العنودية والنقيب الشرس – سارة المجيد

مساؤؤؤ بارت قصير مثل ماطلبتوا حبايب
العنودية والنقيب الشرس
المحطة الثالث والعشرين
بقلمي سارة المجيد

????????????

شاهين ..ماشي عمة يصير خير ..
طلعت وصاحت ورايه عمتي وين ابقه بات هنا كتلها ماريد مخنوك اريد اطلع اشتم هوه ..طلعت ورحت للجزيرة المتعود اروحلها من اختنك كعدت وفتحت دكم ملابسي وبقيت اشمر حجار بالمي من عصبيتي ماعرف شسوي اريد اطفي ناري المشتعلة بداخلي وبدون وعي صرخت صرخة بالفضاء هزت اركان المكان شوية ارتاحيت ..
ومر يومين وجليل مابين وشهلاء راكبة راسها متقبل اتشوفني وكل ماروح تتحجج بالنوم لو بالتعب مابقه عقل براسي گلبي شعوط اتشعوط ..كعدت من الصبح ورحتلها فاصل مو بوعيي جنت مشتاقلها اشتياق بحيث لو الزمها اكسر اعظامها بحظني ..وصلت دكيت الباب فتحلي ليث سئلتوا منو هنا كال ماكو احد بس شهلاء كتلو وين عمي وعمتي كال راحوا للسوك يتسوكون كلت حلووووووووو وليث شوية وراح لكليتو ايييي سيطرت هسه ..
البيت فارغ وان غاب القط العب يافار ?
طبيت ع كيفي اتسحبت مثل الحرامية خررب يومج شهلاء شسوت بيه صرت مسودن والله …صعدت لغرفتها ع كيفي شفتها نايمة ع الجرباية وحاطة لينا بصفها دترضع اوووويلي انجنيت ع كيفي سحبت بنتي وشلتها وحطيتها بمكانها الحمدلله ماكعدت وشهلاء اصلا من التعب والسهر منتهيه نايمه ….كعدت ع طارف السرير وبقيت املي عيني منها اووووف يابنت گلبي والله وسفه عليج اتشكين بحبيبج ولج اني شاهين الي دولبو عشكج بقيت ادحج عليها اووف شكد احبج متحملت ابقه بس ادحج اتمددت بصفها هيه فزت ومن شافتني صعد عدها الخبال فوووول ..
شهلاء ..من تعب السهر فقدت نمت وع غفلة ماحس اله واحد بصفي اتمدد انجنيت فزيت فزة اخت الموت وفتحت عيوني ع وسعهم واشوفلكم شاهين بوجهي اتخبلت مكدرت اصرخ لايكعدون الجهال حطيت ايدي ع حلكي وكوه لزمت صرختي كتلو شجابك هنا منو سمحلك تدخل ياخاين امشي اطلع بره لا الم عليك أمة لا اله الا الله
شاهين ..اششششش وجع لتخبصين بالحجي مكدرت ابقه ماحجي وياج شهلاء لازم تعرفين اني بريء ليش بهل سهولة تشكين بيه ولج اني شاهين
شهلاء ..انت الي خليت نفسك بهل موقف والا شنو تفسير هل صورة دتنصحها تستقيم وتصلي مثلا ..
شاهين ..لا .. لا انصحها ولا شي وهم ماكدر ادافع عن نفسي ..بس وعدتج وعد اجيبو للنذل جدامج واخلي يحجي الحقيقه الي شافها مو الي بالصورة ..
شهلاء ..مايهمني شي بعد انت نزلت من نظري للاسف وبعد ماعندي ثقة بيك شما سويت ماصدكك ..وارجوك ابتعد عني وروح احظن سما حبيبتك القديمة الي كلك لهفة وشوگ لحظنها ..
شاهين ..وجع لهل لسان شنو هل حجي شبيج اتخبلتي تدرين كوولش زين ماعندي حبيبة ولا راح يكون الي حبيبة غيرج

شهلاء ..هه حجي شكد سهل ..يله رجاءا تعبانه اريد انام وماريدك بعد تجي لبيتنه لا والله احرك روحي زين ..

