رواية ولد راجل امي
#ولد_راجل_امى
بقلم زهور جمال الدين?
?الحلقه الثامنه ?
–
فى حوش عمران ….
واقف عمران مع سالم جاره ….
-سالم / هوا بعتلك ليه اسبوعين مفروض مشيت معاه وكسرتش بخاطره
-عمران ايشالى بايديه ويعارك / نمشى معاه بعد سائل ومتكلم ومكمل اموره ..حاسبنى رجل كرسى امالا
-سالم / ياعمران عيب عليك .. هوا قالى قول لبوى اخت صاحبي وكلمته عليها وعطاهالى .. تى ماهو الناس تنشد وتشاور قبل ماتقول لاهلها ولا
-عمران / لا يقولى انا عالبنت نمشى نكلمهم انا وبعتالى ساهل
-سالم / يعنى تمشى بلا نشدة ..افرض ايردوك
-عمران / ايييييه علينا عاد ..كلمتك ديما واتيه …انا نشرق وانت تغرب ..
-سالم / باهى توة بتلحقه ولا كيف بيصير
-عمران / قالو البنت خارج طرابلس … توة لابدة راهو مشى من بكرى …زايد الكلام
-سالم / انا قلتلك نلحقوه .. هوا مشى من بكرى ..كلمنى عبدالكريم راجل خالته قالى بنمشو العصر
-عمران حمق ووجهه تغير/ صار رافع عبدالكريم معاه .. امالا والله مانى خاشله فى مخيط
-سالم / تى ماهو لما مشى يخطب فالبنيه مشى بروحه خاف يرفع حد وتتغشش انت …بالرغم كبر بيك وبعتلك
-عمران / واهو توة رفع راجل خالته ….وبعتالى ليش مايجينيش هوا …تى والله كانا جانى رانى مشيت معاه
-سالم / حلفك باطل يا عمران ..والولد ماجاش عارفك بترده…وبالنسبه لراجل خالته رفعه لان بو البنت شرط عليه يجيب معاه حد من اهله
هما يتكلمو … وانفتح باب حوش خيريه …طلع عبدالجبار يجرى وهوا حامق ووجهه اسود
-عبدالجبار يكلم فى بوه/ وينه مرتك
-عمران/ ضم فمك وتكلم بالشوى خلى نفهم خيرك ومن مرتى
-عبدالجبار/ مرتك اللى ماتتحشمش وماتخافش ربي
__________________________________________
–
فى حوش ساسى
لبست صفيه جلابيه بيضا …ودارت مكياج خفيف..
وفالمربوعه
الشيخ يقرا فى فاتحتها عالعريس الجديد اللى ماشافتاش نهائيا لعند الان .. مقعمزين ساسى وراجل اخته نبيله وولده حفيظ وعلاء … ومنادى صغار عمه الزوز وثلاثه من جيرانه
ونادر جايب معاه جارهم مصطفى وعبدالكريم راجل خالته
والشيخ مقعمز فالوسط
-ساسى/ غير اشرب الشاهى يا شيخ
-الشيخ / والله مستعجل عندى فاتحه ثانيه
-ساسى/ تى مد الحلويات مع الشاهى يا حفيظ سقد
-حفيظ / باهى يا بوى
-نادر اتكى على علاء/ قتلك …
-علاء انتبه/ نعم
-نادر/ قبل مانقرا الفاتحه نبى نشوف اختك ..عندى ليها كلام .. قلتلك من اول امس وانت مادرت شى
-علاء/ بوى واعر فالمواضيع اهيا ..قالى لا مقابله ولا سو
-نادر/ وانا منقدرش نقرا فاتحه الا بعد مانقوللها اللى عندى
-علاء/ باهى نوض وراى …
وقف علاء/ نستادنكم العريس يبي الحمام حشاكم
– اللى فالمربوعه / ادنك معاك
-الشيخ / قبل ماتطلعو اعطونى بطايقكم انت ووكيلها والشهود خلى نعبى البيانات قبل …
-نادر مدله بطاقته / اهيا بطاقتى..ووكيلى عمى عبدالكريم
-الشيخ / باهى
ومد ساسى بطاقته..والشهود صالح جارهم .. وفرج راجل عمتهم
نادر وعلاء طالعين ….
