العنودية والنقيب الشرس – سارة المجيد

اسعد الله مساء متابعيني بكل خير ❤

#العنودية_والنقيب_الشرس

#المحطة_الثالثة_عشر

#بقلمي_سارة_المجيد

نزلت بأم قصر .. معتقل بوكا .. وتعرفون هل معتقل الي يطب بي بعد محد يطلع منو اله بمعجزة ..

جاسم ..وينك ستار هذا اخوك صارلو اسبوع لاحس ولاخبر بقه ابغداد وعاند ماقبل يجي علمود بيتو خاف عليه لايتفرهد ..وهسه الخطوط كلها مكطوعة بين المحافظات ..

ستار ..متعرفو ميخاف ولايوكف كدامو احد ولاياخذ بكلام احد ..يعني اذا صار عليه شي بهل مصيبة الي وكعت ع البلد شراح يفيدو البيت لو الغراض متكولي ..

جاسم .. والله گلبي مثل النار علي دبرني شنسوي
ستار ..بوية مابيدنه شي نسوي بغداد صايرة خط احمر منكدر نروح هناك والله راسا ننقتل
ايكولك صايرة مذبحة وناس تقتل ناس ورمي الرصاص بالشوارع ..

جاسم ..ادري والله ..ربي يستر ع ابني مادري شسوي ..امشي نروح لبيت عمك ابراهيم خلي نشوف شنسوي ..
ستار ..يله حطلع اشغل السيارة حظر نفسك..

شهلاء ..مر اسبوع ع غيبة شاهين واني گلبي مثل النار علي ظليت لايبه روحي مادري وين ادير وجهي والمن اسئل البلد اتدمر وبغداد محتركه حرك الخطوط اتكطعت جنت اتصل بي ع البيت الي ببغداد ونسولف بس من صارت الكارثة واحتلوا البلد انكطع الاتصال وبعد مكدرت اتصل بي ..
بهل لحظة اندك الباب كلبي كمز كلت بلكت الله شاهين اجه ركضت فتحت الباب جانوا عمي جاسم وستار دخلوا للهول رحت صحت بابا اجه وكاموا يحجون بموضوع شاهين ..
ابراهيم ..والله ياخيي هذا ابنك ولايسمع كلام اني من قبل الاحتلال لملمت كل متعلقاتي من الوزارة وطلعت رحت علي كتلو امشي نرجع لتكريت الوضع مايطمن هنا تره دقت ساعة الصفر والكل طلعوا من بغداد …هوه عاند وماقبل يرجع وياي كال بيتي ينباك وهذا تعب عمري خليتو بي ..شكد حجيت ويا وشكد حاولت تالي ايست منو وعفتو ورجعت لتكريت وهوه بقه ابيتو ..
شهلاء ..عمو لحد اخر يوم جنت اخابرو وموجود بالبيت كال ماعوفو وهم اتوسلت بي تعال ارجع لتكريت هم ماقبل واصر يبقه يحمي البيت من الفرهود بس من انكطعت الاتصالات بعد ماكدرت اتصل بي ??
جاسم ..اهدي بوية لتسوين هيج بنفسج الله كريم ان شاءالله يرجع ونتطمن عليه
ستار ..ادري شلون يرجع متكلي الطريق خطر علي وهوه شغلة بالجيش جان احتمال الامريكان ياخذوا لو لزموا
شهلاء ..لاااااا فدوة ستار لتوكع گلبي والله ماتحمل اسمع هل حجي الله يخليك كول شي يطمني مو يحرك گلبي ??

