العنودية والنقيب الشرس – سارة المجيد

مساءكم عسل صافي احبتي
وهذا البارت الاضافي تدللون عليه
??????????

#العنودية_والنقيب_الشرس
#المحطة_الثانية_والعشرين
#بقلمي_سارة_المجيد

شهلاء ..الصور جان شاهين واكف وسما واكفه مقابيلو ولازمه ايدو وديسولفون امبينه ….

خلونه نرجع بالاحداث شوية

شاهين ..من وديت شهلاء يم اهلها حتى اتداريها امها بنفاسها اني رحت لبيتي اخذت كم هدمة وغرض كلت اروح لاهلي شعندي باقي بالبيت وحدي ضوجه ..
والله وصلت لاهلي وجان اشوف سما واكفه بالباب وابنها ديلعب بره بالبايسكل نزلت دانزل غراضي وجان اشوفها واكفه بظهري جفلت لايالله كتلها شبيج اتخبلتي منا العالم وخري ..
سما ..ماوخر واذا انت وخرت هسه اصيح والم العالم عليك واكول يتحرش بيه
شاهين ..اصخام الصخمج ولج انتي شنو لزكة متستحين شنو هل جرائة العندج
امشي طبي جوه لبيتكم يله بلا هل سخافه مالتج
سما ..شاهين اني احبك بداعتي خلينه نرجع لبعض قابله حتى لو انت متزوج واني متزوجه عادي نعيش حبنه ..اني زوجي دومه مسافر وشامرني يم اهلي ومحاس بيه وصدك يوم عن يوم داشتعل بنار وكل ماشوفك اتخبل مدري شيصير بيه ولك حس بيه يبن الناس اني احبك
شاهين ..ولج بابه الي دتسوي حرام لاشرع ولادين يقبل عليه زوجج شنو ذنبو تخوني ..واني مامستعد اخون حبيبتي وزوجتي وهسه انوب ام جهالي صارت ..اعذريني روحي لغير شخص نفسيتو ضعيفه مثلج يكدر يخون ..اما اني . اعذريني ماكدر لان احب مرتي وجهالي
سما ..ليش شوكت صار عندج جهال ..الادري بي مرتك شهلاء ماتخلف
شاهين ..اكلي تبن شهلاء مابيها شي بس الرزق من الله والحمدلله رزقنا بتؤم اطفال ..ومامستعد اضيعهم علمود نزوه حقيرة وياج ..
سما ..جان حاط ايدو ع بنيد السيارة واني حطيت ايدي فوك ايدو كتلو حبيبي اترجاك ارجع لحظني والله ماكول لاحد خلي علاقتنه بالسر ونعيش حبنه بحظن بعض ..