-ساسى/ ياعلاء كلم سعيد عالارضى قوله هيا وينك
-علاء/ باهى تو نكلمه
وطلع
-فرج راجل نبيله يوشوش لى ساسى/ انتو سألتو عليه الولد .. لا شايف معاه بوه ولا خوته
-ساسى/ والله شن بنقولك .. علاء ولدى صاحبه .. وقاللى بوه مطلق امه من زمان ومتفارق معاهم
-فرج / انت سألت عليه شن اصله شن فصله بوه منو وين يخدم ..منو عمامه ..كيف تعطى بنتك منغير ماتنشد
-ساسى/ خوتها سألو ساد.. وعلاء يعرفه من زمان ويعرف عليه كل كبيرة وصغيرة …وشن مزال بنقول انا بعد خوتها صحابه وعارفينه
-فرج/ توة معقولة …
-قص عليه ساسى/ ياراجل بعد قالت باهى والامور مشت .. تبينى نق وانتفتى.. تى هدا سابع راجل.. الاولين نوافق عليهم ويجو خوتها ايقضو كلمتى…معقولة توة نرفض وانقول لا بعد الكل موافق والخاطر زاهى
-فرج / انا ماقلتلكش ارفض…لكن مش تعطيها لاى حد وخلاص
-ساسى/ .. تى والله كان جانى حتى حد مش ليبي راهو عطيتها ..شن بندير بيها..تمشى ادير عويله وادير سيور
-فرج / انا ماقلتلك شدها ولا عندك مادير بيها …لكن قصدى نشدتو عليه ولا لا بس
-ساسى/ نشدو عليه خوتها ساد
-فرج / باهى كل شى بالبركه
حس ان النقاش زايد .. وبوها المهم يعطيها وخلاص
__________________________________________
–
فى حوش عمران
قدام الحوش واقفين عمران وعبدالجبار وسالم جارهم
طلعت خيريه من قدام الحوش لابسه رديه وراده غطاه على راسها
-خيريه / يا وليدى تعالة فكنا من المشاكل
-تلفتلها عبدالجبار/ خشى يااام .. خشى
-سالم / غير صلو عالنبى يا جماعه الخير.. خيركم شن فى
-عبدالجبار/ تى روح من قدامى
-عمران / بسمالله خيرك ..خيرها امك .. شن فى.. شن صاير
-عبدالجبار / بدرية وينها
-عمران / خيرها بدريه ..اهيا لداخل
-عبدالجبار دف الباب وخش/ بدريه … بدريه
خش وراه عمران … وصلو للصالة
-عبدالجبار يعيط / بدرية …وينك اطلعى ياسحارة
طلعت تجرى من المطبخ / خير بلاك تصيح
-مد يده فيها حجاب / هدا شنو
-شافاته انخلعت / شنهوا هدا
-عبدالجبار/ قولى انتى يا مسخه..شنهوا هدا وامتى حطيتيه
-عمران / غير فهونى شن فى وشن صاير ..
-عبدالجبار/ مرتك دايرتلى حجاب بيش تفرق بينى وبين بنتها …
-بدريه / حاشانى مالحجابات والسحورات .. برة شوف امك وخواتك اللى يدورو من شيخ لشيخ بالك دايرينهولك
-هجم عليها / امى متع سحورات يا وقحة ياللى متربيتيش
-عمران ايحز/ تحشم يا ولد وحر لتالى
خشو احمد وخيريه يجرو
-احمد مشى لعبدالجبار جبده/ خيرك شن في
-خيريه / تحشم يا ولد لمدت علينا الجيران
-عبدالجبار شاد الحجاب ويعيط/ عقابها نلقى كتيبه تحت سريري…توة انا فهمت ليش بنتها طلبت الطلاق واصرت عليه …عاميتها ياااام ..خرابت بيوت
-بدريه مشت لخيريه/ والله يا وخيتى ما درتله حاجه ولا ليا علاقه بيه الحجاب هدا
-عبدالجبار يعيط/ امالا من حطهولى امى وخواتى …هادو فعايلك انتى يا حيوانه