ابراهيم ..اووووف لاحول ولاقوة الا بالله بنتي كافي حتموتين اسكتي خلينه نفكر شنسوي بهل مصيبة ..
شيماء ..رحت كعدت يم شهلاء وحظنتها وبستها كتلها الله يبرد گلبج بشوفتو حبيبتي لتخافين ان شاءالله يرجع
ام شهلاء ..ياجماعة انطوا خبر لشيخ حازم بلكت عندو معارف شي يكدر يساعدنه

جاسم ..لا خلي ماحجي هسه ماريد احد يعرف بأختفاء شاهين ..هاي امو عفتها اتدك وتلطم وتكول ابني راح من ايدي شلعت گلبي ابجيها ونوحها
شهلاء ..اوييلي عليك شاهين وينك وين عفتني ورحت اوووووويلي عليك يابه ??
ابراهيم ..ام شهلاء الخاطر الله امشي اخذي بنتج واطلعي من الصالة صعديها لغرفتها حتموت هاي
زهور ..ماشي ..كومي يمه كومي تعالي ويايه نروح لغرفتج ارتاحي وين جانتلج هاي
شهلاء ..ولج يمه ياراحه هاي التحجين عنها اني صارلي 4 ايام منايمة متت وكلبي مفرفح جيبولي خبر من شاهين فدوة يمه

زهور ..اوووف بنتي كافي هيج اتسوين بروحج يايمه شلعتي گلبي عليج ..
شهلاء ..كمت مسحت دموعي ورحت كعدت يم رجل عمو جاسم كتلو عمو فدوة اروحلك خلوني اني اروح عليه لبغداد اني بنية ماعليه شي مو رجال حتى يوكفوني بالسيطرات.
جاسم ..صدك تحجين عمو اسكتي الخاطر الله ليش الوضع يميز مراة من رجال اكولها بغداد صايرة كتله من نااااار احترك الاخضر واليابس
شهلاء ..عجل شلون فهموني راح تبقون جاعدين وساكتين وشاهين منعرف عنو شي ..كمت اضرب وجهي وابجي ..كام بابا لزمني وصرخ بأمي اتطلعني وتصعدني بغرفتي ..ولكم شبيكم متحسون بنار گلبي المشتعله اووووووف ربي ???

ومرت الايام ومر ع اختفاء شاهين شهر ومحد يعرف عنو شي وشهلاء اتدمرت نفسيتها لا اكل ولاشرب وكاضيتها بس بجي ونوح والوجع الي بگلبها ع فراك شاهين فتك بيها …
ومرت الايام ومر ع اختفاء شاهين شهرين والحال معاد ينسكت عليه ..انتشر الخبر ودره جليل وراح لبيت اهلو ..

جليل ..بوية دريت بشاهين مختفي صارلو شهرين لان باقي ابغداد يم بيتو ومراجع بعد

شيخ حازم ..لابربك صدك تحجي
جليل ..اي والله بالصدفة دريت من ولد صديقي بالكهوة واحنه بيت عمه مندري نسمع من الغرب شنو يعني عبالهم احنه نتشمت بيهم مثلا
شيخ حازم ..متسكت الخاطر الله شنو هل حجي الناس بيا حال ..امشي وديني الهم اريد اشوف شنو هل مصيبة الوكعت ع روسهم
جليل ..ماشي بوية يله ..اخذت ابوية ورحنه لبيت عمي جاسم دكينه الباب وطلع ستار دخلنه جوه جانوا ملتمين يمهم حتى بيت عمي ابراهيم ..شفت شهلاء مكلوبة خلقتها لايالله هاي شصاير بيها

شيخ حازم ..ادري ياخوتي هاي سوايه تسووها يعني شاهين مختفي صارلو شهرين واحنه عمامو مندري ونسمع من الغربه ليش هيج ليش والله فلا مقبولة منكم وزعلت منكم
جاسم ..لا العفو خوية مو قصدنه انظم عليكم والله بس جنه منتظرين جية شاهين بس اتأخر وماعاد نعرف شنسوي وعساس باجر كلنه نجيك وننطيكم خبر
شيخ حازم ..والله الخاطر شاهين راح اسكت واعديها الكم بس قسما بذات الله لو عدتوها لا انتو اخوتي ولا اعرفكم بعد ..عجل احنه اخوة بس ع الورق مو بالدم ..اذا مانوكف لبعض بالشدات شوكت نوكف
جاسم ..اعتذر منك خيي واحسبها علينه ..كمت ع حيلي ورحت يمو وكتلو هذا راسك هم ابوسو بس لتاخذ ع خاطرك من عدنه ..هسه احنه الي انريدو نوصل لشاهين لان گلوبنه احتركت مدنكدر نوصلو ومنكدر نروحلو والاتصالات مكطعه بينه ..

