شر انتقام
#شر_انتقام * الحلقة العاشرة *
#الكاتبةوعدالخضر
يوم الزفاف
خش عزيز ع امه لقى خالاته و عماته والدوشه واصله لحد الشارع
خش عليهم
عزيز : امي شن هالدوشه زح وين تحسابو ارواحكم هذا حي راقي راه
شافوله الموجودين بصدمة
امه وجهها تقشر من الحشمة
شدت يد ولدها وطلعت بيه لبرا
غيثيه : وليدي هذا شنو الي درته حشمتنا مع الناس
عزيز : لا ناس لا واحد فكونا من جو البيئة هذا
غيثيه : ماساد حرمتنا من سربنا ولا درنا شي وقعدت اتنق نبيه فرح أجنبي نبيه فرح اجنبي
عزيز : نم فرحي ولا مافيش حد دخله فيا اجنبي ولا صومالي مهم قتلك ابعتي بنتك لشقتي بيش ترتب لحنان دبشها
غيثيه : اللطف علاش بنتي ارتبلها وين خواتها
عزيز : وين نعلم نا هي قتلي هك مهم كلمي رهف انا طالع
وطلع
غيثيه :
” ربي يهديك ياوليدي ”
غيثيه : رهف يابنتي تعالي
جتها تجري
غيثيه : اركبي لشقة خوك ورتبي لمرته دبشها
حطت يدها ع خصرها
رهف : اسم الله وعلاش انرتبلها انا نخدم عندها ؟
غيثيه : والله مانعرف هذا كلام خوك ديري زي ماقال وخلاص
رهف : ووووه من اولها بتحكم عليه
وركبت للشقه وهي متعصبه
عند سحر
قاعده في مكتبها وتخدم
خبط الباب وخش جندي
حياها
الجندي : وصلت جرائد اليوم
شافتله سحر بعدم مبالاة واشرتله بيش يحطهم
حطهم وطلع
رن تلفيونها ردت
هاجر : سسحر قريتي جرائد اليوم احي ريتيه شن دار الكلب خزززي والله ماهو راجل
رفعت سحر حاجبها
سحر : ع شن تدوي انتي ؟
هاجر : اه الحماس نساني نقولك ماه ني بعد نتحمس هلبا ننسى ياوخيتي حالتي صعبه حتى امس كنت نهدرز ع حبيب قتله
قاطعتها سحر
سحر : هاجر ورايا خدمة اختصري
هاجر : اه نسيت مره اخرى مهم عزيز اليوم فرحه
فتحت سحر عيونها بصدمة
سحر : شن اتقولي من وين عرفتي ?
هاجر : مكتوب في الجرائد امالا ماقريتيهم اني الحق يوميا نقرأ فيهم ياوخيتي الواحد لازم يعرف شن صاير في الدنيا
رفعت سحر أحد الجرائد المحطوطه جنبها وشافت الخبر بالخط العريض
سحر : سكري سكري بعدين نكلمك
سكرت الخط وقرت الجريدة بإهتمام
زفاف ابن عائلة الجابري عزيز الجابري اليوم
قلبت الصفحة وكملت قرايا وعرفت التفاصيل ومكان الصالة و المنظميين وكل شي لفت انتباها اسم احد المنظمين
رفعت راسها وتذكرت الاسم
سكرت الجريدة
سحر :
” بعد الي درته كـلـه تبي تتزوج بـ هالسهولة لا والله ماهي صايره مش اني الي نخلي حقي توا نوريك ياعزيز ”
رفعت حاجاتها وخدت اذن وطلعت
اتصلت بهاجر
سحر : هاجر نبي احلى فستان ومن احسن مصمم تمام و نبي كوافير ممتاز و اكسسوارات كاملة تقدري اتوفريهم ليا ؟
هاجر : اشيه شن تبي فيه هذا كله
سحر : تقدري ولا لا
هاجر : نقدر اكيد
سحر : تمام توا نبعتلك مبللغ اقضي بيه الموضوع و اي
احسبي روحك معايا
هاجر : نحسب روحي في شنو امال وين بنمشو
سحر : توا تعرفي كملي وقوليلي
وسكرت الخط
فتحت تلفيونها واتصلت برقم