-بدريه / ضم فمك …حلفت لامك توة قدامكم ولا ..والله مادخلى فيه الحجاب اللى فى يدك هدا
-احمد / تحلفى عالقران
-بدريه انخلعت/ شفت ولادك هالمجرمه ولا .. ملمدين بعضهم ويحلفو فيا عالقران …
وتعيط/ ياحليلى شن الماخدة الحرفه …
-عبدالجبار هاجم عليها واحمد شاده / احنا مجرمه يا حقيرة يلى خربيتلى بيتى
-بدريه / لااال هوا عامر ..غير انا خربته .. تى برة دور وين تلعب
-عبدالجبار يدف فى احمد / تى حول خلينى نقتلها ونفتكو منها فى هالليله
-بدري تعطى فيه بواصى / ووووك عليا ياناس تعالولى
…ياناس صغار راجلى بيقتلونى
-عمران / ضمى فمك يا مراة فضحتينى
-بدريه / صوتك يعلى غير عليا انا ..ماك تشوف فولادك ردهم عليا ولزهم
-عمران تلفت لى خيريه / هادى اخرتها ياخيريه .. هدا عقابها جايه انتى ولادك بتقتلو المراة
وعبدالجبار يبي يهجم عليها زايد ناقص.. لمتهم امهم وروحت بيهم لحوشها
-خيريه / ياوليدى دعوتها تقلبها كانها حق داراته
-عبدالجبار/ وشن الفايدة ياام بعد حوشى خرب
-احمد / البنت قاعدة فى حوش بوها ..كان تبيها برة ردها
…ووريها عمايل امها اللى كانو السبب فطلاقها
-رحمه/ ياوخيينى ان بعض الضن اثم .. من قال هيا دايراته بالك حد ثانى
-احمد / تى منو بيدره غيرها …حتى انتى قداش تخرفى يا رحمه
-عبدالجبار قام راسه / تمشى معاى ياام لحوش صفيه
-خيريه سخفها ولدها/ الحاجه اللى تسعدك يا وليدى نمشى معاك فيها انشالله فى اخر الدنيا
-رحمه قعمزت جنبه / حتى انا نمشى معاكم يا وخى
…ومايصير خاطرك الا طيب
________________________________________
–
فى حوش ساسى …
علاء ونادر مشو للسقيفه لان نادر يبي يكلم صفيه …خش علاء ينادى عليها
-علاء/ صفيه … صفيه وينك
-طلعت صفيه مواطيه راسها / ايووة
-علاء/ البسى حجابك نادر يبي يدوى معاك
-صفيه تحشمت / باهى
خشت صفيه لبست جلابيتها فوق الجبه المطرزة .. ولبست وشاح ونزلاته هلبا على وجهها .. وطلعت لعلاء قدام الدار … اللى رفعها للممر اللى قدام الصالة ..
-علاء/ بري اسمعى نادر شن يبي يقولك خلى نمشى نكلم خالك سعيد نستعجله
-صفيه / باهى تعالة معاى وبعتالى كلمه
-علاء/ لا بري بروحك …اسمعى منه وشوفيه شن يبي يقول ..
-واطت راسها/ باهى
خشت للصالة …هما حاطين فيها صالون على جنب يبان نادر مقعمز فنهايته ….
-منغيرمتقيم راسها / السلام عليكم
-نادر يشبحلها عجباته / وعليكم السلام …
قعدت واقفه
-نادر/ قعمزى …
-مشت للجهه الثانيه من الصالون وقعمزت / باهى
-نادر / انا اسمى نادر .. نخدم على سيارة كبيرة ..نكرى فيها لجميع مناطق ليبيا
-مواطيه راسها / وانا صفيه
-نادر يشبحلها/ ماشاءالله فيما خلق..ربي كملك بالزين والعقل
صفيه خشت فى بعضها ..ومقدرتش اتقيم راسها
-نادر/ اسمعى يابنت الناس .. عندى كلمتين بنقولهملك قبل مانقرو الفاتحه وتبدى حلالى
صفيه بدو ايديها يرعشو .. ثقته بنفسه.. وصراحته فالحديث عجبتها ….