شاهين ..مو بكيفج افتهمتي ..جنت ادحج عليها وبعد شوية تبجي ماكدر ابقه ساكت هجمت عليها وكامت اترافس جوايه لفيت ايدها فوك راسها وحبستها وثبتت رجلها جوه رجلي كتلها انتي من حق شاهين ولو تموتين ماتكدرين تبتعدين عنو

شهلاء ..وخر شاهين جسمك ثكيل وعمليتي بعدها خضرة ..ابتعد عني اني ماريدك افتهمت اني مااااااريدك بعد
شاهين ..مو بكيفج لو تموتين متكدرين تعوفيني لان امشي بدمج ولتكابرين وتعاندين مثل عوايدج لان راح تتعبين وتاذين نفسج

شهلاء ..خلي اتعب ولا احترك انت خذلتني للاسف وماعاد بينه عيشة ولازم كلمن يروح لحال سبيلو اعتقني وطلكني

شاهين ..اشششش كتلج مو بكيفج تبقين ملك شاهين للموت وماتكونين لغيرو

شهلاء ..جنت احس بقبضة عضلاتو وقوة جسمو وصوت انفاسو الحار ياربي ماريد اخضعلو ولا ارضخلو ظليت اقاومو لاكن كل محاولاتي باءت بالفشل جسمو اقوة وجان محكم قبضة ايدو مكدرت افلت منو

شاهين ..لتحاولين تنهزمين كعوايدج

شهلاء ..ماكدر اصارخ بس اختنكت صرخت وكتلو شاهين اتوخر لا والله اكلب الدنيا عليك انت ليش ماعندك كرامة داكولك ماريدك كمت اكرهك طلكني ياخي طلكني واذا ماطلكتني راح ارفع عليك قضية بالمحكمة واوكل ابن عمنه جليل يطلكني منك وتعرفو جليل يتمنه هل شي مو ..

شاهين ..صدمتني بأخر حجاية منها مثل صاعقة وضربتني ع راسي اتخبلت بدون وعي مني شلت ايدي وضربتها راشدي فريت وجها فر كتلها تاكلين تبن اذا جبتي طاري جليل ع لسانج اخاف شفتيني احبج ودائما اضعف جدامج بسبب گلبي ..بس من توصل تندكين بغيرتي لاوالله قسما بالله لا ادفنج بمكانج ولايرفلي جفن ..كمت مسحت وجهي من العرك كتلها اسمعي ولج هل مرة راح اعديها الج مرة ثانية اذا كلتي هل حجي احسبي الله ماخلقج

شهلاء .. من ضربني راشدي حسيت دماغي انخض انصدمت اتخبلت يمد ايدو عليه كمت اصرخ وابجي والطم ع وجهي كتلو اهااا شفت شلون ردت اتموت واني ماواكفه ويا ولا حاطه ايدي بأيدو مثل ماسويت حظرتك ويه حبيبة الگلب

شاهين ..شفتها اتهسترت كامت تلطم بس كلامها دمرني كتلها ..ولج انتي ليش اتعصبيني بالغصب شنو تخلين راسج براسي ول يابه ترا انتي مو زلمة انتي مراة والمراة الي تحجي هيج جدام زلمتها تنذبح افتهمني .. مو ترا ائذيج يولو لتخليني اتعامل وياج مثل الباقين واخليج اتشوفين وجه شاهين الشرس تره تنعلين الساعة السودة الي اتزوجتيني بيها ..

شهلاء ..من صياحنه وعياطنه كعدوا الجهال اثنينهم …كتلو هه والله ماعاد اهتم يا وجه اشوف لان كل وجوهك ضهرت
جدامي ..وطلعت انسان خاين وناكر العشرة

شاهين ..الله لايبارك بيج خبالج كعد الجهال كومي سكتيهم ..
شهلاء ..كمت اصارخ بوجهو كتلو ماريدهم امشي اخذ جهالك واطلع بره لان اثنينهم يذكروني بيك وبخياتنك

شاهين ..اها هسه متريديهم مو ردتي اتموتين من 4 اشهر ماحبلتي ومتي من 3 سنوات ماحبلتي وهسه من الله نطاج وكرمج كمتي تتبطرين خاتونه …

شهلاء ..شاهين كتلك اطلع بره ترا والقران احرك روحي واريد ورقة طلاكي توصلي باجر
شاهين ..تخسين انتي وجليل تحلمين اطلكج حتى تصيرين لكمة سهله الو … هسه راح اطلع مو لان متريدني لا ..اني وعدتج اجيبلج هل نذل الي سوه هل سواية وذاك الوكت من اجيبو ويعترفلج وجدامج ديري بالج تفتحين حلكج بعد
كمت ع حيلي وفتحت الباب وعفتها وطلعت
شهلاء .. من طلع شلت القوطية مال الحليب وركعتها بالباب اطشرت كلها وطكيت بجي كمت اون واشهك ولك ااااخ شسويت بيه من خرررب صفحة گلبي العشكك من يوم ماشفتك شفت الضيم والقهر مارتاحيت بحياتي ?