سحر : مرحباا هويدا ، هههههه شنجوك ، ميه ميه اسمعي طالبتك في خدمة اليوم ، اييي عارفتك مشغوله مع عيلة الجابري اصلا خدمتي ليهم ، توا نبعتلك كل المطلوب في مسج
بعتت المسج وردت عليها هويدا
” اكيد نقدر مستحيل ننسى وقفتك معايا اصلا حصلت هالخدمة من وراك وتطمني مش ح يعرف حد بـ شي ”
ابتسمت سحر بإنتصار
وصلت لحوشهم
خشت غرفتها ودوشت خشت عليها اختها
أروى : سححر هاجر برا راه وجايبه معاها هلبا حاجات
هزت سحر برأسها ايجابا وطلعت ورا اختها
سلمت ع هاجر
عائشة : بنتي شن عندكم اليوم
سحر : فرح وحده صاحبتي و عزيزه عليا هلباااااا وبنمشي عادي ولا
عائشة : اي عادي امشي غيري جوك
اشرت سحر لهاجر ولحقتها و معاها الكوافيره
الكوافيره : نبدو بيك ولا بيها
سحر : لا ابدي بهاجر اني عندي موضوع بنكمله قبل
بدت الكوافيره بـ هاجر وشدت سحر تلفيونها وبعتت كل المطلوب لـ هويدا
بعد ساعات
وقفت سحر قدام المرايا
وتلفتت ع هاجر واروى
سحر : شن رايكم ؟
هاجر : واووو طالعه تهبليي نحس فيك بتطلعي احلى من العروس ههههههه حق من العروس قلتي صاحبتك من صاحبتك هذي خزززي امصحابة غيري
شافت سحر لـ اروى
اروى : تهبلي والله سمحه بكل
ابتسمت سحر
أروى : بس حق كلام هاجر فرح منو ياسحر
سحر : عزيز
شهقو بقوة
سحر : خيركم بسم الله اي فرح عزيز وبنمشي نأدي معاه الواجب
أروى : لالا سحر ماتمشيش بالله عليك فكينا منه
تناولت سحر عباية ولبستها
وحطت يدها ع كتف اختها
سحر : مستحيل نخلي حقنا يااروى ضروري ننتقم منه ماتخافي ساعة زمان ونروح
وشافت لهاجر
سحر : هيا هاجر وقت علينا
لبست هاجر عبايتها وطلعو
ركبو السيارة وبعد دقائق وقفو فتحت سحر الباب وهمت بالنزول
هاجر : وين ماشيه
سحر : لحظه بس تو نجيك
ركبو السيارة وبعد دقائق وقفو فتحت سحر الباب وهمت بالنزول
هاجر : وين ماشيه
سحر : لحظه بس تو نجيك
نزلت من السيارة استلمت ظرف ورجعت
بعد دقائق وصلو قدام الصالة وكانت مزدحمة بالصحافة والاعلام تقدمو بين الجموع واتجهو للباب
الحارس : ممكن كرت الدعوة
فتحت هاجر عيونها بخوف وهمست لسحر
هاجر : احي علينا كيف بنخشو توا
أشرت سحر لهاجر بيش تسكت طلعت الظرف من شنطتها ومداته ليه
الحارس : تفضلو انستو
وخشو اول ماخشو كانت كل العيون ع سحر بفستانها الدمي الطويل والضيق وشعرها المنسدل و كعبها العالي ومكايجها المتقن ، شافت للكل بنظرة غرور وقعمزت
هاجر : من وين حصلتي كرت الدعوة
سحر : معارفي هلبا
هاجر : باه و شن بنديرو توا ها
سحر : اصبري هاجر بعد نروحو نحكيلك
مدت هاجر شفايفها بإنزعاج
طلعت سحر تلفيونها وبعتت مسج لـ عزيز
” عزيز ياغالي بعد تخش للصالة تلفت ع اليمين ح تلقى مفاجأة ح تعجبك هلباااا ”
وصل المسج لعزيز كتبلها
” ههههه صالة صار غير اقدري اتخشيلها قبل بعدين يصير خير ”
فتحت كاميرتها وصورت الصالة من داخل وبعتتله وقفلت تلفونها
شاف الصورة و اتصبب عرق عرف ان جية سحر مش ح تمشي ع خير ، اتصل مرارا وتكرارا التيلفون مقفل !