-نادر/ بالتاكيد حكالك علاء ان امى مريضه .. وكانت خالتى تعانى فيها لما نغيب انا عالحوش
صفيه قعدت ساكته
-نادر/ سمعينى صوتك
-صفيه صوتها هارب / اييييه قاالى
-نادر/ لكن هوا مش زابط مرض امى شنهوا …ولازم انا نحكيلك قبل ماتبدى كنتها ومايعجبوكش تصرفاتها وتقولى حصلت
قامت راسها قعدت تشبحله حست ان كلامه منطقى
-نادر/ ماهو اللى اوله شرط اخره سلامه .. وانا منبيش تندمى بعد يصير النصيب
-صفيه / خيرك خوفتنى وانشاءالله مانندمش .. لاباس عليها الوالدة شنو مرضها
-نادر/ بعد جابتنى جاها مرض اسمه داء الكلاب ..هوا فايروس خداته من المستشفى .. ولكن شفت منه …
-صفيه/ باهى الحمدلله
-نادر/ لكن بوى تخلى عليها فى عز مرضها وطلقها ..وخلانى عندها .. جتها حالة نفسيه ماتبيش تطلع ولا تبى تشوف حد .. كلتها الوحدة شادتنى انا بس فى دار فى حوش جدى
-سخفتها امه / لا حول ولا قوة الا بالله
-نادر/ لكن زادت حالتها بعد مازارها بوى من زوجته الجديدة وصغاره منها ..كانو يبو يشوفوها ويشقو عليها
-صفيه / لما شافاته اتزوج سائت حالتها قصدك
-نادر ?/ لما شافاته متهنى وملوحنا زادت حالتها النفسيه سوء..بالرغم ان زوجته بارك الله فيها كان قصدها بالخير..لكن الحركه ولت على امى بالشر
-صفيه / باهى وتوة كيف حالتها
-نادر/ تصعب عالكافر خاصه بعد وفاة خالتى .. مرات نخش للدار نلقاها تمزق فحوايجها اللى لابستهم
-صفيه / معقولة للدرجه هادى
-نادر/ واكثر…مانبيش نكدب عليك ونبى نحطك فالصورة من اول يوم .. ومن لما جيت لبوك وانا نكلم فى علاء انى نبى نحكى معاك ونفهمك ضروفى وهوا يقولى بوى مايبيش
-صفيه بحزن/ انت اديرلها فى كل شى
-نادر/ ونوكل فيها ونشرب
-صفيه / من يدوشلها
-نادر?/ انا ندوشلها ونغيرلها فحوايجها
-صفيه / ربي يعطيك صحيحتك
-نادر/ نبيك تفكرى كووويس قبل مانقرو الفاتحه راهو معانات امى مش حاجه ساهلة .. وفغيابى اللى حكيتهولك كله بديريه انتى ..زى كنت نخلى فيها لخالتى..وتوة خالتى توفت ..يعنى انتى اللى بتهنينى فغيابى
-صفيه / باهى عندى سؤالين
-نادر يشبحلها باعجاب/ شنهما
-صفيه / الاول ليش مخديتش من بنات خالتك
-نادر/ هما كلهم متزوجات واكبرمنى.. وبتقوليلى خيره بناتهم نقولك مستحيل يستحملو امى
-صفيه / سؤالى الثانى قالولك انى مطلقه صح
-نادر/ قالى علاء من الاول
-صفيه / وليش توافق تاخد مطلقه بالرغم عندك مليون فرصه تاخد بنت
-نادر/ لانى نحب علاء.. وتمنيت اناسبه من زمان
-صفيه / وموافق عليا وعلى وضعى
-نادر/ ايه موافق… وانتى شنو ..موافقه عليا وعلى وضعى
-ابتسمت وواطت/ موافقه
_______________________________________
–
فى المربوعه الشيخ يكتب فالبيانات ….اسم الشاب نادر عمران عبدالسلام واسم البنت صفيه ساسى عبدالحفيظ
وحفيظ خوها جنب الشيخ ويتفرج عليه يكتب …
خشو نادر وعلاء لقو الشيخ كاتب ومساوى كل شى …
جى علاء للشيخ / شنو جهزت كل شى
-الشيخ / كل شى جاهز .. خلى نقرو توة الفاتحه لانى مستعجل
-حفيظ يشبح لعلاء ويضحك/ مطيحها اختك فى اسم عمران
-علاء مبتسم/ ايه عارفه ..حتى هدا اسمه نادر عمران
-الشيخ / مفهمتش
-علاء/ لا لا شى يا شيخ …كمل امورك …
نادر داير راجل خالته عبدالكريم الوكيل ..
-عبدالكريم / شنو نبدو
-ساسى/ خال البنيه قريب يوصل ..
