شر انتقام
#شر_انتقام * الحلقه الثالثة *
#الكاتبةوعدالخضر
طلعت سحر للبلكونة وفتحت تلفيونها واتصلت بأخر مكالمة رد ع طول
عزيز : يازين من يتصل
سحر : شنو ؟
عزيز : كنت نفكر فيك توا وفكرت نكلمك بس بعدين لغيت الفكرة
ضحكت
عزيز : ربي يدومها هالضحكه الحلوه الزي صاحبتها
سحر تحشمت وسكتت
عزيز : علاش سكتي سمعيني صوتك ماصدقتش اتصلتي
تمالكت روحها وتذكرت علاش اتصلت وتكلمت بجدية
سحر : هـ احم اتصلت بنسألك ع اسم المحل الي جبتلي منه الورد
عزيز : لاه لاه في ورد يسأل عن ورد ، والله غدوة توصلك احلى باقة
سحر : لالا مانبيش عطيني الاسم بسس
عزيز : اشش انا حلفت خلاص غدوة توصلك وين ماتبي
سحر : ااا شكرا هي باي
سكرت الخط بسرعة وقلبها بدأ يدق بسرعة
رن تلفيونها مره اخرى ردت بفرح
هاجر : مع من مشغول يالصياعة يالضايعة
خاب أملها
سحر : اوف هذي انتي
هاجر : ومن غيري ها قولي
سحر : حد ، خيرك متصلة ياهاجر في هاليل
هاجر : نسيتيني شن كنت بنقول زعما شن كنت بنقول اكيد حاجه خطيرة زعما شن هي ، سحر علاش كلمتك
سحر : ووك اختصري يابنتي بنرقد ?
هاجر : وووك نسيت قتلك ، اصبريني نتذكر
سحر : ها صبرتك ع قولتك تذكري !??
بعد دقائق
هاجر : ايواا تذكرت شن صار في سيارتك
سحر : ههههههههههه بالله ساعه بيش اتقوليلي هك
هاجر : شن بنديرلك اني كان حياتك مافيهاش مواضيع مهمة
سحر : رجعها ليا اليوم و كان نقولك شن دار اول مره حد يعاملني هك ياهاجر
هاجر : شن دار شوقتيني
وبدت تحكيلها عن كل شي وهي فرحانه
هاجر : بس ديري بالك مش مطمنتله راه
سحر : لالا ماتخافي مابنعطيه وجه عارفتيني انتي
هاجر : اياه من مايعرفك سحر عدوة الرجال ?
سحر : خـزي عـلـيـك بري ارقدي وخليني نرقد
سكرت سحر الخط وخشت لغرفتها ورقدت
في صباح اليوم التالي
ناضت سحر ع صوت تخبيط باب غرفتها
فتحت عيونها بكسل و اذنت للطارق بالدخول
أروى : سحوره تعالي افــطــري
سحر : جايه هي
سكرت أروى الباب ووقفت سحر وهي تتثاوب
جاها مسج رفعت التلفيون وقرت المسج
” أليس الصباح جميل اليوم اتدرين لماذا بسبب وجود كل جمالك فيه ، صباحو حضرة النائبة ”
ابتسمت وحطت التلفيون في مكانه ومشت بإتجاه الحمام ورجعت مره أخرى كتبت بسرعة وارسلت
” كان اتعاود هالحركات تحبسك هالنائبة راه ? ”
وحطت التلفيون بإنزعاج ومشت للحمام وقبل لا توصل استوقفها صوت رنين التلفيون
سحر :
” اياااه علينا ”
رفعت التليفون وردت
سحر : خير بلاك ع الصبح انت مكسد عليا ولا كيف ها
عزيز : الحمدالله بخير شكرا هلبااا ع سؤالك
تحشمت
عزيز : عموما اسف ع المسج كان ازعجك بس مش عارف قلبي قالي لازم نصبح عليك واني راجل حنون ونسمع لـ كلام قلبي الحق
تفاجأت سحر من كلامه
عزيز : الباقة واتيه وين نقدر انسلمها ليك
سحر : لالا مانبيهاش توا نبيها العصر لـ لمة اختي الصغيره
عزيز : شكلها بيبي اختك هذي نحب البيبز
سحر : لا شابة مش بيبز يابيبز انت وبعدين خيرك تسأل وتهدرز بالك تحسابني حبيبتك لا سمح الله
عزيز : علاش لا سمح الله بس قولي بإذن الله
سحر : هيه انت سكر فمك و ماتنسى حدودك معايا
عزيز : اســف ماتنزعجيش مني ، تمام العصر نكلمك باي واسف مره اخرى
وسكر الخط
حطت سحر التلفيون بتأنيب ضمير وخشت الحمام
خش عزيز الحوش وهو ينادي في اخته
مشتله تجري خايفه لا يكون عرف بـ قصتها
رهف : مادرتش حاجه ?