نادوه بيش يخش مع حنان
سلم عليها وخشو الصالة قعدو يصفقو الناس
فتحت سحر تلفونها وبعتتله
” طالع حلو هههههههه ”
” عروستك تضحك راه ”
” ترا تلفت ع اليمين ”
رفع تلفيونها وشاف المسجات
حنان : عزييز دخل تلفيونك شن المهزله هذي الناس يشوفو فينا ?
دخل التلفيون بخوف وتلفتت ع اليمين شاف سحر مقعمزة بكل غرور
اشرتله بيدها بمعنى مرحباا
طلع منديل وقعد يمسح في عرقه بتوتر
حنان : عزيز خيرك متخلف هك بطل الي اتدير فيه
دخل المنديل وقعد يشوف لسحر بخوف من اي ردة فعل منها
بعتت مسج لهويدا
” بعد 3 دقائق بزبط اعرضي كل شي ع الشاشة ”
و وقفت
سحر : هاجر عليك بالعروس اشغليها لين نكلم عزيز تمام
هزت هاجر براسها ايجابا
واتجهو للعروسين
سلمت هاجر ع العروس وقعدت تهدرز وتهدرز وقربت سحر من عزيز
تفاجاء وجهه قعد الوان الوان
تكلمت بصوت واطي
سحر : خيرك ياعريس وجهك تقول قوس قزح هذا وجه عريس بالله عليك
رفع صوته شوي
عزيز : شن جايبك هنا ها
شافتلهم حنان لفتتها هاجر وكملت هدرزة
سحر : اششش ماتعليش صوتك لتسمعك العروس توا هذي الخنفساء اخترتها من بين كل البنات الي تعرفهن لا بجد ماعندكش ذوق نهاائيا
عزيز : سحر شن تبي بالله عليك ماتديري شي
سحر : نو نو ماتترجاني عيب هك جيت بنباركلك بس خيرك خواف هك
عزيز : مش مصدق حاس انك بتديري مصيبة
سحر : ههههههه لا هك غلط كلمة مصيبة شويه على بنديره فيك الي بنديره #شر_انتقام
وقفت بشموخ وشافت لحنان بتقزز واشرت لهاجر ومشت خطوات استوقفتها غيثية
غيثية : بنتي شن حالك
رفعت حاجبها بتعجب
سحر : نعرفك ياعمتي ؟
غيثيه : اني حاجة غيثيه ام عزيز العريس ونبيك في حاجه
ابتسمت سحر
سحر : اتشرفنا تفضلي ان شاء الله خير
غيثيه : يابنيتي نبي رقم امك نبيها في موضوع
بانت ملامح الصدمة ع سحر
غيثيه : كان عندك مانع عادي يابنيتي مش مشكله
ابتسمت سحر بمكر
سحر : لالا ماعنديش اي مانع سجلي عندك
سجلت غيثيه الرقم وتلفتت سحر ع عزيز وابسمتله وهو مييت خوف ومستني الصدمة
جرت سحر ع الكرسي ورفعت تلفيونها واتصلت بهويدا
سحر : هويدا وقفي كل شي توااا
هويدا : مازال ثواني ع العرض كيف بنوقفه
سحر : وقفي حاولي اتديري اي شي هيااا
هويدا : تمام سكري
وقفت سحر برا الصاله بتوتر
وصلها مسج من هويدا
” تمام وقفت كل شي ”
خذت نفس براحه وركبت في سيارتها
هاجر : ممكن اتفهميني شن الي صار وشن الي بتوقفه ومن هويدا هذي قعدت زي الاطرش في الزفة راه