-الشيخ / انا والله مانقدر نتأخر اكثر من هكى
-علاء/ كلمته عالارضى ينادى و ميردش
-ساسى/ امالا توكلو .. وانشالله بالبركه وخالها مش حيزعل نغرفه …
وبالفعل قرو الفاتحه … وبدت صفيه زوجه نادر … روح الشيخ..وسقو العشى مرت بوها وعمتها وبعض من قريباتهم
_______________________________________
–
لما يسقو فالعشى …
-منيرة مرت ولد عمهم / اول مرة نسمع ماخدة مافيهاش نساوين
-نعيمه مرت ساسى/ الولد امه مريضه وعندها ضروف .. وخالته متوفيه …واهل بوه مش اوى هوا وياهم خاطر امه مطلقه
-سعاد جارتهم / حاق قالو عزرى
-نبيله ?/ ايه عزرى …
-منيرة / ومنين يعرفها
-نعيمه / حاشاها بنيتى ..هوا صاحب علاء خوها ويخدم معاه فى الكري
-سالمه جارتهم / حتى هوا عنده طانطه ويكرى
-نبيله / يا نعيمه سقدى عطلنا بالعشى تو يخش ساسى ويبدا يعارك
-نعيمه / صدقتى والله …سقدو يا وخياتى فيسع
.. تعشو الناس كلهم وركبت صفيه مع نادر فالسيارة .. ووراهم سيارة خوها علاء وحفيظ ومعاهم عمتهم نبيله .. وسيارة فيها راجل خالته …ونادر موصيهم يوصلو منغير كلاكسات خايف يخلع امه
_________________________________________
–
وصلو العرسان لحوشهم ….
خوتها وعمتها من قدام الباب دورو وروحو …
خشت صفيه من الباب وقفت فالسقيفه وجنبها شنطه صغيرة …
-نادر مبتسم/ تفضلى يا عروس
وقام الشنطه ودخلها للصالة
-صفيه مبتسمه / فضل عليك ويرحم ولديك …
خشت للصالة وقفت ….الزوز متحشمين من بعضهم ..لكن بالتاكيد هوا اجرأ
-نادر/ حولى نقابك و عبايتك .. نورتى حوشك
-قامت نقابه وحولاته / الله اينور عليك
-نادر / خلى نخش لامى نشوفها …نفيقها سلمى عليها
-صفيه / قصدك هدا كله وانت مخليها بروحها
-نادر بهدوء/ عندها دوا نعطيلها فيه ترقد ست ساعات
-صفيه / وليش تعطيلها فيه
-نادر/ الدكتور وصفهولها ..الدوا هدا يريحلها فى اعصابها
-صفيه ابتسمت / ربي يشفيها
-نادر / شوى بس نشوفها ونجيك
هما فى حوش عربي مسقف..كل دياره تفتح عالصاله ..مشى جهه اليمين لدار امه …فتح الباب وخش
وانخلعت صفيه بدت تسمع فيه يعيط …لحقاته تجرى فتحت الباب وخشت .. تلقاه ايعيط زى العيل
-نادر/ سامحينى يمى خليتك بروحك..عمرى مادرتها..مشيت
نجيب فى اللى بتعاونى فيك
-صفيه مخلوعه / خيرها امك
-نادر يبكى/ تعالى
….
خشت صفيه تلاقى رجلين العزوز كلهم مجرحات .. شورها فاقت بعد ماطلع ولدها …وترا وين لاقيا لاميتا واخدتها ومجرحه بيها رجليها ….
مشت صفيه تجرى للعزوز تشبح فى رجليها
-صفيه / رجلها مضرورة
-نادر يبكى / لا جروح خارجيه
ويبكى/ ياريتنى ماخليتك يا مينتى ….
والعزوز راقدة فى سبات عميق
-صفيه / عندكم مطهر
-نادر / فى الحمام
-صفيه / اهو تو نجيبه ….
وطلعت مشت تجرى لباب على جهه واضح انه الحمام …
فتحاته لقت صيدليه معلقه على جنب …فتحتها طلعت منها مطهر وقطن …
ورجعت للدار لقت نادر واخد فوطه ويمسح فالجروح
-صفيه / لا غلط هكى …الجروح لازم يمتسحو بشاش او قطن معقم
نادر قعد يشبحلها
-صفيه / انا قاريه تمريض ماتهزاش عليا …خود القطن وحطه قى المطهر وامسح الجروح
خدى نادر القطن وحطه فالمطهر وبدى يمسح فى الجروح متع رجليها …
-صفيه مبتسمه / ماتخافش ..ثلاثه ايام ويلتئمو ..جروح بسيطه
نادر يمسح وساكت ….كملو ..وخدو الشاش ..ولفو رجليها الزوز بيه باعتبار انهم ايعقمو فالجروح
-صفيه/ الصبح انحولو الشاش بيش الجروح يضربهم الهوا
_______________________________________
–
بعد ساعه ….
