شر انتقام
#شر_انتقام * الحلقة الثانية *
#الكاتبةوعدالخضر
عند سحر
وصلت الحوش
خشت الصالة وحطت حاجاتها وقعدت اتدلك في رجلها
أروى : سحر جيتي
سحر : أي جيت ياعيون سحر انتي تعالي قعمزي نبيك
ابتسمت أروى بـ فرح و نفذت طلب اختها
فتحت سحر كيسه من الاكياس الجايبتها وطلعت منها علبتين ومدتهم لـ أروى
أروى : شنو هذين مازال مرتبك مانزل ولا
سحر : اي مانزل بس خطر ع بالي نهديك حاجه ، افتحيهم
فتحتهم أروى بكل فرح وكانت الهدايا عبارة عن أسوارة وبرفان يهبل
حضنت أروى اختها بإمتنان
أروى : كان خاطري فيهم ليا فترره
سحر : اي عارفه هذا علاش جبتهم ليك
أروى : شكرا هلبا ?
سحر : اششش مافيش اخت تشكر اختها ، ها قوليلي شن غدانا
أروى : والله مانعلم بيه كنت نقرأ
سحر : امممم باه عاونيني ندخل هالحاجات غرفتي
ورفعو الحاجات واتجهو لغرفة سحر
حطت أروى الاكياس ع الارض بـ تعب
أروى : اخخخ امالا شاريه السوق كله ??
سحر : هههههه نفس كلام هاجر خمسة و خميسة في عيونكم بدال ماتقولو اتبيدهم بالهناء
أروى : اتبيدهم بالهناء ??
شدتها سحر من خدودها
أروى : اخخ سحر كبرررت ع الجو هذا
سحر : مهما تكبري بنقعد انشدكك ? ، هي اطلعي بنبدل حوايجي
بعد ساعة
تجمعو في الصالة ويشربو في القهوة
حامد : ربي يخليك لينا يابنتي
عائشة : اي صحيتي ع الهدايا ربي يزيدك من عنده
سحر : ماتقولوش هك انتو اهلي وعليكم حق عليا وكان في يوم جبتلكم حاجه هذا لأنكم تستاهلو وتستاهلو اكتر والله
عند عزيز
ناض في ليل بدل ملابسه وطلع طول للاستراحة
اتصل بـ سراج
عزيز : تي وينك ياراجل
سراج : قاعد خير في شي
عزيز : كانك فاضي تعالي في الاستراحة
سراج : تم مسافة الطريق بس
سكر منه وقعد يتفحص في سيارة سحر بـ تمعن
بعد دقائق سمع صوت خطوات تقترب منه تلفت
سراج : ها جيتك قولي سيارة منو هذي
عزيز : سيارة وحده مبكري …
وحكاله القصة
سراج : خلاص امالا صلحها ورجعها ليها بما انك الغالط
عزيز : تي شن نصلح وشن نرجع قتلك قتلي ياعيل وتهزب وجو تحساب روحها وين
سراج : شن بتدير يعني ؟
عزيز : توا نوريها الكلبه حسابها معايا
سراج : ربي يستر وخلاص مايجي من تحت راسك غير المشاكل انت
ضربه عزيز ع كتفه
عزيز : هههههههه تي خيرك تدعي زي النتايه مابيصير غير الخير اصبر بسسس ?
#شر_انتقام * تابع الحلقة الثانية *
بعد مرور يومين
في صباح يوم جديد :
كانت سحر مقعمزة ع كرسيها في مركز الشرطة ولابسه بدلتها الرسمية وحاطه رجل ع رجل وتستنى في ضيفها
بعد دقائق
خش الضيف المنتظر يسب ويعارك ويتوعد
الجندي : اهوا الراجل حضرة النائب اي خدمة تانيه
ابتسمت ع الجنب واشرتله بمعنى انصرف حياها الجندي وطلع
شافلها الضيف بصدمة وعيونه قريب يطلعو من مكانهم
سحر : قعمز خيرك واقف
عزيز : نقعمز وين شن هالمهزله هذي ها شن تحسابي روحك وربي لـ نقاضيك ووو
ضربت بقبضتها المكتب بقوة
سحر : مازال محافظه ع هدوئي راه قتلك قعمز خير مانقعمزك في الزنزانه
قعمز عزيز بإستسلام
ابتسمت وشبكت يديها في بعض
سحر : لأني مشغولة وسبق وقتلك مانيش فاضية بيش انعاني عويل الروضة ، بنخش في صلب الموضوع طول سيارتي وين ؟
عزيز : احلمي بيها
ضحكت بأستهزاء
عزيز : ماقلتش حاجه اتضحك انا
سحر : لا قلت بس ماتعرفش شن الي يضحك
رفع حاجبه
سحر : تمام خليني انعرفك ع الشي الي يضحك في كلامك ، عزيز عبدالقادر الجابري الأخ الأصغر لسالم عبدالقادر الجابري مدير شركة سلاير للأقمشة وتصنيع الملابس الجاهزة من عيلة معروفة بالثراء الفاحش ووسائل الإعلام 24 ساعة يسعو بيش يعرفو خبر واحد عنكم
رفع عزيز حاجبه بتفاجئ
سحر : و بتليفون واحد مني نقدر نعطيهم احلى خبر
ورسمت بيدها خط عريض
سحر : موضوع صحف غدوة عزيز الجابري يسبب لمرأة في تعطيل سيارتها التي لا تملك غيرها ويرفض ان يعطيها ابسط حقوقها الا وهي تصليح الضرر الذي سببه
ولا نقولك خبر ثاني حسيته احلى
عزيز الجابري يقضي اول لياليه في الحبس بسبب طيشه و اخلاقه السيئة
شرايك اما احلى
عزيز : ??