سحر : ههههههه توا نحكيلك ولا يوجعك خاطرك الي صار بعد ماكلمتيني الصبح ع خبر فرح عزيز قريت الجريدة و لقيت منظمة الحفلة هويدا وهويدا هذي وحده مره صارتلها مشكله في المركز عندنا وساعدتها وامنتلها هالخدمة فقررت نفضح عزيز قدام كل الناس و نخرب عليه عرسه
هاجر : وكيف بتفضحيه
سحر : ساهله قبل فترة كلمت وحده في الاستخبارات و طلعتلي كل علاقات عزيز موثقه بالصور و المقاطع والاوراق وكلل شي ف كنت نبي نعرض الصور و المقاطع ع الشاشة الكبيره في الصاله والكل يشوفو عار عزيز بيش ننتقم منه بس توا غيرت راي
هاجر : اياه وعلاش
سحر : لأن لقيت انتقام احلى مش يقولو الانتقام البطيء اقوى واني نبي نعذبه الف مره في حياته ع الي داره في أروى
هاجر : وكيف بتنتقمي ها والله كان درتي خطتك هذيك احسن
سحر : لا الجاي احسن بهلبااا غير اصبري بس أنتي و ح تعرفي كلل شي
===============================
#شر_انتقام * الحلقة الاحدى عشر 11 *
#الكاتبةوعدالخضر
بعد مرور كم أسابيع
خش سالم ع امه في غرفتها
سالم : نعم ياامي رهف قتلي تبيني
غيثيه : اي صح سكر الباب وراك وتعال قعمز
سكر الباب وقعمز جنب امه
سالم : ان شاء الله خير
غيثيه : خير خير ، نبيك ياوليدي تتزوج زي خوك هك ونشوف صغارك قبل لا نموت
سالم باس يد امه
سالم : بعيد السؤ عنك يااميمتي بعد عمر طويل
غيثيه : الموت حق وكلنا ليه يا وليدي اهو شقتك واتيه و بخدمتك الحمدالله تزوج وكمل نص دينك يرضى عليك ربي
فكر لثواني
سالم : حاضر ياامي
غيثيه : يحضرلك الخير خلاص امالا نخطبلك البنت الي شفتها في عرس خوك
سالم : شوفي رايك الي تبيها اني معاك
غيثيه : خلاص امالا انوتو ارواحنا ونمشولهم وان شاء الله خير
ابتسم سالم بنوع من القهرة وطلع
طلعت الام تليفونها واتصلت
غيثيه : السلام عليكم ام سحر ؟
عائشة : اي ان شاء الله وخيتي تفضلي
غيثيه : شن حالكم ، معاك وخيتك غيثيه و والله اني شفت بنتك في فرح ولدي قبل فتره وعجتني مشاءالله عليها جمال وادب واخلاق
عائشة : تسلمي من ذوقك والله
غيثيه : سلم شانك ياوخيتي الصراحه نبيها لولدي الكبير سالم عبدالقادر الجابري
عائشة : ان شاء الله خير نشوفها ونشوف بوها وانرد عليكم
غيثيه : ان شاء الله
وسكرت الخط
حطت عائشة يدها ع حنكها وتفكر
” كان مايطلعو هذكوما الاغنياء خل نسأل سحر ”
نادت ع بنتها
جت سحر تجري
سحر : نعم ياماما
عائشة : تعالي قعمزيلي اهني
قعمزت جنبها
عائشة : من سالم ؟
رفعت سحر حاجبها
سحر : من سالم ؟
عائشة : يعني ماتعرفيشي ؟
سحر : لا والله مانعرفش حد بـ هالاسم
عائشة : هذا ياحنه امه كلمتني قبل شوي ويبوك
ساوت شعرها بدلع