في مكان اخر ..
جليل ..يمه اني رايح لبيت عمي جاسم عندي شغلة ويه ستار تخص المكتب
ام جليل ..روح يمه الله وياك
جليل ..صعدت بسيارتي ورحت لبيت عمي اول ماوصلت شفت منظر والشيطان هنا كام يلعب بعقلي اوووويلي جاك الموت ياترك الصلاة ..شفت شاهين واكف يم بنت جوارينهم وديسولفون وذيج حاطه ايدها فوك ايد شاهين ومندمجين بالسوالف بس امبين ذيج ذابه نفسها عليه لان شاهين دينافخ وميريد يوكف وياها ..عسريع طلعت موبايلي وفتحت الكاميرة وسويت زوم قربت اللقطة وطكيت صورتين وحفظتهن ..كلت اله ادزها لشهلاء خانم وخلي اتشوف الي باعتني علمودو شديسوي من وره ظهرها ? شفت شاهين نفض ايدو من ايدها ودفعها وطب جوه امممممم شكد وفي هل شاهين يله المهم اخذت اللقطة المهمة ??
بس شلون رقمها مو عندي ? اممممممم اخذ حسابها مال فيس مو مشكلة اكيد صديقة ستار بالفيس شفتهم طبوا اني هم مشيت يم البيت طبكت سيارتي ونزلت ..
شاهين ..نفضت ايدها من ايدي وكتلها ابتعدي عن حياتي كتلج اني مو مال علاقات اني بگلبي وحدة وبس ..وما اثنيها لو مو انتي لو حورية تنزل من الجنة مابدلها بشهلاء ..يله استري ع نفسج وطبي لبيتكم ..عفتها وطبيت لبيت اهلي مادري هل مراة شبيها لاطشه يعني زوجها خطية يتعب علمودها ويشكه وحظرتها تخون بي الله اكبر متشوفون الله شديسوي بينه ..الحمدلله والشكر الي نطاني مريتي طاهرة وشريفه وعفيفه فديتها لام اسد ?
كعدت شوية دزيتلها ع رسائل الفيس ها يگلبي شدسوين مشتاقلج مووت
شفتها مامتصله بالنت ياروحي خطية تعبانه يمكن من وره الجهال ..سديت التلفون وبهل لحظه طب جليل عكدت حاجبي دحجت علي من فوك ليجوه ..سلم علينه ردينه السلام ..
جليل ..دحجت ع شاهين ورفعت تك حاجبي وكلت بگلبي اوووف شاهين شوف شراح اسوي بيك ..كتلهم عجل وين ستار
ام شاهين ..فوك بغرفتو يمكن ..كوم امجد يمه صيحلو كلو ابن عمك جليل يريدك جوه
امجد ..ماشي يمه ..
جليل ..نزل ستار كتلو اريدك بشغلة تخص المكتب امشي نطلع بره شوية
ستار ..ماشي تعال نكعد بالحديقه ..
جليل ..ردت احصل تلفونو بس شلون ..رحت بالحديقه كعدنه بالمرجوحة شفتو كعد وجان يحط تلفونو ع الطاولة الجدامنه اييييي هسه لازم اكومو امممم اكول ستار رحمة لاهلك جيبلي كلاص مي عطشان
ستار ..اي خيي صار هسه .. رحت جوه للمطبخ ترست كلاص مي جان اتصيحلي شيماء تعال اخذ محمد اشتريلو خبلني بس يبجي ..كتلها نزلي يله
شيماء ..هسه بس ابدلو ملابسو انتظر دقيقه ..
ستار ..ماشي يله واكف يم الدرج
جليل ..عسريع اخذت تلفون ستار وفتحتو طبيت ع رسائل الفيس كلت اكيد حاجي ويه شهلاء بقيت ادور وبالاخير لكيت محادثه بينو وبين شهلاء دحجت مو هوه حاجي وياها شيماء اختها حاجية وياها من فيسو ديسولفن المهم ماقريت الحجي بس ردت اعرف حساب شهلاء شنو اسمها والله اخذتو وطلعتو بالسيرج يمي وعفتو كلت من ارجع للبيت ارتب الشغلة ..سمعت ستار اجه ويه ابنو راسا طلعت من الفيس وقفلت التلفون ورجعتو ع الطاولة ستار ..بس اشتري لحمودي وارجعلك ..
جليل ..تعال خيي ..خابرني صديقي راح اروح غير مرة اجيك مالحك اكعد
ستار ..اهااا ماشي خييي براحتك
جليل ..عسريع شخطت سيارتي ورحت للمكتب طبيت وقفلت الباب كعدت سويت حساب فيس جديد سميتو رجل له مهابة ودزيت الصور لشهلاء وماكتبت شي لان بس اكتب يعرفوني ..دست ارسال وانرسلت بس للاسف مجانت متصلة بالنت كلت ميخالف مصيرها تفتح النت واتشوف المفاجئة ??
وره اسبوع دخلت ع الرسالة شفتها واصله وشايفتها يالله كتلني الفضول اريد اشوفها شسوت ااااااخ الله اريد ابرد نار گلبي الي حركتو حرك …
شهلاء ..جنت اشهك من البجي اجتي شيماء يمنه هيه وابنها وشاهين وياهم ماردت يشوفون حالتي طبيت للحمام وغسلت وجهي واتنفست بقوة حتى اهدأ وطلعت صار شاهين بوجهي حسيت روحي شاغت صارت خيانتو جدام عيني وهوه حاط ايدو بيد سما وديسولفون ..
شفتو شيطان كدامي بمدي الزمو واكطعو بسنوني ..كوه صبرت نفسي لا انفعل وابتلي بي .. هوه حضني ..متجاوبت ويا دفعتو عني لان حسيت بنفور منه شي مقزز ااااااخ ولكم گلبي مشتعل بنار شلون اطفي ?