سحر : شكله عجبك الموضوع نتصل بيهم ؟
ورفعت تليفونها واتصلت
سحر : مرحبا جريدة النبأ عندي ليكم خبر ناار
جرى عليها عزيز وسكر الخط
عزيز : خلاص غدوة تكون عندك فكينا من الصحافة
رفعت منه تلفونها وحطاته ع الطاولة وشاورتله بيش يرجع لـ كرسيه
سحر : اليوم !
عزيز : تم تم اليوم
سحر : اتفقنا هي تفضل شرفتنا ياعزيزو
طلع ركب سيارته ويسب
اتصل بـ سراج ع طول
عزيز :خير سراج فاضي ؟
سراج : طالع للعمل في شي ؟
عزيز : الصراحه في ، اسمع نبي ميكانيكي مليح
سراج : نعرف واحد لكن شن تبي فيه
عزيز : بنصلح سيارة هذيك البنت
سراج : احسن مادرت ، توا نبعتلك الرقم كلمه
عزيز : تم تم
بعتله سراج الرقم و كلمه
بعد مرور ساعات
عزيز و سراج واقفين قدام سيارة سحر ويتفصحو فيها
عزيز : ها شن رايك
سراج : مشاءالله خدمته نظيفه
عزيز : اييي هي ني وقت عليا نمشي انرجعلها سيارتها
سراج : غير كان اتقولي شن الي غير رايك بس
عزيز : سلامات
وغمزله غمزة ذات معنى وركب السيارة ومشا
سراج : ربك يستر ??♂ ??♂
مر عزيز ع محل معين وبعدها اتصل بـ سحر ووصفلها مكان بيش يتلاقو فيه ويسلمها سيارتها
بعد دقائق وصلت سحر للمكان المنشود
دفعت للتاكسي حقه واتجهت لعزيز الـ كان واقف قدام سيارتها
مد يده بيش يصافحها
سحر : مانسلمش ع العويل ? !
سحب يده بخجل
عزيز : شرايك فيها
واشر ع السيارة
وقفت ورا وشافتلها
سحر : لا بأس بها
واتجهت للباب وفتحاته
استوقفها عزيز بصوته
عزيز : اسف ع الي صار ونتمنى تقبلي اعتذاري ونحاولو نفتحو صفحة جديدة
سحر : حاول بروحك ? سلامات
وركبت لقت في الكرسي المجاور ليها باقة ورد كبيرة رفعتها و شافتلها بتعجب
لأول مرة سحر اتجيها هدية من راجل بالرغم من جمالها الخلاب ماكنش يتجرئ اي راجل يبعتلها هدية او حتى يغازلها خوفا من شخصيتها القوية وخوفا من ردة فعلها !
حست بـ شعور غريب وسرعان ماتمالكت روحها وفتحت الروشن ونادت ع عزيز
جاها يجري
سحر : هذي اخر مرة اتدير هالحركات مانيش صاحبتك انا
ولوحت عليه الباقة وانطلقت
رفع عزيز الباقة وابتسم ومشا ع حاله
قربت سحر من الحوش شافت أروى مروحه من المدرسه وقفتلها وركبت أروى معاها
أروى : اخخخخ ع النعيم ?
وحطت وجهها قدام المكيف
سحر : راك تمرضي تباعدي عليه شويه
بعدت أروى عن المكيف ولفتت انتباها وردة لقتها طايحه رفعتها
أروى : محلاها من وين جبتيها
سحر ارتبكت
سحر : قطفتها من شجرة ع الطريق
أروى : شجرة ؟ بس هذي منظفه كويس كأنها من محل
سحر : اياه علينا خلاص قتلك من شجرة يعني من شجرة
نزلت أروى راسها بـ حزن
انتبهت سحر لـ اختها
سحر : اووف خربتي المفاجأة كنت جايبتلك باقة وخديت هالوردة عينة منهم
أروى : محلاككك سحر ?
سحر : شكلها ماعجباتك توا نشوف محل ثاني
أروى : لالاا نبي من هالمحل سحر بالله عليك غدوة جيبها بيش انوريها لصحباتي في اللمة
سحر : حاضر ?
في ليل تجمعو عيلة سحر ويهدرزو
أروى : ماما سحر بتجيبلي باقة ورد غدوة بنوريها لـ صحباتي زي مادارت ايمان ?
عائشة : حق يابنتي
سحر : ااا اي ??♀
عائشة : سلمها بنيتي ربي يزيدك واتجيبيلنا ?
سحر : ان شاء ان شاء الله هي اني بنرقد
حامد : اقعدي هدرزي يا بنتي مازال الوقت
سحر : لالا هذا هو تعبانه ووراي خدمة صبح
حامد : ربي يعاونك ان شاء الله
ابتسمت و ركبت لـ دارها حايره في أمرها
من وين بتجيب نفس الباقة وهي ماتعرف عنوان المحل واختها عندها خبرة في الورد و لو جابتلها من محل ثاني بتعرف انه مش من نفس المحل
فـ قررت…