليكم
-سيرين : وعليكم السلام..اهلا ملوكه
وفى قلبها مغتاضه منها خيرات الله ???
-ملاك : كيف الحال سريوة انشالله بخير
-سيرين : الحمدلله فى خيار الخير
-ملاك : شنو صار معاك فالعريس ..ولا مازلتو
-سيرين ?: لا مزال نتعرفو على بعضنا عالمزبوط
-ملاك?: ربي يعقد عسلكم
-سيرين : تسلمى يا حنه
-ملاك : بكرى قلتيلى نبيك …شنو انشالله خير
-سيرين: لا والله قبل نبى نتسلف منك فلوس.. لكن لما طلعتى مستعجلة قلت براحتها وتصرفت انا
-ملاك : والله بكرى سليمه كانت مستعجله هلبا ويادوبك وصلتها
-سيرين : حق والله وينها سليمه…غريبه اليوم بروحك ..وهيا ديما معاك زى ظلك
-ملاك : عندها مشوار
وشرين تليفون ملاك …شافت لقت اكحيلة ايكلم فيها..
-تلفت لسيرين : ماتبى شى سريوة
-سيرين مغتاضه متاكدة انه هوا يكلم فيها
..وبابتسامه صفرا : لااا والله صحيتى
-ملاك : امالا نستادنك توة
وخشت لدارها فتحت التليفون ردت عليه

____________________________

-اكحيلة : اهلا حبيبتى
-ملاك : خيره صوتك حبيبتى
-اكحيلة : اتأثرت هلبا بالموضوع
-ملاك : تسخف هلبا خالتى فضيلة
-اكحيلة : خوى وحيد هوا اللى يسخف
-ملاك : ياروووحى على وخى وحيد
-اكحيلة: وحيد هدا ولدى يا ملاك .. بعد نتزوجو نبيك تعامليه معاملة الاخ الحقانية
-ملاك تتجكتر: منهما بعد بيتزوجو
-اكحيلة : ااه .. منهمااا!!؟ .. انتى قاعدة تسألى ياقرعتى
-ملاك : قرعتك عينك .. غير كمل موضوع خوك …وبعتالى شوف شن بتقرر فى موضوعنا
-اكحيلة: انا قررت خلاص
-ملاك : وشن قررت
-اكحيلة : انتى ليا ..وليا انا وبس
-ملاك : انا نحكى جديات راهو
-اكحيلة: وانا نحكى جديات
-ملاك : لازم تختار وترد عليا
-اكخيلة يضحك: باهى تحبينى
-ملاك تضحك: اما انت
-اكخيلة : جاوبى
-ملاك : طبعا
-اكحيلة : طبعا شنو
-ملاك : وااااك
-اكحيلة : جاوبي ?
-ملاك : ن ح ب ك
-اكحيلة: وانا نمووووت فيك يا عمرى..انتى ملاكى انا وبس
-ملاك : سليمه وينها ولا عجبتها القعدة غادى
-اكحيلة : قالت مدامه ملاك بتجى تعيش هنايا خلى نسبقها ونستقبلها
-ملاك : لا هيا اديرها سليمه وتقعد عندكم راهو
-سليمان : ولا متبيش تعيشى هنايا
-ملاك : باهى كانا قلتلك منبيش نعيش معاك شن بتقول
-اكحيلة: بنقول زى ما اى راحل يحب …حاضر نشريلك حوش ثانى …لكن كونه انتى ليا يعنى ليا راهو مافيهاش نقاش

______________________________

فى حوش سعيد ..

ياحنه قولى فضت المخاصمه اللى صارت فالصالة بين فضيله وسعيد …وركب وحيد امه لداره …ما اقنعها انها تركب معاه الا بجهد جهيد ..كانت تبى تطلع …
ركبوها وحيد من جهه وسليمه من جهه …
رقدها على سريره …
-وحيد : انتى اسمك سليمه
-سليمه : ايه اسمى سليمه
-وحيد : خليك بحدا امى نمشى نجيب عشى ونجى
-فضيلة قاعدة تبكى: لا ياوليدى تعالة جنبى خليك
-وحيد طالع يجرى فرحان : شويا بس يمى نجيبلك عشى ونجى انتى جايه من سفر مش قادرة حتى تقيمى راسك
وطلع وسكر الباب وراه
تلاقى هوا وبوه راكب من الدروج
-سعيد : ارقل يا وحيد ولدى مدامه امك جاتك
وحيد يضحك ونزل يجرى
طلع من باب الحوش لقى سليمان شاد التليفون
-اكحيلة : خيرك تجرى
-وحيد : بنمشى بسرعه نجيب عشى لامى ونجى
-اكحيلة يضحك: الايام ايامك يا وحيد