شاهين ..شبيج شهلاء ليش دفعتيني صاير شي
شهلاء ..دحجت علي بگلبي كلت يابجاحتك ياخي يقتل القتيل ويمشي بجنازتو ..كتلو احم لا ماكو شي تعال نكعد يم الجماعة عيب جاعدين بالصالة ..
شاهين ..استغربت منها مو شهلاء هاي اكيد صاير شي لو سامعه شي ..كتلها ماشي يله حبيبي ..الجهال وين
شهلاء ..تعبوني والله هسه ناموا
شاهين ..اريد اشوفهم
شهلاء ..لا عفيه لتكعدهم والله متت ياله ناموا عوفهم فدشوية يكعدون وشوفهم
شاهين ..ماشي حبيبي ..لزمت ايدها وجان تنفضها مني ?
لا هاي مو صاحية اليوم اكيد صاير شي ..
شهلاء ..رحنه للصالة كعدت بصف شيماء شافتني مو ع بعضي
شيماء ..شبيج شهلاء شو احسج مقهورة وكاتمة قهرج بگلبج
شهلاء ..احم لا حبيبتي ماكو شي بس يمكن من التعب لان مدانام باليل والجهال مديعوفني النهار كله يبجون ميسكتون
شيماء ..اووي حبيبتي الله يكون بعونج والله حقج اني بس حمودي بذاك الوكت وشصار بحالي كيف انتي 2 خطية ربي يعينج ويحفظهم الج ويكبرون بسرعة حتى ترتاحين
شهلاء ..اشكرج حبيبتي ويحفظلج حمودي وعبودي يارب ..وينه حمودي شو ماهوه
شيماء ..ههههه متعرفين بابا اول ما اجي كبل ياخذو ويطلعو ويشتريلو
شهلاء ..هههههه اي عفيه صدك
شاهين ..جنت ادحج ع شهلاء اريد اعرف شبيها اليوم طكت روحي ..
شهلاء ..اووووف يمكن كعدوا صوت بجيهم اروح اجيبهم ..
كمت ورحت لغرفتي شفت اسد كاعد وديبجي ولك اسكت راح اتكعد اختك خررب عشيرتك
دنكت اشيلو وماحس اله واحد حضني بقوة وشالني انهبطت درت وجهي واذا شاهين مثل المسودن يحضن بيه ..
شاهين ..من كامت شهلاء راحت ع الجهال كمزت رحت وراها ردت اعرف شبيها ليش لابستني اليوم وتنفر مني ..طبيت وشفتها مدنكه تريد اتشيل اسد كبل بدون تفاهم حظنتها ..هيه كامت اتدفع بيه
شهلاء ..وخر شاهين تعبانه مالي خلكك

شاهين ..والتعب شعليه بحضني بلعكس اريد اريحج من التعب اريد امتص شكو تعب بجسمج .. جنت مشتاقلها بكد رحمة الله حضنتها بقوة حسيت عظمها كامت اتطكطك جوه ايدي

شهلاء ..ردت اموت واني بين حضنو شكد جنت مشتاقتلو وگلبي يريدو بس عقلي رافضو رفض قاطع ..يذكرني بالصورة اله شوية واتجاوب ويا بس نفضت نفسي منو كتلو وخر ابنك ديبجي جوعان
شاهين ..ماعوفج لو تنطبك السما ع الارض