شيخ حازم ..اي تستاهلون هذا الي مايستشير الكبير لو جايين عليه جان ساعدتكم واندلينه مكانو للولد بس انتوا تتصرفون بكيفكم ومتستشيرون الاكبر منكم
جاسم ..يعني تكدر تعرف شلون نوصل لشاهين ..
شيخ حازم ..ان شاءالله اكدر ..عندي ولد صديقي بنفس منطقة بيت شاهين اتصل عليه بلكت يكدر يروح لبيت شاهين ويشوفلنه الوضع
ابراهيم ..خيي الاتصالات متكطعه ماكو مو كنالك
شيخ حازم ..ومنو كلك راح استخدم التلفون الارضي
جاسم ..عجل شنو راح تستخدم
شيخ حازم ..عندي جهاز ثريا اتصال بالقمر الصناعي جنت اتصل بصديقي دائما هسه راح اتصل بي
شهلاء ..جنت مثل الوحدة الميتة والجثة بلا روح من سمعت عمي حازم هيج كال عبالك واحد صفعني ع خدي صحاني كمزت من مكاني كتلو شنو عمو الله عليك يعني تكدر تتصل بشاهين احلف فدوة لعمرك عمو صدك يعني ..
شيخ حازم ..اي عمو ان شاءالله ..كوم جليل جيب جهاز الثريا من السيارة
جليل ..صار بوية ..طلعت بره فتحت السيارة اخذت الثريا ورجعت طبيت ونطيت الجهاز لابوية
شيخ حازم ..اي عفية وليدي ..فتحت الجهاز ..ودكيت ع صديقي عمار شوية ودك الحمدلله ..مرة ومرتين و3 مرات ياله شالو الوووو
عمار ..الووو
شيخ حازم ..ها خيي ابو وليد شلونك ان شاءالله بخير
عمار ..هلا والله بشيخ حازم الحمدلله زينين انتوا شلونكم شخباركم ع هل اوضاع
شيخ حازم ..والله تحت خيمتو نحمدو ونشكرو ع كل حال
اكول بعد اخوك ردت منك خدمة
عمار ..اي كول عيوني الك
شيخ حازم ..تسلملي عيونك يغالي ..عندي ابن اخوي بيتو يمكم صارلو شهرين ماعدنه خبر منو ولو بيها زحمة بس انريدك اتروح اتشوفو شخبارو لان امو خطية محروك گلبها عليه والكل خايف لاصاير عليه شي بسبب الاوضاع اليمكم ..
عمار ..اي اي عادي من عيوني ان شاءالله باجر الصبح اروح لان هسه تعرف الامريكان فارضين حظر تجوال ومنكدر نطلع ..
شيخ حازم ..اي والله بعد اخوك ماتقصر ادري بيك ..هذا فضلك ما انساه الك للموت
…
شهلاء ..صار عندي بصيص امل حتى لو ضعيف بس اكول ان شاءالله شاهين بخير ومابي شي ويارب يضهر ويرجع الي سالم من كل شر ..حطيت ايدي ع وجهي مكدرت اتحمل كمت ابجي بسكته كمت من الهول ورحت للحمام انفجرت بالبجي ياربي فدواتك ماعندي غيرك احفظلي حبيبي وسندي الي بهاي الدنيا …الي قهرني جنت ابعدو عني كل ما يريد قربي ..جنت اصدو كل ما يريد يطفي نار شوكو بحظني ??
اووووف شاهين حركت گلبي ع فراكك ليش هيج سويت بيه ?