رفع حاجبه بتعجب
عزيز : هاك هالورد ?
رفعت منه الورد وحمدت ربها انه ماعرف شي وجت بتمشي نادها مره اخرى وقفت بتوتر
عزيز : ماسألتيني شن المناسبة شكلي متعود نجيلك ورد و اني مانندري
رهف : ااا لالا عمرك ماجبتلي بس بس هك فرحت ونسيت نسألك
عزيز : نسيتي تسأليني ، وخيرك متوترة و اتمتمي هك
رهف : اااا شي شي بنمشي داري
شدها من وذنها
عزيز : اتقولي شن امدايره من عملة ولا نمرجك طريحة توا ?
رهف : مادرتش شي مادرتش وووه سااالم تعاااال الحقني
عزيز : اتنادي في سالم ياكلبة نخاف منه قالولك
وضربها كف لين جت طايحه ورفعها سالم
سالم مسح ع راس اخته وباسلها راسها
سالم : امشي دارك توا اني نتفاهم معاه
هزت رهف بـ راسها ايجابا واتجهت لغرفتها
تلفت سالم ع عزيز
سالم : خــيـرك انت ع البنت ها
عزيز : امدايرتلها مصيبة
سالم : وشن امدايره ؟
عزيز : مش عارف بس
سالم : لا بس لا بسين تحساب كل الناس زيك ماوراهم غير المصايب بدال ماتتمرجل ع اختك برى اخدم زي التريس
تدخلت امهم محاولة تهدئ الوضع
غيثيه : استهدو بالله ياولادي خلاص
#شر_انتقام * تابع الحلقة الثالثة *
وقف سالم قدام عزيز وشاورله بصبعه بتهديد
سالم : هذي آخر مرة اتمد يدك عليها المره الجايه نقطعهالك وانت عارفني انديرها ياعزيز
عزيز : خليته ليكم الحوش امرحو فيه والله معاد شايفين وجهي مره اخرى
وطلع يسب ويعارك
غيثيه : علاش درت هك ياوليدي بس
سالم : شن درت توا اني ماشفتيه كيف ضربها بدون سبب
غيثيه : اي بس مفروض ماتعاركت معاه خوك عارفه متهور مرات يدير في روحه حاجة
سالم : خليه يدير الي بيديره تعبت منه كل مره ننصح فيه ونفهم فيه ومافيش فايدة
قعمزت الأم و حطت يدها ع راسها
غيثيه : ربي يهديكم ربي يهديكم
تنهد سالم وقعمز جنب امه
سالم : معليش ياامي سامحيني بس رهف مسكينة بدال مايجبر بخاطرها ، يضربها مايجيش هك ضروري انوقفه عند حده
غيثيه : ربي يرضا عليك انت واختك ويهدي خوكم ياارب
سالم : ان شاء الله هي تبي شي
غيثيه : لالا سلامتك
باس ع راسها وطلع
مشا عزيز الاستراحة الكانو مشتركين فيها هو وسراج
لقا سراج غادي مقعمز ع العشب ويدخن
عزيز : شن مقعدك اهني امال ماعندك خدمة اليوم
سراج : دوامي العصر و جيت نكسد اهني من دوشة العيلة ، وانت شن جابك
قعمز جنبه
وخدا منه سيجارة وبدأ يدخن
عزيز : نفس الجو
وكملو هدرزتهم
وقت العصر
رن تليفون عزيز رفعه وشاف المتصل
عزيز : اووووف نسيتها الزح
سراج : من هيا ؟
عزيز : اصبر نرد ونحكيلك
رد
سحر : وتيتلي الباقة ؟
عزيز : أي اي نص ساعه تكون عندك وين تبي نتلاقو
سحر : في سوق …
عزيز : تم تم
وسكر الخط
سراج : مع من تحكي انت
عزيز : هذيك البنت سحر صاحبة السيارة
سراج : ايــاه امال مازال ماتفكيت من سريبها
عزيز : فتحت سريب جديد
سراج : حب ولا ؟
عزيز : تعجبني والله تفهم ع الطاير ، هي بنطلع نتلاقو بعدين
شاف سراج لساعته
سراج : هي طالع حتى ني وقت عليا
وكل واحد مشا في طريقه