شهلاء ..اووويلي ياربي ماتحمل اسكت دفعتو مني وكتلو وخر ابتعد عني واياني وياك تلمسني بعد وانسه شي اسمه شهلاء بعد افتهمت ..
شاهين ..طكيت ضحك كتلها اكييد مقلب هذا مو اي اي احجي كولي مسويه بيك الكاميرة الخفية ..بس بايخه ولج لتعيديها تعرفيني ماحب هل سوالف ردت احضنها ومرة ثانية دفعتي وصرخت بوجهي كلتلي شاهين طلكني
اني هنا جمدت بمكاني عقلي طار حسيتو ..كلت هاي اتخبلت والقران ردت اضربها كتلها هل حجاية مو مال شقة شهلاء ديري بالج اتعيديها جدامي لاوالله اشك حلكج وحلك الخلفج افتهمتي ..
شهلاء ..ومنو كلك اني داشاقه وياك اصلا ها ..اني داحجي صدك وماعاد بينه عيشة لان السويتو بحقي شي مايغتفر وعشم ابليس بالجنة ارجعلك افتهمت
شاهين ..سويتو ؟؟ اوكفي دقيقه مدافتهم عن شنو دتحجين انتي ..شسويت اني فهميني ..
شهلاء ..مراح اكولك شسويت .. راح اراويك اشسويت لان گلبي طك منك ومن مصايبك لاعبالك غشيمة ومدمغه ونايمة ع اذاني تراني كوولشي عرفت
شاهين ..هوه شكو شعرفتي شبيج
شهلاء ..شلت اسد لان طك بجي ورحت جبت التلفون مالتي وفتحت الفيس وكتلو اتفضل يالوفي يالصايني وصاين حبي …
شوف نفسك ..صورك صارت ع النت تتوزع
شاهين ..اخذت تلفون شهلاء وفتحت الرسائل وهنا جانت الصدمة والطامة الكبرى ..انصدعت اول ماشفت الصورة لايالله هاي شنو اصخام هل موقف صحيح صاير بس مو مثل الي فاهمتو .. شهلاء هاي منو دازه الج احجي
شهلاء ..كعدت ارضع اسد والغصة بصدري والدموع اربع اربع ..كتلو هذا الهامك ها منو دزها ماهامك النار الي اشتعلت بداخلي ..الحساب جديد يا افندي اكيد من اعدائك الي مسوي بيهم دكايك وشافوك كيفوا واخذولك صورة ودزوهن الي ..حتى يحركون گلبك وگلبي ..
شاهين ..صفنت منو اله مصلحة بكل هذا ..كعدت بسدها وخليت التلفون بيدي ودخلت ع الحساب مسوي من قبل اسبوع بقيت افكر منو جان بهل يوم الي رحت لبيت اهلي بي ؟ وبعدين اتذكرت لايالله هسه عرفت هذا جليل
كتلها عيني هذا المتيم ابن عمج ماكو غيرو ..
شهلاء ..اني مايهمني جليل لو غيرو اليهمني انت شجنت اتسوي واكف وياها وشجنتوا تحجون وليش كامش ايدها تره هسه احرك روحي وابليك احجي
شاهين .. ووجع لتصيحين فززتي للولد اشبيج .. هلا انوب ذيج كعدت من خررب عشيرتج زين .. كمت رحت شلت لينا وسكتتها ردت اشوف هذا شلون اخذلنه صورة وشلون عرف حساب شهلاء ع الفيس ااااخ الله اله ازوعو العافية خلي يصطبرلي
رحت يم شهلاء كعدت وبيدي لينا اسكت بيها ..كتلها حبيبي لتتعصبين وماريد هاي الدمعه تنزل من عينج وداعتج وداعة اسد ولينا اذا ماجبتو للي سوا هل فعلة يركع تحت جدامج ماتسمى شاهين واخلي يحجي الحقيقه هم ..لان الصورة مو مثل الي امبينه باللقطة والله العظيم هيه الي ذابه نفسها عليه واني جنت ابعدها عني ولو تلاحظين هيه حاطه ايدها ع ايدي بالصورة مو اني ..
شهلاء ..ميهمني امشي روح لحبيبة الگلب سما اشبع بيها اني مالك شغل بيه ولتجي اتشوفنه بعد لا اني ولا جهالك ..
شاهين ..يعني اهون عليج تحرميني منج ومن جاهلي ??
شهلاء ..عادي مثل ماهنت عليك اني وجهالي ..رجاءا ابتعد عنه ولتحط رجلك بهل بيت لان وجودك ماعاد مرحب بي ..
شاهين ..كمت وحطيت لينا بكاروكها وكتلها وداعتج اله اجيبلج الي سوه هل دكه واخلي يعترف جدامج اني بريء ..
شهلاء ..اي خووش يله عن اذنك اريد اغير ملابسي انترست حليب
شاهين ..ماتغيرهن شنو تستحين مني
شهلاء ..لا مو استحي بس ماريد انزع جدامك لو سمحت اطلع بره
شاهين ..اوووف اني الك جليل اله اخلي فاتحتك اليوم جدام باب اهلك …شاطت روحي طلعت وركعت الباب وراية ورحت طاير لبيت اهلي ..وصلت صحت ستار ..
ستار ..خير خيي شبيك صركعتني ع كيفك شكو اتصارخ
شاهين … لزمتو من قميصو وسحلتو كتلو تعال احجيلي
ستار ..شحجي ؟!