ووحيد يانارى مش سايعاته الدنيا من الفرحة

___________________________

سعيد كمل الدروج راكب للدور الثانى
وصل للممر قعد ينادى
-سعيد: يا سليمه .. سليمه
سليمه تسمع فيه هيا وفضيله لداخل فالدار
-فضيله : ماتطلعيلاش خليه يضبح تو يعيا ويمشى
-سليمه : نخاف منه ولا مانقدر
وسعيد مزال ينادى من برة : وينك يا سليمه
طلعتله سليمه : نعم يا سيدى سعيد
-سعيد : قوليلها هدا حوش ولدك ماكش قاعدة عند حد ..وكانها تبيه يطلعها لاى مكان ثانى تطلع ويسكنها برة بعلمه ..وبناويتها كان بيلحقوها الحوش كبير نديرولهم جناح بروحهم وباب بروحهم مفصولين عليا انا وولدى
-سليمه : باهى تو نقوللها
-سعيد : هيا تصبحو على خير
وخش داره فى نهاية الممر وسكر الباب
.
.
سليمه اتصلت بملاك بلغتها انها بتبات مع فضيلة
.
.
وبعد نص ساعه روح وحيد ..جايب معاه عشى
سليمه طلعت من الدار ونزلت للصالة خلتهم بروحهم
وفضيله تحكى لولدها فى قصه حياتها كلها
تشكى وتبكى …
وحكتله على خواته ايمان وايناس
-وحيد : قلتيلهم عليا يمى
-فضيله : قلتلهم عليك يا قلب امك
-وحيد : وليش ماجبتيهمش معاك
-فضيلة : لما سمعت بالخبر طرت …ويادوبك حصلت حجز ليا انا وهما حجزو بكرو بيلحقونى
-وحيد : وتوة وين قاعدات هما
-فضيلة : عند جارتى..هيا ليله قلت يقضوها عندها خير
-وحيد : وغدوة امتى طيارتهم
-فضيلة : يوصلو بعد العصر …
وتخمم : توة انا لازم انأجر حوش
-وحيد وجهه احمر: اتأجرى حوش ..وحوش ولدك موجود
-فضيلة : لا ياوليدى فى رجالة غرب فالبيت مانقدرش نجيب البنات هنا
-وحيد : خواتى بيجو هنايا حوش خوهم غدوة ..مابين ماتصرفت شفت شقه او وحدة من استراحات خوى سليمان
-فضيلة : الباين عليه كويس خيك
-وحيد : هدا بوى وخوى وكل دنيتى ..وكان نحكيلك على معاملته ليا هوا وامه تقعدى تبكى عام
-فضيله : احكيلى ياوليدى