سحر : سالم الجابري ؟
عائشة : ع اساس ماتعرفيشي
سحر : بالله ماما من مايعرفهم هالعيله قصدي عادي
عائشة : قصدك هم نفسهم شكيت فيهم والله
سحر : اي هم مهم شقتيلها
عائشة : قلتلها نشوفها و بوها ونرد عليك
سحر : ايوا هك صح ، امتى بتقولي لبوي ؟
عائشة : بعد يروح بنقوله
سحر : لالا ماما ماتقوليه اليوم خليه هك كم يوم بيش مايقول مشت العرس ودارت العار ويهزبني
عائشة : امالا شن درتي ها
سحر : والله مادرت حاجه غير انتي ماتقوليله اليوم باهي ماما
عائشة : باهيي توا نخبره بكرة
باستها ع خدها وجرت لغرفتها
===========================
عند عزيز
سافر لـ تركيا هو و حنان وعايشين جو حلو هي تتشرط وهو يرعش عليها
حنان : حبيبي نبي نشري هدايا لماما وبابا وخواتي وخوتي ونساوين خوتي وخالاتي وعماتي واييي الجيران بيش يعرفو اني كنت في تركيا
عزيز : ان شاء الله حبيبتي بس هلبا هك والفلوس الي عطاها لينا سالم قريب اتم
حنان : مااادخلنييش اتطير اترك اتجيبلي الي قلت عليه ايوا
عزيز : ان شاء الله ان شاء الله
وطلع متضايق
========================
بعد ايام
عند سحر
عائشة : سحر لينا اسبوعين ماردينا ع الجماعة خيرك يابنت كان ماتبيه قولي وخلاص
سحر : خلاص كلميهم وقوليلهم موافقين نبيه
عائشة : الحمد لله واخيرا
زغرطت وبعدها اتصلت بيهم وكلمتهم
========================
في حوش عيلة الجابري
كانو غيثيه وبنتها وكنتها قاعدين في غرفة المعيشة ويهدرزو
سكرت الخط بعد مااتحصلت ع موافقه سحر واهلها
رهف : ماما شن قالولك ان شاء الله وافقو
غيثيه : لا الحمدالله وافقو ، هي بنيتي شوفي الناقص بيش تمشي معانا واني بنكلم معاتك بيش الخميس نمشو انشوفوها
شافتلهم حنان وقالت
حنان : اخ انوض نوتي روحي
رهف : وعلاش ؟ شن عندك
حنان : بنمشي معاكم
شافتلها رهف بقعر عيونها وشافت للجهة الثانيه
غيثيه : مش ضروري منها مشيتك يابنيتي بنمشو احني النساوين انشوفوها وخلاص
حنان : اهي رهف ماشيه شنو هي ع راسها ريشه ?
رهف : أي ع راسي ريشه ومعاش تتكلمي مع امي هك
وقفت حنان
حنان : نتكلم زي مانبي مادخلكش فيا
وقفت رهف بتحدي
غيثيه : خلاص يابنات كلمة وقلتها معاش اتناقشو
حنان مدت بوزها وركبت لـ شقتها
تعارك وتلعن
جاها عزيز يجري
عزيز : خيرك حبيبتي من مزعلك
حنان : اختك الحيوانه اتعالي صوتها عليا انا
عزيز : شن قتلك ها
حنان : هزبتني وعابت فيا وماخلت كلمه وماقالتها هك ياعزوز يهينو مرتك وانت قاعد تتفرج
نزل عزيز لأخته زي الثور الهايج
عزيز : رهـــــــــــف ??