وصار ثاني يوم وصديق عمو حازم ماتصل اني گلبي شعوط اتشعوط والانتظار قتلني ودمرني ..وصار ثالث يوم ورحنه لبيت عمو جاسم كلنه واجه عمو حازم وكعدنه داير مدايرو والترقب والانتظار فتك بينه جسمي كلو يرجف اريد خبر يطمني حموت حيل مابقه بيه احس بروحي جاعد تنسلب مني شوية شوية ..طلع عمو جهاز الثريا واتصل بصديقو عمار ودك عليه مرتين مارد ودك مرة ثالثه ياله شالو ..كلو ها خيي ظل بالنه والله
عمار ..اعذرني ابو جليل والله اول بارحة صارت ويانه حادثه وانكلبت الدنيا هنا
شيخ حازم ..خير ياستار شكو شصار
عمار ..اول البارحة اول ماسديت الخط منك وره ساعة صار ركع هاونات دك ع روسنه المراة والجهال اتخبلوا كاموا يرجفون واضطريت اطلع الصبح لاربيل لملمنه غراضنه وملابسنه و وديتهم لبيت اهلها ..بس لتخاف قبل لا اطلع لاربيل كدرت امر لبيت شاهين الي دليتني عليه
شيخ حازم ..اي فدوة لگلبك خيي بشرنه شلكيت الوضع بالبيت
شهلاء ..كمت وكفت ع حيلي مكدرت بعد اتحمل ظليت افرك بايدي من القلق والتوتر والخوف كوه جنت واكفه رجلي احس بيهن صارن مثل السعفه يرجفن .. حتى دمي جمد بعروگي ..
عمار ..والله ياخيي للاسف الوضع مايطمن لان البيت شفتو واكع عليه طيارة امريكيه ومتفلش اتفلش للكاع
شيخ حازم ..انتفضت من مكاني وكفت وصرخت بصوت عالي كتلو شنوووووووو لايالله شتحجي انت
شهلاء ..ها ها عموو فدوة شكو احجي الله يخليك شبي شاهين ????
جاسم ..شكو خيي احجي
شيخ حازم ..اشرتلهم بيدي دقيقه ..كتلو وهوه وينو ماشفتو بالبيت
عمار ..لا والله البيت كتلك مهجوم للكاع وشاهين مالو اثر المنطقه شبه مهجورة ولا بشر بيها ..
بس يمكن الامريكان معتقلي
شيخ حازم ..الله ليكولها اذا الامريكان معتقلي والله فلا يفكون ياخه منو
..سديت الخط من عمار وكعدت وكتلهم بيت شاهين متفلش واكع عليه طيارة امريكية وشاهين مالو اثر
شهلاء ..يبووووووووو عزززة العزاج شهلاء وين جانتلج ..ولك شاهين شسويت بيه وين رحت ليش هيج ليش ظليت ادك والطم واملخ بنفسي والكل التموا عليه ويلزمون بيه وتالي فقدت الوعي واتخربطت اخذوني للمستشفى ..وام شاهين ارتفع ضغطها وسكرها ووكعت وهم شالوها الله لايراوي مسلم الي شفناه بذاك اليوم يحزن الكافر ..انثبرنه ثبر وانفجعنه بالخبر ..كلنه وكفنه فد وكفه وماهجعنه اني صار بيه انهيار عصبي كل ما اصحه اظل اصيح وادك والطم ويرجعون يضربوني ابر ومهدئات وارجع انام
بقيت ع هل حالة شهر فاقده لا ادري نهاري من ليلي ولا اعرف الي يجيني والي يحجي ويايه دخلت حالة اكتئاب اهلي ابتلوا بيه ..يعني حب عمري بلحظة يروح من ايدي هيج بكل بسهولة غير اموت ..
ومرت الايام ومر ع اختفاء شاهين 5 اشهر واني مثل الوحدة المختله عقليا صرت بس صافنه وماحجي ولا حاسة بالي حواليه ..جان جليل يجي يحجي ويكطع گلبي بكلامو ويكول شاهين ميت امبين لان مالو اثر واني روحي شاغت للسماء اشيل روحي واركعها بالكاع واريد املخو لجليل باضافيري واكولو عساك انت بمكانة الله ياخذك ان شاءالله ..شاهين ما مات شاهين عايش وان شاءالله يجي ويكسر خشمك ..
وبقينه ع هل حال من صدمه لصدمة وفصلت عن الدنيا بقيت بغرفتي وقافلة بابي عليه وماحجي ويه احد جنت مكابله صورة شاهين وحاظنتها وابجي ..
ابراهيم ..زهور بنتنه لتروح من ايدنه البنية فاصلة عن الدنيا
زهور ..سودة بوجهي يممه بنيتي ماتهنت بخطيبها حسدوها وانظربت عين يايمه ياشهلاء وين جانتلج متغيرة صايرة جلد ع عظم وين جانت ام جسم الحلوو والوجه الگمر صايرة جنها عجوزة …
شهلاء ..جنت اسمع ماما وبابا يحجون بس ماكدر احجي بس صافنه وبغير عالم جنت عبالك تمثال ..
ومر ع اختفاء شاهين 8 اشهر ومحد يعرف وينو مندري ان كان ميت لو عايش مندري بيا مكان موجود مثل فص ملح وذاب …
جليل ..بوية مادام شاهين بعد مموجود بحياة شهلاء اريدك تخطبها الي مرة ثانية ..لان الي جان ترفضني الخاطرو اختفه واحتمال ميت هم هسه ماكو عارض لزواجي منها
شيخ حازم ..اكولك انت شبيك ماعندك دم ماعندك ذرة احساس ..
يعني دتشوف البنية نص عايشة ونص ميته ع خطيبها دتشوفها بيا حال خطية خطوبتيش تحجي بيها انت كل عقلك تقبل بيك
جليل ..والله اذا ماقبلت برضاها اخليها تقبل بالغصب
شيخ حازم ..ولك شوف تاكولك لاتندك ابيت اخوي ترا اذبحك والخلقك ..ماريد مشاكل بسببك عوف البنية بحالها مو ناقصة هم وقهر هيه ..
جليل ..بوية كتلك ماعوفها وشهلاء الي متصير لغيري شاهين وخلصنه منو والكل ديكولون مات يعني شنو حجتها هسه بعد ..