وقعد وحيد يحكى لامه على عيشة ام سليمان وكيف كانت ماتفرقش بيناتهم بكل

وقعدو للفجر يحكو ..ومعاهم سليمه ..ركبت مع الساعه 1 فالليل

_____________________________

ثانى يوم وصلو ايمان وايناس خوات وحيد
مشى وحيد استقبلهم فالمطار وجابهم للحوش
سلمو على سعيد وعلى اكحيلة
وحيد يعرف فيهم ..هدا سليمان خوى وخوكم
وسليمه عاااد سبقت بالكلمه هيا الاولى توشوشلهم هدا يبي ملاك بنت خالتكم ..
??تقولك بالك وحدة منهم ترمى العين عليه
” مش قالتلها سيبيه معش فهمناها سليمه احنا ”
البنات فرحانات بخوهم وخوهم فرحان بيهم
اكحيلة مقعمز شرين تليفونه
-ملاك : الووو
-اكحيلة : اهلين بالناس الباهية
-ملاك: وينك اليوم ماكلمتنيش
وتسمع فى ضحك بنات …ركبت فيها نااار
-ملاك : انت وين
-اكحيلة : انا فالحوش
-ملاك : وشنو صوت البنات والضحك هدا
-اكحيلة مواطى صوته : هادو ايمان وايناس خوات خوى وحيد
-ملاك : اهاا ماشالله وصلو ?.. حمدالله على سلامتهم
-اكحيلة : الله يسلمك
-ملاك : وانت شن مقعمز ادير بحداهم
-اكحيلة : لا عادى مقعمز معاهم انا ووحيد خويا
-ملاك : وحيد خوهم ..وانت شن وضعك مقعمز جنبهم
-اكحيلة يضحك : اطلع يا غيور
-ملاك قريب تموت : لا غيور لا ميور …انت مش مكانك جنبهم …نوض توة اطلع
-اكحيلة يتكلم بالشوى : نقصى صوتك البنات يسمعو فيك
-ملاك : شنو شورهم قراب هلبا منك ..لدرجه يسمعو فى صوت التليفون
-اكخيلة : ملاااك شن صارلك
-ملاك بعصبيه : بتنوض تطلع توة ولا والله نسكر تايفونى وماعاد نفتحه لغدوة الصبح
-سليمان : ونهون عليك ماتسمعيش صوتى
-ملاك تعيط : سليمااااان …نوض اطلع
-اكحيلة : باهى بالشوى
وسكر الخط
شرين جرس الباب …
مشت ايناس بتفتح
“عندها عادى انسجمت مالاول فالحوش”
فتحت الباب تلاقى سلطان قدامها
-سلطان : السلام عليكم
-اكحيلة : تفضل يا سلطان
-سلطان : تعالة انت الباين عندكن ضيوف
-ايناس : تفضل مفيش حد برانى
تفاجأ سلطان بجرئتها …خش سلم …
-وحيد : هادو خواتى
-سلطان جت عينه على ايمان مد يده وسلم عليها : بالجودة بيهم
-ايمان واطت راسها وتحشمت : بيك اجود
وقعد يد سلطان فى يدها لين فالاخير انتبه لنفسه وحول يده ?

شرين تليفون سليمان ..رد
-ملاك : طلعت ولا مزال
-اكحيلة : اهو بنطلع
-ملاك تعيط : ماتهبلنيش ياسليمان اطلع توة
وسكرت الخط
وهوا يضحك فرحان وسعيد ومستمخ بغيرتها
.
.
طلع من الحوش للجنان …يبي يدير روحه واعر معاها ومش قادر لانها مش هاينه عليه
اتصل بيها …ردت
-سليمان : خيرك تعيطى قدام الناس
-ملاك عيونها دمعو وبدت تسبل فى دميعاتها: معش تقعمز بحدا حد
-سليمان : ياعبيطه هادو خوات خوى يعنى خواتى
-ملاك تدلع : انلاااا..مفيش تقعميز جنبهم باهى
-سليمان : مش هما بنات خالتك وتعرفيهم
-ملاك بعصبية: يعنى كانا بنات خالتى نخليك تقعمز جنبهم
-سليمان : هما تبى الحق …صراحة محلاهم
-ملاك : باااهى تو لما تلقى تليفونى مقفل تو تندم عليه الكلام هدا كله
-سليمان يضحك : تعالى يا مجنونه عارفتنى نحرقلك فاعصابك بس ولا ..ونطلع فى غيرتك
-ملاك? : قاعدة غير بنغير منهم
-سليمان : عينى فعينك
-ملاك : لا عينى لا ودنى والحوش معش فى مرواح ليه لين هما ينتقلو لسكنهم الجديد
-حاضر: انتى تؤمرى عليا امر ..وماعاش من يزعل حبيبتى
-ملاك : ايه صدقتك
-سليمان يضحك : هدا كله غير بتسيبينى
-ملاك : اسكت ?
-سليمان : باهى ستاحشتك ونبى نشوفك
-ملاك : برة ..معش نحبك
-سليمان : هيا عاد بلا دلع
وطلع سلطان من الحوش ….
يشبح فيه سليمان: سلطان جاى جيهتى سكرى وبعتالى نحكو
-ملاك : انراجى فيك راهو مش تنسانى
-سليمان : فى حد ينسى روحه …نحبك باىى
.
.
-سلطان غمزله : شن حالها
-اكحيلة يضحك : تمااام التمام
-سلطان : شن قصه وحيد قالى خواتى
-اكحيلة : خواته من امه
وقعد يحكيله علي القصه كلها …
-سلطان : قتلك البنت اللى سلمت عليها الثانيه مش اللى فتحت الباب..شن اسمها
-سليمان : تقريبا ايمان
-سلطان : اهاا ايمااان
______________________________

تمت …ويتبع??

نحبكم ❤