نادر متكى على فراش وواخد امه فى حضنه وهيا تنادى نادر يا نادر .. وهوا دموعه نازلات وخلاص …
-تلفت لصفيه / نوضى غيري حوايجك …وسامحينى فى تعبك
-صفيه ?/ لا لا عادى ما بيناتنا تعب ….
وقفت طلعت من الغرفه وردت الباب … مشت للشنطه فتحتها …ولبست جلابيه خفيفه.. وقامت شعرها ديل حصان … وخشت للحمام غسلت وجهها وطلعت
رجعت للدار اللى فيها نادر وامه …
لما خشت نادر قعد يشبحلها وتفاجأ فالجمال …
ومنغير مايشعر بنفسه …مد يده / تعالى فى جنبى
-صفيه تحشمت / باهى …
مشت للفراش اللى مقعمز عليه هوا وقعمزت جنبه..حط يده على كتافها …
وتلفت لامه / يااام …يااام هادى صفيه مرتى
-امه راقدة على يده فتحت عيونها / صوفيه
-نادر/ لا ياام .. صفييييه
-تلفت لى صفيه / هادى عمتك امباركه امى
-صفيه مبتسمه / ربي يباركلها فى صحتها وفى وليدها …
اتكى نادر عالفراش اللى وراه وهوا مقعمز ..وسحب صفيه تكاها على صدره ..وحط يده على شعرها
-نادر/ لو تبى الحن انحن عليك لين ربي ياخد روحى … ولو تبى الاحترام نحطك فوق راسى ..ولو تبى الدلال نديرك اميرة .. لكن طلبى الوحيد امى .. حتى اهملتينى مندورش ..
لكن امى مانتسامحش فى مثقال درة من زعلها
-صفيه سحبت نفسها من صدره تحشمت / وانت لو تبى الحن تلقى عندى قلب كبير يحن عليك زى حن الام لولدها ولو تبى الاحترام انديرك سيدى وتاج راسى .. ولو تبى الدلال نكون ليك الفرس المطيعه اللى ادلل فى فارسها …
-نادر/ بنت اجواد وماعندى مانقول فيك .. وكانك تبى الصراحة والحق عجبتينى من لما شفتك فى حوش بوك
-صفيه / ومزال فعلى بيعجبك اكثر ..
-نادر/ المراة عشرة وطبع .. وانا والله متاكد من عشرتك وطبعك
-صفيه / لا ح نتصنع ولا ح نقولك امك وامك .. ح نخلى اصلى ايبان فى خدمتى وتصرفاتى
-حط يده على خدها / اقسم بالله انى سعيد بيك فوق ماتتصورى ….
وشبحلها باعجاب/ يا حلالى
-عمتك امباركه مغمضه عيونها / صوفيه..صوفيه
-نادر / ياااام .. اسمها صفيه
بدت العزوز تشخر
-نادر/ نمشو لدارنا
-صفيه مواطيه راسها / باهى
بدى انزل فى امه لمكانها بيحط راسها عالمخدة
-امباركه / لااا ..اقعد يا نادر…نادر اوليدى
-ردها على يده / اهو معاك انا ياام
-امباركه / باهى
تلفت لصفيه/ بري ارقدى فمكانك استريحى
-صفيه / لا خلينى هنايا معاكم
-نادر/ سامحينى من اول ليله رقدناك هنايا
-صفيه / اسكت معش تقول هكى احنا عويلة وحدة بدينا خلاص اللى بيكم بيا
نادر يشبحلها وهيا تساوى فالفراش بيش ترقد …فرحان بيها هلبا
وقعدو راقدين للصبح جنب عمتك امباركه …نادر حاط امه على يده وراقد وهيا راقدة على فراش مقابلهم
_________________________________________
–
ثانى يوم الساعه 8 الصبح ..