شيخ حازم ..والله فلا امشي وياك بخطبة تريد تروح تخطب روح وحدك اخطبها
جليل ..ممنون منك بوية ماقصرت
شيخ حازم ..امشي كوم من كدامي الله لايبارك بيك وبالساعة السودة الي صرت بيها ابني ..
جليل ..طكت روحي عفت ابويه وطلعت بره شنو يعني ليش ميقبل اتقدملها بنت عمي ياناس بنت عمي واني احق من غيري بيها ..شاهين هسه مات وفرغتلي الساحة ليش ماستغلها الفرصة واتقدملها …
كلت خلي تتحسن صحتها حتى اروح واتقدملها …

شهلاء ..الكل فقد الامل انو شاهين عايش اله اني جنت اسمع صوت أنفاسو بأذني جنت اسمع دكات گلبو جنت اكولهم شاهين عايش وداحس بي بس محد يصدكني يكولون شاهين مات وشبع موت ..واني من اسمع هل حجاية اني اشيط واحترك بجمرة و أوج بنار تسعر
ومحد يكدر يطفيني لان شاهين جان الهوه الي اتنفسو جان كل حياتي وعمري الي ماتهنيت بي جان حلمي الي ماتحقق ..جان دگات گلبي الي ينبض

#وبعد_مرور_سنة_ع_الحادث

وللحكاية بقية ..

((عبارات بقلم شهلاء المجيد كانت في دفتر مذكراتها بيوم فقدت حبيبها ??))

مابالك يا دنيا ؟؟! لماذا ﻻتتركينا في حالنا لماذا صببتي علينا كل دمارك وعذابك وآآآهاتك ؟؟ الم تملي منا الم تحزني على حباً ذاق مراراتك ولم يتهنا به الحبيبين ولو للحظة … بالله عليك ارحمينا من وجع الفراق فقد وصل حد الاختناق فلم نعد نحتمل ظلمك بعد ..حسبي الله عليكي
??

يتبع …

#سارة_المجيد?