رهف : نعم
عزيز : اتعلي في صوتك ع مرتي يال ماتتحشمي
وقرب منها بيضربها جرت لبرا ووقفت ورى سالم
تلفت عليها سالم
سالم : خيرك شن في
رهف : عزيز بيضربني
رفع حاجبه وتلفت ع عزيز
سالم : خيرك مع البنت كم مره حذرتك ع ضربها ؟
عزيز : بعد تعلي صوتها ع مرتي وتتمادى في الكلام بنضربها
سالم : كلامه صح ؟
هزت رهف براسها نفيً
عزيز شاف لحنان
عزيز شاف لحنان
حنان : اي اي عبتي فيا وتوا اتكذبي في كلامي
رهف : والله ماعبت فيك شن هذا استغفرالله كذبت الكذبه وصدقتها
نزلت حنان دموع التماسيح
حنان : اهئ اهئ اهو قاعده اتعبي فيا
رهف : تي شن عبت فيك والله يا عزيز ماعبت فيها لا شي صدقني
تدخلت غيثيه
غيثيه : خلاص ياولادي ماصار شي رهف اعتذري من مرت خوك
رهف : بس مادرتش شي بيش نعتذر
غيثيه : رهف
اعتذرت رهف من حنان ومش طايبلها
غيثيه : لكن ياحنان كلمتي وقلتها هذا سربنا مانرفعو في حد يشوف العروس غير النساوين الكبار واخت العريس سامحينا
عزيز : مش مشكله ياامي ، هيا حنان
ركبت حنان ورا عزيز
حنان : عاجبك هك ها ريت امك شن قالت
عزيز : حبيبتي هي مشية نساوين بيشوفو البنت وبس مش ضروري تمشي انتي
حنان : وكان هذا اني الكنة الصغيره ولازم نمشي
عزيز : شن بندير انا باه انعارض كلام امي ولا كيف
حنان : اوووف منك ومنهم
وخشت لغرفة النوم وخبطت الباب بقوة
=======================
يوم الخميس
جهزت سحر روحها وكانت بسيطه هلباا مجرد فستان طويل و اكمامه نازله و دارت شعرها كعكه و ولا قطرة ميكب
خشت عليها امها
عائشة : يامصيبتي هذا شنو
سحر : شن هوا ؟
عائشة : خيرك يابنت ماجهزتي روحك لتوا الناس وصلو راه
اشرت سحر ع نفسها
سحر : جاهزه انا
عائشة : خيرك مادرتي مكياج
سحر : والله هذي اني عجبتهم باهي ماعجبتهم يتوكلو
تنهدت عائشة بيأس من عناد بنتها و طلعت
بعد دقائق نادو ع سحر رفعت سفرة القهوة وخشت بكل ثقه وعيونهم عليها ضيفتهم وقعمزت
غيثيه : مشاء الله عليك يابنتي تعالي قعمزي.جنبي
قعمزت سحر وابتسمت
تلفتت غيثيه ع عائشة
غيثيه : شن ياوخيتي نكلم العريس ع النظرة الشرعيه بيش يجي يشوفها
تكلمت سحر
سحر : ياعمتي مانحبش الجو هذا ونتحشم توا يشوفني يوم العرس
غيثيه : ان شاء الله يابنتي ع راحتك ،عندكم اي شروط اي شي
نزلت سحر راسها بخجل
سحر : عادي ماعندي شي معين
غيثيه : شكلك متحشمه خلاص امالا نعطوك رقمه وتفاهمو
هزت سحر راسها ايجابا
كملو القعده وروحو
خشو رهف وامها الصاله ولقو عزيز ومرته قاعدين نادت غيثيه ع سالم وقعدو جميع
غيثيه : مشاء الله عليها البنت حتى عماتك شكروها ياسالم
ابتسم سالم ع جنب
رهف : ايييي ريتيها ياماما مش حاطه ميكب و طالعه غزاله مشاءالله عليها ، بنات توا تلقي وجهها مش قادر يتنفس من الميكب وياريته طالع عليها بس
وشافت لـ حنان بمعنى الكلام ليك
تعصبت حنان من الكلام ومشت
« اووو حبايبي نسيت نوصفلكم حنان طبعا حنان قصيره هلباا عكس سحر و بشرتها معبيه حبوب وشوائب من كترت الميكب الي عليها و شعرها قصير وجمالها بعد المييكب تعتبر عادية جدا وتحب الدلع المصطنع موووت
ح تقولو علاش خداها عزيز وهو في الف بنت غيرها ، ح تعرفو في الحلقات الجايه علاش خداها »»
غيثيه : خيرها مرتك
عزيز : مش عارف توا بعدين نشوفها ، ها ياامي امتى العرس نبو نفرحو بـ سلومه
تدخلت رهف
رهف : ههههههه ماحددنا شي سحر متحمشه عطيتها رقم سالم بيش تكلمه
شاف عزيز بصدمة بعد سمع اسم سحر
عزيز : سحر منو ؟
قصده اسمها بالكامل بس رهف ردت عليه بسرعه
رهف : سحر مرت سالم ههههههههههه غزاله ياناس غزاااله
وتعمدت تعلي صوتها بيش تسمعها حنان و عزيز في صدمة ثلاثية الأبعاد
صوتو من فضلكم