سعيد وحفيظ وعلاء واقفين قدام الحوش..وسعيد يبان مضروب جهه عينه
-حفيظ/ وخيرك ماكلمتناش يا خالى راهو مشينا ادبناهم
-سعيد / لااا كيف عاد …عرفها فاتحه صفيه …نفزعكم تخلو اختكم وتجونى
-علاء/ باهى وكيف درت
-سعيد/ تى والله كان مافكوه الناس من بين ايديا رانى قتلته وخليته عبرة
-حفيظ يضرب فى ايديه فى بعضهم / اخخخخ غير ياريتك حضرتنى يا خالى
-علاء/ انت شديتهم معاه الفلوس
-سعيد/ لا انا ماشديتهمش معاه ..الكاميرا صوراته وهوا خاش للمكتب وياخد فيهم …ناديته فتحتله الفيديو بدى يحل فى فمه ..طول مدت يدى وخنقته
-حفيظ/ وتوة محبوس ولا وين
-سعيد / هدا اللى عطلنى …رفعته للمركز سلمته …ماعطوه كفوف على وجهه.. ماحققو معاه لين هوا هداكه ..وبعتالى بدو ياخدو فى اقوالى واقوال العمال …. ورجعنا للمكتب وغيرنا الاقفال …المهم غنايه..وبنت اختى مبروك عليها وربي يهنيها سوا حضرت والا لا
طلعت نعيمه من الباب / برو …بوك قالى لا ماتمشيش
-حفيظ/ علاش …مش قال عادى امشى انتى وعمتى نبيله
-نعيمه / ماهو حتى زمان فى ماخدتها الاولة قال برو يوم الصباح وبعتالى قال لا ماتمشوش
-علاء/ باهى حصل خير …
وتلفت لسعيد / اركب هى
-حفيظ/ ياراجل خلى نمشى معاكم نسايركم
-علاء/ لا لا خليك فالحوش على جية حد …احنا فيسع نحطولها الشناطى والماعين ونطلعو
-حفيظ/ باهى طريق السلامه
ركبو سعيد وعلاء …حاطين شناطى صفيه ..وبعض من الماعين واخدتهملها مرت بوها وعمتها وتسقدو مشولها بيش يعطوهملها …
سيارة علاء مشت ودار من الكوربه ….ووقفت وراه سياره عبدالجبار سارى بكرى وجايهم هوا وامه واخته ….
____________________________________
–
فى حوش نادر
صفيه فايقه من الساعه 7 ونص .. ناضت غسلت وجهها وصلت … وخشت للمطبخ دارت الفطور .. ومعاه شاهى وحطتهم فى صفرة ..وخلتهم على رخامه المطبخ
الساعه 8 وربع …
خشت للدار لقت نادر قاعد حاط امه على يده وراقد هوا وياها …
-صفيه بصوت واطى/ نااادر… نادر
فتح عيونه ..فاللحظات الاولى مش مستوعب اللى قدامه منهيا ??
-نادر/ صباح النور
-صفيه / نوض اغسل وجهك وصلى.. الفطور واتى
-نادر/ طبختى دحى
-صفيه / لا
-نادر/ اطبخى دحيتين لامى تحب تفطر بيه
-صفيه مبتسمه / تغيرلها فحوايجها قبل .. ولا تفطر فيها قبل
-نادر/ نغيرلها قبل .. وبعتالى نفطرها ..
وشبح لرجليها ملفوفات بشاش …
تلفتلها باسها على خدها / سامحينى يا مينتى …
وحطلها راسها بالشوى … ووقف مشى للحمام ….
غسل وجهه .. وطلع صلى …ويسمع فالباب يطقطق …
-طلعت صفيه من المطبخ / زعما شكون
-نادر/ بالك خوك علاء… تو نفتح كانا لقيته هوا تو ندخله
.
.
طلع نادر للباب فتحه …يلاقى علاء سلم عليه …
-علاء/ صباح الخير يا عريس
-نادر / صباح الخيرات يا علاء …تفضل مرحبتين بيك
-علاء/ خلى انزل الشناطى من السيارة …
انفتح باب سيارة علاء طلع سعيد مستغرب / نادر
-نادر شبحله / سعيد… اهلا بيك …
ومشاله سلم عليه .. وسعيد يسلم ووجهه اسود …
-علاء/ انتو تعرفو بعضكم
-نادر/ احنا معرفه قديمه من زمان ….