شاهين …اول ما نزلت شفت عمي وعمتي جايين ديطبون بالكراج اتفاجئوا بيه
ابراهيم ..ها بوية شوكت جيت
شاهين ..قبل نص ساعة اشتاقيت للجهال اجيت اشوفهم
ابراهيم ..ولك ملعون اشتاقيت للجهال لو لام الجهال هههههه
شاهين ..احم اي عادي لامهم هم يله اترخص راح اروح
زهور ..وين يمه ابقه اتغدة ويانه .
شاهين ..لاعمة تسلميلي ماريد عندي شغل ولازم اروح ..
طلعت ورحت اخذت ستار كتلو يله امشي نروح ننتظر جليل ابيت اهلو لو اعرف ابات يمهم اليوم اجيبو اجيبو لهل نذل ….

ستار ..ماشي خيي يله امشينه …
شاهين ..رحنه لبيت عمي طبينه كعدنه كتلهم ما اجه جليل ..
شيخ حازم ..هسه خابرني ع وصول ..
شاهين …ماشي منتظري …شوية وجان يجي جليل مكدرت اصبر اعرف روحي كمت ولزمتو من ياختو وسحلتو ودفعتو ع الحايط وخليت ايدي ع ركبتو وبقيت اضغط لحد ما اختنك وكام يكح …كتلو طلع تلفونك

ام جليل ..ياااا يااا شبيك شاهين اتسودنت ليش لازم ابني هيج

شيخ حازم ..انصدمت من شاهين والي سواه بجليل صرخت وكتلو شاهين شدسوي شبيك مخبل

شاهين ..عمي رجاءا لاتتدخلون عندي حساب ويه ابنك خليني اصفي لان دكاتو بيه كثرن ومايتسولفن شافني اسكتلو اتماده وكام يسوي شغلات ماتسولف ..

جليل ..ردت افلت من قبضة ايدو الحقير ماكدرتلو عبالك حايط واكع عليه كتلو وخر شدسوي شبيك
شاهين ..لزمت الغترة وشمرتها من راسو ولزمت شعرو بقوة بحيث رادت فروة راسو تطلع بأيدي
جليل ..اااااااخ وخر الله ينتقم منك شعري ياحقير
شاهين ..ضربت راسو حيل بالحايط كتلو بعدك مشايف شي وداعتك ..طلع تلفونك يله
جليل ..شتريد من تلفوني
شاهين .. بيانك ماتريد اتجيبها لبر ..شو .مديت ايدي بجيبو وطلعت تلفونو كتلو افتحو
جليل ..اوويلي الله هذا عرف بيه وره هل سالفه والله لايدفني اليوم ..كتلو مافتح شتريد تسوي بتلفوني
شاهين ..ماسوي شي بس افتحو يله
جليل ..اخذتو وفتحتو الو كتلو هاك شتريد اتسوي بي يعني
شاهين ..اخذتو وفتحتو وطبيت ع برنامج الفيس والرسائل كلبت بيهن كلهن ماكو بس حسابو الي معروف عدنه جليل حازم رحت كلبت بكل التلفون حتى بالاستديو طبيت مالكيت اي صورة لعد منو داز الصورة لتخبلوني ..كتلو احجي جليل ماسحهن مو صح
جليل ..انت ع شنو دتحجي تره خبلتنه وخر

ابو جليل ..شاهين كافي تره اتحملناك زايد وكمت تطغه وماعاد تحشم لا جبير ولاصغير لاتخليني اطردك من البيت واحرم عليك دخلتو
شاهين ..عمي اني بيتي انهجم والي هجمة ابنك وماصدك غيرو لان بس هوه الو مصلحة بهل شي ..
جليل ..مامسوي شي اني بوية شاهين جذاب وجدامك اخذ تلفوني ومادري شيريد منو وهم مالكه الي رادو ..
شاهين ..اكيد ماسح الصور والفيس انت مو غبي حتى اتخلي دليل ادانتك بتلفونك ..وجان بهل لحظة

وللحكاية بقية ..
طبعا تقديرا لتفاعلكم نزلت البارت القصير حتى ليظل بكلبكم منا لباجر ..استمروا ?

#يتبع …

#سارة_المجيد?