شاهين ..تتذكر من اجه جليل ذاك اليوم ورادك بشغلة اتخص المكتب
ستار ..? اي اي تذكرت شبي
شاهين ..من كعدتوا بالحديقة شصار بالضبط ..
ستار ..امممممم كعدنه عادي هوه راد كلاص ماي كال عطشان كمت اجيبلو عاد شيماء صاحتلي اشتري لحمودي واخذتو ردت اطلع كتلو بس اشتري لحمودي وارجعلك ..عاد هوه كال لا ماكدر انتظر صديقي يريدني بشغلة رايحلو وراح ..هذا الي صار
شاهين ..ماخذ تلفونك
ستار ..لا ماخذو وليش ياخذو ..
شاهين ..حتى يعرف حساب شهلاء لان اكيد عرف شهلاء صديقتك بالفيس ..زين تلفونك وين جان من رحت اتجيب سم الو ..
ستار ..?? امممممم خلي اتذكر دقيقه جان بأيدي وها حطيتو ع الطاولة بالحديقه من كعدنه وراها راد ماي عاد كمت اجيبلو وعفت التلفون ع الطاولة ماخذتو ويايه مانتبهت اخذو او لا ماشفت للامانة يعني
شاهين ..هاي هيه ماكو غيرو هوه الي وره هل المصيبة الي حطها ع راسي
ستار ..خير خيي مصيبة ايش الي تحجي عنها
شاهين .. ابن عمك النذل داز صورة الي واكف ويه سما لشهلاء وهذيج عفتها اتدك وتلطم ومتخبلة علي حتى طردتني من بيتهم
ستار ..لاوالله صدك تحجي
شاهين ..والله والعظيم ..بس قسما بذات الله اذا هوه طلع صدك وره هل سالفة اله اسوي بي سواية الله ..سهلة امشي كوم ويايه تانروح لبيت عمي حازم
ستار ..صار يله امشينه ..
شاهين ..صعدنه بسيارتي وطلعت ورحنه لبيت عمي حازم وصلنه طبكت السيارة
ونزلت دكينه الباب فتحت ام جليل رحبت بينه وطبينه كتلها وين جليل كالت راح للموصل بشغلة ليش خما اكو شي ..
شاهين ..اووويلي فار دمي يعني مراح الكفو اليوم ..كتلها شوكت يرجع ..
ام شاهين ..عكب باجر ان شاءالله
شيخ حازم ..ها يشاهين خير شنو هل عاصفة الي جايينه بيها شكو ياستار
شاهين ..سلامتك عمي ماكو شي بس ردت جليل بشغلة
شيخ حازم ..خير ان شاءالله ..جليل مسافر للموصل اكعدوا ..كومي ام جليل جيبي جايات للزلم
ام جليل ..صار دقايق ويجهز
شاهين ..بقيت جاعد واحس روحي جوايه بركان يريد يتفجر جنت جاعد ع اعصابي كتلو كوم ستار طكت روحي
شيخ حازم ..ها وين جاعدين ابقوا شربوا جاياتكم
شاهين ..غير وكت عمي اودعناكم …طلعنه اني وستار ورجعت للبيت بقيت افرفح اريد الزم جليل والكعبة لا اجنزو الكلب الجبان اني الو ..
ستار ..اهدأ بعد اخوك لاتتهور انت روح لشهلاء واحجي وياها ممعقولة اتصدك الي شافتو
شاهين ..ولك ستار الصورة مصيبة مبينه اني عندي شي ويه سما ..بس هوه الكلب اكيد شافني من جنت اصيح علييها واطردها من جدام البيت وحتى من نفضت ايدي من ايدها هم شافني بس هذا صور مقطع حقير مثلو واخذها مستند ضدي ..
ستار ..ميخالف اهدأ خل يجي ويصير خير وداعتك لانزوعو العافية
شاهين ..طبيت للبيت صعدت لغرفتي حسيت دمي احترك وجسمي صخن ..حقها شهلاء هيج اتفكر بيه اووووف الله …طلعت تلفوني وفتحت الفيس دزيتلها رسالة شفتها مامتصله بالنت ..شسوي هسه بروحي ..بقيت اتكلب بفراشي ماكدرت اهجع ..ضجت كمت رحت للعيادة مالتي طبيت للمختبر ايدي متاخذ ع الشغل شافوني الدكاترة الي يشتغلون يمي بالمختبر عرفوا بيه شي سئلني دكتور زياد شبيك كتلو مابيه شي بس شوية تعبان ..راح اروح للبيت انت عود اقفل المختبر والصبح فتحو من وكت
زياد …صار دكتور ماشي ..
شاهين ..رحت للبيت طبيت اوووف عطر شهلاء بكل مكان روحي شاغت اوووويلي شكد مشتاق لحظنها راح اموت يالله كعدت دكيت عليها جان اتسدو بوجهي وغلقتو شسوي هسه بله شلون راح اتسامحني وتعرف هل مصيبة ملفقة من هل كلب جليل ….والله اموت اذا عافتني …فتحت التلفون وكمت اتفرج ع صورنه اني وياها الله شلون جنه فرحانين بذيج الايام وشلون جانت بحظني ومكيفه صور چثيرة طاكين حظنت التلفون واتنهدت بحسرة مكدرت اتحمل حسيت روحي لايبه …كمت من فراشي وطلعت من البيت لان احسو دياكلني موحش بلا شهلاء ….