وتلفت لسعيد/ شن حالك يا سعيد وشن جو الخدمه
-سعيد مش قادر يبلع ريقته / هوا هدا اللى خدى صفيه
-علاء/ ايه هوا هدا… مش قلتلك صاحبي واسمه نادر
-سعيد/ الله يرزيك فى عمرك..وعلاش ماشاورتنيش يا حمار
-علاء/ تى خيرك تعيط يا راجل..اهو قلتلك وقلتلى انشاءالله ربي يجيبهالها زينه
-سعيد / لكن ماقلتليش بتعطيها لى نادر ولد عمران
ويخبط فى ايديه فى بعضهم / لا حول ولا قوة الا بالله
-نادر/ مفهمتش خيرك حامق يا سعيد وبعتالى انت شن تقرب للعيلة عندى
-علاء/ هدا خالها …
-نادر/ سبحان الله شوف الدنيا كيف صغيرة … باهى وصفيه بنت اختك اللى واخدة بوى ولا اختك اللى مسافرة برة
-علاء مصدوم / غير بالشوى بيش نفهم …بنت اخته اللى واخدة بوك ولا اللى مسافرة برة !!!!…مفهمتش منهوا بوك
-سعيد يعيط / هدا ولد عمران نسيبى … هدا خو عبدالجبار فهمت …
-علاء/ لا حول ولا قوة الا بالله
-نادر/ وشن علاقه علاء بى عبدالجبار .. ومنين يعرفه
-سعيد قريب يهبل / عبدالجبار كان واخد صفيه اخت علاء وطلقها قبل عام
-نادر/ اههههه… صفيه كانت واخدة عبدالجبار خوى
-علاء مشى لى نادر وشده من حوايجه / علاش ماقلتليش انك ولد عمران وخو عبدالجبار
-نادر بهدوء وبصدمه / قصدك اختك اللى تزوجتها انا امس وجبتها لحوشى كانت واخدة عبدالجبار خوى
وانهارو الثلاثه بفعل الصدمه …..وقعدو يتناقشو فى نقاش حاد بينهم الثلاثه
-نادر/ مستحيل تقعدلى فى حوش ..كانت عند خوى وتوة بناخدها انا …وين صارت هادى
-علاء/ توة والله مانى مروح بيها …نشهد بالله بوى ما يطيح الا مشلول ولا مجلوط
-سعيد / المفروض قلتو …المفروض شاورتو …مش من روسكم اديرو عمله زى هادى
وتلفت لى علاء/ كيف ماكتشفتوش ختى تشابه الاسماء بين نادر وعبدالجبار
-علاء/ لا والله خوى حفيظ لاحضه .. وقالى مطيحها اختك فى اسم عمران وضحكنا …
وتلفت لنادر/ انت كنت حاط اسم جدك مش لقبكم فى كتيبك
وزادو فالنقاش وتعالت اصواتهم …نادريقوللهم منقدرش حتى نشبحلها بعد ماعرفت انها كانت مرت خوى .. وعلاء يقوله خليها تقعد عالاقل فترة وبعتالى نجى ناخدها …
وافق نادر ….بس تكون الزواجه فترة معينه
وولعو سيارتهم وروحو ….
________________________________________
دخل نادر الشناطى للحوش…..
وخش للمطبخ حامق ملقاش صفيه … مشى لدار امه فتح الباب … لقى صفيه تمشط لامه فى شعرها …وامه مقعمزة وهاديه بين يديها
-نادر حامق/ انتى شن اديري
-صفيه مبتسمه وعايشه الدور/ لما تأخرت برة قلت اكيدة حد من جماعتك ..فخشيت لدار امك درت محاولة تتقبلنى والا لا
-عمتك امباركه تشبح لولدها / صوفيه..
-نادر/ تعالى نبيك …
-صفيه لاحضاته مش على بعضه / باهى
وقفت صفيه شدتها العزوز ….
نزلت صفيه وبحركه حنونه / شوووية بس نجيبلك فطورك ونجى
-امباركه / باهى …
طلع نادر … وطلعت وراه صفيه ….
تلفتلها وهوا حامق
-صفيه سعيدة/ تعرف امك الباين تفهم …لما قلتلها هادى صفيه مرتى حسيتها فهماتك .. وزبطت انى مرتك وكنتها
-نادر/ خيرك ماقلتيليش
-صفيه / شن منقولك
-نادر/ انك كنتى مرت عبدالجبار خوى …
صفيه قريب جاها شلل رباعى ودماغها ستك …لكن استوعبت الجملة وزبطت مدى القرابه
-ضربت خدودها / انت شن تقول يا غبارتى
.
.
_______________________________________
تمت … ويتبع
الحلقه الجايه نشوفو المواجهه بين صفيه ونادر .. بيخليها ولا بيطلقها ..نعرفو الحلقه الجايه ….
وعبدالجبار اللى وصل لحوش ساسى زعما شن بيصير بينهم
على فكرة راهو هادى حلقتين فى حلقه .. كاتبه ضعف عدظ الصفحات اللى نكتب فيهم للحلقه فالمفكرة …مابيتش ندير الحيلة ونقسمهم على حلقتين …خليتهم حلقه وحدة ..يعنى عوضتكم 2فى 1
المهم نحبكم ❤?