في مكان اخر ..

شهلاء ..نيمت اسد ولينا بفراشهم واتمددت شوية حتى ارتاح هناك وجان اتشيط روحي طكيت بجي وكمت اشهك ..هاي تالية حبك يشاهين هيج اتجازيني بعد حب شكبره هيج تنهي بخيانة ويه وحدة سا***ة يعني اتبدلني بسما ولك ليش شنو الذنب الجنيتو وياك وهيج اتجازيني اااااخ حركت گلبي الله يحرك گلبك شكد صبرت وياك وشكد اتحملت قهر وعذاب وبالاخير اتخوني ولك ماحرمتك من شي حتى جهال مثل الورد جبتلك شتريد بعد اسويلك …بس انتوا جنس اولاد آدم كلكم هيج ولايثمر بيكم التعب ولايغزر بعينكم اشما نسويلكم دومكم الخيانة بدمكم …
بس قسما بالله ياشاهين لا اروايك وجه شهلاء الثاني وشوف شراح اسوي بيك مو اني الي انطعن بظهري سهله ..

زهور ..يمه شهلاء تعالي شاهين بره يريدج
شهلاء ..انصدمت شجابه بهل ليل شبي مخبل كتلها كوليلو نايمة
زهور ..يا شبيج يمه الزلمة جوه يريدج انزلي يله ..
شهلاء ..صيحت كتلها يمه ماريد انزل كوليلو مخمودة ماتت انتحرت تره والله احرك روحي
زهور ..يا اصخام اتسودنت البنت
شاهين ..مكدرت ابقه للصبح كلت لازم اشوف شهلاء لازم احجي وياها ..رحت لبيتهم وطبيت جوه راح اتصيحها عمتي …
زهور ..اكول يمه شسمه شهلاء نايمة تعبانه خطية الليل كلو تسهر ع الجهال ..انت بات هنا اليوم ….هسه افرشلك وباجر من تكعد عود احجي وياها
شاهين ..عمة احجيلي شهلاء ماقبلت اتشوفني مو
زهور ..والله يايمة مادري شنو الي صاير بينكم بس امبينه بنتي تعبانه ونامت ..
شاهين ..ماشي عمة يصير خير ..

وللحكاية بقية ..

روحي اليوم رادت مني ملكك
وشلون أوصلك وبيا وسيله
أريد أحضن أعيونك وأبقى وياك
ولو أدفع حياتي هم قليلة
معزتك بالنفس وألنفس تهواك
وعود أنساك هاي المستحيلة
أنت شكد بعيد وتنسى مرات
صدك مانسيتك ولا ليلة

#يتبع …..

#سارة_المجيد?